ᐊᑲᐅᙱᓕᐅᕈᑎ: ᖃᓄᖓᓴᕐᓂᖅ
ᐅᖃᖅᐳᒍᑦ: ᓇᒡᓕᒍᓱᖕᓂᖅ ᐱᕐᔪᐊᖑᕗᖅ
ᐅᕙᓂ ᖃᕋᓴᐅᔭᑎᒍᑦ ᐅᑭᐅᖑᓕᖅᑐᒥ, ᐊᔪᕐᓇᙱᓚᖅ ᑕᑯᒃᓴᐅᔪᒥ ᑭᓇᐅᓂᖓᓂ ᓇᓗᓇᖅᓯᓯᒪᓂᐅᔪᒥ ᖃᕋᓴᐅᔭᒃᑰᕆᓂᐅᔪᒥ ᐅᕙᑦᑎᓐᓂ ᐊᓯᐅᑎᑦᑎᓯᒪᕗᖅ. ᐃᒃᐱᒍᓱᑦᑎᐊᕐᓂᖃᖅᑐᒥ ᐅᖃᓪᓚᖕᓂᖃᕐᓂᕐᒥ ᐅᖃᐅᓯᐅᔪᓄᑦ ᐱᓐᓇᕆᕐᔪᐊᖅᑕᑦᑎᓐᓂ, ᐃᓚᖏᑦ ᐃᓄᐃᑦ ᓂᕈᐊᖔᓲᖑᕗᑦ ᐋᓐᓂᕐᓇᖅᑐᓂ ᐅᖃᐅᓯᒃᓴᓕᐅᕐᓂᕐᒧᑦ ᐲᖅᓯᕙᒃᑐᒥ ᓯᕗᓪᓕᐅᔪᒥ ᑭᐅᓘᑎᓂᐅᔪᒥ ᐊᒻᒪᓗ ᐱᔨᑦᑎᕋᑐᐃᓐᓇᓲᖑᕗᖅ ᐃᓄᖕᓂ ᐃᓄᑑᔾᔪᔾᔨᑎᑦᑎᓕᓲᖑᕗᖅ ᓴᖑᓇᓱᐊᓚᐅᖅᑐᓂ ᐃᓱᒪᒋᔭᒥᓂᑦ.
ᖃᕋᓴᐅᔭᑎᒍᑦ-ᖃᓄᖓᓴᕐᓂᖅ ᐊᒃᑐᐃᓲᖑᕗᖅ ᐃᓄᖕᓂ ᖃᓄᑐᐃᓐᓇᖅ ᐅᑭᐅᓕᖕᓂ, ᒪᒃᑯᒃᑐᓂ ᐅᖃᓘᑎᕋᓛᑎᒍᑦ ᑎᑎᕋᕐᓂᐅᔪᒥ ᐊᒻᒪ ᐊᓯᖏᓐᓂ ᖃᕋᓴᐅᔭᑎᒍᑦ ᐋᔩᖃᑎᒌᖕᓂᐅᔪᒥ ᑕᑉᐸᐅᖓᓗᒃᑖᖅ ᑲᑎᒪᔨᕐᔪᐊᖑᔪᓂ ᐱᒋᐊᖅᑕᐅᓂᖏᓐᓂ ᐅᖃᐅᓯᖃᕐᓂᖏᓐᓂ ᐃᓱᒪᒋᔭᒥᓂᑦ.
ᑭᓇᑐᐃᓐᓇᖅ ᐊᑐᕋᓱᒃᑐᒥ ᐃᓂᐅᔪᒥ ᐱᔪᓐᓇᕐᓂᕆᔭᒥᓂᑦ – ᐃᓅᖃᑎᒌᖑᔪᓄᑦ ᖃᓄᐃᑦᑑᓂᖓᓂ ᐱᓕᕆᖃᑎᒥᓂᑦ ᑲᑎᙵᓂᐅᔪᒥ, ᐅᕝᕙᓘᓐᓃᑦ ᐃᓂᐅᔪᒥ ᐱᔪᓐᓇᕐᓂᖃᖅᑐᓂ ᓄᓇᓕᐅᔪᒥ – ᐃᓕᕋᓵᕆᓂᐅᔪᒥ, ᐊᑲᐅᒃᓴᙱᑎᑦᑎᓂᕐᒥ ᐊᓯᐊᓂᒡᓘᓐᓃᑦ ᓱᔪᐃᑎᑦᑎᓗᓂ ᐊᓯᐊᓂ ᐃᓄᖕᒥ ᑎᒥᒥᑎᒍᑦ ᐃᓱᒪᒥᒍᓪᓘᓐᓃᑦ ᖃᓄᖓᓴᕐᓂᐅᕗᖅ.
ᖃᐅᔨᒪᕗᒍᑦ ᐊᒥᓱᓂ ᐊᕐᕌᒍᓂ ᖃᐅᔨᓴᖅᑕᐅᓂᑯᓂ ᖃᓄᖓᓴᕐᓂᖅ ᐱᕐᔪᐊᖑᔪᓂ ᐊᒃᑐᐃᓂᖃᖅᐳᖅ ᐃᓄᖕᓄᑦ ᑕᐃᒪᐃᑕᐅᕙᒃᑐᓂ.
ᖃᓄᖓᓴᕐᓂᖅ ᑲᓇᑕᒥ ᐃᑭᐊᖅᑭᕕᖓ ᐅᖃᖅᓯᒪᕗᖅ “ᐃᓚᖏᑦ ᐃᓄᐃᑦ ᐃᓱᒪᓲᖑᕗᑦ ᖃᓄᖓᓴᕐᓂᖅ ᐃᓚᒋᔭᐅᑐᐃᓐᓇᕐᓂᖓᓂ ᐱᕈᖅᓴᓂᐅᔪᒥ ᐊᒻᒪᓗ ᐱᓕᕆᓂᐅᓪᓗᓂ ᒪᒃᑯᒃᑐᓄᑦ ᐃᓕᑦᑎᓂᖏᓐᓂ ᐃᒻᒥᖕᓂ ᓇᖏᖅᓯᒪᔪᓐᓇᖅᓯᓂᕐᒧᑦ. ᑭᓯᐊᓂ ᖃᓄᖓᓴᕐᓂᖅ ᐊᑯᓂᐅᔪᒥ ᑎᒥᒃᑯᑦ ᐊᒻᒪ ᐃᓱᒪᒃᑯᑦ ᖃᓄᐃᓕᐅᕐᓂᖃᕈᓐᓇᖅᐳᖅ … (ᐃᓚᖃᖅᑐᒥ) ᐃᓚᐅᖃᑕᐅᙱᓐᓂᐅᔪᒥ ᐃᓚᖕᓂ ᐊᒻᒪᓗ ᐃᓕᓐᓂᐊᕐᕕᖕᒥ ᖃᓄᐃᓕᐅᕈᑕᐅᔪᓂ, ᓱᖁᑎᒋᔭᐅᔪᒪᙱᓐᓂᐅᔪᒥ, ᑲᙳᓱᖕᓂᖅ, ᓈᙳᓂᖅ, ᓂᐊᖁᙳᓂᖅ, ᐅᐃᒻᒪᒃᓴᕋᐃᓪᓗᓂ, ᓯᓂᒍᓐᓇᐃᓪᓕᓂᕐᒥ ᐅᕝᕙᓘᓐᓃᑦ ᓯᓂᓗᐊᖅᐸᖕᓂᖓᓂ, ᑕᖃᓯᒪᐃᓐᓇᐅᔭᕐᓂᖓᓂ ᐊᒻᒪᓗ ᓯᓐᓇᒃᑐᕐᓘᑎᖃᖃᑦᑕᕐᓂᕐᒧᑦ.”
ᐃᑲᔪᖅᓱᐃᓂᕐᒧᑦ ᐃᑭᐊᖅᑭᕕᒃ ᐅᕙᑦᑎᓐᓂ ᐃᖅᑲᐃᑎᑦᑎᕙᒃᑭᕗᖅ ᖃᓄᖓᓴᕐᓂᖅ ᐱᓕᕆᓲᖑᙱᓚᖅ ᒥᓪᓗᐊᕐᓂᐅᔪᒥ, ᐋᓐᓂᖅᓯᓲᖑᒋᕗᖅ ᓴᓂᐊᓂ ᓇᖏᖅᑐᓂᑦᑕᐅᖅ, ᐃᓱᒫᓗᑐᐃᓐᓇᕆᐊᓕᖕᓂ ᐃᑲᔪᖅᓯᕋᓱᒃᑯᑎᒃ ᓵᑕᐅᖔᕈᓐᓇᕐᓂᖏᓐᓂ.
ᑲᖏᖅᖠᓂᖅ ᐅᐊᖕᓇᒥ-ᐃᒡᓗᓕᒑᕐᔪᖕᒥ ᒪᓕᒐᓕᐅᖅᑎ ᑳᑎ ᑕᐅᑐᙱ ᐅᓂᒃᑳᕆᓚᐅᖅᐳᖅ ᖃᕋᓴᐅᔭᑎᒍᑦ ᐸᒡᕕᓵᕆᓂᐅᔪᒥ ᐅᖓᕙᕆᐊᓚᐅᖅᑐᒥ ᐱᒋᐊᕐᓂᐅᔪᓂ ᐃᒻᒥᓄᑦ ᑭᓯᐊᓂᑦᑕᐅᖅ ᐃᓚᖏᓐᓄᑦ.
“ᑕᒪᓐᓇ ᐋᓐᓂᕐᓇᖅᐳᖅ … ᓄᓇᕗᑦ ᒥᑭᑦᑐᑯᓗᒃ – ᐃᓅᑉ ᐃᓅᓯᐊᓂ ᓱᕋᑦᑎᕆᑦᑎᐊᕈᓐᓇᖅᐳᖅ,” ᐅᖃᓚᐅᖅᐳᖅ.
“ᓱᕈᓰᑦ ᐃᓕᑦᑎᒑᖓᒥᒃ ᖃᓄᐃᓕᐅᖅᑕᐅᔾᔮᙱᓐᓂᖏᓐᓂ ᐋᓐᓂᖅᓯᕆᓂᐅᔪᒥ ᐊᒻᒪᓗ ᑲᑉᐱᐊᓵᕆᓂᕐᒥ ᑕᐃᒪᐃᓕᐅᖏᓐᓇᓲᖑᕗᑦ ᐃᓐᓇᕈᕋᓗᐊᖅᑎᓪᓗᒋᑦ,” ᖃᓄᖓᓴᕐᓂᖅ ᑲᓇᑕᒥ ᐅᖃᖅᐳᖅ. “ᖁᑦᑎᖕᓂᖅᓴᒥ ᐃᓚᐅᖃᑕᐅᓕᕈᓐᓇᖅᐳᖅ ᐊᐃᑉᐸᖃᕐᓂᖏᓐᓂ ᑲᑉᐱᐊᓵᕆᓂᕐᒥ, ᖁᓄᔪᓐᓂᐊᕐᓂᕐᒥ ᐊᒻᒪ ᐱᕋᔭᖕᓂᕐᒧᑦ ᐃᓕᖅᑯᓯᖃᓕᕐᓗᑎᒃ ᑭᖑᓂᒃᑲᓐᓂᐊᓂ ᐃᓅᓯᖓᓐᓂ.”
ᖃᓄᖓᓴᕐᓂᖅ ᖃᓄᑐᐃᓐᓇᑦᑎᐊᖅ ᐊᒃᑐᐃᓂᖃᕈᓐᓇᖅᐳᖅ ᐃᓕᑦᑎᓂᐅᔪᒥ, ᐃᓱᒪᑦᑎᐊᕈᓐᓇᕐᓂᕐᒧᑦ ᐊᒻᒪ ᑕᐅᑐᒃᑕᑐᐊᖃᑲᐃᓐᓇᕐᓂᕐᒧᑦ.
ᐊᐅᐸᔪᒃᑐᒥ ᐅᕕᓂᕈᕐᒥ ᐅᓪᓗᖓ ᐱᒋᐊᖅᑕᐅᓚᐅᖅᐳᖅ 2008−ᒥ, ᑲᔪᖏᖅᓱᖅᑕᐅᓪᓗᓂ 2007−ᒥ “ᖁᑦᑎᒃᑐᒥ ᐃᓕᓐᓂᐊᕐᕕᖕᒥ ᓈᒻᒪᒃᓴᙱᓐᓂᕐᒥᓂᒃ ᑕᑯᒃᓴᐅᑎᑦᑎᔪᒥᒃ ᐊᑐᕐᓂᕐᒧᑦ ᐊᐅᐸᔪᒃᑐᒥ ᓇᒡᓕᒍᓱᖕᓂᕐᒧᑦ ᖁᑦᑎᖕᓂᓕᖕᒥ 9−ᒥ ᐊᖑᒻᒥ ᖃᓄᖓᓴᖅᑕᐅᓚᐅᖅᑐᒥ (ᐊᑐᕐᓂᕐᒧᑦ ᐊᐅᐸᔪᒃᑐᒥ ᐅᕕᓂᕈᕐᒥ).”
ᑲᑐᔾᔨᖃᑎᒌᖑᔪᑦ ᑐᓄᐊᓂ ᐱᒋᐊᕈᑕᐅᔪᒥ, CKNW Kids’ Fund, ᑐᓂᓯᓲᖑᕗᑦ 100 ᐳᓴᓐᑎᖓᓂ ᑮᓇᐅᔭᓕᐊᖑᔪᑦ ᐅᓄᕐᓂᖏᑦ ᐃᓚᙵᕈᑕᐅᔪᒃᓴᐃᑦ ᐲᖅᖅᑕᐅᓚᐅᖅᑎᓪᓗᒋᑦ ᐅᕗᙵᐅᓲᖑᕗᑦ “ᐊᔾᔨᒌᙱᑦᑐᓄᑦ ᑲᑐᔾᔨᖃᑎᒌᖑᔪᓄᑦ ᐃᑲᔪᖅᓱᐃᔪᓂ ᓱᕈᓯᕐᓄᑦ ᖃᓗᐃᙱᑦᑎᐊᕐᓂᕐᒧᑦ ᐃᒻᒥᓂᒃ−ᐅᐱᒍᓱᑦᑎᐊᕐᓂᕐᒥ, ᑕᒪᒃᑭᑦ ᐱᓕᕆᖃᑎᒥᓂᒃ ᐊᒻᒪᓗ ᐃᒻᒥᖕᓄᑦ.” ᐅᑯᐊ ᐃᓚᖃᖅᐳᑦ ᓱᕈᓯᕐᓄᑦ ᐃᑲᔪᖅᑕᐅᓂᕐᒧᑦ ᐅᖃᓗᒡᕕᒃᓴᒥ ᐊᒻᒪᓗ ᑭᓇᐅᔪᖓ ᐃᓱᓕᑦᑎᓂᕐᒥ ᖃᓄᖓᓴᕐᓂᕐᒥ ᑲᑐᔾᔨᖃᑎᒌᖑᔪᓂ ᐱᔨᑦᑎᕋᖅᑐᓂ ᑲᓇᑕᒥᐅᑕᓕᒫᓂᑦ, ᐃᓚᖃᖅᑐᒥ ᖃᔅᓯᒐᓚᖕᓂ ᐳᕆᑎᔅ ᑲᓚᒻᐱᐊᒥ−ᑐᙵᕕᓕᖕᓂ ᑮᓇᐅᔭᓂᒃ ᑐᓂᓯᓂᐅᒧᓂ ᑲᑐᔾᔨᖃᑎᒌᖑᔪᓂᑦ.
“ᐅᓇ ᐊᐅᐸᔪᒃᑐᒥ ᐅᕕᓂᕈᕐᒥ ᐅᓪᓗᖓ, ᑕᐅᑐᒃᑕᑐᐊᖃᑲᐃᓐᓇᕐᓂᑦᑎᓐᓂ ᑲᑎᙵᓗᑕ ᐱᓕᕆᖃᑎᒌᖕᓂᕐᒥ ᐊᒻᒪᓗ ᐊᓯᑦᑎᓐᓂ ᐱᓕᕆᕙᒡᓗᑕ ᐃᒃᐱᒍᓱᑦᑎᐊᕐᓂᖃᕐᓗᑕ ᐊᒻᒪ ᐃᒃᐱᒋᔭᐅᑦᑎᐊᕐᓗᓂ. ᓄᕙᒡᔪᐊᕐᓇᖅ-19 ᐊᒥᓱᓄᑦ ᖃᓂᒻᒪᓐᓇᐅᔪᒥ ᐅᕙᑦᑎᓐᓂᓕᒫᖅ ᐊᒃᑐᐃᓯᒪᕗᖅ ᐊᒻᒪᓗ ᑕᑯᑎᑦᑎᓯᒪᓪᓗᓂ ᐱᒻᒪᕆᐅᓂᖓᓂ ᐃᑲᔪᖃᑦᑕᐅᑎᓂᕐᒥ ᐊᒻᒪᓗ ᐃᑲᔪᖅᓱᐃᓂᕐᒥ ᑕᐃᒃᑯᓄᖓ ᐱᔭᕆᐊᖃᖅᑐᓄᑦ. ᐃᑲᔪᖅᑎᒍᑦ ‘ᖁᕝᕙᖅᑎᑦᑎᓇᓱᐊᕐᓂᕐᒥ ᑭᒃᑯᓕᒫᓂᒃ’ ᐊᒻᒪ ᐃᑲᔪᖅᓱᐃᓂᕐᒥ ᐱᓕᕆᐊᖑᔪᓂ ᐊᔭᐅᕆᔪᒥ ᖃᓄᐃᙱᑦᑎᐊᖅᑐᒥ ᐃᒻᒥᓂᒃ−ᐅᐱᒋᔭᖃᕐᓂᕐᒥ ᐊᒻᒪᓗ ᐃᓕᓐᓂᐊᖅᑎᑦᑎᓗᑕ ᑐᑭᓯᐅᒪᑦᑎᐊᕈᓐᓇᕐᓂᕐᒥ ᐅᖃᐅᓯᕆᓗᒍᓗ, ᓇᒡᓕᒍᓱᖕᓂᕐᒥ ᐊᒻᒪ ᑐᙵᓇᕐᓂᕐᒥ.”
ᐊᑐᓂ ᐃᓄᒃ ᓂᕈᐊᒐᒃᓴᖃᖅᐳᖅ ᖃᓄᖅ ᐱᑦᑎᐊᓲᖑᓂᖓᓂ ᐊᓯᖏᓐᓂ. ᐃᓚᐅᖃᑕᐅᓚᐅᖅᑕ ᑐᙵᓇᕐᓂᕐᒧᑦ ᐊᔪᕐᓇᙱᒃᑳᖓᑦ, ᐊᒻᒪᓗ ᑕᑯᒃᓴᐅᑎᑦᑎᓗᑕ ᓇᒡᓕᒍᓱᖕᓂᐅᔪᒥ ᑮᓇᖓᓂ ᐊᒥᓱᓄᑦ ᐊᒃᓱᕈᕐᓇᖅᑐᓄᑦ ᑎᑭᐅᑎᕙᒃᑕᑦᑎᓐᓂ ᐃᓅᓯᑦᑎᓐᓂ.