ᖁᓕᑦᑕᐅᔭᖅᓯᒪᓂᕐᒧᑦ ᐊᕐᕌᒍᖓᓂ ᐃᓚᖓᓐᓂ ᓄᖅᑲᙵᓚᐅᑲᖕᓇᐅᓕᕋᓗᐊᖅᑎᓪᓗᒍ, ᖃᔅᓯᒐᓚᐃᑦ ᕿᑎᕐᒥᐅᓂ ᐊᕐᓇᐃᑦ ᐃᓚᒋᐊᖅᓯᕗᑦ ᐱᐅᓂᐅᔪᓂ ᐅᑭᐅᒃᑯᑦ ᖁᓕᑦᑕᐅᔭᖏᓐᓂ ᐅᔾᔨᕐᓇᕐᔪᐊᕐᓂᐊᖅᑐᓂ ᐅᑭᐅᖑᓛᖅᑐᒥ.
ᐱᑦᖁᕼᐃᕐᓂᒃᑯᑦ ᐃᓕᕼᐊᐅᑎᓂᖅ/ᕿᑎᕐᒥᐅᓂ ᐃᑦᑕᕐᓂᓴᓕᕆᔨᒃᑯᑦ ᑲᑐᔾᔨᖃᑎᒌᖏᑦ ᒫᓐᓇᓕᓴᐅᔪᒥ ᐃᓕᓐᓂᐊᕐᓂᖃᓚᐅᖅᐳᑦ ᐃᓚᐅᔪᓄᑦ ᓴᓇᓂᕐᒧᑦ ᑲᓚᖃᐅᖅᑐᓂ ᖃᓕᐹᓂ ᐊᒻᒪ ᐱᕋᕐᓂᐅᔪᓂ ᖁᓕᑦᑕᐅᔭᖏᓐᓄᑦ.
“ᐊᔾᔨᒌᙱᕈᓘᔭᖅᑐᓂ ᓴᓇᓯᒪᓂᖃᐅᖅᐳᖅ,” ᐅᖃᓚᐅᖅᐳᖅ ᐊᐃᓖᓐ ᐅᒃᕼᐃᓇ, ᐃᓕᖅᑯᓯᒧᑦ ᐱᓕᕆᔨᐅᔪᖅ ᐃᑦᑕᕐᓂᓴᓕᕆᔨᒃᑯᑦ ᑲᑐᔾᔨᖃᑎᒌᖏᓐᓄᑦ, ᓇᖕᒥᓂᖅ ᖁᓕᖅᑕᐅᔭᖓ ᑐᖑᑦᑐᕆᒃᑐᒥ ᖃᓕᐹᓕᖕᒥ ᑐᑭᖃᑦᑎᐊᕐᓂᐅᔪᒥ ᖃᓪᓗᓈᖅᑕᖓ ᑐᓐᓂᖅᑯᓯᐊᕆᖕᒪᒍ ᐃᓄᑐᖃᐅᓚᐅᖅᑐᒥ. “ᐃᓚᐅᖃᑕᐅᔪᑦ ᓂᕈᐊᖅᑎᓲᕆᕙᕗᑦ ᐊᑐᕈᒪᔭᖏᓐᓂ – ᓂᕈᐊᖅᖢᑎᒃ ᑲᓚᖓᓂ ᐊᒻᒪ ᓴᓇᓯᒪᓂᐊᕐᓂᖓᓂ ᐊᒻᒪ ᑭᓱᓂᒃ ᐃᓕᔪᒪᔭᒥᓂᑦ.”
ᐅᒃᕼᐃᓇ ᓇᖕᒥᓂᖅ ᑲᑎᙵᓂᖃᖅᐳᖅ ᑲᓕᑯᒥ ᓴᓇᓯᒪᓂᖓᓂ ᖁᓕᑦᑕᐅᔭᒥᒃ ᐅᖃᓚᐅᖅᐳᖅ ᐊᔭᐅᑉᐱᐊᖓ ᓇᒃᓴᓚᐅᖅᓯᒪᖕᒪᑦ ᓴᓇᓯᒪᓂᖓᓂ ᐊᓛᔅᑲᒧᑦ. ᓯᓂᒃᓴᖓ ᐱᕐᕋᖅᓯᒪᔪᖅ, ᐊᕙᓗᓲᒥᒃ ᖁᓕᑦᑕᐅᔭᐅᑉ ᐊᑎᖓᓂ, ᐃᓚᒋᔭᐅᓪᓗᓂ ᐱᒋᐊᓚᐅᖅᓯᒪᔪᒥ ᐃᓅᕕᒃ/ᑐᒃᑐᔮᖅᑐᖅ ᐃᓂᐅᔪᒥ ᓄᓇᑦᓯᐊᕐᒥ, ᐃᓚᒋᐊᖅᓯᓚᐅᖅᐳᖅ.
ᐅᓂᒃᑳᕆᓚᐅᖅᐸᖓ ᐊᓈᓇᖓᓂ “ᑲᒪᓇᖅᑐᒻᒪᕆᐊᓘᓪᓗᓂ ᒥᖅᓱᖅᑎᐅᓂᖓᓂ” ᐃᓕᓐᓂᐊᖅᑎᑦᑎᓚᐅᖅᑐᒥ ᐃᒻᒥᓂᒃ ᐊᒻᒪ ᓄᑲᖏᓐᓂ ᒥᖅᓱᕆᐅᖅᓴᓂᕐᒧᑦ. ᒥᖅᓱᕐᓂᖅ ᖁᓕᑦᑕᐅᔭᓂ ᐱᓕᕆᐊᖑᓲᖑᕗᖅ ᒥᖅᓱᖅᑕᐅᓪᓗᓂ ᐊᒡᒐᒧᑦ ᐊᒻᒪ ᒥᖅᓲᑎᒧᑦ. ᐊᑯᓂᐅᓂᖓᓂ ᐊᔾᔨᒌᙱᕈᓘᔭᖅᐳᖅ. ᐅᒃᕼᐃᓇ ᐅᖃᓚᐅᖅᐳᖅ ᐊᑕᐅᓯᖅ ᐊᕐᓇᖅ ᐃᑲᕐᕋᓂ ᒪᕐᕉᖕᓂ ᖃᐅᑕᒫᒥ ᐱᓕᕆᓪᓗᓂ ᐱᓕᕆᐊᒃᓴᒥᓂ ᐱᓇᓱᐊᕈᓯᕐᒥ ᐱᔭᕇᖅᓯᓂᕐᒧᑦ.
ᐃᓕᓐᓂᐊᕐᓂᕐᒧᑦ ᐃᓚᐅᖃᑕᐅᔪᑦ, ᐊᔪᕆᖅᓱᖅᑕᐅᕙᓪᓕᐊᓪᓗᑎᒃ ᐃᓄᑐᖃᕐᒥ ᐋᓐ ᐅᐃᖕᓂᒃᒧᑦ ᐃᓚᓯᓚᐅᖅᐳᖅ ᖃᕝᕕᒑᕐᔪᖕᒥ ᓄᐃᓚᒃᓴᒥ ᐊᒻᒪ ᒥᖅᑐᓂ “ᐳᕼᐃᑕᕐᓂ” ᓇᓴᖓᓐᓂ ᐊᓐᓄᕌᓕᐊᒥᓂᑦᑕᐅᖅ.
ᖃᓪᓗᓈᓂ–ᓴᓇᓯᒪᔪᓂ ᖁᓕᑦᑕᐅᔭᖃᐅᖅᖢᑎᒃ ᐊᒻᒪ ᐅᑭᐅᖅᓯᐅᑎᓂ ᔭᐸᓂ ᐊᑐᐃᓐᓇᐅᒐᔪᒃᑐᓂ ᓄᓇᓕᖕᓂ ᓂᐅᕕᕐᕕᓂᑦ ᐊᒻᒪᓗ ᖃᓪᓗᓈᑦ ᓄᓇᖓᓐᓂ, ᐱᒻᒪᕆᐅᕗᖅ ᐱᓯᒪᐃᓐᓇᕋᓱᖕᓂᕐᒥ ᐱᖅᑯᓯᑐᖃᕐᒧᑦ, ᐅᖃᐅᓯᐅᓪᓗᓂ ᐅᒃᕼᐃᓇᒧᑦ.
“ᓴᓇᓯᒪᓂᖓ ᐊᓯᐅᕙᓪᓕᐊᓕᕐᒪᑦ ᐅᕙᓂ ᑕᐃᒫᒃ ᐸᐸᑦᑎᓇᓱᐊᖅᐳᒍᑦ ᑲᓕᑯᒥ ᓴᓇᓯᒪᓂᖓᓂ. ᓱᒃᑲᐃᑦᑐᒥ ᐊᓯᐅᕙᓪᓕᐊᖕᒪᑦ ᐸᐸᓐᓇᓱᐊᖅᑕᕗᑦ, ᐃᖏᕐᕋᑏᓐᓇᕋᓱᐊᖅᖢᒍ,” ᐅᖃᓚᐅᖅᐳᖅ. “ᒪᒃᑯᖕᓂᖅᓴᐅᔪᓂ ᐱᐅᓯᖃᑎᒌᖑᔪᓂ ᐅᕙᓂ ᐃᓕᑦᑎᔪᒪᔪᓂ ᓴᓇᓂᕐᒧᑦ.”
ᐅᓄᕐᓂᖅᓴᓂ ᐃᓕᓐᓂᐊᕐᓂᖃᕈᓐᓇᖅᑐᖅ ᑕᐃᒪᐃᑦᑐᒐᓚᖕᓂ ᐅᑭᐊᒃᓵᒥ ᓂᒡᓚᓱᖕᓂᖅᓴᖅ ᓯᓚ ᓴᖑᑎᑦᑎᒍᓂ ᐃᓄᐃᑦ ᐃᓱᒪᓂᕆᔭᖏᓐᓂ ᓴᐳᔾᔨᓯᒪᓂᕐᒧᑦ ᓯᓚᒥ ᐊᓐᓄᕌᓄᑦ.
“ᒫᓐᓇᐅᔪᒥ ᑕᖕᒫᕐᓇᐅᕗᖅ, ᐃᖃᓪᓕᐊᕐᓇᐅᕗᖅ ᐊᒻᒪ ᓄᓇᒦᓐᓂᕐᒥ. ᐅᖅᑰᕗᖅ ᑭᒃᑯᓕᒫᑦ ᐊᐅᓪᓛᖅᐸᓪᓕᐊᕗᑦ,” ᐅᒃᕼᐃᓇ ᐅᖃᓚᐅᖅᐳᖅ.