ᐊᑭᐅᔪᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᒻᒪᓗ ᑮᓇᐅᔭᒃᑯᕕᖕᓄᑦ ᐊᒥᓱᓂ ᐱᔾᔪᑎᑕᖃᒃᑲᓐᓂᐅᔭᓕᖅᐳᖅ ᓯᒡᒐᓕᐊᓂᒃ ᐃᒃᓯᓐᓇᐃᓂᕐᒥ ᐃᓅᓯᓕᒫᒧᑦ
ᐊᑲᐅᙱᓕᐅᕈᑎ: ᑕᕝᕚᑭᒥ ᐊᑐᕐᓂᕐᒧᑦ
ᐅᖃᖅᐳᒍᑦ: ᑮᓇᐅᔭᐃᑦ ᐳᔪᕐᒧᐊᑐᐃᓐᓇᖅᑐᑦ
ᑕᕝᕚᑭᒥ ᐊᑐᕐᓂᕐᒥ ᓄᓇᕗᒻᒥ ᐊᐅᓚᑕᒃᓴᐅᔪᓐᓃᖅᐳᖅ –2018–ᒥ ᓄᓇᕗᒻᒥ ᒐᕙᒪᒃᑯᓐᓂ ᐅᓂᒃᑳᓕᐊᖑᔪᒥ, ᓴᖅᑭᑎᑕᐅᓚᐅᖅᐳᖅ 74 ᐳᓴᓐᑎᒥ ᓄᓇᕗᒻᒥᐅᓂ ᐅᑭᐅᓕᖕᓂ 16–ᓂ ᐊᒻᒪ ᐅᖓᑖᓂ ᐃᓛᓐᓂᓚᐅᓱᖓᕐᒥ ᐅᕝᕙᓘᓐᓃᑦ ᖃᐅᑕᒫᒥ ᓱᐴᖅᑐᖅᑎᐅᓂᖏᓐᓂ.
51 ᐳᓴᓐᑎᒥ ᓱᕈᓯᕐᓂ ᐅᑭᐅᓕᖕᓂ 12-19–ᒧᑦ ᐆᒃᑐᖅᓯᒪᕗᑦ ᐅᕝᕙᓘᓐᓃᑦ ᐅᐃᕆᓯᒪᓕᖅᖢᑎᒃ ᐊᑐᓲᖑᕗᑦ ᑕᕝᕚᑭᒥ ᓴᓇᓯᒪᔪᓂ. ᐅᑯᐊ ᐅᓄᕐᓂᐅᔪᑦ ᖄᖏᐅᑎᕐᔪᐊᖅᐳᑦ ᑲᓇᑕᐅᑉ ᑕᐃᒪᐃᒐᔪᖕᓂᖓᓂ 15.8–ᒥ ᐊᒻᒪᓗ 7.7 ᐳᓴᓐᑎᒥ, ᒪᓕᖃᑦᑕᐅᑎᓪᓗᑎᒃ.
ᖃᓂᒋᓛᑦᑎᓐᓂ ᓴᓂᓕᕗᑦ ᓄᓇᑦᓯᐊᕐᒥ ᐅᓂᒃᑲᐅᓯᖃᑐᐃᓐᓇᕈᓐᓇᖅᐳᑦ 34 ᐳᓴᓐᑎᒥ ᐃᓄᒋᐊᖕᓂᖏᓐᓂ ᓱᐴᖅᑐᓚᐅᓲᓂᒃ ᐅᕝᕙᓘᓐᓃᑦ ᖃᐅᑕᒫᒥ ᓱᐴᖅᑐᖅᑎᐅᓂᖏᓐᓂ.
ᓄᓇᕐᔪᐊᒥ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑲᑐᔾᔨᖃᑎᒌᖑᔪᑦ ᑕᐃᓯᕗᖅ "ᑕᕝᕚᑭᒥ ᐊᐃᑦᑐᐃᓐᓇᖅᑐᒥ ᐋᓐᓂᐊᕐᓇᒥ ... ᐊᑕᐅᓯᐅᓪᓗᓂ ᐊᖏᓛᖑᖃᑕᐅᔪᒥ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐅᓗᕆᐊᓇᕈᑕᐅᔪᒥ ᓄᓇᕐᔪᐊᑉ ᓵᙵᓂᕆᔭᖓᓐᓂ."
ᑕᒪᑦᑕᒐᓚᒃ ᑐᓴᖅᓯᒪᕗᒍᑦ ᐃᓂᖅᑎᕆᓂᐅᔪᓂ ᐱᔾᔪᑎᖃᖅᑐᒥ ᐊᖏᒡᓕᒋᐊᖅᑐᒥ ᐅᓗᕆᐊᓇᕐᓂᖓᓂ ᑳᓐᓱᓂᑦ ᐊᒻᒪ ᐆᒻᒪᑎᒧᑦ ᐊᒻᒪ ᐳᕙᖕᓄᑦ ᐋᓐᓂᐊᕐᓇᐅᔪᓂ ᑎᑭᑉᐸᒃᑐᓂ ᑕᕝᕚᑭᒥ ᐊᑐᕐᓂᕐᒧᑦ, ᓲᖃᐃᒻᒪ, ᐃᓕᓯᒪᐅᕐᒪᑕ ᑕᒪᒃᑭᓂ ᐴᖑᔪᓂ ᐱᕙᖕᓂᑦᑎᓐᓂ ᑕᐃᒃᑯᓂᖓ ᐃᓗᕕᕐᒧᑦ ᑭᑭᐊᖑᔪᓂ. 90 ᐳᓴᓐᑎᐸᓗᖕᒥ ᐳᕙᖕᓂ ᑳᓐᓱᓂ ᐱᑎᑕᐅᓲᖑᕗᑦ ᑕᕝᕚᑭᒥ ᐊᑐᕐᓂᕐᒧᑦ ᐊᒻᒪ ᓄᓇᕗᑦ ᐅᓄᕐᓂᖃᖅᐳᖅ ᐱᖓᓱᐃᓪᓗᐊᖅᑐᒥ ᓱᒃᑲᓂᖅᓴᐅᔪᒥ ᑕᐃᑲᙵᓂ ᑲᓇᑕᐅᑉ ᑕᐃᒪᐃᒐᔪᖕᓂᖓᓂ ᑕᐃᒪᐃᑦᑐᓄᑦ ᑳᓐᓲᔪᓄᑦ.
ᓱᐴᖅᑐᖃᑦᑕᕐᓂᖅ ᐱᐅᙱᒋᐊᖅᑎᑦᑎᓲᖑᕗᖅ ᐊᓂᖅᓵᖅᑐᕈᑎᖏᓐᓂ ᒥᑭᒡᓕᓯᒪᔪᓄᑦ, ᐊᖏᒡᓕᒋᐊᖅᑎᑦᑎᕗᖅ ᐳᕙᖕᒥᒍᑦ ᐃᒻᒪᒃᓯᒪᓂᕐᒧᑦ ᐊᒻᒪᓗ ᖃᓄᐃᓕᐅᕐᓂᐅᒐᔪᒃᑐᓂ ᐊᔪᕐᓇᕐᓂᖅᓴᐅᑎᑦᑎᓪᓗᓂ ᐱᔾᔪᑎᖃᖅᑐᒥ ᒥᒃᖠᒋᐊᖅᑐᒥ ᐳᕙᖕᒥ ᐱᔪᓐᓇᕐᓂᖓᓂ. ᑭᒍᑎᓄᑦᑕᐅᖅ ᐱᐅᙱᓐᓂᕗᖅ.
ᖃᐅᔨᓴᖅᑕᐅᓂᖅ ᐱᓕᕆᐊᖑᓚᐅᖅᑐᒥ ᓄᓇᕗᒻᒥ ᒐᕙᒪᒃᑯᓐᓂ ᕿᑭᖅᑖᓗᒃ ᐊᕕᒃᑐᖅᓯᒪᓂᖓᓂ ᑕᑯᒃᓴᐅᑎᑦᑎᕗᖅ 80 ᐳᓴᓐᑎᒥ ᐊᓈᓇᐅᔪᓂ ᓱᐴᖅᑐᖃᑦᑕᖅᑐᓂ ᓯᖓᐃᓂᓕᒫᖓᓐᓂ, ᐃᑲᔪᖅᓱᐃᔪᒥ ᐊᑦᑎᒃᑐᒥ ᐃᕐᓂᐊᖑᔪᒥ ᐅᖁᒪᐃᓐᓂᖓᓐᓂ ᐊᒻᒪᓗ ᐃᕐᓂᓵᓕᓗᐊᕐᓂᖓᓂ.
ᑭᒡᓕᖃᑐᐃᓐᓇᙱᓚᖅ ᓯᒡᒐᓕᐊᓄᑦ. ᑕᒧᐊᔭᐅᓲᑦ ᑕᕝᕚᑭ ᐅᕝᕙᓘᓐᓃᑦ ᑎᐹᒃ ᑕᐃᒪᓐᓇᑎᒋ ᐅᐃᕆᓐᓇᕆᕗᖅᑕᐅᖅ ᐊᒻᒪᓗ ᐱᐅᙱᑎᒋᓪᓗᓂ ᐋᓐᓂᐊᖃᕐᓇᙱᑦᑐᓕᕆᓂᕐᓄᑦ. ᐳᔫᕈᑕᐅᔪᓂ ᐊᑐᐃᓐᓇᖃᖅᑎᑦᑎᒋᕗᖅ ᑕᐃᒪᓐᓇᑎᒋ ᐅᐃᕆᓐᓇᖅᑐᒥ ᐊᒃᑐᐃᓂᐅᔪᒥ ᒪᒪᖅᑐᓂ ᑎᐱᖃᐅᖅᑐᓄᑦ ᐱᔪᒥᓇᕐᓂᖅᓴᐅᓪᓗᓂ ᒪᒃᑯᒃᑐᓄᑦ, ᐊᒻᒪᓗ ᑕᐃᒃᑯᓄᖓ ᐅᑭᐅᓕᖕᓂ 25 ᑐᖔᓂ ᐃᓄᒋᐊᕐᓂᐅᔪᒥ ᓇᑉᐸᓪᓗᐊᕆᔭᖓᓐᓂ.
ᓱᓐᓂᕈᑕᐅᓲᑦ ᓱᐴᖅᑐᒐᑦᑕᐅᖅ, ᐃᓚᒋᔭᐅᖃᑕᐅᕗᖅ ᓇᐃᓴᐅᓯᕆᓂᐅᔪᒥ, ᐱᓂᖅᓴᒃᑲᓐᓂᐅᒻᒪᕆᒃᖢᓂ ᐊᖏᔪᒥ ᖃᓄᐃᓐᓂᐅᔪᒥ ᐱᑕᖃᐃᓐᓇᖅᑐᒥ ᑲᙳᓇᕐᓂᖓᓂ ᑭᕕᒃᑕᐅᕙᓪᓕᐊᓕᕐᒪᑦ ᐊᑐᖅᑕᐅᓂᖓᓄᑦ ᐊᒻᒪᓗ ᐊᑐᐃᓐᓇᐅᒃᑲᓐᓂᓕᕐᓂᖓᓂ ᐱᕋᔭᒍᑕᐅᙱᓐᓂᖓᓄᑦ ᓴᖅᑭᓯᒪᓕᕐᓂᖓᓂ.
ᓄᓇᕗᒻᒥ ᒐᕙᒪᒃᑯᑦ ᑭᒡᓕᖃᖅᑎᑦᑎᓯᒪᕗᖅ ᑕᕝᕚᑭᒥ ᐊᑐᕐᓂᕐᒥ ᓄᓇᕗᒻᒥ, ᓇᓗᓇᐃᖅᑕᐅᓯᒪᓂᖓᓂ 2018–ᒥ ᑕᕝᕚᑭᒥ ᐊᐅᓚᑕᐅᓂᖓᓄᑦ ᐊᒻᒪ ᓱᐴᖅᑐᕐᕕᐅᔭᕆᐊᖃᙱᓐᓂᐅᔪᓂ ᐃᓂᐅᔪᓂ ᒪᓕᒐᖓᓐᓂ ᐅᖃᖃᑎᖃᕐᓂᐅᔪᒥ ᐅᓂᒃᑳᓕᐊᒥ.
ᐅᓂᒃᑳᓕᐊᖅ ᐅᖃᖅᓯᒪᕗᖅ: "ᐅᒃᑐᐱᕆ 2018–ᒥ, ᓄᓇᕘᑉ ᓱᓐᓂᕈᑕᐅᓲᓂ ᓱᐴᖅᑐᒐᕐᓂ ᒪᓕᒐᖓ ᐊᒻᒪ ᓱᓐᓂᕈᑕᐅᓲᓂ ᓱᐴᖅᑐᒐᕐᓂ ᒪᓕᒐᖅᑎᒎᖓᔪᓂ ᐊᒻᒪ ᐃᓚᒋᐊᕈᑕᐅᔪᓂ ᒪᓕᒐᕐᒥ ᑕᒪᒃᑭᑦ ᓴᖅᑭᑎᑦᑎᓚᐅᖅᐳᑦ ᐊᖏᐸᓗᒃᑐᓂ ᐊᓯᔾᔨᕐᓂᐅᔪᓂ ᓄᓇᕘᑉ ᑕᕝᕚᑭᒧᑦ ᐊᐅᓚᑕᐅᓂᖓᓄᑦ ᐱᖁᔭᐅᔪᒥ ᐋᖅᑭᒃᓯᒪᓂᐅᔪᒥ ᐊᖏᒡᓕᒋᐊᖅᑐᒥ ᓱᐴᖅᑐᖃᑦᑕᕆᐊᖃᙱᓐᓂᐅᔪᒥ ᐊᕕᒃᓯᒪᓂᐅᔪᓄᑦ ᐃᓂᐅᔪᓂ, ᓄᑖᓂ ᓱᐴᖅᑐᕆᐊᖃᙱᓐᓂᐅᔪᓂ ᐃᓂᐅᔪᓂ ᐊᒻᒪᓗ ᓄᑖᙳᕆᐊᖅᑎᑕᐅᓯᒪᔪᒥ ᑐᑭᓕᐊᖑᓂᖓᓂ ᓱᐴᖅᑐᕐᓂᕐᒧᑦ ᐃᓚᖃᖅᑐᒥ ᑕᕝᕚᑭᒥ, ᓱᓐᓂᕈᑕᐅᓲᓂ ᓱᐴᖅᑐᒐᕐᓂ, ᐊᒻᒪ ᐳᔫᖅᑎᑦᑎᓂᐅᔪᓂ. ᐅᑯᐊ ᓯᕗᓪᓕᖅᐸᐅᓪᓗᑎᒃ ᐊᓯᔾᔨᕐᓂᐅᓚᐅᖅᐳᑦ ᓴᓇᔭᐅᔪᓂ ᑕᕝᕚᑭᒥ ᐊᐅᓚᑕᐅᓂᖓᓄᑦ ᐱᖁᔭᐅᔪᓂ ᐊᕐᕌᒍᓄᑦ 15–ᓄᑦ."
ᐅᖃᐅᓯᐅᓪᓗᓂ ᐅᓂᒃᑳᓕᐊᒥ, 93–ᓂ ᓚᐃᓴᓐᓯᓕᖕᓂ ᑕᕝᕚᑭᒥ ᓂᐅᕕᕐᕕᒃᑕᖃᖅᐳᖅ ᓄᓇᕘᑉ 25–ᖑᔪᓂ ᓄᓇᓕᐅᔪᓂ.
ᐊᕐᕌᒍᑕᒫᑦ, ᖃᓂᒋᔭᖓᓂ 60 ᒥᓕᐊᓐᓂ ᓯᒡᒐᓕᐊᓂ ᓂᐅᕕᖅᑕᐅᕙᒃᐳᑦ ᓄᓇᕗᒻᒥ. ᑕᐃᒫᒃ 60 ᒥᓕᐊᓐᓂ ᓯᒡᒐᓕᐊᓂ ᓄᙳᕐᓗᑯᓂ ᐊᒃᑕᕐᕕᑦᑎᓐᓂ, ᐊᖅᑯᑎᑦᑎᓐᓂ ᓴᓂᐅᑎᑦᑎᔪᓂ ᐊᒻᒪᓗ ᐲᖅᑕᐅᕙᒃᑐᓂ ᐃᒪᖃᕐᕕᑦᑎᓐᓂ ᐅᕝᕙᓘᓐᓃᑦ ᐊᕝᕗᖅᑕᐅᔪᓂ ᓯᒡᔭᓂᑦ.
ᖃᓂᒋᔭᖓᓂ $1–ᑐᖅᑐᒥ ᐊᑐᓂ ᓯᒡᒐᓕᐊᒥ, ᑕᒪᓐᓇ $60 ᒥᓕᐊᓐᓂ ᐃᑭᑎᑕᐅᓪᓚᕆᒃᑐᒥ ᐊᕐᕌᒍᑕᒫᒥ. ᐊᒻᒪᓗ, 2019–ᒥ 2020–ᒧᑦ ᒐᕙᒪᑐᖃᒃᑯᑦ ᐱᓚᐅᖅᐳᑦ ᐅᓄᕐᓂᖅᓴᐅᔪᒥ $22 ᒥᓕᐊᓐᓂ ᑖᒃᓯᓂᑦ ᑮᓇᐅᔭᓄᑦ ᐃᓯᖅᐸᓪᓕᐊᔪᓄᑦ ᑕᕝᕚᑭᓂ ᓂᐅᕕᖅᑕᐅᓂᐅᔪᓄᑦ ᓄᓇᕗᒻᒥ.
ᐃᓕᓐᓂᐊᕐᓂᖅ ᐊᒻᒪᓗ ᐅᖃᐅᓯᒃᓴᓂ ᑕᑯᒃᓴᐅᑎᑦᑎᓂᐅᔪᑦ ᐱᒻᒪᕆᐅᓪᓗᑎᒃ ᐃᓚᒋᔭᐅᕗᑦ ᓇᓗᓇᕐᓂᐅᔪᒥ, ᐊᒻᒪᓗ ᐱᐅᕗᖅ ᓄᓇᕗᒻᒥ ᒐᕙᒪᒃᑯᑦ ᐱᓕᕆᓂᖏᓐᓂ ᓄᑖᙳᕆᐊᖅᑎᑦᑎᓂᕐᒥ ᐊᑐᐊᒐᐅᔪᓂ ᐊᒻᒪᓗ ᐱᖁᔭᕐᓂᑦ. ᓇᓗᓇᐃᖅᓯᓂᕐᒥ ᓱᕈᓰᑦ ᓱᐴᖅᑐᖃᑦᑕᓕᙱᓐᓂᖏᓐᓂ ᐱᐅᓂᖅᐹᖑᕗᖅ ᐱᓕᕆᓂᐅᓪᓗᓂ ᒥᒃᖠᒋᐊᖅᑎᑦᑎᓂᕐᒧᑦ ᑕᕝᕚᑭᒥ ᐊᑐᕐᓂᕐᒧᑦ ᓄᓇᕗᒻᒥ.
ᐊᖏᓛᖑᔪᒥ ᐊᓯᔾᔨᕐᓂᐅᔪᖅ ᐱᓕᕆᐊᖑᔭᕆᐊᖃᕐᓂᐊᖅᐳᖅ ᓄᓇᓕᖕᓂ ᑭᒡᓕᐅᔪᒥ, ᐊᒻᒪᓗ ᐊᖏᕐᕋᒥ, ᑭᓯᐊᓂ. ᐄᓪᓚᕆᒃ, ᐊᖏᖅᓯᒪᓂᖃᕆᐊᖃᖅᐳᖅ ᓄᖅᑲᕐᓂᕐᒧᑦ.