Skip to content

ᐊᖅᑯᒻᒦᖏᓐᓇᕐᓂᖅ ᓴᐃᒻᒪᖃᑎᒌᖕᓂᐅᔪᒥ

ᐊᖅᑯᑎᑯᑖᖑᕗᖅ ᓴᐃᒻᒪᖃᑎᒌᖕᓂᐅᔪᒧᑦ.
26603938_web1_210517-NUN-editorial-standard_1

ᐊᖅᑯᑎᑯᑖᖑᕗᖅ ᓴᐃᒻᒪᖃᑎᒌᖕᓂᐅᔪᒧᑦ.

ᐃᖏᕐᕋᓯᒪᒐᓗᐊᖅᑎᓪᓗᑕ ᑕᐃᔅᓱᒥᖓ ᐊᖅᑯᑕᐅᔪᒥ ᐅᓄᕐᓂᖅᓴᐅᔪᓂ ᐃᓄᖕᓂ ᐃᓚᐅᔪᖃᓕᖅᑎᓪᓗᒍ ᐊᕐᕌᒍᑲᓴᖕᓄᑦ 6-ᓄᑦ — ᑕᐃᒪᙵᓂ ᑲᓇᑕᐅᑉ ᓱᓕᓂᕐᒧᑦ ᐊᒻᒪ ᓴᐃᒻᒪᖃᑎᒌᖕᓂᐅᔪᒥ ᑭᓪᓕᓯᓂᐊᖅᑏᑦ (TRC) ᓴᖅᑭᑎᑦᑎᓚᐅᖅᑎᓪᓗᒋᑦ ᐅᓂᒃᑳᓕᐊᖓᓐᓂ ᐊᒻᒪ ᖃᐃᖁᔨᓂᐅᔪᓂ ᖃᓄᐃᓕᐅᕐᓂᕐᒧᑦ — ᓱᓕ ᐱᔭᒃᓴᖃᕐᔪᐊᖅᐳᑦ.

ᐊᒥᐊᒃᑯᓂᐅᔪᓂ 215–ᓂ ᓄᓇᖃᖅᑳᖅᓯᒪᔪᓄᑦ ᓱᕈᓯᕐᓄᑦ ᓇᓂᔭᐅᓚᐅᖅᑎᓪᓗᒍ ᐃᓂᐅᔪᒥ ᑳᒻᓘᑉᔅᒥ ᐊᓪᓚᓄᑦ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓂ ᒪᐃ 27–ᒥ, ᐊᒻᒪᓗ, ᐅᕙᓂ ᑎᑎᕋᕐᓂᐅᔪᒥ, ᐅᓄᕐᓂᖓ ᐅᓄᖅᓯᒋᐊᖅᓯᒪᓕᖅᐳᖅ ᐅᓄᕐᓂᖅᓴᐅᔪᓄᑦ 5,000–ᓄᑦ ᑲᓇᑕᓕᒫᒥ ᐊᒻᒪ ᐅᓄᕐᓂᖅᓴᐅᔪᓂ 6,000–ᓂ ᐃᓂᐅᔪᑦ ᔫᓇᐃᑎᑦ ᔅᑕᐃᑦᔅᓂ ᐃᓚᓕᐅᔾᔭᐅᓯᒪᑎᓪᓗᒋᑦ.

ᑎᓯᐱᕆ 2019–ᒥ ᐅᓂᒃᑳᓕᐊᒥ ᐄᕙ ᔫᕗᓪᒧᑦ ᐊᒻᒪ ᐄᐊᓐ ᒫᔅᐱᒧᑦ Yellowhead ᐃᓕᓐᓂᐊᕐᕕᐅᔪᒥ ᓇᓂᓯᓚᐅᖅᐳᖅ 9–ᑐᐃᓐᓇᓂ ᓱᓕᓂᕐᒧᑦ ᐊᒻᒪ ᓴᐃᒻᒪᖃᑎᒌᖕᓂᐅᔪᒥ ᑭᓪᓕᓯᓂᐊᖅᑏᑦ ᖃᐃᖁᔨᓂᐅᔪᓄᑦ ᖃᓄᐃᓕᐅᕐᓂᕐᒧᑦ ᐱᔭᕇᖅᑕᐅᓯᒪᕗᑦ ᑭᓯᐊᓂ, 2020–ᒥ ᓇᓂᔭᐅᓂᐅᔪᑦ ᑕᑯᒃᓴᐅᑎᑦᑎᓚᐅᖅᐳᖅ ᐅᓄᕐᓂᖓ ᑲᑕᓚᐅᖅᐳᖅ 8–ᓄᑦ.

“ᐃᓱᐊᓂ, ᓇᓂᓯᕗᒍᑦ ᑲᓇᑕ ᐱᓕᕆᓂᖃᑦᑎᐊᙱᓚᖅ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓂ ᐆᒪᔪᓄᑦ ᐊᒻᒪ ᐃᓚᖏᓐᓄᑦ,” ᐅᖃᖅᐳᑦ ᑎᑎᕋᖅᑐᕕᓃᑦ ᐅᓂᒃᑳᓕᐊᒥ, ᐅᖃᖅᖢᑎᒃ “ᐊᕐᕌᒍᓂ ᑕᓪᓕᒪᓂ, ᐅᒃᐱᕈᓱᒃᐳᒍᑦ, ᐅᖓᑖᓄᐊᖅᓯᒪᕗᖅ ᓈᒻᒪᖕᓂᐅᔪᒥ ᖃᐅᔨᓴᕐᓂᕐᒧᑦ ᓴᙱᓂᖓᓂ ᐊᒻᒪᓗ ᑐᑭᖃᑦᑎᐊᕐᓂᖓᓂ ᑕᐃᔅᓱᒥᖓ ᐊᖏᖅᓯᒪᓂᐅᓚᐅᖅᑐᒥ.”

ᑕᒪᑐᒪᓂ ᐊᕐᕌᒎᔪᒥ ᐃᓚᓯᔪᓐᓇᖅᐳᒍᑦ ᒪᕐᕉᖕᓂ ᐱᔭᕇᖅᑕᐅᓯᒪᔪᓂ ᖃᐃᖁᔨᓂᐅᔪᓄᑦ ᖃᓄᐃᓕᐅᕐᓂᕐᒧᑦ ᑎᑎᕋᖅᑕᐅᓯᒪᔪᓄᑦ.

ᓈᓴᐅᑎᖓ 80 ᕿᓂᓚᐅᖅᐳᖅ ᑲᓇᑕᒥ ᐅᓪᓘᔪᒥ ᓱᓕᓂᕐᒧᑦ ᐊᒻᒪ ᓴᐃᒻᒪᖃᑎᒌᖕᓂᐅᔪᒥ, ᐊᒻᒪᓗ ᓯᑎᐱᕆ 30–ᒥ ᑕᑯᓂᐊᖅᐳᒍᑦ ᓯᕗᓪᓕᖅᐸᐅᔪᒥ ᐅᓪᓗᓪᓚᕆᐅᔪᒥ ᑕᐃᔅᓱᒥᖓ ᐊᑎᓕᖕᒥ, ᒪᓕᒐᒃᓴᖅ C-5 ᐱᓚᐅᖅᑎᓪᓗᒍ ᑯᐃᓐᒧᑦ ᐊᖏᖅᑕᐅᓂᖓᓂ ᔫᓂ 3–ᒥ.

ᓈᓴᐅᑎᖓ 15 ᖃᐃᖁᔨᓂᖃᖅᐳᖅ ᑎᒃᑯᐊᖅᑕᐅᓂᖓᓂ ᓄᓇᖃᖅᑳᖅᓯᒪᔪᓄᑦ ᐅᖃᐅᓯᕐᒧᑦ ᑲᒥᓴᓇᐅᔪᒥ – ᔫᓂ 14–ᒥ, ᑲᓇᑕᒥ ᒐᕙᒪᒃᑯᑦ ᐅᖃᐅᓯᖃᓚᐅᖅᐳᑦ ᓯᕗᓪᓕᖅᐸᐅᔪᓂ ᑎᓴᒪᓂ ᑎᒃᑯᐊᖅᑕᐅᓂᐅᔪᓂ ᓄᑖᒧᑦ ᑎᑎᕋᕐᕕᐅᔪᒧᑦ ᑲᒥᓴᓇᒧᑦ ᓄᓇᖃᖅᑳᖅᓯᒪᔪᓄᑦ ᐅᖃᐅᓯᕐᓄᑦ: ᑲᒥᓴᓇ ᕌᓄᑦ E. ᐃᒡᓇᐃᔅ ᐊᒻᒪ ᑐᑭᒧᐊᒃᑎᑦᑎᔨᑦ ᕌᐳᑦ ᐅᐊᑦ, ᔪᐊᔾᔩᓇ ᓕᐳᑎ ᐊᒻᒪ ᔫᓐ ᒍᕋᐃᐊᐃᔅ.

ᒪᓕᒐᒃᓴᖅ C-8: ᒪᓕᒐᖅ ᐃᓚᒋᐊᖅᓯᓂᕐᒧᑦ ᓄᓇᓕᒻᒪᕆᖕᒥ ᒪᓕᒐᐅᔪᒥ, ᑭᐅᓂᖃᖅᑐᒥ ᖃᐃᖁᔨᓂᐅᔪᒥ ᖃᓄᐃᓕᐅᕐᓂᕐᒧᑦ ᓈᓴᐅᑎᖓ 94–ᒥ, ᐊᓂᒍᖅᑎᑕᐅᔪᒥ ᒪᕐᕈᖓᓂ ᐅᖃᓕᒫᖅᑕᐅᓂᖓᓂ ᑎᓯᐱᕆ 10, 2020–ᒥ ᐊᒻᒪ ᑎᑎᕋᖅᑕᐅᓯᒪᕗᖅ ᑲᓇᑕᒥ ᒪᓕᒐᓕᐅᖅᑎᖏᓐᓂ ᐱᓚᐅᕐᓂᖓᓂ ᑯᐃᓐᒧᑦ ᐊᖏᖅᑕᐅᓂᖓᓂ.

ᐱᓱᖕᓂᐅᔪᑦ ᒥᑭᑦᑑᒐᓗᐊᑦ, ᑭᓯᐊᓂ ᐊᑐᓂ ᐱᓱᖕᓂᐅᔪᒥ ᓯᕗᒻᒧᑦ ᐃᑲᔫᑎᖃᖅᐳᖅ.

Yellowhead ᐅᓂᒃᑳᓕᐊᖅ ᓂᕆᐅᖕᓂᖃᙱᓐᓂᖅᓴᐅᕗᖅ, ᐅᖃᐅᓯᖃᖅᖢᓂ ᐅᖃᓪᓚᖕᓂᐅᔪᓂ ᓄᓇᖃᖅᑳᖅᓯᒪᔪᓄᑦ ᖃᐅᔨᒪᓂᖃᕐᔪᐊᖅᑐᓂ ᐊᒻᒪ ᐊᑐᖅᑎᐅᔪᓂ ᑎᒃᑯᐊᕆᕗᑦ ᓄᓇᖃᖅᑳᖅᓯᒪᙱᑦᑐᓄᑦ ᑲᑐᔾᔨᖃᑎᒌᖑᔪᓄᑦ ᐊᑑᑎᖃᑦᑎᐊᕐᓂᖓᓂ ᒐᕙᒪᑐᖃᒃᑯᑦ ᑮᓇᐅᔭᓂ ᐊᑐᖅᑐᒃᓴᓂ ᑐᑭᓕᐊᕐᓂᐅᔪᓂ ᐊᒻᒪ ᖄᖏᐅᔾᔨᔪᑦ “ᐃᓕᓐᓂᐊᕐᕕᖕᓄᑦ ᐊᓯᔾᔨᕆᐊᖃᕐᓂᐅᔪᓂ ᓴᐃᒻᒪᖃᑎᒌᖕᓂᐅᔪᒥ ᐱᔪᒪᔭᖏᓐᓂ. ᑕᐃᒪᐃᓐᓇ, ᑮᓇᐅᔭᐃᑦ ᑐᕌᖓᔪᒃᓴᐅᑕᐅᔪᑦ ᓴᐃᒻᒪᖃᑎᒌᖕᓂᐅᔪᒥ ᐱᑎᑦᑎᒐᔪᒃᐳᖅ ᐊᖏᓂᖅᓵᕐᔪᖕᒥ ᐱᖅᑯᓯᕆᙱᑕᖓᓂ ᐱᐅᓯᖃᓕᖅᑎᑕᐅᒃᑲᓐᓂᕐᓂᐅᔪᒥ. ᐊᑕᐅᓯᕐᒥ ᓄᓇᖃᖅᑳᖅᓯᒪᔪᓄᑦ ᖃᐅᔨᒪᔨᕐᔪᐊᖑᓪᓗᑕ ᐅᖃᖃᑎᖃᓚᐅᖅᐳᒍᑦ ᓇᐃᓈᖅᓯᒪᓂᐅᔪᒥ: ‘ᐱᓕᕆᑦᑎᐊᙱᑐᐃᓐᓇᖅᐳᒍᑦ. ᐅᑎᖅᐸᓪᓕᐊᕗᒍᑦ ᓯᕗᓂᐊᓂ ᓱᓕᓂᕐᒧᑦ ᐊᒻᒪ ᓴᐃᒻᒪᖃᑎᒌᖕᓂᐅᔪᒥ ᑭᓪᓕᓯᓂᐊᖅᑎᓄᑦ.’”

ᐅᓇ ᑐᑭᖃᙱᓚᖅ ᓴᐱᓕᑐᐃᓐᓇᕐᓂᕐᒧᑦ, ᐅᓂᒃᑳᓕᐊᖅ ᑕᐃᒪᓐᓇ ᐃᓱᓕᑦᑎᒋᕗᖅ.

ᓄᓇᕗᒻᒥ ᑐᙵᕕᒃᑯᑦ ᐊᖓᔪᖅᑳᖓ ᐊᓗᑭ ᑰᑦᑎᖅ ᐅᖃᓚᐅᖅᐳᖅ ᑕᒪᑐᒪᓂᓂ ᐊᕐᕌᒍᒥ: “ᐱᓕᕆᓂᖃᕆᐊᖃᖅᐳᖅ ᐊᒻᒪ ᑲᑎᖅᓱᖅᑕᐅᕙᓪᓕᐊᔪᑦ ᑮᓇᐅᔭᓂ ᑐᖅᑯᖅᑕᐅᓗᑎᒃ ᐱᕈᖅᐸᓪᓕᐊᑎᑕᐅᔭᕆᐊᖃᖅᐳᑦ ᐊᒻᒪ ᐃᑲᔪᖅᓱᐃᓂᓂ ᐱᔭᕆᐊᖃᖅᐳᑦ ᐃᓄᖕᓂ ᑎᑭᐅᑎᓂᖏᓐᓄᑦ ᓯᕗᓂᐊᓄᑦ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓂ ᐃᓄᐃᑦ ᐅᐱᒍᓱᓕᕐᓗᑎᒃ ᑭᓴᐅᓂᖏᓐᓂ ᐃᓅᓪᓗᑎᒃ… ᐊᒻᒪᓗ ᐱᓱᒃᐸᒡᓗᑎᒃ ᓄᓇᓕᖕᓂ ᐅᐱᒍᓱᖕᓂᖃᕐᓗᑎᒃ.

“ᐅᑯᓄᖓᓕᒫᖅ ᐃᓄᓕᒫᓄᑦ ᐊᑐᐊᒐᐅᔪᓄᑦ, ᑕᓗᕈᒃᑯᑎᓂᖃᕐᔪᐊᖅᓯᒪᕗᖅ ᐅᕙᑦᑎᓐᓄᑦ ᐃᓕᔭᐅᔪᓄᑦ ᐃᓅᖃᑎᒌᖑᓪᓗᑕ … ᑕᐃᓐᓇ ᑕᓗᕈᒃᑯᑎᓂᖅ ᐱᒋᙱᑕᕗᑦ. ᓴᓇᐅᒐᐅᕗᒍᑦ ᐃᓄᓕᒫᓄᑦ ᐊᑐᐊᒐᐅᔪᓂ ᐅᕙᑦᑎᓐᓄᑦ ᐃᓕᔭᐅᓚᐅᖅᑐᓄᑦ. ᖃᓄᐃᓕᖓᓂᐅᕗᖅ ᑕᒪᒃᑭᓗᒃᑖᓂ ᐅᕙᑦᑎᓐᓄᑦ ᖃᓄᐃᓕᐅᕈᑕᐅᓯᒪᔪᓄᑦ, ᐊᒻᒪ ᑭᓇᑐᐃᓐᓇᖅ ᐃᓄᒃ ᐊᑐᖅᓯᒪᔪᓂ ᐊᔾᔨᖏᓐᓂ ᐊᑐᕐᓂᑯᓂ ᐅᑯᓂᖓ ᐃᓅᖃᑎᒌᖑᔪᓄᑦ ᐊᒃᓱᕈᕈᑎᖃᕋᔭᕆᕗᑦᑕᐅᖅ.”

ᒥᑭᓛᖓᓂ ᑲᓇᑕ ᐱᓕᕆᔪᓐᓇᕐᓂᖓᓂ ᑭᐅᓗᑎᒃ ᐅᑯᓂᖓ ᖃᐃᖁᔨᓂᐅᔪᓄᑦ ᖃᓄᐃᓕᐅᕐᓂᕐᒧᑦ ᑕᒻᒪᕐᓂᕋᕐᓗᑎᒃ ᐋᖅᑭᒋᐊᖅᓯᓗᑎᒃ, ᐊᒻᒪ ᖃᐅᔨᒋᐊᒃᑲᓐᓂᖅᐸᒡᓗᑎᒃ ᐅᑯᓂᖓ ᖃᓄᐃᓕᐅᕐᓂᐅᔪᓄᑦ ᐃᖏᕐᕋᐃᓐᓇᖅᑐᒥ ᐃᓚᐅᑎᑦᑎᓂᐅᔪᒥ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ ᐊᒻᒪ ᑲᑐᔾᔨᖃᑎᒌᖑᔪᓄᑦ ᓇᓗᓇᐃᖅᓯᓂᕐᒥ ᒪᒥᓴᐃᓂᕐᒥ ᑎᑭᐅᑎᔭᐅᔪᓐᓇᕐᓂᖓᓂ ᐊᒻᒪᓗ ᑲᒪᒋᔭᐅᓗᓂ ᐱᓕᕆᓂᐅᔪᒥ ᐃᒃᐱᒍᓱᑦᑎᐊᕐᓂᖃᖅᑐᒥ ᑕᐃᒃᑯᓄᖓ ᕿᓂᖅᑐᓄᑦ.