ᑳᑎ ᑕᐅᑐᙱᐅᑉ ᓴᑭᖓ, ᓇᑲᓱᒃ ᑕᐅᑐᙱ, ᐃᖕᒥᓂᒃ ᒥᖅᓱᕈᔾᔩᓐᓇᖃᑦᑕᓚᐅᖅᑐᖅ, ᐅᖁᕈᓐᓇᖅᓴᖅᐸᒃᖢᓂᒋᑦ ᐅᐃᖓᓗ ᓄᑕᕋᖏᓪᓗ.
ᐃᓅᔪᓐᓃᕐᒪᑦ ᐃᒻᒪᖄ 30 ᐅᑭᐅᑦ ᐱᐊᓂᒃᓯᒪᓕᖅᑐᑦ, ᑳᑎ ᓇᓗᓕᐅᖅᑲᓯᒪᓚᐅᖅᑐᖅ.
“ᒫᓐᓇᑲᐅᑎᒋᐊᓗᒃ, ᐃᒡᓗᒥᐅᖃᑎᑯᓗᒃᑲ ᐃᓚᕙᓪᓕᐊᓕᖅᖢᑎᒃ,” ᑕᐃᒪᓐᓇ ᐅᖃᖅᖢᓂ ᑕᐅᑐᙱ. “ᓴᑭᒐ ᑲᒥᒃᑖᕐᕕᒌᓐᓇᖃᑦᑕᓚᐅᕋᑉᑯ, ᐊᒻᒪᓗ ᐅᐃᒐ ᓄᑕᖅᑲᒃᑲᓗ ᐃᓕᖅᑯᓯᑐᖃᑎᒍᑦ ᐊᓐᓄᕌᖅᑖᖅᐸᒃᖢᑎᒃ, ᒥᖅᓱᕐᓂᕐᓗ ᓇᓗᑉᓗᖓ.”
ᑭᖑᓂᖃᓈᖅᓯᖃᑦᑕᓕᓚᐅᖅᑐᖅ ᓴᑭᖓᑕ ᒥᖅᓱᖅᓯᒪᔭᖏᓐᓂᒃ, ᑕᐃᒪᐃᒻᒪᑦ ᐃᖕᒥᓂᒃ ᒥᖅᓱᕋᓱᖃᑦᑕᓕᓚᐅᖅᑐᖅ ᒥᖅᓱᖅᓯᒪᔪᓂᒃ ᐃᓚᓂᓗ ᐊᑐᐃᓐᓇᖃᑦᑕᕈᓐᓇᖁᑉᓗᒋᑦ.
ᐊᒃᓱᓪᓘᓐᓃᑦ, ᓴᑭᖓᑕᑦᑕᐅᖅ, ᖃᔫᑦᑕᖅ ᖃᓗᔾᔭᐅᑉ, ᐊᒻᒪᓗ ᖃᓗᔾᔭᐅᑉ ᓄᑲᖓ ᒪᕆ ᓇᑦᑕ ᐃᖕᒥᓂᒃ ᐃᓕᓐᓂᐊᖅᑎᑦᑎᓕᓚᐅᖅᑑᒃ.
ᐃᓕᓐᓂᐊᖅᑎᑕᐅᓕᓚᐅᖅᑐᖅ ᖃᓄᖅ ᐊᒡᒐᖕᒥᓂᒃ ᐊᑐᖃᑦᑕᕋᔭᕐᒪᖔᕐᒥ, ᑕᓕᕐᒥᓂᒡᓗ ᓇᓗᓇᐃᔭᐃᓂᐊᕐᓗᓂ ᐊᓐᓄᕌᓕᐊᖏᑦ ᖃᓄᖅ ᑕᑭᑎᒋᓇᔭᕐᓂᖏᓐᓄᑦ ᓇᐅᒃᓗᒃᑖᖅ.
“ᑕᒪᒃᑯᐊ ᐳᐃᒍᕐᓇᙱᑦᑐᑦ,” ᑕᐃᒪᓐᓇ ᐅᖃᖅᖢᓂ ᑕᐅᑐᙱ, ᐆᒃᑐᕋᖃᑦᑕᖅᑐᖅ ᓱᓕ ᐊᒡᒐᖕᒥᓄᑦ ᐊᒻᒪᓗ ᐊᓐᓄᕌᓕᐊᓂ ᓈᒻᒪᓈᖅᓯᒪᖃᑦᑕᖅᑕᖏᑦ ᑕᐃᒪᐃᒻᒪᑦ.
ᐃᓕᑦᑎᓚᐅᖅᑐᖅ ᖃᓄᖅ ᐊᒥᕐᓂᒃ ᐊᑐᕐᓗᓂ ᐊᓐᓄᕌᓕᐅᖃᑦᑕᕋᔭᕐᒪᖔᕐᒥ ᒪᓕᒃᑕᐅᔭᕆᐊᓖᑦ ᒪᓕᒡᓗᒋᑦ, ᒪᓕᒐᒃᓴᓕᒻᒪᕆᐊᓗᒃ ᐊᒥᓕᕆᓂᖅ.
“ᐆᒃᑐᓕᖅᖢᓂ ᐊᒥᕐᓂᒃ, 100%-ᒥᒃ ᓈᒻᒪᒋᐊᖃᖃᑦᑕᖅᑐᑦ,” ᑕᐃᒪᓐᓇ ᐅᖃᖅᖢᓂ ᑕᐅᑐᙱ. “ᖃᓄᑐᐃᓐᓈᓗᒃ ᐆᒃᑐᕆᐊᖃᕐᓇᙱᑦᑐᖅ. ᕿᐊᖃᑦᑕᓚᐅᖅᑐᖓ ᒥᖅᓱᖅᖢᖓ ᒥᖅᓱᖅᑕᒃᑲ ᐲᔭᖅᑕᐅᒃᑲᓐᓂᕌᖓᑕ, ᐃᕙᓗᙳᐊᑦ ᐲᔭᖅᑕᐅᑉᓗᑎᒃ, ᐱᒋᐊᒃᑲᓐᓂᕆᐊᖃᖅᐸᒃᖢᖓᓗ.”
ᒥᑭᔪᒥᒃ ᐊᒻᒪᔪᖃᖅᐸᓪᓘᓐᓃᑦ ᐱᒋᐊᒃᑲᓐᓂᕆᐊᖃᖃᑦᑕᓚᐅᖅᑐᖓ, ᓱᐱᔪᓐᓇᕐᓂᖓ ᐱᔾᔪᑎᒋᑉᓗᒍ, ᐊᒻᒪᓗ ᐱᐅᓴᑐᐃᓐᓇᙱᓪᓗᒍ, ᐃᓕᖅᑯᓯᑐᖃᑎᒍᑦ ᐊᓐᓄᕌᓕᐅᕐᓂᖅ ᓄᓇᒥ ᐱᐊᓂᒍᓐᓇᕐᓂᕐᒧᑦ ᑐᕌᖓᓂᖃᕆᐊᓕᒃ. ᖃᓗᔾᔭᐅᑉ ᓇᑦᑕᐅᑉ ᐃᓕᓐᓂᐊᖅᑎᓯᒪᖕᒥᔭᖓ ᑕᐅᑐᙱ ᑐᒃᑐᑦ ᐊᒥᖏᑦᑕ ᓈᖏᑦ ᖃᓄᐃᑕᐅᔭᕆᐊᖃᖃᑦᑕᕐᒪᖔᑕ ᖃᐅᓪᓗᖅᑑᓂᐅᔪᑦ, ᑕᖅᓴᒃᓴᓕᐊᖑᓲᖅ ᑕᑯᑎᑦᑎᔪᓐᓇᖅᑐᖅ ᖃᓄᖅ ᐊᒃᖢᑎᒋᖕᒪᖔᑦ ᐊᖑᑦ – ᑮᓇᐅᔭᑎᒎᙱᑦᑐᖅ, ᑭᓯᐊᓂ ᖃᓄᖅ ᐃᑲᔪᕈᓐᓇᕐᓂᖓᓄᑦ ᐃᓚᒥᓂᒃ ᐊᓯᖏᓐᓂᒡᓗ ᐃᓄᖕᓂᒃ.
ᑲᒦᓪᓕ, ᑲᒥᓕᐅᕐᓂᖅ ᓇᓗᓇᐃᔭᖅᑕᐅᑦᑎᐊᖃᑦᑕᓚᐅᕐᒥᔪᖅ, ᐊᒻᒪᓗ ᑕᒻᒪᕌᖓᑦ ᐋᖅᑭᒋᐊᖅᑕᐅᖃᑦᑕᖅᖢᑎᒃ ᐲᔭᖅᑕᐅᕙᒃᖢᑎᒃ. “ᐅᕙᒻᓂᒃ ᐅᖃᐅᔾᔨᖃᑦᑕᓚᐅᖅᑐᑦ ᐲᔭᐃᖁᔨᑉᓗᑎᒃ ᒥᖅᓱᖅᓯᒪᔭᒃᑲᓂᒃ ᑕᒻᒪᕌᖓᒪ,” ᑕᐃᒪᓐᓇ ᐅᖃᖅᖢᓂ. “ᑕᐃᒪᓐᓇ ᐃᓕᓐᓂᐊᖅᑎᑦᑎᓂᐅᖕᒪᑦ, ᒥᖅᓱᖃᑦᑕᕐᓂᖏᑦ ᒪᓕᑦᑎᐊᕈᓐᓇᖁᑉᓗᒋᑦ. ᐅᑉᓗᒥ, ᒥᖅᓱᖃᑦᑕᓕᕋᑉᑕ ᑐᐊᕕᐊᓗᒃ.”
ᐃᓅᔪᓐᓃᖅᑳᖅᑎᓐᓇᒍ, ᓇᑲᓱᒃ ᐅᖃᐅᔾᔨᖃᑦᑕᓚᐅᖅᑐᖅ ᑕᐅᑐᙱᒥᒃ ᓱᓇᑐᐃᓐᓇᕐᓂᒃ ᐃᓱᒪᖁᓇᒍ ᐱᒻᒪᕆᐊᓗᖕᒥᒃ ᒥᖅᓱᓕᕌᖓᑦ, ᐃᒡᓗᕋᓛᖓᓄᙵᐅᓗᓂ ᐅᖃᓘᑎᐊᓛᓕᔭᙱᓪᓗᓂ ᐅᕝᕙᓘᓐᓃᑦ ᐃᓅᖃᑎᒥᓄᑦ ᐅᐃᒪᔮᖅᑎᑕᐅᙱᓪᓗᓂ. ᑕᐅᑐᙱ ᐃᖕᒥᓂᒃ ᒥᑭᓪᓕᑎᓲᖅ. ᑭᓇᑐᐃᓐᓇᕐᒥᒃ ᐊᔪᙱᓐᓂᖅᓴᐅᓇᓱᒋᙱᑦᑐᖅ, ᐊᒻᒪᓗ ᖃᑉᓯᑲᓪᓚᖕᓂᒃ ᒥᖅᓱᖅᑎᓂᒃ ᐅᐱᒋᔭᓕᒻᒪᕆᐊᓗᒃ ᑭᕙᓪᓕᕐᒥ.
“ᐃᓕᑦᑎᕙᓪᓕᐊᔪᖓ ᓱᓕ ᐅᑉᓗᒥ,” ᑕᐃᒪᓐᓇ ᐅᖃᖅᖢᓂ. “ᐊᒦᑦ ᕿᓯᑦ ᐊᑐᓂ ᐊᔾᔨᒌᙱᑦᑐᐃᓐᓇᐅᖕᒪᑕ.”
ᐊᒥᓱᑦ ᐃᓄᐃᑦ ᐆᒃᑑᑎᖏᓐᓂᒃ ᐱᔪᒪᕙᒃᑐᑦ, ᑭᓯᐊᓂ ᑐᓂᓯᔪᒪᔪᓐᓇᙱᑦᑐᖅ, ᐊᒡᒐᖕᒥᓂᒃ ᐊᑐᖅᖢᓂ ᐆᒃᑐᑲᑕᖃᑦᑕᕋᒥ ᒥᖅᓱᕈᑎᔭᖓ ᐃᓱᒪᒋᑉᓗᒍ.
ᐃᓚᒥᓂᒃ ᒥᖅᓱᕈᔾᔨᒐᔪᒃᑐᖅ, ᑭᓯᐊᓂ ᓂᐅᕕᐊᒃᓴᖃᕋᔪᙱᑦᑐᖅ – ᑭᓯᐊᓂ ᓱᓇᓂᒃ ᒥᖅᓱᕈᑎᓂᒃ ᐱᔭᕆᐊᖃᕌᖓᒥ, ᐊᒻᒪᓗ ᐅᖃᖃᑦᑕᖅᓯᒪᔪᖅ ᔪᒥᓂᒥ ᒥᖅᓲᑎᓕᐊᖑᓯᒪᔪᑦ ᐱᐅᒋᓪᓚᕆᒃᑲᒥᒋᑦ.
ᐸᓂᖕᒥᓂᒃ ᐃᓕᓐᓂᐊᖅᑎᑦᑎᕙᓪᓕᐊᖏᓐᓇᖅᑐᖅ.
“ᐊᓕᐊᓇᐃᒋᖃᑦᑕᙱᓐᓇᑉᑭᑦ ᒪᒃᑯᒃᑐᑦ ᐊᕐᓇᑦ ᐃᒪᓐᓇ ᐅᖃᕌᖓᑕ “ᐆᒥᖓ ᒥᖅᓱᕈᑎᙵ,” ᑕᐃᒪᓐᓇ ᐅᖃᖅᖢᓂ ᑕᐅᑐᙱ. “ᐸᓂᒐ ᐅᖃᐅᑎᓯᒪᔭᕋ, ‘ᑐᒃᓯᕋᑐᐃᓐᓈᓗᖃᑦᑕᙱᓪᓗᑎᑦ. ᐱᔾᔪᔾᔭᐅᔪᒪᓗᑎᑦ ᐅᖃᑐᐃᓐᓇᖃᑦᑕᙱᓪᓗᑎᑦ.’ ᐃᓄᖁᑎᕗᑦ ᑕᐃᒪᐃᑦᑑᓚᐅᙱᒻᒪᑕ. ᐃᖕᒥᓂᒃ ᐱᓇᓱᐊᖃᑦᑕᖅᓯᒪᔪᑦ. ᑕᐃᒪᓐᓇ ᐸᓂᒐ ᐅᖃᐅᑎᖃᑦᑕᖅᓯᒪᔭᕋ, ‘ᐅᓇ ᑕᑯᒍᒃ, ᑕᐅᑐᒋᑦ ᖃᓄᖅ ᐱᓕᕆᖕᒪᖔᕐᒪ, ᑕᑯᒋᑦ ᖃᓄᖅ ᒥᖅᓱᕐᒪᖔᕐᒪ, ᐃᕙᓗᙳᐊᖅ ᐊᑐᖅᑕᕋ ᑕᑯᒍᒃ, ᑕᑯᒍᒃ ᖃᓄᖅ ᐆᒃᑐᖅᓯᒪᖕᒪᖔᑉᑯ.”
ᐃᖅᑲᐅᒪᐃᓐᓇᖃᑦᑕᕐᓂᐊᖅᑐᖅ ᓴᑭᒥᓂᒃ ᐊᒻᒪᓗ ᖃᓄᖅ ᐱᔾᔪᔾᔭᐅᒐᔪᓚᐅᕐᓂᕐᒥᓄᑦ.
“ᐃᕐᓂᓂ ᑎᒍᐊᑯᓗᓂ ᓇᒡᓕᒋᓪᓚᑦᑖᓚᐅᖅᑕᖓ, ᐅᕙᒻᓂᒡᓗ ᓇᒡᓕᒍᓱᑦᑎᐊᖅᖢᓂ,” ᑕᐃᒪᓐᓇ ᐅᖃᖅᖢᓂ.