ᐊᑲᐅᙱᓕᐅᕈᑎ: ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖑᔪᓄᑦ ᐅᑯᐊᓗ ᐹᕙᓐᓛᓐᑯᑦ
ᐅᖃᖅᐳᒍᑦ: ᓈᒻᒪᒃᑐᒥ ᐱᔪᒪᓂᖃᕐᓂᖃᖅᐸ?

ᑭᓇᑐᐃᓐᓇᖅ ᒪᓕᒃᑯᓂ ᐃᖏᕐᕋᐃᓐᓇᖅᑐᒥ ᖃᓄᐃᓕᐅᕐᓂᐅᔪᒥ ᐅᑯᓇᓂ ᐹᕙᓐᓛᓐᑯᑦ ᓄᓘᔭᕐᓂ ᓴᕕᕋᔭᒃᓴᒥ ᐅᔭᕋᖕᓂᐊᕐᕕᖕᒥ ᐊᒻᒪᓗ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖑᔪᓄᑦ (QIA) ᖁᖏᓯᖓᓐᓂ ᐋᓐᓂᐊᖅᑐᒃᓴᐅᓕᖅᐳᑦ ᐅᑎᖅᑕᕋᐅᔭᐃᓐᓇᓗᐊᒧᑦ, ᐃᓄᐃᑦ ᑲᑐᔾᔨᖃᑎᒌᖑᔪᑦ ᓴᖑᑎᑦᑎᖕᒪᑕ ᐃᓂᒋᔭᖓᓂ ᐃᑲᔪᖅᓱᐃᓂᕐᒧᑦ ᐅᔭᕋᖕᓂᐊᕐᕕᐅᑉ ᐊᐅᓚᑕᐅᓂᖏᓐᓂ ᖃᔅᓰᖅᓱᒐᓚᓕᖅᖢᑎᒃ ᖄᖏᖅᓯᒪᔪᓂ ᖃᔅᓯᐊᕐᔪᖕᓂ ᐱᓇᓱᐊᕈᓯᐅᔪᓂ.

2018−ᒥ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖑᔪᑦ ᐃᑲᔪᖅᓱᐃᓚᐅᖅᐳᑦ – ᐊᒻᒪ ᐊᔭᐅᕆᓇᓱᐊᕐᓂᕐᒥ ᒐᕙᒪᑐᖃᒃᑯᓐᓂ ᑭᒡᒐᖅᑐᐃᓪᓗᑎᒃ ᐹᕙᓐᓛᓐᑯᓐᓂ – ᓴᖅᑭᑎᑦᑎᓂᐅᔪᒥ ᐊᖏᒡᓕᒋᐊᖅᓯᓂᐅᔪᒥ ᓴᕕᕋᔭᒃᓴᒥ 6 ᒥᓕᐊᓐ ᑕᓐᓄᑦ ᐊᕐᕌᒍᑕᒫᒥ (Mt/a) ᐅᕙᙵᑦ 4.2 ᒥᓕᐊᓐ ᑕᓐᓂ ᐊᕐᕌᒍᑕᒫᒥ, ᐃᓱᒪᒋᓇᒍ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦᑕ ᐊᑭᕋᖅᑐᖁᓇᔭᖅᑕᖓᓂ. ᐃᑲᔪᖅᓯᖅᑕᐅᓪᓗᑎᒃ ᕼᐋᒻᓚᒃᑯᓐᓂ ᒥᑦᑎᒪᑕᓕᖕᒥ ᐊᒻᒪ ᒥᑦᑎᒪᑕᓕᖕᒥ ᐊᖑᓇᓱᒃᑐᓕᕆᔨᒃᑯᑦ ᒥᑭᒋᐊᕐᓂᐊᖅᑎᒃᑯᓪᓗ ᑲᑐᔾᔨᖃᑎᒌᖑᔪᓂ, ᒐᕙᒪᑐᖃᒃᑯᓐᓂ ᐊᒋᖅᑕᐅᓂᖓ ᐊᖏᒡᓕᒋᐊᖅᑕᐅᓂᕐᒧᑦ ᑎᑭᓚᐅᖅᐳᖅ ᓯᑎᐱᕆ 30−ᒥ ᑕᐃᑲᓂ ᐊᕐᕌᒎᔪᒥ.

ᐅᔭᕋᖕᓂᐊᕐᕕᒃ ᑐᒃᓯᕋᖅᑎᓪᓗᒍ ᐊᖏᒡᓕᒋᐊᕐᓂᐅᔪᒥ 6 ᒥᓕᐊᓐ ᑕᓐᓄᑦ ᐊᕐᕌᒍᑕᒫᒥ, ᓱᓕᓂᕋᐃᓚᐅᖅᐳᑦ ᐃᖅᑲᓇᐃᔭᖅᑏᑦ ᐊᑑᑎᖃᑦᑎᐊᕐᓂᖓᓂ ᐱᔪᓐᓇᖅᑎᑦᑎᓚᐅᖅᐳᖅ ᐊᖏᓂᖅᓴᒥ ᓴᖅᑭᑎᑦᑎᓂᕐᒧᑦ ᑐᓂᔭᐅᓯᒪᓂᖓᓂ ᓴᖅᑭᑎᑦᑎᓂᐅᔪᒥ ᑕᐃᔅᓱᒪᓂ, ᑭᓯᐊᓂ ᐃᖅᑲᓇᐃᔭᖅᑎᓂ ᐃᖅᑲᓇᐃᔭᖅᑎᑦᑎᙱᓚᐅᑲᒋᐊᖃᓚᐅᖅᐳᑦ ᖁᕝᕙᕆᐊᖅᑐᒥ ᐊᖏᓂᐅᔪᒥ ᐱᔪᓐᓇᖅᑎᑕᐅᙱᒃᑯᑎᒃ. ᓄᓇᕐᔪᐊᒥ ᐆᒪᔪᓄᑦ ᑮᓇᐅᔭᖃᖅᑎᑕᐅᓂᖅ ᐃᒪᐃᖁᔨᓚᐅᖅᐳᑦ “ᐹᕙᓐᓛᓐᑯᑦ ᐱᔭᕆᐊᖃᖅᑎᑦᑎᓚᐅᖅᐳᑦ ᐅᓗᕆᐊᓇᕐᓂᐅᔪᒥ ᓱᒃᑲᐃᒡᓕᒋᐊᖅᑎᑕᐅᓂᐅᔪᒥ ᑐᙵᕕᖃᖅᑐᒥ ᓇᖕᒥᓂᖅ ᒪᓕᙱᓐᓂᖓᓐᓂ (ᓲᕐᓗ ᓴᖅᑭᑎᑦᑎᓂᕐᒧᑦ ᐊᒻᒪ ᐅᓯᑲᑦᑕᕐᓂᐅᔪᒥ ᐅᖓᑖᓄᑦ ᐊᒻᒪ ᖁᓛᓂ ᐱᔪᓐᓇᖅᑎᑕᐅᔪᓄᑦ ᐊᖏᓂᐅᔪᓄᑦ) ᐊᒻᒪᓗ ᕿᓂᓕᖅᐳᑦ ᐅᑎᖅᑕᐅᔪᒥ ᑭᖑᓂᒐᒍᑦ ᐊᖏᖅᑕᐅᓂᐅᔪᒥ ᐃᓕᓯᙱᖔᖅᖢᑎᒃ ᐃᓚᒋᐊᕈᑕᐅᔪᒥ ᓯᕗᓂᐊᓂ ᐋᖅᑭᒋᐊᖅᓯᓂᕐᒥ ᐊᐅᓚᑕᐅᓂᖏᓐᓂ.”

ᐹᕙᓐᓛᓐᑯᑦ ᒫᓐᓇ ᒪᕐᕈᐃᓪᓗᐊᖅᑐᒥ ᑖᔅᓱᒥᖓ ᓴᖅᑭᑎᑦᑎᓂᐅᔪᒥ 12 ᒥᓕᐊᓐ ᑕᓐᓄᑦ ᐊᕐᕌᒍᑕᒫᒥ, ᑭᓯᐊᓂ ᐅᖃᖅᖢᑎᒃ ᐅᓯᑲᑦᑕᕐᓂᕐᒥ ᑕᐃᒪᓐᓇᑎᒋ ᓴᕕᕋᔭᒃᓴᒥ ᐅᕘᓇ ᐅᓯᑲᑦᑕᕐᓂᕐᒧᑦ ᐊᖅᑯᑕᐅᔪᒃᑯᑦ ᑮᓇᐅᔭᓕᕆᓂᕐᒧᑦ ᑐᑭᖃᖅᑎᑦᑎᓗᐊᙱᓚᖅ, ᕿᓂᖔᖅᐳᑦ ᓴᓇᓂᕐᒥ 110-ᑭᓛᒥᑐᒥ ᓄᓇᓯᐅᑎᑯᑖᕐᒧᑦ ᐊᖅᑯᑎᒃᓴᖓᓂ ᐅᔭᕋᖕᓂᐊᕐᕕᖕᒥ ᑐᓚᒃᑕᕐᕕᖓᓄᑦ ᕿᙳᐊᓂ.

ᑲᒻᐸᓂ ᐅᖃᖅᐳᖅ $1-ᐱᓕᐊᓐᑐᖅᑐᒥ ᓄᓇᓯᐅᑎᑯᑖᕐᒧᑦ ᐊᖅᑯᑎᒃᓴᖓ ᐃᑲᔪᕐᓂᐊᖅᐳᖅ ᒥᒃᖠᒋᐊᖅᑎᑦᑎᓂᕐᒥ ᐊᑭᓕᒐᒃᓴᓂ, ᑭᓯᐊᓂ ᐃᓱᒪᓂᐅᔪᖅ ᐊᑭᕋᖅᑐᖅᑕᐅᕐᔪᐊᖅᓯᒪᕗᖅ ᑕᐃᒪᙵᓂ ᓯᕗᓪᓕᖅᐹᒥ ᓴᖅᑭᑕᐅᓚᐅᕐᓂᖓᓂ 2017−ᒥ.

ᑎᑎᕋᖅᓯᒪᔪᓂ ᑐᓂᔭᐅᓂᐅᔪᓂ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ (NIRB) ᔭᓄᐊᕆ 2018−ᒥ, ᒥᑦᑎᒪᑕᓕᖕᒥᐅᑕᑦ, ᓄᓘᔭᕐᓂ ᐱᓕᕆᓂᐅᔪᒥ ᒪᕐᕈᖓᓂ ᕿᒥᕐᕈᔭᐅᓂᖓᓂ ᑲᑎᒪᔨᕋᓛᖏᑦ ᐅᖃᓚᐅᖅᐳᑦ: “ᐃᓱᒫᓗᒃᐳᒍᑦ ᓄᓇᓯᐅᑎᑯᑖᕐᒧᑦ ᐊᖅᑯᑎᒃᓴᖓ ᑭᒡᒐᖅᑐᐃᓇᔭᕐᓂᖓᓂ ᐊᖏᓂᖅᓴᐅᔪᒥ ᐊᒡᕕᐊᕈᑕᐅᔪᒥ ᐃᓄᖕᓄᑦ ᐊᐅᓪᓛᕐᓂᖓᓄᑦ ᒫᓐᓇᐅᔪᒥ ᐊᑐᖅᑕᐅᕙᒃᑐᒥ ᐅᓯᑲᑦᑕᕐᓂᕐᒧᑦ ᐊᖅᑯᑕᐅᔪᒥ.”

ᑲᑎᒪᔨᕋᓛᑦ ᐅᓂᒃᑳᕆᓚᐅᕆᕗᑦ ᖃᓄᖅ ᑐᒃᑐᐃᑦ ᐊᒻᒪ ᐊᓯᖏᓐᓂ ᐆᒪᔪᐃᑦ ᐊᒃᑐᖅᑕᐅᕐᔪᐊᕈᓐᓇᕐᓂᖏᓐᓂ ᓄᓇᐅᑉ ᖁᓛᓂ ᓄᓇᓯᐅᑎᑯᑖᕐᒧᑦ ᐊᖅᑯᑎᒃᓴᖓᓄᑦ. ᐅᓂᒃᑳᕆᓂᐅᔪᑦ ᐱᑕᖃᑐᐃᓐᓇᕆᐊᓕᖕᓂ ᐊᒃᑐᐃᓂᐅᔪᓂ ᓱᓕ ᐱᑕᖃᑦᑎᐊᙱᓚᑦ ᐊᒻᒪᓗ ᐱᑕᖃᙱᓗᐊᕐᓂᖓᓂ ᐅᑯᓇᓂ ᐱᓪᓚᕆᐅᔪᓂ ᐅᓂᒃᑳᕆᓂᐅᔪᓂ ᓴᖅᑭᑕᐅᓯᒪᕗᑦ ᑲᑎᒪᓂᕐᓂ ᑲᑎᒪᓂᕐᓄᑦ ᖄᖏᖅᓯᒪᓕᖅᑐᓂ ᖃᔅᓯᐊᕐᔪᖕᓂ ᐊᕐᕌᒎᔪᓄᑦ.

ᑐᓄᓂᕐᒧᑦ ᒪᓕᒐᓕᐅᖅᑎ ᑕᐃᕕᑦ ᖃᒪᓂᖅ ᐅᖃᓚᐅᖅᐳᖅ ᒪᓕᒐᓕᐅᕐᕕᖕᒥ ᕕᕈᐊᕆ ᓄᙳᐊᓂ “ᓂᕈᐊᖅᑎᖏᑦ ᐃᓱᒪᕗᑦ ᖃᓄᐃᒻᒪᑦ ᓄᓇᕗᒻᒥ ᒐᕙᒪᒃᑯᑦ ᐱᔪᓐᓇᖅᑑᔮᕐᓂᖏᓐᓂ ᐊᒻᒪᓗ ᐃᓕᓯᔪᓐᓇᖅᖢᑎᒃ ᑭᒡᓕᖃᖅᑎᑕᐅᓂᐅᔪᓂ ᑐᒃᑐᓕᐊᕐᓂᕐᒥ ᐅᕙᓂ ᐊᕕᒃᑐᖅᓯᒪᓂᐅᔪᒥ ᓴᐳᔾᔨᓯᒪᓂᕐᒧᑦ ᐆᒪᔪᐃᑦ ᐊᔾᔨᒌᙱᓐᓂᖏᓐᓂ, ᑭᓯᐊᓂ ᐱᔪᒪᔫᔮᙱᓚᑦ ᐅᕝᕙᓘᓐᓃᑦ ᐃᓕᓯᔪᒪᙱᖦᖢᑎᒃ ᑭᒡᓕᖃᖅᑎᑕᐅᓂᐅᔪᓂ ᐅᔭᕋᖕᓂᐊᕐᓂᕐᒧᑦ ᑲᒻᐸᓂᐅᔪᓄᑦ ᓴᐳᔾᔨᓯᒪᓂᕐᒧᑦ ᓄᓇᑦᑎᓐᓂ, ᐃᒪᑦᑎᓐᓂ, ᐊᒻᒪᓗ ᐆᒪᔪᖁᑎᑦᑎᓐᓂ.”

ᓴᕕᕋᔭᒃᓴᒥ ᐳᔪᖓᓐᓂ ᐃᒪᖃᕐᕕᓂ ᓯᒥᒃᓯᓂᖏᓐᓂ, ᐊᖏᒡᓕᒋᐊᖅᑐᒥ ᐅᓯᑲᑦᑕᕐᓂᐅᔪᒥ ᐊᒃᑐᐃᓂᖓᓂ ᐊᓪᓚᙳᐊᓂ ᕿᓚᓗᒐᕐᓂ ᐊᒻᒪᓗ ᐃᖃᓗᖕᓂ ᐅᓄᕐᓂᐅᔪᓂ, ᑐᒃᑐᐃᑦ ᐅᑎᖅᑕᕐᓂᖏᓐᓂ ᐸᒡᕕᓵᕆᔭᐅᓪᓗᑎᒃ ᐊᒻᒪᓗ ᐅᓄᕐᓂᖅᓴᓂ ᐃᓱᒫᓘᑕᐅᔪᓂ ᓴᖅᑭᑕᐅᖏᓐᓇᖅᐳᑦ.

ᒐᕙᒪᒃᑯᓐᓂ ᐱᓕᕆᔨᐅᔪᓂ, ᑕᒪᒃᑭᓂ ᒐᕙᒪᑐᖃᒃᑯᓐᓂ ᐊᒻᒪᓗ ᓄᓇᕗᒻᒥ, ᐊᒻᒪᓗ ᐊᕙᑎᓕᕆᓂᕐᒧᑦ ᑲᑎᙵᓂᐅᔪᓂ ᑐᓂᓯᓯᒪᕗᑦ ᕼᐊᓐᓇᓚᖏᓐᓂ ᒪᒃᐱᖅᑐᒐᕐᓂ ᐊᐱᖅᑯᑕᐅᔪᓂ ᐊᒻᒪ ᐃᓱᒫᓘᑕᐅᔪᓂ ᑐᒃᓯᕋᖅᑕᐅᔪᒧᑦ ᐊᖏᒡᓕᒋᐊᖅᑕᐅᓂᖓᓂ ᐊᒻᒪ ᐅᓄᕐᓂᖅᓴᐅᔪᓂ 2,000−ᓂ ᑎᑎᖅᑲᖁᑕᐅᔪᓂ ᑎᑎᕋᐅᓯᐅᓯᒪᕗᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ.

ᐱᑕᖃᕐᔪᐊᖅᐳᖅ ᐅᖃᐅᓯᒃᓴᓂ ᐊᔪᕐᓇᑲᓴᑦᑎᐊᖅᐳᖅ ᐊᑕᐅᓯᑐᐊᒥ ᐃᓄᖕᒥ ᑲᑐᔾᔨᖃᑎᒌᖑᔪᒥᓪᓘᓐᓃᑦ ᕿᒥᕐᕈᐊᕆᐊᒃᓴᖅ ᑕᒪᒃᑭᓂ ᐊᑑᑎᓕᖕᓄᑦ ᐅᓂᒃᑳᕆᓯᒪᓂᐅᔪᓂ ᐅᕙᑦᑎᓐᓂ ᑐᓂᓯᔪᓐᓇᑐᐃᓐᓇᕆᐊᖃᖅᑐᒥ ᑭᐅᔾᔪᑎᓂᑦ ᐊᒥᓱᒻᒪᕆᐊᓗᖕᓄᑦ ᑐᓴᖅᑕᐅᔪᒪᓗᐊᖅᑐᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ−ᐱᔾᔪᑎᓕᖕᓂ, ᐃᓅᓰᑦ ᒪᑭᒪᐅᑏᓪᓗ ᐊᒻᒪᓗ ᐊᕙᑎᓕᕆᓂᕐᒧᑦ ᐃᓱᒫᓘᑕᐅᔪᓄᑦ.

ᐊᔪᕐᓇᖅᐳᖅ ᓇᓂᓯᓂᕐᒥ ᓈᒻᒪᒃᑐᒥ ᐱᔪᒪᓂᖃᕐᓂᖃᕐᓂᕐᒥ ᐃᒪᐃᑦᑑᔮᖅᑎᓪᓗᒍ ᐊᑐᓂ ᐃᓐᔅᒥ ᑐᓂᔭᐅᔪᒥ ᐅᔭᕋᖕᓂᐊᕐᓂᕐᒧᑦ ᑲᒻᐸᓂᐅᔪᒧᑦ, ᐊᓯᐊᓂ ᒪᐃᔪᓪᒥ ᐊᐱᕆᓇᓱᐊᓲᖑᑎᓪᓗᒋᑦ, ᑕᒪᒃᑭᐅᒪᔪᒥ ᐊᒻᒪᓗ ᓇᓕᒧᑦᑐᒥ ᐃᓱᒪᒃᓴᖅᓯᐅᕆᓂᕐᒥ ᐊᑯᓂᐅᔪᒃᑯᑦ ᐊᒃᑐᐃᓂᐅᔪᓄᑦ ᐃᓅᓯᐅᕙᒃᑐᒥ ᐆᒪᔭᕆᐊᖃᖅᑐᒥ ᐅᔭᕋᖕᓂᐊᕐᕕᐅᑉ ᐃᓅᓯ ᓄᖑᒃᑯᓂ.

Leave a comment

Your email address will not be published. Required fields are marked *