Skip to content

ᓱᕈᓯᕐᓂᒃ ᑲᑉᐱᐊᓱᒃᑎᑦᓯᓂᖅ

ᐊᔾᔨᒌᖏᑦᑐᑦ ᑲᑉᐱᐊᓇᖅᑐᑦ ᐃᓂᖁᓇᖏᑦᑐᓪᓗ ᓄᓇᕗᒥ ᑕᑯᒃᓴᐅᑎᑕᐅᓂᐊᓕᕆᕗᑦ ᐊᒻᒪ ᑕᒪᒃᑯᐊ ᐃᖃᓗᒃᑑᑦᓯᐊᒥ ᓴᓂᕋᔭᖕᒥᓗ ᐊᑐᖅᑕᐅᖃᑦᑕᕆᓪᓗᑎᒃ.

ᕼᐊᓚᓐ ᑭᐅᕼᐊ ᐊᒻᒪ ᐲᑕ ᓚᐅᑉ, ᐊᐃᐸᕇᒃ, ᑕᐃᒪᓐᓇ ᐃᖃᓗᒃᑑᑦᓯᐊᒥ ᐊᓐᓄᕌᓗᖕᓇᐅᑎᓪᓗᒍ ᖃᓄᐃᓕᐅᕈᑎᖃᖃᑦᑕᖅᐳᑦ ᐊᕐᕌᒍᓄᑦ 13-ᖑᓕᖅᑐᓄᑦ. ᑕᐃᒪᓐᓇ ᐃᒡᓗᒥᖕᓂᒃ ᐃᓕᐅᖃᐃᖃᑦᑕᖅᐳᑦ ᑲᑉᐱᐊᓇᖅᑑᑎᑦᓯᓇᓱᐊᖅᖢᑎᒃ.

ᐊᐃᑉᐸᕇᒃ ᕼᐊᓚ ᑭᐅᕼᐊ ᐊᒻᒪ ᐲᑕ ᓘᐅᑉ ᐃᖃᓗᒃᑑᑦᓯᐊᒥ ᐃᒡᓗᒥᖕᓂᒃ ᐊᔾᔨᒌᖏᑦᑐᓂᒃ ᖃᓄᐃᓕᐅᕈᑎᖃᖃᑦᑕᖅᐳᑦ ᑕᒪᒃᑯᐊ ᑎᖕᒥᖃᑦᑕᖅᑐᑦ ᐹᑦᔅ, ᓴᐅᓂᕕᓂᖑᐊᑦ ᐊᒻᒪ ᐱᐅᖏᑦᑐᑦ ᖃᓪᓗᐱᓪᓗᐃᑦ ᐊᔾᔨᒌᖏᑦᑐᑦ ᐸᓂᖏᓪᓗ ᑕᐃᒪᐃᓕᐅᕈᑎᖃᖃᑦᑕᖅᐳᑦ, ᑕᐃᒪᓐᓇ ᑭᐊᕕᒃ ᐃᓐᑐᐳᕋᐃᓯᒃᑯᓐᓄᑦ ᐊᑐᖅᑕᐅᕙᒃᑭᓪᓗᑎᒃ ᑕᐃᒪᓐᓇᐃᓕᐅᕐᓂᖅ ᐱᓕᕆᕕᖓᓄᑦ ᐊᑐᖅᑕᐅᕙᒃᑭᓪᓗᑎᒃ Kalvik Enterprises. ᑕᐃᒪᓐᓇᐃᓕᐅᕆᐊᓚᐅᖅᐳᑦ ᐊᕐᕌᒍᓂ 13-ᓂ. ᐱᐅᓂᖅᓴᐅᑎᑦᓯᓇᓱᐊᖃᑦᑕᖅᖢᑎᒡᓗ ᐊᔾᔨᐅᖏᑦᑑᒐᓱᐊᖅᓱᑎᒃ ᐊᕐᕌᒍᑕᒫᑦ ᑎᑭᓴᐃᖃᑦᑕᖅᓱᑎᒃ ᕼᐊᓗᕖᒃᑯᑦ ᑕᑯᒃᓴᐅᑎᑕᐅᔪᒃᓴᓂᒃ ᐅᒥᐊᕐᔪᐊᒃᑯᑦ ᐊᕐᕌᒍᑕᒫᑦ.

ᐃᓕᖁᓯᑐᖃᕆᔭᐅᓕᖅᐳᖅ, ᐊᒻᒪ ᐃᓕᓐᓂᐊᕐᕕᑦ ᐊᒡᔭᖅᓯᖃᑦᑕᖅᐳᑦ ᓱᕈᓯᖕᓂᒃ ᐃᒡᓗᒋᔭᖏᓐᓄᑦ ᑕᑯᔭᖅᑐᐃᑎᑕᐅᓪᓗᑎᒃ.

“ᐃᓚᖏᑦ ᑲᑉᐱᐊᓱᖃᑦᑕᖅᐳᑦ ᐃᓯᕈᒪᖏᑦᖢᑎᒃ ᐃᒡᓗᒧᑦ, ᐱᓗᐊᖅᑐᒥᒃ ᑕᒪᒃᑯᐊ ᐃᓕᓐᓂᐊᓕᓵᖅᑐᑯᓗᐃᑦ,” ᐅᖃᓚᐅᖅᐳᖅ ᑲᕼᐅᐊ. “ᐊᒥᓲᓂᖅᓴᐃᑦ ᓱᕈᓯᑦ (ᐅᑭᐅᖁᖅᑐᓂᖅᓴᐃᑦ) ᖁᕕᐊᓱᑦᓯᐊᖃᑦᑕᖅᐳᑦ ᐃᒡᓗᒧᐊᕈᒪᓪᓗᑎᒃ ᖃᓄᐃᑦᑐᖃᓕᕐᓂᖏᓐᓄᑦ ᑕᑯᒍᒪᓪᓗᑎᒃ.”

ᐃᓕᓐᓂᐊᖅᑎᑦ ᑐᓂᔭᐅᖃᑦᑕᖅᐳᑦ ᐅᖁᒥᐊᒐᓂᒃ ᐊᓯᖏᓐᓂᒡᓗ ᒪᒪᖅᑐᓂᒃ ᐊᓂᓕᕌᖓᑕ. ᐊᕐᕌᒍᒥ ᑕᒡᕙᓂ ᐊᑐᖅᑐᒥ ᑲᕼᐅᐊ ᐊᒻᒪ ᓗᐊᑉ ᑕᒪᐃᓐᓄᑦ ᐃᓯᖅᑐᓄᑦ ᐃᒡᓗᖏᓐᓄᑦ ᓵᓚᒃᓴᐅᑎᑖᖅᑐᖃᖃᑦᑕᕐᓂᐊᓕᖅᐳᖅ ᐊᑕᐅᓯᕐᒥᒃ.

“ᐱᓗᐊᖅᑐᒥᒃ ᓱᕈᓯᓄᑦ ᑐᕌᕐᓂᐊᖅᐳᖅ. ᖁᕕᐊᓱᖁᒐᑦᑎᒍ ᕼᐊᓗᕖᕐᓇᐅᑎᓪᓗᒍ,” ᑲᕼᐅᐊ ᐅᖃᓚᐅᖅᐳᖅ. “ᐊᖏᒡᓕᕙᓪᓕᐊᑐᐃᓐᓇᖅᐳᖅ ᐱᓕᕆᐊᖅᐳᑦ ᐊᕐᕌᒍᑕᒫᑦ.”

ᓴᓂᕋᔭᖕᒥ, ᓄᓇᕗᒥ ᓯᓚᑦᑐᖅᓴᕐᕕᓕᕆᔨᒃᑯᖏᓐᓄᑦ ᐃᓕᓐᓂᐊᖅᑎᑎᔨ ᔨᓚ ᐱᐊᓚᖅ ᑲᔪᖏᖅᓴᐃᖃᑦᑕᖅᐳᖅ ᐃᓕᓐᓂᐊᖅᑎᒥᓂᒃ ᐊᓐᓄᕌᕐᓗᒃᓯᒪᖁᓪᓗᒋᑦ ᑮᓇᖏᓪᓗ ᐊᒥᐊᖅᓯᒪᖁᓪᓗᒋᑦ.

“ᖁᕕᐊᓱᖃᑎᒌᖃᑦᑕᖅᐳᒍᑦ,” ᐅᖃᓚᐅᖅᐳᖅ. “ᐃᒻᒪᖄᓗ ᐹᑎᖃᑦᑕᖅᖢᑕ, ᐊᓐᓄᕌᕐᓗᒃᓯᒪᓪᓗᑕ.”

ᑕᒪᓐᓇ ᕼᐊᓗᕖᒃᑯᑦ ᖁᕕᐊᓱᒃᑎᑎᓂᖅ ᐸᐅᓕᐊᒃᑯᓐᓂ. ᑕᐃᒪᓐᓇ ᓂᐱᖁᑎᖃᖅᐳᖅ ᑲᑉᐱᐊᓇᖅᑐᓂᒃ ᑐᓴᖅᓴᐅᔪᓂᒃ ᐳᓚᕋᖅᑐᓄᑦ ᑐᓴᕐᓈᖃᑦᑕᖅᖢᓂᒋᓪᓗ. ᒪᕐᕉᖕᓂᒡᓗ ᐸᓂᖃᖅᖢᓂ ᐅᓗᕈᖃᖅᖢᓂᓗ ᑕᒪᒃᑯᐊ ᐅᖁᒥᐊᒐᖅᓯᐅᖅᑐᑦ ᑲᑉᐱᐊᓱᒃᑎᑉᐸᒃᖢᒋᑦ. ᑕᐃᑦᓱᒪᓂ ᐅᓗᕈᖓ ᐊᓐᓄᕌᖅᑐᐃᓚᐅᖅᓯᒪᕗᖅ ᐃᓄᖑᐊᒥᒃ ᑕᐃᒪᓐᓇᓗ ᐃᖕᒥᓂᒃ ᐊᓐᓄᕌᕐᓗᒃᖢᓂ ᑮᓇᑉᐸᒃᓯᒪᓪᓗᓂᓗ.

“ᑕᒪᕐᒥᒃ ᐱᓪᓚᕆᐅᔮᖏᑦᖢᑎᒃ. ᓂᑯᕕᖓᑐᐃᓐᓇᖅᖢᓂ ᑲᑉᐱᐊᓱᒃᑎᑦᓯᓪᓗᓂᓗ ᐃᓄᖕᓂᒃ ᐊᐅᓚᖃᑦᑕᖅᖢᓂ ᓴᓂᐊᒎᖅᑐᖃᓕᕌᖓᑦ.” ᐱᐊᓕᐊᖅ ᐅᖃᓚᐅᖅᐳᖅ, ᐃᒡᓚᖅᖢᓂ.

ᐊᕐᕌᒍᒥᓗ ᐊᑕᐅᓯᕐᒥ, ᐱᐊᓕᐊᖅ ᐊᐅᒃᑐᓲᖑᖑᐊᓚᐅᖅᓯᒪᕗᖅ, ᐊᐅᖃᖑᐊᖅᖢᓂᓗ ᖃᓂᒥᒍᑦ.

“ᐅᖃᐅᑎᖃᑦᑕᓚᐅᖅᐸᒃᑲ ᓱᕈᓯ ᐅᖁᒥᐊᒐᖅᑖᖅᑎᑦᓯᖃᑦᑕᖏᓐᓇᒥ ᑭᓯᐊᓂ ᐊᐅᒃᑐᕐᕕᒋᐊᕐᔪᒡᓗᓂᒋᑦ,” ᐅᖃᓚᐅᖅᐳᖅ.

ᑕᐃᒪᓐᓇ ᑲᑉᐱᐊᓇᕋᓗᐊᖅᑎᓪᓗᒍ, ᐅᕙᓘᓐᓃᑦ ᑖᒃᑯᐊ ᐱᔾᔪᑎᒋᓪᓗᒋᑦ, ᐱᐊᓚᖅ ᒪᒃᑯᒃᑐᓂᒃ ᑕᐃᒪᓐᓇᐃᓕᐅᖃᑦᑕᖅᐳᖅ ᐅᖁᒥᐊᒐᖅᓯᐅᖅᑐᓂᒃ ᒪᑐᖓᓂ.

“ᑕᐃᒪᓐᓇ ᐃᒡᓗᑦᑎᓐᓄᐊᕋᓱᐊᖃᑦᑕᖅᐳᑦ ᓱᕈᓯᑦ ᑕᐃᒪᓐᓇ ᐱᔾᔪᑎᖃᖅᖢᑎᒃ,” ᐅᖃᓚᐅᖅᐳᖅ ᐃᒡᓚᖅᖢᓂᓗ.





Pop-up banner image