Skip to content

ᐃᓱᒪᕗᑦ: ᐃᖏᕐᕋᓂᐅᔪᑦ ᐅᑯᓄᖓ ᓱᓕᓂᕋᐃᓂᕋᕐᓂᐅᔪᓄᑦ

ᐅᖃᓪᓚᖕᓂᐅᔪᖅ ᑯᐃᓐ ᐃᒃᓯᕙᐅᑕᖓᓐᓂ ᑐᓂᓰᓐᓇᖅᐳᖅ ᑕᐃᒃᑯᓂᖓᑦᑕᐃᓐᓇᖅ ᑐᕌᒐᒃᓴᐅᔪᓂ ᑲᓇᑕᐅᑉ ᐅᑭᐅᖅᑕᖅᑐᖓᓄᑦ

ᐊᑲᐅᙱᓕᐅᕈᑎ: ᒐᕙᒪᑐᖃᒃᑯᓐᓂ ᓯᕗᓪᓕᐅᔾᔭᐅᑎᑕᐅᓂᐅᔪᑦ
ᐅᖃᖅᐳᒍᑦ: ᖃᐅᔨᓴᐃᙱᓐᓂᖅᓴᐅᓗᓯ, ᓱᒃᑲᓂᖅᓴᒥ ᐱᓕᕆᓗᓯ

ᓯᑎᐱᕆ 23–ᒥ, ᑯᐃᓐ ᑭᒡᒐᖅᑐᖅᑎᖓ ᑲᓇᑕᒥ ᔫᓕ ᐸᐃᔭᑦ ᑐᓂᓯᓚᐅᖅᐳᖅ ᑲᓇᑕᒧᑦ ᐅᖃᓪᓚᖕᓂᕆᔭᖓᓂ ᑯᐃᓐ ᐃᒃᓯᕙᐅᑕᖓᓐᓂ.

ᐊᒃᑐᖅᓯᓂᖃᓚᐅᖅᐳᖅ ᑕᒪᒃᑭᓂ ᐅᖃᓪᓚᖕᓂᐅᔪᓄᑦ ᑎᒃᑯᐊᖅᑕᐅᓯᒪᔪᓄᑦ – ᐃᒡᓗᒃᓴᖃᖅᑎᑦᑎᓂᕐᒥ, ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐸᖅᑭᔭᐅᓂᐅᔪᒥ, ᐃᓕᓐᓂᐊᕐᓂᕐᒥ, ᐊᑐᐊᒐᓕᐅᕆᓂᕐᒥ, ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂ, ᓄᓇᒥᙶᖅᑐᒥ ᐆᒻᒪᖅᑯᑎᖃᕐᓂᕐᒥ ᐊᒻᒪ ᐊᒥᓱᒃᑲᓐᓂᕐᓂ – ᑕᐃᒫᒃ ᐅᑯᐊ ᐅᖃᓪᓚᖕᓂᐅᔪᑦ ᑕᐃᒪᐃᖏᓐᓇᖅᐸᒃᑎᓪᓗᒋᑦ, ᐃᒃᓯᓐᓇᐃᓪᓗᑎᒃ ᐅᖃᐅᓯᖃᕐᓂᐅᔪᒥ ᖃᓄᖅ ᐊᖏᔪᐊᓘᓪᓗᑎᒃ ᑐᕌᒐᒃᓴᐅᔪᑦ ᑎᑭᐅᑎᔭᐅᓂᐊᕐᓂᖏᓐᓂ.

ᐊᐃᑉᐸᖓ ᐃᓚᑰᓂᐅᔪᖅ ᐅᖃᓪᓚᖕᓂᐅᔪᒥ ᐅᖃᐅᓯᖃᕐᓂᐅᔪᒥ ᑲᓇᑕᐅᑉ ᐅᑭᐅᖅᑕᖅᑐᖓᓄᑦ ᐊᒻᒪᓗ ᐅᐊᖕᓇᒥ ᐊᑐᐊᒐᓄᑦ ᐋᖅᑭᒃᓱᖅᑕᐅᓯᒪᓂᖏᓐᓂ, ᑐᓂᔭᐅᓚᐅᖅᑐᒥ ᐊᕐᕌᓂ ᐅᓐᓄᖓᑕ ᓯᕗᓂᐊᓂ ᒐᕙᒪᑐᖃᒃᑯᑦ ᓂᕈᐊᕐᓂᕆᓚᐅᖅᑕᖓᓂ ᑕᐃᔭᐅᓚᐅᖅᑳᕋᓂ, ᐊᒻᒪᓗ ᖃᓄᖅ 8–ᖑᔪᑦ ᑐᕌᒐᒃᓴᐅᔪᑦ ᓇᓗᓇᐃᖅᑕᐅᓯᒪᔪᓂ ᐅᓂᒃᑳᕆᓯᒪᕐᔪᐊᕐᓂᐅᔪᓂ ᐅᔾᔨᕆᔭᐅᓇᔭᕐᓂᖏᓐᓂ.

ᐃᓱᒪᐅᑉ ᖁᑦᑎᓛᖓᓂ ᒐᕙᒪᑐᖃᒃᑯᓐᓄᑦ ᐊᑭᑐᓗᐊᙱᑦᑐᒥ ᐃᒡᓗᖃᖅᑎᑦᑎᓂᐅᔪᒥ ᓄᓇᖃᖅᑳᖅᓯᒪᔪᓄᑦ ᐊᒻᒪ ᐅᑭᐅᖅᑕᖅᑐᒥ ᓄᓇᓕᐅᔪᓄᑦ. ᐅᓇ ᑐᑭᖃᑦᑎᐊᑐᐃᓐᓇᖅᐳᖅ, ᑕᐃᒪᙵᓂ ᐊᑐᐃᓐᓇᐅᓂᖃᕐᓂᖓᓂ ᐃᒡᓗᒃᓴᓂ ᐊᖏᓛᖑᔪᒥ ᐊᒃᑐᐃᓂᖃᕐᓂᖓᓂ ᐃᓄᐃᑦ ᐆᒪᓂᖏᓐᓂ ᖃᓄᐃᙱᑦᑎᐊᖅᑐᒥ ᐃᓅᓯᖃᕐᓂᐅᔪᓂ – ᑕᒪᒃᑭᑦ ᐊᑲᐅᙱᓕᐅᕈᑕᐅᔪᑦ ᒥᑭᓐᓂᖅᓴᒻᒪᕆᐅᖅᑰᔨᕗᑦ ᐊᑦᑕᓇᙱᑦᑐᒥ ᐃᒡᓗᒃᓴᖃᑦᑎᐊᕐᓗᓂ.

ᓯᕗᓕᖅᑎ ᔫ ᓴᕕᑲᑖᖅ ᐅᖃᓚᐅᖅᐳᖅ ᑕᒪᒃᑭᓗᒃᑖᓂ ᐱᓕᕆᖃᑎᖃᕐᓂᐅᔪᒥ ᑲᓇᑕᐅᑉ ᐊᖓᔪᖅᑳᕐᔪᐊᖓᓂ ᐊᒻᒪ ᒐᕙᒪᑐᖃᒃᑯᑦ ᒥᓂᔅᑕᐅᔪᓄᑦ, ᓇᓗᓇᐃᖅᓰᓐᓇᐅᔭᖅᐳᖅ ᓄᓇᕘᑉ ᓄᓇᓕᖕᓂ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᐃᓚᑰᓂᐅᓗᐊᖅᑐᓄᑦ.

"ᐅᖃᕐᓂᓐᓂ ᑭᖑᕙᓯᕐᔪᐊᕐᓂᑦᑎᓂ ᐱᒋᐊᕐᕕᐅᔪᒦᙱᑉᐸᓵᕐᓂᑦᑎᓐᓂ ᐊᒻᒪᓗ ᒐᕙᒪᑐᖃᒃᑯᑦ ᐱᓕᕆᔭᕆᐊᖃᕐᓂᖏᓐᓂ ᑲᓇᑕᒥ–ᐱᕈᖅᓴᐃᓂᐅᔪᒥ ᓄᓇᕘᑉ ᐃᓗᐊᓂ ᐊᒃᓱᓪᓘᓐᓃᑦ ᐱᒋᐊᕐᕕᖕᒧᐊᕈᓐᓇᕐᓂᐊᕋᑦᑕ," ᐅᖃᓚᐅᖅᐳᖅ ᓴᕕᑲᑖᖅ.

ᓱᓕ ᐊᒥᒐᕐᓂᖃᓗᐊᖅᐳᖅ ᐅᓄᕐᓂᖅᓴᐅᔪᓂ 3,000–ᓂ ᐃᒡᓗᒃᓴᐅᔪᓂ ᓴᓇᔭᐅᔭᕆᐊᓕᖕᓂ ᑭᐅᓂᕐᒧᑦ ᐱᑕᖃᖅᐸᒌᖅᑐᒥ ᐱᔭᕆᐊᖃᕐᓂᐅᔪᓄᑦ ᐊᒻᒪᓗ ᐅᓄᕐᓂᐅᔪᑦ ᓄᑖᖑᔪᓂ ᐊᖏᕐᕋᒃᓴᓂ ᐃᓚᒋᐊᖅᑕᐅᓪᓗᓂ ᐊᕐᕌᒍᑕᒫᒥ ᑭᐅᒪᙱᑦᑎᐊᖅᐳᖅ ᐱᕈᖅᐸᓪᓕᐊᖏᓐᓇᖅᑐᒥ ᐱᔪᒪᓂᐅᔪᒥ. ᐃᒡᓗᖃᖅᑎᑕᐅᓂᕐᒧᑦ ᑐᐊᕕᕐᓇᕐᓂᐅᔪᖅ ᓱᓕ ᖄᖏᐅᑎᓚᐅᙱᓚᖅ ᓄᓇᕗᒻᒥ.

"ᒐᕙᒪᕗᑦ ᑲᑎᖅᓱᖅᑕᐅᕙᓪᓕᐊᔪᓂ ᑮᓇᐅᔭᓂᒃ ᑐᖅᑯᖅᑕᐅᓯᒪᓪᓗᑎᒃ ᐱᕈᖅᐸᓪᓕᐊᑎᑦᑎᓯᒪᕗᑦ, ᑮᓇᐅᔭᑎᒍᑦ, ᐅᓄᕐᓂᖅᓴᐅᔪᓂ ᑮᓇᐅᔭᓂᑦ ᐱᓕᕆᖃᑎᒌᖕᓂᐅᔪᒃᑯᑦ ᓄᓇᖃᖅᑳᖅᓯᒪᓂᐅᔪᓄᑦ ᓄᓇᐅᔪᓄᑦ ᐊᓯᓕᒫᖏᓐᓂ ᒐᕙᒪᐅᔪᓂ ᒫᓐᓇᓕᓴᐅᔪᒥ ᐃᖅᑲᐅᒪᓂᐅᔪᒥ," ᐅᖃᓚᐅᖅᐳᖅ ᐅᑭᐅᖅᑕᖅᑐᒥ ᐱᓕᕆᓂᐅᔪᒥ ᒥᓂᔅᑕᖓ ᑖᓐ ᕚᓐᑎᐅᓪ. "ᐃᖏᕐᕋᕙᓪᓕᐊᓂᖃᖅᐳᒍᑦ, ᐅᒃᐱᕆᒐᓗᐊᕈᕕᐅᒃ ᐋᒃᑲᓘᓐᓃᑦ, ᑭᓯᐊᓂ ᐊᑲᐅᙱᓕᐅᕈᑕᐅᔪᖅ ᐅᓇᐅᕗᖅ ᐃᓚᑰᓂᐅᔪᑦ ᐊᖏᓗᐊᕐᓂᑯᒧᑦ ᐃᖏᕐᕋᓂᕆᔭᕗᑦ ᐅᔾᔨᕐᓇᓗᐊᙱᓚᖅ. ᑕᐃᒫᒃ ᐱᓕᕇᓐᓇᕆᐊᖃᖅᐳᒍᑦ ᐱᓕᕆᔭᑦᑎᓐᓂ – ᐱᓕᕆᒃᑲᓐᓂᕆᐊᖃᖅᐳᒍᑦ ᐊᒻᒪᓗ ᐱᓕᕆᓗᑎᒍᑦ ᐊᑯᓂᐊᓗᖕᒥ."

ᑮᓇᐅᔭᓂᑦ ᐱᓕᐊᓐ–ᖏᓐᓃᑦᑐᓂ ᐃᓕᔭᐅᖏᓐᓇᖅᐳᑦ ᐃᒡᓗᒃᓴᖃᕐᓂᕐᒧᑦ ᐊᒻᒪ ᓄᓇᓕᖕᓂ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᑲᓇᑕᓕᒫᒥ. ᓄᑖᖑᔪᒥ $1 ᐱᓕᐊᓐᓂ ᓱᒃᑲᔪᒥ-ᐃᒡᓗᒃᓴᖃᖅᑎᑕᐅᓂᐅᔪᒥ ᐱᓕᕆᐊᖑᔪᒥ ᓴᖑᑎᑦᑎᓂᕐᒧᑦ ᐃᓄᖃᙱᑦᑐᓂ ᐃᒡᓗᕐᔪᐊᓂ ᐊᖏᕐᕋᒃᓴᓕᐊᖑᓂᕐᒧᑦ ᐱᔪᒥᓇᖅᑑᕗᖅ, ᓈᒻᒪᒃᑐᓂ ᐊᑐᖅᑕᐅᙱᑦᑐᓂ ᓇᑉᐸᖅᑎᕆᓯᒪᓂᑕᖃᖅᐸᑦ ᓄᓇᕗᒻᒧᑦ ᐅᑯᓂᖓ ᐊᑐᕐᓂᖏᓐᓂ ᐃᓚᖏᓐᓂ ᐃᑲᔪᕈᑎᒃᓴᐅᓇᔭᖅᑐᓂ ᓯᕗᒻᒧᐊᕆᔭᐅᓂᖏᓐᓂ.

ᕚᑖᓪ ᐅᖃᐅᓯᖃᓚᐅᕆᕗᖅ $700-ᒥᓕᐊᓐᓂ, ᐊᕐᕌᒍᓄᑦ–10-ᓄᑦ ᐃᒡᓗᖃᖅᑎᑦᑎᓂᕐᒧᑦ ᐱᓕᕆᐊᖑᔪᒥ ᐱᖓᓱᓄᑦ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᓂᐅᔪᓄᑦ ᐊᒻᒪᓗ $300-ᒥᓕᐊᓐᓂ, ᐊᕐᕌᒍᓄᑦ–10-ᓄᑦ ᐃᒡᓗᖃᖅᑎᑦᑎᓂᕐᒧᑦ ᐱᓕᕆᐊᖑᔪᒥ ᐃᓄᐃᑦ ᑕᐱᕇᑦ ᑲᓇᑕᒥ ᑕᑯᒃᓴᐅᓂᐅᔪᒥ ᒐᕙᒪᑐᖃᒃᑯᑦ ᑭᐅᓂᖓᓂ ᐊᑲᐅᙱᓕᐅᕈᑕᐅᔪᒥ.

ᐆᒻᒪᖅᑯᑎᓄᑦ-ᐊᑐᑦᑎᐊᕐᓂᐅᔪᓄᑦ ᐋᖅᑭᒋᐊᖅᑕᐅᓂᐅᔪᓄᑦ, ᓴᓗᒪᔪᒥ ᐆᒻᒪᖅᑯᑎᓄᑦ ᐊᒻᒪᓗ ᐅᖓᓯᒃᑐᒧᑦ ᖃᕋᓴᐅᔭᒃᑰᕈᓐᓇᕐᓂᐅᔪᒥ ᐃᓚᓕᐅᔾᔭᐅᔪᐃᓐᓇᐅᓚᐅᖅᐳᑦ ᐃᓂᐅᔪᓂ ᐱᐅᓯᒋᐊᖅᑕᐅᒃᑲᓐᓂᕈᓐᓇᖅᑐᓄᑦ ᑯᐃᓐ ᐃᒃᓯᕙᐅᑕᖓᓂ ᐅᖃᓪᓚᖕᓂᐅᔪᒥ. ᑕᒪᒃᑭᑦ ᐊᑑᑎᖃᔾᔮᙱᑦᑐᓂ ᓈᒻᒪᒃᑐᓂ ᐃᒡᓗᒃᓴᖃᙱᓗᐊᖅᑎᓪᓗᒍ ᓄᓇᕗᒻᒥᐅᓕᒫᓄᑦ.

ᐋᓂᐊᖃᕐᓇᙱᑦᑐᓕᕆᓂᕐᒧᑦ ᐸᖅᑭᔭᐅᓂᐅᔪᒥ ᐊᑐᐃᓐᓇᐅᓂᖓᓂ ᐊᒻᒪ ᐊᖏᓂᖅᓴᓂ ᐱᓕᕆᓂᐅᔪᓂ ᑭᐅᓂᕐᒧᑦ ᓂᕿᒃᓴᖃᑦᑎᐊᕐᓂᐅᔪᒥ ᑐᕌᒐᒃᓴᐅᒋᕗᑦ ᐱᔭᐅᔭᕆᐊᓕᖕᓂ, ᑭᓯᐊᓂ ᐊᕐᕌᒍᒐᓵᓗᖕᓂ ᑐᕌᒐᒃᓴᐅᓯᒪᕗᑦ.

ᐱᓂᖅᓴᒻᒪᕆᐅᔪᒥ, ᐱᔪᒪᓪᓗᐊᖅᑕᑦᑎᓐᓂ ᐋᑐᕚᒥ ᐃᖏᕐᕋᓂᐅᓪᓗᐊᖅᐳᖅ. ᐊᑐᐃᓐᓇᖃᕐᓂᕐᒥ ᒐᕙᒪᑐᖃᒃᑯᑦ ᑮᓇᐅᔭᖃᖅᑎᑕᐅᓂᐅᔪᓂ ᐃᓚᐃᓐᓇᕆᕙᖓ ᐋᖅᑭᒍᑎᒃᓴᐅᔪᒥ. ᑎᑭᐅᑎᔪᒪᒍᑦᑕ ᓯᕗᓪᓕᖅᐹᖑᔪᒥ ᖃᓄᐃᓕᖓᓂᐅᔪᒥ ᓯᕗᓪᓕᖅᐹᒥ ᑐᕌᒐᒃᓴᐅᔪᒥ ᑲᓇᑕᐅᑉ ᐅᑭᐅᖅᑕᖅᑐᖓᓂ ᐊᒻᒪᓗ ᐅᐊᖕᓇᒥ ᐊᑐᐊᒐᓄᑦ ᐋᖅᑭᒃᓱᖅᑕᐅᓯᒪᓂᐅᔪᓄᑦ – ᓄᖑᑎᕆᓂᕐᒥ ᐊᔪᖅᓴᕐᓂᐅᔪᒥ ᐅᑭᐅᖅᑕᖅᑐᒥ – ᕿᓚᒻᒥᐅᔪᒥ ᐋᖅᑭᒍᑎᒃᓴᖃᕆᐊᖃᖅᐳᖅ ᐅᔾᔨᕆᔭᐅᓯᒪᔪᓂ ᐲᔭᐃᑎᓪᓗᑕ ᐃᒃᐱᒍᓱᑦᑎᐊᙱᓐᓂᐅᔪᓂ ᐱᓕᕆᐊᖑᓂᑰᔪᓂ ᖄᖏᖅᓯᒪᓕᖅᑐᓂ ᐱᖅᑯᓯᕆᙱᑕᓄᑦ ᐱᐅᓯᖃᓕᖅᑎᑦᑎᓇᓱᐊᕐᓂᐅᔪᒥ ᒐᕙᒪᐅᔪᓄᑦ.