ᐳᔾᔫᑦ ᑯᓱᒐᖅ ᐅᖃᐅᓯᖃᖅᑐᖅ ᐊᑖᑕᒋᓚᐅᖅᑕᖓᑕ ᑕᐅᑐᒐᕆᓚᐅᖅᑕᖓᓂᒃ ᐱᒻᒪᕆᐅᓂᖓᑕ ᐃᓕᓐᓂᐊᕐᓂᖃᕐᓂᖅ ᐊᑑᑎᖃᕐᓂᖓᓄᑦ ᓄᓇᕗᒻᒥᑦ ᐱᕈᖅᐸᓪᓕᐊᓂᖓᓄᑦ ᐊᒻᒪᓗ ᐱᕙᓪᓕᐊᓗᓂ - ᐊᒻᒪᓗ ᐃᓄᖏᑦ ᓄᓇᕗᒻᒦᑦᑐᑦ.
ᐳᔾᔫᑦ ᐊᑖᑕᖓ, ᔫᓯ ᑯᓱᒐᖅ, ᐊᖓᔪᖅᖄᖑᓚᐅᖅᑐᖅ ᓄᓇᕗᑦ ᑐᙵᕕᒃᑯᓐᓄᑦ ᓄᓇᕗᙳᕐᒪᑦ 1999-ᒥᑦ. ᔫᓯ ᐊᒃᓱᕈᖅᖢᓂ ᑭᒡᒐᖅᑐᐃᖃᑦᑕᓚᐅᖅᑐᖅ ᐃᓄᐃᑦ ᐱᔪᖕᓇᐅᑎᖏᓐᓄᑦ ᐃᓅᓯᓗᒃᑖᕐᓚᖓᓂᑦ. ᐃᓅᔪᖕᓃᓚᐅᖅᑐᖅ ᑕᖅᖀᓐᓇᕐᔪᐊᖅ 2011-ᒥᑦ.
ᓄᓇᕗᑕᖃᓚᐅᖏᑎᓪᓗᒍ ᓱᓕ 1999-ᒥᑦ, ᐳᔾᔫᑦ, 44-ᓂᒃ ᐅᑭᐅᖃᓕᖅᑐᖅ, ᐅᖃᓚᐅᖅᑐᖅ ᐊᑖᑕᖓᑕ ᐅᖃᐅᑎᓚᐅᖅᑕᖓ ᐱᒻᒪᕆᐅᒋᔭᐅᓂᖓ ᐃᓄᖕᓄᑦ ᓄᓇᕗᑖᕐᓂᖅ, ᐊᒻᒪᓗ ᐊᖏᔫᓂᐊᕐᓂᖓ ᐱᓕᕆᐊᖑᔭᕆᐊᖃᖅᑐᑦ ᐊᒻᒪᓗ ᑕᐅᑐᒐᕆᔭᖃᕐᓂᖅ.
ᐅᖃᖅᑐᖅ ᐃᓄᐃᑦ ᓯᕗᓕᖅᑎᐅᔪᑦ ᐃᖕᒥᖕᓂᒃ ᑐᓂᔾᔪᑎᒋᓯᒪᔪᑦ ᐊᑯᓂᐅᔪᒥᑦ ᕿᒪᐅᒪᓂᐊᕐᓗᒋᑦ ᖃᑕᙳᖏᑦ ᐃᑲᔪᖅᑎᓪᓗᒋᑦ ᓄᓇᕗᑖᕐᓂᕐᒧᑦ.
“ᐊᑖᑕᒐ ᖃᐅᔨᒪᔭᖃᓚᐅᖅᑐᖅ ᐊᒥᓱᓂᒃ ᐋᔩᖃᑎᒌᒃᑎᓂᒃ ᐊᒻᒪᓗ ᐳᔾᔫᒻᒧᑦ ᐅᖃᓚᐅᖅᑐᖅ ᐃᓛᓐᓂᒃᑯᑦ ᐊᒃᓱᕈᕐᓇᖃᑦᑕᖅᑐᓂᒃ,” ᐅᖃᖅᑐᖅ ᐳᔾᔫᑦ. “ᑕᐃᒪᓐᓇᐃᓚᐅᖅᑐᑦ ᐋᖅᕿᖃᑎᒌᖕᓃᑦ ᐅᖃᐅᓯᐅᖃᑦᑕᖅᖄᖅᑎᓐᓇᒋᑦ, ᐊᒻᒪᓗ ᖃᐅᔨᒪᓂᖃᓗᐊᓚᐅᖏᑎᓪᓗᒍ ᐃᓄᐃᑦ ᒥᒃᓵᓄᑦ, ᐱᖅᖁᓯᕆᔭᑉᑎᖕᓂᑦ ᐊᒻᒪᓗ ᖃᓄᖅ ᐃᓅᖃᑎᒌᖃᑦᑕᕐᓂᕐᒥᒃ.
“ᐅᑉᓗᒥᐅᔪᖅ ᐱᓕᕆᐊᕆᖃᑦᑕᖅᑕᕗᑦ ᓱᓕ ᐱᔾᔪᑕᐅᔪᑦ, ᑕᐅᑐᕐᕉᕐᓗᑎᑦ 30 ᐅᑭᐅᖑᓕᖅᑐᑦ ᐊᓂᒍᖅᓯᒪᔪᑦ ᐊᒻᒪᓗ ᐊᔪᕐᓇᕐᓂᖅᓴᐅᓚᐅᖅᑐᒃᓴᐅᓂᖓᓂᑦ ᑕᐃᑉᓱᒪᓂ, ᓄᓇᕗᑦ ᐱᐊᓂᑦᑎᐊᖅᓯᒪᕐᓚᓕᖅᑐᖅ ᑭᓯᐊᓂ ᐱᓕᕆᐊᒃᓴᖅᑕᖃᑦᑎᐊᖅᑐᖅ ᓱᓕ.
“ᑭᓯᐊᓂ, ᐊᑕᐅᑦᑎᒃᑯᑦ, ᐃᓂᐅᔪᒦᓕᖅᑐᒍᑦ ᐱᓕᕆᐊᕆᓂᐊᕐᓗᑎᒍᑦ ᐊᑎᓕᐅᖅᑕᐅᓚᐅᖅᑎᓪᓗᒍ, ᑐᑭᖃᖅᑐᖅ ᐱᕙᓪᓕᐊᔪᒍᑦ ᐊᒥᓲᓂᖅᓴᓂᒃ ᐃᓱᒪᓕᐅᕈᑕᐅᓂᐊᖅᑐᓂᒃ ᓄᓇᕗᒻᒧᑦ ᐱᔾᔪᑎᖃᖅᑐᓂᒃ ᓄᓇᕗᒻᒥᐅᓄᑦ ᐃᓱᒪᓕᐊᖑᔪᓂᑦ.
“ᐃᓚᖏᑦ ᐃᓄᐃᑦ ᐃᓱᒪᖃᑦᑕᖅᑐᒃᓴᐅᔪᑦ ᐊᑯᓂᐅᓗᐊᖅᑐᖅ. ᐊᑯᓂᒍᓱᒃᑐᑦ ᐊᒻᒪᓗ ᐃᓱᒪᖃᑦᑕᖅᑐᒃᓴᐅᔪᑦ ᑕᐃᒪᓐᓇ ᑕᐅᑐᒃᑕᐅᓚᐅᖏᒻᒪᑦ, ᑭᓯᐊᓂ ᖃᐅᔨᒪᔭᕆᐊᖃᖅᑐᒍᑦ ᐱᓕᕆᔨᒋᔭᕗᑦ ᐊᔾᔨᒋᙱᑕᖏᑦ ᐊᓯᐊᓃᑦᑐᓂᑦ ᓇᓂᑐᐃᓐᓇᖅ.”
ᐳᔾᔫᑦ ᐅᖃᓚᐅᖅᑐᖅ ᐊᒥᓲᓂᖅᓴᓂᒃ ᐃᓄᖕᓂᑦ ᐃᓕᓐᓂᐊᖅᓯᒪᔪᓂᒃ ᐱᑕᖃᒃᑲᓐᓂᕆᐊᖃᖅᑐᖅ, ᐊᑐᖅᓯᒪᓂᑯᖃᖅᑐᓂᒃ ᐊᒻᒪᓗ ᐱᓕᕆᓐᓂᑯᖃᖅᑐᓂᒃ ᐱᔭᕆᐊᓖᑦ ᐊᔾᔨᒋᓕᕐᓂᐊᕐᓗᒋᑦ ᐊᓯᖏᓐᓂᑦ ᐃᓂᐅᔪᓂ ᐊᐅᓚᑦᑎᓂᖃᕐᕕᐅᓃᑦᑐᑦ.
ᐅᖃᖅᑐᖅ ᐱᓕᕆᔨᓂᒃ ᐱᑕᖄᓂᙱᑦᑐᑦ ᓱᓕ ᐃᓚᖏᓐᓂᒃ ᓄᓇᕗᙳᓚᐅᖅᖄᖅᑎᓪᓗᒍ ᐊᒻᒪᓗ ᐱᕕᒃᑕᖃᒃᑲᓐᓂᕆᐊᓕᒃ ᐊᙳᑎᓂᐊᕐᓗᓂ.
“ᐃᓕᓐᓂᐊᕐᓂᖃᕆᐊᖃᕐᓂᕐᒥᒃ ᐊᔭᐅᖅᑐᐃᔭᕆᐊᖃᖅᑐᒍᑦ ᓱᓕ. ᐃᓚᖏᑦ ᑲᓇᑕᒥᑦ ᐃᓅᖃᑎᒌᓂᑦ, ᓄᓇᕐᔪᐊᕐᒥᓘᓐᓃᑦ, ᐱᔭᕆᐊᖃᕐᓂᐅᔪᖅᑕᖃᖅᑐᖅ ᓱᓕ ᐊᒻᒪᓗ ᐃᓕᓐᓂᐊᖅᓯᒪᓂᖅ ᐃᓚᒋᔭᐅᔪᖅ.
ᐃᓅᔪᖕᓃᖅᖄᖅᑎᓐᓇᒍ, ᐊᑖᑕᒐ ᓴᕆᒪᓱᓚᐅᖅᖂᖅᑐᖅ ᓄᓇᕗᑦ ᓇᓃᓕᕐᓂᖓᓂᑦ, ᑐᑭᓯᐊᑉᓗᓂ ᐱᔭᒃᓴᖅᑕᖃᑦᑎᐊᕐᒪᑦ ᓱᓕ. ᑕᑯᓚᐅᖅᑕᕗᑦ ᐱᕙᓪᓕᐊᓃᑦ ᓲᕐᓗ ᒪᓕᒐᓕᕆᔨᒧᑦ ᑐᕌᖓᔪᒥᑦ, ᓄᓇᕗᒻᒥᑦ ᐃᓕᓐᓂᐊᖅᑎᑦᑎᔨᐅᓂᕐᒧᑦ ᐃᓕᓐᓂᐊᖅᑎᑦᑎᓂᕐᒥᒃ, ᐱᕕᖃᖅᑎᑦᑎᒃᑲᓐᓂᖅᑐᓂᒃ ᐱᓕᕆᐊᓄᑦ ᐃᓕᑕᕆᔭᐅᔾᔪᖃᕐᓗᑎᒃ ᐊᒻᒪᓗ ᐊᒥᓱᙳᖅᐸᓪᓕᐊᔪᑦ ᐃᓕᓐᓂᐊᖅᑏᑦ ᓯᓚᑦᑐᖅᓴᕐᕕᖕᓄᑦ ᐃᓕᓐᓂᐊᕆᐊᒃᑲᓐᓂᖅᑐᓂᑦ.
“ᐸᐅᓕ ᐅᑲᓕᖅ ᓯᕗᓪᓕᖅᐹᕆᓚᐅᖅᑕᕗᑦ ᒪᓕᒐᓕᕆᔨᐅᓂᕐᒧᑦ (ᐊᒻᒪᓗ ᓯᕗᓕᖅᑎ) ᐊᒻᒪᓗ ᒫᓐᓇ ᐊᒥᓲᓂᖅᓴᑲᓪᓚᐅᓕᖅᑐᑦ ᐊᔾᔨᒌᙱᑦᑐᓂᒃ ᐊᔪᙱᓐᓂᖃᖅᑐᓂᒃ 20 ᐅᕝᕙᓘᓐᓃᑦ 30 ᐅᑭᐅᓂᑦ ᐊᓂᒍᖅᓯᒪᓕᖅᑐᓂᐅᖓᓂᑦ. ᒫᓐᓇᓕ ᐊᒥᓱᓂᒃ ᒪᓕᒐᓕᕆᔨᖃᐅᓕᖅᑐᒍᑦ, ᐃᓕᓐᓂᐊᖅᑎᑦᑎᔨᓂᒃ ᐊᒻᒪᓗ ᑎᖕᒥᓲᖅᑎᓂᓪᓘᓐᓃᑦ. ᐃᓅᔪᓂᑦ ᐱᑕᖃᐅᖅᑐᒍᑦ ᐃᓕᑕᕆᔭᐅᔾᔪᑎᖃᖅᑐᓂᒃ ᐃᑯᒻᒪᖅᖁᑎᓕᕆᔨᐅᓂᕐᒧᑦ.
“ᓄᑕᕋᐅᑎᓪᓗᖓ, ᓄᓇᒃᑰᕈᑎᕐᔪᐊᓂᒃ ᐊᖁᒃᑎᖃᐅᓚᐅᖅᑐᒍᑦ ᖃᑕᙳᑎᒋᔭᑉᑎᖕᓂᑦ, ᕿᔪᐊᕐᔪᓕᕆᔨᓂᒃ ᐊᒻᒪᓗ ᐃᒡᓗᓕᕆᔨᒃᑯᑦ ᐃᒡᓗᖁᑎᖏᓐᓂᒃ ᐋᖅᕿᒃᓱᐃᔨᓂᒃ, ᑭᓯᐊᓂ ᐊᒥᓲᙱᑦᑐᑦ ᐃᓕᓐᓂᐊᖅᑎᑦᑎᔨᐅᓚᐅᖅᑐᑦ ᐊᒻᒪᓗ ᑎᖕᒥᓲᖅᑎᑕᖃᙱᖦᖢᑕ. ᐊᒥᓲᓗᐊᖏᑦᑐᓂᒡᓘᓐᓃᑦ ᐃᓄᖕᓂᑦ ᒪᓕᒐᓕᐅᖅᑎᑕᖃᓚᐅᖅᑐᖅ ᑕᐃᑉᓱᒪᓂ, ᑭᓯᐊᓂ ᒥᓂᔅᑕᓗᑖᖑᔪᓂᑦ ᐃᓄᐃᓐᓇᕐᓚᐅᔪᑦ ᐊᒻᒪᓗ ᓇᖕᒥᓂᕆᔭᑉᑎᖕᓂᑦ ᓯᕗᓕᖅᑎᖃᖅᖢᑕ.”
ᐳᔾᔫᑦ ᐅᖃᖅᑐᖅ ᐊᒥᓱᓂᒃ ᐱᓕᕆᐊᒃᓴᖅᑕᖃᐅᖅᑐᖅ ᓱᓕ ᑕᒪᐃᓐᓂᑦ ᒐᕙᒪᒃᑯᓐᓂᑦ ᐊᒻᒪᓗ ᓇᖕᒥᓂᖃᖅᑐᓂᑦ ᓄᓇᕗᒻᒥᑦ ᐊᔪᕈᖕᓃᖅᓴᖅᓯᒪᔪᓂᒃ ᐊᒻᒪᓗ ᐃᓕᓐᓂᐊᖅᓯᒪᔪᓂᒃ ᐱᑕᖃᙱᓐᓂᖓᓄᑦ.
ᒫᓐᓇ ᐊᒡᓃᑯᒃᑯᓄᑦ ᐊᖓᔪᖅᖄᕆᔭᐅᔪᖅ ᓄᓇᕗᒻᒥ ᑲᒪᔪᓄᑦ, ᐳᔾᔫᑦ ᐅᖃᖅᑐᖅ ᖃᑉᓯᑲᓪᓚᖕᓂᒃ ᐱᓕᕆᐊᒃᓴᓂᒃ ᐅᔭᕋᒃᑕᕆᐊᓂᑦ ᐱᑕᖃᐅᖅᑐᖅ ᑭᓯᐊᓂ ᐊᒥᓱᑦ ᐃᓄᐃᑦ ᐃᓕᓐᓂᐊᖅᓯᒪᒃᑲᓐᓂᕆᐊᖃᖅᑐᑦ ᐊᒻᒪᓗ ᐊᔪᕈᖕᓃᖅᓴᖅᓯᒪᓕᑎᒃ ᐃᓐᓄᒃᑕᐅᓂᐊᕐᓗᑎᒃ ᐃᓄᖕᓄᑦ ᐱᓕᕆᐊᒃᓴᐃᑦ.
ᐅᖃᖅᑐᖅ ᐅᑎᖃᑦᑕᐃᓐᓇᖅᑐᖅ ᐃᓕᓐᓂᐊᖅᓯᒪᔭᕆᐊᖃᕐᓂᕐᒧᑦ ᐊᒻᒪᓗ ᐱᒻᒪᕆᐅᓂᖓ ᐃᓄᖕᓄᑦ, ᐱᓗᐊᖅᑐᒥᑦ ᒪᒃᑯᒃᑐᓄᑦ, ᐱᓂᐊᕐᓗᒍ ᐃᓕᓐᓂᐊᖅᓯᒪᓂᖅ.
“ᐊᑖᑕᒐ ᐱᔾᔪᑎᒋᓚᐅᖅᑕᖓ ᐃᑲᔪᕈᒪᑉᓗᒋᑦ ᐃᓄᐃᑦ ᐊᒻᒪᓗ ᐃᑲᔪᕐᓗᒋᑦ ᑐᓴᖅᑕᐅᑎᓪᓗᒋᑦ ᐃᓱᒪᒋᔭᖏᑦ ᐃᓚᖏᑦ ᑐᓴᖅᑕᐅᖏᑦᑐᖕᓇᖅᑎᓪᓗᒋᑦ. ᐅᖃᓪᓚᒃᑎᓪᓗᒍ, ᐃᓄᐃᑦ ᑐᓵᖃᑦᑕᓚᐅᖅᑐᑦ ᐅᖃᐅᓯᕆᔭᕆᐊᖃᖅᑕᖏᓐᓂᑦ. ᐅᖃᓪᓚᒍᖕᓇᑦᑎᐊᓚᐅᖅᑐᖅ ᑐᓵᔭᐅᔪᒪᖃᑦᑕᖅᖢᓂ ᐃᓄᖕᓄᑦ. ᐅᖃᐅᓯᒃᓴᖏᑦ ᐃᓄᖕᓃᓐᓇᖅ ᐱᔾᔪᑎᖃᖃᑦᑕᐅᓚᐅᖅᑐᑦ ᐊᒻᒪᓗ ᐊᔪᙱᓐᓂᕆᔭᑉᑎᖕᓂᑦ.
“ᑕᑯᑎᑦᑎᔭᕆᐊᖃᖅᑐᒍᑦ ᖁᔭᓕᓂᕐᒥᒃ ᐊᒻᒪᓗ ᖁᕕᐊᒋᒐᑉᑎᒍᑦ ᓯᕗᓕᖅᑎᒋᔭᕗᑦ ᐃᑲᔪᓚᐅᖅᑐᑦ ᓴᖅᕿᑕᐅᓂᖓᓄᑦ ᓄᓇᕗᑦ ᐊᒻᒪᓗ ᑕᐃᒪᐅᔪᑦ ᒫᓐᓇ ᐊᑐᓕᖅᑎᓐᓂᐊᕐᓗᒋᑦ ᓄᓇᑖᕐᓂᕐᒧᑦ ᐊᖏᖃᑎᒌᒍᑎᒥᑦ.
“ᐱᓕᕆᐊᒃᓴᑲᓪᓚᐅᔪᖅ ᐊᒻᒪᓗ ᖁᔭᓕᓐᓇᕐᓂᖅᑕᙱᑦᑎᐊᖅᑑᑉᓗᓂ ᐱᓕᕆᐊᖑᔪᒧᑦ ᐃᓛᓐᓂᒃᑯᑦ. ᖃᑕᙳᑎᖏᑦ ᓯᕗᓕᖅᑎᑉᑕ ᓲᕐᓗ ᐊᒃᓱᕈᖃᑕᐅᔭᕆᐊᖃᖃᑦᑕᖅᑐᑦᑕᐅᖅ. ᐃᓱᒪᒋᖃᑦᑕᖅᑕᕋ ᐊᓈᓇᒐ (ᓂᐊᓕ), ᑲᒪᔨᐅᔭᕆᐊᖃᖃᑦᑕᓚᐅᖅᑐᖅ, ᐊᒻᒪᓗ ᖃᑕᙳᑎᒌᑦ ᐃᑲᔪᓚᐅᖅᑐᑦ ᐱᕈᖅᓴᖅᑕᐅᑎᓪᓗᑕ ᐅᕙᖓᓗ ᓇᔭᒃᑲᓗ ᐊᑖᑕᒐ ᐃᖏᕐᕋᔭᑲᑕᒋᐊᖃᖃᑦᑕᐃᓐᓇᓚᐅᖅᑎᓪᓗᒍ ᐊᒻᒪᓗ ᑭᒡᒐᖅᑐᐃᓗᓂ.
“ᑕᒪᒃᑯᐊᓗᒃᑖᖅ ᑕᐃᒪᐅᔪᑦ ᓱᓕ ᐊᒻᒪᓗ ᐱᓕᕆᐊᕆᔭᖏᑦ ᐊᒻᒪᓗ ᑐᓂᔾᔪᑎᒋᓯᒪᔭᖏᑦ ᖃᐅᔨᔭᐅᙱᑦᑑᓂᐊᖏᑦᑐᑦ.”