ᐊᑲᐅᙱᓕᐅᕈᑎ: ᒪᓕᒃᓴᕐᓂᖅ ᑮᓇᐅᔭᓂ
ᐅᖃᖅᐳᒍᑦ: ᐃᑲᔪᖅᓱᐃᓗᓂ ᐃᓄᖕᓂ
ᒪᓕᒐᓕᐅᖅᑎᒃᑯᑦ ᑲᑎᒪᕝᕕᖓ ᐊᒥᓱᓂᒃ ᐅᖃᓪᓚᒍᑎᒃᓴᖃᖅᑎᑦᑎᕗᖅ ᐅᕙᑦᑎᓐᓂ ᑕᒪᑐᒪᓂ ᐱᓇᓱᐊᕈᓯᐅᔪᒥ.
ᓯᕗᓪᓕᖅᐹᒥ, ᐊᔭᐅᕆᔭᕆᐊᖃᖅᐳᒍᑦ ᐊᓯᔾᔨᕐᓂᐅᔪᓂ ᐱᑕᖃᖅᐸᒌᖅᑐᓂ ᓂᖃᐃᓱᕐᓂᕐᒧᑦ ᒪᓕᒋᐊᓕᖏᓐᓂ, ᓴᖅᑭᑎᑕᐅᓯᒪᖃᑦᑕᖅᑐᖅ ᐊᒥᓱᐃᖅᓱᖅᑐᒥ, ᐃᓄᒋᐊᖑᔪᓄᑦ ᐊᔪᖅᓴᙱᑦᑐᓄᑦ ᐃᓄᖕᓄᑦ – ᐃᓚᖏᑦ ᐅᔾᔨᕈᓱᒃᓯᒪᙱᑦᑐᓂ ᖃᓄᖅ ᐆᒪᓇᓱᐊᕈᓐᓇᕐᓂᖏᓐᓂ ᐅᓄᙱᓐᓂᖅᓴᐅᔪᒥ $30,000−ᒥ ᐊᕐᕌᒍᑕᒫᒥ.
ᑕᖃᓇᕐᔪᐊᖅᐳᖅ ᐅᖃᐅᔾᔭᐅᓪᓗᓂ ᐱᓕᕆᙱᓗᐊᕐᓂᕐᓂ ᓇᓂᓯᓂᕐᒧᑦ ᐃᖅᑲᓇᐃᔮᒃᓴᒥ ᓄᓇᓕᐅᔪᒥ ᐃᖅᑲᓇᐃᔮᒃᓴᖃᙱᑦᑐᓂ, ᐅᕝᕙᓘᓐᓃᑦ ᐱᓕᕆᙱᓗᐊᕐᓂᕐᓂ “ᐱᓕᕆᑦᑎᐊᕐᓂᕐᒥ ᓂᕈᐊᖅᓯᓂᐅᔪᒥ,” ᓇᓗᓇᐃᒃᑯᓯᖅᑕᐅᓯᒪᓂᖓᑎᒍᑦ ᐃᓄᓕᕆᔨᒃᑯᓐᓂ.
ᑲᖏᖅᖠᓂᕐᒥ ᐅᐊᖕᓇᒥ-ᐃᒡᓗᓕᒑᕐᔪᖕᒧᑦ ᒪᓕᒐᓕᐅᖅᑎ ᑳᑎ ᑕᐅᑐᙱ ᐅᖃᓚᐅᖅᐳᖅ, “ᒐᕙᒪᐅᓪᓗᑕ ᐱᓕᕆᐊᖃᓪᓗᐊᙱᓚᒍᑦ ᓄᓇᖃᖅᑎᐅᔪᓂ ᑲᒪᑦᑎᐊᕈᓐᓇᙱᑎᑐᑦ, ᖃᐅᔨᒪᒐᑦᑕ ᑕᒪᕐᒥᒐᓚᑦ ᐃᓄᐃᑦ ᐅᓪᓗᒥ, ᒫᓐᓇᐅᔪᒥ, ᓵᙵᓂᖃᕐᓂᖏᓐᓂ ᐊᒃᓱᕈᕐᓂᐅᔪᓂ ᐋᖅᑭᐅᒪᑎᑦᑎᓂᓱᐊᕐᓂᖏᓐᓂ ᑐᙵᕕᖃᑦᑎᐊᕐᓂᐅᔪᒥ.”
ᐃᓄᓕᕆᔨᒃᑯᑦ ᒥᓂᔅᑕᖓ ᐃᓕᓴᐱ ᓯᐅᑎᐊᐱᒃ ᑕᒻᒪᙱᒃᑲᓗᐊᖅᑎᓪᓗᒍ ᐅᖃᕐᓂᖓᓂ ᐊᔪᕐᓇᕐᓂᖓᓂ ᐱᓕᕆᕝᕕᐅᔪᒥ ᐊᓯᔾᔨᕐᓂᖃᕆᐊᒃᓴᖅ 6−ᖑᔪᓂ ᒥᓂᔅᑕᖃᕐᓂᖏᓐᓂ ᐊᕐᕌᒍᓄᑦ 8−ᓂ ᐱᓕᕆᓪᓗᑎᒃ ᒥᓂᔅᑕᓄᑦ ᐱᓕᕆᔭᕆᐊᖃᖅᑕᖏᓐᓂ, ᐱᔾᔪᑎᓪᓗᐊᖑᙱᓚᖅ.
ᐃᓄᐃᑦ ᐃᑲᔪᖅᑕᐅᔭᕆᐊᖃᖅᐳᑦ. ᑭᐅᓗᖕᓂᒃᑯᑦ ᐃᓂᐅᙱᑦᑐᒃᓴᐅᕗᖅ ᒐᕙᒪᒃᑯᓐᓂ ᓴᖅᑭᑎᑦᑎᓂᖏᓐᓂ ᐃᖅᑲᓇᐃᔮᒃᓴᓂ ᐃᓄᑭᑦᑐᓂ ᓄᓇᓕᖕᓂ, ᑭᓯᐊᓂ ᓄᓇᕗᒻᒥ ᒐᕙᒪᒃᑯᑦ ᐱᓕᕆᐊᒃᓴᕆᕙᖓ ᓇᓗᓇᐃᖅᓯᓂᕐᒧᑦ ᐃᓄᐃᑦ ᑲᑕᑐᐃᓐᓇᕐᓂᖏᓐᓂ ᖁᐱᓯᒪᓂᐅᔪᓂ ᐱᓕᕆᔾᔪᓯᐅᔪᒥ ᐃᑲᔪᖅᓱᐃᔭᕆᐊᖃᓚᐅᖅᑐᒥ.
ᐊᑕᐅᓯᐅᔪᒥ ᓇᓗᓇᓛᖑᔪᒥ ᐃᓚᖓᓐᓂ ᐱᓕᕆᔾᔪᓯᐅᔪᒥ ᐊᑭᒃᖠᒋᐊᖅᑎᑦᑎᓂᐅᔪᒥ ᐃᓄᖕᓂ ᐊᒻᒪᓗ ᑮᓇᐅᔭᓂ ᑐᓂᕐᕈᓯᐊᖑᔪᓂ ᐃᓚᓕᐅᔾᔭᐅᓂᖓᓂ ᑮᓇᐅᔭᓕᐊᕆᔭᖏᓐᓂ. ᖃᓄᖅ ᐃᑲᔪᕐᓂᖃᖅᐸ ᑮᓇᐅᔭᖅᑖᙱᓐᓂᖅᓴᐅᓂᕐᒥ ᑕᖅᑭᐅᓂᐊᖅᑐᒥ ᐃᓚᒥᒃ ᑐᙵᓇᓚᐅᖅᑐᒥ ᐊᒻᒪ ᐃᓕᖕᓄᑦ ᑐᓂᓯᔪᓐᓇᕐᓂᖓᓂ ᖄᒃᑲᓐᓂᐊᒍᑦ ᐃᑲᔪᖅᓱᐃᓂᐅᔪᒥ ᐱᓕᕆᕝᕕᒃ ᑐᓂᓯᔾᔮᙱᑕᖓᓂ?
ᐊᓱᐃᓛᒃ ᐅᕗᙵᖅᐳᒍᑦ ᓄᑖᖑᔪᒥ ᒪᓕᒐᖅᑎᒍᑦ ᐊᖅᓵᖅᑕᐅᓂᕐᒧᑦ ᑎᑎᕋᕐᕕᖓᓂ, ᕿᓂᖅᑐᓂ ᐅᑎᖅᑎᕆᓂᕐᒥ “ᐱᔭᐅᓂᑯᓂ ᐱᕋᔭᖕᓂᒃᑯᑦ.” ᑐᑭᓯᓇᓗᐊᙱᓚᖅ ᖃᓄᖅ ᐅᖃᕋᓱᖕᓂᖓᓂ ᒪᓕᒐᓕᕆᔨᒃᑯᓐᓂ ᒥᓂᔅᑕᖓ ᔪᐊᔾ ᕼᐃᒃᔅ ᐅᖃᓪᓚᐅᓯᖃᖅᑎᓪᓗᒍ ᐊᖅᓵᖅᓯᓂᕐᒥ ᐊᒻᒪ ᐃᒋᑦᑎᓂᐅᔪᒥ ᐱᕋᔭᖕᓂᒃᑯᑦ ᐱᔭᐅᔪᓂ ᐱᑯᑎᓂᑦ. ᓄᓇᕗᒻᒥ ᒐᕙᒪᒃᑯᑦ ᓴᖑᓂᐊᖅᐸᑦ ᐊᒻᒪ ᓂᐅᕕᐊᒃᓴᖃᕐᓗᑎᒃ ᐅᑯᓂᖓ ᐱᖁᑕᐅᔪᓂ ᒪᓕᒐᓂ−ᒪᓕᑦᑎᐊᖅᑐᓄᑦ ᓄᓇᖃᖅᑎᐅᔪᓄᑦ ᐊᒻᒪᓗ ᖃᑭᓂᖃᕐᓗᑎᒃ ᐊᑭᓖᓂᕐᒧᑦ ᐆᒧᖓ ᓄᑖᖑᔪᒧᑦ ᑎᑎᕋᕐᕕᖕᒧᑦ?
ᐃᖃᓗᖕᓂ-ᓂᐊᖁᙴᒥ ᒪᓕᒐᓕᐅᖅᑎ ᐹᑦ ᐊᕐᓇᒃᑲᖅ ᐊᔭᐅᕆᓚᐅᖅᐳᖅ ᒐᕙᒪᒃᑯᓐᓂ ᓇᓗᓇᐃᖅᓯᓂᕐᒥ ᑭᓇᑐᐃᓐᓇᖅ ᐸᓯᔭᒃᓴᐅᔪᒥ ᖃᐅᔨᒪᓂᖏᓐᓂ ᑭᓱᓂᒃ ᐱᔪᓐᓇᕐᓂᕆᔭᖏᓐᓂ. ᐊᔪᕐᓇᖅᐳᖅ ᐅᖃᕐᓂᕐᒥ ᒫᓐᓇᐅᔪᒥ ᑭᓱᑦ ᐱᔪᓐᓇᕐᓂᕆᔭᖏᓐᓂᐅᖕᒪᖔᑕ.
ᐊᕙᓗᖓᓐᓂ ᓂᖃᐃᓱᕐᓂᕐᒧᑦ ᐊᒻᒪ ᓇᖕᒥᓂᕆᔭᐅᔪᓂ ᐊᖅᓵᖅᓯᓂᐅᔪᒥ ᐃᓚᒌᙱᑦᑑᔮᕋᓗᐊᖅᑎᓪᓗᒍ ᓯᕗᓪᓕᕐᒥ ᑕᑯᓪᓗᒍ, ᑭᓯᐊᓂ ᐅᕗᙵᓲᖑᕗᖅ ᐃᓄᖕᓂ ᑭᓱᖃᙱᓗᐊᕐᓂᖏᓐᓂ ᐊᒻᒪᓗ ᑮᓇᐅᔭᓕᐅᕋᓱᐊᕐᓂᖏᓐᓂ ᖃᓄᑐᐃᓐᓇᑦᑎᐊᖅ ᐱᔪᓐᓇᕐᓂᕆᔭᖏᓐᓂ. ᐃᒥᐊᓗᖕᒥ ᓂᐅᕕᐊᒃᓴᖃᕐᓂᖅ ᐱᕋᔭᖕᓂᒃᑯᑦ ᓴᖅᑭᑎᑦᑎᓲᖑᕗᑦ ᐅᐃᒻᒪᒃᓴᒥᓂᐅᔪᒥ ᓄᓇᓕᖕᓂ ᐱᓂᕐᒥ ᐱᔪᒪᔭᖏᓐᓂ, ᐊᓯᖏᑦ ᐱᓇᓱᐊᕐᓂᖏᓐᓂ ᐱᔪᓐᓇᕐᓂᕆᔭᒥᓂᑦ ᒐᕙᒪᒃᑯᓐᓂ ᐱᓕᕆᔨᐅᔪᓂ ᐸᓯᒃᓯᔪᒥ ᑕᒪᒃᑭᓕᒫᓂ ᓂᕈᐊᖅᑕᒥᓂᑦ ᐅᕗᖓ ᐃᑲᔪᖅᑕᐅᓪᓗᐊᕐᒪᖔᑕ.
ᖃᐅᔨᓴᕐᔪᐊᙱᖔᕐᓗᑎᒃ ᑭᓱᓂᒃ ᐃᓄᐃᑦ ᐱᖃᕐᓂᖏᓐᓂ ᐊᒻᒪᓗ ᖃᓄᖅ ᐱᓚᐅᕐᓂᖏᓐᓂ, ᐊᐅᓚᑕᐅᓂᖅᓴᐅᔪᒥ ᑐᕌᒐᖃᕆᐊᖃᓪᓗᐊᖅᐳᑦ ᓇᓗᓇᐃᖅᓯᓂᕐᒥ ᓄᓇᕗᒻᒥᐅᓕᒫᑦ ᐱᖃᕐᓂᖏᓐᓂ ᐱᔭᕆᐊᓕᖕᒥᓂ.