Skip to content

ᐃᓱᒪᕗᑦ: ᑮᓇᐅᔭᐃᔭᕈᑕᐅᔭᕆᐊᓖᑦ ᓈᒻᒪᑦᑎᐊᖅᑐᑦ

ᐊᒃᓱᕈᕐᓇᖅᑐᒃᑰᖅᓯᒪᔪᑦ ᓄᓇᕗᑦ ᒐᕙᒪᒃᑯᖏᑦ, ᐅᔾᔨᕆᔭᐅᔪᒪᔪᑦ ᐊᒥᓲᓂᖅᓴᐅᓯᒪᑉᓗᑎᒃ, ᑭᓯᐊᓂ ᓄᓇᕗᑦ ᐋᖅᑭᐅᒪᑦᑎᐊᖅᑑᔭᖅᑐᖅ.
Nunavut News_editorial
Editorial & opinions - Nunavut News

ᐱᔾᔪᑕᐅᔪᖅ: ᑮᓇᐅᔭᑦ 2021-22-ᒧᑦ
ᐅᖃᖅᑐᒍᑦ: ᐋᖅᑭᐅᒪᑦᑎᐊᖅᑐᑦ

ᑕᑯᓯᒪᔭᑉᑎᓐᓂᒃ ᓇᓗᓇᐃᔭᖅᑕᐅᓯᒪᓛᑦᑎᐊᖅ ᓄᕙᒡᔪᐊᕐᓂᖅᑕᖃᖅᑎᓪᓗᒍ ᐅᑭᐅᖅ, ᐋᓐᓂᐊᖃᕐᓇᙱᑦᑐᓕᕆᓂᖅ ᑲᒪᒋᔭᐅᔪᖅ ᐊᖏᕐᕋᒥ ᓄᓇᕗᒥ ᐃᑲᔫᑕᐅᔪᖅ ᓄᓇᕗᒥᐅᓄᑦ ᖃᓄᐃᙱᑦᑐᓐᓇᖁᑉᓗᒋᑦ.

ᑕᒪᓐᓇ ᐃᒃᐱᒋᔭᐅᔪᖅ ᐅᖃᐅᓯᐅᑲᑕᓚᐅᖅᑐᖅ ᑮᓇᐅᔭᓕᕆᔨᒃᑯᑦ ᒥᓂᔅᑕᖓᓄᑦ ᔪᐊᔾᔨ Hᐃᒃᔅᒧᑦ 2021-22-ᒥ ᑮᓇᐅᔭᓕᕆᑎᓪᓗᒍ, ᓴᖅᑭᑎᑦᑎᑎᓪᓗᒍ ᒪᓕᒐᓕᐅᕐᕕᒡᔪᐊᕐᒥ ᕕᕗᐊᕆ 23-ᒥ.

ᓄᓇᕗᑦ ᒐᕙᒪᒃᑯᖏᑦ ᐱᓕᕆᐊᒃᓴᖃᓪᓚᕆᒃᑐᑦ ᓇᓕᒧᒌᓕᖅᑎᑦᑎᓯᒪᓇᓱᒃᑎᓪᓗᒋᑦ ᑮᓇᐅᔭᖁᑎᖏᓐᓂᒃ ᓄᓇᒋᔭᖓ ᐊᖏᓂᖅᐹᖑᑎᓪᓗᒍ ᐊᒥᓱᓂᒃ ᓄᓇᖃᖅᖢᓂ ᓯᐊᒻᒪᒃᓯᒪᔪᓂᒃ ᐅᖓᓯᒌᒃᑑᑎᐅᓪᓗᑎᒡᓗ.

ᐃᑲᔪᖅᑑᑕᐅᓯᒪᔪᑦ ᒐᕙᒪᑐᖃᒃᑯᓐᓂᙶᖅᑐᑦ − ᐅᑯᐊᖑᔪᑦ $200 ᒥᓕᔭᓐ ᐅᖓᑖᓃᑦᑐᑦ ᑮᓇᐅᔭᓕᖅᑕᐅᑲᐅᑎᒋᓚᐅᙱᑦᑐᒃᑯᑦ ᐃᑲᔫᑎᒃᓴᑦ ᓄᕙᒡᔪᐊᕐᓂᖅ-19 ᐱᔾᔪᑎᒋᑉᓗᒍ − ᐱᒻᒪᕆᐊᓘᓯᒪᔪᖅ. ᒐᕙᒪᑐᖃᒃᑯᑦ ᐃᑲᔪᕆᐊᓚᐅᙱᑉᐸᑕ “ᐱᒻᒪᕆᐊᓗᒃᑯᑦ ᐊᔾᔨᐅᙱᑦᑐᒥᒃ ᑮᓇᐅᔭᓕᕆᓂᒃᑯᑦ ᐅᖃᐅᓯᖃᕋᔭᓚᐅᖅᑐᖓ ᐅᑉᓗᒥ,” ᑕᐃᒪᓐᓇ ᐅᖃᖅᖢᓂ Hᐃᒃᔅ.

ᐊᖏᓂᖅᓴᓂᒃ ᐋᓐᓂᐊᖃᕐᓇᙱᑦᑐᓕᕆᓂᒃᑯᑦ ᐱᕈᖅᑎᑦᑎᓂᖃᕐᓂᐊᖅᑐᒍᑦ, ᐃᓚᒋᐊᕈᑎᖃᖅᖢᑕ $4.5 ᒥᓕᔭᓂᒃ ᐱᐅᓯᕚᓪᓕᕈᑎᒃᓴᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᓄᓇᕗᒥ.

ᐃᓚᖓ ᐱᕈᖅᑎᑦᑎᒍᑎ $405,000-ᒦᑦᑐᖅ ᐃᓚᒋᐊᖅᓯᔪᒪᓂᕐᒧᑦ ᓯᑕᒪᓂᒃ ᓄᑖᓂᒃ ᓴᓇᔨᒃᓴᓂᒃ ᐃᖃᓗᐃᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᖏᓐᓄᑦ, ᐃᓚᐅᖃᑕᐅᓗᒍ ᑎᒥᒃᑯᑦ ᐊᔾᔨᓕᐅᕆᔨᒃᓴᖅ.

ᓇᓗᓇᐃᖅᓯᔪᓐᓇᖃᑦᑕᕐᓂᐊᖅᑐᖅ “ᐱᔭᕆᐊᑐᔪᓂᒃ ᐋᓐᓂᐊᖃᕐᓇᙱᑦᑐᓕᕆᓂᒃᑯᑦ ᐃᖢᐊᖏᓕᐅᕈᑕᐅᔪᓂᒃ ᓄᓇᕗᒥ” ᑕᒪᓐᓇ ᑮᓇᐅᔭᐃᔭᙱᓐᓂᖅᓴᐅᔾᔪᑕᐅᓂᐊᖅᑐᖅ ᓯᕗᓂᒃᓴᒃᑯᑦ.

Hᐃᒃᔅ ᐃᓕᑕᖅᓯᓚᐅᕐᒥᔪᖅ ᑲᔪᓰᓐᓇᖅᑐᒃᑯᑦ ᓄᓇᕗᑦ ᒐᕙᒪᒃᑯᖏᑦᑕ ᐱᓕᕆᐊᕆᔭᖏᓐᓂᒃ ᐸᕐᓇᐃᓂᕐᒧᑦ “ᐃᓕᖅᑯᓯᑐᖃᑎᒍᑦ ᑐᕌᖓᔪᓂᒃ, ᓄᓇᕗᒥ ᐅᐃᕆᓯᒪᔪᑦ ᐊᒃᓱᕈᕐᓇᖅᑐᒃᑰᖅᐸᒃᑐᓪᓗ ᐃᑲᔪᖅᑕᐅᕝᕕᒃᓴᖓᓂᒃ,” ᐱᐊᓂᒃᑕᐅᔭᕆᐊᖃᕐᓂᐊᖅᑐᖅ ᒐᕙᒪᒋᔭᐅᔪᒫᖅᑐᓄᑦ, ᓂᕈᐊᕌᓂᒃᓯᒪᓕᖅᐸᑕ ᐅᑐᐱᕆ 25-ᒥ ᓄᓇᕗᒥ.

“ᒫᓐᓇᐅᔪᖅ, ᐊᑐᐃᓐᓇᕐᓂᐊᖅᑐᒍᑦ ᓄᓇᕗᑦ ᓯᓚᑖᓂ ᐅᖃᐅᔾᔨᒋᐊᖅᑎᐅᕙᒃᑐᓂᒃ ᐊᒻᒪᓗ ᐅᐃᕆᓯᒪᔪᓂᒃ ᐃᑲᔪᖅᑕᐅᕝᕕᖕᓂᒃ. ᑮᓇᐅᔭᑦ ᐊᑐᓕᖁᔨᓯᒪᔪᑦ $10.6 ᒥᓕᔭᓂᒃ ᓄᑖᙳᖅᑎᑦᑎᔪᒪᓂᕐᒧᑦ ᑕᒪᒃᑯᓂᙵ ᐃᓱᒪᒃᑯᑦ ᐃᑲᔪᖅᑕᐅᔭᕆᐊᖃᖅᐸᒃᑐᓄᑦ ᐅᐃᕆᓯᒪᔪᓄᓪᓗ ᐃᑲᔪᖅᑕᐅᕝᕕᒃᑯᑦ ᑳᓐᑐᕌᒃᑖᕈᑎᓄᑦ... (ᐊᒻᒪᓗ) $3 ᒥᓕᔭᓐ ᓄᑖᙳᖅᑎᑦᑎᔪᒪᓂᕐᒧᑦ ᐃᖢᐊᖅᓴᐃᔨᓄᑦ ᑳᓐᑐᕌᒃᓂᒃ.”

ᐊᓯᖓᑦᑕᐅᖅ ᐱᒻᒪᕆᐊᓗᒃᑯᑦ ᐱᕈᖅᑎᑦᑎᓂᕐᒧᑦ ᓄᓇᓕᖕᓂᒃ ᐋᓐᓂᐊᖃᕐᓇᙱᑦᑐᓕᕆᓂᒃᑯᑦ ᑲᔪᓯᔪᒃᑯᑦ ᑮᓇᐅᔭᓕᖅᑐᐃᓯᒪᓂᐊᖅᑐᒍᑦ ᓄᓇᓕᖕᓂ ᐃᖅᑲᖅᑐᐃᔪᓕᕆᓂᒃᑯᑦ ᐃᑲᔫᑎᒃᓴᓄᑦ ᐃᖃᓗᒃᑑᑦᑎᐊᕐᒥ “ᐃᑲᔫᑕᐅᖃᑦᑕᖅᑐᖅ ᑲᒪᕙᓪᓕᐊᓂᕐᒧᑦ ᓱᖕᒪᑦ ᐃᓄᐃᑦ ᐱᕋᔭᖃᑦᑕᕐᒪᖔᑕ, ᐃᑲᔫᑕᐅᑉᓗᓂᓗ ᐃᓱᒪᒃᑯᑦ ᐋᓐᓂᐊᖃᕐᓇᖅᑐᓕᕆᓂᕐᒧᑦ, ᐅᐃᕆᓯᒪᔪᓄᑦ ᐃᑲᔫᑕᐅᑉᓗᓂ ᐊᒻᒪᓗ ᐊᒃᓱᕈᕐᓇᖅᑐᒃᑰᖅᓯᒪᔪᓄᑦ.”

ᑕᒪᓐᓇ ᐃᑲᔫᑎ ᐃᓚᒋᐊᖅᓯᓂᐊᕐᒥᔪᖅ ᐊᕐᕕᐊᓂ.

ᐃᑲᔪᖅᑐᐃᓂᖅ ᐱᕋᔭᒃᓯᒪᔪᓂᒃ ᒪᒥᓴᕐᓂᒃᑯᑦ ᐱᐅᔪᒥᓇᖅᑐᖅ ᐸᕐᓇᐅᑎ, ᐊᒻᒪᓗ ᒪᑐᐃᖅᓯᓂᕐᒧᑦ ᐋᖅᑭᒋᐊᕐᕕᒃ ᐊᓄᓪᓚᒃᓰᕝᕕᒃ ᒪᒥᓴᕐᕕᖕᒥᒃ ᐃᖃᓗᖕᓂ ᐅᑭᐊᒃᓵᖑᔪᖅ − $3 ᒥᓕᔭᒦᑦᑐᑦ ᓴᓇᔨᓄᑦ ᐊᑭᓕᐅᑎᒃᓴᑦ − ᑕᒪᓐᓇ ᓯᕗᒻᒧᐊᒃᐸᓪᓕᐊᒍᑎ ᐃᓄᐃᑦ ᐃᓅᓯᕆᓚᐅᖅᑕᒥᓄᑦ ᐅᑎᖅᐸᓪᓕᐊᖃᑦᑕᕈᓐᓇᖁᑉᓗᒋᑦ, ᓅᑉᐸᓪᓕᐊᓂᖅ ᐊᓄᓪᓚᒃᓰᑎᑦᑎᑐᐃᓐᓇᖃᑦᑕᕐᓂᕐᒥᒃ.

ᓲᖃᐃᒻᒪ, ᐅᖃᐅᓯᐅᒐᔪᒃᑐᖅ ᐃᒡᓗᑭᒃᓴᕐᓂᖅ ᑕᐃᒪᐅᖏᓐᓇᕐᓂᐊᖅᑐᖅ, ᐊᒻᒪᓗ Hᐃᒃᔅ ᑮᓇᐅᔭᓂᒃ ᐅᖃᐅᓯᖃᖅᑎᓪᓗᒍ ᑕᒪᓐᓇ ᖁᔭᓈᖅᑕᐅᓯᒪᓇᓂ. 12% ᑲᑎᖦᖢᒋᑦ ᑮᓇᐅᔭᕆᔭᐅᔪᓂᒃ ᓴᓂᕐᕙᖅᑕᐅᓯᒪᔪᖅ ᑮᓇᐅᔭᓕᖅᑕᐅᓯᒪᔪᓐᓇᖁᑉᓗᒍ ᓄᓇᕗᒥ ᐃᒡᓗᓕᕆᔨᕐᔪᐊᒃᑯᑦ ᐊᐅᓚᑦᑎᔾᔪᑎᖏᑦ ᐋᖅᑭᐅᒪᐃᓐᓇᕈᑎᖏᓪᓗ ᑮᓇᐅᔭᒃᑯᑦ, ᐃᓚᐅᖃᑕᐅᑉᓗᒍ “$48.5 ᒥᓕᔭᓐ ᖃᓂᒋᔭᖓᓃᑦᑐᑦ... (ᑐᕌᖅᑎᑕᐅᔪᑦ) ᐋᖅᑭᐅᒪᑎᑦᑎᓂᕐᒧᑦ ᐱᐅᓯᕚᓪᓕᖅᑎᑦᑎᔪᒪᓂᕐᒧᓪᓗ ᐃᒡᓗᖁᑎᒋᔭᑉᑎᓐᓂᒃ.”

ᑕᒪᓐᓇ ᐃᓚᐅᖃᑕᐅᑎᑦᑎᔪᖅ ᐋᖅᑭᒋᐊᖅᓯᔪᒪᓂᕐᒧᑦ ᐃᒡᓗᑦ ᐅᖁᖃᖃᑦᑕᖅᑎᓪᓗᒋᑦ ᐊᒻᒪᓗ ᐃᑲᔪᖅᑑᑏᑦ ᓄᓇᓕᖕᓂ ᐃᒡᓗᓕᕆᔨᒃᑯᓐᓄᑦ. ᓄᓇᕗᑦ ᒐᕙᒪᒃᑯᖏᑦ ᐃᓚᓯᒋᐊᖅᓯᒪᔪᑦ $11 ᒥᓕᔭᒃᑲᓐᓂᕐᓂᒃ ᐃᓕᓐᓂᐊᖅᑐᓕᕆᓂᒃᑯᑦ ᑕᐃᑉᓱᒪᓂᐅᖓᓂᒃ $2 ᒥᓕᔭᓐ ᖃᓂᒋᔭᖓᓂᒡᓗ ᐱᐅᓯᕚᓪᓕᕈᑎᒃᓴᑦ ᐃᓕᓐᓂᐊᕐᕕᖕᓄᑦ ᐅᓯᑲᖅᑕᐅᑕᐅᖃᑦᑕᖅᑐᓄᑦ ᓄᑕᖅᑲᓂᒃ (bus) ᓄᓇᓕᖕᓂ.

ᐱᐅᔪᓂᒃ ᑕᑯᔭᒃᓴᖃᕐᓂᐊᖅᑐᖅ. ᐃᑲᔪᖅᑑᑏᑦ ᒪᒃᑯᒃᑐᖁᑎᑉᑎᓐᓄᑦ ᐃᓕᓐᓂᐊᖅᑎᑦᑎᔩᑦ ᐊᒥᒐᖁᓇᒋᑦ ᐃᓕᓐᓂᐊᖅᑎᑦᑎᔪᓐᓇᖅᑐᑦ ᐱᕕᒃᓴᖃᕐᓂᖅᓴᐅᓗᓂᓗ ᐃᓕᓐᓂᐊᖅᑐᑦ ᐊᑐᓂ ᐃᑲᔪᖅᑕᐅᔪᓐᓇᖅᓯᖁᑉᓗᒋᑦ.

ᐊᒃᓱᕈᕐᓇᖅᑐᒃᑰᖅᓯᒪᔪᑦ ᓄᓇᕗᑦ ᒐᕙᒪᒃᑯᖏᑦ, ᐅᔾᔨᕆᔭᐅᔪᒪᔪᑦ ᐊᒥᓲᓂᖅᓴᐅᓯᒪᑉᓗᑎᒃ, ᑭᓯᐊᓂ ᓄᓇᕗᑦ ᐋᖅᑭᐅᒪᑦᑎᐊᖅᑑᔭᖅᑐᖅ.

ᐊᖏᔫᓇᓂ ᐅᖓᑕᐅᔾᔨᓯᒪᓂᐅᔪᖅ ᐊᒻᒪᓗ ᐃᑲᔫᑎᑕᖃᒃᑲᓐᓂᖅᑎᓪᓗᒍ, ᒪᓕᒐᓕᐅᖅᑎᒃᑯᑦ ᐸᕐᓇᐃᓯᒪᑦᑎᐊᖅᑑᔭᖅᑐᑦ ᒪᓕᒐᓕᐅᖅᑎᙳᒃᑲᓐᓂᕈᒫᖅᑐᓂᒃ.