ᓂᕈᐊᖅᑕᐅᓯᒪᓂᕐᒥ ᑲᑎᒪᔨᐅᓚᐅᖅᓯᒪᙱᑦᑐᖅ. ᐅᖃᓚᐅᖅᑐᖅ ᐊᓈᓇᖓ ᓯᕗᓪᓕᖅᐹᑦᑎᐊᖑᓪᓗᓂ ᐃᑲᔪᖅᓱᐃᔨᒋᔭᖓ.
"ᐃᓄᑐᐃᓐᓇᐅᕗᖓ ᐃᑲᔪᕈᒪᔪᒥ ᐊᓯᖏᓐᓂ ᐃᓄᖕᓂ," ᒧᒥᓛᖅ ᖃᖅᑲᖅ ᐅᖃᓚᐅᖅᐳᖅ ᓂᕈᐊᖅᑕᐅᓚᐅᖅᑎᓪᓗᒍ ᓄᓇᕗᒻᒥ ᐃᓚᒋᔭᐅᔪᖅ ᑲᓇᑕᐅᑉ ᒪᓕᒐᓕᐅᖅᑎᒋᓂᐊᖅᑕᖏᓐᓂ.
ᐱᕕᒃᓴᖃᕐᓂᐊᓕᖅᐳᖅ.
ᑲᒪᓇᖅᑐᒥ ᓵᓚᖃᕐᓂᐅᔪᒥ ᐊᐃᑉᐹᓂ ᐅᓪᓛᕐᔪᐊᖓᓂ ᖁᙱᐊᖅᑎᑦᑎᕐᔪᐊᓚᐅᖅᑐᒥ ᐅᑭᐅᖅᑕᖅᑐᒥ ᐊᒻᒪ ᑲᓇᑕᒥ ᑲᑎᒪᔨᐅᔪᓄᑦ ᐃᓱᒪᒋᔭᐅᓂᐅᔪᓄᑦ, ᒥᔅ ᖃᖅᑲᖅ, ᖃᒪᓂᑦᑐᐊᕐᒥᐅᑕᖅ ᒪᒃᑯᒃᑐᓄᑦ ᐃᑲᔪᖅᓱᐃᔨᐅᔪᖅ ᐊᒻᒪ ᐃᓚᒋᔭᐅᓕᖅᑐᒥ New Democrat Party–ᑯᓐᓂ, ᓵᓚᖃᓚᐅᖅᐳᖅ ᓕᐆᓇ ᐊᒡᓘᒃᑲᕐᒥ, ᑲᓐᓲᕕᑎᒃᑯᓐᓂ ᐃᑲᔪᖅᓱᐃᔨᕐᔪᐊᖑᔪᒥ ᐊᒻᒪ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᒥᓂᔅᑕᐅᓚᐅᖅᑐᒥ ᓯᕗᓪᓕᖅᐸᐅᓪᓗᓂ ᐃᓅᓪᓗᓂ ᒪᓕᒐᓕᐅᖅᑏᑦ ᑲᑎᒪᔨᖏᓐᓃᖃᑕᐅᓂᕐᒧᑦ.
ᓵᓚᖃᓚᐅᕆᕗᖅ ᓕᐳᕈᒃᑯᑦ ᓂᕈᐊᒐᒃᓴᐅᔪᒥ ᒪᐃᒋᓐ ᐱᑦᓱᓪ-ᓚᐃᔪᓪᒥ, ᐃᖃᓗᖕᓂ ᓄᓇᓕᖅᐸᐅᔭᒥ ᑲᑎᒪᔨᐅᓚᐅᖅᓯᒪᔪᒥ ᐊᒻᒪ ᐊᕐᓇᐅᓪᓗᓂ ᓇᖕᒥᓂᖃᖅᑎᐅᓪᓗᓂ.
ᖃᖅᑲᖅ 25–ᖑᕗᖅ, ᕿᑎᖅᐸᓯᐊᓂ ᐅᑭᐅᖑᔪᒥ ᓄᓇᕗᒻᒥ, ᐅᖃᐅᓯᐅᓪᓗᓂ 2016–ᒥ ᓇᐃᓴᐃᓂᐅᓚᐅᖅᑐᒥ, ᐊᒻᒪ ᐃᓕᓐᓂᐊᖅᓯᒪᓂᖓᓂ, ᐱᔪᓐᓇᕐᓂᖓᓐᓂ ᐊᒻᒪ ᐊᑐᕐᓂᑯᖏᑦ ᓇᐃᓐᓂᖅᓴᒐᓚᐅᕗᑦ ᐱᒋᔭᐅᔪᓂ ᓵᓚᒋᕐᔪᐊᓚᐅᖅᑕᖏᓐᓂ ᓂᕈᐊᒐᒃᓴᐅᖃᑎᒋᔭᖏᓐᓂ.
ᐊᑯᓂᐅᔪᒥ ᑐᕌᒐᖃᖅᓯᒪᓪᓗᓂ ᐃᑲᔪᖅᓱᐃᓂᐅᔪᒥ, ᖃᖅᑲᖅ ᓯᕗᓕᐅᖅᑎᐅᓯᒪᕗᖅ ᐅᑭᐅᖅᑕᖅᑐᒥ ᒪᒃᑯᒃᑐᓄᑦ ᓄᓇᕐᔪᐊᓕᒫᒧᑦ, ᐊᒻᒪ ᐃᖅᑲᓇᐃᔭᖅᓯᒪᕗᖅ ᓄᓇᕗᒻᒥ ᑐᙵᕕᒃᑯᓐᓄᑦ, ᐊᒻᒪ ᓄᓇᕗᒻᒥ ᒐᕙᒪᒃᑯᓐᓄᑦ ᐊᒻᒪ ᐃᓄᐃᑦ ᑕᐱᕇᑦ ᑲᓇᑕᒥ. ᐃᓕᓴᕆᔭᐅᕐᔪᐊᖅᓯᒪᕗᖅ ᐅᖃᓪᓚᖕᓂᕆᓚᐅᖅᑕᖓᓄᑦ ᑭᐅᓂᕐᒧᑦ ᐃᒻᒥᓃᕐᓂᕐᒧᑦ ᑲᓇᑕᐅᑉ ᒪᓕᒐᓕᐅᕐᕕᖓᑕ ᑲᑎᒪᕝᕕᒡᔪᐊᖓᓄᑦ 2017–ᒥ.
ᑭᓯᐊᓂ ᒥᔅ ᖃᖅᑲᖅ, ᐅᓐᓄᐃᓐᓇᕐᒥ, ᑮᓇᒋᔭᐅᓕᖅᐳᖅ ᓄᓇᕘᑉ ᓂᕆᐅᖕᓂᕆᔭᖏᓐᓂ ᓵᓚᖃᕐᓂᕐᒧᑦ ᐊᒥᓱᓂ ᐱᓕᕆᔾᔪᓯᐅᔪᓄᑦ ᐊᑲᐅᙱᓕᐅᕈᑕᐅᔪᓄᑦ, ᖁᔭᓕᓂᖃᕐᔪᐊᖅᐳᖅ ᑲᑎᒪᔨᕐᔪᐊᖑᔪᓄᑦ ᐱᔪᓐᓇᖅᓯᒪᙱᑦᑐᓂ ᐅᕝᕙᓘᓐᓃᑦ ᐋᖅᑭᒃᓯᔪᒪᙱᑦᑐᓄᑦ ᐋᖅᑭᒋᐊᖃᖅᑐᓄᑦ ᑲᓇᑕᐅᑉ ᐊᖏᓛᖓᓂ, ᒪᒃᑯᓛᖑᔪᓂ ᐊᒻᒪ ᐃᒻᒪᖄ ᐊᒃᓱᕉᓴᖕᓂᖅᐹᖑᔪᓄᑦ ᐱᔪᓐᓇᕐᓂᖃᕐᓂᖓᓂ.
ᐊᒡᓘᒃᑲᖅ ᓂᕆᐅᕐᓂᐅᔪᒥ ᐅᓐᓄᖃᑦᑎᐊᓚᐅᙱᓚᖅ ᐊᒥᓱᐊᓗᖕᓄᑦ ᐃᓱᒪᒋᔭᐅᓂᐅᔪᒥ, ᐊᑲᐅᒐᓗᐊᖅᐸᑦ ᐋᒃᑲᓘᓐᓃᑦ, ᑲᓐᓲᕕᑎᒃᑯᑦ ᐃᓱᒪᒋᔭᖃᙱᓐᓂᖏᓐᓂ ᐃᓅᖃᑎᒌᖑᔪᓄᑦ ᐊᑲᐅᙱᓕᐅᕈᑕᐅᔪᓄᑦ ᓵᙵᔭᐅᔪᓂ ᓄᓇᕗᒻᒥ.
ᐅᓇ ᐃᓱᒪᒋᔭᐅᓂᐅᔪᖅ ᐃᑲᔪᕐᓂᖃᓚᐅᙱᓚᖅ ᐊᖑᔭᐅᒐᒥ ᐅᖃᓕᒫᖅᑎᓪᓗᒍ ᑐᓴᒐᒃᓴᓕᐊᖑᔪᓂ ᑲᓇᑕᐅᑉ ᒪᓕᒐᓕᐅᕐᕕᖓᑕ ᑲᑎᒪᕝᕕᒡᔪᐊᖓᓐᓂ ᐊᑭᑦᑐᕋᐅᑎᔪᓄᑦ ᑲᑎᒪᔨᕐᔪᐊᖑᔪᑦ ᐊᐱᖅᓱᕐᔪᐊᖅᑎᓪᓗᒋᑦ ᒐᕙᒪᐅᔪᓂ ᓂᕿᑦᑎᐊᕙᓕᕆᓂᕐᒥ ᐅᑭᐅᖅᑕᖅᑐᒥ ᑕᐃᔅᓱᒪᓂ ᓯᑏᕙᓐ ᕼᐋᐳᕐ ᑲᓇᑕᒥ ᐊᖓᔪᖅᑳᕐᔪᐊᖑᑎᓪᓗᒍ.
ᒪᓕᒃᑐᒥ ᓂᕈᐊᕐᓂᐅᔪᒥ, ᓄᓇᕗᒻᒥᐅᑦ ᓵᓚᐅᖅᐳᑦ ᐃᓚᒋᔭᐅᓚᐅᖅᑐᒥ ᑲᓇᑕᐅᑉ ᒪᓕᒐᓕᐅᖅᑎᖏᓐᓂ ᕼᐊᓐᑐᕐ ᑑᑑᒧᑦ, ᑲᑎᒪᔨᐅᓂᖓ ᓇᓗᓇᐃᖅᓯᒪᓚᐅᖅᐳᖅ ᖃᐱᓚᓇᖅᑐᒥ ᐊᒻᒪ ᖃᓄᐃᓕᐅᕐᓘᑎᑲᑕᖕᓂᖓᓂ ᐲᖅᑕᐅᓚᖅᑳᕋᓂ ᒥᓂᔅᑕᓄᑦ ᑲᑎᒪᔨᖏᓐᓂ ᐊᒻᒪ ᑲᑎᒪᔩᓐᓇᐃᑦ ᑲᑎᒪᓂᖏᓐᓂ ᒪᐃ 2016–ᒥ.
ᐊᔭᐅᕆᕗᒍᑦ ᖃᖅᑲᕐᒥ ᑐᐊᕕᓗᐊᙱᓪᓗᓂ, ᖃᓱᖓᓗᓂ, ᐃᒻᒥᓂᒃ ᑲᑎᖅᓱᐃᓗᓂ ᐊᒻᒪ ᐸᕐᓇᒡᓗᓂ ᐊᒥᓱᓂ ᐊᒃᓱᕈᕐᓂᖃᕐᓂᐊᕐᒪᑦ ᓯᕗᓂᐊᓂ.
ᒐᕙᒪᑐᖃᒃᑯᓐᓂ ᑲᑎᒪᔨᕐᔪᐊᖑᓂᐅᔪᑦ ᐊᒃᓱᕈᕐᓇᖅᖢᓂ ᐱᙳᐊᕐᓂᐅᕗᖅ, ᐋᑐᕚ ᓂᐱᖅᑯᖅᑐᓪᓗᓂ ᐃᓂᐅᕗᖅ ᐊᒥᓱᓂ ᓂᐱᓂᑦ ᑐᓴᖅᑕᐅᓛᖑᔪᒪᔪᓂ ᓄᓇᖏᓐᓄᑦ ᐊᑲᐅᙱᓕᐅᕈᑎᖏᓐᓄᑦ, ᓂᐸᖏᖅᑎᑦᑎᓇᓱᐊᖅᑐᓂ ᑕᐃᒃᑯᓂᖓ ᐃᑲᔪᖅᓱᐃᔪᓄᑦ ᐅᑭᐅᖅᑕᖅᑐᒧᑦ.
ᓄᓇᕗᑦ ᐃᓂᐅᕗᖅ ᑕᐅᑐᙳᐊᒐᒃᓴᐅᙱᑦᑐᒥ ᑲᔾᔮᕐᓇᖅᑐᒻᒪᕆᐊᓗᖕᒥ, ᐲᔭᖅᑕᐅᓯᒪᙱᑦᑐᓂ ᐊᒃᖢᙱᓐᓂᐅᔪᓂ ᐊᒻᒪ ᑲᒪᓇᖅᑐᒥ ᐆᒻᒪᕆᒃᑐᒥ ᐊᒻᒪ ᓱᖏᐅᑎᓴᕋᐃᑦᑐᒥ ᐃᓄᒋᐊᖕᓂᐅᔪᓂ, ᑭᓯᐊᓂ ᓄᖑᓱᐃᑦᑐᑦ ᐊᑲᐅᙱᓕᐅᕈᑎᖏᑦ ᐃᒃᓯᖕᓇᖅᑕᐅᑐᐃᓐᓇᕆᐊᖃᕈᓐᓃᖅᐳᑦ.
ᓄᓇᕗᑦ ᖁᑦᑎᓛᖑᔪᒥ ᐃᒻᒥᓃᕐᓂᖃᓲᖑᕗᖅ ᑲᓇᑕᓕᒫᒥ. ᐱᔪᓐᓇᕐᓂᖃᖅᑐᑐᐊᖑᕗᖅ ᑲᓇᑕᒥ ᐳᕙᒡᓗᖕᓂᖅ ᐱᒻᒪᕆᐅᓪᓗᓂ ᐊᑲᐅᙱᓕᐅᕈᑕᐅᓂᖓᓂ. ᐱᓕᕆᓯᒪᕗᑦ ᐃᒡᓗᒃᓴᖃᙱᓗᐊᕐᓂᖓᓂ ᑐᐊᕕᕐᓇᕐᓂᓪᓚᕆᐅᔪᒥ ᐊᒥᓱᓄᑦ ᐊᕐᕌᒍᓄᑦ. ᐃᓂᐅᕗᖅ ᓂᐅᕕᕐᓂᕐᒥ ᐴᖑᔪᒥ ᓂᕿᓂᑦ ᑮᓇᐅᔭᖃᕈᓐᓃᖅᑎᑦᑎᔪᓐᓇᕐᓂᖓᓂ.
ᐱᔭᕆᐊᖃᖅᐳᖅ ᓇᒡᓕᒍᓱᒃᑐᒥ ᐃᑲᔪᖅᓱᐃᔨᐅᔪᒥ ᓄᓇᕗᒻᒧᑦ ᐊᒻᒪ ᐃᓄᖏᓐᓂ ᐋᑐᕚᒥ. ᑕᐃᓐᓇ ᓈᒻᒪᒃᓴᑐᐃᓐᓇᔾᔮᙱᑦᑐᒥ ᐅᖃᐅᓯᑐᐃᓐᓇᕐᓂ ᐊᒻᒪ ᖃᖅᑲᖅ ᑕᐃᓐᓇᐅᑐᐃᓐᓇᕆᐊᖃᖅᐳᖅ.
"ᑕᐃᑲᓃᙱᓚᖓ (ᑲᓇᑕᐅᑉ ᒪᓕᒐᓕᐅᕐᕕᖓᑕ ᑲᑎᒪᕝᕕᒡᔪᐊᖓᓂ) ᐃᒃᓯᕙᐅᑕᖃᑐᐃᓐᓇᕐᓂᕐᒧᑦ, ᑕᐃᑲᓃᑉᐳᖓ ᐃᑲᔪᕐᓂᕐᒧᑦ 38,000–ᓂ ᐃᓄᖕᓂ ᐊᖏᓛᖑᔪᒥ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᓂᐅᔪᒥ ᑲᓇᑕᒥ," ᐅᖃᓚᐅᖅᐳᖅ ᖃᖅᑲᖅ. "ᑭᓱᑐᐃᓐᓇᐃᑦ ᐅᖃᖅᑕᐅᙱᑐᐃᓐᓇᕆᐊᖃᕈᓐᓃᖅᐳᑦ ᐊᒻᒪ ᐱᔭᕇᖅᑕᐅᓯᒪᙱᓪᓗᑎᒃ ... ᐱᔪᓐᓇᕐᓂᓕᒫᓐᓂ ᐱᓕᕆᓇᓱᐊᕐᓂᐊᖅᐳᖓ ᐊᕐᕌᒍᓄᑦ ᑎᓴᒪᓄᑦ ᐃᒃᓯᕚᖅᑎᓪᓗᖓ ᐃᒃᓯᕙᐅᑕᓐᓂ ᐊᓯᔾᔨᕐᓂᖃᓪᓚᕆᖕᓂᖓᓂ, ᒪᒥᐊᓐᓂᑐᐃᓐᓇᐅᙱᑦᑐᓂ ᑭᓯᐊᓂ ᖃᓄᐃᓕᐅᕐᓂᖃᓪᓚᕆᖕᓂᖓᓂ ᐊᒻᒪ ᑲᒪᒋᔭᖃᑦᑎᐊᕐᓂᐅᔪᒥ."
ᐅᖃᓪᓚᖕᓂᖓ ᐱᐅᒋᑦᑎᐊᖅᐸᕗᑦ. ᖁᙱᐊᓚᐅᖅᑕ ᐱᓱᖕᓂᖓᓂ.