ᐊᑲᐅᙱᓕᐅᕈᑕᐅᔪᖅ ᐅᑎᕐᕕᒌᓐᓇᖅᑕᑦᑎᓐᓂ, ᑕᐃᓐᓇ ᕿᒫᔪᓐᓇᙱᑕᕗᑦ, ᓱᖃᓪᓕᓕᒑᔪᒥ ᐱᔭᕆᐊᖃᕐᓂᐅᔪᒥ ᐃᒡᓗᒃᓴᒃᑲᓐᓂᕐᓂ ᓄᓇᕗᒻᒥ.
ᐊᑲᐅᙱᓕᐅᕈᑕᐅᕗᖅ ᐱᕈᖅᐸᓪᓕᐊᖏᓐᓇᖅᑐᒥ ᐃᓄᒋᐊᖕᓂᐅᔪᑦ ᐱᕈᖅᐸᓪᓕᐊᑎᓪᓗᒍ.
ᓄᓇᓖᑦ ᐊᑐᖅᐸᒃᑕᖏᓐᓂ ᐊᐅᓚᔪᓐᓇᖁᓪᓗᒋᑦ ᓄᑕᐅᔪᓐᓃᖅᐸᓪᓕᐊᑎᓪᓗᒋᑦ, ᐊᔪᕐᓇᖅᓯᒃᑲᓐᓂᐅᔭᕐᓂᐊᖅᐳᖅ ᓴᓇᓂᕐᒧᑦ ᓄᑖᓂ ᐱᔭᕆᐊᖃᕐᔪᐊᖅᑐᓂ ᐃᒡᓗᒃᓴᓂ ᐊᒻᒪ ᐃᑲᔪᖅᓯᕐᓗᒋᑦ ᐃᒪᕐᒧᑦ ᐊᒻᒪ ᑯᕕᖅᑕᖅᑕᐅᓂᕐᒧᑦ ᐃᓚᒋᐊᖅᑕᐅᓂᐅᔪᓄᑦ, ᑐᑭᓯᓇᖅᐸᒌᖅᑐᒥ ᐃᖃᓗᖕᓂ ᐊᒻᒪ ᑲᖏᖅᖠᓂᕐᒥ, ᒪᐃᔭᐃᑦ ᐅᖃᐅᓯᖃᖅᓯᒪᓪᓗᑎᒃ ᓴᐱᓕᖅᓯᒪᓂᖏᓐᓂ ᓄᓇᓕᖏᓐᓂ ᐱᔪᓐᓇᙱᓐᓂᖏᓐᓂ ᐱᕈᖅᐸᓪᓕᐊᓂᕐᒧᑦ.
ᒪᓕᒐᓕᐅᕐᕕᖕᒥ ᒫᔾᔨ 7–ᒥ, ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᑦ ᒥᓂᔅᑕᖓ ᑕᐃᕕᑦ ᔪᐊᓇᓯ ᐅᖃᓚᐅᖅᐳᖅ ᐱᓕᕆᕝᕕᒃ ᐱᓕᕆᕗᑦ ᓄᑖᙳᕆᐊᖅᑎᑦᑎᓂᕐᒥ ᑲᖏᖅᖠᓂᐅᑉ ᐃᒪᕐᒧᑦ ᓄᓇᓖᑦ ᐊᑐᖅᐸᒃᑕᖏᓐᓂ ᐊᐅᓚᔪᓐᓇᖁᓪᓗᒋᑦ, ᓇᖕᒥᓂᕆᔭᐅᔪᓄᑦ ᐱᓕᕆᓂᐅᔪᒥ ᐱᔭᕇᖅᑕᐅᓂᖓᓂ ᑕᒪᑐᒪᓂ ᑕᖅᑭᐅᔪᒥ. ᐃᓚᒋᐊᖅᓯᓚᐅᖅᐳᖅ ᐊᑭᑐᔫᑎᓄᑦ ᑮᓇᐅᔭᖃᖅᑎᑕᐅᓂᐅᔪᒥ 2022-’23 ᑮᓇᐅᔭᓂᑦ ᐊᑐᖅᑐᒃᓴᓃᙱᑐᐃᓐᓇᕆᐊᖃᖅᐳᖅ, ᑭᓯᐊᓂ ᐸᕐᓇᐃᓂᖅ ᐱᔭᕇᖅᐸᓪᓕᐊᑎᓪᓗᒍ, ᑐᒃᓯᕋᕐᓂᐅᔪᑦ ᐊᑭᑐᔫᑎᓄᑦ ᑮᓇᐅᔭᖃᖅᑎᑕᐅᓂᐅᔪᒥ ᓴᓇᔭᐅᓂᐊᖅᐳᑦ ᐃᒪᕐᒧᑦ ᓴᓗᒻᒪᖅᓴᐃᕝᕕᒃᓴᖓᓄᑦ ᐃᒡᓗᕐᔪᐊᖓᓂ ᑲᖏᖅᖠᓂᕐᒥ.
ᐊᑯᓂᐊᓗᖕᒥ ᐅᑕᖅᑭᔭᕆᐊᖃᕐᓂᐅᕗᖅ ᑭᐅᔾᔪᑕᐅᔪᓄᑦ ᐃᒡᓗᕐᔪᐊᖅᑕᖃᖅᐸᒌᖅᑎᓪᓗᒍ ᐸᕐᓇᒃᓯᒪᓕᖅᑐᓂ ᐃᓐᓄᒍᓐᓇᕐᓂᖓᓄᑦ ᑲᑎᑕᐅᔪᓐᓇᙱᑦᑐᓂ ᐱᓕᕆᓗᐊᖅᑐᒧᑦ ᐃᒪᕐᒧᑦ ᓱᓪᓗᑯᑖᒧᑦ ᐱᓕᕆᔾᔪᓯᐅᔪᒧᑦ.
ᐊᑲᐅᙱᓕᐅᕈᑎᒃᑲᓐᓂᐅᔪᖅ ᓂᕆᐅᒋᔭᐅᔪᒥ ᐊᑭᖓᓂ ᓄᑖᙳᖅᑎᑦᑎᓂᕐᒧᑦ ᐱᓕᕆᔾᔪᓯᐅᔪᒥ ᐊᕐᕌᒍᒐᓵᓗᖕᓂ ᐅᑭᐅᖃᓕᖅᑐᒥ ᐊᖏᒡᓕᕙᓪᓕᐊᔪᒥ ᐊᑭᖓᓐᓂ ᓴᓇᓂᕐᒧᑦ ᓄᑖᓂ ᐃᒡᓗᒃᓴᐅᔪᓂ – ᐊᑭᖃᐸᓗᒃᑐᓂ ᕿᑎᐊᓂ $900,000–ᒥ ᐊᒻᒪ $1.1 ᒥᓕᐊᓐᓂ ᐊᑐᓂ ᐃᒡᓗᒃᓴᐅᔪᒧᑦ, ᐅᖃᐅᓯᐅᓪᓗᓂ ᓗᐊᓐ ᑯᓱᕐᒧᑦ, ᒥᓂᔅᑕ ᑲᒪᒋᔭᖃᖅᑐᒥ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓂ.
ᐃᒡᓗᒃᓴᓂ ᐊᒥᒐᓗᐊᕐᓂᐅᔪᒥ 3,545–ᓂ ᐃᒡᓗᒃᓴᐅᔪᓂ 2020–ᒥ, ᑕᒪᓐᓇ ᑐᓂᓯᕗᖅ ᐃᒡᓗᒃᓴᖃᕐᓂᕐᒧᑦ ᑐᐊᕕᕐᓇᕐᓂᐅᔪᒥ ᐊᑭᐅᔪᒥ $3.5 ᐱᓕᐊᓐᑐᖅᑐᒥ, ᑐᓂᓗᒍ ᐱᓗᓂᓘᓐᓃᑦ ᖃᔅᓯᐊᕐᔪᖕᓂ ᑮᓴᐅᔭᓕᐅᕈᑕᐅᔪᓂ ᑮᓇᐅᔭᓂᒃ.
ᐊᑭᖓ ᖁᕝᕙᖅᐸᓪᓕᐊᑎᓪᓗᒍ ᐱᔾᔪᑎᖃᖅᑐᒥ ᓱᓇᑐᐃᓐᓇᐃᑦ ᐊᑭᑦᑐᖅᐸᓪᓕᐊᓂᖓᓂ, ᐅᓄᕐᓂᐅᔪᑦ ᐃᒡᓗᒃᓴᓂ ᓴᓇᔭᐅᓂᐊᖅᑐᓂ ᒥᒃᖠᒋᐊᖅᐸᓪᓕᐊᕗᖅ, ᑯᓱᒐᖅ ᐅᓂᒃᑳᓚᐅᖅᐳᖅ, ᐃᓚᒋᐊᖅᓯᓪᓗᓂ ᐅᓄᕐᓂᐅᔪᓂ ᓄᑖᓂ ᓴᓇᔭᐅᓂᐅᔪᓂ 2022-‘23–ᒧᑦ ᐋᖅᑭᒃᓯᒪᓪᓚᕆᙱᓚᖅ — ᐅᑯᐊ ᖁᕝᕙᖅᐸᓪᓕᐊᔪᓂ ᐊᑭᐅᔪᑦ ᑕᑯᔪᓐᓇᖅᐳᖅ ᐅᓄᙱᓐᓂᖅᓴᐅᔪᓂ ᓴᓇᔭᐅᓂᐅᔪᓂ ᐱᔭᕇᖅᑕᐅᓂᖏᓐᓂ.
“ᐊᒃᓱᕈᕐᓇᖅᑐᐊᓘᓪᓗᓂ ᖃᓄᐃᓐᓂᐅᕗᖅ,” ᐅᖃᓚᐅᖅᐳᖅ. “ᑮᓇᐅᔭᖅᑖᒃᑲᓐᓂᕆᐊᖃᖅᐳᒍᑦ ᐃᒡᓗᒃᓴᓄᑦ.”
ᐃᖃᓗᐃᑦ-ᑕᓯᓗᖕᒧᑦ ᒪᓕᒐᓕᐅᖅᑎ ᔪᐊᔾ ᕼᐃᒃᔅ ᖃᐃᖁᔨᓂᖃᓚᐅᖅᐳᖅ ᒪᓕᒐᓕᐅᖅᑎᐅᖃᑎᖏᓐᓂ ᓇᓂᓯᓂᕐᒧᑦ ᐱᐅᓂᖅᓴᐅᔪᓂ ᐱᓕᕆᓂᐅᔪᓂ ᓴᓇᓂᕐᒧᑦ.
“ᖃᐅᔨᒪᕗᖓ ᓇᓗᓇᐃᖅᓯᔭᕆᐊᖃᕐᓂᑦᑎᓐᓂ ᓴᓇᓂᑦᑎᓐᓂ ᐃᒡᓗᒃᓴᓂ ᐊᑯᓂᐅᔪᒥ ᓇᐸᓂᐊᖅᑐᓂ ᐊᒻᒪ ᐊᑐᕆᐊᖃᖅᐳᒍᑦ ᐱᐅᔪᓂ ᓱᓇᒃᑯᑖᓂ ᐊᒻᒪ ᐱᐅᔪᓂ ᓇᑉᐸᖅᑎᕆᓂᐅᔪᒥ ᐱᓕᕆᔾᔪᓯᐅᔪᓂ, ᑭᓯᐊᓂ ᐃᓱᒪᒋᔭᓐᓂ ᒫᓐᓇᐅᔪᒥ, ᖃᓄᐃᒃᓴᙱᑦᑎᐊᖅᐳᖓ ᓵᓚᒃᓴᕋᓗᐊᕈᑦᑕ ᐋᒃᑲᓘᓐᓃᑦ ᓴᓇᓂᐅᔪᒧᑦ ᓵᓚᖃᐅᓯᐊᖑᔪᒥ ᐅᕝᕙᓘᓐᓃᑦ ᓵᓚᖃᐅᓯᐊᑦᑎᐊᕚᓗᖕᒥ,” ᐅᖃᓚᐅᖅᐳᖅ. “ᑕᑯᔪᒪᕗᖓ ᐆᒻᒪᖅᑯᑎᓄᑦ-ᐊᑑᑎᖃᑦᑎᐊᖅᑐᓂ ᐃᒡᓗᒃᓴᓂ ᓴᓇᔭᐅᔪᓂ ᐊᑭᑭᓛᖑᔪᒥ ᐊᔪᕐᓇᙱᓐᓂᖓᓂ ᐃᒡᓗᒃᓴᖃᖅᑎᑦᑎᓂᐊᕋᑦᑕ ᐊᒥᓱᓂ ᐃᓄᖕᓂ ᐊᕐᕌᒍᑕᒫᒥ ᐱᔪᓐᓇᕐᓂᓕᒫᖓᓐᓂ.”
ᐱᐅᔫᔮᖅᐳᖅ ᐸᐃᑉᐹᑎᒍᑦ, ᑭᓯᐊᓂ ᐃᒡᓗᓕᕆᔨᕐᔪᐊᒃᑯᑦ ᐅᖃᐱᓗᒃᓯᒪᒋᕗᑦ ᐃᒡᓗᓂ ᐊᑐᖅᑐᐊᖅᑎᐅᔪᓂ ‘ᐱᔮᕆᓪᓗᑎᒃ’ ᓱᕋᑦᑎᕆᓂᖏᓐᓂ ᐃᒡᓗᖁᑕᐅᔪᓂ ᐊᑭᓖᔭᕆᐊᖃᓕᖅᖢᑎᒃ ᐋᖅᑭᒃᑕᐅᓂᖏᓐᓄᑦ ᓇᖕᒥᓂᖅ ᐃᒃᐱᐊᕐᔪᖏᓐᓂ. ᐃᓚᖏᑦ ᐊᑲᐅᙱᓕᐅᕈᑕᐅᔪᒥ ᐊᖏᒡᓕᒋᐊᖅᑎᑕᐅᕗᖅ ᐸᖕᒥᐅᓗᐊᕐᓂᐅᔪᓂ, ᐊᔭᐅᕆᔪᒥ ᖃᐅᒻᒪᖅᑯᑎᓂ ᐃᓅᓯᕆᔭᖏᓐᓂ ᐃᓱᓕᓵᓕᒃᑲᓐᓂᕐᓂᐅᔪᓂ ᓱᒃᑲᓂᖅᓴᐅᔪᒥ, ᑕᐃᒫᒃ ᓇᓕᒧᓐᓂᐅᔪᒥ ᓇᓂᔭᐅᔪᖃᕆᐊᖃᖅᐳᖅ ᓄᖅᑲᖅᑎᑦᑎᔪᒥ ᓄᓇᕗᒻᒥ ᒐᕙᒪᒃᑯᓐᓂ ᐅᕝᕙᓘᓐᓃᑦ ᐃᒡᓗᓕᕆᔨᕐᔪᐊᒃᑯᓐᓂ ᐃᓇᖏᖅᓰᓐᓇᐅᔭᕆᐊᖃᕐᓂᖏᓐᓂ ᐊᑭᑭᓗᐊᖅᑐᒥ ᓴᓇᔭᐅᓯᒪᔪᓂ ᖁᑦᑎᒃᑐᒥ–ᐊᒃᑐᖅᑕᐅᕙᒃᑐᓂ ᐃᓚᒃᓴᖏᓐᓂ.
ᑲᒪᓇᙱᓚᖅ ᓂᐱᐅᔪᒥ ᐅᑯᓂᖓ ᐅᖃᓪᓚᖕᓂᐅᔪᓂ ᒪᓕᒐᓕᐅᕐᕕᖕᒥ ᑐᙵᓇᙱᓚᖅ, ᐋᖅᑭᒍᑎᒃᓴᖓ ᐊᒥᓱᓗᐊᕌᓗᖕᓄᑦ ᐊᑲᐅᙱᓕᐅᕈᑕᐅᔪᓄᑦ ᑮᓇᐅᔭᖅᑖᒃᑲᓐᓂᕆᐊᖃᕐᓂᐅᔪᒥ ᐋᑐᕚᒥ. ᐱᓯᒪᓇᓂ ᑲᑎᖅᓱᖅᑕᐅᕙᓪᓕᐊᔪᓂ ᑮᓇᐅᔭᓂ ᑐᖅᑯᖅᑕᐅᓯᒪᓪᓗᑎᒃ ᐱᕈᖅᐸᓪᓕᐊᑎᑕᐅᔪᓂ ᐅᐃᔾᔮᕐᓂᐅᕗᖅ ᑯᕕᕕᐅᔪᒥ.
ᐃᓚᖓᓂ ᑎᑭᐅᑎᓂᐅᔪᒥ ᓄᓇᕗᒻᒥ ᑐᙵᕕᒃᑯᓐᓄᑦ ᐊᒻᒪ ᐅᓄᕐᓂᖅᓴᐅᔪᒥ $1.7 ᐱᓕᐊᓐᓂ ᑲᑎᖅᓱᖅᑕᐅᕙᓪᓕᐊᔪᓂ ᑮᓇᐅᔭᓂ ᑐᖅᑯᖅᑕᐅᓯᒪᓪᓗᑎᒃ ᐱᕈᖅᐸᓪᓕᐊᑎᑕᐅᔪᓂ ᐱᖁᑕᐅᔪᓂ ᓄᓇᕗᒻᒥ ᐸᐸᑦᑎᕕᖓᑦ ᐱᓕᕆᖃᑎᒋᔭᐅᔪᓐᓇᕐᓂᖓᓂ ᐃᒡᓗᖃᖅᑎᑦᑎᓂᕐᒥ ᓄᓇᕗᒻᒥᐅᓄᑦ, ᑭᓯᐊᓂ ᑕᐃᓐᓇ ᒪᑭᒪᔾᔪᑕᐅᔪᓐᓇᙱᓚᖅ ᓂᕈᐊᕐᓂᕐᒧᑦ.
ᐋᖅᑭᒍᑎᒃᓴᑐᐊᖅ ᐆᒧᖓ ᐊᑲᐅᙱᓕᐅᕈᑕᐅᔪᒥ ᐆᒻᒪᕆᒃᑐᒥ ᑲᑎᖅᓱᖅᑕᐅᕙᓪᓕᐊᔪᓂ ᑮᓇᐅᔭᓂ ᑐᖅᑯᖅᑕᐅᓯᒪᓪᓗᑎᒃ ᐱᕈᖅᐸᓪᓕᐊᑎᑕᐅᔪᓂ ᐅᑭᐅᖅᑕᖅᑐᒥ ᓄᓇᓕᖕᓂ ᒐᕙᒪᑐᖃᒃᑯᓐᓂ. ᓈᒻᒪᒃᓯᕗᖅ ᐱᕕᖕᓂᕐᒧᑦ ᐅᑭᐅᖅᑕᖅᑐᒥ ᐊᐅᓚᑦᑎᒍᓐᓇᕐᓂᕐᒥ ᐊᒻᒪ ᑐᓂᓯᓂᕐᒥ ᐃᓄᖕᓄᑦ ᓅᓚᐅᖅᑐᓄᑦ ᐃᓂᒌᓐᓇᕐᓂᐊᖅᑕᒥᓂᑦ ᓄᓇᓕᖕᓄᑦ ᐊᑎᖓᓄᑦ ᐱᓂᖏᓐᓂ ᓄᓇᑖᕋᓱᐊᕐᓂᕐᒧᑦ.