ᖃᓄᖓᓴᕐᓂᖅ ᐅᕙᑦᑎᓐᓂᓕᒫᖅ ᐊᒃᑐᐃᓲᖑᕗᖅ, ᖃᓄᖓᓴᖅᑕᐅᓯᒪᒍᕕᑦ, ᖃᐅᔨᒪᒍᕕᑦ ᑭᓇᑐᐃᓐᓇᒥᒃ ᖃᓄᖓᓴᖅᑕᐅᓯᒪᔪᒥ, ᐅᕝᕙᓘᓐᓃᑦ ᖃᓄᖓᔫᓗᓂ.
ᐊᐅᐸᔪᒃᑐᒥ ᐅᕕᓂᕈᕐᒥ ᐅᓪᓗᖓᓂ ᑕᑯᔭᐅᓲᖑᕗᖅ ᑭᖑᓪᓕᖅᐹᒥ ᐱᖓᔪᐊᓐᓂ ᕕᕗᐊᕆᑕᒫᒥ ᑕᐃᒪᙵᓂ 2007–ᒥ. ᐅᓄᕐᓂᖅᓴᐅᔪᓂ 180–ᓂ ᓄᓇᐅᔪᓂ ᐃᓚᐅᖃᑕᐅᖃᑦᑕᓕᖅᐳᑦ ᖃᓄᐃᓐᓂᐅᔪᒥ, ᓴᖅᑭᑎᑦᑎᓇᓱᐊᓲᖑᔪᒥ ᑐᙵᓇᕐᓂᖅᓴᒥ, ᐃᓚᐅᑎᑦᑎᒃᑲᓐᓂᕐᓂᐅᔪᒥ ᓄᓇᕐᔪᐊᒥ ᓴᖅᑭᑎᑦᑎᓂᒃᑯᑦ ᐅᔾᔨᕈᓱᖕᓂᐅᔪᒥ ᐊᒻᒪ ᑮᓇᐅᔭᓂ ᖃᓄᖓᓴᖅᑕᐃᓕᒪᑎᑦᑎᓂᕐᒧᑦ ᐱᒋᐊᕈᑕᐅᔪᓂ.
ᓄᓇᕗᒻᒥ, ᑕᑯᓲᖑᕗᒍᑦ ᐃᓕᓐᓂᐊᖅᑎᓂ ᐊᑎᓂᖏᓐᓂ ᐊᐅᐸᔪᒃᑐᒥ ᐊᓐᓄᕌᖏᓐᓂ, ᐊᒻᒪ ᓄᓇᕗᒻᒥ ᒐᕙᒪᒃᑯᑦ ᐃᓕᓐᓂᐊᖅᑐᓕᕆᔨᒃᑯᖓᑦ ᑐᓂᓯᓲᖑᕗᖅ ᐃᑲᔪᕈᑎᒃᓴᓂ ᐃᓕᓴᐃᔨᓄᑦ ᐃᑲᔪᕐᓂᕐᒧᑦ ᑭᐅᓂᕐᒥ ᖃᓄᖓᓴᕐᓂᐅᔪᒥ ᐃᓕᓐᓂᐊᕐᕕᓂ.
ᒫᔾᔨᐅᓚᐅᖅᑐᒥ ᒪᓕᒐᓕᐅᖅᑎᒃᑯᑦ ᑲᑎᒪᕝᕕᖓᓐᓂ, ᑕᐃᖦᓱᒪᓂ-ᐃᖃᓗᐃᑦ-ᒪᓂᕋᔭᖕᒧᑦ ᒪᓕᒐᓕᐅᖅᑎ ᐋᑕᒻ ᓚᐃᑦᔅᑑᓐ ᐅᐱᒋᔭᖃᓚᐅᖅᐳᖅ ᐊᐅᐸᔪᒃᑐᒥ ᐅᕕᓂᕈᕐᒥ ᐅᓪᓗᖓᓂ “ᑲᒪᓇᖅᖢᓂ ᐱᒋᐊᕈᑕᐅᓂᖓᓂ ᓴᖅᑭᑎᑦᑎᓂᕐᒧᑦ ᐅᔾᔨᕈᓱᖕᓂᐅᔪᒥ ᖃᓄᖓᓴᕐᓂᕐᒧᑦ ᐊᒻᒪ ᓱᔪᐃᔪᓐᓇᖅᑐᒥ ᐊᒃᑐᐃᔪᓐᓇᕐᓂᖓᓂ,” ᐃᒪᐃᖁᔨᓪᓗᑎᒡᓗ ,ᕐᕈᖓᓂ ᑕᐃᒪᐃᑦᑐᒥ ᐅᓪᓗᖃᒃᑲᓐᓂᕐᓂᖓᓂ ᓯᕗᓂᐊᓂ ᐃᓕᓐᓂᐊᕐᓂᕐᒥ ᐊᕐᕌᒍᖓᓂ ᐃᑲᔪᕐᓂᕐᒧᑦ ᖁᕝᕙᖅᓴᐃᓂᕐᒥ ᐅᔾᔨᕈᓱᖕᓂᐅᔪᒥ ᐃᓕᓐᓂᐊᖅᑎᓄᑦ ᑎᒥᖁᑕᐅᔪᓄᑦ.
ᒫᓂ ᐅᓗᔪᖕᒥ ᐃᓕᓐᓂᐊᕐᕕᖓᓂ ᐊᖓᔪᖅᑳᖑᓚᐅᖅᓯᒪᔪᖅ ᔭᓯ ᐸᐃᓐ ᐅᖃᓚᐅᖅᐳᖅ 2019–ᒥ ᐊᐱᖅᓱᖅᑕᐅᓂᕐᒥ ᐊᐅᐸᔪᒃᑐᒥ ᐅᕕᓂᕈᕐᒥ ᐅᓪᓗᖓ ᐊᖏᔪᐊᓗᖕᒥ ᐊᒃᑐᐃᓂᖃᖅᓯᒪᓂᖓᓂ ᐃᓕᓐᓂᐊᖅᑎᓄᑦ ᑲᖏᖅᖠᓂᕐᒥ ᐃᓕᓐᓂᐊᖅᑎᓂᑦ ᐅᔾᔨᕈᓱᖕᓂᖅᓴᐅᓂᖏᓐᓂ ᖃᓄᐃᓕᐅᕐᓂᖏᓐᓂ.
ᐅᖃᓚᐅᖅᐳᖅ ᖁᙱᐊᑐᐃᓐᓇᙱᓪᓗᑎᒃ, ᐃᑲᔪᓲᖑᕗᖅ ᐃᓕᓐᓂᐊᖅᑎᓂᑦ ᕿᑎᐊᓄᐊᕐᓂᖏᓐᓂ ᐊᒻᒪ ᐃᖅᑲᐃᑎᑦᑎᓪᓗᑎᒃ ᑕᐃᒃᑯᓂᖓ ᖃᓄᖓᓴᑐᐃᓐᓇᕆᐊᓕᖕᓂ ᑕᒪᓐᓇ ᓈᒻᒪᙱᖦᖢᓂ ᐃᓕᖅᑯᓯᓂᐅᕗᖅ ᐃᓕᓐᓂᐊᕐᕕᖕᒥ ᐅᕝᕙᓘᓐᓃᑦ ᓄᓇᓕᖕᓂ.
“ᐃᓕᓐᓂᐊᖅᑏᑦ ᐃᓗᐊᖅᓯᓂᖅᓴᐅᕗᑦ ᓯᕗᒻᒧᐊᕆᓂᕐᒥ ᐊᒻᒪ ᐃᓐᓇᕐᒥ ᖃᐅᔨᑎᑦᑎᓂᕐᒥ ᑕᐃᒪᐃᑦᑐᖃᕐᓂᖓᓂ ᐱᖃᓐᓇᕆᔭᒥᓄᑦ ᐅᕝᕙᓘᓐᓃᑦ ᐃᓕᓐᓂᐊᖃᑎᒥᓂᑦ ᐃᓕᓐᓂᐊᕐᕕᖕᒥ,” ᐅᖃᓚᐅᖅᐳᖅ.
ᖃᓄᐃᓐᓂᐅᔪᓂ ᓱᕈᓯᑦᑎᓐᓂ ᐊᖏᔪᐊᓗᖕᒥ ᐊᒃᑐᐃᓂᖃᕈᓐᓇᖅᐳᖅ ᐃᒻᒥᖕᓄᑦ.
ᐅᔾᔨᕈᓱᒃᑐᐃᓐᓇᐅᕗᒍᑦ ᓄᓇᕗᑦ ᑎᒍᔭᐅᓯᒪᕐᔪᐊᕐᓂᖓᓂ ᐃᒻᒥᓃᕐᓂᕐᒧᑦ ᐊᓯᓱᓄᑦ ᐋᓐᓂᐊᖑᔪᒥ, ᐊᒻᒪ ᑐᙵᓇᕐᓂᖅᓴᐅᓂᕐᒥ ᑭᒃᑯᓕᒫᓄᑦ ᐋᖅᑭᒍᑎᐅᙱᓚᖅ ᐃᓱᓕᑦᑎᓂᖓᓂ ᐊᑲᐅᙱᓕᐅᕈᑕᐅᔪᒥ, ᓇᓗᓇᐃᖅᓯᓂᖅ ᐋᓐᓂᖅᓯᕆᓂᖅ ᐃᓕᓐᓂᐊᖅᑎᐅᔪᓂ – ᑎᒥᒃᑯᑦ ᐅᕝᕙᓘᓐᓃᑦ ᐃᓱᒪᒧᑦ – ᐊᒻᒪ ᑭᐅᓂᕐᒥ ᓇᒡᓗᒍᓱᖕᓂᖃᑦᑎᐊᕐᓗᓂ ᐊᑕᐅᓯᐅᓪᓗᓂ ᐱᓕᕆᓂᐅᕗᖅ ᐃᑲᔪᕐᓂᕐᒧᑦ ᐱᕈᖅᓴᐃᓂᕐᒥ ᐊᒻᒪ ᐋᖅᑭᒃᓯᓂᕐᒥ ᐃᒻᒥᓂᒃ–ᐅᐱᒋᔪᓐᓇᕐᓂᐅᔪᒥ ᒪᒃᑯᒃᑐᓄᑦ.
ᓄᖅᑲᖅᑎᑦᑎᓂᕐᒥ ᐆᒥᖓ ᐱᔪᒪᔭᐅᙱᑦᑐᒥ ᐃᓕᖅᑯᓯᐅᔪᒥ ᐃᓕᓐᓂᐊᕐᕕᖕᓂ ᐅᖃᐅᓯᒃᓴᕐᔪᐊᖑᓯᒪᕗᖅ ᒪᓕᒐᓕᐅᖅᑎᓂᑦ ᐊᒻᒪ ᐃᓕᓐᓂᐊᕐᕕᖕᓂ ᐱᓕᕆᔨᒻᒪᕆᐅᔪᓂ ᐊᕐᕌᒍᒐᓴᓄᑦ. ᐅᓂᒃᑳᕆᓂᕐᒥ ᐱᓕᕆᔾᔪᑎᒥᒃ ᐱᕙᓪᓕᐊᑎᑕᐅᓯᒪᔪᖃᖅᐳᖅ ᐊᕐᕌᒍᓄᑦ 8-ᓄᑦ, ᒫᓐᓇᓕᓴᐅᔪᒥ ᐊᐳᖅᓯᓂᖃᖅᑐᒥ ᐊᒡᕕᐊᕈᑕᐅᔪᒥ ᑲᙳᓇᕐᓂᖃᕆᐊᑲᕐᓂᖓᓂ ᐃᓱᒫᓘᑕᐅᔪᓂ ᐱᔭᕆᐊᖃᖅᑎᑦᑎᔪᒥ ᖃᐅᔨᓴᐃᓂᐅᔪᒥ, ᑕᐃᒫᒃ ᐸᐃᑉᐹᑎᒍᑦ ᐱᓕᕆᔾᔪᓯᐅᔪᒥ ᓱᓕ ᐊᑐᖅᑕᐅᕗᖅ.
ᐅᓄᕐᓂᐅᔪᓂ ᐋᓐᓂᖅᓯᕆᓂᐅᔪᓂ ᐃᓕᓐᓂᐊᕐᕕᓂᑦ ᑲᑕᒃᐹᓪᓕᖅᓯᒪᔫᔮᕋᓗᐊᖅᑎᓪᓗᒍ 165–ᓄᑦ ᓂᙵᐅᒪᔪᓂ ᐅᕝᕙᓘᓐᓃᑦ ᐋᓐᓂᖅᓯᕆᓂᐅᔪᓂ ᖃᓄᐃᓐᓂᐅᔪᓂ 2020-‘21–ᒥ ᐃᓕᓐᓂᐊᕐᕕᖕᒥ ᐊᕐᕌᒍᖓᓂ –84-ᐳᓴᓐᑎᒥ ᑲᑕᖕᓂᐅᔪᒥ 1,093–ᓂ ᖃᓄᐃᓐᓂᐅᔪᓂ ᐅᓂᒃᑳᕆᔭᐅᔪᓂ CBC–ᑯᓐᓄᑦ ᖃᐅᔨᓴᖅᑕᐅᓂᐅᔪᓂ ᓯᕗᓂᐊᓂ ᐃᓕᓐᓂᐊᕐᕕᖕᒧᑦ ᐊᕐᕌᒍᖓᓂ, ᑕᑯᒃᓴᐅᑎᑦᑎᓂᐅᑐᐃᓐᓇᕆᐊᖃᖅᑐᒥ ᐃᓕᓐᓂᐊᕐᕕᐊᕈᓯᐅᑉ ᓯᓚᑖᓃᖃᑦᑕᕐᓂᖏᓐᓂ ᖁᔭᓐᓇᒦᒃ ᐊᒥᓱᓄᑦ ᖃᓂᒻᒪᓐᓇᐅᔪᒥ ᑭᒡᓕᖃᖅᑎᑕᐅᓂᐅᔪᓄᑦ, ᐊᖏᓂᖅᓴᐅᔪᒥ ᑕᑯᓂᑦᑎᐊᕙᐅᔪᒥ ᐊᓯᔾᔨᖅᑕᐅᓯᒪᓂᐅᔪᓄᑦ.
ᐃᓕᓴᐃᔨᓄᑦ ᐊᖓᔪᖅᑳᑦ ᐅᓂᒃᑳᓕᐅᓲᖑᕗᑦ ᑕᖅᑭᑕᒫᒥ ᐊᕕᒃᑐᖅᓯᒪᔪᓄᑦ ᐃᓕᓐᓂᐊᕐᕕᖕᓄᑦ ᐊᐅᓚᑕᐅᓂᐅᔪᓄᑦ, ᐅᖃᐅᓯᐅᓪᓗᓂ ᑕᐃᔅᓱᒪᓂᓂ ᐃᓕᓐᓂᐊᖅᑐᓕᕆᔨᒃᑯᓐᓄᑦ ᒥᓂᖦᑕᐅᓚᐅᖅᑐᒥ ᑕᐃᕕᑦ ᔪᐊᓇᓯᒧᑦ, ᐅᖃᓚᐅᖅᑐᒥ ᐊᕐᕌᓂ ᐊᔾᔨᒌᙱᕈᓘᔭᖅᑐᓂ ᐃᑲᔪᕈᑎᒃᓴᖃᕐᓂᖓᓂ ᐊᑐᐃᓐᓇᐅᑎᑕᐅᔪᓂ ᐃᓕᓐᓂᐊᕐᕕᓄᑦ, ᐃᓚᖃᖅᑐᒥ ᐱᓕᒻᒪᒃᓴᐃᓂᕐᒥ, ᐊᑦᑕᓇᙱᑦᑐᒥ ᐊᒻᒪ ᐸᖅᑭᑦᑎᐊᕐᓂᕐᒧᑦ ᐊᑐᖅᑕᐅᔪᒃᓴᒥ ᐅᖃᓕᒫᒐᕐᒥ ᐊᒻᒪ ᐅᕘᓇ ᐃᓅᓯᕗᑦ ᐊᓐᓂᓇᖅᑐᖅ ᐱᒋᐊᕈᑕᐅᔪᒥ, ᓄᓇᕘᑉ ᐃᒻᒥᓃᖅᑕᐃᓕᒪᑎᑦᑎᓂᕐᒧᑦ ᐸᕐᓇᒍᑎᐅᔪᖅ.
ᐃᓕᓐᓂᐊᕐᕕᖕᒥ ᐃᓅᓯᓕᕆᔨᐅᔪᑦ ᐅᖃᐅᓯᐅᓯᒪᕗᑦ ᐊᖏᓛᖑᔪᒥ ᐊᒃᑐᐃᓂᖃᕐᓂᖏᓐᓂ ᐃᓕᓐᓂᐊᖅᑎᐅᔪᓄᑦ ᖃᓄᖓᓴᖅᑐᓄᑦ ᐅᕝᕙᓘᓐᓃᑦ ᖃᓄᖓᓴᖅᑕᐅᔪᓄᑦ ᐊᓯᖏᓐᓂ, ᑐᓂᓯᓂᕐᒥ ᐅᖃᐅᔾᔨᓂᐅᔪᒥ ᐅᕝᕙᓘᓐᓃᑦ ᐱᓕᕆᐊᖃᕈᓐᓇᕐᓂᕐᒥ ᐊᐅᓚᓂᐅᔪᓂ ᐊᒻᒪ ᐅᖃᓪᓚᖃᑎᖃᕐᓂᕐᒥ ᑕᐃᒃᑯᓄᖓ ᐃᓕᓐᓂᐊᖅᑎᐅᔪᓄᑦ. ᐃᓅᓯᓕᕆᔨᖃᕐᓂᕐᒥ ᐊᑐᐃᓐᓇᐅᔪᓂ ᑕᒪᒃᑭᓄᑦ ᖁᑦᑎᖕᓂᓕᖕᓄᑦ ᑭᒡᓕᐅᔪᓄᑦ ᐃᑲᔪᕋᔭᑦᑎᐊᖅᐳᖅ ᐃᑲᔪᖅᓱᐃᓂᕐᒥ ᖃᓄᐃᙱᑦᑎᐊᖅᑐᒥ ᐱᕙᓪᓕᐊᑎᑕᐅᓂᖓᓂ. ᐱᑕᖃᕐᓂᖓᓂ ᐅᑯᓂᖓ ᐃᓂᒃᓴᐅᔪᓂ ᐊᔭᐅᕆᓇᔭᕆᕗᖅ ᐱᔭᕆᐊᖃᓪᓚᕆᒃᑐᓂ ᐅᖃᓪᓚᖕᓂᐅᔪᓂ ᒪᒃᑯᒃᑐᖁᑎᑦᑎᓐᓂ ᖃᓄᖅ ᐱᓕᕆᐊᖃᕐᓂᕐᒥ ᐊᒃᓱᕈᕈᑎᒋᔭᖏᓐᓂ ᓵᙱᖔᕐᓗᓂ ᓯᓚᒻᒧᑦ ᐊᓯᖏᓐᓄᑦ ᐃᒻᒥᓂᒃ–ᓱᔪᐃᓂᐅᔪᒥ.
ᒫᓐᓇᐅᔪᒥ ᓇᖏᕐᓂᖓᓂ, ᐃᑲᔪᕈᑎᒃᓴᓂ ᐊᑐᐃᓐᓇᖃᙱᓪᓗᓂ, ᐅᖃᓪᓚᖃᑎᒌᖕᓂᐅᔪᒥ ᐃᒻᒥᖕᓄᑦ ᐊᒻᒪ ᐃᑲᔪᖅᓱᐃᖃᑦᑕᐅᑎᓂᕐᒥ ᐊᓯᐊᒎᖅᑐᒥ ᐅᔾᔨᕈᓱᖕᓂᐅᔪᒥ ᐅᓪᓗᕐᓂ ᓱᓕ ᒥᑭᒃᑲᓗᐊᖅᖢᑎᒃ ᐱᐅᔪᒧᑦ ᐱᓱᖕᓂᐅᕗᑦ ᐱᓕᕆᔪᓐᓇᖅᑕᑦᑎᓐᓂ.
“ᐊᖏᔪᒥ ᐅᖃᕐᔪᐊᕐᓂᖃᕈᕕᑦ ᑲᑎᓪᓗᒍ ᐃᓕᓐᓂᐊᖅᑎᐅᔪᓄᑦ ᑎᒥᐅᔪᓄᑦ 10 ᐳᓴᓐᑎᒥ ᐊᔾᔨᐅᙱᑎᑦᑎᓂᖃᖅᐳᖅ ᐅᕝᕙᓘᓐᓃᑦ 20 ᐳᓴᓐᑎᒥ ᐊᔾᔨᐅᙱᑎᑦᑎᓂᐅᔪᒥ, ᑕᐃᒫᒃ ᐊᒃᓱᕈᕐᓇᕐᓂᐅᓚᐅᖅᑐᒥ ᐊᑲᐅᓈᑦᑎᐊᖅᐳᖅ ᓴᖅᑭᑎᑦᑎᓂᕐᒧᑦ,” ᐅᖃᖅᐳᖅ ᐸᐃᓐ.