ᓇᒧᑐᐃᓐᓇᑦᑎᐊᖅ ᑕᑯᓪᓗᑕ, ᐃᓄᐃᑦ ᐊᒻᒪ ᐱᖁᑏᑦ ᐊᒥᒐᓗᐊᕐᓂᐅᕗᑦ ᐊᒻᒪ ᐱᔪᒪᔭᐅᕐᔪᐊᖅᖢᑎᒃ.
ᐊᑲᐅᙱᓕᐅᕈᑕᐅᔪᖅ ᑐᓂᓯᔨᐅᔪᓄᑦ ᐃᒻᒥᖕᓂ ᐋᖅᑭᑐᐃᓐᓇᕆᐊᖃᖅᐳᑦ ᐊᑯᓂᐅᔪᒥ, ᑭᓯᐊᓂ ᐊᒥᒐᕐᓂᐅᔪᒥ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐸᖅᑭᓂᐅᔪᒥ ᖃᐅᔨᒪᔨᕐᔪᐊᖑᔪᓂ ᓄᓇᕗᒻᒥ ᐱᔭᕆᐊᖃᕐᓂᐊᖅᐳᑦ ᐊᒃᓱᕈᐃᓐᓇᕐᓂᐅᔪᒥ ᑭᐅᓂᕐᒧᑦ.
ᐃᓗᐊᖅᓴᐃᔩᑦ ᐱᔭᐅᔭᕆᐊᖃᕐᔪᐊᖅᐳᑦ ᓄᓇᕐᔪᐊᓕᒫᒥ. ᐃᓱᓕᑦᑎᓂᐅᔪᒥ ᐅᓄᕐᓂᖏᓐᓂ ᓇᓕᒧᑎᑦᑎᔫᔮᙱᓚᖅ ᐃᖅᑲᓇᐃᔭᖅᑎᓂ ᓴᖑᑎᑕᐅᓂᐅᔪᓄᑦ ᐊᒻᒪ ᓄᖅᑲᕐᓂᐅᔪᓄᑦ ᐱᔾᔪᑎᖃᖅᑐᒥ ᑕᖃᓗᐊᕐᓂᐅᔪᒥ, ᓄᕙᒡᔪᐊᕐᓇᕐᒥ–ᑕᖃᓗᐊᕐᓂᐅᔪᒥ, ᐱᐅᙱᑦᑐᒥ ᐃᖅᑲᓇᐃᔭᕐᓂᕐᒧᑦ ᖃᓄᐃᓐᓂᐅᔪᓂ ᐊᒻᒪ ᐃᒪᐃᑦᑑᔭᓪᓚᕆᐅᖅᑰᔨᔪᒥ ᐱᑕᖃᙱᓗᐊᕐᓂᖓᓂ ᐃᒃᐱᒋᔭᐅᑦᑎᐊᕐᓂᕐᒧᑦ ᐅᑯᓄᖓ ᐊᕐᓇᓄᑦ ᐊᒻᒪ ᐊᖑᑎᓄᑦ ᐱᓕᕆᓯᒪᔪᓂ ᓇᐃᓴᒐᒃᓴᐅᙱᑦᑐᓂ ᐃᑲᕐᕋᓂ ᐊᒻᒪ ᑮᓇᐅᔭᓂ ᐃᓕᑦᑎᓂᕐᒧᑦ ᖃᓄᖅ ᐱᐅᓛᖑᔪᒥ ᐱᔨᑦᑎᕋᕈᓐᓇᕐᓂᖏᓐᓂ ᐅᕙᑦᑎᓐᓂ ᐃᓚᖏᓐᓂ ᐊᒃᓱᕈᕐᓇᓛᖑᓂᐅᔪᓂ.
ᐱᐅᙱᓐᓂᖅᓴᐅᔪᖅ, ᐱᕕᒃᓴᖃᓗᐊᕌᓗᙱᑦᑐᖅ ᓈᒻᒪᒃᓴᙱᑎᓪᓗᑎᑦ ᐅᖃᐅᓯᐅᓂᖏᓐᓂ ᐃᖅᑲᓇᐃᔮᕆᔭᕐᓂ. ᓵᓚᒃᓴᒐᒃᓴᐅᙱᖦᖢᓂ ᐊᑕᐅᓯᖅ ᓄᓱᒃᑕᐅᑎᓪᓗᒍ ᔫᓂᐊᓐ–ᖑᔪᓂ, ᒐᕙᒪᒃᑯᓐᓂ ᐱᓕᕆᕝᕕᖕᓂ ᐊᒻᒪ ᓇᖕᒥᓂᖅ ᐃᒻᒥᓄᑦ–ᐱᔪᒪᓂᕆᔭᖏᓐᓂ.
ᓄᓇᕗᒻᒥ ᒐᕙᒪᒃᑯᑦ (GN) ᐊᖏᐸᓗᒃᑐᒥ ᐱᖃᑕᐅᓯᒪᕗᑦ ᐊᒃᓱᕉᓴᖕᓂᐅᔪᓂ ᐃᓐᓄᒃᓯᓂᕐᒥ ᐊᖏᐸᓗᒃᑐᒥ ᐃᓚᖓᓐᓂ 300–ᓂ ᐃᓗᐊᖅᓴᐃᔨᒃᓴᓄᑦ ᐃᓂᐅᔪᓂ ᓄᓇᕗᓕᒫᒥ, ᑎᑭᐅᑎᓪᓗᓂ ᐊᔾᔨᒌᙱᑦᑐᓂ ᓄᓇᓕᖕᓂ ᐋᓐᓂᐊᕕᖕᓂ ᓅᓯᒪᓂᖏᓐᓂ ᕿᓚᒻᒥᐅᔪᒥ “ᑐᐊᕕᕐᓇᕐᓂᐅᔪᒥᑐᐊᖅ” ᖃᓄᐃᓕᖓᓂᐅᔪᒥ ᖄᖏᖅᓯᒪᓕᖅᑐᓄᑦ ᖃᔅᓯᐊᕐᔪᖕᓄᑦ ᐊᕐᕌᒍᓄᑦ.
ᓄᓇᕗᒻᒥ ᒐᕙᒪᒃᑯᑦ ᓴᖅᑭᑎᑦᑎᓚᐅᖅᐳᖅ ᐊᕐᕌᒍᓄᑦ-ᑕᓪᓕᒪᓄᑦ-ᐸᕐᓇᐅᑎᒥᐃᓗᐊᖅᓴᐃᔨᒃᓴᓂ ᐃᖅᑲᓇᐃᔭᖅᑎᑖᕋᓱᐊᕐᓂᕐᒥ ᐊᒻᒪ ᐸᐸᑦᑏᓐᓇᕐᓂᕐᒧᑦᓴᕕᕗᐊᕆᒥ, ᐋᖅᑭᒃᓱᖅᓯᒪᔪᒥ ᓯᕗᓪᓕᖅᐹᒥ ᐱᓕᒻᒪᒃᓴᕐᓂᐅᔪᒥ ᓴᓇᓯᒪᔪᒥ–ᓄᓇᕗᒻᒥ ᐃᓗᐊᖅᓴᐃᔨᓂᑦ ᐊᒻᒪᓗ ᐅᖃᐅᓯᐅᔪᓂ ᐱᔪᒥᓇᕐᓂᖅᓴᐅᓂᐅᔪᓄᑦ ᐃᓗᐊᖅᓴᐃᔨᑖᕋᓱᐊᕐᓂᕐᒧᑦ ᓄᓇᓕᖕᓂ ᐊᒻᒪᓗ ᐊᓯᖏᓐᓂ ᐱᔪᓐᓇᕐᓂᖃᕐᓂᐅᔪᓂ, ᓲᕐᓗᐅᕘᓇ “ᐊᑭᑦᑐᕋᐅᑎᔪᒥ” ᐅᑎᕐᕕᐅᔭᕆᐊᖃᕐᓂᕐᒥ — ᑕᒪᒃᑭᑦ ᐱᔪᒥᓇᖅᑐᐊᓗᐃᑦ ᑮᓇᐅᔭᖅᑖᕆᔭᐅᒃᑲᓐᓂᖅᑐᓂ ᐱᑎᑦᑎᓚᐅᖅᑐᒥ ᐊᑲᐅᙱᓕᐅᕈᑕᐅᔪᒥ ᐊᑯᓂᐅᓂᖅᓴᒥ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᖅᑲᓇᐃᔭᖅᑎᐅᔪᓄᑦ ᖁᑦᑎᓛᖓᓂ ᓄᓇᕘᑉ ᑭᖑᓪᓕᖅᐹᖓᓂ ᓄᕙᒡᔪᐊᕐᓇᕐᓂᖃᓚᐅᖅᑐᒥ.
8–ᓂ ᐃᓗᐊᖅᓴᐃᔨᓂ ᑎᑭᑎᑕᐅᔪᖃᓚᐅᖅᐳᖅ ᓄᓇᕗᒻᒧᑦ ᐅᕘᓇ Red Cross–ᑯᑎᒍᑦ ᐊᒻᒪᓗ ᒐᕙᒪᑐᖃᒃᑯᑦ ᐃᑲᔪᓚᐅᖅᖢᑎᒃ ᐅᕿᒡᓕᒋᐊᖅᑎᑦᑎᓂᕐᒥ ᐅᖁᒪᐃᓐᓂᐅᔪᒥ, ᐊᒻᒪᓗ ᕕᕗᐊᕆᒥ, ᐊᒻᒪ ᐃᓇᖏᖅᓯᓚᐅᑲᒃᑐᓂ ᓘᒃᑖᓂ ᐊᑯᓂᐊᓗᖕᒥ ᓄᖅᑲᖅᑎᑦᑎᓯᒪᕗᖅ ᐃᓚᑰᓂᐅᔪᓂ ᐅᑯᓇᓂ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐸᖅᑭᓂᐅᔪᒥ ᐱᔭᕆᐊᓕᖕᓂ ᐊᒻᒪ ᓱᓕᓂᐅᔪᓂ.
ᐊᑲᐅᒃᓴᕐᓇᙱᓐᓂᐅᔪᖅ ᑖᔅᓱᒥᖓ, ᑭᓯᐊᓂ, ᑎᑭᐅᑎᒍᑦᑕ ᐃᓚᖓᓐᓂ ᖃᓄᐃᑦᑑᓂᖓᓂ ᐱᓪᓚᕆᐅᔪᒥ ᐅᓄᕐᓂᐅᔪᓂ ᐋᓐᓂᐊᕕᖕᓂ, ᐃᖅᑲᓇᐃᔭᖅᑎᓂ, ᐊᒻᒪ ᑐᓵᔨᓂ ᐅᕝᕙᓘᓐᓃᑦ ᐱᓕᒻᒪᒃᓴᖅᓯᒪᔪᓂ ᐱᔨᑦᑎᕋᖅᑎᐅᔪᓂ ᐅᖃᕈᓐᓇᑦᑎᐊᖅᑐᓂ ᐃᓄᒃᑐᑦ, ᐊᑐᐃᓐᓇᕐᓂᖃᐃᓐᓇᕐᓂᐊᖅᐳᒍᑦ ᐋᓐᓂᐊᕕᓕᐊᖅᑎᑕᐅᔪᓂ ᖃᖓᑕᓲᒃᑯᑦ ᐃᖃᓗᖕᓄᑦ ᐅᖓᓯᖕᓂᖅᓴᐅᔪᒨᓪᓘᓐᓃᑦ ᑕᐃᒪᐃᒐᔪᒃᑐᒥ ᐸᖅᑭᓂᐅᓪᓗᐊᖅᑐᒥ.
ᖃᐅᔨᓴᐃᓂᐅᔪᒥ ᑎᑎᕋᖅᑕᐅᓚᐅᖅᑐᒥ ᒪᐃ 3–ᒥ ᑲᓇᑕᒥ ᐃᓅᓕᓴᐃᓂᐅᔪᒥ ᑲᑐᔾᔨᖃᑎᒌᖑᔪᒥ ᐅᖃᓕᒫᒐᕐᒥ ᑕᑯᒃᓴᐅᑎᑦᑎᓚᐅᖅᐳᖅ ᓄᓇᕗᒻᒥ ᐃᓄᐃᑦ 25 ᐳᓴᓐᑎᒥ ᐊᑐᕐᓂᖅᓴᐅᓇᔭᓚᐅᖅᐳᑦ ᐱᕐᔪᐊᖑᔪᓂ ᐊᑲᐅᙱᓕᐅᕈᑕᐅᔪᓂ ᐱᓚᒃᑕᐅᓚᐅᖅᑎᓪᓗᒋᑦ ᑕᐅᑐᒃᖢᒍ ᖃᓪᓗᓈᖑᔪᓂ ᐃᓚᖏᓐᓂ ᐊᔾᔨᐸᓗᐊᓂ ᐅᑭᐅᓕᖕᓂ ᐊᒻᒪ ᐋᓐᓂᐊᖃᕐᓇᙱᑦᑐᓕᕆᓂᖓᓐᓂ ᐊᔾᔨᒌᙱᓐᓂᐅᔪᓂ.
ᖃᐅᔨᓴᖅᑎᐅᔪᑦ ᐃᓱᒪᕗᑦ ᐅᑯᐊ ᐱᐅᙱᓐᓂᖅᓴᐅᔪᓂ ᖃᓄᐃᓕᖓᓂᐅᔪᑦ ᐱᔾᔪᑕᐅᔪᓐᓇᖅᐳᑦ ᐊᒡᕕᐊᕈᑕᐅᔪᓄᑦ ᐊᑐᐃᓐᓇᖃᕐᓂᕐᒥ ᕿᓚᒻᒥᐅᔪᒥ ᐊᒻᒪ ᐃᓕᖅᑯᓯᒧᑦ ᓈᒻᒪᒃᑐᒥ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐸᖅᑭᓂᐅᔪᒥ, ᐱᑎᑦᑎᔪᒥᒃ ᓄᓇᕗᒻᒥ ᐃᓄᖕᓂ ᑎᑭᓐᓂᖏᓐᓂ ᐱᓚᐅᒃᑕᐅᓂᐅᔪᒥ ᐅᓄᕐᓂᖅᓴᐅᔪᓂ ᐅᖓᕙᕆᐊᖅᓯᒪᒃᑲᓐᓂᖅᑐᒥ ᐋᓐᓂᐊᕐᓇᒥ, ᐊᖏᒡᓕᒋᐊᖅᑎᑦᑎᔪᒥ ᐅᓗᕆᐊᓇᕐᓂᖓᓂ ᐊᑲᐅᙱᓕᐅᕈᑕᐅᔪᓐᓇᖅᑐᓄᑦ.
“ᖃᐅᔨᒪᕗᒍᑦ ᑕᐃᔅᓱᒪᓂᒃᑲᓐᓂᖅ ᖃᐅᔨᓴᐃᓂᐅᔪᓂ ᐋᓐᓂᐊᖃᙱᓐᓂᖅᓴᐅᓂᕐᓂ ᐃᓯᖅᑎᓪᓗᑎᑦ ᐱᓚᒃᑐᐃᕕᖕᒧᑦ, ᐱᐅᔪᒥ ᖃᓄᐃᓕᖓᖃᕐᓂᖅᓴᐅᔪᓐᓇᖅᐳᑎᑦ. ᐊᒥᓱᑦ ᓄᓇᕗᒻᒥᐅᑦ ᐃᓄᖕᓂ ᐅᓂᒃᑐᓂ ᐊᑐᓲᖑᕗᑦ ᐋᓐᓂᐊᑯᑖᒃᑐᒥ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᖃᓄᐃᓐᓂᐅᔪᓄᑦ, ᐊᑐᐃᓐᓇᖃᑦᑎᐊᙱᓐᓂᐅᔪᒥ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐸᖅᑭᓂᐅᔪᒥ ᐱᔨᑦᑎᕋᕐᓂᕐᒧᑦ ᐊᒻᒪ ᑭᖑᕙᕆᐊᖅᑐᒥ ᐱᓚᒃᑕᐅᓂᕐᒧᑦ ᐸᖅᑭᔭᐅᓂᖓᓐᓂ,” ᐅᖃᓚᐅᖅᐳᖅ ᓘᒃᑖᖅ ᔭᐃᓴᓐ ᒪᒃᕕᑯᕐ, ᑎᑎᕋᖅᑎᐅᓛᖑᔪᖅ ᖃᐅᔨᓴᕐᓂᐅᔪᒥ.
ᒫᓐᓇᐅᔪᒥ, 18–ᓂ ᐃᓕᓐᓂᐊᖅᑎᑕᖃᖅᐳᖅ ᕿᑎᐊᓂ ᐊᕐᕌᒍᒥ ᐊᑕᐅᓯᕐᒥ ᐊᒻᒪ ᑎᓴᒪᒥ ᐃᓚᐅᖃᑕᐅᔪᓂ ᐃᓗᐊᖅᓴᐃᔨᙳᕐᓂᕐᒥ ᐱᓕᕆᐊᖑᔪᒥ ᓄᓇᕗᒻᒥ ᐅᑭᐅᖅᑕᖅᑐᒥ ᓯᓚᑦᑐᖅᓴᕐᕕᖕᒥ, 7–ᖑᔪᑦ ᐃᓅᓪᓗᑎᒃ.
ᕿᑎᐊᓂ 2004–ᒥ ᐊᒻᒪ 2021–ᒥ, 70–ᓂ ᐃᓗᐊᖅᓴᐃᔨᙳᕋᓱᐊᖅᑐᓂ ᐃᓱᓕᑦᑎᔪᓂ ᓄᓇᕗᒻᒥ ᐅᑭᐅᖅᑕᖅᑐᒥ ᓯᓚᑦᑐᖅᓴᕐᕕᐅᔪᒥ (NAC), 28–ᖑᔪᑦ ᐃᓅᓪᓗᑎᒃ.
ᐅᑯᐊ ᐅᓄᕐᓂᐅᔪᑦ ᑲᔪᖏᖅᓴᐃᓐᓇᖅᐳᑦ — ᑕᑯᒃᓴᐅᑎᑦᑎᕗᖅ ᐱᕈᖅᐸᓪᓕᐊᓂᐅᔪᒥ, ᐊᒻᒪ ᐱᓕᕆᐊᖑᔪᖅ ᐊᑐᐃᓐᓇᐅᑎᑕᐅᔪᒥ ᓯᓚᑦᑐᖅᓴᕐᕕᑎᒍᑦ ᐊᖏᒡᓕᕙᓪᓕᐊᒋᕗᖅᑕᐅᖅ.
ᐃᖃᓗᒃᑑᑦᑎᐊᖅ ᐊᑐᐃᓐᓇᖃᖅᑎᑦᑎᓂᐊᖅᐳᖅ ᐃᓗᐊᖅᓴᐃᔨᑐᐃᓐᓇᒧᑦ ᐃᓱᓕᑦᑎᓂᐅᔪᒥ ᓯᕗᓪᓕᖅᐹᑦᑎᐊᒥ ᑕᒪᑐᒪᓂ ᐊᕐᕌᒎᔪᒥ ᐊᒻᒪᓗ ᐊᖏᒡᓕᒋᐊᖅᑕᐅᓂᐊᖅᐳᖅ ᓯᕗᓂᐊᓂ–ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᖃᐅᔨᓴᐃᓂᐅᔪᒥ ᐸᐃᑉᐹᖅᑖᕐᓂᕐᒧᑦ ᕿᑎᕐᒥᐅᓂ ᓄᓇᓕᖕᓂ.
6–ᖑᔪᓂ ᐃᓕᓐᓂᐊᖅᑎᓂ ᐃᓕᓐᓂᐊᕆᐊᖅᑐᒃᓴᐅᑕᐅᔪᓂ ᓯᕗᓂᐊᓂ–ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᐊᖑᔪᒥ ᑲᖏᖅᖠᓂᕐᒥᑦᑕᐅᖅ, ᐊᒻᒪ ᓄᓇᕗᒻᒥ ᐅᑭᐅᖅᑕᖅᑐᒥ ᓯᓚᑦᑐᖅᓴᕐᕕᖕᒥ ᐸᕐᓇᒃᐸᓪᓕᐊᕗᑦ ᐱᒋᐊᕐᓂᐊᕐᓂᖓᓂ ᐃᓗᐊᖅᓴᐃᔨᑐᐃᓐᓇᕐᒥ ᐱᓕᕆᐊᖑᔪᒥ ᓯᕗᓂᒃᓴᐅᔪᒥ.
ᑕᐃᒪᑐᖅ ᐅᑯᐊ ᓱᒃᑲᐃᒃᑲᓗᐊᖅᑎᓪᓗᒍ–ᑭᓯᐊᓂ–ᑲᔪᓰᓐᓇᖅᑐᒥ ᐱᐅᓯᒋᐊᖅᐸᓪᓕᐊᔪᓂ ᓈᒻᒪᖕᓂᐊᖅᐳᑦ ᐱᐅᓯᒋᐊᖅᑎᑦᑎᓂᕐᒥ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐸᖅᑭᓂᐅᔪᒥ ᖃᓄᐃᓕᖓᓂᐅᔪᓂ ᓄᓇᕗᒻᒥ.