ᖃᕋᓴᐅᔭᒃᑯᑦ ᑲᑎᙵᓂᕆᔭᖓᓂ ᓴᓂᓕᕗᑦ ᖃᓪᓗᓈᑦ ᓄᓇᖓᓐᓂ ᐃᓱᒪᒋᕙᙱᑕᖏᓐᓂ. ᐃᔨᕋᖅᑑᑕᐅᙱᓚᖅ ᑕᒪᕐᒥᒐᓚᑦ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᓄᓇᕗᒻᒥ ᐃᓚᑰᕐᔪᐊᕐᓂᖓᓂ–ᓇᓗᓇᐃᖅᑕᐅᓯᒪᓂᖓᓂ ᐅᖃᐅᓯᐅᒐᔪᒃᑐᒥ ᓄᓇᕗᒻᒥ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᐃᓚᑰᓂᐅᔪᓂ ᐅᓂᒃᑳᓕᐊᒥ, ᐱᔭᕇᖅᑕᐅᓚᐅᖅᑐᒥ ᓄᓇᕗᒻᒥ ᑐᙵᕕᒃᑯᓐᓂ ᐅᒃᑐᐱᕆ 2020–ᒥ.
ᐊᑕᐅᓯᐅᔪᖅ ᓇᓗᓇᐃᖅᑕᐅᓯᒪᔪᓄᑦ ᑕᐃᑲᓂ ᐅᓂᒃᑳᓕᐊᒥ ᓱᓕᓂᐅᕗᖅ ᓄᓇᕗᒻᒥᐅᑦ ᐊᑐᐃᓐᓇᖃᕐᓂᖏᓐᓂ ᖃᕋᓴᐅᔭᑎᒍᑦ ᓱᒃᑲᓛᖑᔪᒥ 8–ᖏᖅᓱᖅᑐᒥ ᓱᒃᑲᐃᓐᓂᖅᓴᐅᔪᒥ ᑲᓇᑕᓕᒫᒥ ᑕᐃᒪᐃᒐᔪᖕᓂᖓᓂ.
ᐅᓇ ᐊᒃᑐᐃᓂᖃᖅᐳᖅ ᑭᓱᓕᒫᓂᒃ ᒫᓐᓇᐅᔪᒥ ᐃᓅᖃᑎᒌᖑᔪᓄᑦ, ᐊᒻᒪ ᐱᓪᓚᑲᐅᔭᕐᓂᐅᙱᓚᖅ.
ᖃᕋᓴᐅᔭᖅ ᐊᒥᓱᑎᒍᑦ ᐋᔩᖃᑎᖃᖅᐸᖕᓂᑦᑎᓐᓂ ᖃᐅᑕᒫᒥ ᑐᙵᕕᖃᕐᓂᐅᔪᒥ. ᑕᐃᒫᒃ ᐃᓕᓐᓂᐊᖅᑏᑦ ᐱᔭᕇᖅᓯᓲᖑᕗᑦ ᐅᖓᓯᒃᑐᒥ ᐃᓕᓐᓂᐊᕐᓂᐅᔪᓂ, ᖃᓄᖅ ᐱᓕᕆᕙᖕᓂᑦᑎᓐᓂ ᐃᖅᑲᓇᐃᔮᑦᑎᓐᓂ ᐊᖏᕐᕋᑦᑎᓐᓂ ᐊᓂᑦᑕᐃᓕᒪᔭᕆᐊᖃᖅᑎᓪᓗᑕ, ᖃᓄᖅ ᑎᑭᓴᐃᕙᖕᓂᑦᑎᓐᓂ ᐱᖁᑎᓂ ᐊᑐᐃᓐᓇᐅᑲᐅᑎᒋᙱᑦᑐᓂ.
ᓄᐊᑦᕕᐊᔅᑎᐅᓪ ᓇᓗᓇᐃᖅᓯᓚᐅᖅᐳᑦ ᑭᕙᓪᓕᕐᒥ ᑐᓴᒐᒃᓴᓕᕆᔨᒃᑯᓐᓄᑦ “ᐊᖏᐸᓗᒃᑐᒥ ᓴᖑᓂᖃᕐᓂᖓᓂ ᖃᕋᓴᐅᔭᒃᑯᑦ ᐊᑐᕐᓂᐅᔪᒥ ᐅᓄᕐᓂᖅᓴᐃᑦ ᐃᓄᐃᑦ ᐃᖅᑲᓇᐃᔭᕐᓂᖏᓐᓂ ᐊᒻᒪ ᐃᓕᓐᓂᐊᕐᓂᖏᓐᓂ ᐊᖏᕐᕋᒥᒃ,” ᐅᓄᕐᓂᖅᓴᐅᔪᓂ ᐱᓕᕆᔾᔪᑎᓂᒃ ᑲᑎᙵᓂᖃᖅᑐᓂ ᐊᑕᐅᑦᑎᒃᑯᑦ. ᐊᒃᑐᐃᓂᖃᖅᑐᒥ ᓂᐅᕕᖅᐸᒃᑐᓄᑦ ᐊᑐᕐᓂᖓᓂ.
ᒫᓐᓇᐅᔪᒥ, ᕿᒥᕐᓗᖓ ᓄᓇᕘᑉ ᖃᕋᓴᐅᔭᑎᒍᑦ ᐱᔨᑦᑎᕋᕐᓂᖓ ᑐᙵᕕᖃᖅᐳᖅ ᖃᖓᑦᑕᖅᑎᑕᐅᓯᒪᓂᐅᔪᓄᑦ, ᐊᖏᔪᒥ ᐱᐅᓯᒋᐊᕐᔪᐊᖅᓯᒪᔪᒥ ᖄᖏᖅᓯᒪᔪᓄᑦ ᖃᔅᓯᒐᓚᖕᓄᑦ ᐊᕐᕌᒍᓄᑦ, ᑭᓯᐊᓂ ᓱᓕ ᓱᒃᑲᐃᐸᓗᒃᐳᑦ ᐊᒻᒪ ᐊᑭᑐᕐᔪᐊᐸᓗᒃᖢᓂ.
SSi ᑲᓇᑕ, ᐊᖓᔪᖅᑳᖃᖅᑎᐅᓪᓗᓂ ᑲᒻᐸᓂᐅᔪᖅ ᕿᓂᕐᒥ, ᓯᕗᓪᓕᖅᐹᒥ ᑲᒪᒋᔭᖃᖅᐳᖅ ᐆᒧᖓ ᑲᓱᖃᑎᒌᒃᓯᒪᔪᒧᑦ, ᐊᒻᒪ ᑲᑎᖅᓱᖅᑕᐅᕙᓪᓕᐊᔪᑦ ᑮᓇᐅᔭᓂ ᑐᖅᑯᖅᑕᐅᓯᒪᓪᓗᑎᒃ ᐱᕈᖅᐸᓪᓕᐊᑎᑕᐅᔪᓂ ᐅᓄᕐᓂᖅᓴᐅᔪᒥ $100 ᒥᓕᐊᓐᓂ ᖃᕋᓴᐅᔭᑎᒍᑦ ᓄᓇᓖᑦ ᐊᑐᖅᐸᒃᑕᖏᓐᓂ ᐊᐅᓚᔪᓐᓇᖁᓪᓗᒋᑦ ᓄᓇᕗᒻᒥ ᑕᐃᒪᙵᓂ 2005–ᒥ. ᔭᓄᐊᕆᒥ, ᑲᒻᐸᓂᒃᑯᑦ ᐊᖏᒡᓕᒋᐊᖅᓯᓚᐅᖅᐳᑦ ᑎᑎᕋᖅᓯᒪᔪᓂ ᖃᐅᔨᓴᖅᑕᐅᓂᑯᓂ ᐃᓱᖏᓐᓂ ᐊᖏᒡᓕᒋᐊᖅᑎᑦᑎᓚᐅᖅᑎᓪᓗᒋᑦ ᑲᓱᖃᑎᒌᒃᓯᒪᔪᓄᑦ ᐱᔪᓐᓇᕐᓂᖓᓂ ᐱᓪᓗᑎᒃ ᐊᑐᐃᓐᓇᖃᕐᓂᕐᒥ ᑐᕌᖓᔪᒥ ᖃᖓᑦᑕᖅᑎᑕᐅᓯᒪᔪᒥ ᑲᓇᑕᐅᑉ ᐅᑭᐅᖅᑕᖅᑐᖓᓄᑦ. ᐊᖏᔪᒥ ᐱᓕᕆᓂᐅᔪᖅ, ᑭᓯᐊᓂ ᓱᓕ ᓈᒻᒪᙱᓚᖅ, ᐅᑯᓄᖓᓘᓐᓃᑦ ᐃᔨᐅᔪᓄᑦ ᐱᕙᓪᓕᐊᑎᑕᐅᓂᖓᓄᑦ ᐊᖓᔪᖅᑳᒻᒪᕆᐅᔪᒥ ᑏᓐ ᐳᕌᒃᑐᕐᒧᑦ.
“ᓈᒻᒪᒃᐹ? ᐋᒃᑲ,” ᐅᖃᓚᐅᖅᐳᖅ ᐳᕌᒃᑐᕐ. “ᑭᓯᐊᓂ ᐱᐅᓂᖅᓴᒻᒪᕆᐅᕗᖅ ᑕᐃᔅᓱᒪᓂᐅᓚᐅᖅᑐᒥ, ᐊᒻᒪ ᓱᓕ ᐱᓕᕆᒃᑲᓐᓂᕋᓱᐊᖅᐳᒍᑦ.”
ᐊᐃᑦᑖᖑᒐᓗᐊᖅ SSi–ᑯᓐᓄᑦ, ᒐᕙᒪᑐᖃᒃᑯᑦ ᐅᖃᓘᒻᒥ ᑭᐅᓯᑲᑕᒍᓐᓃᖅᑑᔮᖅᐳᑦ, ᓇᓗᓇᙱᑦᑐᒥ ᑕᐅᑐᒃᑕᑐᐊᖃᑲᐃᓐᓇᕐᓂᐅᔪᒥ fiber-optic ᐱᓕᕆᐊᒃᓴᐅᔪᓄᑦ, ᐱᖓᓱᑦ ᐅᖃᓪᓚᖕᓂᐅᔪᓂ ᐊᓐ, ᑕᒪᒃᑭᑦ ᐃᓚᖃᖅᑐᒥ ᐊᑭᑐᔪᕐᔪᐊᕌᓗᖕᓂ.
ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᑦ ᑲᒪᒋᔭᖃᖅᐳᑦ ᐊᐅᓚᑦᑎᓂᕐᒥ ᓴᓇᔭᐅᓂᖓᓂ ᐊᒻᒪ ᓇᑉᐸᖅᑎᕆᓂᕐᒥ ᓄᓇᕗᒻᒥ ᒐᕙᒪᒃᑯᓐᓄᑦ ᕙᐃᐸᒧᑦ ᑲᓱᕐᕕᒃᓴᖓᓂ ᖃᓪᓗᓈᑦ ᓄᓇᖓᓐᓄᑦ ᑲᓇᑕᒥ, ᐊᖏᖅᑕᐅᓚᐅᖅᑐᒥ 2018-‘19–ᒥ ᑮᓇᐅᔭᓕᕆᓂᕐᒧᑦ ᐊᕐᕌᒍᖓᓂ ᐊᒻᒪ ᓂᕆᐅᒋᔭᐅᔪᒥ ᐱᔭᕇᖅᑕᐅᓛᕐᓂᖓᓂ 2025-‘26–ᒥ ᓇᓚᐅᑦᑖᕆᔭᐅᔪᒥ $209.5-ᒥᓕᐊᓐᓂ ᑕᒪᐃᑎᒍᑦ ᐊᑭᒋᓇᔭᖅᑕᖓᓂ.
ᒫᓐᓇᐅᔪᒥ, ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᑕᒪᒃᑭᖅᑐᒥ ᓇᖕᒥᓂᕆᔭᐅᓇᔭᖅᐳᖅ ᓄᓇᕗᒻᒥ ᒐᕙᒪᒃᑯᓐᓂ, ᑭᓯᐊᓂ ᐱᒻᒪᕆᐅᓛᖑᔪᒥ ᐃᓱᒪᓕᐅᕆᓂᐅᔪᒥ ᐊᑲᐅᙱᓕᐅᕈᑕᐅᔪᒥ ᐃᓚᑰᓂᐅᕗᖅ ᕿᑎᐊᓂ $150 ᒥᓕᐊᓐᓂ ᑐᓂᔭᐅᔪᒥ ᑲᓇᑕᒥ ᒐᕙᒪᒃᑯᓐᓂ ᐊᒻᒪ $17.5 ᒥᓕᐊᓐᓂ ᓄᓇᕗᒻᒥ ᒐᕙᒪᒃᑯᓐᓂ ᓇᓗᓇᐃᖅᓯᒪᔭᖓᓐᓂ. ᖄᒃᑲᓐᓂᐊᒍᑦ ᐊᑭᐅᔪᓂ ᐊᑐᖅᑕᐅᔪᓂ – ᒪᓕᒐᓕᐅᖅᑎ ᔮᓐ ᒪᐃᓐ ᓴᖅᑭᑎᓯᒪᔭᖓᓂ ᐃᓱᒫᓘᑕᐅᔪᓂ ᐊᑕᐅᓯᐊᙱᖦᖢᓂ – ᐲᖅᓯᔪᓐᓇᖅᐳᖅ ᐊᓯᖏᓐᓂ ᐱᔭᕆᐊᖃᒻᒪᕆᒃᑐᓂ ᐱᓕᕆᐊᖑᓂᐅᔪᓂ.
ᓄᓇᕗᒻᒥ ᐊᑐᓕᖅᑎᑕᐅᓂᖓᓂ ᑲᑎᒪᔨᕋᓛᑦ (NIC) ᐅᖃᓚᐅᖅᐳᑦ 1995–ᒥ ᒫᓐᓇᓕᓴᐅᓛᖑᔪᒥ ᖃᕋᓴᐅᔭᑎᒍᑦ ᐋᔩᖃᑎᒌᖕᓂᕐᒧᑦ ᑲᓱᖃᑎᒌᒃᓯᒪᔪᓄᑦ ᐱᓪᓚᕆᐅᓚᐅᖅᐳᖅ ᓄᓇᕘᑉ ᐱᓕᕆᑦᑎᐊᕈᓐᓇᕐᓂᖓᓂ, ᐊᒻᒪ ᐊᔭᐅᕆᓚᐅᖅᐳᑦ ᑲᓱᖃᑎᒌᒃᓯᒪᔪᓂ ᓴᓇᔭᐅᓂᖓᓂ ᕿᓚᒻᒥᐅᓛᒃᑯᑦ ᑲᑎᖅᓱᖅᑕᐅᕙᓪᓕᐊᔪᑦ ᑮᓇᐅᔭᓂ ᑐᖅᑯᖅᑕᐅᓯᒪᓪᓗᑎᒃ ᐱᕈᖅᐸᓪᓕᐊᑎᑕᐅᔪᓂ ᓄᓇᕗᒻᒥ ᓯᕗᓂᒃᓴᖓᓄᑦ ᐊᒻᒪ ᐊᐅᓚᔪᓐᓇᕐᓂᖓᓄᑦ ᖃᕋᓴᐅᔭᒃᑯᑦ ᓄᓇᕐᔪᐊᙳᖅᐸᓪᓕᐊᓂᖓᓂ. ᐅᑯᐊ ᐊᑐᖁᔭᐅᓇᔭᖅᑐᑦ ᑐᓴᖅᑕᐅᓚᐅᙱᑦᑎᐊᖅᐳᑦ.
ᓄᓇᕗᒻᒥ ᐊᑐᓕᖅᑎᑕᐅᓂᖓᓂ ᑲᑎᒪᔨᕋᓛᑦ ᐃᓂᖅᑎᕆᓚᐅᕆᕗᑦ: “ᐊᑭᖓ ᐃᓯᕐᓂᕐᒧᑦ ᖃᕋᓴᐅᔭᑎᒍᑦ ᓂᐅᕕᐊᒃᓴᖃᕆᐊᖅᑐᕐᓂᕐᒥ ᖁᑦᑎᖕᓂᖅᓴᐅᓂᐊᕐᓂᖓᓂ ᐊᑯᓂᐅᓂᖅᓴᐅᔪᒥ ᐱᒋᐊᕐᓂᐅᔪᒥ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᐱᑕᖃᙲᓐᓇᖅᑎᓪᓗᒋᑦ, ᐊᒻᒪ ᐃᓅᖃᑎᒌᖑᔪᓄᑦ ᐊᒻᒪ ᑮᓇᐅᔾᔭᒃᓴᓂᕐᒧᑦ ᓵᙵᔭᐅᔾᔪᑎᑦ ᐱᔪᓐᓇᙱᓐᓂᐅᔪᒥ ᐃᓚᐅᖃᑕᐅᓂᕐᒧᑦ ᐊᖏᓂᖅᓴᒻᒪᕆᐅᓂᐊᖅᐳᖅ.”
ᐊᐃᑦᑖᖑᒐᓗᐊᖅ ᑕᐃᒃᑯᐊ ᓯᕗᒻᒧᑦ–ᐃᓱᒪᔨᐅᔪᑦ ᓈᓚᒃᑕᐅᓚᐅᙱᓐᓂᖏᓐᓂ ᐊᕐᕌᒍᑦ 27–ᖑᓕᖅᑐᓂ ᖄᖏᖅᓯᒪᓕᖅᑐᓂ. ᒫᓐᓇ ᓄᓇᕗᒻᒥᐅᑦ ᐱᓕᕆᔭᕆᐊᖃᖅᐳᑦ ᑕᐃᒪᓐᓇᑐᐃᓐᓇᖅ ᐱᔪᓐᓇᕐᓂᑭᓐᓂᖅᓴᐅᓗᑎᒃ ᐊᒥᐊᒃᑯᖓᓂ ᑲᓇᑕᒥ ᐅᕙᓂ ᐱᓕᕆᓂᐅᔪᒥ ᐱᑎᓪᓗᒋᑦ ᐊᑭᑐᓂᖅᓴᒻᒪᕆᐅᔪᓂ ᐊᑭᐅᔪᓂᑦ. ᓄᓇᕗᒻᒥ ᒐᕙᒪᒃᑯᑦ ᐱᓕᕆᔪᓐᓇᕋᓗᐊᕈᑎᒃ ᐆᒥᖓ fiber-optic ᐱᓕᕆᐊᒃᓴᐅᔪᒥ, ᖃᔅᓯᒐᓚᖕᓂ ᐊᕐᕌᒍᓂ ᓂᕆᐅᖕᓂᖃᕐᓂᐊᖅᐳᑦ ᖃᕋᓴᐅᔭᑎᒍᑦ ᓇᒃᓯᐅᔾᔨᔪᓐᓇᕐᓂᕐᒥ ᑲᓱᖃᑎᒌᒃᓯᒪᔪᑦ ᐱᔪᓐᓇᐃᓪᓕᓚᐅᕐᓂᖓᓂ ᐃᓕᓐᓂᐊᕌᓂᒃᑎᓪᓗᒋᑦ.