ᓇᓄᖅ ᓴᖅᑭᔮᑦᑎᐊᖅᖢᓂ ᓇᓗᓇᐃᒃᑯᑕᐅᕗᖅ ᖃᓪᓗᓈᓄᑦ ᖃᐅᔨᓴᖅᑕᐅᓂᖓᓂ ᑭᓱᓕᒫᓄᑦ ᖃᓄᐃᕐᓘᑕᐅᔪᓄᑦ, ᐊᒃᓱᓪᓘᓐᓃᑦ ᓯᓚ ᐃᓱᒪᒋᔭᐅᓂᖓᓂ.

ᐅᑭᐅᖅᑕᖅᑐᒥ ᓯᑯᖓ ᑕᐃᔅᓱᒪᓂᑐᖃᖅᑎᒍᑦ ᓄᖑᑉᐸᓪᓕᐊᖏᓐᓇᕐᒪᑦ. ᔪᓚᐃ 16–ᒥ, ᑲᓇᑕᒥ ᐊᐳᒻᒧᑦ ᓯᑯᒧᓪᓗ ᑎᑎᕋᖅᓯᒪᔪᓂᒃ ᖃᐅᔨᓴᖅᑕᐅᓂᑯᓂ ᐱᓕᕆᕝᕕᒃ ᐅᓂᒃᑳᕆᓚᐅᖅᐳᖅ ᐅᑭᐅᖅᑕᖅᑐᒥ ᑕᕆᐅᑉ ᓯᑯᖓᓂ ᐅᓕᒃᓯᒪᓂᖓᓂ 7.51 ᒥᓕᐊᓐ ᑭᑉᐹᕆᒃᑐᓂ ᑭᓛᒥᑐᓂ ᔪᓚᐃ 15–ᖑᑎᓪᓗᒍ, 330,000 ᑭᑉᐹᕆᒃᑐᓂ ᑭᓛᒥᑐᓂ ᐊᑖᓃᑦᑐᒥ ᓯᕗᓂᐊᓂ ᑎᑎᕋᖅᑕᐅᓯᒪᓚᐅᖅᑐᒥ ᐊᑦᑎᖕᓂᖓᓂ ᑕᐃᔅᓱᒧᖓ ᐅᓪᓘᔪᒥ, ᐋᖅᑭᒃᓯᒪᔪᒥ 2011–ᒥ.

ᐅᓇ ᓄᖑᑉᐸᓪᓕᐊᖏᓐᓇᕐᓂᖓ ᑕᕆᐅᑉ ᓯᑯᖓ ᐃᓱᒫᓗᖕᓇᖅᐳᖅ “ᐊᑯᓂᐅᓂᖅᓴᒥ ᓯᑯᖃᙱᓐᓂᐅᔪᒥ ᑐᑭᖃᕐᒪᑦ ᓇᓄᐃᑦ ᓄᓇᒦᓐᓂᖅᓴᐅᔭᕆᐊᖃᕋᔭᕐᓂᖏᓐᓂ, ᑕᐃᑲᓂ ᐱᕕᒃᓴᖃᕐᓂᖅᓴᐅᓂᐊᖅᖢᑎᒃ ᓇᒧᙵᐅᕈᓘᔭᕐᓂᖏᓐᓂ ᐃᓂᐅᔪᓄᑦ ᐅᐸᒃᐸᓚᐅᙱᑦᑕᖏᓐᓄᑦ,” ᐅᖃᖅᐳᖅ ᐲᑕ ᒨᓪᓄᕐ, ᐃᓕᓴᐃᔨᐅᑉ ᐃᑲᔪᖅᑎᖓ ᐆᒪᔪᐃᑦ ᐃᓕᖅᑯᓯᖏᓐᓂ ᖃᐅᔨᓇᓱᖕᓂᕐᒧᑦ ᓯᓚᑦᑐᖅᓴᕐᕕᒡᔪᐊᒥ ᑐᕌᓐᑐᒥ, ᐊᑕᐅᓯᐅᔪᖅ 6–ᓂ ᑎᑎᕋᖅᓯᒪᔪᓂ ᓄᑖᖑᔪᒥ ᖃᐅᔨᓴᖅᑕᐅᓂᐅᔪᒥ, ᑕᐃᒎᓯᓕᖕᒥ ᓂᕿᒃᓴᖃᙱᓐᓂᕐᒧᑦ ᐊᕐᕌᒎᑉ ᐃᓚᖓᓐᓂ ᐊᑯᓂᐅᓂᖓ ᐋᖅᑭᒃᓯᕗᖅ ᓄᓇᕐᔪᐊᒧᑦ ᑭᒡᓕᐅᔪᓂ ᓄᓇᕐᔪᐊᒥ ᓇᓄᕐᓄᑦ ᐱᑕᖃᐃᓐᓇᕐᓂᖓᓄᑦ (Fasting Season Length Sets Temporal Limits for Global Polar Bear Persistence).

ᑕᑯᒃᓴᐅᓂᖅᓴᐅᓕᕐᓂᖏᓐᓂ ᑐᑭᖃᙱᓚᖅ ᐅᓄᕐᓂᖅᓴᐅᔪᓂ ᓇᓄᕐᓂ, ᐃᒪᓐᓇᑐᐊᖅ ᖃᓂᒡᓕᒋᐊᕐᓂᐊᕐᓂᖏᓐᓂ ᐃᓄᖕᓄᑦ ᓄᓇᒋᔭᐅᔪᓄᑦ ᕿᓂᕐᓂᕐᒧᑦ ᐊᔪᕐᓇᙱᓐᓂᖅᓴᐅᔪᒥ ᓂᕿᑖᕐᕕᐅᕙᒃᑐᓂ, ᓴᖑᔪᓐᓇᖅᑐᒥ ᑐᖂᑦᑎᓂᐅᔪᒥ ᐹᖅᓯᓂᖃᕈᓐᓇᕐᓂᖓᓂ – ᐊᓯᐅᔨᓂᐅᔪᒥ ᐃᓅᓯᕐᒥ ᐃᓅᒍᓂ, ᐅᕝᕙᓘᓐᓃᑦ ᓇᓄᕐᒥ ᐊᑲᐅᙱᓕᐅᕈᑎᖃᓕᕐᓂᖓᓂ ᐱᔾᔪᑎᖃᖅᑐᒧᑦ ᓇᔪᖅᐸᒃᑕᐅᓂᖏᓐᓄᑦ.

ᐃᓚᖏᑦ ᐊᖏᓂᖅᓴᐅᔪᒥ ᐅᓄᕐᓂᐅᔪᓄᑦ ᑐᖁᕋᕈᓐᓇᕆᕗᑦ ᕿᓚᒻᒥᐅᓂᖅᓴᒥ ᐊᓯᖏᓐᓂ, ᓇᓄᕐᓄᑦ ᓂᒋᕐᒥ ᑲᖏᖅᓱᐊᓗᖕᒥ ᐊᒻᒪ ᕿᑭᖅᑖᓘᑉ ᐊᑯᑭᑦᑐᐃᓪᓗ ᓄᓇᖓᑦᑕ ᐃᑭᕋᓴᖓ ᓵᙵᑐᐃᓐᓇᕆᐊᖃᕐᓂᖏᓐᓂ ᑐᖁᕋᕐᓂᖏᓐᓂ ᐃᓗᐊᓂ ᐊᕐᕌᒍᓄᑦ 20-ᓄᑦ ᐊᒻᒪ ᐊᓯᖏᑦ ᐊᕐᕌᒍᓄᑦ 80–ᓄᑦ, ᖃᐅᔨᓴᕐᓂᖅ ᓇᓚᐅᑦᑖᕆᕗᖅ.
ᓲᖃᐃᒻᒪ, ᐃᓱᒪᒋᔭᖃᕐᓂᕐᒥ ᓇᓚᐅᑦᑖᕆᓂᐅᔪᓄᑦ ᐆᒃᑑᑕᐅᔪᑦ ᖃᓪᓗᓈᑦ ᖃᐅᔨᓴᕐᓂᖓ ᑐᙵᕕᖃᖅᑐᒥ ᓈᓴᐅᑎᓪᓚᕆᖕᓂ ᓱᓕᓪᓚᕆᖕᒪᖔᑕ.

ᕕᓕᑉ ᐳᑐᒥᕋᖅᑐᖅ, ᐃᒃᓯᕙᐅᑕᐅᔪᖅ ᖃᒪᓂᑦᑐᐊᕐᒥ ᐊᖑᓇᓱᒃᑎᓄᑦ ᒥᑭᒋᐊᕐᓂᐊᖅᑎᒃᑯᓐᓄᓪᓗ ᑲᑐᔾᔨᖃᑎᒌᖑᔪᑦ, ᐅᖃᓚᐅᖅᐳᖅ ᐃᓕᓯᓯᒪᓂᖓᓂ ᐊᖏᓂᖅᓴᐅᔪᒥ ᐱᓐᓇᕆᔭᖃᕐᓂᐅᔪᒥ ᐃᓄᖕᓄᑦ ᖁᙱᐊᖅᑕᐅᓯᒪᓂᐅᔪᓄᑦ ᐊᒻᒪ ᐃᓕᓴᐃᓂᖏᓐᓂ.

“ᖃᐅᔨᓴᖅᑏᑦ ᐅᖃᓪᓚᐅᓯᖏᑦ, ᖃᓄᐃᓕᕙᖕᓂᖏᑦ, ᒪᓕᓗᐊᕌᓗᒃᐸᙱᓚᕋ. ᒪᓕᑐᐃᓐᓇᓲᖑᕗᖓ ᐃᓕᖅᑯᓯᒪ ᐊᑐᖅᐸᒃᑕᑦᑎᓐᓄᑦ,” ᐅᖃᓚᐅᖅᐳᖅ. “ᐊᑖᑕᒐ, ᐅᖃᓚᐅᖅᓯᒪᔭᖓᓂ ‘(ᐆᒪᔪᐃᑦ) ᐱᑕᖃᐃᓐᓇᕐᓂᐊᖅᐳᑦ.'”
ᐲᑕ ᐄᑦᓯᐊᖅ, ᐊᐅᓚᑦᑎᔨᐅᔪᖅ ᐃᑲᔫᑎᑦ ᐊᖑᓇᓱᒃᑎᓄᑦ ᒥᑭᒋᐊᕐᓂᐊᖅᑎᒃᑯᓐᓄᓪᓗ ᑲᑐᔾᔨᖃᑎᒌᖑᔪᑦ ᐃᒃᐱᐊᕐᔪᖕᒥ, ᐅᖃᓚᐅᖅᐳᖅ ᖃᐅᔨᓴᖅᑏᑦ “ᓇᓚᐅᑦᑖᑐᐃᓐᓇᖅᑐᒃᓴᐅᔪᑦ” “ᓇᒦᓐᓂᑦᑎᓐᓂ ᐅᑯᐊ (ᓇᓄᐃᑦ) ᖃᓄᐃᙱᑦᑎᐊᖅᐳᑦ. ᓄᓇᒥᒃ ᐆᒪᔪᓐᓇᕐᒥᔪᑦᑕᐅᖅ. ᓇᑦᑎᕋᓱᒍᓐᓇᖅᐳᑦ ᓯᑯᖃᙱᑦᑐᒥ ᐃᒪᕐᒥ. ᐊᓪᓚᙳᐊᓂ ᕿᓚᓗᒐᕋᓱᒍᓐᓇᖅᑐᑦ ᓯᑯᖃᙱᑦᑐᒥ ᐃᒪᕐᒥ. ᐆᒪᓪᓚᕆᖕᓂᐊᖅᑐᑦ,” ᐅᖃᓚᐅᖅᐳᖅ.

ᐃᓱᒫᓘᑎᖃᕆᕗᑦ ᐹᕙᓐᓛᓐᑯᑦ ᐊᖏᒡᓕᒋᐊᖅᑐᒥ ᐅᓯᑲᑦᑕᕐᓂᕐᒧᑦ ᐊᐅᔭᒃᑯᑦ ᐊᒃᑐᐃᓂᖓᓂ ᑕᕆᐅᕐᒥ ᐆᒪᔪᐃᑦ ᓯᓚᑎᖃᑎᒌᑦ ᓯᓚᑖᓗ ᕿᙳᐊᓂ.

2019–ᒥ ᐅᒥᐊᕐᔪᐊᒃᑰᖅᑎᑦᑎᓂᕐᒥ ᐊᐅᔭᒃᑯᑦ ᔪᓚᐃ 17–ᒥ ᐅᒃᑐᐱᕆ 31–ᒧᑦ ᐹᕙᓐᓛᓐᑯᑦ ᐅᓯᑲᑦᑕᓚᐅᖅᐳᑦ ᑲᑎᓪᓗᒍ 5.86 ᒥᓕᐊᓐ ᑕᓐᓂ ᓴᕕᕋᔭᒃᓴᒥ ᕿᙳᐊᓂ ᑐᓚᒃᑕᕐᕕᖓᓐᓂ ᓄᓇᕐᔪᐊᒧᑦ ᓂᐅᕕᐊᒃᓴᐅᔭᖅᑐᖅᖢᑎᒃ. 81–ᓂ ᐅᒥᐊᕐᔪᐊᒃᑰᖅᑎᑦᑎᓂᖃᓚᐅᖅᐳᑦ, ᑎᑭᐅᒪᔪᓄᑦ 5.1 ᒥᓕᐊᓐ ᑕᓐᓂ ᓴᕕᕋᔭᒃᓴᒥ 71 ᐅᖓᑖᓂ ᐅᓯᔭᐅᓂᐅᔪᓄᑦ 2018–ᒥ.

ᑕᒪᑐᒪᓂ ᐊᕐᕌᒎᔪᒥ ᐅᒥᐊᕐᔪᐊᒃᑰᖅᑎᑦᑎᓂᐅᔪᓂ ᖄᖏᐅᑎᔪᓐᓇᖅᐳᖅ 100–ᓂ.

ᒥᑦᑎᒪᑕᓕᖕᒥ ᒪᐃᔭᖓ ᔮᓱᐊ ᐋᕆᐊᖅ ᐅᖃᓚᐅᖅᐳᖅ ᓄᓇᓕᐅᔪᑦ ᓇᐅᑦᑎᖅᓱᑦᑎᐊᖅᐳᑦ ᐊᒃᑐᐃᓂᐅᑐᐃᓐᓇᕆᐊᓕᖕᓂ ᐅᒥᐊᕐᔪᐊᒃᑰᖅᑎᑦᑎᓂᐅᔪᒥ ᐃᖏᕐᕋᓂᐅᔪᓂ ᐱᑐᐃᓐᓇᕆᐊᖃᕐᓂᖓᓂ ᐊᕙᑎᒧᑦ, ᐆᒪᔪᓄᑦ ᐊᒻᒪᓗ ᓄᓇᓕᖕᒥᐅᑕᓄᑦ.
“ᖃᐅᔨᓴᕐᓂᒃᑯᑦ, ᐋᒃᑳᓚᕗᑦ, ᑭᓯᐊᓂ ᐊᖏᔪᒥ ᐊᒃᑐᐃᓂᖃᙱᓚᖅ ᑭᓯᐊᓂ ᐊᖑᓇᓱᒃᑎᓄᑦ, ᐄ, ᐊᒃᑐᐃᓂᖃᕐᓂᕋᐃᔪᑦ. ᓇᐃᓴᐅᑎᓅᑐᐃᓐᓇᕈᓐᓇᖅᐳᒍᑦ,” ᐋᕆᐊᖅ ᐅᖃᓚᐅᖅᐳᖅ. “ᖃᐅᔨᓂᐊᖅᐳᒍᑦ ᖃᓄᐃᓐᓂᐊᕐᒪᖔᑦ ᑕᒪᑐᒪᓂ ᐊᕐᕌᒎᔪᒥ. ᓇᖕᒥᓂᖅ ᓇᐅᑦᑎᖅᓱᐃᓐᓇᕐᓂᐊᖅᐳᒍᑦᑕᐅᖅ.”

ᐃᓄᑐᐃᓐᓇᕐᓄᑦ ᖃᐅᔨᓴᕐᓂᖅ ᐊᖏᓛᖑᖃᑕᐅᓪᓗᓂ ᐱᕚᓪᓕᕈᑕᐅᖃᑕᐅᕗᖅ ᓄᓇᕐᔪᐊᒥ ᐃᓅᖃᑎᒌᖕᓂᐅᔪᒥ, ᐊᑐᕈᓐᓇᕋᑦᑎᒍᑦ ᖃᕋᓴᐅᔭᑎᒍᑦ ᐱᓕᕆᔾᔪᑎᓂᑦ ᐃᑲᔪᕐᓂᕐᒧᑦ ᖃᐅᔨᓴᕐᓂᕐᒧᑦ ᐊᒻᒪ ᓇᐅᑦᑎᖅᓱᕐᓂᕐᒧᑦ ᐆᒪᔪᐃᑦ ᓯᓚᑎᖃᑎᒌᑦ ᓯᓚᑖᓗ ᐱᓕᕆᓂᐅᔪᒥ ᖃᓂᓐᓂᖅᓴᐅᔪᒧᑦ ᐊᖏᕐᕋᒧᑦ.

ᐊᒥᓱᑦ ᐃᓄᐃᑦ ᐃᓕᓐᓂᐊᖅᑏᑦ ᐅᓪᓗᒥ ᑐᙵᕕᖃᖅᐸᓪᓕᐊᕗᑦ ᖃᐅᔨᓴᐃᓂᐅᔪᓂ ᐃᓕᓐᓂᐊᕐᕕᑎᒍᑦ ᐊᒻᒪᓗ ᓴᖅᑭᔮᕐᕕᐅᓂᖏᓐᓂ ᐱᖅᑯᓯᑐᖃᖅᑎᒍᑦ ᐊᔪᙱᓐᓂᐅᔪᓂ ᐃᓚᒐᓴᖏᓐᓂᑦ.

ᑕᒪᑐᒪᓂ ᑎᑭᑉᐸᓪᓕᐊᔪᒥ ᐱᐅᓯᖃᑎᒌᖑᔪᓂ ᑕᑯᔪᓐᓇᕐᓂᐊᖅᐳᑦ ᑕᒪᒃᑭᓂᙶᖅᑐᓂᑦ, ᐃᓚᓕᐅᔾᔨᓂᖅ ᐃᓄᐃᑦ ᖃᐅᔨᒪᔭᑐᖃᖏᓐᓂ ᓴᓂᓕᖃᕐᓗᓂ ᖃᐅᔨᓴᖅᑕᐅᓂᕐᒧᑦ ᖁᙱᐊᕐᓂᐅᔪᒥ. ᑕᒪᓐᓇ ᐃᑲᔫᑎᖃᕐᔪᐊᕈᓐᓇᖅᐳᖅ ᐊᑐᓗᐊᖅᑕᐃᓕᓂᕐᒥ ᐅᖃᓪᓚᖕᓂᐅᓂᐊᖅᑐᓂ ᑎᑭᑉᐸᓪᓕᐊᔪᓄᑦ.

Leave a comment

Your email address will not be published. Required fields are marked *