ᐃᖅᑲᖅᑐᐃᔨ ᐹᓪ ᐸᐃᓴᒃ ᐃᓱᒫᓗᒃᐳᖅ ᓴᙲᓗᐊᖅᑐᒥ ᐃᖅᑲᖅᑐᐃᓂᐅᔪᒥ ᑕᑯᒃᓴᐅᑎᑦᑎᕗᖅ ‘ᒪᓕᒐᓕᕆᓂᖃᙱᓗᐊᖅᐳᖅ ᐃᓄᖕᓄᑦ ᐊᕐᓇᓄᑦ ᐱᕋᔭᖕᓂᕐᒥ ᒪᓕᒐᓕᕆᓂᕐᒧᑦ ᐱᓕᕆᔾᔪᓯᐅᔪᒥ
ᐊᑲᐅᙱᓕᐅᕈᑕᐅᔪᖅ: ᐊᕐᓇᐅᓂᖓᓂ ᐊᖑᑕᐅᓂᖓᓂᓪᓘᓐᓃ−ᐋᓐᓂᖅᓯᕆᓂᐅᔪᖅ
ᐅᖃᖅᐳᒍᑦ: ᐊᑦᑕᓇᙱᑦᑐᓂ ᓂᕈᐊᒐᒃᓴᐅᔪᓂ ᐱᔭᐅᔭᕆᐊᖃᓪᓚᕆᒃᐳᖅ
ᖁᕕᐊᓱᒡᕕᖕᒥ, ᖁᕕᐊᓇᕐᓂᐅᔪᒥ ᐊᒻᒪ ᖁᕕᐊᓱᒍᑕᐅᓪᓗᓂ, ᐊᒃᓱᕈᕐᓇᖅᑑᔪᓐᓇᖅᐳᖅ ᐊᒥᓱᓄᑦ.
ᐃᓚᖃᕐᓗᓂ ᖃᐅᑕᒫᒥ ᐊᒃᓱᕈᕐᓂᐅᔪᓂ ᐃᖏᕐᕋᐃᓐᓇᖅᑐᒥ ᐊᒥᓱᓄᑦ ᖃᓂᒻᒪᓐᓇᐅᔪᒥ ᐊᒻᒪᓗ ᐱᓕᕆᓂᕐᓘᑎᖃᑦᑎᐊᖅᐳᖅ ᐊᐃᑉᐸᕇᖑᔪᓄᑦ ᐋᓐᓂᖅᓯᕆᓂᐅᔪᒥ.
ᐅᓄᕐᓂᐅᔪᓂ ᐊᕐᓇᓂᑦ ᓂᕕᐊᖅᓯᐊᓂᓪᓗ ᐋᓐᓂᖅᓯᕆᓂᐅᔪᒥ ᐊᑐᖅᑐᓂ ᐊᒑᐅᔪᓄᑦ ᐊᐃᑉᐸᕆᕙᒃᑕᖓᓂ, ᐊᐃᑉᐸᖓᓂ ᐃᓚᖓᓂᓪᓘᓐᓃᑦ ᐊᔪᕐᓇᑲᓴᒃᐳᖅ ᓇᓚᐅᑦᑖᕆᓂᕐᒧᑦ ᐅᓄᕐᓂᖅᓴᐅᔪᓂ 80 ᐳᓴᓐᑎᓂ ᖃᓄᐃᓐᓂᐅᔪᓄᑦ ᐅᓂᒃᑳᕆᔭᐅᕙᙱᒻᒪᑕ, ᐅᖃᐅᓯᐅᓪᓗᓂ ᐊᑕᐅᓯᕐᒥ ᑲᓇᑕᒥ ᑭᓪᓕᓯᓂᐊᖅᑎᒃᑯᓐᓂ ᓇᓚᐅᑦᑖᕆᔭᐅᓯᒪᔪᒥ.
112-ᒪᒃᐱᖅᑐᒐᓕᖕᒥ ᐅᓂᒃᑳᓕᐊᒥ ᐸᐅᒃᑑᑎᑦ ᐃᓄᖕᓂ ᐊᕐᓇᓄᑦ ᑲᓇᑕᒥ ᓴᖅᑭᑕᐅᓚᐅᖅᑐᒥ ᔭᓄᐊᕆᒥ ᐅᖃᖅᐳᖅ ᐅᓄᕐᓂᐅᔪᓂ ᐋᓐᓂᖅᓯᕆᓂᐅᕙᒃᑐᓂ ᐃᓄᖕᓄᑦ ᐊᕐᓇᓄᑦ 13−ᖏᖅᓱᕐᖢᓂ ᖁᑦᑎᖕᓂᖅᓴᐅᕗᖅ ᐊᕐᓇᓂ ᐊᒥᐊᒃᑯᖓᓂ ᑲᓇᑕᒥ.
ᑭᓯᐊᓂ ᐅᑯᐊ ᐅᓄᕐᓂᐅᔪᑦ ᑕᑯᒃᓴᐅᑎᑦᑎᙱᓚᑦ ᖃᓄᖅ ᓄᓇᕗᒻᒥ ᐊᕐᓇᓂ ᕿᒫᔪᓂ ᐋᓐᓂᖅᓯᕆᓂᐅᔪᓂ ᐊᔪᖅᓯᓯᒪᒐᔪᖕᓂᖏᓐᓂ ᐅᑎᖅᑕᐃᓐᓇᐅᔭᖅᑐᒥ ᐱᓂᕐᓗᖕᓂᐅᔪᒥ ᐱᑕᖃᙱᓗᐊᕐᓂᖓᓂ ᓈᒻᒪᒃᑐᓂ ᐱᔨᑦᑎᕋᕐᓂᐅᔪᓂ.
ᐊᓱᐃᓛᒃ ᐃᓱᒪᒃᓴᖅᓯᐅᕆᐊᖃᕆᕗᒍᑦ ᐅᑯᐊ ᐋᓐᓂᖅᓯᕆᓂᖃᖅᑎᓪᓗᒍ, ᐅᓂᒃᑳᕆᔭᐅᑎᓪᓗᒋᑦ ᑕᐃᒃᑯᓄᖓ ᑲᒪᒋᔭᖃᖅᐸᒃᑐᓄᑦ ᐊᒻᒪ ᐃᖅᑲᖅᑐᖅᑕᐅᓪᓗᑎᒃ, ᐱᕋᔭᒃᑕᐅᔪᖅ ᓱᓕ ᑕᑯᙱᑐᐃᓐᓇᕆᐊᖃᖅᐳᖅ ᒪᓕᒐᓕᕆᓂᐅᔪᒥ.
ᐃᖅᑲᖅᑐᐃᔨ ᐹᓪ ᐸᐃᓴᒃ ᐅᖃᐅᓯᖃᓚᐅᖅᐳᖅ ᐊᑲᐅᒃᓴᙱᓐᓂᖓᓂ ᐃᓱᒪᓕᐅᕆᓂᐅᔪᒥ ᓴᖅᑭᑕᐅᔪᒥ ᓄᕕᐱᕆᒥ ᑐᓂᓯᔭᕆᐊᖃᓚᐅᕐᓂᖓᓂ “ᓴᙲᓗᐊᖅᑐᒥ” ᐃᖅᑲᖅᑐᐃᔭᕆᐊᖃᕐᓂᖓᓂ ᖁᕐᓗᖅᑐᕐᒥᐅᑕᒧᑦ ᐊᖑᒻᒧᑦ ᐸᓯᔭᐅᓂᖓᓂ ᒪᕐᕈᐃᖅᓱᖅᖢᓂ ᐱᖃᓐᓈᒥᓂᒃ ᐋᓐᓂᖅᓯᕆᓂᖓᓂ. ᒪᓕᒃᑐᒥ ᑭᐅᓂᐅᔪᒥ ᐋᔩᖃᑎᒌᖕᓂᐅᔪᓂ, ᑯᐃᓐ ᑭᒡᒐᖅᑐᐃᔨᖓ ᒋᐊᕆ ᐆᓪ ᐃᖅᑲᖅᑐᐃᕕᖕᒥ ᐲᖅᓯᑎᑦᑎᓚᐅᖅᐳᖅ ᕿᒥᓴᐃᓂᐅᔪᒥ ᐃᖅᑲᖅᑐᒐᒃᓴᐅᓂᖓᓂ, ᐸᐃᓴᒃ “ᓂᕆᐅᒋᔭᖃᓚᐅᖅᐳᖅ ᑯᐃᓐ ᑭᒡᒐᖅᑐᐃᔨᖓᓂ ᑲᖐᒍᓱᖕᓂᕋᖅᑕᐅᓂᖓᓂ ᐱᒋᐊᖅᓯᓂᕐᒧᑦ ᐱᔾᔪᑎᕐᔪᐊᖑᓂᖓᓂ ᐱᒋᐊᖅᓯᓂᑐᐃᓐᓇᐅᔪᒥ.” ᐱᕋᔭᒃᑐᖅ ᑭᖑᓂᐊᒍᑦ ᐸᓯᔭᒃᓴᐅᓂᕋᓚᐅᖅᐳᖅ ᐱᒋᐊᖅᓯᓂᑐᐃᓐᓇᐅᔪᒧᑦ ᐊᒻᒪᓗ ᐊᓂᔾᔪᑎᑖᖅᑐᒧᑦ ᓱᕋᐃᓂᐅᔪᒥ.
2019−ᒥ ᒪᒃᓚᐃᓐᔅᑯᓐᓂ ᐊᐱᖅᓱᖅᑕᐅᓂᐅᔪᒥ, ᑏᑐᕆ ᐸᐃᓐᐳᕆᑦᔾ, ᐃᓗᐊᖅᓴᐃᔨᐅᔪᒥ ᐃᒃᓯᕙᐅᑕᐅᔪᒥ ᐋᓐᑎᐊᕆᐅᒥ ᐊᐃᑉᐸᕇᖑᔪᓄᑦ ᐋᓐᓂᖅᓯᕆᓂᕐᒧᑦ ᐃᓄᐊᖅᓯᓂᐅᔪᒥ ᕿᒥᕐᕈᔨᐅᔪᓄᑦ ᑲᑎᒪᔨᕋᓛᖏᓐᓂ, ᑕᐃᓯᓚᐅᖅᐳᖅ ᕿᒥᓴᐃᓂᐅᔪᒥ ᐊᖏᔪᒻᒪᕆᐅᓪᓗᓂ ᓇᓗᓇᐃᒃᑯᑕᐅᓂᖓᓂ, ᐋᓐᓂᖅᓯᕆᔨᐅᔪᒥ ᐱᕋᔭᒃᑕᖓᓂ ᐃᓅᓯᖓᓐᓂ ᑎᒍᒥᐊᕐᓂᖓᓂ ᐊᒡᒐᖏᓐᓂ: “ᑭᓇᑐᐃᓐᓇᖅ ᕿᒥᓴᖅᑕᐅᔪᖅ ᖃᐅᔨᒪᔪᓐᓃᕐᓗᓂ ᑭᓯᐊᓂ ᐆᒪᑎᑕᐅᖏᓐᓇᕐᓗᓂ 7−ᖏᖅᓱᓪᓗᐊᖅᑐᒥ ᑐᖁᑕᐅᑐᐃᓇᕆᐊᖃᖅᐳᖅ ᕿᒥᓴᖅᑕᐅᓚᐅᙱᒃᑯᓂ.”
ᐅᑎᕐᓗᓂ ᐸᐃᓴᒃᒧᑦ. “ᑲᑐᔾᔭᐅᓪᓗᓂ ᑐᓂᔭᐅᓂᐅᔪᖅ ᖃᓄᐃᓕᐅᕐᓂᖃᓚᐅᙱᓚᖅ ᐃᑲᔪᕐᓂᕐᒧᑦ ᐅᒃᐱᕆᔭᐅᓂᐅᔪᒥ ᐊᓯᐅᑎᑕᐅᓂᖓᓂ ᐃᓱᒪᒋᔭᐅᓂᐅᔪᒥ ᒪᓕᒐᓕᕆᓂᕐᒧᑦ ᐱᓕᕆᔾᔪᓯᕗᑦ ᒥᒃᖠᒋᐊᖅᑎᑦᑎᓲᖑᓂᖓᓂ ᐃᓅᓯᐅᔪᓂ ᐃᓄᖕᓂ ᐱᕋᔭᒃᑕᐅᓂᑯᓂ ᐱᕋᔭᖕᓂᐅᔪᓂ. ᖃᐅᔨᒪᑦᑎᐊᖅᐳᖓ ᐅᓇ ᐳᐃᒡᒍᑰᔪᖅ ᖁᒃᓴᓪᓚᒃᑎᑦᑎᓇᔭᖅᐳᖅ ᐊᒻᒪ ᑲᐸᑎᑦᑎᓇᔭᖅᐳᖅ ᑕᒪᒃᑭᓂ ᐅᖃᐅᔾᔪᖅᑕᐅᓯᒪᑦᑎᐊᖅᑐᓂ ᐊᒻᒪ ᐃᓱᒪᖃᑦᑎᐊᖅᑐᓂ ᓄᓇᕗᒻᒥᐅᓂ,” ᐃᖅᑲᖅᑐᐃᔨ ᐅᖃᓚᐅᖅᐳᖅ.
ᐅᖃᓚᐅᕆᕗᖅ ᐅᓗᕆᐊᓇᖅᑐᖃᕐᓂᖓᓂ ᓴᙲᓗᐊᖅᑐᒥ ᐃᖅᑲᖅᑐᐃᓂᐅᔪᓂ ᓴᙱᒃᑎᒋᐊᖅᓯᔪᓐᓇᕐᓂᖓᓂ ᐃᓱᒪᒋᔭᐅᓂᐅᔪᒥ ‘ᒪᓕᒐᓕᕆᓂᖃᙱᓗᐊᖅᐳᖅ ᐃᓄᖕᓄᑦ ᐊᕐᓇᓄᑦ ᐱᕋᔭᖕᓂᕐᒥ ᒪᓕᒐᓕᕆᓂᕐᒧᑦ ᐱᓕᕆᔾᔪᓯᐅᔪᒥ.
“ᐃᓄᐃᑦ ᐊᕐᓇᐃᑦ, ᐊᒻᒪᓗ ᑕᒪᒃᑭᓂ ᓄᓇᕗᒻᒥᐅᑦ, ᐱᓪᓗᐊᖅᐳᑦ ᒪᓕᒐᓕᕆᓂᐅᔪᒥ ᐱᓕᕆᔾᔪᓯᐅᔪᒥ ᑐᑭᖃᑦᑎᐊᖅᑐᒥ ᑭᐅᓂᖃᖅᑐᒥ ᐊᕐᓇᐅᓂᖓᓂ ᐊᖑᑕᐅᓂᖓᓂᓪᓘᓐᓃ ᐋᓐᓂᖅᓯᕆᓂᐅᔪᒧᑦ,” ᐃᖅᑲᖅᑐᐃᔨ ᑎᑎᕋᓚᐅᖅᐳᖅ. “ᐱᔭᕆᐊᖃᕐᓂᖃᖅᐳᖅ ᐊᒻᒪ ᐊᑐᕐᓂᖃᐅᑎᒥᒃ ᑲᓇᑕᒥ ᒪᓕᒐᓕᐅᖅᑎᖏᑦ ᒪᑐᐃᒃᑲᓐᓂᕆᐊᖃᖅᑕᒥᓂᑦ ᑭᐅᓗᒍᑎᖃᓂᕐᒧᑦ ᐆᒧᖓ ᐱᒻᒪᕆᕐᔪᐊᖑᔪᒥ ᐃᓱᒪᒋᔭᐅᓂᐅᔪᒥ ᐱᕋᔭᕐᓂᕐᒧᑦ ᒪᓕᒐᓕᕆᓂᐅᔪᒥ ᐱᓕᕆᔾᔪᓯᐅᔪᒥ.”
ᐸᐃᓴᒃ ᓇᓚᐅᑉᐳᖅ, ᑭᓯᐊᓂ ᒪᓕᒐᓕᕆᓂᖅ ᐃᓄᑑᓗᓂ ᓂᒡᓕᓇᖅᖢᓂ ᐃᓇᖏᖅᓯᓂᐅᕗᖅ ᐃᑲᔪᖅᓱᐃᓂᐅᔪᓄᑦ ᐊᕐᓇᓄᑦ ᐊᒻᒪ ᐃᓚᒌᓄᑦ ᓇᒧᙵᐅᕝᕕᒃᓴᖃᙱᑦᑐᓄᑦ.
ᓄᓇᕗᒻᒥ ᑲᓇᑕᒥ ᐸᓖᓯᒃᑯᓐᓂ ᐊᖓᔪᖅᑳᖓ ᐊᒫᓐᑕ ᔫᓐᔅ ᐅᖃᓚᐅᖅᐳᖅ 2018−ᒥ ᓄᑖᒥ ᐃᓚᒌᓄᑦ ᐋᓐᓂᖅᓯᕆᓂᐅᔪᓄᑦ ᕿᒫᕝᕕᖕᓂ ᐱᕚᓪᓕᕈᑎᑦᑎᐊᕙᐅᓇᔭᖅᐳᖅ ᐊᕐᓇᓄᑦ ᕿᒪᐃᓇᓱᐊᖅᑐᓂ ᐋᓐᓂᖅᓯᕆᓂᐅᕙᒃᑐᓂ ᖃᓄᐃᓐᓂᐅᔪᓄᑦ.
“ᐊᑲᐅᒃᓴᙱᓐᓂᐅᕗᖅ ᐊᒥᓱᓄᑦ ᐃᓚᒋᔭᑦᑎᓐᓄᑦ, ᓇᒧᙵᐅᕝᕕᒃᓴᖃᖅᑑᔮᙱᓚᑦ ᑐᕌᖅᑎᑦᑎᓂᕐᒧᑦ ᐱᓕᕆᔾᔪᔾᔭᐅᔪᒧᑦ, ᐊᑦᑕᓇᙱᓐᓂᖅᓴᒧᑦ ᐊᕙᑎᐅᔪᒧᑦ,” ᐅᖃᓚᐅᖅᐳᖅ. “ᐃᓚᒋᔭᕗᑦ ᐃᒃᐱᒍᓱᓲᖑᕗᑦ ᐃᓛᓐᓂᒃᑯᑦ ᐃᓄᑑᕐᔪᐊᕐᓂᖏᓐᓂ ᐱᓇᓱᐊᕐᓂᕐᒧᑦ ᐊᒻᒪᓗ ᐋᖅᑭᒃᓯᓇᓱᐊᕐᓂᕐᒧᑦ ᐊᑲᐅᙱᓕᐅᕈᑕᐅᔪᓂᑦ.”
ᐃᓄᓕᕆᔨᒃᑯᑦ ᑐᒃᓯᕋᖅᓯᒪᕗᑦ ᓄᑖᖑᔪᒥ ᐃᓚᒌᓄᑦ ᐋᓐᓂᖅᓯᖅᑕᐅᕙᒃᑐᓄᑦ ᕿᒫᕝᕕᐅᔪᓂᑦ ᐸᖕᓂᖅᑑᒥ, ᖃᒪᓂᑦᑐᐊᖅ, ᒥᑦᑎᒪᑕᓕᒃ ᐊᒻᒪ ᐅᖅᓱᖅᑑᒥᑦ. ᐅᑯᐊ ᐱᔭᐅᔭᕆᐊᖃᕐᔪᐊᖅᐳᑦ.
ᒪᕐᕈᖓᓂ-ᐱᓕᖅᑭᒃᑕᕐᓂᕐᒧᑦ ᐃᒡᓗᖃᖅᑎᑕᐅᓂᐅᔪᒥ – ᐃᒡᓗᕐᔪᐊᒥ ᐊᑐᐃᓐᓇᖃᖅᑎᑦᑎᔪᒥ ᐊᑯᓂᐅᔪᒃᑯᑦ, ᐃᒡᓗᒃᓴᖃᖅᑎᑕᐅᓂᐅᔪᒥ ᐃᑲᔪᖅᓱᐃᓂᖃᖅᑐᒥ ᐊᒻᒪᓗ ᐅᐸᒃᑕᐅᕝᕕᒃᓴᐅᔪᒥ ᐱᔨᑦᑎᕋᕐᓂᐅᔪᒥ ᓴᓇᓯᒪᔪᒥ ᐃᑲᔪᖅᓱᐃᓂᕐᒧᑦ ᐊᕐᓇᓂ ᕿᓂᖅᑎᓪᓗᒋᑦ ᐊᖏᕐᕋᕇᓐᓇᕐᓂᐊᖅᑕᒥᓂᑦ – ᐱᔭᕆᐊᖃᓐᓂᕐᓂᐅᒋᕗᖅ ᐊᒻᒪᓗ ᐊᐱᕆᔪᓂ−ᑭᖑᓂᐊᒍᑦ ᐃᑲᔪᖅᓱᐃᓂᐅᔪᒥ. ᐱᑕᖃᙱᓐᓂᖓᓂ ᑕᐃᒪᐃᑦᑐᓂ ᐃᒡᓗᖃᖅᑎᑕᐅᓂᐅᔪᓂ ᐊᒃᑐᐃᓲᖑᕗᖅ ᐊᕐᓇᓂ ᐊᒻᒪ ᓱᕈᓯᕐᓂ ᐊᒃᓱᕈᕐᓇᖅᑐᒃᑰᓛᖑᓂᖏᓐᓂ.
ᑲᓇᑕᒥ ᒪᓕᒐᓕᐅᖅᑎᖏᑦ ᑭᐅᔭᕆᐊᖃᕆᕗᑦ ᐱᕈᖅᐸᓪᓕᐊᖏᓐᓇᖅᑐᒥ ᐃᒡᓗᒃᓴᖃᕆᐊᖃᕐᓂᐅᔪᒥ – ᓅᑉᐸᓪᓕᐊᓂᐅᔪᒥ ᐊᒻᒪᓗ ᐃᒡᓗᒌᓐᓇᕐᓂᐊᖅᑕᒥᓄᑦ – ᓴᐳᔾᔨᓯᒪᓂᕐᒧᑦ ᐊᒃᑐᖅᑕᐅᓴᕋᐃᓛᖑᔪᓄᑦ ᐊᒻᒪᓗ ᑐᓂᓗᒋᑦ ᓂᕆᐅᖕᓂᐅᔪᒥ ᐊᑦᑕᓇᙱᑦᑐᒥ ᓯᕗᓂᒃᓴᐅᔪᒥ.