ᐸᓖᓯᐅᔪᑦ ᐊᒃᑐᖅᑕᐅᓂᖃᓲᖑᒋᕗᑦ ᐱᓂᕐᓗᒃᑕᐅᓯᒪᓂᐅᔪᒧᑦ ᑕᐃᒪᓐᓇᑎᑐᑦ ᓄᓇᕗᒻᒥᐅᑎᑐᑦ ᐱᔨᑦᑎᕋᖅᐸᒃᑕᖏᓐᓂ
ᐊᑲᐅᙱᓕᐅᕈᑎ: ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᖅ
ᐅᖃᖅᐳᒍᑦ: ᑲᓇᑕᒥ ᐸᓖᓯᒃᑯᑦ ᑐᐊᕕᕐᓇᕐᓂᐅᔪᒥ ᐊᒃᑐᖅᑕᐅᓂᖃᕐᒥᔪᑦ
ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᖅ ᐱᓇᓱᐊᕈᓯᖓ ᐃᓕᓴᕆᔭᐅᕗᖅ ᓄᓇᕗᒻᒥ ᒪᐃᑕᒫᒥ.
ᓇᓗᓇᙱᓚᖅ ᓴᖅᑭᑎᑦᑎᓲᖑᓂᖓᓂ ᐊᖏᒡᓕᒋᐊᖅᓯᓂᐅᔪᒥ ᑭᒡᓕᖃᖅᑐᒥ ᐃᑲᔪᕈᑎᒃᓴᓂ ᐊᑐᐃᓐᓇᐅᔪᓄᑦ ᓄᓇᕗᒻᒥᐅᓄᑦ ᓂᕆᐅᖕᓂᐅᔪᓂ ᒥᒃᖠᒋᐊᖅᑎᑦᑎᓇᓱᐊᕐᓂᕐᒧᑦ ᓄᓇᕘᑉ ᐊᔾᔨᐅᙱᕐᔪᐊᖅᑐᒥ ᐊᒻᒪ ᐊᒃᓱᕈᕐᓇᕐᔪᐊᖅᑐᒥ ᐃᒻᒥᓃᕐᓂᐅᔪᓄᑦ ᐅᓄᕐᓂᖏᓐᓂ. ᖃᐅᔨᒪᕗᒍᑦ ᐊᑕᐅᓯᑐᐊᒥ ᐱᓇᓱᐊᕈᓯᐅᔪᒥ ᒥᑭᓗᐊᖅᑐᒻᒪᕆᐅᕗᖅ ᓇᓗᓇᐃᖅᓯᓂᐅᔪᒥ ᑕᐃᒪᐃᑦᑐᒥ ᐸᒡᕕᓵᕆᓂᐅᔪᒥ ᐊᑲᐅᙱᓕᐅᕈᑕᐅᔪᒥᒃ.
ᐃᖅᑲᐃᑎᑦᑎᓂᐅᔪᒥ ᓯᑎᐱᕆᒥ ᑎᑭᑦᑐᖃᓚᐅᖅᐳᖅ ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᖅ ᑐᐊᕕᕐᓇᕐᓂᖓᓂ ᐅᖓᕙᕆᐊᖅᓯᒪᓂᖓᓂ ᐃᓚᖏᓐᓄᑦ ᓯᕗᓪᓕᖅᐸᐅᔪᓄᑦ ᑭᐅᔨᐅᕙᒃᑐᓄᑦ. ᑎᓴᒪᓂ ᑲᓇᑕᒥ ᐸᓖᓯᓂᑦ ᑕᒪᒃᑭᑦ ᐱᔨᑦᑎᕋᓚᐅᖅᑐᓂ ᓄᓇᕗᒻᒥ ᐸᓖᓯᒃᑯᕕᐅᔪᓂᑦ ᐃᖅᑲᖅᑐᐃᕕᒃᑯᑦ ᑮᓇᐅᔭᐃᖅᑎᑦᑎᒐᓱᐊᖅᐳᑦ ᐅᑯᓄᖓ ᒐᕙᒪᑐᖃᒃᑯᓐᓄᑦ. ᐱᓇᓱᐊᖅᐳᑦ ᓱᔪᐃᓂᐅᔪᓂ "ᐱᓕᕆᔾᔪᓯᐅᔪᒥ ᐃᒃᓯᓐᓇᖅᑕᐅᓯᒪᓂᐅᔪᓄᑦ" ᒐᕙᒪᒃᑯᑦ ᐊᒻᒪᓗ ᐸᓖᓯᒃᑯᑦ ᑭᐅᑦᑎᐊᕈᓐᓇᓚᐅᙱᒻᒪᑕ ᐱᓂᕐᓗᒡᔪᐊᕐᓂᐅᔪᒥ ᐅᑯᐊ ᐸᓖᓯᐅᔪᑦ ᐊᑐᓚᐅᖅᑕᖏᓐᓂ.
ᑎᓴᒪᑦ ᐸᓖᓯᐅᔪᑦ ᐅᓂᒃᑳᕆᓚᐅᖅᐳᑦ ᐋᓐᓂᖅᓯᕆᓂᐅᔪᒧᑦ ᑐᕌᖓᓂᖃᖅᑎᑕᐅᓂᖏᓐᓂ – ᐃᓚᖏᑦ ᑲᑉᐱᐊᓇᖅᑐᒥ ᐱᕐᔪᐊᖑᔪᓂ – ᑭᐅᑎᓪᓗᒋᑦ ᐅᖃᓗᖕᓂᐅᔪᓄᑦ ᐃᑲᔪᖅᓯᖅᑕᐅᓂᕐᒧᑦ ᐊᔾᔨᒌᙱᑦᑐᓂ ᓄᓇᕗᒻᒥ ᓄᓇᓕᐅᔪᓂ.
ᐃᖅᑲᖅᑐᐃᕕᖕᒥ ᑎᑎᖅᑲᖁᑕᐅᔪᖅ ᐅᖃᐅᓯᖃᖅᓯᒪᒋᕗᖅ ᖁᑭᖅᓴᕐᓂᐅᔪᒥ ᖃᓄᐃᓐᓂᐅᔪᒥ ᑎᓯᐱᕆ 2018–ᒥ ᑕᐃᒪᐃᓚᐅᖅᑐᒥ ᖃᔅᓯᒐᓚᖕᓄᑦ ᐃᑲᕐᕋᓄᑦ. ᑕᐃᒪᐃᑦᑐᑦ ᐹᖅᓯᓂᐅᔪᓂ ᐸᓖᓯᒃᑯᓐᓄᑦ ᐊᒻᒪ ᐃᓄᑐᐃᓐᓇᕐᓄᑦ, ᐃᓄᑐᐃᓐᓇᖅ ᑮᒍᑎᓯᒪᑎᓪᓗᒍ ᐃᒡᓘᑉ ᐃᓗᐊᓂ ᖁᑭᐅᓯᔭᖅᖢᓂ, ᐊᐃᑦᑖᖑᒐᓗᐊᖅ ᑕᐃᒪᐃᒐᔪᓗᐊᓕᖅᐳᑦ.
ᐃᓚᖏᑦ ᐊᖑᓇᓱᒃᑎᐅᔪᑦ ᓄᓇᕗᒻᒥ ᐊᑐᖅᓯᒪᕗᑦ ᓱᓇᒐᕐᒥ ᖃᓂᒋᔮᒎᖅᑐᒥ ᐊᓯᐊᓂ ᐊᖑᓇᓱᒃᑎᐅᔪᒥ ᖁᑭᕆᐊᓚᐅᖅᑎᓪᓗᒍ, ᐅᔾᔨᕆᓇᓂ ᐃᓄᒃᑕᖃᕐᓂᖓᓂ ᑕᐅᕙᓂ ᐅᖓᑎᑦᑎᐊᖓᓂ. ᑲᑉᐱᐊᓇᖅᑐᒻᒪᕆᐅᓪᓗᓂ ᐊᑐᕐᓂᐅᕗᖅ ᐃᒻᒥᓂᑐᐊᖅ. ᑕᐅᑐᙳᐊᕆᑦ ᐃᓂᖓᓃᓪᓗᑎᑦ ᐸᓖᓯᐅᔪᒥ ᐱᔮᕆᔭᐅᓪᓗᑎᒃ ᑐᕌᖅᑎᑕᐅᓂᖏᓐᓂ ᐃᓄᖕᒧᑦ ᑐᕌᖅᑎᑦᑎᔪᒥ ᖁᑭᐊᒻᒥ. ᑕᒪᓐᓇ ᐃᓱᒪᒋᔪᓐᓃᑐᐃᓐᓇᒐᒃᓴᐅᙱᓚᖅ, ᐊᖏᕐᕋᐅᓗᓂ ᐊᒻᒪᓗ ᓯᓂᑦᑎᐊᓕᕐᓗᓂ, ᖃᐅᔨᒪᓪᓗᓂ ᐃᓅᓯᖓ ᐃᓱᓕᑐᐃᓐᓇᕆᐊᖃᕐᓂᖓᓂ ᑕᐃᑲᓂ ᐅᓪᓘᔪᒥ.
ᑎᓴᒪᑦ ᑲᓇᑕᒥ ᐸᓖᓯᒃᑯᑦ ᑭᐅᔭᐅᓚᐅᖅᐳᑦ ᐱᔪᒪᙱᓐᓂᐅᔪᒥ ᐊᒻᒪ ᑲᙳᓵᕆᔭᐅᓪᓗᑎᒃ ᐅᖃᐅᔾᔨᖕᒪᑕ ᐊᖓᔪᖅᑲᒥᓂᑦ ᐱᔭᕆᐊᖃᕐᓂᖏᓐᓂ ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᑲᔪᖅᓱᐃᓂᐅᔪᒥ. ᐅᖃᓚᐅᖅᐳᑦ ᑐᓴᓚᐅᕐᓂᖏᓐᓂ ᑭᐅᓂᐅᔪᓂ ᓲᕐᓗ "ᐃᒃᐱᒋᙱᓪᓗᒍ" ᐊᒻᒪᓗ "ᐱᓕᕆᓗᑎᒃ" ᐊᑲᐅᙱᓕᐅᕈᑎᒋᔭᖏᓐᓂ. ᓱᓕᒍᓂ, ᑕᑯᒃᓴᐅᑎᑦᑎᕗᖅ ᓈᒻᒪᙱᑦᑐᒥ ᑭᒡᓕᐅᔪᒥ ᑐᑭᓯᐅᒪᓂᐅᔪᒥ ᐊᓯᖏᓐᓂ ᐃᒃᐱᒍᓱᖕᓂᐅᔪᓄᑦ ᓇᓕᐊᑐᐃᓐᓇᒥ ᐃᖅᑲᓇᐃᔭᕐᕕᐅᔪᒥᑦ.
ᐸᓖᓰᑦ ᓵᙵᒐᔪᓲᖑᒋᕗᑦ ᐱᑦᑎᐊᖅᑕᐅᙱᓐᓂᐅᔪᒥ ᑕᒪᐃᑎᒍᑦ ᐃᓄᖕᓂ, ᐅᐸᒃᑕᐅᓯᒪᑎᓪᓗᒋᑦ ᐊᒻᒪᓗ ᐅᕘᓇ ᐃᓅᖃᑎᒌᒃᑎᒍᑦ ᓯᐊᒻᒪᖅᑎᑦᑎᓂᐅᔪᓄᑦ. ᖃᔅᓰᖅᓱᖅᖢᑕ ᑐᓴᓲᖑᕗᒍᑦ "ᑯᑰᓰᑦ" ᐊᒻᒪᓗ "f*** ᐸᓖᓯᒃᑯᑦ?" ᐃᓛᓐᓂᒃᑯᑦ ᑎᕝᕗᐊᕐᕕᐅᕙᒃᐳᑦ, ᐃᓛᓐᓂᒃᑯᑦ ᑑᖅᑕᐅᓚᐅᖅᐸᒃᖢᑎᒃ.
ᐄ, ᐱᐅᙱᑦᑐᓂ ᐸᓖᓯᑕᖃᖅᐳᖅᑕᐅᖅ. ᑕᒪᓐᓇ ᑕᑯᒃᓴᐅᑎᑕᐅᓯᒪᕗᖅ, ᐊᒻᒪᓗ ᓱᓕ ᐊᓯᖏᓐᓂ ᐱᓕᕆᓂᕐᓘᑎᓂᑦ ᖀᒥᓇᖅᑐᓂ ᐱᓕᕆᔪᕕᓂᐅᑎᓪᓗᒋᑦ ᖃᓄᐃᓕᐅᖅᑕᐅᓯᒪᙱᖦᖢᑎᒃ.
ᑭᓯᐊᓂ ᑕᐃᒃᑯᐊ ᑐᕌᖓᓂᖃᑦᑎᐊᕋᓱᐊᖅᑐᓂ ᐊᒻᒪᓗ ᖃᓄᐃᙱᑦᑎᐊᕐᓂᖏᓐᓂ ᐅᓗᕆᐊᓇᖅᑐᒧᐊᖅᑎᑦᑎᔪᒪᔪᓂ ᓄᓇᕗᒻᒥᐅᓄᑦ ᓱᓕ ᑕᐃᒪᓐᓇᑎᑐᑦ ᐱᓕᕆᐊᖑᕙᒃᑭᕗᑦ.
ᑕᒪᓐᓇ ᐅᑎᖅᑎᑦᑎᕗᖅ ᐱᔭᕆᐊᖃᕐᓂᐅᔪᒥ ᑎᒥᒧᑦ ᐊᑕᔪᓂ ᐊᔾᔨᓕᐅᕈᑕᐅᔪᓂ. ᑲᓇᑕᒥ ᒪᓕᒐᓕᐊᕆᔭᐅᔪᓂᒃ ᖃᐅᔨᓴᖅᑎ ᑕᓂᔅ ᐹᑐᓴᓐ ᑲᒪᒋᔭᖃᓚᐅᖅᐳᖅ ᑲᑎᒪᓂᐅᔪᒥ ᐅᖃᓪᓚᖕᓂᖃᕐᓂᕐᒧᑦ ᖃᔅᓯᒐᓚᖕᓄᑦ ᐃᓚᐅᔪᓄᑦ ᔫᓂᒥ ᖃᐅᔨᓇᓱᐊᕐᓂᕐᒧᑦ ᐊᒡᕕᐊᕈᑕᐅᔪᓂ ᓄᖅᑲᖅᑎᑦᑎᓯᒪᔪᓂ ᓄᑖᙳᖅᐸᓪᓕᐅᓂᐅᔪᓄᑦ ᐱᒋᐊᖅᑎᑕᐅᓂᖏᓐᓂ ᓄᓇᕗᒻᒥ. ᐅᑭᐅᖅᑕᖅᑐᒥ ᐱᓕᕆᓂᕐᒧᑦ ᒥᓂᔅᑕᖓ ᑖᓐ ᕚᓐᑎᐅᓪ ᓇᓗᓇᐃᖅᓯᓚᐅᖅᐳᖅ ᓄᓇᕗᒻᒥ ᑐᓴᒐᒃᓴᓕᕆᔨᒃᑯᓐᓄᑦ ᐱᓇᓱᐊᕈᓯᐅᓚᐅᖅᑐᒥ ᐊᖏᖅᓯᒪᓂᖃᕐᓂᖓᓂ ᑕᑯᓂᕐᒥ ᑎᒥᒧᑦ ᐊᑕᔪᓂ ᐊᔾᔨᓕᐅᕈᑎᓂ ᐊᑐᓕᖅᑎᑕᐅᓂᖏᓐᓂ ᓄᓇᕗᒻᒥ.
ᑎᒍᒥᐊᖅᑎᑦᑎᓪᓚᕆᒃᐳᒍᑦ ᑲᑎᒪᔨᕐᔪᐊᖑᔪᓂ ᐊᔭᐅᕆᓂᕐᒥ ᐊᖏᕐᓂᕐᒧᑦ ᑖᔅᓱᒧᖓ. ᑎᒥᒧᑦ ᐊᑕᔪᓄᑦ ᐊᔾᔨᓕᐅᕈᑎᑦ ᖃᓱᑎᑦᑎᔾᔮᙱᓚᖅ ᑕᒪᒃᑭᓂ ᓱᑲᖓᓂᐅᔪᓄᑦ ᐊᒻᒪᓗ ᐅᒃᐱᕆᔭᖃᙱᓐᓂᐅᔪᓂ ᓄᓇᕗᒻᒥᐅᓂ ᐊᒻᒪ ᐸᓖᓯᒃᑯᓐᓂ, ᑭᓯᐊᓂ ᐅᕙᑦᑎᓐᓂ ᑕᑯᒃᓴᐅᑎᑦᑎᓇᔭᖅᐳᖅ ᖃᓄᐃᓕᐅᓪᓚᕆᓚᐅᕐᓂᖓᓂ ᒪᕐᕉᖕᓂ ᐃᓂᐅᔪᓂ ᐅᓂᒃᑳᕆᑎᓪᓗᒋᑦ ᐊᔾᔨᒌᙱᕕᒡᔪᐊᖅᑐᓂ ᐅᓂᒃᑳᕐᓂᐅᔪᓄᑦ.
ᒫᓐᓇᐅᔪᒥ, ᑕᑯᒃᓴᐅᑎᑦᑎᓇᓱᐊᓚᐅᖅᑕ ᑭᒃᑯᓕᒫᓄᑦ. ᖃᐅᔨᒪᒐᔪᙱᓚᒍᑦ ᖃᓄᖅ ᐊᔪᕐᓇᕐᔪᐊᕐᓂᖓᓂ ᖃᓄᐃᓐᓂᐅᔪᒥ ᑕᐃᓐᓇ ᐃᓅᔪᖅ ᐊᑐᕐᓂᖓᓂ, ᐸᓖᓯᓯᐅᒻᒥ ᐊᑐᕈᓂ ᐋᒃᑲᓘᓐᓃᑦ.