ᐊᒃᓱᕈᕋᓚᐅᖅᑎᓪᓗᒋᑦ ᐊᔾᔨᒌᙱᑦᑐᓂ ᑲᑎᙵᓂᐅᔪᓂ ᐃᓱᒫᓘᑎᐅᔪᓂ ᑐᓴᖅᑕᐅᓂᖏᓐᓂ ᐊᒻᒪᓗ ᐱᓕᕆᖃᑎᒌᒡᓗᑎᒃ, ᐊᖏᖃᑎᒌᙱᓐᓂᐅᔪᑦ ᑕᖅᑭᑉᐳᑦ ᐹᕙᓐᓛᓐᑯᑦ ᐊᖏᒡᓕᒋᐊᖅᑎᑦᑎᓇᓱᐊᕐᓂᕐᒧᑦ ᓄᓘᔭᕐᓂ ᓴᕕᕋᔭᒃᓴᒧᑦ ᐅᔭᕋᖕᓂᐊᕐᕕᖓᓄᑦ
ᐊᑲᐅᙱᓕᐅᕈᑎ: ᐹᕙᓐᓛᓐᑯᑦ ᐱᓕᕆᓂᖓ ᒪᕐᕈᖓ
ᐅᖃᖅᐳᒍᑦ: ᐋᔩᖃᑎᖃᙱᓗᐊᖅᑐᖅ
ᑭᖑᓪᓕᖅᐹᖑᔪᒧᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ (NIRB) ᑐᓵᓂᐅᔪᒥ ᐹᕙᓐᓛᓐᑯᑦ ᑐᒃᓯᕋᖅᑕᐅᔪᒥ ᐊᖏᒡᓕᒋᐊᖅᑎᑕᐅᓇᓱᐊᕐᓂᖓᓂ ᓴᖅᑭᑎᑦᑎᓂᐅᔪᒥ ᓄᓘᔭᕐᓂ ᐅᔭᕋᖕᓂᐊᕐᕕᖓᓂ ᐱᓕᕆᐊᖑᓂᐊᕐᓗᓂ ᑕᒪᑐᒪᓂ ᓇᒡᒐᔾᔭᐅᒥ, ᔭᓄᐊᕆ 25–ᒥ, ᑎᑭᐅᑎᕗᖅ ᑐᓴᐅᒪᖃᑎᒌᑦᑎᐊᕐᓂᐅᔪᒥ ᐊᒃᑐᖅᑕᐅᓯᒪᔪᓄᑦ ᓄᓇᓕᐅᔪᓄᑦ ᐱᔭᕆᐊᖃᖅᑕᖏᓐᓂ ᐅᔭᕋᖕᓂᐊᕐᕕᖕᒥ ᐱᓕᕆᔨᕐᔪᐊᖑᔪᓂ.
ᕼᐋᒻᓚᒃᑯᑦ ᒥᑦᑎᒪᑕᓕᖕᒥ ᓴᖅᑭᑎᑦᑎᓚᐅᖅᐳᑦ ᖃᓄᐃᓕᖓᖁᔭᐅᓂᐅᔪᓂᑦ ᑎᓯᐱᕆ 29–ᒥ ᑎᑎᖅᑲᒥ ᐊᑎᓕᐅᖅᑕᐅᓯᒪᔪᒥ ᒪᐃᔭᒧᑦ ᔮᓱᐊ ᐋᕆᐊᕐᒧᑦ. ᐃᓚᖃᖅᑐᒥ ᐱᔭᕆᐊᖃᕐᓂᐅᔪᓂ ᓲᕐᓗ ᐊᖏᒡᓕᒋᐊᖅᐸᓪᓕᐊᖏᓐᓇᖅᑐᒥ ᓴᖅᑭᑎᑦᑎᓂᐅᔪᒥ 6-ᒥ 12 ᒥᓕᐊᓐ ᑕᓐᓂᒧᑦ ᓴᕕᕋᔭᒃᓴᒥ ᐊᕐᕌᒍᑕᒫᒥ ᑭᒡᓕᖃᖅᑎᑦᑎᓂᕐᒧᑦ ᓱᔪᐃᓂᐅᔪᒥ ᐊᕙᑎᒧᑦ ᐊᒻᒪᓗ ᐆᒪᔪᓄᑦ, ᐊᒻᒪᓗᑦᑕᐅᖅ ᐊᖏᖅᓯᒪᑦᑎᐊᕐᓂᐅᔪᒥ ᐅᓄᖅᓯᒋᐊᖅᓯᓂᕐᒧᑦ ᐃᓄᖕᓂ ᐃᖅᑲᓇᐃᔮᖃᖅᑎᑦᑎᓂᐅᔪᒥ, ᑎᑭᐅᑎᔭᐅᓚᐅᖅᓯᒪᙱᑦᑐᒥ 25 ᐳᓴᓐᑎᒧᑦ ᐃᖅᑲᓇᐃᔮᖃᖅᑎᑦᑎᓂᕐᒧᑦ ᑐᕌᒐᒃᓴᖓᓂ ᐊᒻᒪᓗ ᑲᑕᒃᐹᓪᓕᖅᓯᒪᕗᖅ ᒫᓐᓇᓕᓴᐅᔪᓂ ᐊᕐᕌᒎᔪᓂᑦ.
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖑᔪᑦ ᐅᖃᐅᓯᖃᓚᐅᖅᐳᑦ ᔭᓄᐊᕆ 18–ᒥ ᕿᓂᕐᓂᐊᕐᓂᖏᓐᓂ ᖃᒃᑲᓐᓂᐊᒍᑦ ᐅᖃᐅᓯᒃᓴᓂ ᐊᒃᑐᖅᑕᐅᓯᒪᔪᓂ ᓄᓇᓕᐅᔪᓂ ᑎᑭᐅᑎᓚᐅᙱᓐᓂᖏᓐᓂ ᑭᖑᓪᓕᖅᐹᖑᔪᒥ ᐃᓱᒪᓕᐅᕐᓂᐅᔪᒥ ᐱᔾᔪᑎᖃᖅᑐᒧᑦ ᐹᕙᓐᓛᓐ ᓴᕕᕋᔭᒃᓴᒧᑦ ᐅᔭᕋᖕᓂᐊᕐᕕᖓᓂ ᑐᒃᓯᕋᖅᑕᐅᔪᒧᑦ ᐱᓕᕆᓂᖓ ᒪᕐᕈᖓᓂ ᐊᖏᒡᓕᒋᐊᖅᑕᐅᓂᖓᓂ.
ᐅᓇ ᐱᐅᕗᖅ, ᑎᒃᑯᐊᖅᓯᒪᓂᖃᕐᒪᑦ ᐊᒥᓱᓄᑦ ᑐᕌᖓᓂᐅᔪᓄᑦ, ᐊᒥᓱᓂ ᓂᐱᓂ ᓄᓇᓕᐅᔪᓂ ᑲᑐᔾᔨᖃᑎᒌᖑᔪᓂᑦ, ᓄᓇᓕᖕᓂ ᒐᕙᒪᐅᔪᓂ ᐊᒻᒪᓗ ᓄᓇᖃᖅᑎᐅᔪᓂ ᑐᓴᖅᑕᐅᓯᒪᙱᓐᓂᕋᐃᓪᓗᑎᒃ, ᐅᕝᕙᓘᓐᓃᑦ ᐸᓯᓂᐅᔪᑦ ᐋᔩᖃᑎᒌᖕᓂᐅᔪᑦ ᐱᓕᕆᐊᖑᖃᑦᑕᕐᓂᖏᓐᓂ ᑐᓴᖅᑎᑦᑎᓚᐅᕐᓇᑎᒃ.
ᔫᓂ 2020–ᒥ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖑᔪᑦ (QIA) ᐊᑎᓕᐅᕆᓚᐅᖅᐳᑦ ᐃᓄᐃᑦ ᐅᒃᐱᕆᔭᐅᓂᖏᓐᓄᑦ ᐊᖏᕈᒻᒥ, ᐋᖅᑭᒃᓯᓲᒥᒃ ᐊᖏᔪᐊᓗᖕᓂ ᑐᕌᒐᒃᓴᐅᔪᓂ ᐊᖏᒡᓕᒋᐊᖅᑐᓄᑦ ᓂᖏᖅᑕᕐᓂᓂ, ᐊᑭᓖᓂᐅᔪᑦ ᐊᒻᒪᓗ ᓄᓇᓕᖕᓂ ᐃᑲᔪᖅᓱᐃᓂᐅᔪᓂ ᐅᓄᕐᓂᖅᓴᐅᔪᓄᑦ $100 ᒥᓕᐊᓐᓂ ᖄᒃᑲᓐᓂᐊᒍᑦ ᐊᑭᓖᓂᐅᔪᓂᑦ – ᑕᒪᕐᒥᒃ ᐃᓱᒪᓂᐅᔪᒥ ᓄᓘᔭᕐᓂ ᐅᔭᕋᖕᓂᐊᕐᕕᖓᑕ ᐱᓕᕆᓂᖓᓂ ᒪᕐᕈᖓᓂ ᐊᖏᒡᓕᒋᐊᕐᓂᖓᓂ ᐃᖏᕐᕋᓂᐊᕈᓂ.
ᐊᓯᖏᓐᓂ ᓲᕐᓗ ᓴᓇᓂᕐᒥ ᓱᕈᓯᕐᓄᑦ–ᐸᐃᕆᕝᕕᖕᓂ ᒥᑦᑎᒪᑕᓕᖕᒥ, ᐃᒃᐱᐊᕐᔪᒃ, ᑲᖏᖅᖢᒑᐱᒃ, ᐃᓘᓕᒃ ᐊᒻᒪ ᓴᓂᕋᔭᖕᒥ – ᐊᑭᖃᕈᓐᓇᖅᑐᒥ ᑎᑭᐅᑎᔪᒧᑦ $15 ᒥᓕᐊᓐᓂ ᓴᓇᓂᕐᒧᑦ – ᐃᑲᔫᓯᖅᑕᐅᓂᐅᔪᓂ ᐊᑭᖓᓂ ᐸᐃᕆᔭᐅᓂᖏᓐᓄᑦ $19–ᒥ ᐊᑐᓂ ᐅᓪᓗᕐᒥ ᑮᓇᐅᔭᓕᐅᕋᓱᐊᑦᑎᐊᕐᓂᐅᓇᔭᖅᐳᖅ ᑕᐃᑲᓂ ᓄᓇᓕᐅᔪᓂ.
ᐊᖏᕈᑎ ᑎᑎᕋᖅᓯᒪᒋᕗᖅ ᐊᑕᐅᓯᐊᖅᑐᒥ $1.3-ᒥᓕᐊᓐᓂ ᐊᑭᓕᐅᑕᐅᔪᒥ ᒥᑦᑎᒪᑕᓕᒃ ᐊᖑᓇᓱᒃᑐᓕᕆᔨᒃᑯᓐᓄᑦ ᒥᑭᒋᐊᕐᓂᐊᖅᑎᒃᑯᓐᓄᓪᓗ ᑲᑐᔾᔨᖃᑎᒌᖑᔪᓄᑦ ᒥᑦᑎᒪᑕᓕᖕᒥ "ᐊᓯᔾᔨᕐᓂᐅᔪᓄᑦ ᐊᖑᓇᓱᖕᓂᕐᒧᑦ ᐊᑐᖅᑕᐅᕙᖕᓂᐅᔪᒥ" ᑕᐃᒪᙵᓂ ᓄᓘᔭᕐᓂ ᐅᔭᕋᖕᓂᐊᕐᓂᕐᒧᑦ ᖃᓄᐃᓕᐅᕐᓂᐅᔪᑦ ᐱᓕᕆᐊᖑᓕᓚᐅᕐᓂᖓᓂ ᐊᒻᒪᓗ $400,000–ᒥ ᐊᑭᓕᐅᑎᐅᔪᒥ ᑭᐅᑦᑎᐊᙱᓐᓂᐅᔪᒧᑦ "ᐃᓄᖕᓂ ᐃᓚᖃᖅᑐᓂ" ᑐᕌᒐᒃᓴᐅᔪᓂ ᒫᓐᓇᒧᑦ ᑎᑭᖦᖢᒍ, ᓲᕐᓗ ᓂᐅᕕᖃᑦᑕᕐᓂᕐᒥ ᓄᓇᓕᐅᔪᓂ, ᑳᓐᑐᕌᒃᑕᐅᒃᑲᓐᓂᕐᓂᐅᔪᓂ ᐱᓕᒻᒪᒃᓴᕐᓂᕐᒥᓪᓘᓐᓃᑦ.
ᑮᓇᐅᔭᕐᔪᐊᕌᓘᕗᑦ, ᐊᒻᒪ ᐱᐅᔫᔮᖅᐳᖅ ᐸᐃᑉᐹᑎᒍᑦ, ᑭᓯᐊᓂ ᐅᖃᓕᒫᕐᓂᖃᕆᕗᖅ ᐃᓇᖏᖅᓯᓇᓱᐊᕐᓂᐅᔪᒥ ᓱᓕᓂᕋᐃᔪᓄᑦ, ᓱᕋᖅᑕᐅᓯᒫᓂᒃᑐᓂ ᓯᕗᓪᓕᖅᐹᒥ ᐱᓕᕆᓂᐅᔪᒥ ᐅᔭᕋᖕᓂᐊᕐᕕᐅᑉ ᐃᓅᓯᕆᔭᖓᓂ.
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖑᔪᑦ ᐊᖓᔪᖅᑳᖓ P.J. ᐊᕿᐊᕈᖅ ᐅᖃᓚᐅᖅᐳᖅ ᑲᑐᔾᔨᖃᑎᒌᖓ ᐊᒻᒪ ᐹᕙᓐᓛᓐ ᐊᑐᖅᓯᒪᕗᑦ "ᐱᑕᖃᙱᓗᐊᕐᓂᖓᓂ ᑕᐃᒪᐃᑉᐸᓚᐅᖅᑐᒥ ᐅᒃᐱᕈᓱᖕᓂᐅᔪᒥ," ᑭᓯᐊᓂ ᐅᖃᐅᓯᖃᓚᐅᖅᐳᖅ ᓂᕆᐅᖕᓂᐅᔪᒥ ᐱᓕᕆᖃᑎᒌᒃᑐᑦ ᑎᑭᐅᑎᓂᐊᕐᓂᖏᓐᓂ ᓄᑖᒥᒃ ᑐᑭᓯᐅᒪᓂᐅᔪᒥ.
ᐅᐱᓐᓇᕋᓗᐊᖅᐳᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖑᔪᑦ ᐅᖃᖃᑎᖃᒃᑲᓐᓂᕐᓂᐊᕐᓂᖏᓐᓂ ᓄᓇᓕᐅᔪᓂ, ᐅᑯᐊ ᐅᖃᖃᑎᖃᕐᓂᐅᔪᑦ ᐃᓕᔭᐅᖃᓯᐅᑎᓚᐅᖅᐳᑦ ᑭᖑᓪᓕᖅᐹᖑᔪᓂ ᖃᔅᓯᐊᕐᔪᖕᓂ ᐱᓇᓱᐊᕈᓯᐅᔪᓂ ᓯᕗᓂᐊᓂ ᐊᐅᓚᑕᐅᓂᐅᔪᓄᑦ ᑲᑎᒪᓂᐅᔪᓂ ᐱᒋᐊᒃᑲᓐᓂᕐᓂᖏᓐᓂ, ᑕᖅᑭᒐᓵᓗᖕᓂ ᐅᑎᖅᑲᓂᖃᓚᐅᖅᑎᓪᓗᒋᑦ. ᕿᒪᐃᓚᐅᖅᐳᖅ ᐊᒥᓱᒻᒪᕆᐊᓗᖕᓂ ᐊᑲᐅᙱᓕᐅᕈᑕᐅᔪᓂ ᐋᖅᑭᒃᓱᖅᑕᐅᔭᕆᐊᓕᖕᓂ ᑎᑭᐅᑎᒻᒪᕆᓕᖅᑎᓪᓗᒍ.
ᐃᓚᓕᐅᑎᓗᒍ ᐆᒧᖓ ᓄᑖᖑᔪᒥ ᑲᑐᔾᔨᖃᑎᒌᖑᔪᓄᑦ – ᕿᑭᖅᑖᓗᒃ ᐅᐊᖕᓇᖓᓂ ᑲᑐᔾᔨᖃᑎᒌᑦ – ᑮᓇᐅᔾᔭᒃᓴᓇᓱᐊᙱᖦᖢᑎᒃ ᑲᑎᙵᓂᐅᔪᑦ ᑭᒡᒐᖅᑐᐃᓂᖃᓪᓗᐊᖅᑐᓂ ᐅᐊᖕᓇᒥ ᕿᑭᖅᑖᓗᖕᒥ ᐱᔪᒪᔭᖏᓐᓂ ᐊᒻᒪ ᐸᕐᓇᐃᓂᕐᒧᑦ ᓴᖅᑭᑎᑦᑎᓂᕐᒧᑦ ᐊᕕᒃᑐᖅᓯᒪᓂᐅᔪᒥ ᑮᓇᐅᔾᔭᒃᓴᓂᕐᒧᑦ ᑎᒥᖁᑕᐅᔪᒥ. ᐋᔩᖃᑎᒌᖕᓂᐅᔪᑦ ᐱᐅᔪᓐᓃᒃᑲᓐᓂᕐᔪᐊᖅᐳᖅ.
ᐃᒡᓗᓕᖕᒥ ᒪᐃᔭ ᒨᕐᓕᓐ ᕆᓯᓅᔅ ᐅᖃᓚᐅᖅᐳᖅ, "ᑲᑎᖃᑎᒌᒃᓯᒪᕗᒍᑦ ᑕᓪᓕᒪᓂ ᓄᓇᓕᐅᔪᓂ (ᓄᓘᔭᕐᓂ) ᐱᓕᕆᐊᖑᔪᒧᑦ ᑐᑭᓯᐅᒪᓚᐅᕋᑦᑕ ᑕᒪᓐᓇ ... ᐱᓕᕆᓂᑐᐊᖑᓂᐅᕗᖅ ᓯᕗᒻᒧᑦ ᐃᖏᕐᕋᓂᕐᒧᑦ ᓇᓂᓯᓂᕐᒥ ᑲᑎᖃᑎᒌᖕᓂᐅᔪᒥ."
ᑲᑎᖃᑎᒌᖕᓂᐅᔪᒥ ᒫᓐᓇ ᐱᒻᒪᕆᐅᓂᖅᓴᐅᓛᖑᕗᖅ ᒫᓐᓇᐅᔪᒥ.