ᐅᖃᐅᓯᐅᓚᐅᖅᐳᖅ ᒪᐃ ᐱᒋᐊᕐᓂᐸᓗᐊᓂ ᐱᑦᖁᕼᐃᕐᓂᒃᑯᑦ ᐃᓕᕼᐅᑎᓂᒃ/ᕿᑎᕐᒥᐅᓂ ᐃᑦᑕᕐᓂᓴᕐᒧᑦ ᑲᑐᔾᔨᖃᑎᒌᑦ (PI/KHS) ᑲᑎᖃᑎᖃᕐᓂᐊᕐᓂᖓᓂ ᓂᒋᕐᒥ ᐋᓪᐴᑕᒥ ᐃᓕᓐᓂᐊᕐᕕᖓᓂ ᐱᔭᕆᑐᔪᓂ (SAIT) ᓄᓇᒥᙶᖅᑐᒥ ᐃᒡᓗᕐᔪᐊᓂ ᐱᔭᕆᑐᔪᓂ ᖃᐅᔨᓴᕐᕕᖓᓂ ᓴᓇᓯᒪᕙᒌᖅᑐᒥ ᐋᖅᑭᒃᓱᑐᐃᓐᓇᕆᐊᓕᖕᒥ ᓄᓇᒥᙶᖅᑐᒥ ᐃᒡᓗᕐᔪᐊᒥ ᐅᓯᔭᐅᓂᐊᖅᑐᒥ ᐃᖃᓗᒃᑑᑦᑎᐊᕐᒧᑦ ᑕᒪᑐᒪᓂ ᐊᐅᔭᐅᔪᒥ ᐅᒥᐊᕐᔪᐊᒃᑯᑦ ᐊᒻᒪ ᐋᖅᑭᒃᓱᖅᑕᐅᓗᓂ ᓄᓇᓕᖕᓂ .
ᑭᖑᓪᓕᖅᐹᖓᓂ ᐊᐅᓚᓂᖓᓂ ᐃᒡᓗᕐᔪᐊᒥ –1000-ᑭᑉᐹᕆᒃᑐᒥ ᐃᓯᒐᓪᓗᐊᓂ ᐊᑖᓃᓐᓂᐊᖅᑐᒥ – ᓱᓕ ᐃᓱᒪᓕᐅᕈᑕᐅᓚᐅᙱᑎᓪᓗᒍ, ᑐᕌᒐᒃᓴᖓ ᓴᓇᓂᕐᒧᑦ ᐊᖏᒡᓕᒋᐊᖅᑕᐅᔪᓐᓇᖅᑐᒥ ᐆᒃᑑᑎᐅᔪᒥ ᐊᖏᓂᖅᓴᒧᑦ ᐊᒻᒪ ᓇᓗᓇᕐᓂᖅᓴᐅᔪᒥ ᓴᓇᓂᐅᔪᒧᑦ ᖃᖓᒃᑲᓐᓂᐅᓂᐊᖅᑐᒥ.
ᓇᑉᐸᖅᑎᕆᓂᖅ ᓂᕆᐅᒋᔭᐅᕗᖅ ᐱᒋᐊᕐᓂᐊᕐᓂᖓᓂ ᓯᑎᐱᕆᒥ ᑕᒪᑐᒪᓂ ᐊᕐᕌᒎᔪᒥ. ᐱᔭᕇᖅᑕᐅᓂᐊᖅᐳᖅ ᐃᑲᔪᖅᑕᐅᓗᑎᒃ ᓂᒋᕐᒥ ᐋᓪᐴᑕᒥ ᐃᓕᓐᓂᐊᕐᕕᖓᓂ ᐱᔭᕆᑐᔪᓂ ᑲᑎᙵᓂᐅᔪᓂ, ᐱᓕᒻᒪᒃᓴᐃᓂᐊᕐᒥᔪᓂ ᓄᓇᓕᖕᓂ ᐱᓕᕆᖃᑕᐅᔪᓂ ᐊᒻᒪᓗ ᓄᓇᓕᖕᒥᐅᑕᓂ ᓴᓇᔭᐅᑎᓪᓗᒍ.
ᐅᓇ ᐱᐅᕐᔪᐊᖅᐳᖅ – ᐆᒃᑑᑎᑦᑎᐊᕙᐅᕗᖅ ᐃᓐᓄᒍᓐᓇᕐᓂᕐᒥ ᐱᕈᖅᓴᓂᐅᔪᒥ ᐊᒻᒪ ᓯᕗᒻᒧᑦ ᐃᓱᒪᓂᐅᔪᒥ. ᐅᓇ ᐃᒡᓗᕐᔪᐊᖅ ᐊᑐᖅᑕᐅᒍᓂ ᐊᖏᕐᕋᕆᔭᐅᓗᓂ, ᐅᕝᕙᓘᓐᓃᑦ ᐃᓕᖅᑯᓯᒧᑦ ᐱᓕᕆᕝᕕᐅᓗᓂ, ᐅᕝᕙᓘᓐᓃᑦ ᓇᓂᓯᒍᓂ ᐊᓯᐊᓄᑦ ᐊᑐᖅᑕᐅᓂᐊᖅᑐᒥ, ᐱᕚᓪᓕᕈᑎᖃᑦᑎᐊᕐᓂᐊᖅᐳᖅ ᐱᔭᐅᓂᖏᓐᓂ ᓯᕗᓂᒃᓴᒧᑦ ᐱᓕᕆᐊᒃᓴᐅᔪᓄᑦ ᓄᓇᕗᓕᒫᒥ.
ᐊᑲᐅᓂᖅᓴᐅᓗᓂ ᐋᖅᑭᒃᓱᕐᓂᕐᒧᑦ, ᓴᓇᓯᒪᕙᒌᖅᑐᒥ ᐋᖅᑭᒃᓱᑐᐃᓐᓇᕆᐊᓕᖕᒥ ᐃᒡᓗᕐᔪᐊᑦ ᐊᑭᖃᕈᓐᓇᖅᐳᑦ 10–ᒥ 20–ᒧᑦ ᐳᓴᓐᑎᒥ ᐊᑭᑭᓐᓂᖅᓴᐅᓗᑎᒃ ᓇᑉᐸᖅᑎᕆᓂᕐᒧᑦ. ᑕᐃᒪᐃᑦᑐᖅ ᐃᒡᓗᕐᔪᐊᑦ ᐱᓕᕆᓂᕐᒧᑦ–ᐊᓯᔾᔨᕈᑕᐅᔪᓐᓇᖅᐳᑦ ᐅᓄᕐᓂᖅᓴᓂ ᐊᖏᕐᕋᒃᓴᓂ ᓄᓇᕗᒻᒥᐅᓄᑦ, ᓱᒃᑲᓂᖅᓴᐅᔪᒥ.
“ᖃᐅᔨᒪᔪᐃᓐᓇᐅᕗᒍᑦ ᐃᒡᓗᒃᓴᓄᑦ ᑐᐊᕕᕐᓇᕐᓂᐅᔪᒥ ᐊᒃᑐᐃᓯᒪᓂᖓᓂ ᓄᓇᕗᒻᒥᑐᐃᓐᓇᐅᙱᑦᑐᖅ ᑭᓯᐊᓂ ᐊᓯᖏᓐᓂᑦᑕᐅᖅ ᐃᓂᐅᔪᓂ – ᐃᓱᒪᕗᖓ ᐃᓱᒪᑐᓂᐅᔪᓂ ᐱᓕᕆᓂᐅᔪᓂ ᐆᒃᑐᕋᐃᓂᕐᒧᑦ ᐊᒻᒪᓗ ᐃᓕᑦᑎᒃᑲᓐᓂᕐᓂᕐᒧᑦ ᖃᓄᖅ ᓯᓚᒧᑦ ᐅᔾᔨᕈᓱᑦᑎᐊᕈᓐᓇᕐᓂᑦᑎᓐᓂ ᖁᕕᐊᓇᕐᔪᐊᖅᐳᖅ,” ᐃᖃᓗᒃᑑᑦᑎᐊᕐᒥ ᒪᐃᔭᖓ ᐹᒥᓚ ᒍᕉᔅ ᐅᖃᓚᐅᖅᐳᖅ.
ᐋᖅᑭᒃᓯᓗᑎᒃ ᐊᖏᖃᑎᒌᖕᓂᐅᔪᒥ ᐊᕙᑎᐅᔪᒥ, ᓄᓇᒥᐅᑐᖃᖅ ᐱᓕᕆᐊᒃᓴᐅᔫᑉ ᑐᒃᓯᕋᖅᑕᖓᓂ, ᐅᐱᓐᓇᑦᑎᐊᖅᖢᓂ ᑐᕌᒐᒃᓴᐅᕗᖅ, ᐊᒻᒪᓗ ᑕᒪᒃᑭᑦ ᑲᓇᑕᒥ ᐊᕕᒃᑐᖅᓯᒪᓂᐅᔪᑦ ᐊᒻᒪᓗ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᓂᐅᔪᑦ ᐃᓕᑦᑎᕝᕕᒋᔪᓐᓇᖅᐸᖓ.
ᓇᑉᐸᖅᑎᕆᔪᓐᓇᕐᓂᐅᔪᒥ ᐃᓕᖅᑯᓯᒧᑦ ᑲᑎᕝᕕᐅᔪᓐᓇᖅᑐᓂ ᐊᒻᒪ ᖁᙱᐊᖅᑕᐅᓂᕐᓄᑦ ᐃᓂᐅᔪᓂ ᓄᓇᓕᖕᓂ ᐱᐅᔾᔪᑎᒃᑲᓐᓂᐅᔪᓐᓇᖅᐳᖅ ᐆᒪᙵᑦ ᐱᓕᕆᐊᒃᓴᐅᔪᒥ.
ᖃᒡᒋᐊᕘᑦ ᐃᑲᔪᖅᓱᐃᓯᒪᕗᑦ ᐃᓕᖅᑯᓯᒧᑦ ᑲᑎᕝᕕᐅᔪᓐᓇᖅᑐᒥ ᐃᖃᓗᖕᓂ ᐊᕐᕌᒍᑦ ᖁᓖᑦ ᐅᖓᑖᓂ, ᐊᒻᒪᓗ ᐱᔾᔪᑎᒃᓴᖃᑦᑎᐊᖅᖢᑎᒃ. ᓴᓇᐅᒐᓕᕆᕝᕖᑦ ᐃᓅᓯᓕᒫᒧᑦ ᐃᓴᒡᕕᐅᕗᖅ ᓄᓇᓕᖕᓄᑦ, ᐆᒻᒪᖅᑎᑦᑎᒃᑲᓐᓂᕐᓂᕐᒧᑦ ᐊᒻᒪ ᑐᓂᓯᓂᕐᒥ ᐃᓂᐅᔪᒥ ᖁᕕᐊᓱᒍᑎᖃᕐᓂᕐᒧᑦ, ᓴᐳᔾᔨᓯᒪᓂᕐᒧᑦ ᐊᒻᒪ ᖁᕝᕙᖅᓴᐃᓂᕐᒧᑦ ᐅᖃᐅᓯᕐᒥ ᐊᒻᒪ ᐃᓕᖅᑯᓯᒥᒃ.
ᕿᑎᖅᐸᓯᐊᓂ ᐱᓕᕆᕝᕕᒃ ᓯᕗᓪᓕᕐᒥ ᓴᓇᔭᐅᔭᕆᐊᖃᖅᐳᖅ – ᐊᔪᕐᓇᕋᔭᙱᓐᓂᖓᓂ ᖃᐅᔨᓴᖅᑕᐅᓂᖓ ᐱᔭᕇᖅᑕᐅᓚᐅᖅᑐᒥ ᕕᕈᐊᕆ 2020–ᒥ ᑕᑯᒃᓴᐅᑎᑦᑎᕗᖅ ᑐᒃᓯᕋᖅᑕᐅᔪᒥ ᖃᒡᒋᖅ ᐃᑲᔪᖅᓱᐃᓇᔭᕐᓂᖓᓂ 408–ᓂ ᐅᓪᓗᓕᒫᖅᓯᐅᑎᓂ ᐃᖅᑲᓇᐃᔮᖑᔪᓄᑦ ᐊᒻᒪᓗ ᐃᓕᓯᓗᓂ ᓇᓚᐅᑦᑖᕆᔭᐅᔪᒥ $41 ᒥᓕᐊᓐᓄᑦ ᓄᓇᕘᑉ ᑮᓇᐅᔾᔭᒃᓴᓂᖓᓄᑦ ᓯᕗᓪᓕᖅᐹᒥ ᐊᕐᕌᒍᓄᑦ ᑕᓪᓕᒪᓄᑦ.
“ᓄᑖᖅ ᖃᒡᒋᖅ ᑲᑎᕝᕕᐅᔪᓐᓇᖅᑐᒥ ᑐᓂᓯᓂᐊᖅᐳᖅ ᐊᖏᐸᓗᒃᑐᓂ ᐱᕚᓪᓕᕈᑕᐅᔪᓂ ᑕᓪᓕᒪᓂ ᐱᒻᒪᕆᐅᔪᓂ ᐃᓂᐅᔪᓄᑦ, ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐊᒻᒪ ᖃᓄᐃᙱᑦᑎᐊᕐᓂᐅᔪᒥ, ᐃᓕᓐᓂᐊᕐᓂᕐᒧᑦ, ᐃᓱᒪᑐᓂᕐᒧᑦ ᐊᒻᒪ ᑮᓇᐅᔾᔭᒃᓴᓂᕐᒧᑦ,” 2019–ᒥ ᖃᒡᒋᐊᕘᑦ ᑐᓴᒐᒃᓴᓕᐊᖑᔪᒥ ᐅᖃᖅᓯᒪᕗᖅ, “ᐃᓕᖅᑯᓯᒧᑦ, ᓄᓇᓕᖕᓄᑦ, ᒐᕙᒪᐅᔪᓂ, ᐊᒻᒪᓗ ᓇᖕᒥᓂᖃᖅᑐᓄᑦ ᐱᓕᕆᖃᑎᒋᔭᐅᔪᓂ ᐊᖏᖃᑎᖃᖅᐳᑦ ᑲᑎᖅᓱᖅᑕᐅᕙᓪᓕᐊᔪᑦ ᑮᓇᐅᔭᓂ ᑐᖅᑯᖅᑕᐅᓯᒪᓪᓗᑎᒃ ᐱᕈᖅᐸᓪᓕᐊᑎᑕᐅᓂᕐᒧᑦ ᐃᓕᖅᑯᓯᒧᑦ ᐃᒡᓗᕐᔪᐊᓄᑦ ᐃᖃᓗᖕᓂ ᓄᓇᒋᔪᒥᓇᕐᓂᖅᓴᐅᑎᑦᑎᓂᐊᖅᐳᖅ ᐊᒻᒪ ᐊᐅᓚᑦᑎᓗᓂ ᐳᓚᕋᖅᑐᓕᕆᓂᕐᒥ ᐊᒻᒪᓗ ᑮᓇᐅᔾᔭᒃᓴᓂᕐᒧᑦ ᐱᕈᕐᓂᐅᔪᒥ.”
ᑕᐃᔅᓱᒪᓂ-ᐃᓱᒻᒥᖅᑐᐃᔨᐅᓚᐅᖅᑐᖅ ᐊᓚᓐ ᕼᐋᒧᓪᑎᓐ ᐅᖃᓚᐅᖅᐳᖅ, “ᐊᓯᐊᒍᑦ ᐅᖃᕐᓗᓂ, ᓴᙱᒃᑎᒋᐊᖅᓯᕗᒍᑦ ᓄᓇᕗᒻᒥ ᑮᓇᐅᔾᔭᒃᓴᓂᐅᔪᒥ ᓴᓇᐅᒐᓕᕆᓂᒃᑯᑦ, ᑕᐃᒪᓐᓇᑎᒋ ᓴᙱᒃᑎᒋᐊᖅᓯᓂᑦᑎᓐᓂ ᐅᖃᐅᓯᕐᒥ ᐊᒻᒪ ᐃᓕᖅᑯᓯᐅᔪᒥ.”
ᑕᒪᓐᓇᑦᑕᐅᖅ ᒥᒃᖠᒋᐊᖅᑕᐅᔪᓐᓇᖅᐳᖅ ᐃᓄᑭᓐᓂᖅᓴᐅᔪᓄᑦ ᓄᓇᓕᐅᔪᓄᑦ, ᐅᓪᓗᓕᒫᖅᓯᐅᑎᓂ ᐊᒻᒪ ᐅᓪᓘᑉ ᐃᓚᐃᓐᓇᖓᓂ ᐃᖅᑲᓇᐃᔮᖃᕐᓂᕐᓂ ᓴᓇᐅᒐᓕᕆᓂᕐᓄᑦ ᐊᒻᒪ ᐃᓕᖅᑯᓯᒧᑦ ᐱᓕᕆᓂᐅᔪᓂ ᐱᔭᐅᔪᓐᓇᕋᔭᖅᐳᑦ.
“ᓲᖃᐃᒻᒪ, ᐃᓅᓯᖅ–ᒪᑭᒪᐅᑏᓪᓗ ᐱᕚᓪᓕᕈᑎᑕᖃᕋᔭᕆᕗᖅᑕᐅᖅ. “ᐊᑭᖃᖅᐳᖅ $350–ᒥ ᐅᓪᓗᕐᒥ ᐊᖑᒻᒥ ᐊᓄᓪᓚᒃᓯᖅᑕᐅᓂᖓᓄᑦ. ᖁᙱᐊᖅᑕᐅᕙᒃᑐᑦ ᓴᓇᐅᒐᓕᕆᓂᕐᒥ ᐊᑕᐅᓯᐅᓪᓗᓂ ᐱᓕᕆᓂᐅᕗᖅ ᒥᒃᖠᒋᐊᖅᓯᓂᕐᒥ ᐅᓗᕆᐊᓇᕐᓂᐅᔪᓂ. ᐊᑑᑎᖃᑦᑎᐊᖅᑐᒥ ᐱᓕᕆᓂᐅᕗᖅ ᐃᓕᓐᓂᐊᖅᑎᑦᑎᓂᕐᒥ ᐃᓄᖕᓂ, ᑲᔪᖏᖅᓴᖅᑕᐅᖏᓐᓇᕐᓗᑎᒃ.”
ᓴᓇᓂᕐᒥ ᓄᓇᒥᙶᖅᑐᒥ ᓯᕗᓂᒃᓴᐅᔪᒥ ᑲᑎᙵᓗᑕ ᐊᔪᕐᓇᙱᑎᑦᑎᒃᑲᓐᓂᖅᐳᖅ ᖁᕝᕙᖅᓴᐃᓂᕐᒥ ᖃᓄᐃᙱᑦᑎᐊᖅᑐᒥ ᓄᓇᓕᐅᔪᓂ ᐱᓱᖕᓂᐅᕗᖅ ᖃᓂᓐᓂᖅᓴᐅᔪᒥ ᐆᒧᖓ ᐃᖃᓗᒃᑑᑦᑎᐊᕐᒥ ᐱᓕᕆᐊᒃᓴᐅᔪᒧᑦ.