‘ᐊᕐᕌᒎᑉ ᐃᓚᖓᓐᓂ ᓈᒻᒪᒃᓯᕗᖅ ᑮᓇᐅᔭᑲᓪᓛᓗᖕᓂ ᑐᓂᔭᐅᓂᐊᕐᓂᕋᖅᑕᐅᓪᓗᑎᒃ ᐊᒥᓱᓄᑦ ᐱᓕᕆᐊᒃᓴᐅᔪᓄᑦ ᐊᒻᒪ ᐊᑲᐅᙱᓕᐅᕈᑕᐅᔪᓄᑦ ᓵᙵᔪᓂ ᑕ,ᒃᑭᑦ ᓄᓇᕗᒻᒥ ᐊᒻᒪ ᑲᓇᑕᒥ.
ᑕᒪᐃᑎᒍᑦ, ᐊᐃᑉᕆᓕ 7–ᒥ ᒐᕙᒪᑐᖃᒃᑯᑦ ᑮᓇᐅᔭᓂ ᐊᑐᖅᑐᒃᓴᑦ ᓴᓂᕐᕙᐃᓚᐅᖅᐳᑦ $31.2 ᐱᓕᐊᓐᓂ ᓄᑖᓂ ᐊᑐᖅᑕᐅᔪᒃᓴᓂ ᒪᓕᒃᑐᓄᑦ ᐊᕐᕌᒍᓄᑦ ᑕᓪᓕᒪᓄᑦ ᐊᒻᒪ ᓇᓚᐅᑦᑖᕆᕗᑦ ᑮᓇᐃᔭᐃᑦ ᖄᖏᐅᑎᓂᖏᓐᓂ $52.8 ᐱᓕᐊᓐᓂ.
ᐃᓚᖏᑦ ᐅᓂᒃᑳᕆᓂᐅᔪᑦ ᐱᑕᖃᓗᐊᙱᑎᓪᓗᒋᑦ, ᓄᓇᕗᒻᒥ ᑲᓇᑕᒥ ᒪᓕᒐᓕᐊᕆᔭᐅᔪᓂᒃ ᖃᐅᔨᓴᖅᑎᖓ ᑕᓂᔅ ᐹᑐᓴᓐ ᐅᖃᓚᐅᕐᓂᖓᓂ ᐃᖃᓗᖕᓂ ᐊᐃᑉᕆᓕ 12–ᒥ, ᑭᓯᐊᓂ ᑕᑯᒥᓇᖅᑐᓂ ᑮᓇᐅᔭᓄᑦ ᐊᖏᖅᓯᒪᓂᐅᔪᓂ ᐅᑕᖅᑭᔪᓂ ᓴᖅᑭᑎᑕᐅᓂᐊᕐᓂᖏᓐᓂ.
ᑮᓇᐅᔭᐃᑦ ᐊᑐᖅᑐᒃᓴᑦ ᓇᓗᓇᐃᖅᓯᕗᖅ “ᑲᓇᑕᐅᑉ ᐅᑭᐅᖅᑕᖅᑐᒥ ᓄᓇᓕᖏᑦ ᓵᙵᕗᑦ ᐊᔾᔨᐅᙱᑦᑐᓂ ᐃᒡᓗᒃᓴᖃᖅᑎᑦᑎᓂᕐᒧᑦ ᐱᔭᕆᐊᓕᖕᓂ ᐱᔾᔪᑎᖃᖅᑐᒥ ᖁᑦᑎᖕᓂᖅᓴᐅᔪᒥ ᓇᑉᐸᖅᑎᕆᓂᕐᒧᑦ ᐊᑭᖏᓐᓂ, ᓇᐃᓐᓂᖅᓴᐅᔪᒥ ᓇᑉᐸᖅᑎᕆᓂᕐᒧᑦ ᐊᕐᕌᒎᑉ ᐃᓚᖓᓐᓂ, ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᐃᓚᑰᓂᐅᔪᓂ ᐊᒻᒪᓗ ᐊᒃᑐᐃᓂᐅᔪᓂ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂ ᐊᖏᒡᓕᕙᓪᓕᐊᔪᓂ ᐅᑭᐅᖅᑕᖅᑐᖅ ᐅᖅᑰᓯᕙᓪᓕᐊᑎᓪᓗᒍ ᐱᖓᓱᐃᓪᓗᐊᖅᑐᒥ ᓱᒃᑲᓂᖅᓴᐅᔪᒥ ᓄᓇᕐᔪᐊᒥ ᐅᖅᑰᓯᕙᓪᓕᐊᓂᖓᓂ.”
ᑎᑎᖅᑲᖁᑕᐅᔪᖅ ᐊᖏᖅᓯᒪᓂᖃᖅᐳᖅ $845 ᒥᓕᐊᓐᓂ ᐊᕐᕌᒍᓄᑦ 7–ᓄᑦ ᐃᑲᔪᖅᓱᐃᓂᕐᒥ ᐃᒡᓗᒃᓴᖃᖅᑎᑦᑎᓂᕐᒧᑦ ᐃᓄᖕᓄᑦ ᓄᓇᓕᐅᔪᓄᑦ ᐊᒻᒪ $60 ᒥᓕᐊᓐᓂ ᐊᕐᕌᒍᓄᑦ ᒪᕐᕉᖕᓄᑦ ᓄᓇᕗᒻᒥ ᒐᕙᒪᒃᑯᓐᓄᑦ (GN) ᐃᑲᔪᖅᓱᐃᓂᕐᒥ ᐊᑭᑐᓗᐊᑎᑦᑐᓄᑦ ᐃᒡᓗᒃᓴᓄᑦ ᐊᒻᒪ ᐱᔾᔪᑎᓕᖕᓂ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ.
ᐱᒋᐊᕐᓂᑦᑎᐊᕙᐅᕗᖅ, ᐄᓛᒃ, ᐊᒻᒪ ᐱᖓᓱᐃᓪᓗᐊᖅᑐᒥ ᐱᓂᐊᕐᓂᕋᖅᑕᐅᔪᒥ ᐊᖏᓂᖓᓂ ᓇᓗᓇᐃᖅᑕᐅᓯᒪᔪᒥ 2018–ᒥ ᑮᓇᐅᔭᐃᑦ ᐊᑐᖅᑐᒃᓴᓄᑦ, ᑭᓯᐊᓂ ᖄᖓᓂ ᐊᒃᑐᐃᓂᖃᒐᓛᑐᐃᓐᓇᖅᐳᖅ $3.5 ᐱᓕᐊᓐ–ᖑᔪᒥ – ᐊᒻᒪ ᐱᕈᖅᐸᓪᓕᐊᔪᒥ – ᐊᑲᐅᙱᓕᐅᕈᑕᐅᔪᒥ.
ᓱᓇᑐᐃᓐᓇᐃᑦ ᐊᑭᑦᑐᖅᐸᓪᓕᐊᓂᖏᑦ ᖁᕝᕙᕆᐊᖅᐸᓪᓕᐊᑎᓪᓗᒍ, ᐊᒻᒪᓗᑦᑕᐅᖅ ᐃᓄᒋᐊᖕᓂᖓᓂ, ᐱᔭᕆᐊᓖᑦ ᐊᖏᒡᓕᕙᓪᓕᐊᑐᐃᓐᓇᖅᐳᑦ.
ᐅᑭᐅᖅᑕᖅᑐᒥ ᐱᓕᕆᓂᕐᒧᑦ ᒥᓂᔅᑕᖓ ᑖᓐ ᕚᓐᑎᐅᓪ ᑎᒃᑯᐊᕆᕗᖅ ᐱᓕᐊᓐᑲᓐᓂᕐᓂ ᐊᓯᖏᓐᓂ ᒐᕙᒪᑐᖃᒃᑯᑦ ᐃᒡᓗᒃᓴᓄᑦ ᑮᓇᐅᔭᖃᖅᑎᑦᑎᓂᖃᖅᐳᑦ ᓄᓇᕗᑦ “ᐱᔪᓐᓇᓪᓗᐊᖅᑕᖏᓐᓂ” ᑭᓯᐊᓂ ᕿᑎᐊᓃᑎᓪᓗᑕ ᐋᖅᑭᒃᓱᐃᓂᕐᒥ ᐊᒥᓱᒻᒪᕆᐊᓗᖕᓂ ᒪᓕᖃᑦᑕᐅᑎᔪᓂ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᐊᑲᐅᙱᓕᐅᕈᑕᐅᔪᓂ ᐃᒃᐱᒍᓱᓗᐊᖏᓐᓂᖃᕐᓂᐅᕗᖅ ᐅᕙᑦᑎᓐᓂ ᐃᖅᑲᐃᑎᑦᑎᓂᕐᒧᑦ ᑐᙵᓱᖕᓂᑦᑎᓐᓂ ᑐᒃᓯᕋᕐᓂᕐᒧᑦ ᐊᓯᖏᓐᓄᑦ ᐱᓕᕆᐊᖑᔪᓄᑦ.
ᓄᓇᕗᒻᒥ ᑐᙵᕕᒃᑯᑦ, ᓄᓇᕗᒻᒥ ᒐᕙᒪᒃᑯᑦ ᐊᒻᒪ ᒐᕙᒪᑐᖃᒃᑯᑦ ᐱᓕᕆᖃᑎᒌᖕᓂᐊᖅᐳᑦ ᐱᖓᓲᔪᓂ ᐱᓕᕆᖃᑎᒌᖕᓂᐅᔪᒥ ᐊᖏᕈᑎᒥᒃ ᐅᓇᑕᕋᓱᐊᕐᓂᕐᒧᑦ ᐃᒡᓗᒃᓴᖃᙱᓗᐊᕐᓂᖓᓄᑦ ᐊᑲᐅᙱᓕᐅᕈᑕᐅᔪᓂ, ᓯᕗᓕᖅᑎ P.J. ᐊᕿᐊᕈᖅ ᐅᖃᓚᐅᕐᓂᖓᓂ ᐅᐱᒋᔭᖃᕐᔪᐊᕐᓂᖓᓂ.
“ᑖᒃᑯᐊᓪᓚᕆᐅᕗᑦ ᐱᒻᒪᕆᐅᔪᓂ ᐊᑲᐅᙱᓕᐅᕈᑕᐅᔪᓂ, ᓲᕐᓗ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ, ᐃᒡᓗᑭᒃᓴᓗᐊᕐᓂᕐᒧᑦ ᐊᑲᐅᙱᓕᐅᕈᑕᐅᔪᒥ, ᓄᑦᑐᒃᓯᔭᕆᐊᖃᕐᓂᐊᕐᓂᑦᑎᓐᓂ ᑭᒡᓕᓕᖕᓂ ᐃᑲᔪᕈᑎᒃᓴᑦᑎᓐᓂ ᑭᐅᓂᕐᒧᑦ ᐊᑯᓂᐅᔪᒥ ᐊᑲᐅᙱᓕᐅᕈᑕᐅᔪᓂ,” ᐅᖃᓚᐅᖅᐳᖅ.
ᐊᓯᖓᓂ ᑲᒪᓇᖅᑐᒥ ᐊᖏᓂᐅᔪᒥ, ᓴᖅᑭᑎᑕᐅᔪᒥ ᑮᓇᐅᔭᓂ ᐊᑐᖅᑐᒃᓴᓂ 2021–ᒥ, $1.4 ᐱᓕᐊᓐᓂ ᐊᕐᕌᒍᓄᑦ ᑕᓪᓕᒪᓄᑦ “ᐋᖅᑭᐅᒪᑎᑦᑎᓂᕐᒥ ᐊᒻᒪ ᓴᖑᑎᑦᑎᓗᓂ” ᐱᓪᓚᕆᐅᔪᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐸᖅᑭᓂᐅᔪᒥ ᐱᔨᑦᑎᕋᕐᓂᐅᔪᒥ ᐃᓄᖕᓄᑦ ᐊᒻᒪ ᓄᓇᖃᖅᑳᖅᓯᒪᔪᓄᑦ, ᐃᓚᐅᑎᑦᑎᔪᒥ ᑮᓇᐅᔭᓂᒃ ᐃᑲᔪᖅᓱᐃᓂᕐᒧᑦ ᐊᑐᑦᑎᐊᕈᓐᓇᖅᑐᒥ ᐊᑐᐃᓐᓇᖃᕐᓂᖓᓂ ᓴᓗᒪᔪᒧᑦ ᐃᒪᕐᒥ ᓄᓇᖃᖅᑳᖅᓯᒪᔪᓄᑦ ᓄᓇᓕᐅᔪᓄᑦ.
ᑕᕝᕙᙵᑦ, $228 ᒥᓕᐊᓐᓂ ᐅᖃᐅᓯᐅᓚᐅᖅᐳᖅ ᐱᓂᕐᓗᒡᔪᐊᖅᑕᐅᓯᒪᔪᓄᑦ–ᐅᖃᐅᔾᔨᓯᒪᔪᓄᑦ, ᐃᓕᖅᑯᓯᒧᑦ ᓈᒻᒪᒃᑐᒥ ᓄᓇᖃᖅᑳᖅᓯᒪᔪᓄᑦ–ᑐᕌᖅᑎᑕᐅᓯᒪᔪᓂ ᐱᔨᑦᑎᕋᕐᓂᐅᔪᓂ ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ, “ᓴᓇᔭᐅᓯᒪᓪᓗᓂ-ᑐᕌᖓᓂᖃᖅᑐᒥ ᓄᓇᕗᒻᒧᑦ” ᐊᒻᒪ ᐊᑲᐅᙱᓕᐅᕈᑕᐅᔪᓂ ᓄᓇᕗᑦ ᓵᙵᔭᖏᓐᓂ.
ᐅᓇ ᐊᖏᐸᓗᒃᑐᒥ ᒐᕙᒪᑐᖃᒃᑯᑦ ᐅᖃᐅᓯᒃᓴᓕᐊᖓ ᐃᑲᔪᕈᓐᓇᖅᐳᖅ ᓇᓗᓇᐃᖅᓯᓂᕐᒥ ᐱᑕᖃᖅᐸᒌᖅᑐᓂ ᐱᓕᕆᐊᒃᓴᐅᔪᓂ ᐊᑐᐃᓐᓇᖃᕈᓐᓇᕐᓂᖏᓐᓂ ᐃᑲᔪᖅᓯᖅᑕᐅᓂᕐᒥ ᐃᖏᕐᕋᐃᓐᓇᕈᓐᓇᖁᓪᓗᒋᑦ, ᐊᒻᒪᓗ ᐊᓯᖏᓐᓂ ᐱᒋᐊᕈᑕᐅᔪᓂ ᒪᑭᒋᐊᖅᑎᑦᑎᔪᓐᓇᖅᑐᓂ ᐅᓇᑕᕐᔪᐊᕆᐊᖃᙱᓪᓗᑎᒃ ᐃᓕᓴᕆᔭᐅᓂᕐᒧᑦ ᐱᒻᒪᕆᕐᔪᐊᖑᔪᒥ ᐱᓕᕆᐊᖏᓐᓂ ᐱᓕᕆᕙᒃᑕᖏᓐᓂ.
ᐊᖏᓛᖑᔪᖅ ᐊᒥᐊᒃᑯᔪᖅ ᐊᐱᖅᑯᑕᐅᔪᖅ ᐅᓇᐅᕗᖅ, ᑭᓱᓂᒃ $6 ᐱᓕᐊᓐᓂ ᑐᓐᓂᖅᓴᖅᑕᐅᓯᒪᔪᓂ ᓴᐳᔾᔨᓯᒪᓂᕐᒧᑦ ᑐᕌᕐᓂᐊᖅᐸ ᖁᕝᕙᖅᓴᐃᓂᕐᒧᑦ ᐅᑭᐅᖅᑕᖅᑐᒥ?
ᐱᓇᓱᐊᕈᓯᐅᓚᐅᖅᑐᒥ, ᓄᓇᕗᒻᒥ ᑐᓴᒐᒃᓴᓕᕆᔨᒃᑯᑦ ᑕᑯᒃᓴᐅᑎᑦᑎᓚᐅᖅᐳᑦ ᐃᓱᒪᒋᔭᐅᓂᐅᔪᓂ ᓄᖅᑲᖓᓕᖅᑐᒥ ᑰᓄᓪ ᐱᐊᕆ ᓚᐸᓛᖕᒃ, ᐱᓕᕆᐊᒃᓴᓕᐅᖅᖢᓂ ᐱᕙᓪᓕᐊᑎᑦᑎᒃᑲᓐᓂᕐᓂᕐᒥ ᖃᐅᓱᐃᑦᑐᕐᒥ ᒥᐊᓂᖅᓯᓂᕐᒥ ᑲᑎᕝᕕᐅᔪᒥ ᐅᑭᐅᖅᑕᖅᑐᒧᑦ, ᐅᔾᔨᕆᓪᓗᓂ ᑕᒪᕐᒥᒐᓚᑦ ᓄᑖᙳᖅᐸᓪᓕᐊᓂᐅᔪᖁᑎᕗᑦ ᓄᑕᐅᙱᓗᐊᓕᕐᓂᖏᓐᓂ, ᐅᕝᕙᓘᓐᓃᑦ ᐱᑕᖃᙱᓗᐊᕐᓂᖏᓐᓂ, ᐱᓗᐊᖅᑐᒥ ᑕᐅᑐᒃᖢᒍ ᕋᓴᐅᑉ ᐅᑭᐅᖅᑕᖅᑐᖓᓐᓂ ᓴᐳᔾᔨᓯᒪᓂᐅᔪᓂ.
ᐹᑐᓴᓐ ᑕᐃᒪᓐᓇᑎᒋ ᐃᓱᒫᓗᓚᐅᖅᐳᖅ.
“ᕋᓴ ᒥᑭᓐᓂᖅᓴᐅᔪᒥ ᓂᐅᕕᖅᑕᐅᓂᑯᓄᑦ ᑮᓴᐅᔭᓕᐊᕆᔭᐅᓯᒪᔪᓄᑦ ᑲᑎᖦᖢᒋᑦ ᑲᓇᑕᒥ, ᑭᓯᐊᓂ ᑮᓇᐅᔭᖃᖅᑎᑦᑎᓯᒪᕗᑦ ᓯᑯᐃᖅᓯᔾᔪᑎᓂᒃ ᐅᒥᐊᕐᔪᐊᓂ, ᑐᙵᕕᐅᔪᓂ, ᒥᑦᑕᕐᕕᖕᓂ ᐊᒻᒪ ᑐᓚᒃᑕᕐᕕᖕᓂ, ᑕᐃᑲᓂᓗᒃᑖᖅ ᐅᑭᐅᖅᑕᖅᑐᖓᓂ ᓯᒡᔭᖅᐸᓯᖓᓐᓂᔭ ᑲᓇᑕᐅᑉ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᐅᑭᐅᖅᑕᖅᑐᒥ ᑲᙳᓇᖅᐳᖅ ᑕᐅᑐᒃᖢᒍ ᐊᒻᒪ ᑕᐃᒪᑐᖅ ᓈᒻᒪᒃᑐᒥ ᐱᓂᐊᖅᐳᒍᑦ ᐃᓚᖓᓐᓂ $6 ᐱᓕᐊᓐᓂ ᑐᓂᔭᐅᔪᒥ ᑮᓇᐅᔭᐃᑦ ᐊᑐᖅᑐᒃᓴᓂ.”
ᐱᔪᓐᓇᑦᑎᐊᖅᐸᑦ, ᐅᑕᖅᑭᔭᕆᐊᖃᔾᔮᙱᑉᐳᒍᑦ ᐊᕐᕌᒍᒥ ᒪᕐᕉᖕᓂᓪᓘᓐᓃᑦ ᐸᕐᓇᒃᑕᐅᓯᒪᑦᑎᐊᖅᑐᓂ ᐋᔩᖃᑎᒌᒃᓯᒪᔪᓂ ᑐᓴᒐᒃᓴᓕᐊᖑᔪᓂ ᐊᒻᒪ ᖃᓄᐃᓐᓂᐅᔪᓂ ᓴᖅᑭᑎᑦᑎᓂᕐᒧᑦ ᑕᒪᒃᑭᓗᒃᑖᓂ ᐱᒻᒪᕆᐅᔪᓂ ᐅᓂᒃᑳᕆᓯᒪᔪᓂ.