ᐊᑲᐅᙱᓕᐅᕈᑎ: ᐅᓪᓗᓂ 365−ᓂ ᓄᕙᒡᔪᐊᕐᓇᕐᒥ
ᐅᖃᖅᐳᒍᑦ: ᐅᓇᑕᕐᓂᖅ ᐱᔭᕇᙱᓚᖅ ᓱᓕ
ᐅᖃᕐᓗᓂ ᓄᓇᕗᒻᒥᐅᑦ ᓴᙱᔫᓪᓗᑎᒃ ᐃᓅᓪᓗᑎᒃ ᐅᖃᙱᓗᐊᕐᓂᐅᕗᖅ ᑕᒪᒃᑭᐸᓗᖕᓂ ᖃᓄᐃᓐᓂᐅᔪᓄᑦ.
ᒫᔾᔨ 18–ᒥ, ᐊᕐᕌᒍᓕᒫᒥ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑐᐊᕕᕐᓇᖅᑐᓂ ᐅᖃᖅᓯᒪᓂᖃᖅᓯᒪᕗᑦ ᐅᖓᕙᕆᐊᖅᑕᐅᖏᓐᓇᖃᑕᒃᖢᓂ. ᓂᕆᐅᒋᔭᐅᙱᑎᓪᓗᒍ ᐊᑐᖅᑕᐅᒐᔪᒃᑐᒥ ᕿᓚᒻᒥᐅᔪᒥ ᐃᓱᓕᔾᔮᙱᓐᓂᖓᓂ, ᑭᓱᑐᐃᓐᓇᐃᑦ ᐱᐅᓯᕙᓪᓕᐊᔫᔮᓕᖅᐳᑦ ᐊᓱᐃᓛᒃ.
ᐊᕐᕕᐊᑦ ᐊᑐᕐᓂᖃᓚᐅᖅᐳᑦ ᐊᑕᐅᓯᐅᔪᒥ ᐊᒃᓱᕈᕐᓇᓛᒥ ᐊᓂᑦᑕᐃᓕᒪᑎᑕᐅᓂᐅᔪᒥ ᓇᒥᑐᐃᓐᓇᖅ ᓄᓇᕐᔪᐊᒥ, ᐅᓪᓗᓂ 118–ᓂ ᑭᒡᓕᖃᖅᑎᑕᐅᓂᕐᔪᐊᖑᔪᓂ ᐃᓚᒋᔭᐅᓪᓗᓂ ᕼᐋᒻᓚᒃᑯᑦ ᐊᒃᓱᕈᕐᓂᖏᓐᓂ ᓄᖅᑲᖅᑎᑦᑎᓇᓱᐊᕐᓂᕐᒥ ᐊᐃᑦᑐᐃᓂᐅᔪᒥ ᓄᕙᒡᔪᐊᕐᓇᖅ-19–ᒥ ᐃᓗᐊᓂ ᑭᒡᓕᒋᔭᖏᓐᓄᑦ.
ᐊᒥᓲᙱᑦᑐᑦ ᐃᓂᐅᔪᑦ ᐅᖃᕈᓐᓇᖅᐳᑦ ᑕᐃᒪᐃᑦᑐᓂ ᐊᑐᕆᐊᖃᖅᓯᒪᓂᖏᓐᓂ ᐊᓂᑦᑕᐃᓕᒪᕐᔪᐊᖅᑎᑕᐅᓂᖓᓂ. ᓂᐅ ᓰᓚᓐ, ᐅᐱᒋᔭᐅᕐᔪᐊᖅᓯᒪᔪᒥ ᐊᒃᓱᕈᕐᓂᖏᓐᓂ ᐅᓇᑕᕐᓂᕐᒧᑦ ᖁᐱᕐᕈᐃᑦ ᐊᐃᑦᑐᐃᓐᓂᐅᔪᒥ, ᐊᓂᑎᑕᐅᑦᑕᐃᓕᒪᓪᓗᑎᒃ ᓇᑉᐸᓪᓗᐊᖓᓂ ᑕᐃᒪᐃᓐᓂᖓᓂ – ᐅᓪᓗᓂ 49–ᓂ ᕿᑎᐊᓂ ᒫᔾᔨ 25–ᒥ ᐊᒻᒪ ᒪᐃ 13, 2020–ᒧᑦ. ᑕᐃᓐᓇ ᐱᓕᕆᓂᕐᔪᐊᖑᔪᒥ ᐃᓕᓯᓚᐅᖅᐳᖅ ᕿᑭᖅᑖᓗᖕᒥ ᐊᑦᑕᓇᕈᓐᓃᖅᑎᑦᑎᓪᓗᓂ ᓯᕗᓂᐊᓂ ᓴᖑᓂᐅᔪᒧᑦ ᖁᐱᕐᕈᓂ ᐊᐃᑦᑐᐃᓂᐅᔪᒥ. ᐱᓕᕆᑦᑎᐊᖅᓯᒪᕕᒡᔪᐊᖅᐳᖅ, ᐃᓄᒋᐊᖕᓂᖏᓐᓂ 5 ᒥᓕᐊᓐᑲᓴᖕᓂ ᐅᓂᒃᑳᕆᔪᓂ 2,000 ᐅᖓᑎᑦᑎᐊᖓᓂ ᖃᓄᐃᓐᓂᐅᔪᓂ ᐊᒻᒪᓗ 26–ᓂ ᐃᓅᔪᓐᓃᕐᓂᐅᔪᓂ ᑕᐃᒪᙵᓂ ᒫᔾᔨ 2020–ᒥ.
ᒪᓕᑦᑎᐊᕐᓂᐅᔪᒥ ᐅᑯᓂᖓ ᒪᓕᒃᑕᐅᕐᔪᐊᕆᐊᓕᖕᓂ ᑕᖃᓇᖅᐳᖅ, ᑭᓯᐊᓂ ᑕᑯᒃᓴᐅᓂᖅ ᑕᐃᑲᓃᑉᐳᖅ, ᑕᐃᒪᓐᓇᑎᑐᑦ ᐅᕙᓂ.
395–ᓂ ᓇᓗᓇᐃᖅᑕᐅᓯᒪᔪᓂ ᖃᓄᐃᓐᓂᐅᔪᓂ ᓄᕙᒡᔪᐊᕐᓇᖅ-19–ᒥ ᓄᓇᕗᒻᒥ ᒫᔾᔨ 18, ᑕᒪᒃᑭᐸᓗᖏᓐᓂ ᑕᐃᒃᑯᓇᙵᑦ, 339, ᐊᕐᕕᐊᓃᓚᐅᖅᐳᑦ ᒪᕐᕉᔪᓂ ᐊᓯᐊᒎᖅᑐᓂ ᐊᐃᑦᑐᐃᓂᐅᓚᐅᖅᑐᓂ.
ᓘᒃᑖᖅ ᒪᐃᑯᓪ ᐹᑐᓴᓐ, ᓄᓇᕘᑉ ᖁᑦᑎᓛᖓ ᓘᒃᑖᖅ, ᐅᖃᑦᑎᐊᓛᕆᕙᖓ ᐅᖃᖅᑎᓪᓗᒍ, "ᐱᔭᒃᓴᖃᕐᔪᐊᕐᓂᐅᓪᓗᓂ ᐊᒻᒪ ᐊᒃᓱᕈᕐᓇᓚᐅᖅᐳᖅ ᐊᕐᕌᒎᓪᓗᓂ ᐊᒥᓱᓄᑦ ᐃᓄᖕᓄᑦ, ᓄᓇᕗᑐᐃᓐᓇᐅᙱᑦᑐᒥ ᑭᓯᐊᓂ ᑲᓇᑕᓕᒫᒥ ᐊᒻᒪᓗ ᓄᓇᕐᔪᐊᓕᒫᒥ."
ᐱᒋᐊᕐᓂᖓᓂ, ᓄᓇᓕᖕᓂ ᑕᕐᓂᖃᕐᓂᖓ ᐊᔪᕐᓇᓚᐅᙱᓚᖅ ᑕᑯᓂᕐᒥ ᐊᒻᒪ ᐃᒃᐱᒍᓱᖕᓂᕐᒥ. ᐊᖏᕐᕋᖅᓯᒪᐃᓐᓇᖁᔭᐅᓂᕐᒥ ᑎᓕᐅᕈᑕᐅᔪᓂ ᑭᐅᔭᐅᓚᐅᖅᐳᑦ ᑕᒪᐃᑎᒍᑦ ᖁᕕᐊᓱᖕᓂᐅᔪᒥ ᐊᒻᒪᓗ ᐃᓄᑐᐃᓐᓇᐃᑦ ᐊᒻᒪ ᓄᓇᓕᐅᔪᑦ ᓇᓂᓯᓚᐅᖅᐳᑦ ᐱᓕᕆᓂᐅᔪᓂ ᖄᖏᐅᑎᑎᑦᑎᓂᕐᒧᑦ ᐅᓪᓘᔪᓂ ᑲᑎᙵᓪᓗᑎᒃ ᖃᕋᓴᐅᔭᑎᒍᑦ. ᐃᒐᓛᖏᓐᓂ ᐃᓗᓪᓕᖅᓱᐃᓚᐅᖅᐳᑦ ᐅᖃᐅᓯᒃᓴᓂ ᓂᕆᐅᖕᓂᕐᒥ ᐊᒻᒪ ᖃᑦᑕᓂᑦ ᐊᓇᐅᓕᖅᓯᕙᓚᐅᖅᐳᑦ ᖁᔭᓕᓂᕐᒧᑦ ᐃᒻᒥᓂᒃ ᐃᓱᒪᙱᓐᓂᐊᔪᒥ ᐱᓪᓚᕆᐅᔪᓄᑦ ᓴᓇᔨᐅᔪᓄᑦ ᐱᔨᑦᑎᕋᕐᓂᕐᓂ ᐊᐅᓚᑎᑦᑏᓐᓇᓚᐅᖅᑐᓂ ᓇᓗᓇᕋᓗᐊᖅᑎᓪᓗᒍ.
ᐳᓚᕋᖅᐸᓚᐅᖅᐳᑦ ᐃᓄᑐᖃᖏᓐᓂ ᐊᕙᓗᖅᖢᑎᒃ ᐃᒐᓛᑎᒍᑦ, ᖃᐅᔨᒪᓪᓗᑎᒃ ᑮᒃᑯᓕᒫᓄᑦ ᐱᐅᓂᖅᐹᖑᔪᒥ ᐱᔭᕆᐊᖃᕐᓂᐅᔪᒥ ᓇᒡᓕᒋᔭᒥᓂᑦ ᐃᓚᖏᓐᓂ ᓴᖅᑭᔮᕐᕕᐅᙱᓐᓂᖏᓐᓂ ᐅᒡᒍᓇᖅᑐᒥ ᐋᓐᓂᐊᕐᓂᐅᔪᒧᑦ.
ᓄᓇᕗᑦ ᓴᖑᖓᓂᖓ ᑐᑭᓕᐊᖅᑏᓐᓇᓚᐅᖅᐸᖓ ᐱᒋᐊᓕᓵᖅᑎᓪᓗᒋᑦ ᐊᖏᒡᓕᒋᐊᖅᑐᒥ ᐊᒡᒐᒥᓂᑦ ᐅᐊᓴᕆᐊᖃᕐᓂᐅᔪᒥ, ᒪᑐᐊᓂ ᐊᑐᕐᓂᕐᒧᑦ ᐊᒻᒪᓗ ᐊᓯᖏᓐᓂ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᓂᐅᔪᓂ ᓱᓕ ᐊᑐᐃᓐᓇᖅᑐᒥ. ᐊᑐᕐᓂᐅᔪᒥ ᐅᐸᒃᑕᐅᑦᑕᐃᓕᒪᓂᐅᔪᒥ ᑐᔪᕐᒥᕕᖕᓂ ᐋᖅᑭᒃᓱᖅᑕᐅᓯᒪᔪᓂ ᓄᓇᕗᒻᒥ ᒐᕙᒪᒃᑯᓐᓂ ᓇᐅᑦᑎᖅᓱᕐᓂᖏᓐᓂ ᖃᓄᐃᓕᖓᓂᐅᔪᒥ ᑕᐃᒃᑯᓄᖓ ᐋᓐᓂᐊᕕᓕᐊᖅᑐᓄᑦ ᐊᒻᒪᓗ ᐃᖅᑲᓇᐃᔮᒥᓄᑦ ᐊᐅᓪᓛᕐᓂᐅᔪᓄᑦ, ᓄᕙᒡᔪᐊᕐᓇᕐᒥ ᑕᒪᒃᑭᒐᓚᖕᓄᑦ ᐃᓯᖅᑎᑦᑎᓂᖃᓚᐅᙱᓚᖅ ᓄᓇᕗᒻᒧᑦ.
"ᐅᑭᐊᒃᓵᒥ ᐅᒃᐱᕈᓱᖕᓂᖃᓕᓗᐊᓚᐅᖅᐳᖅ ᐅᐸᒃᑕᐅᑦᑕᐃᓕᒪᓂᐅᔪᒥ ᑐᔪᕐᒥᕕᖕᓂ; ᓯᕗᓂᐊᓂ ᐅᖃᓚᐅᒻᒪᕆᒃᐳᒍᑦ ᑐᔪᕐᒥᕕᐅᔪᑦ ᐱᐅᕐᔪᐊᓪᓚᕆᙱᓐᓂᖓᓂ," ᐅᖃᓚᐅᖅᐳᖅ ᐹᑐᓴᓐ. "ᐃᓱᒪᕗᖓ ᐊᒥᓱᑦ ᐃᓄᐃᑦ ᐃᓱᒪᓕᓚᐅᕐᓂᖏᓐᓂ ᓄᕙᒡᔪᐊᕐᓇᖅ ᐊᓂᒎᑎᔪᓐᓇᙱᓐᓂᖓᓂ ᑐᔪᕐᒥᕕᐅᔪᓄᑦ. ᐊᓱᐃᓛᒃ ᓄᕕᐱᕆ ᐱᒋᐊᓚᐅᖅᐳᖅ ᐊᒻᒪᓗ ᐊᕐᕕᐊᓂ ᐊᐃᑦᑐᐃᕐᔪᐊᓚᐅᖅᐳᖅ ᓱᒃᑲᔪᐊᓗᖕᒥ ᑕᐃᑯᙵᑐᐊᕋᒥ."
ᓂᕆᐅᖕᓂᐅᔪᖅ ᖃᐅᒪᓂᖅᓴᒧᑦ ᐊᕐᕌᒎᔪᒧᑦ ᒪᕐᕈᐃᓪᓗᐊᖅᑐᒥ ᑎᑭᑉᐳᖅ: ᑎᑭᐅᑎᓂᕐᒥ ᐃᓄᒋᐊᖕᓂᐅᔪᒥ ᐋᓐᓂᐊᕐᓇᙱᑦᑐᖅᑐᖅᓯᒪᓂᕐᒧᑦ ᐋᖅᑭᒃᓱᖅᑕᐅᑦᑎᐊᖅᓯᒪᔪᒥ ᐋᓐᓂᐊᓕᕇᒃᑯᑎᒧᑦ ᐅᐸᒃᑕᐅᕕᒃᓴᓕᐊᖑᔪᓂ ᐱᓕᕆᐊᖑᔪᓂ ᑕᒪᒃᑭᓂ ᓄᓇᕗᒻᒥ ᓄᓇᓕᐅᔪᒥ ᒫᔾᔨᐅᑉ ᓄᙳᐊᓂ – ᐊᒻᒪᓗ ᑕᐃᒃᑯᓄᖓ ᐊᐅᓪᓛᕆᐊᓕᖕᓄᑦ ᓄᓇᕘᑉ ᓯᓚᑖᓄᑦ ᐱᓕᕆᖃᑕᐅᓪᓗᑎᒃ ᐊᓯᖏᓐᓂ ᐊᑦᑕᓇᖅᑐᒦᑎᑕᐅᑦᑕᐃᓕᒪᓂᕐᒧᑦ ᐅᐸᒃᑕᐅᑦᑕᐃᓕᒪᐃᓐᓇᖅᖢᑎᒃ ᐅᑎᕈᑎᒃ ᒪᓕᒃᑎᓪᓗᒋᑦ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᑐᖁᔭᐅᓇᔭᖅᑐᓂ.
ᑕᖃᓇᕐᔪᐊᕋᓗᐊᖅᑎᓪᓗᒍ, ᐊᒻᒪ ᑕᒪᒃᑭᒐᓚᑦ ᐃᓄᐃᑦ ᐊᑐᕐᓂᖏᓐᓂ ᖃᓄᐃᑦᑑᓂᖓᓂ ᐊᓯᖓᓂᓪᓗ ᓄᕙᒡᔪᐊᕐᓇᕐᒧᑦ-ᑕᖃᕐᔪᐊᕐᓂᐅᔪᒥ, ᑕᐃᒪᐃᖏᓐᓇᕈᑦᑕ ᐅᓇᑕᕐᓂᐅᔪᒥ ᐆᒪᙵᑦ ᖁᐱᕐᕈᓂ ᐊᐃᑦᑐᐃᓐᓇᖅᑐᒥ ᐊᑯᓂᒃᑲᓐᓂᒐᓚᖕᒥ ᑕᑯᑐᐃᓐᓇᕆᐊᖃᖅᐳᒍᑦ, ᐹᑐᓴᓐ ᐅᖃᖅᓯᒪᔭᖓᓐᓂ, ᐅᑎᕋᔮᕐᓂᐅᔪᒥ ᑕᐃᒪᐃᒐᔪᖕᓂᐅᓚᐅᖅᑐᒥ.