ᐃᓐᓇᑐᖃᐅᓯᕝᕕᒃᑖᕆᐊᖃᕐᓂᖅ ᓄᓇᕗᒥ ᓄᓇᕗᑦ ᒐᕙᒪᒃᑯᖏᓐᓄᑦ ᐃᓱᒪᓕᐅᕈᑕᐅᓇᓱᒃᖢᓂ ᐊᖏᖃᑎᒌᒍᓐᓇᐃᓪᓕᓯᒪᖃᑦᑕᕐᒪᑕ.
ᒪᓕᒐᓕᐅᖅᑎᑐᐃᓐᓇᐃᑦ ᒥᓂᔅᑕᒡᒍᑕᐃᓪᓗ ᐊᖏᖃᑎᒌᒃᓯᒪᙱᑐᐃᓐᓇᙱᑦᑐᑦ ᑕᒪᒃᑯᐊ ᐃᓐᓇᑐᖃᐅᓯᕝᕕᒃᑖᖑᓇᔭᖅᑐᑦ ᐃᑲᔫᑕᐅᓇᔭᕐᒪᖔᑕ ᐃᑲᔫᑕᐅᓇᔭᙱᒻᒪᖔᑕᓘᓐᓃᑦ ᓄᓇᖏᓐᓄᑦ, ᑭᓯᐊᓂᓕ ᑕᒪᒃᑯᐊ ᐃᓐᓇᑐᖃᐅᓯᕝᕕᐅᓇᔭᖅᑐᑦ ᑮᓇᐅᔭᖁᑎᖏᓐᓄᑦ ᐱᖃᑕᐅᑎᑕᐅᔪᓐᓇᕋᔭᕐᒪᖔᑕ ᐊᑐᓕᖅᑎᖅᑕᐅᓗᑎᒡᓗ.
ᐸᕐᓇᐅᑕᐅᓯᒪᔪᖅ ᐃᑲᔪᖅᑐᖅᑕᐅᔪᖅ ᓴᓇᔪᒪᑉᓗᑎᒃ ᐃᓐᓇᑐᖃᐅᓯᕝᕕᖕᓂᒃ ᐃᖃᓗᖕᓂ, ᑲᖏᖅᖠᓂᕐᒥ ᐊᒻᒪᓗ ᐃᖃᓗᒃᑑᑦᑎᐊᕐᒥ, ᑕᒪᓐᓇ ᑭᕙᓪᓕᕐᒥ ᒪᓕᒐᓕᐅᖅᑎᐅᓚᐅᖅᑑᑉ ᒪᓃᑦᑐᖅᑖᒻᓴᓐ ᖁᕕᐊᓱᒍᓐᓃᕈᑎᒋᓯᒪᖃᑦᑕᖅᓯᒪᔭᖓ.
ᐊᔭᐅᖅᑐᐃᖃᑦᑕᖅᓯᒪᔪᖅ ᐊᑎᓕᐅᖅᑎᑦᑎᓚᐅᖅᓯᒪᑉᓗᓂ ᐅᑭᐊᒃᓵᖑᓚᐅᖅᑐᖅ ᐊᑎᓕᐅᖅᑕᐅᓯᒪᓕᖅᑐᒥᒃ 22,000 ᐅᖓᑖᓂ ᐃᓄᖕᓄᑦ ᐃᑲᔪᖅᑐᐃᔪᓄᑦ ᐃᓐᓇᑐᖃᐃᑦ ᓄᓇᓕᖕᓃᖃᑦᑕᖁᑉᓗᒋᑦ ᐃᖕᒥᓂᒃ ᑲᒪᔪᓐᓇᐃᓪᓕᓯᒪᑎᓪᓗᒋᑦ.
“ᐊᓯᔾᔩᔪᒪᖅᑰᙱᑦᑐᑦ ᐸᕐᓇᐅᑎᒥᒃ ᓄᓇᓕᖕᓂ ᐊᕕᒃᑐᖅᓯᒪᔪᓂᒃ ᓴᖅᑭᑎᑦᑎᔪᒪᓂᕐᒧᑦ ᒥᑭᓂᖅᓴᓄᑦ, ᐱᖓᓱᓂᒃ ᐃᒡᓗᑕᓕᖕᓄᑦ, ᓯᑕᒪᓄᑦ ᐃᒡᓗᑕᓕᖕᓄᑦ ᐃᓐᓇᑐᖃᐅᓯᕝᕕᖕᓂᒃ ᓄᓇᓕᖕᓂ,” ᑕᐃᒪᓐᓇ ᐅᖃᖅᖢᓂ ᑖᒻᓴᓐ. “ᓄᓇᓕᖕᓂ ᐊᕕᒃᑐᖅᓯᒪᔪᓂᒃ ᐃᓐᓇᑐᖃᐅᓯᕝᕕᖕᓂᒃ ᓴᓇᒃᐸᑕ (ᑲᖏᖅᖠᓂᕐᒥ, ᐃᖃᓗᖕᓂ ᐊᒻᒪᓗ ᐃᖃᓗᒃᑑᑦᑎᐊᕐᒥ), ᐅᖃᕐᓂᐊᖅᑐᑦ ᓈᒻᒪᒃᓯᓂᖏᓐᓄᑦ (ᐊᑯᓂ ᑲᒪᒋᔭᐅᔪᓐᓇᖅᓯᔪᓄᑦ) ᐃᒡᓖᑦ, ᓇᑉᐸᖅᑎᕆᓂᖅ ᐊᔪᖅᑐᒍᑦ ᓄᓇᑉᓯᓐᓂ. ᖁᔭᓈᖅᑕᐅᓯᒪᓕᕐᓂᐊᖅᑐᑦ ᐃᓱᒪᒃᓴᖅᓯᐅᕈᑕᐅᓯᒪᔪᑦ ᓄᓇᓕᖕᓂ.”
ᑲᙳᑦᑕᐃᓐᓂᕋᓚᐅᖅᑕᖏᑦ, ᑖᒻᓇ ᑕᒡᕙ ᐅᖃᐅᓯᖅ ᓈᒻᒪᖕᓂᖅᐹᖑᔪᖅ.
ᒪᓕᒃᖢᒍ ᒪᓕᒐᓕᐅᕐᕕᒡᔪᐊᕐᒥ ᐊᑐᕚᒥ ᑭᒡᒐᖅᑐᐃᔨᑉᑕ ᓗᐊᕆ ᐃᑦᓚᐅᑦ ᐅᖃᐅᓯᕆᓯᒪᔭᖓ, ᐃᓐᓇᑐᖃᐅᓯᕝᕕᐅᔪᑦ ᓄᓇᕗᒥ ᐊᒥᒐᖅᓰᓐᓇᓕᖅᑐᑦ ᐃᒡᓕᕐᓂᒃ 2017-ᒥ ᐱᒋᐊᖅᖢᒍ.
ᓄᕕᐱᕆᒥ, ᐃᑦᓚᐅᑦ ᐊᐱᕆᓚᐅᖅᑐᖅ ᐊᖓᔪᖅᑳᕐᔪᐊᖅ ᔭᔅᑕᓐ ᑐᑐᕐᒥᒃ ᒪᓕᒐᓕᐅᕐᕕᒡᔪᐊᕐᒥ ᖃᓄᐃᓕᒋᐊᖁᑉᓗᒍ ᐊᒻᒪᓗ ᑮᓇᐅᔭᓂᒃ ᐃᓕᓯᖁᑉᓗᒍ ᓄᓇᕗᒧᑦ ᐃᓐᓇᑐᖃᕐᓄᑦ ᐊᑐᖅᑐᒃᓴᓂᒃ, ᐅᖃᖅᖢᓂᓗ ᑖᒻᓴᓐ ᐅᖃᐅᓯᕆᓯᒪᔭᖏᓐᓂᒃ ᐊᑎᓕᐅᖅᑎᑦᑎᓯᒪᓚᐅᕐᓂᖓᓂᒃ.
“ᐅᖃᖅᑎᑦᑎᔩ, ᐃᓐᓇᑐᖃᕆᔭᖅᐳᑦ ᓄᓇᕗᒥ ᓅᑕᐅᖃᑦᑕᓕᕐᒪᑕ ᕿᒪᐃᑎᑕᐅᑉᓗᑎᒃ ᐃᓚᒥᓂᒃ, ᓄᓇᒥᓂᒃ ᐊᒻᒪᓗ ᓄᓇᖁᑎᒥᓂᒃ ᑲᒪᒋᔭᐅᕝᕕᒃᓴᖏᓐᓂᒃ ᓴᖅᑭᑦᑐᖃᕈᓐᓇᐃᓪᓕᓯᒪᑎᓪᓗᒍ ᓄᓇᕗᒥ,” ᑕᐃᒪᓐᓇ ᐅᖃᖅᖢᓂ ᐃᑦᓚᐅᑦ.
ᒐᕙᒪᑐᖃᒃᑯᑦ ᑮᓇᐅᔭᒥᓂᒃ ᓴᖅᑭᑎᑦᑎᓂᐊᖅᑎᓪᓗᒋᑦ 2022-ᒥ, ᓴᖅᑭᑎᑕᐅᓚᐅᖅᑐᖅ ᓯᑕᒻᒥᕐᒥ, ᐊᐃᕆᓕ 7-ᒥ, ᓂᑉᓕᐅᑎᖃᖅᓯᒪᙱᑦᑐᖅ ᑕᐃᒪᐃᑦᑐᒃᑯᑦ ᐃᑲᔫᑎᒃᓴᒥᒃ.
ᐃᓐᓇᑐᖃᐃᑦ ᐊᐅᓪᓚᖅᑎᑕᐅᖃᑦᑕᖅᑎᓪᓗᒋᑦ ᓄᓇᕗᑦ ᓯᓚᑖᓄᑦ ᐃᓐᓇᑐᖃᐅᓯᕝᕕᖕᓄᑦ ᓂᙵᒍᑕᐅᖃᑦᑕᖅᓯᒪᓕᕐᒪᑦ ᐊᒻᒪᓗ ᐅᖃᐅᓯᐅᖃᑦᑕᖅᓯᒪᑉᓗᑎᒃ ᓱᓕᙱᑦᑐᒃᑯᑦ ᓇᒡᓕᒋᔭᐅᔪᑦ ᐃᓚᒋᔭᐅᔪᑦ ᐊᑭᖃᕋᔭᕐᓂᖏᓐᓄᑦ $16,000-ᒥᒃ ᐊᑐᓂ ᑮᓇᐅᔭᓕᖅᑐᖅᑕᐅᓯᒪᔪᒃᑯᑦ. ᑎᑎᖅᑲᖅ ᑎᑎᕋᖅᑕᐅᓯᒪᓂᑰᔪᖅ ᐸᐃᕆᔭᐃᑦ ᑎᒍᒥᐊᖅᑎᒃᑯᓐᓂᙶᖅᑐᖅ, ᐊᐅᓚᑦᑎᔨᐅᓚᐅᖅᑐᑦ ᐃᖃᓗᖕᓂ ᐃᓐᓇᑐᖃᐅᓯᕝᕕᖕᒥ, ᑎᑎᕋᐅᓯᖃᓚᐅᖅᑐᑦ ᐃᓱᒫᓘᑎᒥᓂᒃ ᐱᔾᔪᑎᖃᖅᖢᑎᒃ ᓈᒻᒪᒋᔭᐅᙱᑦᑐᒃᑯᑦ ᑐᓴᖅᑎᑕᐅᓯᒪᖃᑦᑕᕐᓂᖏᓐᓄᑦ Embassy West-ᒦᑦᑐᓂᒃ ᐊᑐᕙᒥ ᐊᒻᒪᓗ ᐃᓚᒋᔭᖏᓐᓂᙶᖅᑐᑦ ᒫᑦᓯ 3-ᒥ, ᐱᔾᔪᑎᖃᖅᖢᑎᒡᓗ ᓈᒻᒪᙱᖃᑦᑕᖅᓯᒪᓂᖓ ᑐᓴᐅᒪᖃᑦᑕᐅᑎᓂᒃᑯᑦ, ᑐᓵᔨᖃᖃᑦᑕᙱᓐᓂᒃᑯᑦ ᐊᒻᒪᓗ ᐃᓕᖅᑯᓯᑐᖃᑎᒍᑦ ᐱᔾᔪᑎᖃᕐᓗᑎᒃ ᑲᒪᒋᔭᐅᑦᑎᐊᕆᐊᖃᕐᓂᖏᓐᓄᑦ.
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒥᓂᔅᑕᖓ ᔮᓐ ᒪᐃᓐ ᑭᐅᓚᐅᖅᑐᖅ ᑎᑎᖅᑲᒥᒃ ᐊᐃᕆᓕ 5-ᒥ, ᐅᖃᖅᓗᓂ Embassy West ᐃᓐᓇᑐᖃᐅᓯᕝᕕᒃ ᑎᑎᖅᑲᕐᒥᒃ ᓇᒃᓯᐅᔾᔨᓚᐅᕐᓂᖏᓐᓄᑦ ᒪᓕᒐᓕᕆᔨᒃᑯᖏᓐᓄᑦ, ᐊᓐᑎᐅᕆᔪᒥ ᐃᓐᓇᑐᖃᐅᓯᕝᕕᖕᓂᒃ ᐊᐅᓚᑦᑎᔨᒃᑯᑦ ᑲᒪᔨᖏᓐᓄᑦ, ᓇᒃᓯᐅᔾᔭᐅᖅᑳᖅᖢᑎᒃ ᑎᑎᖅᑲᕐᒥᒃ ᑕᒪᓐᓇ ᖃᐅᔨᓴᖅᑕᐅᓕᓚᐅᖅᑐᖅ.
ᖃᐅᔨᓴᖅᑕᐅᖅᑳᖅᑎᓪᓗᒍ ᐃᒪᓐᓇᐃᑦᑐᒥᒃ ᓴᖅᑭᑦᑐᖃᓚᐅᖅᑐᖅ “ᓇᓂᓯᓚᐅᙱᑦᑐᑦ ᒪᓕᑦᑎᐊᙱᑦᑐᓂᒃ ᐃᓱᒫᓘᑕᐅᔪᒃᑯᑦ ᓇᓗᓇᐃᔭᖅᑕᐅᔪᒃᑯᑦ ᐸᐃᕆᔩᑦ ᑎᒍᒥᐊᖅᑎᒃᑯᓐᓄᑦ.”
ᑕᒪᕐᒥᒃ 30-ᖃᔭᐅᔪᑦ ᐃᓱᒫᓘᑕᐅᔪᑦ ᑎᑎᕋᖅᑕᐅᓯᒪᔪᑦ ᑎᑎᖅᑲᑎᒍᑦ ᐊᔾᔨᐅᙱᑦᑐᒃᑯᑦ ᐃᓱᒫᓘᑕᐅᓯᒪᒐᓗᐊᖅᐸᑕ, ᐃᓐᓇᑐᖃᕆᔭᖅᐳᑦ ᓈᓚᒃᑕᐅᔭᕆᐊᓖᑦ ᐅᖃᕌᖓᑕ ᓴᓚᐅᓱᙱᓐᓂᖏᓐᓄᑦ ᐅᕝᕙᓘᓐᓃᑦ ᖁᕕᐊᓱᙱᓐᓂᖏᓐᓄᑦ ᐅᖃᐅᑎᔭᐅᓯᒪᑎᓪᓗᒋᑦ ᐊᑦᑕᓇᖅᑐᒦᙱᓐᓂᖏᓐᓄᑦ ᐃᓂᒋᓕᖅᑕᒥᓂᒃ.
ᒪᐃᓐ ᑭᐅᔾᔪᑎᖓ ᐃᒪᓐᓇᐃᓕᒃᑲᓐᓂᓚᐅᖅᑐᖅ: “ᑐᑭᓯᐅᒪᔪᖓ ᐊᒥᓱᑦ ᐃᓄᐃᑦ ᐊᒃᓱᕉᑎᖃᕐᒪᑕ ᐃᓚᒋᐊᖅᓯᖁᔨᑉᓗᑎᒃ ᐊᑐᐃᓐᓇᐅᓇᔭᖅᑐᓂᒃ ᓄᓇᕗᒥ ᐃᓐᓇᑐᖃᐅᓯᕝᕕᖕᓂᒃ ᓄᓇᕗᒥ ᐃᓐᓇᑐᖃᕐᓄᑦ ᐊᒻᒪᓗ ᐱᓕᕆᓇᓱᒃᑐᒍᑦ ᑕᐃᒪᐃᑦᑐᖃᓕᕈᓐᓇᖁᑉᓗᒍ. ᓄᓇᕗᑦ ᒐᕙᒪᒃᑯᖏᑦ ᐱᓕᕇᓐᓇᖅᑐᑦ ᐃᓚᓯᒋᐊᕈᒪᑉᓗᑎᒃ ᓄᓇᕗᒥ ᐃᓐᓇᑐᖃᐅᓯᕝᕕᖕᓂᒃ ᐸᕐᓇᐃᓯᒪᔪᑦ ᐃᓐᓇᑐᖃᐅᓯᕝᕕᒃᑖᖁᑉᓗᒍ ᑲᖏᖅᖠᓂᕐᒥ ᑲᒪᒋᔭᐅᖏᓐᓇᓕᕋᔭᖅᑐᓄᑦ. ᐱᓕᕆᔪᒪᑦᑎᐊᖅᑐᒍᑦ ᐱᑕᖃᓕᖁᑉᓗᒍ ᓄᓇᕗᒥ ᐃᓐᓇᑐᖃᐅᓯᕝᕕᖕᓂᒃ ᐊᒻᒪᓗ ᑲᒪᒋᔭᐅᑦᑎᐊᖃᑦᑕᖁᑉᓗᒋᑦ ᐃᓕᖅᑯᓯᑐᖃᑎᒍᓪᓗ.”
ᐃᒡᕕᑦ ᒥᓂᔅᑕᐅᔪᑎᑦ ᒪᐃᓐ ᐱᒋᐊᕈᑎᒋᔪᓐᓇᖅᓯᔭᐃᑦ. 2019-ᒥ, ᐅᔾᔨᖅᑐᖁᔨᓚᐅᖅᑐᑎᑦ ᐊᑭᕋᖅᑐᖅᖢᑎᑦ ᐱᑕᖃᓕᕋᔭᕐᓂᖓᓄᑦ ᐊᑑᑎᖃᙱᑦᑐᓂᒃ ᓄᓇᓕᖕᓂᒃ ᐊᕕᒃᑐᖅᓯᒪᔪᓂᒃ ᐃᓐᓇᑐᖃᐅᓯᕝᕕᖕᓂᒃ, ᒪᑐᔭᐅᑎᓪᓗᒍ ᖃᒪᓂ’ᑐᐊᕐᒥ ᐃᓐᓇᑐᖃᐅᓯᕝᕕᒃ ᐱᒋᐊᕈᑕᐅᓚᐅᙱᑦᑐᖅ ᒪᓕᒃᑕᐅᓕᕐᓂᐊᖅᑐᒃᑯᑦ.
ᐊᖏᕐᕋᕆᔭᐅᔪᓂᒃ ᑲᒪᒋᔭᐅᓲᑦ ᒫᓐᓇᐅᔪᒧᑦ ᐱᑕᖃᙱᑦᑐᓂᒃ ᐱᕚᓪᓕᕈᑕᐅᔪᒃᓴᐅᔪᑦ, ᑭᓯᐊᓂ ᐱᓕᕆᒃᑲᓐᓂᕆᐊᖃᖅᑐᒍᑦ ᐃᓐᓇᑐᖃᕆᔭᖅᐳᑦ ᐊᑦᑕᓇᖅᑐᖃᙱᑦᑐᒃᑯᑦ ᐃᓅᔪᓐᓇᖁᑉᓗᒋᑦ ᓄᓇᖏᓐᓂᒃ.