ᐃᖅᑲᓇᐃᔭᖅᑎᖃᕐᓂᕐᒧᑦ ᐃᓱᒫᓘᑕᐅᔪᑦ ᑭᐅᔭᐅᔭᕆᐊᖃᖅᐳᑦ ᐊᒻᒪᓗᑦᑕᐅᖅ ᐱᓕᕆᓂᐅᔪᓂ ᐃᓄᑐᖃᓄᑦ ᐃᓐᓇᕈᖅᐸᓪᓕᐊᑦᑎᐊᕈᓐᓇᕐᓂᖏᓐᓂ ᐊᑦᑕᓇᙱᑦᑐᒥ ᐊᖏᕐᕋᒥ
ᐊᑲᐅᙱᓕᐅᕈᑎ: ᐃᓄᑐᖃᐃᑦ ᐊᒻᒪ ᐃᓐᓇᐃᑦ
ᐅᖃᖅᐳᒍᑦ: ᐃᑲᔪᖅᓱᐃᓪᓗᐊᖅᐸᕗᑦ
ᐃᓄᒋᐊᖕᓂᐅᔪᑦ ᓄᓇᕗᒻᒥ ᒪᒃᑯᒃᑑᕗᑦ.
90 ᐳᓴᓐᑎᑲᓴᐅᔪᒥ ᓄᓇᕗᒻᒥᐅᑕᓄᑦ –2016–ᒥ ᑲᓇᑕᒥ ᑭᓪᓕᓯᓂᐊᖅᑎᒃᑯᓐᓂ ᓇᐃᓴᐃᓂᐅᔪᒥ ᖃᐅᔨᓴᖅᑕᐅᓂᑯᓂ ᑎᑎᕋᖅᓯᒪᓂᐅᔪᓂ –55–ᒥ ᐅᑭᐅᓕᖕᓂ ᑐᖔᓃᑉᐳᑦ.
ᐅᖃᐅᓯᐅᓪᓗᓂ ᑕᐃᔅᓱᒥᖓᑦᑕᐃᓐᓇᖅ ᖃᐅᔨᓴᖅᑕᐅᓂᑯᓂ ᑎᑎᕋᖅᓯᒪᓂᐅᔪᓂ ᐋᖅᑭᒃᓯᒪᔪᓂ, ᕿᒪᐃᕗᖅ 4,000–ᐸᓗᖕᓂ ᐃᓐᓇᕐᓄᑦ ᐊᔾᔨᒌᙱᕈᓘᔭᖅᑐᓂ ᐱᔭᕆᐊᖃᕐᓂᖃᖅᑐᓂ ᐱᔾᔪᑎᓕᖕᒥ ᑭᒡᓕᐅᔪᓂ ᐸᖅᑭᔭᕆᐊᖃᕐᓂᐅᔪᓄᑦ ᐊᒻᒪ ᐃᒻᒥᒃᑰᕐᓂᖏᓐᓂ ᐃᓱᒪᒋᔭᐅᓂᖓᓂ. ᓄᓇᕗᒻᒥ ᑭᓪᓕᓯᓂᐊᖅᑎᒃᑯᑦ ᐅᖃᓚᐅᖅᐳᖅ ᔪᓚᐃ 1, 2014–ᒥ, ᐅᓄᕐᓂᐅᔪᑦ ᓄᓇᕗᒻᒥᐅᓂ ᐅᑭᐅᓕᖕᓂ 80–ᓂ ᐊᒻᒪ ᐅᖓᑖᓄᑦ ᓇᓚᐅᑦᑖᕆᔭᐅᓚᐅᖅᐳᖅ ᐅᓄᙱᓐᓂᖅᓴᐅᓂᖏᓐᓂ 150–ᓂ, "ᑭᓯᐊᓂ ᒪᕐᕈᐃᓪᓗᐊᖅᑐᒥ ᐅᓄᖅᓯᒋᐊᕐᓂᐊᖅᐳᖅ ᒪᓕᒃᑐᓂ ᐊᕐᕌᒍᓄᑦ 10–ᓄᑦ ᐊᒻᒪ ᒪᕐᕈᐃᓪᓗᐊᒃᑲᓐᓂᕐᓗᓂ ᐊᕐᕌᒍᓂ 10–ᓂ ᑭᖑᓂᐊᒍᑦ."
ᐊᔪᕐᓇᙱᑐᐃᓐᓇᕆᐊᖃᖅᐳᖅ, ᐱᒋᐊᓕᓵᕐᓂᑰᔪᒥ ᓄᓇᕘᓪᓗᓂ ᑕᑖᖅᑐᒥ ᒪᒃᑯᒃᑐᓂ, ᑲᒪᒋᔭᖃᕐᓂᕐᒥ ᐊᒃᓱᕈᕈᑕᐅᔪᓄᑦ ᓴᙱᓂᕐᒥ ᐃᓐᓇᕈᖅᐸᓪᓕᐊᔪᓄᑦ ᑭᓪᓕᓯᓂᐊᖅᑕᐅᓯᒪᔪᓄᑦ ᖃᐅᔨᓴᖅᑕᐅᓂᑯᓂ ᑎᑎᕋᖅᓯᒪᓂᐅᔪᓂ, ᑭᓯᐊᓂ ᐃᓄᑐᖃᕗᑦ, ᑐᙵᕕᒋᓪᓗᑎᒍᑦ ᐱᒻᒪᕆᐅᓪᓗᑎᒃ ᐃᓅᖃᑎᒌᖕᓂᐅᔪᓄᑦ, ᐱᓪᓗᐊᖅᐳᑦ ᑕᒪᒃᑭᐅᒪᔪᒥ ᐃᑲᔪᖅᓯᕐᓂᑦᑎᓐᓂ.
ᐃᓚᖓᑦ ᐆᒪᙵᑦ ᓇᓗᓇᐃᖅᓯᓂᕐᒥ ᐃᓄᑑᓗᑎᒃ ᐃᓅᔪᓐᓇᐃᓪᓕᒍᑎᒃ, ᐊᖓᔪᖅᑳᕗᑦ ᐊᒻᒪ ᐊᑖᑕᑦᑎᐊᕗᑦ ᐊᓈᓇᑦᑎᐊᕗᑦ ᐃᓂᖃᕐᓂᐊᕐᓗᑎᒃ ᑐᔪᕐᒥᕕᒋᓂᐊᖅᑕᖏᓐᓂ ᓈᒻᒪᒃᑐᒥ ᐊᔾᔨᒌᙱᑦᑐᓂ ᐱᔭᕆᐊᓕᖏᓐᓂ ᐱᔪᓐᓇᕐᓂᐊᖅᑕᒥᓂᑦ.
ᓄᓇᕗᑦ 44–ᓂ ᐊᑯᓂᐅᔪᒃᑯᑦ ᐸᖅᑭᔭᐅᓂᕐᒥ ᐃᒡᓕᖅᑕᖃᖅᐳᖅ ᐅᑯᓇᓂ ᐸᖅᑭᔭᐅᖏᓐᓇᕐᓂᕐᒧᑦ ᐃᒡᓗᖁᑎᖃᖅᐳᑦ ᐊᒻᒪ ᐃᓄᑐᖃᓄᑦ ᐊᖏᕐᕋᐅᔪᓂ ᐃᖃᓗᖕᓂ, ᐃᖃᓗᒃᑑᑦᑎᐊᖅ, ᐃᒡᓗᓕᒃ ᐊᒻᒪ ᐅᖅᓱᖅᑑᒥ. ᑕᒪᒃᑭᑦ ᐃᒡᓕᐅᔪᑦ ᑕᑖᖅᐳᑦ, ᐅᖃᐅᓯᐅᓪᓗᓂ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ.
ᐊᐃᑉᕆᓕ 2015–ᒥ ᓄᓇᕗᒻᒥ ᒐᕙᒪᒃᑯᑦ ᐅᓂᒃᑳᓕᐊᖓᓂ 'ᐃᖏᕐᕋᐃᓐᓇᖅᑐᒥ ᐸᖅᑭᓂᐅᔪᒥ ᓄᓇᕗᒻᒥ 2015–ᒥ 2035–ᒧᑦ' ᐅᖃᖅᓯᒪᕗᖅ "ᓄᓇᕗᒻᒥᐅᑦ ᐸᖅᑭᓂᐅᔪᒥ ᐊᔪᓕᖅᐸᓪᓕᐊᔪᓄᑦ ᐃᓄᑐᖃᕐᓄᑦ, ᒪᒥᔪᐃᑦᑐᓄᑦ ᖃᓂᒪᔪᓄᑦ, ᐅᕝᕙᓘᓐᓃᑦ ᐊᔪᕈᑎᓕᖕᓂ ᐃᓚᒋᔭᐅᔪᓄᑦ ᐱᔪᓐᓇᕐᓂᓕᒫᖏᓐᓂᑦ ᐸᖕᒥᐅᒐᔪᒃᑐᓂ ᐊᖏᕐᕋᐅᔪᓂ. ᐊᖏᑦᕋᒥ ᐸᖅᑭᔭᐅᓂᖏᓐᓂ ᐃᑲᔪᖅᓯᖅᑕᐅᓂᖅ ᑐᓂᔭᐅᓲᖑᕗᖅ ᐊᑐᐃᓐᓇᐅᒑᖓᑕ. ᑭᓯᐊᓂ, ᐸᖅᑭᓂᖃᕐᓂᐅᔪᒥ ᐃᖏᕐᕋᓂᖓ ᐊᑯᓂᐅᔪᓐᓇᖅᐳᖅ ᐊᒻᒪ ᐱᔭᕆᑐᓗᓂ, ᐱᓗᐊᖅᑐᒥ ᐃᖅᑲᐃᙱᑦᑕᐅᑎᓕᖕᒥ, ᓄᓄᔪᓐᓇᖏᓐᓂᖅ, ᐅᕝᕙᓘᓐᓃᑦ ᐱᓱᑦᑎᐊᕈᓐᓇᐃᓪᓕᓂᕐᒥ. ᖃᖓᒃᑯᒃᑭᐊᖅ, ᐊᔪᕐᓇᖅᓯᓇᔭᖅᐳᖅ ᑐᓂᓯᓂᕐᒥ ᐸᖅᑭᓂᐅᔪᒥ ᐊᖏᕐᕋᒥ. ᑕᐃᒪᐃᓕᕈᓂ, ᐃᓄᒃ ᐃᓕᔭᐅᕗᖅ ᐅᑕᖅᑭᓂᕐᒧᑦ ᑎᑎᕋᖅᓯᒪᓂᐅᔪᒥ ᐃᒡᓗᖃᖅᑎᑕᐅᔪᓄᑦ ᐊᑯᓂᐅᔪᒥ ᐸᖅᑭᔭᐅᓂᕐᒧᑦ. ᑕᐃᒪᐃᒐᔪᒃᐸᓪᓕᐊᔪᒥ, ᐃᓄᒃ ᐊᐅᓪᓚᖅᑎᑕᐅᕗᖅ ᕿᑭᖅᑕᓂ ᐋᓐᓂᐊᕕᖓᓄᑦ ᐅᕝᕙᓘᓐᓃᑦ ᓄᓇᕘᑉ ᓯᓚᑖᓄᑦ."
ᓄᑖᖑᔪᖅ ᐊᑯᓂᐅᔪᒥ ᐸᖅᑭᔭᐅᓂᕐᒧᑦ ᐊᖏᕐᕋᐅᔪᑦ ᓴᓇᔭᐅᕙᓪᓕᐊᔪᓂ ᐃᖃᓗᖕᓂ, ᖃᖏᖅᖠᓂᖅ, ᐊᒻᒪᓗ ᓱᓕ ᐅᖃᐅᓯᐅᓂᐊᖅᑐᒥ 24-ᓂ ᐃᒡᓕᓕᖕᓂ ᐃᒡᓗᕐᔪᐊᒥ ᕿᑎᕐᒥᐊᓂ ᐊᕕᒃᑐᖅᓯᒪᓂᐅᔪᒥ ᐊᖏᔪᒻᒪᕆᐊᓘᓪᓗᓂ ᐱᒋᐊᕈᑕᐅᕗᖅ ᑭᓯᐊᓂ ᑎᑭᑦᑐᓐᓇᙱᑐᐃᓐᓇᖅᐳᖅ ᕿᓚᒻᒥᐅᓂᖅᓴᒥ.
ᓵᓐᑎ ᖃᐅᓐᓇᖅ, ᑕᐃᔅᓱᒪᓂ ᐃᓱᒻᒥᖅᑐᐃᔨᐅᓚᐅᑲᓚᐅᖅᑐᒥ ᓄᓇᕗᒻᒥ ᐃᓐᓇᕐᓄᑦ ᑲᑐᔾᔨᖃᑎᒌᖑᔪᓄᑦ, ᐅᖃᓚᐅᖅᐳᖅ ᕕᕈᐊᕆ 2019–ᒥ ᐊᐱᖅᓱᖅᑕᐅᓂᐅᔪᒥ ᑕᑯᔪᒪᓇᔭᖅᐳᖅ ᓄᓇᕗᒻᒥ ᒐᕙᒪᒃᑯᓐᓂ ᐊᑐᓕᖅᑎᑦᑎᓂᖏᓐᓂ ᐅᑎᕐᕕᐅᔭᕆᐊᖃᕐᓂᕐᒥ ᐃᓚᒋᔭᐅᔪᓄᑦ ᐃᒻᒥᖕᓂ ᐸᖅᑭᓂᖏᓐᓂ ᐃᓄᑐᖃᖏᓐᓄᑦ.
"ᐃᓄᐃᑦ ᐃᖅᑲᓇᐃᔮᒥᓂᒃ ᓄᖅᑲᓲᖑᕗᑦ ᐸᖅᑭᓂᕐᒧᑦ ᐃᓄᑐᖃᕐᓂᑦ ᐊᖏᕐᕋᖏᓐᓂ. ᑕᒪᓐᓇ ᐃᑲᔪᖅᓱᐃᓇᔭᖅᐳᖅ ᐃᓚᑰᓂᐅᔪᒥ," ᐅᖃᓚᐅᖅᐳᖅ ᖃᐅᓐᓇᖅ, ᐅᖃᖅᑑᔮᖅᖢᓂ ᓄᓇᕗᒻᒥ ᒐᕙᒪᒃᑯᑦ "ᐊᑐᓕᖅᑎᑦᑎᓗᑎᒃ ᐸᖅᑭᓂᐅᔪᒥ ᐱᓕᕆᐊᖑᔪᒥ – ᓄᓇᑦᓯᐊᖅ ᑕᐃᒪᐃᓕᐅᖅᐳᑦ ᐅᖃᓪᓚᒃᑎᓪᓗᑕ. ᐊᑐᖅᐸᖓᑦ ᐃᓐᓄᒃᑎᑦᑎᓂᕐᒧᑦ ᐃᓗᐊᓂ ᓄᓇᓕᐅᔪᒥ."
ᐃᖃᓗᖕᓂ-ᒪᓂᕋᔭᖕᒥ ᒪᓕᒐᓕᐅᖅᑎᐅᔪᖅ ᐋᑎᒻ ᓚᐃᑦᔅᑑᓐ ᐊᑕᐅᓯᐅᓪᓗᓂ ᐊᒥᓱᓂ ᐃᓚᒋᔭᐅᔪᓂ ᒪᓕᒐᓕᐅᖅᑎᒃᑯᓐᓂ ᖁᕕᐊᓚᐅᖅᑐᒥ ᑕᑯᓂᕐᒧᑦ ᐊᑯᓂᐅᔪᒥ ᐸᖅᑭᓂᐅᔪᒧᑦ ᐃᒡᓗᕐᔪᐊᓂ ᓯᕗᒻᒧᒋᐊᖅᑐᓄᑦ, ᑭᓯᐊᓂ ᐅᔾᔨᖅᓱᑦᑎᐊᖁᔨᕗᖅ ᒪᓕᖕᓂᐊᖅᑐᖅ ᒐᕙᒪᐅᔪᓄᑦ "ᐊᒻᒪ ᐱᓗᐊᖅᑐᒧᑦ ᐅᑭᐅᖅᑕᖅᑐᒥ ᓯᓚᑦᑐᖅᓴᕐᕕᖓᓄᑦ, ᓇᖏᖅᓯᓗᑎᒃ ᐊᒻᒪ ᐱᒋᐊᖅᑎᑦᑎᓗᑎᒃ ᐱᓕᒻᒪᒃᓴᐃᕙᓪᓕᐊᓕᕐᓗᑎᒃ, ᐃᑲᔪᖅᓱᐃᔨᐅᔪᓄᑦ ᓴᓇᔨᓂᑦ ᐱᔭᕆᐊᖃᖅᑐᓄᑦ ᐊᐅᓚᑦᑎᓂᕐᒥ ᑕᐃᔅᓱᒥᖓ ᐃᒡᓗᕐᔪᐊᖑᔪᒧᑦ."
ᒫᓐᓇ ᐊᔪᕐᓇᖅᐸᒌᖅᐳᖅ ᐃᖅᑲᓇᐃᔭᖅᑎᑦᑎᖃᕐᓂᕐᒧᑦ ᓄᓇᕘᑉ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐸᖅᑭᔭᐅᓂᕐᒧᑦ ᐃᒡᓗᕐᔪᐊᖏᓐᓂ, ᐊᒻᒪᓗ ᐱᑕᖃᙱᓗᐊᕐᓂᖓᓂ ᐃᑲᔪᖅᓱᐃᔨᐅᔪᓄᑦ ᓴᓇᔨᓂᑦ ᐱᓕᒻᒪᒃᓴᐃᓂᕐᒧᑦ ᐱᓕᕆᐊᖑᔪᓂ ᓄᓇᕗᒻᒥ, ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᒥᑭᓛᖑᓂᐊᖅᐳᖅ ᒐᕙᒪᒃᑯᓐᓄᑦ ᐃᓱᒫᓘᑕᐅᔪᓄᑦ.
ᐃᓚᒌᖑᔪᓄᑦ ᐊᒻᒪ ᐱᓕᕆᔨᐅᔪᓄᑦ ᒐᕙᒪᒃᑯᓐᓂ, ᐊᖏᔪᓂ ᐃᖏᕐᕋᕙᓪᓕᐊᓂᖃᖅᐳᑦ ᓇᓗᓇᐃᖅᓯᓂᕐᒥ ᐃᓄᑐᖃᕗᑦ ᐃᓅᓯᕐᒥ ᐱᐅᓂᐅᔪᒥ ᐱᓪᓗᐊᖅᑕᒥᓂᑦ ᑭᖑᓪᓕᐹᖑᓂᐅᔪᓄᑦ ᐊᕐᕌᒍᖏᓐᓂ, ᑭᓯᐊᓂ ᒥᒃᖠᒋᐊᖅᑎᑦᑎᔭᕆᐊᖃᙱᑉᐳᒍᑦ ᐊᔭᐅᕆᓂᕐᒥ ᓂᕈᐊᖅᓯᒪᔭᑦᑎᓐᓂ ᑲᑎᒪᔨᐅᔪᓄᑦ ᑕᒪᒃᑭᓄᑦ ᑭᒡᓕᐅᔪᓄᑦ ᐊᒻᒪᓗ ᐊᔭᐅᕆᓂᕐᒥ ᐃᖏᕐᕋᕙᓕᐊᓂᐅᔪᒧᑦ ᖃᓄᐃᑦᑑᓂᖏᓐᓂ ᐸᖅᑭᓂᐅᔪᒥ ᐊᑐᐃᓐᓇᐅᑎᑕᐅᔪᓄᑦ.