ᐊᑲᐅᙳᓕᐅᕈᑎ: ᐃᕐᓂᓱᒃᓰᓂᕐᒥ ᐱᔨᑦᑎᕋᕐᓂᖅ
ᐅᖃᖅᐳᒍᑦ: ᐊᖏᕐᕋᖅᑎᓚᐅᕐᓚᕗᑦ
ᕿᑐᕐᙵᒃᓴᖃᖅᖢᓂ, ᐊᒥᓱᓂ ᑭᓱᑐᐃᓐᓇᓂ ᐸᕐᓇᒃᓯᒪᔭᕆᐊᖃᖅᐳᑎᑦ ᐊᒻᒪᓗ ᐃᓚᖏᓐᓂ ᐊᔪᑦᑎᐊᒻᒪᕆᒃᖢᑎᑦ.
ᑕᒪᕐᒥᒐᓚᑦ ᐊᖓᔪᖅᑳᙳᕐᓂᐊᖅᑐᓄᑦ ᐸᕐᓇᐃᓲᖑᕗᑦ ᖃᓄᖅ ᐃᓅᓯᖓᓐᓂ ᑕᐅᑦᑐᖃᕐᓂᐊᕐᓂᖓᓂ ᓄᑕᕋᓛᖅᑖᓵᖓ ᐃᓅᒍᓂ, ᓂᐅᕕᕐᓂᕐᒥ ᐱᔭᕆᐊᓕᖕᓂ ᓱᓇᒃᑯᑖᓂᑦ, ᓴᓇᓂᕐᒧᑦ ᐱᒃᓴᕆᓂᐊᖅᑕᖏᓐᓂ, ᐊᒻᒪᓗ ᐃᓚᒦᓐᓂᕐᒥ ᓂᕆᐅᖕᓂᕐᒧᑦ ᖁᕕᐊᓱᒍᑕᐅᒐᔪᒃᑐᒥ ᐊᓯᔾᔨᕐᓂᐅᔪᒥ.
ᑭᓯᐊᓂ, ᐊᕐᓇᐃᑦ ᓄᓇᕗᒻᒥ ᐊᑕᐅᓯᒃᑲᓐᓂᕐᒥ ᐊᒡᕕᐊᕈᑎᖃᖅᐳᑦ ᖄᖏᐅᔾᔨᓂᕐᒥ ᐃᓅᓯᖓᓐᓂ ᑲᔪᓯᑎᑦᑎᓂᕐᒧᑦ ᕿᑐᕐᙵᒃᑖᓵᖓᓂ ᐊᒻᒪᓗ ᐊᒥᐊᒃᑯᖓᓂ ᐃᓚᖏᓐᓂ – ᑕᒪᕐᒥᒐᓚᑦ ᐸᕐᓇᒋᐊᖃᕆᕗᑦ ᐊᐅᓪᓛᕐᓂᕐᒧᑦ ᕼᐊᓐᓇᓚᓂ ᑭᓛᒥᑐᓂ ᐊᖏᕐᕋᖓᓐᓂ ᓄᓇᓕᖓᓐᓂ ᐃᕐᓂᔭᖅᑐᕐᓗᑎᒃ ᐃᖃᓗᖕᓂ, ᓄᓇᓕᑐᐊᖅ ᓄᓇᕗᒻᒥ ᒫᓐᓇᐅᔪᒥ ᐋᖅᑭᒃᓱᖅᓯᒪᔪᒥ ᐃᕐᓂᓂᕐᒥ ᓄᑕᕋᓛᒃᓴᒥᓂᑦ, ᐅᖓᓯᖕᓂᖅᓴᒧᓪᓘᓐᓃᑦ ᔭᓗᓇᐃᕝᒧᑦ ᐅᐃᓂᐱᐊᒡᒧᓪᓘᓐᓃᑦ, ᕿᑭᖅᑕᓂ ᐋᓐᓂᐊᕕᖓ ᐃᓂᒃᓯᖃᙱᓗᐊᖅᐸᑦ.
ᐃᓚᓗᒍ ᓇᓗᓇᒃᑲᓐᓂᕐᓂᐅᔪᒥ ᐃᖏᕐᕋᐃᓐᓇᖅᑐᒥ ᐊᒥᓱᓄᑦ ᖃᓂᒻᒪᓐᓇᐅᔪᒥ, ᐊᒻᒪᓗ ᐅᑯᐊ ᐊᓈᓇᙳᕋᑖᖅᑐᑦ ᐅᐸᒃᑕᐅᑦᑕᐃᓕᒪᔭᕆᐊᖃᖅᐳᑦ ᐱᓇᓱᐊᕈᓯᒐᓚᖕᓂ ᐊᖏᕐᕋᓚᐅᖅᑳᕋᑎᒃ.
ᑕᒪᕐᒥᒃ ᐆᒥᖓ ᐊᐅᓪᓈᕐᓂᐅᔪᒥ ᐊᒻᒪ ᐅᐸᒃᑕᐅᑦᑕᐃᓕᔭᕆᐊᖃᕐᓂᐅᔪᒥ ᐊᖅᓵᖅᓯᓂᖃᖅᐳᖅ ᑲᑎᖃᑎᒌᒍᓐᓇᕐᓂᐅᔪᒥ ᐊᖓᔪᖅᑳᙳᓵᖅᑐᓄᑦ, ᕿᑐᕐᙵᖓᓄᑦ ᐊᒻᒪᓗ ᐊᖓᔪᖏᓐᓂ ᐱᑕᖃᕈᓂ.
ᓄᓇᕗᒻᒥ ᒐᕙᒪᒃᑯᑦ ᓇᓗᓇᐃᖅᓯᕗᖅ ᐆᒥᖓ 2008-2014–ᒧᑦ ᓯᖓᐃᔪᓄᑦ ᐊᒻᒪᓗ ᐃᓅᕋᑖᖑᔪᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐸᖅᑭᓂᐅᔪᒥ ᐸᕐᓇᒍᑎᖓᓂ, ᐅᖃᖅᑐᒥ ᖃᓄᖅ “ᐊᐅᓪᓛᕐᓂᖅ ᐊᕐᓇᐅᑉ ᐊᖏᕐᕋᖓᑕ ᓄᓇᓕᖓᑕ ᓯᓚᑖᓄᑦ ᐃᕐᓂᔭᖅᑐᕐᓂᕐᒧᑦ ᐱᓕᕆᓂᐅᔪᒥ ᐱᔪᒥᓇᖅᑑᙱᓚᖅ ᖃᓄᐃᓐᓂᐅᔪᒥ. ᐊᕐᓇᐃᑦ ᐊᐅᓪᓚᕌᖓᒥᒃ, ᒪᓕᒃᑎᖃᒐᔪᙱᖦᖢᑎᒃ, ᐊᑯᓂᐅᔪᒥ, ᐃᓚᒌᖑᔪᓄᑦ ᑲᑎᙵᓂᖃᕐᓂᐅᔪᖅ ᓱᕋᒃᐸᓪᓕᐊᔪᓐᓇᖅᐳᖅ. ᑕᐃᒪᐃᓐᓂᖓᓄᑦ, ᐊᔪᕐᓇᕈᓐᓇᖅᐳᖅ ᐊᑖᑕᐅᔪᒧᑦ ᐊᒻᒪᓗ ᐊᒥᐊᒃᑯᖓᓄᑦ ᐃᓚᖏᓐᓄᑦ ᐃᓚᐅᖃᑕᐅᔫᔮᕐᓂᖏᓐᓂ ᓱᕈᓯᕐᒧᑦ ᐊᒻᒪᓗ ᐃᕐᓂᐊᖑᓂᖓᓄᑦ.”
ᑲᖏᖅᖠᓂᖅ ᐃᓂᐅᓚᐅᖅᐳᖅ ᐃᕐᓂᔭᖅᑐᕐᓂᕐᒧᑦ ᐊᒥᓱᓄᑦ ᐊᕐᕌᒍᓄᑦ, ᑭᓯᐊᓂ ᐋᒍᔅᑎ 2020–ᒧᑦ, ᓄᓇᓕᐅᑉ ᒪᕐᕉᒃ ᐊᑯᓂᐅᔪᒥ ᐃᕐᓂᓱᒃᓰᔨᖏᑦ ᓄᖅᑲᕐᒪᑕ, ᐱᑎᑦᑎᓪᓗᓂ ᐃᕐᓂᓱᕝᕕᖕᒥ ᓄᖅᑲᖅᑎᑕᐅᓂᖓᓂ ᐱᔨᑦᑎᕋᕐᓂᐅᔪᒥ.
ᑐᓴᒐᒃᓴᓕᐊᖑᔪᒥ ᑕᐃᔅᓱᒪᓂ ᑎᒃᑯᐊᕆᓚᐅᖅᐳᖅ ᐱᑕᖃᙱᓗᐊᕐᓂᖓᓂ ᐃᑲᔪᖅᓱᐃᓂᕐᒥ ᐃᓚᖃᖅᑐᒥ ᐅᖁᒪᐃᕐᔪᐊᖅᑐᒥ ᐱᔭᒃᓴᖃᕐᓂᐅᔪᒥ ᒪᕐᕉᖕᓄᑦ ᐊᕐᓇᓄᑦ. ᐃᕐᓂᓱᒃᓰᔩᑦ ᐃᑲᔪᓲᖑᕗᑦ ᐊᒥᓱᓄᑦ ᐃᓚᒋᔭᐅᔪᒥ ᓯᖓᐃᓂᐅᔪᒥ, ᐃᕐᓂᓂᕐᒥ ᐊᒻᒪ ᐃᕐᓂᕋᑖᕕᓂᕐᒧᑦ ᐸᖅᑭᓂᐅᔪᒥ, ᓇᒃᓴᓲᖑᕗᑦ ᐊᒥᓱᒻᒪᕆᐊᓗᖕᓂ ᐊᔾᔨᒌᙱᑦᑐᓂ ᐊᔪᙱᓐᓂᐅᔪᓂ ᐊᒻᒪ ᖃᐅᔨᒪᓂᐅᔪᒥ ᐸᖅᑭᒡᐅᔪᓄᑦ ᑲᑎᙵᔪᓄᑦ.
ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᒥᓂᔅᑕᐅᓚᐅᖅᑐᖅ ᐹᑦ ᐊᕐᓇᒃᑲᖅ ᐅᖃᖅᐳᖅ ᐅᒃᐱᕈᓱᑦᑎᐊᕐᓂᖓᓂ ᐆᒪᙵᑦ ᐊᑲᐅᙱᓕᐅᕈᑕᐅᔪᒥ ᐊᒻᒪ ᐃᓱᒪᕗᖅ ᖃᓄᐃᒻᒪᑦ ᓄᓇᓕᖕᓂ ᐃᕐᓂᓱᒃᓰᓂᕐᒥ ᐃᓕᓯᒪᙱᓐᓂᖓᓂ ᐊᒻᒪᓗ ᐊᑐᖅᑕᐅᓗᓂ ᐃᓚᒋᔭᐅᓗᓂ ᐱᓕᕆᔾᔪᓯᐅᔪᒥ.
ᐊᕐᓇᒃᑲᖅ ᐅᖃᖅᐳᖅ ᐃᕐᓂᓱᒃᓰᔨᖃᕐᓂᕐᒥ ᓄᓇᓕᖕᓂ ᐱᕕᒃᓴᑦᑎᐊᕙᒻᒪᕆᐅᕗᖅ ᐃᓚᓕᐅᔾᔨᓂᕐᒥ ᐃᓕᖅᑯᓯᒥ ᐃᓚᒋᔭᖓᓄᑦ (ᐃᓄᐃᑦ ᖃᐅᔨᒪᔭᑐᖃᖏᓐᓂ) ᐃᕐᓂᓱᒃᓰᔨᖃᕐᓂᕐᒥ ᐅᓪᓗᒥᐅᔪᒥ ᐱᓕᕆᓂᐅᔪᒥ ᐃᕐᓂᑎᑦᑎᓂᕐᒥ ᓄᑕᕋᓛᓂᑦ.
ᓄᓇᕗᒻᒥ ᐅᑭᐅᖅᑕᖅᑐᒥ ᓯᓚᑦᑐᖅᓴᕐᕕᒃ ᐊᑐᐃᓐᓇᖃᖃᑦᑕᓚᐅᖅᓯᒪᕗᖅ ᐃᕐᓂᓱᒃᓰᔨᖃᕐᓂᕐᒧᑦ ᐱᓕᕆᐊᖑᔪᒥ ᑐᙵᕕᖃᖅᑐᒥ ᐃᖃᓗᒃᑑᑦᑎᐊᕐᒥ, ᑲᖏᖅᖠᓂᕐᒥ ᐊᒻᒪ, ᑭᖑᓂᐊᒍᑦ, ᐃᖃᓗᖕᓂ, ᑭᓯᐊᓂ ᐊᓯᐅᔨᒐᒥ ᑮᓇᐅᔭᖃᖅᑎᑕᐅᓂᖓᓂ.
ᐱᔭᕆᐊᖃᕐᓂᐅᔪᖅ ᑕᐃᑲᓃᑉᐳᖅ, ᐊᒻᒪ ᐱᔪᒪᓂᖅ ᐊᕐᓇᓂᑦ ᖃᓂᓐᓂᖅᓴᐅᓂᕐᒧᑦ ᐃᓚᖏᓐᓄᑦ ᐊᒃᑐᖅᑕᐅᓴᕋᐃᑎᓪᓗᒋᑦ ᐃᕐᓂᕋᑖᕕᓂᐅᔪᒥ ᑕᐃᑲᓃᑉᐳᖅ, ᑕᐃᒫᒃ ᖃᓄᖅ ᐱᔾᔪᑎᖃᖅᐸ ᓇᓚᐅᑦᑐᒥ ᑕᐃᒪᐃᑦᑐᒧᑦ ᐊᓯᐅᔨᓂᐅᔪᒥ ᑮᓇᐅᔭᖃᖅᑎᑕᐅᓂᕐᒧᑦ?
ᒫᓐᓇᓕᓴᐅᓛᖑᔪᓂ ᓈᓴᐅᑎᓂᑦ ᑲᓇᑕᒥ ᑭᓪᓕᓯᓂᐊᖅᑎᒃᑯᓐᓂ ᑕᑯᒃᓴᐅᑎᑦᑎᕗᖅ ᓄᓇᕗᑦ ᖁᑦᑎᓛᖓᓂ ᐃᕐᓂᓂᕐᒧᑦ ᐅᓄᕐᓂᖃᖅᐳᖅ ᑲᓇᑕᒥ 22.6–ᖑᔪᓂ ᐃᕐᓂᐊᖑᔪᓂ ᐊᑐᓂ 1,000–ᓄᑦ ᐃᓄᖕᓄᑦ, ᓇᑉᐸᓪᓗᐊᖓᓂ ᐅᓄᕐᓂᖅᓴᐅᔪᒥ ᑲᓇᑕᐅᑉ ᑕᐃᒪᐃᒐᔪᖕᓂᕆᔭᖓᓂ. ᐃᓚᖏᓐᓂ 840–ᖑᔪᓂ ᓄᑕᕋᓛᓂ ᐃᓅᔪᖃᓚᐅᖅᐳᖅ ᓄᓇᕗᒻᒥ ᐊᓈᓇᐅᔪᓄᑦ 2019–ᒥ, ᐊᒻᒪᓗ 2019–ᒥ ᐊᐱᖅᓱᖅᑕᐅᓂᐅᔪᒥ ᑕᐃᔅᓱᒪᓂ–ᓄᓇᕗᒻᒥ ᑲᒪᔨᐅᔪᒥ ᓯᖓᐃᔪᓄᑦ ᐃᕐᓂᕋᑖᖅᑐᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᔨᑦᑎᕋᕐᓂᐅᔪᒧᑦ ᑭᐊᕈᓪ ᒍᕆᕕᓐ ᓇᓗᓇᐃᖅᓯᓚᐅᖅᐳᖅ ᓇᑉᐸᓪᓗᐊᑲᓴᖏᓐᓂ ᐅᑯᓇᙵᑦ ᐃᕐᓂᐊᖑᔪᓂ ᓄᓇᕘᑉ ᓯᓚᑖᓃᓚᐅᖅᐳᑦ.
ᓈᒻᒪᙱᓚᖅ ᓄᓇᓕᐅᔪᑦ ᐃᕐᓂᓱᒃᓰᕕᖃᙱᓐᓂᖏᓐᓂ ᐊᑦᑕᓇᙱᑦᑐᒥ ᐃᕐᓂᓂᕐᒥ ᕿᑐᕐᙵᒥᓂᑦ.
ᓄᓇᕗᒻᒥ ᐅᑭᐅᖅᑕᖅᑐᒥ ᓯᓚᑦᑐᖅᓴᕐᕕᖕᒧᑦ ᐊᒻᒪᓗ ᓄᓇᕗᒻᒥ ᒐᕙᒪᒃᑯᓐᓂ ᐱᓕᕆᖃᑎᒌᒋᐊᖃᖅᐳᑦ ᓇᓂᓯᓂᕐᒥ ᐋᖅᑭᒍᑎᒃᓴᓂ ᐃᓱᓕᑦᑎᓂᐊᖅᑐᓂ ᓱᓕᒃᑲᓐᓂᖅ ᐱᖅᑯᓯᕆᙱᑕᓄᑦ ᐱᐅᓯᖃᓕᖅᑎᑕᐅᓂᕐᒥ ᑎᒍᒥᐊᖅᑕᐅᓂᐅᔪᒥ ᐱᑎᑦᑎᔪᒥ ᑕᐃᒪᐃᓪᓗᐊᙱᑦᑐᒥ ᐊᒃᓱᕈᕐᓂᐅᔪᒥ ᓄᓇᕗᒻᒥᐅᓄᑦ.