ᐊᖓᒃᑯᓴᔭᐅᔪᖅ: ᐊᖓᒃᑯᓴᔭᐅᔪᖅ, ᓴᓇᙳᐊᖅᓯᒪᔪᓂᒃ ᑕᕐᕆᔭᐅᑎᓕᐅᕐᓂᕐᒥ ᑐᓴᐅᒪᔪᐅᕐᔪᐊᖅᑐᒥ ᑐᑭᒧᐊᒃᑎᑦᑎᔨ ᓴᖅᑲᓕᐊᓯ ᑯᓄᒃ, ᐅᐊᖕᓇᒥ ᐊᒥᐊᓕᑲᒥ ᓴᖅᑭᔮᕐᓂᐊᖅᐳᖅ 46–ᖓᓂ ᑐᕌᓐᑐᒥ ᓄᓇᕐᔪᐊᒧᑦ ᑕᕐᕆᔭᓕᐅᕐᓂᕐᒧᑦ ᖁᕕᐊᓱᒍᑕᐅᔪᒥ ᓯᑎᐱᕆᒥ, ᐊᒻᒪ ᑯᓄᒃ ᓂᕆᐅᒃᐳᖅ ᓴᖅᑭᑎᑦᑎᓂᐊᕐᓂᖓᓂ ᐅᖃᓪᓚᖕᓂᐅᔪᓂ ᐱᖅᑯᓯᑐᖃᖅᑎᒍᑦ ᐃᓄᖕᓄᑦ ᑕᕐᓂᒧᑦ ᐃᓕᖓᓂᕐᒧᑦ.
“ᐅᖃᓪᓚᒃᑎᓪᓗᑕ ᐊᖓᒃᑯᓂ ᐊᒻᒪ ᒎᑎᒋᔭᐅᔪᓂ ᐊᒻᒪ ᐃᔪᕈᓂ, ᐅᓇ ᓄᓇᕐᔪᐊᖑᕗᖅ ᑖᔅᓱᒪ ᐅᓂᒃᑳᖅᑐᐊᖅ ᓇᑭᙶᕐᓂᖓᓂ, ᖃᓪᓗᓈᑦ ᓄᓇᖓᓐᓂ ᑎᑭᓚᐅᖅᑳᕋᑎᒃ” ᑯᓄᒃ ᐅᖃᓚᐅᖅᐳᖅ. “ᐅᒃᐱᕐᓂᖅ, ᑐᑭᓯᓇᙱᓚᖅ … ᖄᖏᖅᓯᒪᓕᖅᑐᓂ ᐊᕐᕌᒍᓄᑦ 100–ᓄᑦ ᐅᒃᐱᕐᓂᖅᑕᖃᖅᐳᖅ (ᐃᓄᖕᓂ) ᐊᒻᒪ ᐳᐃᒍᑲᓴᒃᓯᒪᕗᒍᑦ ᖃᓄᖅ ᐊᖓᒃᑰᓂᕐᒥ ᐱᓕᕆᓂᖓᓂ … ᓴᐅᔭᐅᑐᐃᓐᓇᓕᖅᐳᖅ ᐱᖅᑯᓯᕆᙱᑕᓄᑦ ᐱᐅᓯᖃᓕᖅᑎᑕᐅᓂᕐᒥ. ᐃᓱᒪᕗᖓ ᐅᖃᓪᓚᒃᐸᓪᓕᐊᔭᕆᐊᖃᕐᓂᑦᑎᓐᓂ ᑖᔅᓱᒪ ᒥᒃᓵᓄᑦ. ᑐᓴᕈᒥᓇᖅᐳᖅ, ᐊᒻᒪ ᐱᐅᓂᐅᕗᖅ ᐊᒻᒪ ᐱᐅᙱᓐᓂᐅᕗᖅ.”
ᑯᓄᒃ ᐅᖃᓚᐅᖅᐳᖅ ᐊᖓᒃᑯᓴᔭᐅᔪᖅ: ᐊᖓᒃᑯᓴᔭᐅᔪᖅ ᑐᙵᕕᖃᖅᐳᖅ ᐅᓂᒃᑳᖅᑐᐊᒥ ᐅᓂᒃᑲᐅᓯᒪᔪᒥ ᐊᕐᕌᒍᒐᓵᓗᖕᓂ, ᐊᑕᐅᓯᖅ ᑐᓴᖅᓯᒪᔭᖓᓐᓂ ᐃᓄᑐᖃᕐᒥ 1980–ᖏᓐᓂ. ᐃᓚᖃᖅᐳᖅ ᐊᓈᓇᑦᑎᐊᖑᔪᒥ ᐊᒻᒪ ᐃᕐᙳᑕᖓ ᐊᒻᒪ ᐊᒃᓱᕈᕐᓂᖏᓐᓂ ᒪᒥᓴᐃᓂᕐᒧᑦ ᖃᓂᒪᔪᒥ ᐊᖑᓇᓱᒃᑎᒥ, ᐃᕐᙳᑕᖓᓂ, ᒪᒃᑯᒃᑐᒥ ᐊᖓᒃᑰᔪᒥ, ᐃᒪᐅᑉ ᐊᑖᓄᐊᕈᔾᔨᔪᒥ ᑕᑯᔭᖅᑐᕐᓂᕐᒧᑦ ᑲᓐᓈᓗᖕᒥ The One Below.
ᑕᕐᕆᔭᓕᐊᖑᔪᒥ, ᒫᑕᓖ ᐃᕙᓗ ᓂᐱᖃᖅᑎᑦᑎᕗᖅ ᐊᓈᓇᑦᑎᐊᖑᔪᒥ, ᓘᓯ ᑐᓗᒑᕐᔪᒃ ᒪᒃᑯᒃᖢᓂ ᐊᖓᒃᑰᕗᖅ ᐊᒻᒪ ᔮᑭ ᖁᓐᓄᑦ ᒪᒃᑯᒃᑐᒥ ᐊᖑᑎᙳᐊᖑᕗᖅ.
ᑯᓄᒃ ᐅᖃᓚᐅᖅᐳᖅ ᐊᑕᐅᓯᐅᔪᒥ ᑲᒪᒋᔭᕆᐊᖃᖅᑕᒥᓂ ᐊᔪᕆᖅᓱᐃᓂᕐᒥ ᐱᔭᕆᑐᔪᓄᑦ ᐃᖅᑲᓇᐃᔭᖅᑎᐅᔪᓄᑦ ᓇᓗᓇᐃᖅᓯᓂᖏᓐᓂ ᑕᕐᕆᔭᓕᐊᖑᔫᑉ ᓴᓇᙳᐊᖅᓯᒪᔪᓂᒃ ᑕᕐᕆᔭᐅᑎᓕᐅᕐᓂᕐᒥ ᑎᑎᕋᐅᔭᕐᓂᖏᑦ ᑕᒻᒪᖅᓯᒪᙱᑦᑎᐊᕐᓂᖏᓐᓂ ᐊᒻᒪᓗ ᓱᓕᓪᓗᓂ ᐃᓄᖕᓄᑦ ᐊᑐᖅᑕᐅᓂᖏᓐᓄᑦ.
ᐊᖓᒃᑯᓴᔭᐅᔪᖅ ᓯᕗᓪᓕᖅᐸᐅᓇᓂ ᓴᓇᙳᐊᖅᓯᒪᔪᓂᒃ ᑕᕐᕆᔭᐅᑎᓕᐅᕐᓂᕐᒥ ᓴᖅᑭᔮᖅᑎᑦᑎᓂᖓᓂ ᐃᓚᖃᖅᑐᒥ ᑯᓄᖕᒥ. ᐱᓕᕆᓚᐅᕆᕗᖅ ᐅᓂᒃᑳᖅᑐᐊᓂ ᐃᓄᑐᖃᑦᑎᓐᓂ ᖃᔅᓯᐊᕐᔪᖕᓂ ᐊᕐᕌᒎᓚᐅᖅᑐᓂ ᖄᖏᖅᓯᒪᓕᖅᑐᓂ.
ᑎᑎᕋᖅᐸᓪᓕᐊᖏᓐᓇᖅᐳᖅ ᐃᓄᑐᖃᑦ ᐅᓂᒃᑳᖅᑐᐊᖏᓐᓂ ᐅᓪᓗᒥᒧᑦ. ᓂᐱᓕᐅᕆᓯᒪᕗᖅ ᐊᐱᖅᓱᕐᓂᐅᔪᓂ ᐃᒡᓗᓕᖕᒥ ᐃᓄᑐᖃᕐᓂ ᐃᖅᑲᐅᒪᔪᓂ ᐅᖃᐅᓯᒃᑯᑦ ᐃᓕᓐᓂᐊᖅᑎᑦᑎᓂᐅᔪᓂ ᐱᓚᐅᖅᓯᒪᔭᖏᓐᓂ ᓯᕗᓂᐊᓂ ᐱᖅᑯᓯᕆᙱᑕᓄᑦ ᐱᐅᓯᖃᓕᖅᑎᑕᐅᓂᕐᒥ. ᐸᕐᓇᒃᐳᖅ ᐊᖏᒡᓕᒋᐊᖅᓯᓂᕐᒥ ᑕᐃᔅᓱᒥᖓ ᐊᒃᓱᕈᕈᑕᐅᔪᒥ ᐊᓯᖏᓐᓄᑦ ᓄᓇᓕᐅᔪᓄᑦ ᓯᕗᓂᒃᓴᒥ.
“ᑕᒪᓐᓇ ᐊᓕᐊᓇᐃᒋᑦᑎᐊᖅᑕᕋ. ᐊᓕᐊᓇᐃᒋᔭᕋ ᐊᐱᖅᓱᖅᖢᓂ ᐃᓄᑐᖃᕐᓂ ᖃᐅᔨᒪᔭᑐᖃᖏᑦ ᓂᐊᖁᖓᓃᒻᒪᑕ,” ᐅᖃᓚᐅᖅᐳᖅ.
ᐊᖓᒃᑯᓴᔭᐅᔪᖅ, ᓵᓚᖃᓚᐅᖅᐳᖅ FIPRESCI ᓵᓚᖃᐅᓯᐊᒥ ᓯᓚᕐᔪᐊᒥ ᑎᒥᐅᔪᓄᑦ ᑕᕐᕆᔭᓕᐅᕐᓂᕐᒥ ᐊᑭᕋᖅᑐᖅᑎᓄᑦ Annecy ᓯᓚᕐᔪᐊᒥ ᓴᓇᙳᐊᖅᓯᒪᔪᓂᒃ ᑕᕐᕆᔭᐅᑎᓕᐅᕐᓂᕐᒥ ᖁᕕᐊᓱᒍᑕᐅᔪᒥ ᕗᕌᓐᔅᒥ ᔪᓚᐃᒥ, ᐱᓕᕆᐊᖑᓪᓗᓂ ᑲᑐᔾᔨᓪᓗᑎᒃ ᑭᖑᓪᓖᑦ ᓴᖅᑭᑎᑦᑎᔨᐅᔪᓂ ᐊᒻᒪ ᑕᖅᑯᑦ ᓴᖅᑭᑎᑦᑎᔨᐅᔪᓂ.
ᑭᖑᓪᓖᑦ ᐃᓚᒋᔭᐅᖃᑕᐅᕗᖅ ᓴᓇᐅᒐᓕᕆᔨᓂ ᑲᑎᖅᓱᖅᑕᐅᓂᐅᔪᓂ ᐃᓱᒪ ᑲᓇᑕᒥ ᓯᕗᓪᓕᖅᐸᐅᔪᒥ ᑕᒪᕐᒥᒐᓚᖕᓂ-ᐃᓄᖕᓄᑦ-ᓇᖕᒥᓂᕆᔭᐅᔪᒥ ᓯᐊᒻᒪᖅᑎᑦᑎᓂᕐᒧᑦ ᓴᖅᑭᑎᑦᑎᓂᐅᔪᒥ ᑲᒻᐸᓂᐅᔪᒥ.
ᐃᖃᓗᖕᓂ-ᑐᙵᕕᓕᒃ ᑕᖅᑯᑦ ᓴᖅᑭᑎᑦᑎᔨᐅᔪᑦ, ᐃᓄᖕᓄᑦ-ᓇᖕᒥᓂᕆᔭᐅᔪᒥ ᑕᕐᕆᔭᓕᐅᖅᑎᐅᔪᓄᑦ ᑲᒻᐸᓂᐅᔪᖅ ᐃᓂᖃᖅᑐᒥ ᐃᖃᓗᖕᓂ, “ᑐᕌᒐᖃᖅᐳᑦ ᓴᖅᑭᑎᑦᑎᓂᕐᒥ ᐃᒻᒥᓂᒃ ᐃᓱᒪᑐᓂᕐᒥ ᓯᕗᓕᐅᖅᑎᐅᓂᖏᓐᓂ ᒪᒃᑯᒃᑐᓄᑦ ᐊᒻᒪ ᓱᕈᓯᕐᓄᑦ ᐱᓕᕆᐊᖑᓂᐅᔪᓄᑦ” 11–ᓂ ᓇᐃᑦᑐᓂ ᑕᕐᕆᔭᓕᐊᖑᔪᓂ ᓴᓇᓯᒪᔭᖏᓐᓂ. ᑕᖅᑯᑦ ᓴᖅᑭᑎᑦᑎᓂᖃᖅᐳᖅ ᐊᕐᕌᒍᖓᓂ ᐱᖓᔪᖓᓐᓂ ᑕᓚᕖᓴᒥ ᑲᑎᙵᓂᐅᔪᓂ ᐊᓈᓇᐅᑉ ᑐᐱᖓᓐᓂ, ᑕᑯᒃᓴᐅᑎᑕᐅᓲᖑᔪᒥ APTN–ᑯᑦ.
ᓃᐅᓪ ᑯᕆᔅᑕᕗᕐ ᓴᖅᑭᑎᑦᑎᔨᐅᓚᐅᖅᐳᖅ ᐊᖓᒃᑯᓴᔭᐅᔪᕐᒧᑦ.
ᑯᓄᒃ, ᓴᓇᔨᐅᔪᖅ ᐊᑕᓈᕐᔪᐊᑦ ᐅᕿᓚᔪᖅ ᐅᓪᓚᒃᑎᒥ, ᑎᑎᕋᖅᑕᐅᓂᑯᓂ ᓅᑦ ᕌᔅᒥᐅᓴᓐᒧᑦ, ᐊᒻᒪ ᐊᑕᐅᓯᕐᒥ ᐅᓪᓗᖓᓂ ᓄᐊ ᐱᐅᒑᑦᑑᑉ ᐃᓅᓴᖓᓂ, ᐅᖃᓚᐅᖅᐳᖅ ᐸᕐᓇᖕᓂᖃᙱᓚᖅ ᓄᖅᑲᕐᓂᕐᒧᑦ ᑕᕐᕆᔭᓕᐅᕆᓂᕐᒥ, 60–ᖏᓐᓃᓕᕋᓗᐊᖅᑎᓪᓗᒍ.
“ᐃᓱᒪᕗᖓ ᐱᓕᕆᓂᐊᖅᐸᕋ ᐃᓅᓯᓕᒫᓐᓄᑦ ᐊᒥᐊᒃᑯᔪᓄᑦ,” ᐅᖃᓚᐅᖅᐳᖅ. “ᓄᖅᖃᕐᓂᐅᔪᒥ ᑕᑯᒃᓴᐅᔪᖃᙱᓚᖅ ᑕᐃᒪᐃᑦᑐᒥ ᐃᖅᑲᓇᐃᔮᖑᔪᒧᑦ.”