ᐊᑕᐅᓯᐅᔪᒥ ᐊᖏᓛᖑᔪᒥ ᐅᖃᐅᓯᐅᓂᐅᔪᒥ ᑕᑯᕙᒃᑕᑦᑎᓐᓂ ᑕᒪᑐᒪᓂ ᐊᕐᕌᒎᔪᒥ, ᖁᕕᐊᓱᒍᑎᖃᖅᑎᓪᓗᑕ ᖁᑦᑎᒃᑐᒥ ᐃᓕᓐᓂᐊᕐᕕᖕᒥ ᐊᒻᒪ ᖁᑦᑎᖕᓂᖅᓴᒥ ᐃᓕᓐᓂᐊᕐᓂᕐᒧᑦ ᐃᓱᓕᑦᑎᔪᓂ, ᐃᕿᑦᑎᓂᐅᕗᖅ ᓯᕗᓂᒃᓴᔅᓯᓐᓂ, ᓇᓂᓗᒍ ᐊᓕᐊᓇᐃᒋᕐᔪᐊᖅᑕᔅᓯᓐᓂ ᐊᒻᒪᓗ ᐃᓂᒋᔭᕐᓂ ᐅᕙᓂ ᓄᓇᕐᔪᐊᖑᔪᒥ.
ᐊᔪᕐᓇᙱᑦᑐᑯᓘᙱᓚᖅ ᑕᐃᒪᐃᑦᑕᕆᐊᒃᓴᖅ ᐃᓱᒪᒋᑎᓪᓗᑕ ᐊᒥᓲᔪᓂ ᐊᒃᓱᕈᕐᓂᐅᔪᓂ ᓵᙵᔭᐅᔪᓂ ᐃᓕᓐᓂᐊᖅᑎᐅᔪᓄᑦ ᐅᑭᐅᖅᑕᖅᑐᒥ, ᑭᓯᐊᓂ ᓄᓇᕗᒻᒥᐅᑦ ᐃᓕᓐᓂᐊᖅᑏᑦ ᑕᑯᒃᓴᐅᑎᑦᑏᓐᓇᖅᐳᑦ ᐱᔪᒪᓂᖃᕈᑎᒃ, ᐱᕕᒃᓴᖃᖅᑐᖅ.
2011–ᒥ, ᐃᓄᐃᑦ ᑕᐱᕇᑦ ᑲᓇᑕᒥ (ITK) ᓴᖅᑭᑎᑦᑎᓚᐅᖅᐳᑦ ᑲᓇᑕᒥ ᐸᕐᓇᒍᑎᒃᓴᒥ ᐃᓄᐃᑦ ᐃᓕᓐᓂᐊᕐᓂᖓᓐᓄᑦ. ᐆᒧᖓ ᑎᑎᖅᑲᖁᑕᐅᔪᒥ ᐃᑲᔪᖅᓱᐃᔪᒥ ᐋᖅᑭᒃᑕᐅᓯᒪᓂᐅᔪᒥ, ᖄᖏᖅᓯᒪᔪᒥ ᐊᕐᕌᒍᓂ ᖁᓕᓂᑦ ᐊᒃᓱᕈᖅᖢᑎᒃ ᐱᓕᕆᓂᐅᔪᒥ ᐱᑎᑦᑎᓯᒪᕗᖅ ᐊᒥᓱᓂ ᐱᐅᓯᒋᐊᖅᑎᓂᖃᖅᐳᖅ ᐃᓕᓐᓂᐊᕐᓂᐅᔪᒥ ᖃᓄᐃᓕᖓᓂᐅᔪᓂ.
ᖁᑦᑎᒃᑐᒥ ᐃᓕᓐᓂᐊᕐᕕᖕᒥ ᐃᓱᓕᑦᑎᔪᑦ ᐱᐅᓯᕙᓪᓕᐊᖏᓐᓇᖅᐳᑦ, ᐊᒻᒪ ᐅᓄᕐᓂᖅᓴᐃᑦ ᐃᓄᐃᑦ ᐃᓕᓐᓂᐊᖅᑏᑦ ᐃᓕᓐᓂᐊᕆᐊᖃᑦᑕᕐᓂᖅᓴᐅᓕᖅᐳᑦ ᓯᓚᑦᑐᖅᓴᕐᕕᖕᓂ, ᓯᓚᑦᑐᖅᓴᕐᕕᒡᔪᐊᕐᓂ ᐊᒻᒪ ᐃᖅᑲᓇᐃᔮᓄᑦ ᐃᓕᓐᓂᐊᕐᓂᐅᔪᓂ.
ᑲᓇᑕᒥ ᑭᓪᓕᓯᓂᐊᖅᑎᒃᑯᑦ ᐅᓂᒃᑳᕆᓚᐅᖅᐳᑦ 2016–ᒥ 41 ᐳᓴᓐᑎᒥ ᐃᓄᖕᓂ ᐱᓯᒪᕗᑦ ᖁᑦᑎᒃᑐᒥ ᐃᓕᓐᓂᐊᕐᕕᖕᒥ ᐃᓱᓕᑦᑎᓂᖓᓐᓂ. ᐃᓄᖕᓂ ᓄᓇᖃᖅᑐᓂ ᐃᓄᐃᑦ ᓄᓇᖓᓐᓂ, 28.2 ᐳᓴᓐᑎᒥ ᐅᓂᒃᑳᕆᓚᐅᖅᐳᑦ ᖁᑦᑎᖕᓂᖅᓴᒥ–ᐃᓕᓐᓂᐊᕐᓂᐅᔪᒥ ᑕᐅᑐᒃᖢᒍ ᐃᓄᖕᓂ ᓄᓇᖃᖅᑐᓂ ᐃᓄᐃᑦ ᓄᓇᖓᑕ ᓯᓚᑖᓂ 53.3 ᐳᓴᓐᑎᒥ.
“ᐱᓕᕆᑦᑎᐊᖅᐳᖅ, ᑭᓯᐊᓂ ᑕᑕᑦᑐᒥ ᐱᔪᓐᓇᕐᓂᐅᙱᑦᑐᒥ,” ᐅᖃᖅᐳᖅ ᐲᓯ ᐱᑦᓯᐅᓛᖅ, ᓄᓇᕗᒻᒥ ᐅᑭᐅᖅᑕᖅᑐᒥ ᓯᓚᑦᑐᖅᓴᕐᕕᖓᓂ ᓄᓇᑦᑕ ᐃᓕᓐᓂᐊᕐᕕᖓᓂ ᐊᖓᔪᖅᑳᕆᔭᐅᔪᖅ ᐊᒻᒪ ᐃᓚᒋᔭᐅᓪᓗᓂ ᐅᑭᐅᖅᑕᖅᑐᒥ ᐊᒻᒪ ᐅᐊᖕᓇᒥ ᐊᑐᐊᒐᓄᑦ ᐃᑲᔪᖅᓱᐃᔪᒥ ᐋᖅᑭᒃᓱᖅᑕᐅᓯᒪᔪᒥ ᐱᓕᕆᐊᖃᖅᑎᑕᐅᔪᓄᑦ ᑲᑎᒪᔨᐅᔪᓄᑦ ᐅᑭᐅᖅᑕᖅᑐᒥ ᖁᑦᑎᖕᓂᖅᓴᒧᑦ–ᐃᓕᓐᓂᐊᕐᕕᐅᔪᓂ ᐃᓕᓐᓂᐊᕐᓂᐅᔪᒥ.
ᐅᖃᓚᐅᕆᕗᖅ ᓄᓇᕘᑉ ᐃᓕᓐᓂᐊᕈᑎᓕᐅᖅᑕᐅᓯᒪᔪᑦ ᐃᓕᖅᑯᓯᒧᑦ ᐊᑑᑎᖃᕐᓂᖅᓴᐅᕗᖅ ᓄᓇᕗᒻᒥᐅᓄᑦ ᑕᐃᒪᐃᑉᐸᓚᐅᖅᓯᒪᓂᐅᔪᒥ.
ᐃᓄᐃᑦ-ᐅᖃᐅᓯᖓᓐᓂ ᐃᓕᓐᓂᐊᕐᓂᖅ ᐃᓕᓴᕆᔭᐅᓯᒪᕗᖅ ᓯᕗᓪᓕᐅᔾᔭᐅᖁᔭᐅᓪᓗᓂ, ᐊᒻᒪᓗ ᑎᑭᑉᐸᓪᓕᐊᔪᓄᑦ ᐊᕐᕌᒍᓂ ᑕᓪᓕᒪᓂ ᐃᓕᓐᓂᐊᕈᑎᓕᐅᖅᑕᐅᓯᒪᔪᑦ ᐱᕙᓪᓕᐊᑎᑕᐅᓂᐊᖅᐳᑦ ᐊᑐᓕᖅᑎᑦᑎᓂᕐᒥ ᐃᓄᐃᑦ ᐅᖃᐅᓯᖓᓐᓂ ᓴᓇᐅᒐᓕᕆᓂᐅᔪᒥ ᐃᓕᓐᓂᐊᕐᕕᐊᕈᓯᕐᓂ ᐃᓕᓐᓂᐊᕐᕕᓂᑦ ᓄᓇᕗᓕᒫᒥ. ᐱᖁᔭᒃᓴᖅ 25 ᐊᑭᕋᖅᑐᖅᑕᐅᓯᒪᕗᖅ ᓈᒻᒪᙱᓗᐊᕐᓂᖓᓂ, ᐊᒻᒪᓗ ᕿᓚᒻᒥᐅᙱᓗᐊᕐᓂᖓᓂ, ᑭᓯᐊᓂ ᐃᓕᓐᓂᐊᖅᑐᓕᕆᔨᒃᑯᑦ ᒥᓂᔅᑕᖓ ᑕᐃᕕᑦ ᔪᐊᓇᓯ ᐅᖃᓚᐅᖅᐳᖅ 2019–ᒥ ᐊᐱᖅᓱᖅᑕᐅᓂᐅᔪᒥ ᓄᓇᕗᑦ ᓱᓕ ᐱᕈᖅᓴᐃᔭᕆᐊᖃᕐᓂᖏᓐᓂ ᐃᓐᓄᒍᓐᓇᕐᓂᐅᔪᒥ ᐃᓄᒃᑐᑦ–ᐅᖃᓪᓚᒍᓐᓇᖅᑐᓂ ᐃᓕᓴᐃᔨᓂᑦ, ᐃᓚᖃᖅᑐᒥ ᖃᔅᓯᒐᓚᖕᓂ ᓇᓗᓇᕐᓂᐅᔪᓄᑦ, ᐃᓚᖃᖅᑐᒥ ᐋᖅᑭᒋᐊᖅᓯᒃᑲᓐᓂᕐᓂᐅᔪᒥ ᐃᓕᓐᓂᐊᕈᑎᓕᐅᖅᑕᐅᓯᒪᔪᓂᑦ ᐊᒻᒪᓗ ᐱᕙᓪᓕᐊᑎᑦᑎᒃᑲᓐᓂᕐᓂᕐᒥ ᐅᓄᕐᓂᖅᓴᓂ ᓄᓇᓖᑦ ᐊᑐᖅᐸᒃᑕᖏᓐᓂ ᐊᐅᓚᔪᓐᓇᖁᓪᓗᒋᑦ – ᐃᓂᐅᔪᓂ ᐃᓕᓐᓂᐊᖅᑎᑦᑎᓂᕐᒧᑦ ᐱᕈᖅᐸᓪᓕᐊᔪᒥ ᐅᓄᒋᐊᖕᓂᐅᔪᓂ.
ᐃᓕᓐᓂᐊᕐᓂᖅ ᓄᓇᕗᒻᒥ, ᑭᓯᐊᓂ, ᑕᑖᖅᐳᖅ ᖃᓄᕈᓘᔭᓂ ᐃᒃᐱᒍᓱᖕᓂᐅᔪᓂ.
“ᐃᓱᒪᕗᖓ ᐊᒃᓱᕈᖅᑎᑦᑎᔭᕆᐊᖃᖅᐳᒍᑦ ᓄᓇᕗᒻᒥᐅᓂ, ᑕᒪᐃᑎᒍᑦ, ᐊᒻᒪ ᐃᓅᖃᑎᒌᖑᔪᓄᑦ, ᑕᒪᐃᑎᒍᑦ,” ᐅᖃᓚᐅᖅᐳᖅ ᔪᐊᓇᓯ. “ᐱᓇᓱᐊᕐᓂᐅᔪᒥ ᐃᓕᓐᓂᐊᕐᓂᕐᒥ. ᑕᐅᑐᒃᖢᓂ ᐅᐸᑦᑎᐊᕐᓂᐅᔪᒥ ᐅᓄᕐᓂᖓᓂ. ᑕᐅᑐᒃᖢᓂ ᑕᐃᔅᓱᒪᓂᑐᖃᖅ ᐃᓗᓕᖏᓐᓂ, ᐅᓇ ᐊᑲᐅᙱᓕᐅᕈᑕᐅᕗᖅ ᑭᐅᖏᓐᓇᕆᐊᖃᖅᑕᑦᑎᓐᓂ. ᕿᑐᕐᙵᕗᑦ ᐊᒻᒪ ᐃᓕᓐᓂᐊᖅᑎᕗᑦ ᐃᓕᓐᓂᐊᕆᐊᕈᒪᖃᑦᑕᖁᕙᕗᑦ, ᐃᓱᒪᓕᕆᓂᖃᓪᓚᕆᖕᓂᖏᓐᓂ, ᑕᐃᓐᓇ ᐊᐅᓚᓂᐅᔪᒥ ᐊᒻᒪ ᐊᔭᐅᖅᑕᐅᓂᐅᔪᒥ. ᐃᓱᒪᕗᖓ, ᐱᓕᕆᕝᕕᐅᓪᓗᑕ, ᒐᕙᒪᐅᓪᓗᑕ, ᐃᓂᖃᕈᒪᕗᒍᑦ ᐊᒻᒪ ᐊᕙᑎᐅᔪᒥ ᐃᓕᑦᑎᓂᖃᕈᒪᓂᖃᖁᓪᓗᒋᑦ.”
ᐊᓯᖓ ᐊᑲᐅᙱᓕᐅᕈᑕᐅᔪᖅ ᓂᕈᐊᕐᓂᐅᕗᖅ. ᓄᓇᕗᒻᒥᐅᑦ ᐊᒻᒪ ᐅᑭᐅᖅᑕᖅᑐᒥ ᐃᓕᓐᓂᐊᖅᑏᑦ ᐱᖃᓪᓗᐊᖅᐳᑦ ᐱᓕᕆᐊᖑᔪᓂ ᐃᓚᐅᖃᑕᐅᔪᓐᓇᕐᓂᖏᓐᓂ ᐊᑐᐃᓐᓇᖃᖅᑐᒥ ᐸᕐᓇᐃᓂᕐᒧᑦ ᐃᓯᖅᐸᓪᓕᐊᓂᐅᔪᒥ ᒐᕙᒪᐅᔪᓂ ᐅᕝᕙᓘᓐᓃᑦ ᐱᓕᕆᔨᕐᔪᐊᖑᔪᓂ ᐃᖅᑲᓇᐃᔭᖅᑎᐅᔪᓄᑦ. ᑕᐃᒪᑐᖅ ᓄᑖᖑᔪᖅ ᓯᓚᑦᑐᕐᕕᒃᓴᕐᔪᐊᖅ ᐱᕙᓪᓕᐊᑎᑕᐅᓗᓂ ᐃᓄᐃᑦ ᑕᐱᕇᑦ ᑲᓇᑕᒥ ᐃᑲᔪᕐᓂᐊᖅᐳᖅ ᑭᐅᓂᕐᒥ ᐃᓚᖏᓐᓂ ᐅᑯᓂᖓ ᐃᓚᑰᓂᐅᔪᓂ.
ᐱᖅᑯᓯᒋᙱᑕᓄᑦ ᐱᐅᓯᖃᓕᖅᑎᑕᐅᓂᐅᔪᒥ ᐲᔭᐃᓂᐅᔪᒥ ᐃᓕᓐᓂᐊᕐᓂᕐᒥ ᓇᓗᓇᐃᖅᓯᓗᓂ ᐃᓕᓐᓂᐊᖅᑎᑦ ᐊᑐᐃᓐᓇᖃᕐᓂᖏᓐᓂ ᐃᓕᖅᑯᓯᒧᑦ–ᐊᑑᑎᓕᖕᓂ ᐃᓕᓐᓂᐊᕐᓂᐅᔪᓂ ᐃᓄᒃᑐᑦ ᐊᒻᒪ ᖃᓪᓗᓈᑎᑐᑦ ᐃᑲᔪᕐᓂᐊᖅᐳᖅ ᐃᓕᓐᓂᐊᖅᑎᓂ ᓇᓂᓯᓂᖏᓐᓂ ᐃᓄᑐᓂᖅᓴᐅᔪᒥ ᑐᑭᖃᕐᓂᖓᓂ ᐃᓕᓐᓂᐊᖅᑕᒥᓂᑦ ᐊᒻᒪᓗ ᐋᖅᑭᒃᓯᓗᑎᒃ ᐱᓕᕆᑦᑎᐊᕈᓐᓇᕐᓂᕐᒧᑦ.
ᐃᓕᓐᓂᐊᕐᓂᖅ ᓴᓇᐅᒐᓕᕆᓂᕐᒥ ᐱᒻᒪᕆᕐᔪᐊᖑᒋᕗᖅᑕᐅᖅ, ᐱᔪᓐᓇᖅᑎᑦᑎᓪᓗᓂ ᒪᒃᑯᒃᑐᓂ ᐊᒻᒪ ᐃᓐᓇᕐᓂ ᑲᑎᖃᑎᖃᕐᓂᕐᒥ ᐃᒻᒥᖕᓂᒃ ᐊᒻᒪ ᐃᓕᖅᑯᓯᒥᓂᒃ ᓂᔾᔮᑎᑦᑎᓂᒃᑯᑦ, ᐱᖅᑯᓯᑐᖃᖅᑎᒍᑦ ᐊᒻᒪ ᒫᓐᓇᓕᓴᐅᔪᒥ ᓴᓇᐅᒐᓕᕆᓂᐅᔪᒥ ᐊᒻᒪ ᓴᓇᐅᒐᓄᑦ.
ᔪᐊᓇᓯ ᐅᖃᓚᐅᖅᐳᖅ, “ᐅᕙᖓ, ᓯᕗᓕᐅᖅᑎᐅᓪᓗᖓ ᐊᒻᒪ ᒐᕙᒪᒃᑯᑦ, ᐃᒃᖠᓵᕆᔪᒪᕗᖓ, ᐊᔭᐅᖅᓯᓗᖓ ᐊᒻᒪ ᐅᖃᐅᔾᔨᓗᖓ ᓄᓇᕗᒻᒥᐅᓂ ᐃᓕᓐᓂᐊᕐᓂᖅ ᐃᓱᖃᙱᓐᓂᖓᓂ. ᑕᐅᑐᒃᑯᕕᐅᒃ ᓲᕐᓗ ᑐᓐᓂᖅᑯᑕᐅᓂᖓᓂ ᑎᓂᓰᓐᓇᐅᔭᕐᓂᐊᖅᑐᒥ, ᐅᕝᕙᓘᓐᓃᑦ ᐃᓕᖕᓂ ᐃᑲᔪᕐᓂᖃᕐᓂᐊᖅᑐᒥ ᐃᓅᓯᓕᒫᕐᓂᑦ – ᐃᓱᒪᕗᖓ ᐅᕙᓂ ᐃᓄᐃᑦ ᓇᖕᒥᓂᖃᓕᕈᓐᓇᕋᔭᖅᐳᑦ, ᐊᒻᒪ ᒪᓕᒡᓗᑎᒃ ᐊᓕᐊᓇᐃᒋᕐᔪᐊᖅᑕᒥᓂᑦ.”
ᐅᐱᓐᓇᖅᐳᓯ ᐃᓕᓐᓂᐊᕐᕕᐊᕈᓯᑦ 2021–ᒥ ᐱᓕᕆᑦᑎᐊᕈᓐᓇᕐᓂᔅᓯᓐᓂ ᒫᓐᓇᒧᑦ ᑎᑭᖦᖢᒍ, ᐃᓱᓕᑦᑎᓪᓗᓯ ᕿᑎᐊᓂ ᐊᒥᓱᓂ ᖃᓂᒻᒪᓐᓇᐅᔪᒥ ᒥᑭᑦᑐᑯᓘᓪᓗᓂ ᐱᓕᕆᓂᕐᔪᐊᖑᙱᓚᖅ! ᑕᐃᒪᑐᖅ ᒪᓕᒃᑐᓂ ᐱᓕᕆᓂᕆᔭᓯ ᐊᑐᖅᑕᓯ ᐃᑲᔪᕐᓂᐊᖅᐳᖅ ᑎᑭᐅᑎᓂᕐᒥ ᑐᕌᒐᒃᓴᕆᔭᔅᓯᓐᓂ ᐃᓕᖕᓄᑦ ᐊᒻᒪᓗ ᓄᓇᓕᔅᓯᓐᓄᑦ.