ᐊᑲᐅᙱᓕᐅᕈᑎ: ᓴᓇᐅᒐᐃᑦ ᓄᓇᕗᒻᒥ
ᐅᖃᖅᐳᒍᑦ: ᐱᕈᖅᓴᐃᓗᓂ ᐃᓐᓄᒍᓐᓇᕐᓂᖓᓂ
ᐊᖏᓛᖑᔪᒥ ᐃᓄᓕᒫᓄᑦ ᑲᑎᖅᓱᖅᑕᐅᓂᐅᔪᒥ ᐃᓄᐃᑦ ᓴᓇᐅᒐᖏᓐᓂ ᐱᔭᕇᖅᐳᑦ ᑕᑯᒃᓴᐅᑎᑕᐅᓂᕐᒥ ᓄᓇᕐᔪᐊᓕᒫᒧᑦ, ᐊᒻᒪᓗ ᐅᐃᓂᐱᐊᒡᒦᑉᐳᖅ.
ᐱᐅᔪᐊᓘᓪᓗᓂ ᐃᒡᓗᕐᔪᐊᖑᕗᖅ, ᐊᒻᒪᓗ ᐱᓕᕆᐊᖑᔪᓂ ᐃᓄᖕᓂ−ᐊᐅᓚᑕᐅᓯᒪᕗᖅ ᐱᒋᐊᕐᓂᖓᓂ. ᖃᐅᒪᔪᖅ, ᐅᐃᓂᐱᐊᒡ ᓴᓇᐅᒐᓂ ᑕᑯᔭᒐᖃᕐᕕᒃ (WAG) ᓄᑖᖑᓛᒥ ᐃᓚᒋᐊᕈᑎᖓ, 40,000-ᑭᑉᐹᕆᒃᑐᒥ-ᐃᓯᒐᓪᓗᐊᓂ ᐃᓕᖅᑯᓯᒧᑦ ᐃᒡᓗᖁᑕᐅᕗᖅ ᑎᒍᒥᐊᖅᑐᒥ ᖃᓂᒋᔭᖓᓂ 14,000−ᓂ ᐃᓚᖏᓐᓂ ᐃᓄᐃᑦ ᓴᓇᐅᒐᖏᓐᓂ, ᐃᓚᖃᖅᑐᒥ ᓴᓇᙳᐊᒐᓂ, ᑎᑎᕋᐅᔭᒐᕐᓂ, ᓴᓇᙳᐊᒐᒧᑦ ᓴᓇᓯᒪᔪᒥ ᐊᒥᐊᒐᓂ, ᖃᓪᓗᓈᖅᑕᓂ, ᐊᒻᒪ ᓄᑖᖑᔪᓂ ᓯᐊᒻᒪᖅᑎᑦᑎᓂᐅᔪᓂ. ᐅᓇ ᐃᓚᖃᖅᐳᖅ ᐅᓄᕐᓂᖅᓴᐅᔪᓂ 7,385 ᐱᖁᑎᓂᑦ ᓄᓇᕗᒻᒥ ᒐᕙᒪᒃᑯᓐᓂ (GN) ᓴᓇᐅᒐᑦᑎᐊᕙᖏᓐᓂ ᑲᑎᖅᓱᖅᑕᐅᓯᒪᔪᓄᑦ, ᐊᑐᖅᑐᐊᖅᑕᐅᔪᓂ ᐱᔾᔪᑎᖃᖅᑐᒥ “ᐃᓂᒃᓴᒥ ᑭᒡᓕᖃᕐᓂᐅᔪᒥ.”
ᐱᒋᐊᕐᓂᖓᓂ ᐱᓕᕆᕝᕕᐅᔪᒥ, ᐃᓄᐃᑦ ᓄᓇᖓᑦ ᐅᖓᒻᒪᒃᑐᑦ ᐊᑕᐅᑦᑎᒃᑯᑦ ᑲᑎᖃᑎᖃᖅᐳᖅ ᐱᓕᕆᐊᖑᔪᓂ ᓴᖅᑭᑎᑕᐅᔪᓂ ᐅᓄᕐᓂᖅᓴᐅᔪᓂ 90−ᓂ ᐃᓄᖕᓂ ᓴᓇᐅᒐᓕᕆᔨᐅᔪᓂ ᐃᓄᐃᑦ ᓄᓇᖓᓐᓂ ᐊᒻᒪᓗᑦᑕᐅᖅ ᖃᓪᓗᓈᑦ ᓄᓇᖓᓐᓂᕐᒥᐅᑕᐅᔪᓂ, ᐅᑭᐅᖅᑕᖅᑐᒥ ᐱᓕᕆᖃᑎᒋᔭᐅᔪᓂ ᐊᒻᒪᓗ ᑲᑐᔾᔨᖃᑎᒌᖕᓂᐅᔪᓂ ᐊᓛᔅᑲᒥ ᐊᒻᒪᓗ ᑲᓛᖦᖠᐅᑉ ᓄᓈᓐᓂ.
ᑲᔪᖏᖅᓴᐃᓐᓇᖅᐳᖅ ᑕᑯᓂᕐᒥ ᐅᐃᓂᐱᐊᒡ ᓴᓇᐅᒐᓂ ᑕᑯᔭᒐᖃᕐᕕᖕᒥ ᓇᓗᓇᐃᖅᓯᓂᖏᓐᓂ ᐊᑐᕐᓂᖃᐅᑎᖓᓂ ᐱᖅᑯᓯᕆᙱᑕᓄᑦ ᐱᐅᓯᖃᖅᑎᑕᐅᓂᕐᒥ ᐃᓚᐅᖃᑕᐅᓂᖓᓂ ᑲᑎᖅᓱᐃᓂᖏᓐᓂ ᐊᒻᒪᓗ ᐊᖏᖅᓯᒪᓂᖓᓂ ᐱᓕᕆᖃᑎᖃᕐᓂᕐᒧᑦ ᓴᓇᐅᒐᓕᕆᔨᐅᔪᓂ ᓯᕗᒻᒧᑦ ᐃᖏᕐᕋᓂᕐᒧᑦ ᓴᐃᒻᒪᖃᑎᒌᖕᓂᕐᒧᑦ.
ᐅᖃᐅᓯᐅᓪᓗᓂ ᐅᐃᓂᐱᐊᒡ ᓴᓇᐅᒐᓂ ᑕᑯᔭᒐᖃᕐᕕᖓᓂ, “ᓂᐅᕕᖅᑎᒃᑯᑦ (HBC) ᐱᑕᖃᖅᓯᒪᕗᖅ ᐅᐃᓂᐱᐊᒡᒥ ᐊᒻᒪᓗ ᐃᓚᐅᖃᑕᐅᓚᐅᖅᐳᑦ ᐱᒋᐊᖅᑎᑕᐅᕙᓪᓕᐊᓂᖓᓂ ᓄᓇᕐᔪᐊᒥ ᐃᓄᐃᑦ ᓴᓇᐅᒐᓕᕆᓂᕐᒧᑦ ᓂᐅᕕᐊᒃᓴᐅᔭᖅᑐᖅᑎᓪᓗᒋᑦ. 1950−ᖏᓐᓂ, ᓴᓇᙳᐊᒐᑦ ᓂᐅᕕᖅᑕᐅᕙᓚᐅᖅᐳᑦ ᒥᖅᑯᓂ ᑕᐅᖅᓰᕕᐅᔪᓂ ᐃᓄᒃᔪᐊᕐᒥ, ᐳᕕᖕᓂᖅᑐᖅ, ᑭᙵᐃᑦ, ᐊᒻᒪ ᖃᔅᓯᒐᓚᖕᓂ ᐊᓯᖏᓐᓂ ᐃᓄᖕᓂ ᓄᓇᓕᐅᔪᓂ. ᑕᐃᒪᙵᓂ 1950−ᖏᓐᓂ, ᐃᓄᐃᑦ ᓇᖕᒥᓂᖃᖅᓯᒪᕗᑦ ᐊᒻᒪ ᐊᐅᓚᑦᑎᓪᓗᑎᒃ ᓴᓇᐅᒐᓕᕆᔨᕐᓄᑦ ᑯᐊᐸᐅᔪᓂ … ᓴᓇᙳᐊᒐᑦᑎᑭᓚᐅᖅᐳᑦ ᖃᓪᓗᓈᑦ ᓄᓇᖓᓐᓄᑦ ᐅᒥᐊᒃᑯᑦ ᐊᐅᔭᐅᑉ ᓄᙳᐊᓂ ᐅᑭᐊᒃᓵᒥᓪᓘᓐᓃᑦ ᐊᒻᒪᓗ ᓂᐅᕕᐊᒃᓴᐅᓚᐅᖅᐳᑦ…ᓄᓇᕐᔪᐊᓕᒫᒥ. ᐊᖏᔪᓂ ᓇᖕᒥᓂᖃᖅᑎᐅᔪᓂ ᑲᑎᖅᓱᐃᓂᐅᔪᓂ ᓴᖅᑭᑕᐅᓚᐅᖅᐳᑦ ᐅᐃᓂᐱᐊᒡᒥ ᐊᑐᐃᓐᓇᖃᕐᓂᖓᓄᑦ ᑕᒪᒃᑭᒐᓚᖕᓄᑦ ᓴᓇᙳᐊᒐᓂ ᑎᑭᑉᐸᓚᐅᖅᑐᓄᑦ ᓂᐅᕕᖅᑎᒃᑯᑦ ᐊᖓᔪᖅᑳᖃᕐᕕᖓᓂ ᓄᓇᓕᐸᐅᔭᒥ.”
ᖃᐅᒪᔫᑉ ᐃᓚᖓᓐᓂ ᐅᐃᓂᐱᐊᒡ ᓴᓇᐅᒐᓂ ᑕᑯᔭᒐᖃᕐᕕᖓᑕ ᐃᑭᐊᖅᑭᕕᖓᓂ ᐅᖃᖅᓯᒪᕗᑦ: “ᑕᑯᔭᒐᖃᕐᕕᖕᒥ ᐸᐸᑦᑎᔨᑦᑎᓐᓂ … ᐋᖅᑭᐅᒪᑎᑦᑎᕗᑦ ᓴᙱᔪᒥ ᐱᓕᕆᖃᑎᖃᕐᓂᐅᔪᒥ ᓴᓇᐅᒐᓕᕆᔨᐅᔪᓂ ᐳᓚᕋᖅᐸᒃᖢᑎᒃ ᐊᖏᕐᕋᖏᓐᓂ, ᐱᓕᕆᕝᕕᖏᓐᓂ, ᐊᒻᒪ ᓄᓇᓕᖏᓐᓂ, ᐊᒻᒪᓗ ᐃᓚᐅᖃᑕᐅᕙᒃᖢᑎᒃ ᓄᓇᒥ. ᓂᐅᕕᖅᐸᒃᐳᒍᑦ ᓴᓇᐅᒐᓂ ᑕᐃᑲᙵᓪᓚᕆᒃ ᓴᓇᐅᒐᓕᕆᔨᐅᔪᒥ ᓄᓇᓕᖏᓐᓂ, ᑯᐊᐸᒃᑯᓐᓂ ᐅᕝᕙᓘᓐᓃᑦ ᓄᓇᕐᔪᐊᒥ ᓴᓇᐅᒐᓕᕆᓂᕐᒧᑦ ᓂᐅᕕᐊᒃᓴᐅᕙᒃᑐᓄᑦ. ᖄᒃᑲᓐᓂᐊᒍᑦ, ᑲᑐᔾᔨᖃᑎᒌᓲᖑᕗᒍᑦ ᐊᓯᖏᓐᓂ ᑕᑯᔭᒐᖃᕐᕕᓂᑦ, ᑕᑯᒃᓴᐅᑎᑦᑎᕙᒃᑐᓂ ᐊᒻᒪᓗ ᐅᑭᐅᖅᑕᖅᑐᒥ ᑯᐊᐸᒃᑯᓐᓂ ᑕᑯᒃᓴᐅᑎᑦᑎᓂᕐᒧᑦ ᓴᓇᐅᒐᓕᐊᖑᔪᓂ ᐊᑐᖅᑐᐊᖅᑕᐅᔪᓄᑦ.”
ᐅᓇ ᐱᐅᕐᔪᐊᖅᖢᓂ ᑎᑭᐅᑎᓯᒪᔪᓐᓇᕐᓂᐅᕗᖅ, ᐊᒻᒪᓗ ᑕᑯᔭᒐᖃᕐᕈᖕᒥ ᐸᐸᑦᑎᔨᐅᔪᑦ ᖃᐅᒪᔪᕐᒥ ᐅᐱᒋᔭᐅᔭᕆᐊᖃᖅᐳᑦ ᐊᒃᓱᕈᖅᖢᑎᒃ ᐱᓕᕆᓂᖏᓐᓂ ᐆᒥᖓ ᑐᕌᒐᒃᓴᐅᔪᒥ ᐱᓪᓚᕆᙳᖅᑎᑦᑎᓂᖏᓐᓂ, ᐃᑳᕈᑎᒥᒃ “ᐅᑯᓄᖓ ᐃᓕᖅᑯᓯᐅᔪᓄᑦ, ᐅᑯᓄᖓ ᐅᑭᐅᖅᑕᖅᑐᒥ ᐊᒻᒪ ᖃᓪᓗᓈᑦ ᓄᓇᖓᓐᓄᑦ ᐊᒻᒪᓗ ᐅᑯᓄᖓ ᐱᐅᓯᖃᑎᒌᖑᔪᓄᑦ.”
ᓂᐱᖅᑯᖅᓯᑎᑦᑎᓂᕐᒥ ᐃᓄᐃᑦ ᓂᐱᖏᓐᓂ ᐱᔪᓐᓇᑐᐊᕌᖓᑕ ᐱᓪᓚᕆᐅᕗᖅ, ᐊᒻᒪᓗ ᐱᖃᕐᓗᓂ ᐆᒥᖓ ᐃᓕᖅᑯᓯᒧᑦ ᐃᓂᐅᔪᒥ ᖃᓪᓗᓈᑦ ᓄᓇᖓᓐᓂ ᑲᓇᑕᒥ ᑕᐃᒪᑐᖅ ᑕᑯᒃᓴᐅᑎᑦᑎᓂᐊᖅᐳᖅ ᐅᔾᔨᕈᓱᖕᓂᐅᔪᒥ ᑲᒪᓇᕐᔪᐊᖅᑐᓂ ᐱᓕᕆᐊᖑᔪᓂ ᓄᓇᕗᒻᒥᐅᓂ ᓴᓇᐅᒐᓕᕆᔨᐅᔪᓂᑦ.
ᐱᕈᖅᓴᐃᓂᕐᒥ ᐃᓐᓄᒍᓐᓇᕐᓂᖓᓂ ᓄᓇᕗᒻᒥ ᒪᓕᒃᑐᒥ ᐱᓕᕆᓂᐅᓂᐊᖅᐳᖅ ᓴᓇᐅᒐᓄᑦ ᓄᓇᕗᒻᒥ.
ᖃᒡᒋᐊᕘᑦ ᐃᑲᔪᖅᓱᐃᓯᒪᕗᑦ ᖁᙱᐊᖅᑕᐅᕙᒃᑐᓄᑦ ᐃᓂᐅᔪᒥ ᓄᓇᕗᒻᒥ ᐊᒥᓱᓄᑦ ᐊᕐᕌᒎᔪᓄᑦ, ᐊᒻᒪᓗ ᐃᖏᕐᕋᓂᐅᔪᒥ ᐱᓕᕆᐊᖑᕙᓪᓕᐊᑎᓪᓗᒍ ᑕᐃᑯᖓ ᑐᕌᒐᒃᓴᐅᔪᒧᑦ, ᑕᐃᑯᙵᕈᓐᓇᙱᓚᑦ ᐊᖏᕐᕋᒧᑦ ᑎᑭᓐᓂᖓᓂ ᑐᕌᖓᔪᒥ ᑮᓇᐅᔭᖃᖅᑎᑕᐅᓂᐅᔪᒥ ᓄᓇᕗᒻᒥ ᒐᕙᒪᒃᑯᓐᓂ.
ᓄᓇᕗᒻᒥᐅᑦ ᓴᓇᐅᒐᓕᕆᔩᑦ ᐊᒻᒪᓗ ᓴᓇᙳᐊᖅᑏᑦ ᐱᓪᓗᐊᖅᐳᑦ ᐃᑲᔪᖅᓱᐃᓂᐅᔪᒥ ᓇᐅᒃᑯᑐᐃᓐᓇᖅ ᑭᒡᓕᐅᔪᒥ ᑐᓂᔪᓐᓇᖅᑕᑦᑎᓐᓂ.
ᖃᔅᓯᒐᓚᖕᓂ ᒥᑭᓐᓂᖅᓴᐅᔪᓂ ᐱᒋᐊᕈᑎᑕᖃᖅᐳᖅ ᐊᓯᐊᓂ $52.4-ᒥᓕᐊᓐᒥ ᐊᖏᒡᓕᒋᐊᖅᑕᐅᓂᖓᓂ ᐅᐃᓂᐱᐊᒡ ᓴᓇᐅᒐᓂ ᑕᑯᔭᒐᖃᕐᕕᖓᓂ ᓲᕐᓗ ᕿᓐᓄᐊᔪᐊᖅ ᐃᓕᖅᑯᓯᖃᕐᕕᖕᒥ ᐊᒻᒪᓗ ᓴᓇᙳᐊᒐᒥ ᐊᒥᐊᕆᓂᐅᔪᒥ ᑎᑎᕋᐅᒐᔭᓕᐅᕐᕕᖕᒥ ᑭᙵᕐᓂ, ᐱᔭᕇᖅᑕᐅᓚᐅᖅᑐᒥ 2018−ᒥ, ᐊᒻᒪᓗ ᓄᓇᑦᑕ ᓱᓇᒃᑯᑖᖏᓐᓂ ᐃᖃᓗᖕᓂ, ᑕᑯᔭᒐᖃᕐᕕᓪᓚᑦᑖᖑᔪᒥ ᓄᓇᕗᒻᒥ – ᐃᒡᓗᖃᖅᑎᑕᐅᔪᒥ ᐃᔪᕐᓇᒐᓚᒃᑐᒥ ᓄᑕᐅᙱᑦᑐᒥ ᓂᐅᕕᖅᑎᒃᑯᑦ ᓯᕐᓗᐊᕆᓚᐅᖅᓯᒪᔭᖓᓐᓂ. ᐅᑯᐊ ᐱᓐᓇᕆᔭᐅᔪᑦ ᐃᒡᓗᕐᔪᐊᑦ ᖁᕕᐊᓱᒍᑎᖃᖅᐳᑦ ᐊᒻᒪ ᐃᑲᔪᖅᓱᐃᕗᑦ ᐃᓕᖅᑯᓯᒥ ᐊᒻᒪ ᐃᑦᑕᕐᓂᓴᐅᔪᓂ, ᑭᓯᐊᓂ ᐊᔭᐅᕆᓂᖅᓴᐅᓂᐅᔪᒥ ᓱᓕ ᐱᔭᕆᐊᖃᖅᐳᑦ ᐱᕈᖅᓴᐃᓂᕐᒥ ᐃᓐᓄᒍᓐᓇᕐᓂᐅᔪᒥ ᓴᓇᐅᒐᐅᔪᓄᑦ ᓄᓇᕗᒻᒥ ᓴᙱᔪᐊᓗᖕᒥ ᐊᑐᕐᓂᑯᖃᖅᑐᒥ ᐊᒻᒪᓗ ᒫᓐᓇᐅᔪᒥ.
ᐅᐃᓂᐱᐊᒡ ᓴᓇᐅᒐᓂ ᑕᑯᔭᒐᖃᕐᕕᖓ ᐅᖃᖅᐳᖅ “ᐅᓄᙱᓐᓂᖅᓴᐅᔪᒥ 2 ᐳᓴᓐᑎᒥ ᑲᓇᑕᒥᐅᑕᓂ ᑐᑎᓚᐅᖅᓯᒪᓂᐊᖅᐳᑦ ᐅᑭᐅᖅᑕᖅᑐᒥ.” ᐃᒻᒪᖄ ᑐᓂᓪᓗᐊᖅᐸᕗᑦ ᐱᔾᔪᑎᒃᓴᒥ ᐳᓚᕋᕐᓂᕐᒧᑦ.