ᖄᖏᖅᓯᒪᔪᒥ ᐱᓇᓱᐊᕈᓯᐅᓚᐅᖅᑐᒥ, ᐋᒥᑦ ᕼᐅᓯᓐ, ᒐᕙᒪᑐᖃᒃᑯᓐᓂ ᒥᓂᔅᑕᖓ ᑲᒪᒋᔭᖃᖅᑐᖅ ᑲᓇᑕᒥ ᐊᑭᓕᐅᑕᐅᔪᒥ ᐃᒡᓗᒧᑦ ᓄᓇᒧᓪᓘᓐᓃᑦ ᐊᒻᒪ ᐃᒡᓗᓕᕆᔨᕐᔪᐊᒃᑯᓐᓄᑦ, ᐅᖃᐅᓯᖃᓚᐅᖅᐳᖅ $9.9 ᒥᓕᐊᓐᓂ ᑮᓇᐅᔭᖃᖅᑎᑦᑎᓂᐅᔪᒥ ᓱᒃᑲᔪᒥ ᐃᒡᓗᒃᓴᖃᖅᑎᑦᑎᓂᕐᒧᑦ ᐱᒋᐊᕈᑕᐅᔪᒥ ᑐᕌᕐᓂᐊᖅᑐᒥ ᓴᖅᑭᑎᑦᑎᓂᕐᒥ 24–ᓂ ᐊᑦᑎᒃᑐᒥ-ᑮᓇᐅᔾᔭᒃᓴᓂᐅᔪᓄᑦ ᐃᒡᓗᒃᓴᓂ ᐃᖃᓗᖕᓂ, ᐅᖅᓱᖅᑑᖅ ᐊᒻᒪ ᖁᕐᓗᖅᑑᒥ.
ᕼᐅᓯᓐ ᓇᓗᓇᐃᖅᓯᓚᐅᕆᕗᖅ $8 ᒥᓕᐊᓐᓂ ᑲᑎᖅᓱᖅᑕᐅᕙᓪᓕᐊᔪᓂ ᑮᓇᐅᔭᓂ ᑐᖅᑯᖅᑕᐅᓯᒪᓪᓗᑎᒃ ᐱᕈᖅᐸᓪᓕᐊᑎᑕᐅᔪᓂ ᑐᕌᖓᔪᒧᑦ ᐅᖂᑕᖅ ᐊᖑᑎᓄᑦ ᐃᒡᓗᖃᖅᑎᑕᐅᓚᐅᑲᒃᑐᓄᑦ ᐅᖅᑯᐊᖑᔪᒥ ᐃᖃᓗᖕᓂ, ᐃᒡᓗᖃᖅᑎᑦᑎᕙᒃᑐᒥ 60–ᓂ ᐃᓄᖕᓂ.
ᓂᕆᐅᖕᓂᖃᖅᐳᖓ ᐅᓇ ᐱᒋᐊᕐᓂᕆᓂᖓᓂ ᖄᒃᑲᓐᓂᐊᒍᑦ ᑮᓇᐅᔭᖃᖅᑎᑕᐅᓂᐅᔪᒥ ᑭᐅᓂᕐᒧᑦ ᐃᒡᓗᒃᓴᖃᕐᓂᕐᒧᑦ ᑐᐊᕕᕐᓇᕐᓂᐅᔪᒥ ᓄᓇᖁᑎᑦᑎᓐᓂ,” ᐅᖃᓚᐅᖅᐳᖅ ᐃᓄᓕᕆᔨᒃᑯᓐᓂ ᒥᓂᔅᑕᖓ ᐃᓕᓴᐱ ᓯᐅᑎᐊᐱᒃ, ᒪᓕᒃᑐᒥ ᐋᒍᔅᑎ 3–ᒥ ᐅᖃᐅᓯᒃᓴᓕᐊᖑᔪᒥ.
ᐊᓯᐊᒎᕐᕕᒃᓴᖃᓗᐊᙱᓚᖅ ᑭᓯᐊᓂ ᓂᕆᐅᖕᓂᖃᐃᓐᓇᕐᓂᕐᒧᑦ, ᑕᑯᓚᐅᕐᓚᕗᑦ, 24–ᓂ ᐊᖏᕐᕋᒃᓴᓂ ᒥᑭᑦᑐᒻᒪᕆᑯᓘᕗᖅ ᐱᔭᕆᐊᓕᖕᓄᑦ.
142–ᓂ ᐃᓄᖕᓂ ᐅᑕᖅᑭᔪᓄᑦ ᑎᑎᕋᖅᑕᐅᓯᒪᔪᓄᑦ ᐃᒡᓗᒃᓴᓄᑦ ᐅᖅᓱᖅᑑᒥᑐᐊᖅᔭ ᐅᓄᕐᓂᐅᔪᒥ ᒥᒃᖠᒋᐊᖅᑕᐅᓂᖓᓂ 132–ᓄᑦ, ᐸᕐᓇᒃᑕᐅᓯᒪᔪᒥ ᐃᖅᑲᓇᐃᔭᖅᑎᓄᑦ–ᐃᒡᓗᒃᓴᓂ ᓴᓇᔭᐅᓂᐅᔪᓄᑦ ᐅᖅᓱᖅᑑᒥ ᓴᖑᑎᑕᐅᓪᓗᓂ ᐃᓄᓕᒫᓄᑦ ᐃᒡᓗᒃᓴᖏᓐᓄᑦ ᑐᙵᓇᕆᔭᐅᓪᓗᓂ ᐱᒋᐊᕐᓂᐅᕗᖅ, ᑭᓯᐊᓂ ᓄᓇᕗᒻᒥ ᒐᕙᒪᒃᑯᑦ ᖁᓱᔪᒃᓴᐅᕗᑦ ᐊᖏᔪᒻᒪᕆᐊᓗᖕᒥ ᐱᔭᕆᐊᖃᕐᓂᐅᔪᓄᑦ.
ᐃᓘᖃᐃᓐᓇᕐᓂᕐᒥ ᐃᓅᑉ ᓂᐊᖁᖓᑕ ᖁᓛᓂ ᐃᒃᐱᖕᓇᕐᓂᖃᓪᓗᐊᙱᓚᖅ ᓵᓚᒃᓴᕐᓂᕐᒥ ᑮᓇᐅᔭᖅᑖᕐᓂᕐᔪᐊᓂ, ᐊᒻᒪ ᒪᒃᑯᒃᑐᑦ, ᐃᓕᓐᓂᐊᖅᓯᒪᑦᑎᐊᖅᑐᑦ ᓄᓇᕗᒻᒥᐅᑦ ᕿᓂᙱᓚᑦ ᑐᓂᔭᐅᑐᐃᓐᓇᕐᓂᐅᔪᓂ.
ᑲᖏᖅᖠᓂᕐᒥ, ᓄᓇᖃᖅᑎᐅᔪᖅ ᐊᐅᒐᑦᓈᖅ ᐃᑯᓪᔅ ᐅᖃᓚᐅᖅᐳᖅ ᐊᑲᐅᙱᓕᐅᕈᑕᐅᔪᖅ ᐱᑕᖃᐃᓐᓇᖅᐳᖅ ᐅᓄᙱᓗᐊᖅᑐᑯᓗᖕᓂ ᐃᒡᓗᒃᓴᒧᑦ ᓂᕈᐊᒐᒃᓴᖃᙱᓐᓂᖏᓐᓂ, ᐱᑕᖃᖅᐸᒌᖅᑐᓂ ᐃᒡᓗᒃᓴᐅᔪᑦ ᓂᐅᕕᐊᒃᓴᙳᒐᔪᙱᓚᑦ ᐊᒻᒪ ᓴᖅᑭᑦᑕᕌᖓᒥᒃ, ᐃᒻᒥᒃᑰᖅᑐᒥ ᓂᐅᕕᐊᒃᓴᐅᕙᒃᐳᑦ ᒪᑐᐃᖓᓂᐅᔪᒥ ᓂᐅᕕᐊᒃᓴᕆᔭᐅᕙᙱᖦᖢᑎᒃ.
ᓴᓇᓂᕐᒥ ᐊᖏᕐᕋᒃᓴᒥ ᓄᓇᒥᑦ ᑕᑉᐸᐅᖓ ᑎᑭᐅᑎᔭᒃᓴᐅᙱᓚᖅ ᑕᒪᒃᑭᐸᓗᖕᓄᑦ, ᑎᑭᐅᑎᓪᓗᓂ ᖃᓂᒋᔭᖓᓄᑦ $500,000–ᓄᑦ ᓇᑉᐸᖅᑎᕆᓂᕐᒧᑦ ᒪᕐᕉᖕᓂ–ᐃᒡᓗᕈᓯᓕᖕᒥ ᐊᖏᕐᕋᐅᔪᒧᑦ.
ᐃᑯᓪᔅ ᓇᓗᓇᐃᖅᓯᓂᖃᑦᑎᐊᖅᐳᖅ, ᐃᓚᒋᐊᖅᓯᓪᓗᓂ, “ᑕᐃᒃᑯᓄᖓ ᐃᓂᖃᖅᑐᒥ ᐊᑭᓖᔪᓐᓇᕐᓂᕐᒧᑦ ᓇᖕᒥᓂᖅ ᐃᒡᓗᒃᓴᖏᓐᓂ ᓴᓇᔭᐅᓂᖓᓂ ᐱᓕᕆᔪᓐᓇᖅᐸᑕ ᐊᑭᑐᓗᐊᕌᓗᙱᑦᑐᒥ, ᐲᖅᓯᓇᔭᖅᐳᖅ ᐃᒡᓗᖃᕆᐊᓕᖕᓄᑦ ᐃᒡᓗᒃᓴᓂ.”
ᒫᒡᒍᓕᑦ ᓇᑲᓱᒃ, ᒥᓂᔅᑕ ᑲᒪᒋᔭᖃᖅᑐᒥ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᓐᓄᑦ, ᐅᖃᓚᐅᖅᐳᖅ ᐊᖏᕐᕋᒥ ᓇᖕᒥᓂᖃᕐᓂᕐᒧᑦ ᖃᓱᒋᐊᖅᑎᑦᑎᓇᔭᖅᐳᖅ ᐊᒃᓱᕈᕐᓂᐅᔪᒥ ᐃᓄᓕᒫᓄᑦ ᐃᒡᓗᓕᕆᓂᕐᒧᑦ ᐱᓕᕆᔾᔪᓯᐅᔪᒥ, ᑎᑭᐅᑎᔭᒃᓴᙱᓚᖅ ᐊᒥᓱᓄᑦ.
“91 ᐳᓴᓐᑎᒥ ᐃᓄᓕᒫᓄᑦ ᐃᒡᓗᖃᖅᑎᑦᑎᓂᐅᔪᒥ ᐃᒡᓗᖃᖅᑐᓄᑦ, ᐊᑭᖓᓂ ᓂᐅᕕᕐᓂᕐᒧᑦ ᐊᒻᒪ ᐋᖅᑭᐅᒪᑎᑦᑎᓂᕐᒧᑦ ᓇᖕᒥᓂᖓᓐᓂ ᐊᖏᕐᕋᖓᓂ ᐊᑭᑐᔪᕐᔪᐊᖑᕗᖅ. ᓇᓚᐅᑦᑖᕆᕗᒍᑦ ᐅᓄᙱᑎᒋᔪᓂ 16 ᐳᓴᓐᑎᒥ ᐃᓚᒌᖑᔪᓄᑦ ᐊᑭᓖᔪᓐᓇᕋᔭᕐᓂᖏᓐᓂ ᓇᖕᒥᓂᖅ ᐊᖏᕐᕋᖃᕐᓂᖏᓐᓄᑦ,” ᓇᑲᓱᒃ ᑎᑎᕋᓚᐅᖅᐳᖅ.
ᓄᓇᕗᒻᒥ ᑐᙵᕕᒃᑯᑦ ᐊᒥᓲᖅᓱᖅᖢᑎᒃ ᑐᒃᓯᕋᖅᓯᒪᕗᑦ ᒐᕙᒪᑐᖃᒃᑯᓐᓂ, ᐊᐱᕆᓪᓗᑎᒃ $500 ᒥᓕᐊᓐᓂ ᑮᓇᐅᔭᖃᖅᑎᑕᐅᓂᐅᔪᓂ ᐱᒋᐊᕐᓂᕐᒧᑦ ᑭᐅᒋᐊᖅᓯᓂᕐᒥ ᐃᒡᓗᒃᓴᖃᖅᑎᑕᐅᓂᕐᒧᑦ ᑐᐊᕕᕐᓇᕐᓂᐅᔪᒥ ᓄᓇᕗᒻᒥ. ᓄᓇᑖᖅᓯᒪᓂᐅᔪᒧᑦ ᑲᑐᔾᔨᖃᑎᒌᖑᔪᑦ ᐅᖃᐅᓯᖃᓚᐅᖅᐳᑦ ᐊᐃᑦᑖᕈᓱᖕᓂᐅᔪᒥ ᒥᑭᑦᑐᑯᓗᖕᒥ ᑮᓇᐅᔭᓂ ᓇᓗᓇᐃᖅᑕᐅᓯᒪᔪᒥ ᓄᓇᕗᒻᒧᑦ ᒫᓐᓇᓕᓴᐅᓛᖑᔪᒥ ᑮᓇᐅᔭᓄᑦ ᐊᑐᖅᑐᒃᓴᓄᑦ –$25-ᒥᓕᐊᓐᓂ “ᐃᒡᓗᒧᑦ ᐊᑭᖓᑕ ᐃᓛᕐᔪᖓᓂ ᐊᑭᓖᓂᐅᔪᒥ,” ᐅᑭᐅᖅᑕᖅᑐᒥ ᐱᓕᕆᓂᕐᒧᑦ ᒥᓂᔅᑕᖓ ᑖᓐ ᕚᓐᑎᐅᓪ ᐅᖃᐅᓯᕆᓚᐅᕐᓂᖓᓂ.
2018–ᒥ, ᒫᓐᓇᓕᓴᐅᓛᖑᔪᒥ ᐅᓂᒃᑳᕆᔭᐅᓯᒪᔪᒥ ᑮᓇᐅᔭᓄᑦ ᐅᖃᐅᓯᒃᓴᓕᐊᖑᔪᓄᑦ, ᐅᓄᕐᓂᖅᓴᐅᔪᒥ $1.7 ᐱᓕᐊᓐᓂ ᑲᑎᖅᓱᖅᑕᐅᕙᓪᓕᐊᔪᓂ ᑮᓇᐅᔭᓂ ᑐᖅᑯᖅᑕᐅᓯᒪᓪᓗᑎᒃ ᐱᕈᖅᐸᓪᓕᐊᑎᑕᐅᔪᓂ ᐱᖁᑎᒋᔭᐅᔪᓄᑦ ᓄᓇᕗᒻᒥ ᐸᐸᑦᑎᕕᖓᓂ. ᐱᔪᓐᓇᖅᑎᑖᖅᑎᑕᐅᓯᒪᔪᑦ ᐱᓚᐅᖅᐳᑦ $94 ᒥᓕᐊᓐᓂ ᐊᒻᒪ ᐊᑭᓕᒃᓴᖃᓚᐅᙱᓚᑦ ᐊᑭᓕᖅᑕᐅᓯᒪᙱᑦᑐᓄᑦ ᐊᑭᑐᔫᑎᓂ ᐱᖁᑎᒋᔭᐅᔪᓄᑦ ᐊᑐᖅᑕᐅᕐᓂᐅᔪᓂ.
ᐅᖃᐅᓯᐅᓪᓗᓂ ᐸᐸᑦᑎᕕᖓᑕ ᐃᑭᐊᖅᑭᕕᖓᓂ, ᑐᕌᒐᒃᓴᖓ ᑲᑎᖅᓱᖅᑕᐅᕙᓪᓕᐊᔪᓂ ᑮᓇᐅᔭᓂ ᑐᖅᑯᖅᑕᐅᓯᒪᓪᓗᑎᒃ ᐱᕈᖅᐸᓪᓕᐊᑎᑕᐅᔪᓂ ᐊᑭᑐᔫᑎᓂ ᓅᑕᐅᓂᐅᔪᓄᑦ ᐃᒻᒥᖕᓂ ᓴᐳᔾᔨᓯᒪᓂᕐᒧᑦ ᐊᒃᑐᐃᓂᐅᔪᓂ ᑮᓇᐅᔭᐃᑦ ᐊᑭᑭᒡᓕᒋᐊᕐᓂᖓᓄᑦ ᐊᒻᒪᓗ ᑐᓂᓯᓂᕐᒥ ᑮᓇᐅᔾᔭᒃᓴᓂᐅᔪᒥ ᐱᔪᓐᓇᖅᑎᑖᖅᑎᑕᐅᓯᒪᔪᓄᑦ.
ᐱᐅᓂᖅᓴᐅᔪᒥ ᐊᑐᕐᓂᐅᔪᒥ ᐊᖏᔪᒻᒪᕆᐊᓗᖕᒥ ᑮᓇᐅᔭᓂ ᓯᕗᓪᓕᖅᐹᖑᔪᒥ ᐊᑐᖅᑐᐊᕐᓂᕐᒧᑦ–ᓇᖕᒥᓂᖃᓕᖅᑎᑦᑎᓂᕐᒧᑦ ᐃᒡᓗᖃᖅᑎᑦᑎᓂᕐᒥ ᐱᓕᕆᐊᖑᔪᓐᓇᖅᐳᖅ, ᓄᓇᕗᒻᒥ ᑐᙵᕕᒃᑯᑦ ᐊᑐᖅᑐᐊᖅᑎᑦᑎᓗᓂ ᐱᔭᕆᐊᓕᖕᓂ ᑮᓇᐅᔭᓂᑦ ᓴᓇᓂᕐᒧᑦ ᐊᖏᕐᕋᒃᓴᐅᔪᓂ ᐊᑐᓂ ᓄᓇᕗᒻᒥ ᓄᓇᓕᐅᔪᒥ ᐅᑎᖅᑎᒐᒃᓴᐅᓗᓂ ᐊᑭᖓᓐᓂ ᑐᙵᕕᓕᖕᒥ.
16 ᐳᓴᓐᑎᑐᐃᓐᓇᒥ ᓄᓇᕗᒻᒥᐅᑦ ᐊᑭᓖᔪᓐᓇᕈᑎᒃ ᐃᓚᒋᔭᐅᓂᕐᒧᑦ ᑕᐃᒪᐃᑦᑐᒥ ᐱᓕᕆᐊᖑᔪᒥ, ᑕᐃᓐᓇ ᑭᒡᒐᖅᑐᐃᓇᔭᖅᐳᖅ ᐅᓄᕐᓂᖅᓴᐅᔪᓂ ᐃᓄᖕᓂ ᓄᒃᑎᕐᓂᖏᓐᓂ ᐃᓄᓕᒫᓂ ᐃᒡᓗᖁᑎᖏᓐᓂ ᐊᒻᒪᓗ ᓯᕗᓂᒃᓴᒧᑦ ᓇᖕᒥᓂᖅ ᐊᐅᓚᑕᒥᓂᑦ.