ᑎᒥᐅᔪᑦ 215–ᓂ ᑎᒡᓕᒃᑕᐅᔪᓄᑦ ᓄᓇᖃᖅᑳᖅᓯᒪᔪᓄᑦ ᓱᕈᓯᕐᓂ ᓇᓂᔭᐅᓚᐅᖅᐳᑦ ᐃᓂᐅᔪᒥ ᑳᒻᓘᑉᔅᒥ ᐊᓪᓚᓄᑦ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓂ ᒪᐃ 27–ᒥ.
ᐅᖃᕐᓂᕐᒧᑦ ᐅᓇ ᐱᓂᕐᓗᒡᔪᐊᕐᓂᐅᔪᖅ ᑲᒪᒋᔭᖃᖅᐸᓪᓕᐊᙱᓚᖅ. ᐅᕙᓂ, ᐃᓗᐃᓪᓕᐅᕿᕗᒍᑦ ᓄᑕᕋᑯᓗᖕᓂ ᐅᖃᕈᓐᓇᓚᐅᙱᑦᑐᓂ ᐃᓚᐅᖃᑕᐅᔪᒪᓂᕐᒥᓂ ᐱᓕᕆᔾᔪᓯᐅᔪᒥ ᐊᖅᓵᖅᑕᐅᓯᒪᔪᓄᑦ ᑭᓱᓕᒫᑦᑎᐊᓂ ᖃᐅᔨᒪᔭᒥᓂᑦ, ᓇᒡᓕᒋᔭᒥᓂᑦ ᐊᒻᒪ ᓇᒡᓕᒋᔨᒥᓂᑦ.
ᐋᓐᓂᕐᓇᓛᖑᔪᒥ ᐃᓚᖓ ᖃᐅᔨᒪᔪᐃᓐᓇᔪᒍᑦ ᐱᒋᐊᕐᓂᑐᐃᓐᓇᑯᓗᒋᓂᖓᓂ ᓴᖅᑭᑎᑦᑎᓂᐅᔪᒥ ᑕᒪᒃᑭᐅᒪᔪᒥ ᓱᓕᓂᐅᔪᒥ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓂ ᐱᓕᕆᔾᔪᓯᐅᔪᓄᑦ ᐊᒻᒪᓗ ᐊᒃᑐᐃᓂᖏᓐᓂ ᐃᓄᖕᓄᑦ, ᓄᓇᖃᖅᑳᖅᓯᒪᔪᓄᑦ ᐊᒻᒪ ᐊᓪᓚᖓᔪᓄᑦ ᐆᒪᐃᓐᓇᓚᐅᖅᑐᓄᑦ, ᐃᓚᖏᓐᓂ ᐊᒻᒪ ᐃᓚᒋᔭᐅᔪᓂ ᐆᒪᓚᐅᙱᑦᑐᓄᑦ.
ᓄᓇᕗᒻᒥ ᑐᙵᕕᒃᑯᑦ ᐊᖓᔪᖅᑳᖓ ᐊᓗᑭ ᑰᑦᑎᖅ ᐅᖃᓚᐅᖅᐳᖅ ᔫᓂ 2–ᒥ: “ᑕᑯᒃᓴᐅᓂᐅᔪᖅ ᑎᒥᐅᔪᓂ ᑳᒻᓘᑉᔅᒥ ᑐᓴᖅᑕᐅᓕᓵᙱᓚᖅ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ ᐊᒻᒪᓗ ᑕᐃᒪᐃᑦᑐᑐᐊᖑᙱᖦᖢᓂ ᖃᓄᐃᓐᓂᐅᔪᒥ. ᓱᓕᓂᕐᒧᑦ ᐊᒻᒪ ᓴᐃᒻᒪᖃᑎᒌᖕᓂᐅᔪᒥ ᑭᓪᓕᓯᓂᐊᖅᑏᑦ (TRC) ᑭᖑᓪᓕᖅᐹᖅᓯᐅᑎᑲᓂ ᐅᓂᒃᑳᓕᐊᖅ ᖃᔅᓯᒐᓚᖕᓂ ᐊᑐᓕᖅᑎᑕᐅᓯᒪᙱᑦᑐᓂ ᖃᐃᖁᔨᓂᐅᔪᓂ ᖃᓄᐃᓕᐅᕐᓂᕐᒧᑦ ᐃᓚᖃᖅᑐᒥ ᐱᔾᔪᑎᖃᖅᑐᒥ ᐊᓯᐅᖅᑲᔪᓄᑦ ᓱᕈᓯᕐᓂ ᐊᒻᒪ ᐃᓗᕕᖅᑕᐅᓂᐅᔪᓄᑦ. ᐃᓅᓪᓗᑕ, ᐊᑐᕆᕙᕗᑦ ᑕᐃᒪᐃᑉᐸᓚᐅᕐᓂᖏᓐᓂ. ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓂ ᐊᒻᒪ ᐅᓪᓗᒃᑯᑦ ᐃᓕᓐᓂᐊᕐᕕᐅᔪᑦ ᕿᒪᐃᓚᐅᖅᐳᑦ ᐋᓐᓂᖅᓯᕆᓂᕐᔪᐊᖑᔪᓂ ᐊᑐᖅᑕᐅᓂᑯᓂ ᑭᐅᔭᐅᔭᕆᐊᓕᖕᓂ ᐊᒻᒪ ᐱᓕᕆᐊᖑᒃᑲᓐᓂᕐᓗᑎᒃ.”
3,200–ᐸᓗᖕᓂ ᑐᖁᓂᖃᓚᐅᖅᐳᑦ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓂ, ᐊᒻᒪᓗ ᐊᓯᔾᔨᖅᑕᖅᑑᓪᓗᓂ ᓇᓚᐅᑦᑖᕆᓂᐅᕗᖅ – ᓇᐃᓴᖅᓯᒪᓂᖃᙱᓚᑦ “ᐃᓕᐊᕐᔪᒃᑯᕕᖕᓄᑦ,” ᐅᕝᕙᓘᓐᓃᑦ ᑐᖁᓂᐅᔪᓂ ᐋᓐᓂᐊᖃᕐᔪᐊᖅᑐᓄᑦ ᐋᓐᓂᐊᕕᖕᓂ “ᐊᓪᓚᓄᑦ ᐋᓐᓂᐊᕖᑦ.”
ᑲᓇᑕᒥ ᐱᓕᕆᕝᕕᒃ ᓱᓕᓂᕐᒧᑦ ᐊᒻᒪ ᓴᐃᒻᒪᖃᑎᒌᖕᓂᐅᔪᒥ ᐋᖅᑭᐅᒪᑎᑦᑎᕗᑦ ᐃᑭᐊᖅᑭᕕᖕᒥ ᑎᑎᕋᖅᐸᓪᓕᐊᓯᒪᕗᑦ ᐃᖅᑲᐅᒪᓂᐅᔪᒥ ᓱᕈᓯᕐᓂ ᐊᖏᕐᕋᒥᓄᑦ ᐅᑎᓚᐅᖅᓯᒪᙱᑦᑐᓄᑦ. ᒫᓐᓇᐅᔪᒥ 4,118–ᓂ ᐊᑎᖃᖅᐳᑦ ᑎᑎᕋᖅᑕᐅᕙᓪᓕᐊᔪᓂ.
ᑲᑎᙵᓂᐅᔪᒥ 4 ᓱᓕᓂᕐᒧᑦ ᐊᒻᒪ ᓴᐃᒻᒪᖃᑎᒌᖕᓂᐅᔪᒥ ᑭᓪᓕᓯᓂᐊᖅᑏᑦ ᐅᓂᒃᑳᓕᐊᕆᓪᓚᕆᖓᓂ ᐅᖃᖅᓯᒪᕗᖅ: “ᐅᑯᐊ ᐆᒃᑑᑎᐅᔪᑦ ᑎᒃᑯᐊᕆᓂᖃᖅᐳᑦ ᐊᖏᓂᖅᓴᐅᔪᒥ ᐊᔾᔨᓕᐊᖑᔪᒥ: ᐊᒥᓱᑦ ᐃᓕᓐᓂᐊᖅᑏᑦ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓂ ᐅᑎᓚᐅᖅᓯᒪᙱᓚᑦ. ᐊᓯᐅᓚᐅᖅᐳᑦ ᐃᓚᖏᓐᓄᑦ. ᑐᖁᓚᐅᖅᐳᑦ ᐅᓄᕐᓂᐅᔪᓂ ᖁᑦᑎᖕᓂᖅᓴᒻᒪᕆᐅᔪᓂ ᑕᐃᒃᑯᓄᖓ ᐊᑐᖅᑕᐅᓯᒪᔪᓄᑦ ᑕᒪᐃᑎᒍᑦ ᐃᓕᓐᓂᐊᕐᓂᕐᒧᑦ–ᐅᑭᐅᓕᖕᓂ ᐃᓄᒋᐊᖕᓂᐅᔪᓄᑦ. ᐊᖓᔪᖅᑳᖏᑦ ᐅᖃᐅᔾᔭᐅᒐᔪᓚᐅᙱᓚᑦ ᐋᓐᓂᐊᕐᓂᖏᓐᓂ ᐊᒻᒪ ᑐᖁᓂᖓᓐᓂ. ᐃᓗᕕᖅᑕᐅᒐᔪᓚᐅᖅᐳᑦ ᐊᖏᕐᕋᕆᙱᑕᒥᓂᑦ ᐊᒻᒪ ᐊᑯᓂᐅᔪᒥ–ᐃᒃᓯᓐᓇᖅᑕᐅᓯᒪᔪᓄᑦ ᐃᓗᕕᕐᓂ. ᓇᐃᓴᖅᑕᐅᓯᒪᙱᓚᑦ ᖃᔅᓯᓂ ᑐᖁᓚᐅᕐᓂᖏᓐᓂ ᐅᕝᕙᓘᓐᓃᑦ ᑎᑎᕋᖅᑕᐅᓗᑎᒃ ᓇᒥ ᐃᓗᕕᖅᓯᒪᓂᖏᓐᓂ.”
2009–ᒥ, ᓱᓕᓂᕐᒧᑦ ᐊᒻᒪ ᓴᐃᒻᒪᖃᑎᒌᖕᓂᐅᔪᒥ ᑭᓪᓕᓯᓂᐊᖅᑏᑦ ᑐᒃᓯᕋᓚᐅᖅᐳᑦ $1.5 ᒥᓕᐊᓐᓂ ᖃᐅᔨᓴᕐᓂᕐᒧᑦ ᐃᓗᕕᕐᓂ ᐃᓂᐅᔪᓂᑦ ᑲᓇᑕᓕᒫᒥ; ᑭᓯᐊᓂ, ᑐᒃᓯᕋᕐᓂᐅᔪᖅ ᐊᖏᖅᑕᐅᓚᐅᙱᓚᖅ ᑲᓇᑕᒥ ᒐᕙᒪᒃᑯᓐᓄᑦ.
ᐊᖏᙱᓐᓂᕐᒧᑦ ᑕᐃᔅᓱᒥᖓ ᑐᒃᓯᕋᕐᓂᐅᔪᒥ ᑎᒃᑯᐊᖅᐳᖅ ᐊᖏᓂᖅᓴᒻᒪᕆᐅᔪᒥ, ᓱᔪᐃᓂᖅᓴᐅᔪᒥ ᐊᒃᑐᐃᓂᖃᖅᑐᒥ ᐊᑲᐅᙱᓕᐅᕈᑕᐅᔪᒥ ᒐᕙᒪᑐᖃᒃᑯᓐᓂ ᑭᐅᓂᖓᓂ ᐆᒪᓪᓗᑎᒃ ᐊᑐᖅᑕᐅᓂᑯᓄᑦ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᖅ.
ᑮᓇᐅᔭᖃᖅᑎᑕᐅᙱᓗᐊᕐᓂᖓᓂ ᓄᓇᖃᖅᑳᖅᓯᒪᔪᓄᑦ ᐱᔭᕆᐊᓕᖏᓐᓄᑦ ᐊᖏᔫᓪᓗᓂ ᐊᑲᐅᙱᓕᐅᕈᑕᐅᕗᖅ ᐅᕗᓂ ᓄᓇᐅᔪᒥ, ᐅᓇᐅᒐᓗᐊᖅᐸᑦ ᐅᓇᑕᕐᓂᕐᒥ ᓴᓗᒪᔪᒥ ᐃᒪᕐᒧᑦ, ᐃᒡᓗᒃᓴᖃᖅᑎᑦᑎᓂᕐᒥ, ᓂᕿᒃᓴᖃᑦᑎᐊᕐᓂᕐᒧᑦ, ᐅᕝᕙᓘᓐᓃᑦ ᓈᒻᒪᒃᑐᓂ ᐋᖅᑭᒋᐊᖅᓯᓂᕐᓂ ᐱᔾᔪᑎᖃᖅᑐᓂ ᓱᔪᐃᓂᐅᔪᓂ ᐱᑎᑕᐅᔪᓂ ᒐᕙᒪᐅᔪᓂ ᑕᒪᒃᑭᐅᒪᔪᒥ ᑐᓂᓯᓯᒪᔪᒥ “ᐲᖅᓯᓂᕐᒥ ᐊᓪᓚᐅᓂᖓᓂ ᓱᕈᓯᐅᔪᒥ.”
ᐅᓇ ᐊᑐᖅᓂᑯᑐᖃᐅᑐᐃᓐᓇᙱᓚᖅ. ᐅᓇ ᑲᓇᑕᐅᑉ ᑲᙳᓇᖅᑐᒥ ᒫᓐᓇᐅᔪᒥ ᐊᑐᕐᓂᑯᒋᕙᖓ, ᐊᒻᒪ ᕿᓚᒻᒥᐅᓂᖅᓴᒥ ᒐᕙᒪᑐᖃᒃᑯᑦ ᐊᖏᕈᑎᐊᕈᓂ ᐆᒥᖓ ᐊᒻᒪᓗ ᐱᓕᕆᕙᓪᓕᐊᓗᑎᒃ ᐊᑑᑎᖃᑦᑎᐊᖅᑐᒥ ᐱᓕᕆᓂᐅᔪᒥ, ᕿᓚᒻᒥᐅᓂᖅᓴᒥ ᒪᒥᓴᕐᓂᓪᓚᕆᐅᔪᖅ ᐱᒋᐊᕈᓐᓇᖅᐳᖅ.
ᑕᐃᒪᐃᑦᑐᓂ ᓇᓂᓯᓂᐅᔪᓂ ᐱᓕᕆᓯᒪᓂᖃᕐᓂᕈᓂ ᓇᒥᑐᐃᓐᓇᖅ ᓄᓇᕐᔪᐊᒥ, ᒐᕙᒪᑐᖃᒃᑯᑦ ᐃᓄᓕᒫᓄᑦ ᓱᔪᐃᕐᔪᐊᕐᓂᐅᓂᖓᓂ ᐱᐅᙱᕐᔪᐊᕐᓂᖓᓂ, ᐃᓱᒪᒋᔭᒃᓴᐅᙱᑦᑐᒥ ᑲᒪᒋᔭᖃᕐᓂᐅᔪᒥ ᐅᑯᓇᓂ ᓱᕈᓯᐅᔪᓄᑦ – “ᐅᑯᐊ ᑕᕐᓂᑯᓗᐃᑦ, ᐱᔭᐅᔪᑦ, ᐃᒃᓯᓐᓇᖅᑕᐅᔪᑦ ᐊᒻᒪᓗ ᐱᓂᕐᓗᒃᑕᐅᕐᔪᐊᖅᑐᑦ ᐱᓕᕆᔾᔪᓯᐅᔪᒥ ᓱᕋᑦᑎᕆᓇᓱᐊᕐᓂᐅᔪᒥ,” ᓯᕗᓕᖅᑎ ᔫ ᓴᕕᑲᑖᖅ ᐅᖃᓚᐅᕐᓂᖓᓂ.
ᐅᓂᒃᑳᓕᐅᑐᐃᓐᓇᕐᓂᖅ ᓈᒻᒪᙱᓚᖅ. ᒪᒥᐊᓐᓂᖅ ᐊᒻᒪ ᐊᐅᓚᖁᑎᓂᒃ ᐊᑦᑎᒃᓯᒋᐊᕐᓂᖅ ᓈᒻᒪᙱᓚᖅ.
ᑯᐃᓐᒧᑦ-ᓄᓇᖃᖅᑳᖅᓯᒪᔪᓄᑦ ᐱᓕᕆᓂᐅᔪᓂ ᒥᓂᔅᑕᖓ ᑳᓚᐃᓐ ᐸᓂᑦ ᐅᖃᓚᐅᖅᐳᖅ: “ᓱᓕᓂᕐᒧᑦ ᐊᒻᒪ ᓴᐃᒻᒪᖃᑎᒌᖕᓂᐅᔪᒥ ᑭᓪᓕᓯᓂᐊᖅᑏᑦ ᐃᓚᖃᓚᐅᖅᐳᖅ ᖃᐃᖁᔨᓂᐅᔪᓂ ᖃᓄᐃᓕᐅᕐᓂᐅᔪᓄᑦ 72-76–ᓂ ᓇᓗᓇᐃᖅᓯᓂᕐᒧᑦ ᑲᓇᑕ ᐱᓕᕆᖃᑎᖃᕐᓂᖓᓂ ᓄᓇᖃᖅᑳᖅᓯᒪᔪᓄᑦ ᓄᓇᓕᐅᔪᓂ ᓇᓂᓯᓂᕐᒧᑦ ᐊᓯᐅᖅᑲᔪᓂ ᓇᒡᓕᒋᔭᖏᓐᓂ ᐊᒻᒪ ᓇᓗᓇᐃᒃᑯᓯᖅᓯᒪᙱᑦᑐᓂ ᐃᓗᕕᕐᕕᖓᓂ ᐃᓕᖅᑯᓯᒧᑦ ᐅᖃᐅᔾᔨᓯᒪᑦᑎᐊᕐᓂᐅᔪᒥ.
“ᐊᕐᕌᒍᒐᓴᓂ ᐱᓕᕆᓂᐅᔪᒥ, Tk’emlups te Secwepemc ᐊᓪᓚᐃᑦ ᓇᓂᓯᓯᒪᕗᑦ 215–ᖑᔪᓂ ᐊᓯᐅᖅᑲᔪᓂ ᓱᕈᓯᖏᓐᓂ. ᐱᓕᕆᓂᖃᕐᔪᐊᕆᐊᖃᕆᕗᑦ ᓱᓕ ᑲᑎᙵᓗᑕ ᐱᓱᒃᑎᓪᓗᑕ ᐊᖅᑯᒻᒥ ᓴᐃᒻᒪᖃᑎᒌᖕᓂᐅᔪᒥ.”
ᓇᓂᓯᓂᐅᔪᒥ ᑕᒪᒃᑭᓂ ᐃᓂᐅᔪᓂ ᓱᕈᓰᑦ ᐃᓗᕕᖅᓯᒪᓂᖏᓐᓂ ᖃᐅᔨᒪᑎᑕᐅᙱᓪᓗᑎᒃ ᐃᓚᖏᑦ – ᐊᒻᒪᓗ ᓇᓗᓇᐃᖅᓯᓂᕐᒥ ᑎᒥᖏᑦ ᑐᓂᔭᐅᓂᖏᓐᓂ ᐃᒃᐱᒍᓱᑦᑎᐊᕐᓂᐅᔪᒥ ᐱᓪᓗᐊᖅᑕᒥᓂᑦ – ᓈᒻᒪᒃᓯᓇᔭᖅᐳᖅ. ᐃᒻᒪᖄ ᑐᓂᓯᓂᐊᖅᐳᑦ ᐊᑐᓂ ᐃᓄᖕᒥ ᐊᒃᑐᖅᑕᐅᓯᒪᔪᓂ ᐆᒥᖓ ᐊᒥᓱᓂ ᑐᖁᕋᐃᓇᓱᐊᕐᓂᐅᔪᒥ ᐊᖅᑯᒻᒥ ᒪᑐᓯᓂᕐᒧᑦ, ᐃᓗᐊᓃᓪᓚᕆᒍᓐᓇᕈᓂ ᑎᒍᒥᐊᖅᑕᐅᓂᖓᓂ ᐃᓄᖕᓄᑦ ᑕᒻᒪᖅᑕᐅᕐᔪᐊᖅᓯᒪᔪᓄᑦ.
“ᐊᕐᕌᒍᒐᓴᓂ ᐱᓕᕆᓂᐅᔪᒥ, Tk’emlups te Secwepemc ᐊᓪᓚᐃᑦ ᓇᓂᓯᓯᒪᕗᑦ 215–ᖑᔪᓂ ᐊᓯᐅᖅᑲᔪᓂ ᓱᕈᓯᖏᓐᓂ. ᐱᓕᕆᓂᖃᕐᔪᐊᕆᐊᖃᕆᕗᑦ ᓱᓕ ᑲᑎᙵᓗᑕ ᐱᓱᒃᑎᓪᓗᑕ ᐊᖅᑯᒻᒥ ᓴᐃᒻᒪᖃᑎᒌᖕᓂᐅᔪᒥ.”
ᓇᓂᓯᓂᐅᔪᒥ ᑕᒪᒃᑭᓂ ᐃᓂᐅᔪᓂ ᓱᕈᓰᑦ ᐃᓗᕕᖅᓯᒪᓂᖏᓐᓂ ᖃᐅᔨᒪᑎᑕᐅᙱᓪᓗᑎᒃ ᐃᓚᖏᑦ – ᐊᒻᒪᓗ ᓇᓗᓇᐃᖅᓯᓂᕐᒥ ᑎᒥᖏᑦ ᑐᓂᔭᐅᓂᖏᓐᓂ ᐃᒃᐱᒍᓱᑦᑎᐊᕐᓂᐅᔪᒥ ᐱᓪᓗᐊᖅᑕᒥᓂᑦ – ᓈᒻᒪᒃᓯᓇᔭᖅᐳᖅ. ᐃᒻᒪᖄ ᑐᓂᓯᓂᐊᖅᐳᑦ ᐊᑐᓂ ᐃᓄᖕᒥ ᐊᒃᑐᖅᑕᐅᓯᒪᔪᓂ ᐆᒥᖓ ᐊᒥᓱᓂ ᑐᖁᕋᐃᓇᓱᐊᕐᓂᐅᔪᒥ ᐊᖅᑯᒻᒥ ᒪᑐᓯᓂᕐᒧᑦ, ᐃᓗᐊᓃᓪᓚᕆᒍᓐᓇᕈᓂ ᑎᒍᒥᐊᖅᑕᐅᓂᖓᓂ ᐃᓄᖕᓄᑦ ᑕᒻᒪᖅᑕᐅᕐᔪᐊᖅᓯᒪᔪᓄᑦ.