ᐅᖃᖅᐳᒍᑦ: ᑐᑭᖃᙱᑦᑐᑦ ᐃᒃᓯᓐᓇᐃᓂᐅᔪᑦ
^
ᑕᖅᑭᐅᑉ ᐱᒋᐊᕐᓂᐸᓗᐊᓂ, ᐊᔾᔨᓕᐊᖑᔪᓂ ᑕᓪᓕᒪᓪᓗᐊᓂ ᐃᒃᓯᓐᓇᖅᑕᐅᓯᒪᔪᓂ ᑐᒃᑐᓂ ᑐᖁᖓᔪᓂ ᑕᑯᒃᓴᐅᑎᑕᐅᓚᐅᖅᐳᑦ ᐃᓅᖃᑎᒌᖑᔪᓄᑦ ᓯᐊᒻᒪᖅᑎᑦᑎᓂᐅᔪᓂ ᑕᑯᑎᑕᐅᓚᐅᖅᐳᑦ ᑭᕙᓪᓕᕐᒥ ᐊᖑᓇᓱᒃᑎᓄᑦ ᒥᑭᒋᐊᕐᓂᐊᖅᑎᒃᑯᓐᓄᓪᓗ ᑲᑐᔾᔨᖃᑎᒌᖑᔪᓄᑦ (KHTO).
ᑖᒥᔅ ᑰᒧᕐ ᑭᕙᓪᓕᕐᒥ ᐊᖑᓇᓱᒃᑎᓄᑦ ᒥᑭᒋᐊᕐᓂᐊᖅᑎᒃᑯᓐᓄᓪᓗ ᑲᑐᔾᔨᖃᑎᒌᖑᔪᓄᑦ ᐅᖃᓚᐅᖅᐳᖅ, “ᕼᐋᒻᓚᒃᑯᑦ ᑲᖏᖅᖠᓂᕐᒥ ᐊᒻᒪ ᑭᕙᓪᓕᕐᒥ ᐊᖑᓇᓱᒃᑎᓄᑦ ᒥᑭᒋᐊᕐᓂᐊᖅᑎᒃᑯᓐᓄᓪᓗ ᑲᑐᔾᔨᖃᑎᒌᖑᔪᑦ ᐊᐃᑦᑖᕈᓱᒡᔪᐊᖅᐳᑦ ᑕᐃᒪᐃᑦᑐᒥ ᐱᓕᕆᓂᐅᔪᒥ.”
ᐅᓇ ᐃᓚᒋᔭᐅᕗᖅ ᐱᕈᖅᐸᓪᓕᐊᔪᒥ ᑕᐃᒪᐃᖃᑦᑕᕐᓂᐅᔪᒥ ᐃᒃᓯᓐᓇᐃᓂᐅᔪᒥ ᐊᒻᒪ ᐱᕋᔭᖕᓂᒃᑯᑦ ᐊᖑᓇᓱᖕᓂᐅᕗᖅ ᕿᒃᓵᒍᑕᐅᕙᓪᓕᐊᔪᒥ, ᓄᓇᕗᒻᒥᑐᐊᖑᙱᑦᑐᖅ ᑭᓯᐊᓂ ᐃᓚᒋᔭᐅᔪᒥ ᐊᒥᖅᑳᖅᑕᐅᔪᒥ ᐅᖓᓯᖕᓂᐅᔪᒥ ᐅᑯᓄᖓ ᐃᓛᑰᓕᖓᓂᖏᓐᓂᑦ.
ᐊᑭᓖᔾᔪᑎᑦ ᓈᒻᒪᙱᑦᑐᒥ ᐊᖑᓇᓱᖕᓂᐅᔪᒥ ᐱᖏᐊᓲᖑᑎᓪᓗᒍ $575–ᒥ ᐅᕘᓇ ᓄᓇᕗᒻᒥ ᐆᒪᔪᓄᑦ ᒪᓕᒐᖓᓂ, ᐊᔪᕐᓇᕐᓂᖃᖅᐳᖅ ᓇᓂᓯᓂᕐᒥ ᖁᙱᐊᖅᑎᐅᔪᕕᓂᕐᒥ ᐅᖃᕐᓂᖓᓂ ᐆᒪᔪᓕᕆᔩᑦ ᖃᐅᔨᓴᕈᓐᓇᕋᔭᕐᓂᖏᓐᓂ ᐅᑯᓂᖓ ᖃᓄᐃᓐᓂᐅᔪᓂ.
“ᐱᓪᓚᕆᐅᓪᓗᓂ” ᐱᔪᓐᓇᕐᓂᕆᔭᐅᕗᖅ ᓄᓇᕗᑖᕋᓱᐊᕐᓂᐅᔪᒥ ᐊᖏᕈᑎᒥᒃ ᑭᓇᑐᐃᓐᓇᖅ ᐃᓄᒃ ᓂᐅᕕᐊᒃᓴᖃᕈᓐᓇᕐᓂᖏᓐᓂ ᑐᒃᑐᒥ, ᐅᖃᖅᐳᖅ ᐊᕙᑎᓕᕆᔨᒃᑯᓐᓂ ᒥᓂᔅᑕᖓ ᔫ ᓴᕕᑲᑖᖅ, ᐊᒻᒪᓗ ᐊᕙᑎᓕᕆᔨᒃᑯᑦ ᓇᓗᓇᐃᖅᓯᓚᐅᖅᐳᑦ ᕕᕈᐊᕆ 2020–ᒥ ᐊᖑᓇᓱᒃᑏᑦ ᓂᐅᕕᐊᒃᓴᖃᕈᓐᓇᖅᐳᑦ ᕿᑎᐊᓂ $300–ᒥ $1,000–ᒧᑦ ᐊᑐᓂ ᑐᒃᑐᒧᑦ.
ᐊᔪᕐᓇᙱᑦᑐᑯᓘᕗᖅ ᑕᑯᔪᓐᓇᕐᓂᕐᒥ ᕿᓚᒻᒥᐅᔪᒥ ᐅᓗᕆᐊᓇᕐᓂᖓᓂ/ᑎᑭᐅᑎᓂᑦᑎᐊᕙᐅᓂᖓᓂ ᐅᕙᓂ, ᑭᓯᐊᓂ ᓯᕗᒻᒧᑦ ᐃᓱᒪᓂᖃᙱᓚᖅ ᐱᔾᔪᑎᖃᖅᑎᓪᓗᒍ ᐸᐸᑦᑎᑦᑎᐊᕋᓱᐊᕐᓂᐅᔪᒥ.
ᐅᓇ ᐱᓐᓇᕆᔭᐅᔪᒥ ᐆᒪᔪᐃᑦ ᐊᔾᔨᒌᙱᓐᓂᖏᓐᓂ ᐃᒃᐱᒋᔭᐅᑦᑎᐊᙱᓐᓂᖏᓐᓂ ᐊᒻᒪᓗ ᐃᒃᓯᓐᓇᖅᑕᐅᓪᓗᑎᒃ ᐃᒍᓇᑐᐃᓐᓇᕐᓂᕐᒧᑦ ᐅᕝᕙᓘᓐᓃᑦ ᓂᕿᑐᖅᑎᓄᑦ ᐆᒪᔪᓄᑦ ᐱᔭᐅᖢᑎᒃ ᑎᒃᑯᐊᕐᓂᖃᖅᐳᖅ ᑲᑎᙵᓂᖃᑦᑎᐊᙱᓐᓂᐅᔪᒥ ᐊᖑᓇᓱᒃᑎᓄᑦ ᐱᔪᓐᓇᕐᓂᕆᔭᖏᓐᓂ ᐊᒻᒪ ᑲᒪᒋᔭᕆᐊᖃᕐᓂᐅᔪᓂ. ᐊᒥᓱᓂ ᓂᐱᓂᑦ ᐃᓱᒫᓗᒃᑑᔮᖅᐳᑦ ᒪᒃᑯᖕᓂᖅᓴᐅᔪᓂ ᐱᐅᓯᖃᑎᒌᖑᔪᓂᑦ ᐱᖅᑯᓯᖓᓐᓂ ᐃᓛᑰᓕᖓᓂᖏᓐᓄᑦ.
ᒫᔾᔨᒥ, ᐃᒃᓯᕚᕐᓂᐅᔪᒥ ᒪᔨᒐᓕᐅᖅᑏᑦ ᑲᑎᒪᕕᒡᔪᐊᖓᓂ, ᒪᓕᒐᓕᐅᖅᑏᑦ ᐅᖃᐅᓯᖃᓚᐅᖅᐳᑦ ᐱᕈᖅᐸᓪᓕᐊᔪᒥ ᑐᐊᕕᕐᓇᕐᓂᐅᔪᒥ ᑭᕙᓪᓕᕐᒥ.
“ᑕᒪᕐᒥᒐᓚᑦ ᐱᔾᔪᑎᖃᖅᐳᖅ ᐊᖑᓇᓱᒃᑕᐅᓗᐊᖃᑦᑕᕐᓂᖏᓐᓂ ᐊᒻᒪ ᖃᕋᓴᐅᔭᑎᒍᑦ ᓂᐅᕕᐊᒃᓴᖃᕐᓂᐅᔪᒥ … ᒫᓐᓇᐅᔪᒥ ᐊᐅᓚᑕᐅᓂᖃᙱᓚᖅ ᓂᐅᕕᐊᒃᓴᐅᓂᖓᓂ ᓂᕿᖓᓐᓂ, ᐊᒻᒪ ᐃᓚᖏᑦ ᐃᓄᐃᑦ ᓂᐅᕕᐊᒃᓴᖃᓲᖑᕗᑦ ᓂᕿᓂᑦ ᖃᕋᓴᐅᔭᑎᒍᑦ ᐊᑭᑐᔪᒻᒪᕆᐊᓘᓗᓂ. ᐃᑲᔪᖅᓱᐃᔪᒪᕗᖓ ᐊᖑᓇᓱᒃᑎᓂ ᐊᖑᓇᓱᑦᑎᐊᓲᓂᑦ, ᑭᓯᐊᓂ ᐊᒥᓱᓗᐊᒃᑲᓐᓂᕐᓂ ᐃᓄᖕᓂ ᑐᖁᕋᐃᑐᐃᓐᓇᖅᑐᓂ ᑐᒃᑐᓂ ᐊᒻᒪ ᕿᒪᑐᐃᓐᓇᖅᖢᓂᔾᔪᒃ,” ᐅᖃᓚᐅᖅᐳᖅ ᑳᑎ ᑕᐅᑐᙱ, ᒪᓕᒐᓕᐅᖅᑎ ᑲᖏᖅᖠᓂᕐᒧᑦ ᐅᐊᖕᓇᒥ-ᐃᒡᓗᓕᒑᕐᔪᖕᒧᑦ.
ᑕᐅᑐᙱ ᖃᐃᖁᔨᓂᓯᒪᓂᖃᖅᐳᖅ ᐱᖁᔭᓕᐅᕐᓂᕐᒥ ᖃᕋᓴᐅᔭᑎᒍᑦ ᓂᐅᕕᐊᒃᓴᐅᓂᐅᕙᒃᑐᓂ ᑐᒃᑑᑉ ᓂᕿᖓᓐᓂ ᐊᕐᕌᒍᒐᓴᐅᓕᖅᑐᓄᑦ ᓄᖑᑎᕆᑦᑕᐃᓕᒪᓂᕐᒧᑦ ᑐᒃᑐᓂ ᐃᓛᑰᓕᖓᓂᖏᓐᓂᑦ.
ᐅᖃᐅᓯᖃᓚᐅᕆᕗᖅ ᐊᖑᓇᓱᒃᑎᓂ ᕿᒪᐃᑐᐃᓐᓇᖅᑐᓂ ᑐᖁᑕᒥᓂᑦ ᑐᓐᓄᖃᙱᑦᑐᓂ, ᐅᕝᕙᓘᓐᓃᑦ ᐅᖃᑐᐃᓐᓇᖓ ᐱᔭᐅᓪᓗᓂ “ᐊᒻᒪᓗ ᑕᒪᓐᓇ ᐃᓄᐃᑦ ᐱᖅᑯᓯᑐᖃᕆᙱᓚᖓ. ᐃᓱᒪᔭᕆᐊᖃᖅᐳᒍᑦ ᐱᓕᕆᓂᐅᔪᓂ ᐃᓕᓐᓂᐊᖅᑎᑦᑎᓂᕐᒧᑦ ᒪᒃᑯᖕᓂᖅᓴᓂ ᐱᐅᓯᖃᑎᒌᖑᔪᓂ ᐊᖑᓇᓱᒃᑎᐅᔪᓂ ᖃᓄᖅ ᐋᒃᑐᐃᑦᑎᐊᕐᓂᕐᒥ ᑐᒃᑐᒥᒃ, ᐊᒻᒪᓗ ᑭᓱᓂ ᐊᑑᑎᖃᕐᓂᖏᓐᓂ ᐊᔾᔨᒌᙱᑦᑐᓄᑦ ᐃᓚᒋᔭᐅᔪᓄᑦ ᑐᒃᑐᒥ; ᓲᕐᓗ, ᐊᓐᓄᕌᒃᓴᓄᑦ.”
ᑰᒧᕐ ᐅᖃᐅᓯᒃᓴᖓ ᐅᖃᖅᓯᒪᓚᐅᖅᐳᖅ, “ᐃᓚᖏᓐᓂ ᐃᓚᒋᔭᐅᔪᓂ ᓂᕿᓂᑦ ᐱᔪᒪᙱᑕᖃᕈᕕᑦ, ᐃᖅᑲᐅᒪᓂᐊᖅᐳᑎᑦ ᐃᓄᑐᖃᕐᓂ ᐊᒻᒪ ᐊᓯᖏᓐᓂ ᓄᓇᓕᖕᒥᐅᑕᐅᔪᓂ ᓂᕿᖓᓐᓂ ᐱᔪᒪᕐᔪᐊᕋᔭᕐᓂᖏᓐᓂ.”
ᐊᐃᕕᓕᒃ ᒪᓕᒐᓕᐅᖅᑎ ᐸᑎᖅ ᓇᑦᓱᕐ ᐅᖃᓚᐅᕆᕗᖅ ᐊᔾᔨᖓᓂ ᐃᓱᒫᓘᑎᒋᔭᐅᔪᓂ, ᐊᔭᐅᕆᓪᓗᓂ ᓴᕕᑲᑖᕐᒥ “ᐃᒃᓯᕚᖃᑎᖃᕐᓂᖓᓂ ᓄᓇᕗᒻᒥ ᑐᙵᕕᒃᑯᓐᓂ ᐊᒻᒪᓗ ᑲᑎᒪᔾᔪᑎᒋᓗᒍ,” ᐃᓚᒋᐊᖅᓯᓪᓗᓂ: “ᐱᐅᓇᔭᖅᐳᖅ ᑕᐃᒪᐃᑦᑐᓐᓇᕈᑎᒃ ᑐᒃᑐᐃᕈᑎᓚᐅᙱᓐᓂᑦᑎᓐᓂ.”
ᑰᒧᕐ ᐸᕐᓇᒃᐳᖅ ᑐ ᐊᖑᓇᓱᒃᑎᓄᑦ ᒥᑭᒋᐊᕐᓂᐊᖅᑎᒃᑯᓐᓄᓪᓗ ᑲᑐᔾᔨᖃᑎᒌᖑᔪᓄᑦ ᐅᖃᐅᓯᒃᓴᖏᓐᓂ ᓄᓇᓕᖕᓂ ᐅᖃᓪᓚᒡᕕᐅᔪᓄᑦ ᐱᕈᖅᓴᐃᓂᕐᒥ ᐅᔾᔨᕈᓱᖕᓂᐅᔪᒥ.
“ᑕᑯᔪᒪᓇᔭᖅᐳᒍᑦ ᐃᓚᐅᖃᑕᐅᓂᖏᓐᓂ ᐆᒥᖓᓗᒃᑖᒥ ᐱᓕᕆᓂᐅᔪᒥ ᐊᒻᒪᓗ ᐃᓄᑐᖃᕐᓂ ᐅᖃᓪᓚᖕᓂᖏᓐᓂ ᐅᖃᓪᓚᒡᕕᖕᓂ. ᓄᖅᑲᖅᑎᑕᐅᓂᖃᕆᐊᖃᖅᐳᖅ. ᐃᒃᓯᓐᓇᐃᑐᐃᓐᓇᕐᓂᕐᒥ ᓂᕿᓂᑦ ᓄᓇᒥ ᐃᓄᐃᑦ ᖃᐅᔨᒪᔭᑐᖃᖏᓐᓂ ᒪᓕᖕᓂᐅᙱᓚᖅ. ᐊᒥᓱᑦ ᐃᓄᑐᖃᐃᑦ ᐅᖃᓪᓚᐅᓯᖃᕐᓂᐊᖅᐳᑦ ᐊᑭᕋᖅᑐᕐᓗᑎᒃ.”
ᑲᑎᓪᓗᒍ ᐱᔪᓐᓇᖅᑕᐅᔪᒥ ᐊᖑᓇᓱᖕᓂᕐᒧᑦ ᑭᒡᓕᖃᖅᑎᑕᐅᓂᐅᔪᒥ ᑭᕙᓪᓕᕐᒥ ᐃᓛᑰᓕᖓᓂᖏᓐᓂᑦ ᐱᔭᕆᐊᖃᓯᑳᓪᓚᒃᐸᑦ, ᐃᓚᒋᐊᖅᓯᑐᐃᓐᓇᕐᓂᐊᖅᐳᖅ ᐊᑲᐅᙱᓕᐅᕈᑕᐅᔪᒥ, ᐸᐸᑦᑏᓐᓇᕋᓱᐊᕐᓂᐅᔪᒥ ᐃᓕᓯᒪᑎᓪᓗᒍ ᓂᕿᒃᓴᖃᑦᑎᐊᕐᓂᐅᔪᒧᑦ.
ᐃᓕᓐᓂᐊᕐᓂᖅ ᐊᒻᒪ ᑕᖅᑲᐅᖓ ᐃᓴᖕᓂᐅᔪᒥ ᐱᐅᓂᖅᐹᖑᓪᓗᑎᒃ ᐱᓕᕆᐊᖑᔪᓐᓇᖅᑐᒥ ᒥᒃᖠᒋᐊᖅᓯᓂᕐᒧᑦ ᑐᑭᖃᙱᑦᑐᒻᒪᕆᐊᓗᖕᓂ ᐃᒃᓯᓐᓇᐃᑐᐃᓐᓇᕐᓂᐅᔪᓂ. ᐊᒻᒪᓗ ᐅᕙᓂ ᐅᓇᑕᕐᓂᐅᔪᒥ, ᐃᒃᓯᓐᓇᐃᑐᐃᓐᓇᕈᓐᓇᙱᓚᒍᑦᑕᐅᖅ ᐊᑯᓂᐅᓂᐅᔪᒥ.