ᐊᑲᐅᙱᓕᐅᕈᑎ: ᒐᕙᒪᑐᖃᒃᑯᑦ ᑮᓇᐅᔭᑦ ᐊᑐᖅᑐᒃᓴᑦ
ᐅᖃᖅᐳᒍᑦ: ᐱᒋᐊᕐᓂᑦᑎᐊᕙᒃ

ᑲᓇᑕᐅᑉ ᓯᕗᓪᓕᖅᐹᖓᓂ ᒐᕙᒪᑐᖃᒃᑯᑦ ᑮᓇᐅᔭᑦ ᐊᑐᖅᑐᒃᓴᑦ ᐊᕐᕌᒍᓂ ᒪᕐᕉᖕᓂ ᓴᖅᑭᑕᐅᑕᐃᓐᓇᖅᐳᖅ, ᐊᒻᒪᓗ ᐅᓄᖅᑐᒻᒪᕆᐊᓗᖕᓂ 739−ᓂ ᒪᒃᐱᖅᑐᒐᕐᓂ ᓱᓕᓂᕋᐃᔪᓂ.

ᓄᓇᕗᑦ ᐅᖃᐅᓯᐅᕗᖅ 10−ᖏᖅᓱᖅᑕᐅᓪᓗᓂ ᑕᐃᑲᓂᓗᒃᑖᖅ ᐊᖏᔪᒻᒪᕆᐊᓗᖕᒥ ᑎᑎᖅᑲᖁᑕᐅᔪᒥ.

ᐅᖃᙱᓚᖅ ᑮᓇᐅᔭᓂ ᐊᑐᖅᑐᒃᓴᓂ ᑐᒃᓯᕋᖅᑕᐅᔪᓂ ᐊᐅᓚᔪᓐᓇᐅᑎᓂ ᐊᑐᕋᔭᕐᓂᖓᓂ ᓄᓇᕗᒻᒧᑦ, ᐊᒻᒪᓗ 355−ᖑᔪᓂ ᖃᓄᐃᓐᓂᐅᔪᓂ ᓄᕙᒡᔪᐊᕐᓇᖅ-19−ᒥ, ᐊᑕᐅᓯᕐᒥ ᐅᖃᖅᓯᒪᓂᐅᔪᒥ ᐊᓯᖓᓂᓪᓘᓐᓃᑦ, ᐊᑐᓪᓚᕆᖕᓂᐊᖅᐳᖅ ᐊᒥᓱᓂ ᖃᓄᐃᓐᓂᐅᔪᓂ ᐱᑕᖄᓂᙱᒃᑯᓂ ᓇᓗᓇᐃᖅᑕᐅᓯᒪᔪᓂ ᑮᓇᐅᔭᖃᖅᑎᑕᐅᓂᐅᔪᓂ ᐱᕝᕕᐅᔪᓐᓇᖅᑐᓂ ᐊᑐᐃᓐᓇᐅᔪᓂ ᓄᓇᕗᒻᒥ.

ᐸᐃᕆᕝᕖᑦ ᐊᖏᔫᕗᖅ ᐅᕙᓂ ᑮᓇᐅᔭᓂ ᐊᑐᖅᑐᒃᓴᓂ, ᑎᑭᐅᒪᔪᒧᑦ $30 ᐱᓕᐊᓐᓂ ᐊᕐᕌᒍᓄᑦ ᑕᓪᓕᒪᓄᑦ ᐊᖏᖅᑕᐅᓯᒪᓂᖓᓂ, “ᑎᑭᐅᑎᓪᓗᓂ $8.3 ᐱᓕᐊᓐᓂ (ᐊᕐᕌᒍᑕᒫᒥ) ᐱᑕᖃᐃᓐᓇᕐᓂᐊᖅᑐᒥ ᑐᙵᕕᐅᔪᒥ, ᐱᕈᖅᓴᓂᕐᒧᑦ ᖁᑦᑎᒃᑐᒥ−ᐱᐅᓂᐅᔪᒥ, ᐊᑭᑐᓗᐊᙱᑦᑐᒥ ᐊᒻᒪᓗ ᐊᑐᐃᓐᓇᐅᔪᒥ ᐱᒋᐊᓕᓵᖅᑐᓄᑦ ᐃᓕᑦᑎᓂᐅᔪᒥ ᐊᒻᒪ ᐸᐃᕆᕝᕕᖕᒥ ᐱᓕᕆᔾᔪᓯᐅᔪᒥ ᑲᓇᑕᓕᒫᒥ,” ᐅᖃᐅᓯᐅᓪᓗᓂ ᑮᓇᐅᔭᓕᕆᔨᒃᑯᑦ ᒥᓂᔅᑕᖓ ᑯᕆᔅᑎᐊ ᕗᕇᓚᓐ ᐊᓯᐊᒎᖅᑐᒥ ᑎᑎᕋᖅᓯᒪᓂᐅᔪᒥ.

ᐅᓇ ᑐᓴᕈᒥᓇᖅᑑᕗᖅ ᓇᒥᑐᐃᓐᓇᖅ ᓄᓇᖃᕐᓗᓂ, ᐊᒻᒪᓗ ᑮᓇᐅᔭᑦ ᐊᑐᖅᑐᒃᓴᑦ ᑎᑎᖅᑲᖁᑕᐅᔪᖅ ᐅᓂᒃᑳᕆᕗᖅ ᐊᒃᑐᐃᓪᓚᕆᖕᓂᖃᕐᓂᐊᖅᐳᖅ ᐃᓚᒌᖑᔪᓂ ᐱᔪᓐᓇᖅᑎᑦᑎᓗᓂ ᒥᒃᖠᒋᐊᖅᑎᑦᑎᓂᐅᔪᒥ ᑕᐃᒪᐃᒐᔪᒃᑐᓂ ᐸᐃᕆᕝᕕᖕᓂ ᐊᑭᓕᐅᑎᖏᓐᓂ ᐊᑦᑎᒃᑎᒋᔪᒥ $10−ᒥ ᐊᑐᓂ ᐅᓪᓗᕐᒧᑦ.

ᓄᑕᐅᙱᑦᑐᖅ ᐊᖏᖅᓯᒪᓂᐅᔪᑦ ᓄᑖᙳᕆᐊᖅᑎᑕᐅᓚᐅᖅᐳᑦ, ᓲᕐᓗ $27 ᒥᓕᐊᓐᓂ ᑎᑭᑉᐸᓪᓕᐊᔪᓄᑦ ᐊᕐᕌᒍᓄᑦ ᒪᕐᕉᖕᓄᑦ ᐃᓚᒋᔭᐅᓗᓂ ᓄᓇᕗᒻᒥ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑲᑎᖅᓱᖅᑕᐅᕙᓪᓕᐊᔪᑦ ᑮᓇᐅᔭᑦ ᑐᖅᑯᖅᑕᐅᓯᒪᓪᓗᑎᒃ ᐱᕈᖅᐸᓪᓕᐊᑎᑕᐅᔪᓂ ᑮᓇᐅᔭᓂ ᑐᓂᔭᐅᔪᓂ “ᐃᑲᔪᖅᓱᐃᓂᕐᒧᑦ ᓄᓇᕗᒻᒥ ᖄᖏᐅᑎᓂᕐᒧᑦ ᐊᒃᓱᕈᕐᓂᐅᔪᓂ ᑐᓂᓯᓂᕐᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ−ᐸᖅᑭᓂᐅᔪᒥ ᐱᔨᑦᑎᕋᕐᓂᕐᒥ ᐅᑭᐅᖅᑕᖅᑐᒥ.”

$40.4-ᒥᓕᐊᓐᓂ ᑮᓇᐅᔭᖃᖅᑎᑦᑎᓂᐅᔪᒥ ᐱᕝᕕᐅᔪᓐᓇᕐᓂᐊᖅᑐᒥ ᐅᑭᐅᖅᑕᖅᑐᒥ ᒪᓗᒪᔪᒥ ᐆᒻᒪᖅᑯᑎᓄᑦ ᐱᓕᕆᐊᒃᓴᐅᔪᓄᑦ, ᑕᐃᒫᒃ ᐱᓕᕆᐊᒃᓴᑦ ᓲᕐᓗ ᑭᕙᓪᓕᕐᒥ ᐃᒪᕐᒧᑦ ᐆᒻᒪᖅᑯᑎᖃᕐᓂᕐᒥ ᑲᒧᕐᕕᒃᓴᐅᔪᒧᑦ ᐃᑲᔪᖅᓱᐃᓂᖃᕐᓂᐊᖅᐳᖅ ᐱᔭᕆᐊᓕᖕᒥ “ᑐᓂᓯᓂᕐᒥ ᓴᓗᒪᔪᒥ ᐆᒻᒪᖅᑯᑎᒥ ᐅᑭᐅᖅᑕᖅᑐᒥ ᓄᓇᓕᐅᔪᓄᑦ ᐊᒻᒪᓗ ᐃᑲᔪᕐᓗᓂ ᒥᒃᖠᒋᐊᖅᑎᑦᑎᓂᕐᒧᑦ ᐊᓂᐊᑎᑕᐅᕙᓪᓕᐊᓂᐅᔪᓂ ᐅᔭᕋᖕᓂᐊᕐᕕᖕᓂ ᐱᓕᕆᐊᒃᓴᐅᔪᓂ.”

ᓄᑕᐅᙱᓐᓂᖅᓴᐅᔪᓂ ᐊᖏᖅᓯᒪᓂᐅᔪᓂ ᓄᑖᙳᕆᐊᖅᑎᑕᐅᓯᒪᒋᕗᑦᑕᐅᖅ, $163-ᒥᓕᐊᓐᓂ ᑲᑎᖅᓱᖅᑕᐅᕙᓪᓕᐊᔪᑦ ᑮᓇᐅᔭᑦ ᑐᖅᑯᖅᑕᐅᓯᒪᓪᓗᑎᒃ ᐱᕈᖅᐸᓪᓕᐊᑎᑕᐅᔪᓂ ᐊᕐᕌᒍᓄᑦ ᐱᖓᓱᓄᑦ “ᐊᖏᒡᓕᒋᐊᖅᓯᓂᕐᒧᑦ ᓂᕿᑦᑎᐊᕙᓕᕆᓂᕐᒥ ᐅᑭᐅᖅᑕᖅᑐᒥ ᑲᓇᑕᒥ ᐱᓕᕆᐊᖑᔪᒥ ᐊᒻᒪᓗ ᐱᔪᓐᓇᖅᑎᑦᑎᓗᓂ ᒥᓂᔅᑕᒥ ᐅᑭᐅᖅᑕᖅᑐᒥ ᐱᓕᕆᓂᐅᔪᒥ ᑐᕌᖓᔪᒥ ᐱᓕᕆᖃᑎᖃᕐᓂᖓᓂ ᓄᓇᖃᖅᑳᖅᓯᒪᔪᓄᑦ ᐱᓕᕆᖃᑎᒋᔭᐅᔪᓂ, ᐃᓚᖃᖅᑐᒥ ᐃᓄᐃᑦ ᓄᓇᖓᓐᓂ ᑭᐅᓂᕐᒧᑦ ᓂᕿᒃᓴᖃᑦᑎᐊᙱᓐᓂᐅᔪᒥ.”

ᐅᓇ ᑕᑯᔪᒥᓇᖅᑑᓪᓗᓂ ᐅᖃᐅᓯᕆᓂᕐᒧᑦ, ᐊᒻᒪᓗ ᑕᑯᔪᒥᓇᕐᓂᐊᖅᐳᖅ ᑕᑯᓂᕐᒥ ᒐᕙᒪᒃᑯᑦ ᐊᖏᒡᓕᒋᐊᖅᓯᓂᐊᕐᒪᖔᑦ ᓈᒻᒪᒋᔭᐅᔪᓂ ᑭᓱᑐᐃᓐᓇᐃᑦ ᐃᑲᔫᓯᖅᑕᐅᓂᖏᓐᓂ – ᐊᒻᒪᓗ ᖃᓄᑎᒋ ᐊᑭᖏᑦ ᒥᒃᖠᒋᐊᖅᑕᐅᔪᓐᓇᕐᓂᖏᓐᓂ ᓂᐅᕕᖅᐸᒃᑐᓄᑦ, ᐅᕝᕙᓘᓐᓃᑦ ᐊᕕᒃᑐᖅᓯᒪᓂᖏᑕ ᑲᓇᑕᒥ ᐱᔪᓐᓇᖅᑐᓂ ᐃᑲᔫᓯᖅᑕᐅᓂᕐᒧᑦ ᐊᓯᔾᔨᕐᓂᐊᕐᒪᖔᑦ ᒥᑭᑦᑐᒥ ᑐᑭᓯᓇᑦᑎᐊᖅᑐᒥ ᐃᑲᔪᖅᑕᐅᓂᐅᔪᒥ. ᐃᓱᐊᓂ ᐱᑎᑦᑎᔭᕆᐊᖃᖅᐳᖅ ᐊᓯᔾᔨᕐᓂᓪᓚᕆᐅᔪᒥ ᐊᑭᐅᔪᓄᑦ ᐅᑭᐅᖅᑕᖅᑐᒥᐅᓄᑦ ᓂᕿᓄᑦ ᐊᑭᓕᒐᒃᓴᖏᓐᓄᑦ.

ᐊᖏᓛᖑᔪᒥ ᐊᑭᕋᖅᑐᖅᑕᐅᔪᖅ ᐊᑐᐃᓐᓇᐅᑎᑕᐅᔪᓐᓇᖅᑐᒥ $25 ᒥᓕᐊᓐᓂ ᑐᕌᖓᔪᓄᑦ ᐅᓇᐅᔪᒥ $500-ᒥᓪᓕᐊᓐᓂ-ᐊᒻᒪ ᐱᕈᖅᐸᓪᓕᐊᔪᒥ ᐊᑲᐅᙱᓕᐅᕈᑕᐅᔪᒥ.

ᓄᓇᕗᒻᒥ ᑐᙵᕕᒃᑯᑦ ᐊᖓᔪᖅᑳᖓ ᐊᓗᑭ ᑰᑦᑎᖅ ᐊᐃᑦᑖᕈᓱᓚᐅᖅᐳᖅ ᑮᓇᐅᔭᓂ ᓇᓗᓇᐃᖅᑕᐅᓯᒪᔪᖃᙱᓐᓂᖓᓂ ᐱᓗᐊᖅᑐᒥ ᐃᓄᖕᓄᑦ ᐃᒡᓗᒃᓴᖏᓐᓄᑦᒪ ᐱᓗᐊᖅᑐᒥ ᓄᕙᒡᔪᐊᕐᓇᖅ-19−ᖑᔫᑉ ᐊᒃᑐᐃᓂᐅᔪᓄᑦ ᐃᒡᓗᖃᑎᒌᖑᔪᓂ ᐸᖕᒥᐅᓗᐊᖅᑐᓂ ᐊᖏᕐᕋᐅᔪᓂ.

ᓄᓇᕗᒻᒥ ᑲᓇᑕᐅᑉ ᒪᓕᒐᓕᐅᖅᑎᖏᓐᓂ ᐃᓚᒋᔭᐅᔪᖅ ᒧᒥᓛᖅ ᖃᖅᑲᖅ ᑕᐃᒪᓐᓇᑎᒋ ᑲᒪᓚᐅᙱᓚᖅ ᐱᑕᖃᙱᓗᐊᕐᓂᖓᓂ ᑐᕌᖓᔪᓂ ᑮᓇᐅᔭᖃᖅᑎᑕᐅᓂᐅᔪᓂ.

“ᖃᓪᓗᓈᑦ ᓄᓇᖓᑎᑑᙱᑦᑐᖅ, ᐃᓄᐃᑦ ᐊᒻᒪ ᓄᓇᕗᒻᒥᐅᑦ ᐃᓅᓯᒪᕗᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥ, ᐃᒡᓗᒃᓴᖃᖅᑎᑕᐅᓂᕐᒥ ᐊᒻᒪ ᐃᓄᖕᓄᑦ ᐱᔪᓐᓇᕐᓂᕆᔭᐅᔪᓂ ᑐᐊᕕᕐᓇᕐᓂᐅᔪᒥ ᐊᕐᕌᒍᒐᓵᓗᖕᓄᑦ,” ᖃᖅᑲᖅ ᐅᖃᓚᐅᖅᐳᖅ. “ᐱᔾᔪᑎᖓ ᐆᒪᙵᑦ ᑐᐊᕕᕐᓇᕐᓂᐅᔪᒥ ᓇᓗᓇᙱᓚᖅ: ᒐᕙᒪᑐᖃᒃᑯᓐᓂ ᑮᓇᐅᔭᖃᖅᑎᑕᐅᓂᑭᓗᐊᕐᓂᐅᔪᒥ.”

ᑭᓯᐊᓂ, ᐱᔪᓐᓇᕆᕗᒍᑦ ᐸᐅᒃᑑᑎᒃᑯᑦ ᐊᖓᔪᖅᑳᖓᓂ ᕇᐱᑲ ᑲᓪᓘᑉ ᐅᖃᐅᓯᖏᓐᓂ ᑲᔪᖏᖅᓴᐃᓂᐅᔪᒥ ᑕᑯᓪᓗᓂ ᐆᒥᖓ ᑮᓇᐅᔭᑦ ᐊᑐᖅᑐᒃᓴᓂᑦ: “ᒐᕙᒪᑐᖃᒃᑯᑦ ᓱᒃᑲᒃᑎᒋᐊᖅᓯᕗᖅ ᖃᓄᐃᓕᐅᕐᓂᐅᔪᒥ ᑭᐅᓂᕐᒧᑦ ᑐᐊᕕᕐᓇᖅᑐᒥ ᐱᔭᕆᐊᖃᓪᓚᕆᖕᓂᐅᔪᓂ ᐃᓄᖕᓄᑦ ᐊᕐᓇᓄᑦ” ᐅᕘᓇ ᓇᑉᐸᖅᑎᕆᓂᕐᒥ ᐊᒻᒪᓗ ᐊᐅᓚᑦᑎᓂᕐᒥ ᐃᒡᓗᒋᔭᐅᓚᐅᑲᖃᑦᑕᕐᓂᐊᖅᑐᓂ ᐃᓄᖕᓄᑦ ᐊᕐᓇᓄᑦ, ᖄᒃᑲᓐᓂᐊᒍᑦ ᑮᓇᐅᔭᖃᖅᑎᑦᑎᓂᕐᒥ ᐃᓄᖕᓄᑦ−ᑐᕌᖓᔪᓄᑦ ᐊᑦᑕᓇᙱᑦᑐᓂ ᕿᒫᕝᕕᓂᑦ ᐅᖃᐅᓯᐅᓚᐅᖅᑐᒥ ᓯᕗᓂᐊᓂ ᑕᒪᑐᒪᓂ ᐊᕐᕌᒎᔪᒥ.

ᒐᕙᒪᑐᖃᒃᑯᑦ ᑮᓇᐅᔭᑦ ᐊᑐᖅᑐᒃᓴᑦ ᐱᐅᓪᓚᕆᒍᓐᓇᙱᓚᖅ, ᑭᓯᐊᓂ ᑲᔪᖏᖅᓴᓪᓗᐊᖅᐳᒍᑦ ᐊᒃᓱᓪᓘᓐᓃᑦ ᐃᓚᖏᑦ ᓄᓇᕗᒻᒥᐅᑦ ᐅᖃᖅᓯᒪᔭᖏᓐᓂ ᐱᔭᕆᐊᓕᖏᓐᓂ ᑲᓇᑕᒥ ᑐᓴᖅᑕᐅᕙᓪᓕᐊᕗᑦ.

Leave a comment

Your email address will not be published. Required fields are marked *