ᐊᑲᐅᙱᓕᐅᕈᑎ: ᐱᔪᓐᓇᕐᓂᐅᔪᖅ ᐊᐅᓚᑦᑎᓂᕐᒥ ᐃᓱᒪᖅᓱᕐᓂᐅᔪᒥ
ᐅᖃᖅᐳᒍᑦ: ᑐᓴᒐᒃᓴᐅᔪᑦ ᐃᓱᒪᖅᓱᖅᑎᓪᓗᒍ

ᐊᒃᓱᕈᕐᓇᖅᖢᓂ ᐱᓇᓱᐊᕈᓯᐅᓯᒪᕗᖅ, ᐅᓇᐅᑎᓪᓗᒍ ᐅᖃᐅᓯᖃᕐᓂᕐᒥ ᑐᓴᒐᒃᓴᐅᔪᓂ ᐱᔾᔪᑎᒋᓪᓗᒍ.

ᑐᑭᓯᓇᑦᑎᐊᓪᓗᐊᖅᐳᖅ ᑕᑯᒃᓴᐅᑎᑕᐅᒃᑲᓐᓂᕐᓂᖓᓂ ᐊᒻᒪ ᐅᓄᕐᓂᖅᓴᓂ ᐃᓄᓕᒫᓄᑦ ᐊᑐᐃᓐᓇᖃᕐᓂᖓᓂ ᑐᓴᒐᒃᓴᐅᔪᓄᑦ ᑐᕌᖓᓪᓗᐊᖅᑐᒥ ᐃᓄᓕᒫᓄᑦ, ᑕᐃᒫᒃ ᑕᐃᕙᒃᐸᕗᑦ ‘ᐃᓄᓕᒫᓄᑦ’ ᑐᓵᑎᑦᑎᓂᐅᔪᑦ, ᐱᕚᓪᓕᕈᑕᐅᑐᐃᓐᓇᕈᓐᓇᖅᑎᓪᓗᒍ ᓄᓇᕗᒥᐅᑕᓕᒫᓄᑦ. ᐅᓇ ᓱᓕᓗᐊᙵᐅᖅᐳᖅ ᐃᒪᐃᑦᑐᒧᑦ ᐊᒃᑐᖅᑕᐃᓴᕋᐃᑦᑐᒥ – ᐊᒻᒪ ᐱᒻᒪᕆᐅᔪᒥ – ᑐᓵᑎᑕᐅᓂᐅᔪᓂ ᐱᓕᕆᐊᖑᔪᓂ ᐹᕙᓐᓛᓐᑯᑦ ᑐᒃᓯᕋᖅᑕᐅᔪᒥ ᐱᓕᕆᓂᖓᓂ ᒪᕐᕈᖓᓂ ᐊᖏᒡᓕᒋᐊᖅᑕᐅᓂᐅᔪᒥ ᓄᓘᔭᕐᓂ ᐅᔭᕋᖕᓂᐊᕐᕕᖓᓄᑦ ᐱᓕᕆᐊᒃᓴᐅᔪᒥ.

ᑕᐃᒫᒃ ᖁᒃᓴᓪᓚᖕᓇᒐᓚᒃᐳᖅ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑕ (NIRB) ᐊᖏᓚᐅᙱᓐᓂᖏᓐᓂ ᓄᓇᕗᒻᒥ ᐃᒻᒥᒃᑰᖅᑐᒥ ᑕᓚᕖᓴᒧᑦ ᑲᑎᖃᑎᒌᒃᓯᒪᔪᓂ (NITV) ᐱᔪᓐᓇᕐᓂᐅᔪᒥ ᑕᑯᒃᓴᐅᑎᑦᑎᒃᑲᓐᓂᕐᓂᖏᓐᓂ ᑲᑎᒪᓂᐅᔪᒥ ᓯᕗᓂᐊᓂ ᐱᖁᔭᑎᒍᑦ ᑐᓵᑎᑦᑎᓂᐅᔪᓂ ᐱᓕᕆᐊᖑᓯᒪᔪᓂ ᔭᓄᐊᕆᒥ ᐊᒻᒪ ᕕᕈᐊᕆᒥ.

ᐱᔾᔪᑎᓪᓗᐊᑕᐅᔪᖅ ᓄᓇᕗᒻᒥ ᐃᒻᒥᒃᑰᖅᑐᒥ ᑕᓚᕖᓴᒧᑦ ᑲᑎᖃᑎᒌᒃᓯᒪᔪᓂ ᐊᐱᕆᓚᐅᕐᓂᖏᓐᓂ ᐆᒥᖓ ᐱᔪᓐᓇᖅᑎᑕᐅᓂᐅᔪᒥ ᐃᑲᔪᕐᓂᕐᒧᑦ ᐃᒡᓗᓕᖕᒥᐅᑕᓂ ᐊᖑᒻᒪᑎᓂᖏᓐᓂ ᑐᓴᒐᒃᓴᐅᔪᓂ ᑐᓴᓚᐅᙱᑕᖏᓐᓂ, ᐸᒡᕕᓵᕆᓂᐅᔪᓂ ᐱᔾᔪᑎᖃᖅᑐᒥ ᐊᖏᔪᒥ ᐃᑭᓐᓂᐅᓚᐅᖅᑐᒥ ᑕᑯᓚᐅᖅᑐᒥ ᓄᓇᓕᐅᑉ ᑯᐊᐸᒃᑯᑦ ᓂᐅᕕᕐᕕᖓᓂ ᓱᕋᑦᑎᐊᕐᓂᖓᓂ. ᑐᓴᖅᓴᐅᑎᑕᐅᓂᐅᔪᖅ ᑐᕌᖓᓂᖃᓚᐅᕆᕗᖅ ᐅᖃᐅᔾᔨᑦᑎᐊᒃᑲᓐᓂᕐᓂᕐᒧᑦ ᐃᓄᖕᓂ ᐊᒡᕕᐊᕈᑎᖃᓚᐅᕐᓂᖏᓐᓂ ᐱᕕᒃᓴᖃᕐᓂᖏᓐᓂ, ᓲᕐᓗ ᐅᓪᓗᓕᒫᖅᓯᐅᑎᒥᒃ ᐃᖅᑲᓇᐃᔮᖃᕐᓂᕐᒥ.

ᓴᖅᑲᓕᐊᓯ ᑯᓄᒃ, ᓇᓂᓯᔨᐅᔪᖅ ᐃᓱᒪ ᑕᓚᕖᓴᖓᓐᓂ ᐊᒻᒪᓗ ᑲᑎᒪᔨᐅᖃᑕᐅᔪᖅ ᓄᓇᕗᒻᒥ ᐃᒻᒥᒃᑰᖅᑐᒥ ᑕᓚᕖᓴᒧᑦ ᑲᑎᖃᑎᒌᒃᓯᒪᔪᓂ, ᖃᐃᖁᔨᓂᖃᓚᐅᖅᐳᖅ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ ᑭᒡᓕᖃᖅᑎᑦᑎᓂᖏᓐᓂ, ᐅᖃᖅᖢᓂ, “ᖃᐅᔨᒪᕗᒍᑦ ᐱᔪᓐᓇᕐᓂᐅᔪᒥ ᐊᐅᓚᑦᑎᓂᕐᒥ ᐃᓱᒪᖅᓱᖅᑎᑕᐅᙱᓚᒍᑦ. ᖃᐅᔨᔪᒪᕗᒍᑦ ᑭᓇ ᐱᔪᓐᓇᕐᓂᐅᔪᒥ ᐊᐅᓚᑦᑎᓂᕐᒥ ᐃᓱᒪᖅᓱᙱᑎᑦᑎᔪᒥᒃ ᐅᕙᑦᑎᓐᓂ.”

ᑲᑉᐱᐊᑦᑕᐃᑦᑐᓂ ᖃᕋᓴᐅᔭᑎᒍᑦ ᕿᓂᖅᑎᐅᔪᓂ ᓇᓂᓯᔪᓐᓇᕐᓂᖏᓐᓂ ᓯᕗᓂᐊᓂ ᓴᖅᑭᔮᖅᑎᑕᐅᓂᐅᔪᓂ ᖃᕋᓴᐅᔭᑎᒍᑦ ᐃᓱᒪᒃᑯᑦ ᐃᑭᐊᖅᑭᕕᖓᓐᓂ, ᐊᑕᐅᓯᖅ ᓂᕆᐅᓪᓗᐊᖅᐳᖅ ᓄᕗᔭᐃᑦ, ᑕᒪᒃᑭᑦ ᑐᑭᓪᓚᕆᖓᓂ ᐊᒻᒪ ᖃᕋᓴᐅᔭᑎᒍᑦ, ᐱᔪᓐᓇᑦᑎᐊᕐᓂᖏᓐᓂ ᑕᐃᑲᓂ ᐅᓪᓗᖓᓂ ᓄᓇᕘᑉ ᐱᐅᙱᑦᑐᒥ ᖃᕋᓴᐅᔭᑎᒍᑦ ᐱᔨᑦᑎᕋᕐᓂᖓᓂ.
ᐱᔾᔪᑎᖃᖅᑐᒥ ᑎᑎᕋᐅᓯᐅᑦᑎᐊᖅᓯᒪᔪᓂ ᐊᔪᕐᓇᕈᑕᐅᔪᓂ, ᐱᓪᓚᕆᐅᒃᑲᓐᓂᐅᔭᖅᐳᖅ ᐱᕕᒃᓴᖃᕐᓂᓕᒫᑦ ᐅᖃᐅᓯᖃᕐᓂᕐᒥ ᑐᓴᒐᒃᓴᐅᔪᓂ ᐊᒃᑐᐃᕙᒃᑐᓄᑦ ᓄᓇᕗᒻᒥᐅᓕᒫᓂ ᓴᒃᑯᑕᐅᓂᖓᓂ.

ᐃᓚᓯᓗᓂ ᐊᒃᓱᕈᕈᑕᐅᔪᓂ ᐃᓚᒋᔭᐅᔪᒥ ᐊᒥᓱᓄᑦ ᖃᓂᒻᒪᓐᓇᐅᔪᒥ ᑭᒡᓕᖃᖅᑎᑦᑎᕐᔪᐊᖅᑐᒥ ᐅᓄᕐᓂᐅᔪᓂ ᐃᓄᖕᓂ ᐃᓚᐅᖃᑕᐅᔪᓐᓇᕐᓂᖏᓐᓂ ᑐᓵᑎᑦᑎᓂᔨᐅᔪᓂ ᐅᐸᒃᓯᒪᓗᑎᒃ, ᐊᒻᒪᓗ ᐱᖃᖅᐳᑎᑦ ᓈᒻᒪᑦᑎᐊᖅᑐᒥ ᐱᖅᓯᕐᓂᐅᔪᒥ ᐃᔨᕋᖅᑐᕐᓂᐅᔪᒥ.

ᐊᐃᑉᕆᓕ 10−ᒥ, ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᑭᐅᓚᐅᖅᐳᑦ ᓄᓇᕗᒻᒥ ᐃᒻᒥᒃᑰᖅᑐᒥ ᑕᓚᕖᓴᒧᑦ ᑲᑎᖃᑎᒌᒃᓯᒪᔪᓂ ᒪᓕᒐᓕᕆᔨᖓᓄᑦ ᑎᐊᔅ ᓚᐃᑕᓐᒧᑦ, ᐅᖃᖅᓯᒪᔪᒥ, “ᑲᑎᒪᔨᐅᔪᑦ ᓱᓕ ᐃᓱᒪᓕᐅᕆᓂᕐᒦᑉᐳᑦ, ᒪᕐᕉᖕᓂ ᑐᓵᑎᑦᑎᓂᐅᔪᓂ ᑲᑎᒪᓂᐅᔪᓂ ᐱᔭᕇᖅᓯᓯᒪᓪᓗᑎᒃ ᓄᕕᐱᕆ 2019−ᒥ ᐊᒻᒪᓗ ᔭᓄᐊᕆ-ᕕᕈᐊᕆ 2021−ᒥ ᐊᒻᒪ ᐱᖓᔪᖓᓐᓂ ᐱᓕᕆᓂᐅᔪᒥ ᑎᑭᑉᐸᓪᓕᐊᔪᒥ.

“ᑲᑎᒪᔨᒃᑯᑦ ᐊᑐᐊᒐᖓ ᐱᔾᔪᑎᖃᖅᑐᒥ ᑕᑯᒃᓴᐅᑎᑦᑎᒃᑲᓐᓂᕐᓂᐅᔪᒥ ᐅᕝᕙᓘᓐᓃᑦ ᓴᖅᑭᑎᑦᑎᒃᑲᓐᓂᕐᓂᐅᔪᒥ ᑕᐃᒪᐃᖏᓐᓇᖅᐳᖅ, ᑲᑎᒪᔩᑦ ᐃᓚᐅᖃᑕᐅᑎᓪᓗᒋᑦ ᐃᓱᒪᓕᐅᕆᓂᕐᒥ, ᑲᑎᒪᔩᑦ ᐃᓱᒪᒋᔭᖃᔾᔮᙱᓚᑦ ᑐᒃᓯᕋᕐᓂᐅᔪᓂ ᑕᑯᒃᓴᐅᑎᑦᑎᒃᑲᓐᓂᕐᓂᐅᔪᒥ ᐅᕝᕙᓘᓐᓃᑦ ᓴᖅᑭᑎᑦᑎᒃᑲᓐᓂᕐᓂᐅᔪᒥ ᑲᑎᒪᓂᐅᔪᒥ ᐃᓚᒋᔭᐅᔪᒥ ᖃᐅᔨᓴᐃᓂᐅᔪᒥ.”

ᐊᐃᑦᑖᖑᒐᓗᐊᖅ, ᐃᓱᒪᒋᓪᓗᒍ ᓱᓕᓂᐅᔪᒥ ᒫᓐᓇᐅᔪᒥ ᐊᑐᓚᐅᖅᓯᒪᙱᑕᑦᑎᓐᓂ ᐊᑐᕋᑦᑕ ᓴᖑᓴᕋᐃᓐᓂᐅᔪᒥ ᐱᔭᕆᐊᖃᖅᐳᖅ ᑕᒪᒃᑭᐅᒪᔪᑎᒍᑦ ᐱᓕᕆᔭᕆᐊᖃᕐᓂᑦᑎᓐᓂ ᐱᓕᕆᓂᑦᑎᓐᓂ ᐃᖅᑲᓴᐃᔮᑦᑎᓐᓂ ᐊᒻᒪᓗ ᐊᑦᑕᓇᔾᔭᐃᖅᓯᓯᒪᓂᑦᑎᓐᓂ, ᐊᒻᒪ ᑲᑎᒪᔩᑦ ᐊᒃᑐᖅᑕᐅᓂᖃᓚᐅᙱᓚᑦ ᐊᓯᔾᔩᓂᕐᒧᑦ ᓇᖏᕐᓂᕆᔭᖓᓂ.

ᓄᓇᕗᒻᒥ ᐃᒻᒥᒃᑰᖅᑐᒥ ᑕᓚᕖᓴᒧᑦ ᑲᑎᖃᑎᒌᒃᓯᒪᔪᓂ ᐱᒋᐊᒃᑲᓐᓂᓚᐅᖅᐳᑦ ᑕᑯᒃᓴᐅᑎᑦᑎᓂᐅᔪᒥ ᑐᓵᑎᑦᑎᓂᐅᔪᒥ ᐊᐃᑉᕆᓕ 14−ᒥ, ᐊᐃᑦᑖᖑᒐᓗᐊᖅ ᑭᖑᓪᓕᖅᐹᖑᓪᓗᓂ ᐅᓪᓘᓚᐅᕐᓂᖓᓂ ᐃᖏᕐᕋᔪᓐᓇᕐᓂᕆᓚᐅᖅᑕᖓᓂ, ᓯᕗᓂᐊᓂ ᐱᑕᖃᕐᓂᐅᔪᒥ ᓄᕙᒡᔪᐊᕐᓇᒥ ᓇᓗᓇᐃᖅᑕᐅᓂᖓᓂ ᐃᖃᓗᖕᓂ ᓄᖅᑲᖅᑎᑦᑎᒃᑲᓐᓂᖅᖢᓂ ᐅᖃᓪᓚᖕᓂᐅᔪᓂ.

“ᖁᙱᐊᖅᑎᕗᑦ ᑐᓴᕈᒪᕗᑦ ᖃᓄᐃᑉᐸᓪᓕᐊᓂᖓᓂ,” ᐅᖃᓚᐅᖅᐳᖅ ᓄᓇᕗᒻᒥ ᐃᒻᒥᒃᑰᖅᑐᒥ ᑕᓚᕖᓴᒧᑦ ᑲᑎᖃᑎᒌᒃᓯᒪᔪᓂ ᐃᓱᒻᒥᖅᑐᐃᔨᖓ ᓘᓯ ᑐᓗᒑᕐᔪᒃ ᐊᐃᑉᕆᓕ 14−ᒥ ᑐᓴᒐᒃᓴᓕᐊᖑᔪᒥ. “ᓇᖐᓐᓇᕐᓂᐊᖅᐳᒍᑦ ᐃᓄᖕᓄᑦ ᐱᔪᓐᓇᕐᓂᕆᔭᐅᔪᓄᑦ ᑐᓴᖅᑎᑕᐅᓂᐅᔪᒥ. ᓄᓇᕗᒻᒥ ᐃᒻᒥᒃᑰᖅᑐᒥ ᑕᓚᕖᓴᒧᑦ ᑲᑎᖃᑎᒌᒃᓯᒪᔪᓂ ᓈᒻᒪᒃᓴᙲᓐᓇᖅᐳᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑕ ᑭᒡᓕᖃᖅᑎᑕᐅᓂᐅᔪᒥ ᐱᔪᓐᓇᕐᓂᕆᔭᐅᔪᒥ ᑕᑯᒃᓴᐅᑎᑦᑎᒃᑲᓐᓂᕐᓂᐅᔪᒥ, ᑭᒡᓕᖃᖅᑎᑦᑎᔪᒥ ᐃᓄᖕᓂ ᐊᑐᐃᓐᓇᖃᕐᓂᖏᓐᓂ ᑐᓵᑎᑦᑎᓂᐅᔪᓂ, ᐊᒻᒪ ᐊᔭᐅᕆᕗᖅ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓂ ᐃᓱᒪᒃᓴᖅᓯᐅᕆᒃᑲᓐᓂᕐᓂᖏᓐᓂ ᑕᐃᔅᓱᒥᖓ ᐃᓂᐅᔪᒥᑦ.”

ᓇᓕᒧᑦᑐᒥ ᐊᑐᐃᓐᓇᖃᕐᓂᐅᔪᒥ ᑐᓴᒐᒃᓴᐅᔪᓄᑦ ᓇᓗᓇᐃᒃᑯᑕᐅᕗᖅ ᓇᒡᓕᒍᓱᖕᓂᖃᖅᑐᒥ ᐃᓅᖃᑎᒌᖑᔪᓄᑦ. ᓈᒻᒪᖕᓂᖃᙱᓚᖅ ᓄᓇᕗᒻᒥ ᐊᕙᑎᓕᕆᔨᒃᑯᓐᓂ ᑲᑎᒪᔨᖏᓐᓂ ᓄᖅᑲᖅᑎᑦᑎᓂᕐᒥ, ᖃᓄᑐᐃᓐᓇᑦᑎᐊᖅ, ᓄᓇᕗᒻᒥᐅᑦ ᑐᓴᐅᒪᑎᑕᐅᑦᑎᐊᒃᑲᓐᓂᕈᒪᕗᑦ.

Leave a comment

Your email address will not be published. Required fields are marked *