ᐅᓪᓗᑐᐃᓐᓇᖅ, ᓄᕕᐱᕆ 5 ᓇᓗᓇᐃᖅᓯᕗᖅ ᐅᓪᓗᕐᔪᐊᖑᓂᖓᓂ ᐃᓅᓪᓗᓂ rapper ᔮᔅᓕᓐ ᐋᕆᐊᕐᒧᑦ, ᖁᙱᐊᖅᑕᐅᓲᖅ ᐊᑎᖃᖅᖢᓂ ᐋᔅᓕᓐᒥ.
ᑕᐃᑲᓂ ᓯᕗᓪᓕᖅᐹᖓᓂ ᓂᔾᔮᑎᑦᑎᓂᐅᔪᖅ, ᐊᑎᓕᖕᒥ Lovely–ᒥ, ᓴᖅᑭᑕᐅᓂᐊᕐᓂᖓᓂ.
8–ᖑᔪᓂ ᓂᔾᔮᑎᑦᑎᓂᐅᔪᓂ, ᐱᐅᒋᓛᕆᕙᖓ ᓂᔾᔮᑎᑦᑎᓂᐅᔪᒥ ᑕᐃᒎᓯᓕᖕᒥ Wrong Guy–ᒥ, ᓯᕗᓂᐊᓂ ᐊᑎᖃᓚᐅᖅᑐᒥ Adore You–ᒥ.
“ᐊᐃᑉᐸᕇᓄᑦ ᑐᕌᖓᔪᖅ. ᑐᓴᕐᓂᖅᑐᖅ, ᐅᖃᐅᓯᖏᑦ ᐱᐅᓂᖅᐹᖑᖅᑰᖅᑐᖅ ᐱᓕᕆᐊᓐᓂ,” ᐅᖃᓚᐅᖅᐳᖅ.
ᐋᔅᓕᓐ — ᑕᐃᔭᐅᔪᖅ “Aw-slin” — ᑎᑎᕋᓚᐅᖅᐳᖅ ᑕᒪᒃᑭᒐᓚᖕᓂ ᐃᙱᐅᓯᓂᒃ ᓂᔾᔮᑎᑦᑎᓂᐅᔪᒥ.
ᑐᐊᕐ ᓴᐃᒪᓐᓴᓐ, ᐊᐅᓚᑦᑎᔨᒻᒪᕆᒃ Hitmakerz–ᑯᓐᓂ, ᓇᓗᓇᐃᒃᑯᑕᖅ ᐊᑎᓕᐅᕆᓚᐅᖅᑐᒥ ᐋᔅᓕᓐᒥ, ᐋᖅᑭᒃᓱᐃᓚᐅᖅᐳᖅ ᐊᒻᒪ ᓴᖑᑎᑦᑎᓂᐅᔪᒥ ᐃᙱᐅᓯᓂᑦ.
ᐱᓕᕆᐊᒃᓴᐅᔪᖅ ᐱᓕᕆᔭᐅᕙᓪᓕᐊᓚᐅᖅᐳᖅ ᑕᐃᒪᙵᓂ 2020–ᒥ.
“ᐅᑕᖅᑭᔪᓐᓇᐃᓪᓕᔪᖓ ᓴᖅᑭᓐᓂᐊᕐᓂᖓᓂ. ᓯᕗᓪᓕᖅᐹᑦᑎᐊᖑᓪᓗᓂ ᓂᔾᔮᑎᑦᑎᓂᕆᕙᕋ,” ᐅᖃᓚᐅᖅᐳᖅ ᐋᔅᓕᓐ, 22, ᒥᑦᑎᒪᑕᓕᖕᒥᐅᑕᐅᔪᖅ.
ᐱᓐᓇᕆᓛᕆᔭᖓ ᓂᔾᔮᑎᑦᑎᓂᕐᒧᑦ ᐊᔭᐅᕆᔨᒋᔭᖓᓂ rapper Eminem–ᖑᕗᖅ.
“ᐃᖅᑲᐅᒪᕗᖓ (ᓯᕗᓪᓕᖅᐹᖓᓂ) ᓂᔾᔮᑎᑦᑎᓂᖓ ᓴᖅᑭᓐᓇᒥ. ᐅᕙᓐᓂ ᓂᕈᐊᖕᓂᖃᖅᑎᑦᑎᓚᐅᖅᐳᖅ. (ᓂᔾᔮᑎᑦᑎᓂᕋ) ᐱᓕᕆᑦᑎᐊᕐᓂᖃᙱᒃᑯᓂ, ᓱᓕ ᓂᕆᐅᖕᓂᖃᖅᑎᑦᑎᓂᐊᖅᐳᖅ ᐅᕙᓐᓂ. ᑕᐃᔅᓱᒪᙵᑦ ᐃᓕᑦᑎᓚᐅᖅᐳᖓ.”
Eminem ᐱᑦᑎᐊᖅᑕᐅᖃᑦᑕᓚᐅᙱᓐᓂᕗᖅ, ᐃᓚᒋᐊᖅᓯᓚᐅᖅᐳᖅ. ᑕᒪᓐᓇ ᑐᑭᓯᐅᒪᔭᖓ.
“ᖃᓪᓗᓈᖑᖅᑰᔨᔪᖓ ᐃᓚᖏᓐᓄᑦ ᐃᓄᖕᓄᑦ. ᐃᓚᖓᒍᑦ ᕿᕐᓂᖅᑕᐅᕗᖓ, ᑕᐃᒫᒃ ᖃᓄᐃᑦᑑᓂᓐᓂ ᐱᔾᔪᑎᒋᓪᓗᒍ ᐊᑭᕋᖅᑐᖅᑕᐅᓲᖑᕗᖓ ᐊᒻᒪᓗ ᖃᓄᕈᓘᔭᖅ ᐅᖃᐅᓯᐅᕈᓘᔭᖅᐸᒃᐳᖓ, ᐅᖃᓚᐅᖅᐳᖅ. “ᐊᑖᑕᒪ ᑎᓯᒡᓕᑎᓚᐅᖅᐹᖓ — ᕿᔪᑦ ᐊᒻᒪ ᐅᔭᖅᑲᑦ ᓱᕋᒃᓯᔪᓐᓇᖅᐳᑦ ᓴᐅᓂᓐᓂ ᑭᓯᐊᓂ ᐅᖃᐅᓰᑦ ᐅᕙᓐᓂ ᐋᓐᓂᖅᓯᓚᐅᖅᓯᒪᔾᔮᙱᑦᑐᑦ.”
ᑭᓯᐊᓂ ᐅᔾᔨᕈᓱᒃᐳᖅ ᖃᓄᑎᒋ ᐋᓐᓂᕐᓇᕈᓐᓇᕐᓂᖓᓂ ᐱᑦᑎᐊᖅᑕᐅᙱᓐᓂᐅᔪᒥ. ᖃᐅᔨᒪᓕᓚᐅᖅᐸᖓ ᐃᓅᔪᓐᓃᓚᐅᖅᑐᒥ ᑲᓕ ᕗᕋᐃᓱᕐ, ᐃᓚᒌᑦ ᓴᖅᑭᑎᑦᑎᓚᐅᖅᑐᓂ ᑐᖁᓚᐅᖅᑎᓪᓗᒍ ᐸᒡᕕᓵᕆᔭᐅᕐᔪᐊᖅᓯᒪᓂᖓᓂ ᖃᕋᓴᐅᔭᒃᑯᑦ.
ᐋᔅᓕᓐ, 22, ᐅᖃᐅᓯᖃᓚᐅᕆᕗᖅ ᐃᓚᖏᓐᓂ ᐊᒃᓱᕈᕈᑎᒋᓯᒪᔭᖏᓐᓂ ᕗᕋᐃᓱᕐᒧᑦ ᖃᔅᓯᐊᕐᔪᖕᓂ ᐊᕐᕌᒍᓂ ᖄᖏᖅᓯᒪᓕᖅᑐᓂ.
“ᑕᐃᓐᓇᐅᕗᖅ ᐅᕙᓐᓂ ᓇᓂᓯᓚᐅᖅᑐᒥ,” ᐅᖃᓚᐅᖅᐳᖅ. “ᓴᙱᓂᕆᓚᐅᖅᐹᖓ ᐊᑕᐅᓯᐊᖅᖢᓂ ᐊᒃᓱᐊᓗᒃ ᐱᑦᑎᐊᖅᑕᐅᖃᑦᑕᙱᓐᓂᓐᓂ. ᐅᕙᓐᓂ ᐃᒡᓚᐅᑎᖃᖃᑦᑕᓚᐅᖅᐳᑦ ᐊᒻᒪ ᑕᐃᒪᓐᓇᒐᓚᒃ.”
ᑕᐃᒫᒃ ᑎᑭᐅᑎᔪᓐᓇᕐᓂᐅᔪᒥ ᓴᖅᑭᑎᑦᑎᓂᕐᒥ ᓂᔾᔮᑎᑦᑎᓂᐅᔪᒥ ᐊᖏᔫᓪᓗᓂ ᑎᑭᐅᑎᔪᓐᓇᖅᓯᓯᒪᓂᐅᕗᖅ ᐊᒻᒪᓗ ᐱᓕᕆᓂᐅᓪᓗᓂ ᖄᖏᐅᑎᓂᕐᒥ ᐊᑭᕋᖅᑐᖅᑎᖏᓐᓂ. ᒫᓐᓇᐅᔪᒥ ᐱᓕᕆᐊᕆᓛᕈᒪᔭᖓ ᖁᕝᕙᕆᐊᕐᓂᕐᒧᑦ ᐱᒻᒪᕆᐅᓂᖓᓂ ᓂᔾᔮᑎᑦᑎᓂᕐᒧᑦ ᐱᓕᕆᕐᔪᐊᕈᓐᓇᕐᓂᖓᓂ, ᐸᕐᓇᒃᐳᖅ ᐃᒃᓯᕋᕐᔪᐊᙳᕈᒪᕗᖅ 30–ᖑᖅᓯᒪᓕᕈᓂ. ᐅᒃᐱᕐᓂᖅ ᐱᒻᒪᕆᐅᓪᓗᓂ ᐃᓚᒋᔭᐅᕗᖅ ᐃᓅᓯᖓᓂ, ᐊᒻᒪ ᐃᓚᒋᔭᐅᓪᓗᓂ ᓴᙱᓂᖃᖅᑎᑦᑎᔪᒥ.
“ᒎᑎᐅᑉ ᐃᓱᒪᒋᔭᖓᓂ ᐃᓱᒪᒋᔭᑐᐊᕆᕙᕋ,” ᐅᖃᓚᐅᖅᐳᖅ.
ᕿᓚᒻᒥᐅᔪᒥ ᑐᕌᒐᒃᓴᖏᓐᓂ ᐃᓚᖃᖅᐳᖅ ᐃᓚᐅᖃᑕᐅᓕᕐᓂᖓᓂ ᓂᔾᔮᑎᑦᑎᓂᕐᒧᑦ ᐱᓕᕆᐊᖑᔪᒥ Algonquin ᓯᓚᑦᑐᖅᓴᕐᕕᖓᓄᑦ ᐋᑐᕚᒥ ᔭᓄᐊᕆᒥ. ᑐᕌᕋᓱᐊᖅᐳᖅ ᑎᒍᓯᓂᖓᓂ ᑐᙵᕕᐅᔪᓂ ᓯᐊᒻᒪᖅᑎᑦᑎᓂᐅᔪᒥ, ᑕᕐᕆᔭᓕᐅᕐᓂᕐᒥ ᐊᒻᒪ ᓂᔾᔮᑎᑦᑎᓂᕐᒧᑦ ᑕᖅᑭᓄᑦ–8–ᓄᑦ ᐱᓕᕆᐊᖑᔪᒥ.
ᑐᕌᒐᒃᓴᖃᕆᕗᖅ ᐳᓚᕋᓛᕐᓂᐊᕐᓂᖓᓂ ᓄᓇᕗᓕᒫᒥ, ᐊᒻᒪ ᐱᓕᕆᖃᑎᖃᕈᒪᕗᖅ Hitmakerz ᐃᓚᐅᖃᑕᐅᓯᒪᔪᓂ ᓵᓇ ᓰᑏᓐᓇᕐᒥ ᐊᒻᒪ ᐋᓐᔨᓚ ᐊᒪᕈᐊᓕᖕᒥ.
“ᐋᓐᔨᓚ ᐱᖃᓐᓇᕆᓯᒪᕙᖓ ᓱᕈᓯᐅᓂᓕᒫᖓᓂ,” ᐅᖃᓚᐅᖅᐳᖅ ᐊᒪᕈᐊᓕᖕᒥ, ᑕᒪᒃᑭᑦ ᐱᕈᖅᓴᓯᒪᖕᒪᑕ ᐃᒡᓗᓕᖕᒥ.
ᓰᑏᓐᓇᒃᒥ, rapper–ᖃᑎᒋᔭᒥᓂ ᖃᒪᓂᑦᑐᐊᕐᒥᐅᑕᖅ, ᐅᖃᓚᐅᖅᐳᖅ, “ᐱᐅᒋᕙᕋ. ᐅᐊᑲᓪᓚᐅᕗᖅ
ᐳᓚᕋᕐᓂᖅ ᑐᓂᓯᓇᔭᖅᐳᖅ ᐋᔅᓕᓐᒥ ᐱᕕᒃᓴᖃᕐᓂᐅᔪᒥ ᐱᙳᐊᕐᓂᕐᒥ ᐅᐸᒃᓯᒪᔪᓂ ᐃᓄᒋᐊᖑᔪᓂ, ᓱᓕ ᑕᐃᒪᐃᓚᐅᖅᓯᒪᙱᒻᒪᑦ.
ᑕᕝᕙᑐᖅ ᑭᖕ–ᖑᓚᖓ, ᓯᕗᓪᓕᖅᐹᖑᓪᓗᓂ ᐊᑕᐅᓯᐅᔪᒥ ᐅᕙᙵᑦ Lovely–ᒥ ᒪᕐᕈᒋᓪᓗᓂᐅᒃ ᓴᖅᑭᑎᓯᒪᔭᖓᓂ ᑕᒪᐃᑎᒍᑦ. ᒪᓕᒃᐳᖅ Adventure Awaits-ᒥ, ᓴᖅᑭᓚᐅᖅᑐᒥ ᓈᓚᐅᑎᒃᑯᑦ 2019–ᒥ.
ᓯᑎᐱᕆᒥ, ᐋᔅᓕᓐ ᐊᑕᐅᓯᐅᓚᐅᖅᐳᖅ ᖃᔅᓯᒐᓚᖕᓂ ᓴᓇᐅᒐᓕᕆᔨᓂ ᐃᓚᐅᖃᑕᐅᓂᕐᒥ Hitmakerz ᐱᓕᕆᕝᕕᖓᓂ ᐋᑐᕚᒥ ᐱᓇᓱᐊᕈᓯᐅᔪᒥ ᐱᓕᒻᒪᒃᓴᕐᓂᐅᔪᒥ ᖁᙱᐊᖅᑕᐅᖃᑦᑕᕐᓂᕐᒧᑦ. ᑕᐃᑲᓃᑎᓪᓗᒍ, ᑕᕐᕆᔭᓕᐅᕆᓚᐅᖅᐳᖅ ᑕᕝᕙᑐᖅ ᑭᖕ–ᖑᓚᖓ, ᑕᑯᒃᓴᐅᑎᑦᑎᔪᒥᒃ ᐃᒻᒥᓂᒃ ᐊᒻᒪ ᑐᓄᐊᓂ ᒧᒥᖅᑎᐅᔪᓂ ᑕᑯᒃᓴᐅᑎᑦᑎᔪᓂ ᐊᐅᓚᓂᖏᓐᓂ.
“ᐃᓄᑦᑎᐊᕙᐅᓚᐅᖅᐳᑦ, ᐱᓕᕆᔨᒻᒪᕆᐅᓪᓗᑎᒃ, ᑐᙵᓇᖅᑐᑦ. ᐃᓄᑦᑎᐊᕙᒻᒪᕆᐊᓘᓚᐅᖅᐳᑦ. ᐃᖅᑲᐅᒪᖃᑦᑕᓕᕇᖅᐸᒃᑲ, ᑭᖑᓂᖃᕆᕙᕋ ᑲᑎᙵᕈᓘᔭᖅᖢᑕ,” ᐅᖃᓚᐅᖅᐳᖅ ᐋᑐᕚᒦᓚᐅᕐᓂᖓᓂ.
ᓴᐃᒪᓐᓴᓐ ᐅᖃᐅᓯᖃᖅᐳᖅ ᐋᔅᓕᓐᒥ “ᐊᔾᔨᐅᙱᖦᖢᓂ ᓴᓇᐅᒐᓕᕿᔨᐅᓂᖓᓂ, ᓄᓇᕗᒻᒥᑐᐃᓐᓇᐅᙱᑦᑐᖅ ᑭᓯᐊᓂ ᑲᓇᑕᒥ.”
“ᐱᓕᕆᔨᕐᔪᐊᖑᓂᖓᓂ ᐱᓕᒻᒪᒃᓴᖅᓯᒪᙱᓚᖅ, ᑭᓯᐊᓂ ᓈᓚᑦᑎᐊᒃᑳᓗᒃ ᐊᒻᒪ ᑐᓴᕈᒥᓇᖅᑐᓂ ᐃᓱᒪᓂᖃᓲᖑᕗᖅ,” ᐅᖃᓚᐅᖅᐳᖅ. “ᐅᓇ ᐃᑲᔪᓲᖑᕗᖅ ᐃᙱᐅᓯᖏᓐᓂ ᓂᐱᖏᓐᓂ ᐊᔾᔨᐅᙱᕐᔪᐊᕐᓂᖏᓐᓂ ᐊᓯᓕᒫᖏᓐᓂ. ᔮᔅᓕᓐ ᐊᒃᓱᐊᓗᒃ ᐊᐅᓚᓂᖃᕈᒪᓂᖃᖅᐳᖅ, ᑕᐅᑐᒃᑕᑐᐊᖃᑲᐃᓐᓇᖅᖢᓂ, ᐊᒻᒪ ᒪᑐᐃᖓᓪᓗᓂ ᓄᑖᓄᑦ ᐊᒃᓱᕈᕐᓂᐅᔪᓂ. ᑕᒪᓐᓇ ᑕᒪᒃᑭᑦ ᓴᓇᐅᒐᓕᕆᔨᐅᔪᑦ ᐱᔭᕆᐊᖃᕐᓂᖏᓐᓂ ᐱᓕᕆᔨᕐᔪᐊᙳᕈᒪᒍᑎᒃ. ᐊᐅᓚᓂᖃᕈᒪᓂᖅ ᐱᒻᒪᕆᐅᓂᖅᓴᐅᕗᖅ ᐊᔪᙱᓐᓂᐅᔪᒥ – ᐃᓕᓐᓂᐊᖅᑎᑦᑎᔪᓐᓇᖅᐳᑎᑦ ᐊᔪᙱᓐᓂᐅᔪᒥ, ᑭᓯᐊᓂ ᐃᓕᓐᓂᐊᖅᑎᑦᑎᔪᓐᓇᙱᓚᑎᑦ ᐊᐅᓚᓂᖃᕈᒪᓂᐅᔪᒥ, ᐱᓇᔪᐃᓐᓇᕐᓂᕐᒥ, ᐊᒻᒪ ᐊᒃᓱᕈᕐᓂᐅᔪᒥ.”