Skip to content

ᐃᓱᒪᕗᑦ: ᓄᓇᓕᖕᓂ ᓂᐅᕕᕋᖅᐸᒡᓗᓯ, ᓄᓇᓖᑦ ᐃᑲᔪᖅᓱᐃᓗᒍ

ᐊᒥᓱᓄᑦ ᖃᓐᓂᒻᒪᓐᓇᐅᔪᒥ ᐊᓂᒍᕋᓱᕋᔮᖅᑎᓪᓗᒍ, ᒐᕙᒪᒃᑯᑦ ᐃᑲᔪᖅᓱᐃᓂᐅᔪᑦ ᓇᖕᒥᓂᕆᔭᐅᔪᓄᑦ ᓱᓕ ᐃᓕᓯᒪᕗᑦ, ᑭᓯᐊᓂ ᑕᒪᕐᒥᑲᓴᑦᑎᐊᑦ ᐱᓕᕆᓂᕐᔪᐊᖑᔪᑦ ᐊᖏᐸᓗᒃᑐᒥ ᐊᒃᑐᖅᑕᐅᓯᒪᕗᑦ.

ᐱᒋᐊᕐᓂᖅ ᐊᒻᒪ ᐋᖅᑭᐅᒪᑎᑦᑎᓂᕐᒥ ᓇᖕᒥᓂᕆᔭᐅᔪᒥ ᐅᑭᐅᖅᑕᖅᑐᒥ ᐃᓚᐅᖃᑕᐅᓂᖃᖅᐳᖅ ᐊᒥᓱᓂ ᖃᐅᔨᒪᔭᐅᙱᑦᑐᓄᑦ ᐊᒃᓱᕈᕈᑕᐅᔪᓂ ᐊᒻᒪᓗ ᑮᓇᐅᔭᑎᒍᑦ ᐃᑲᔪᖅᓱᐃᓂᖃᕋᓗᐊᖅᑎᓪᓗᒍ ᒐᕙᒪᑐᖃᒃᑯᓐᓂ ᑐᓂᔭᐅᓂᐅᔪᒥ ᐊᐃᑦᑑᑎᓂᑦ, ᐃᑲᔫᓯᖅᑕᐅᓂᕐᒧᑦ ᐊᒻᒪ ᐊᑐᖅᑐᐊᕐᓂᐅᔪᓄᑦ, ᐊᒥᓱᑦ ᒥᑭᑦᑐᑦ ᓇᖕᒥᓂᖃᖅᑎᐅᔪᑦ ᐊᒃᓱᕈᖅᐳᑦ ᒫᓐᓇᐅᔪᒥ.

ᓄᓇᕗᑦ ᓯᕗᒻᒧᑦ ᐃᖏᕐᕋᕗᑦ ᐊᖅᑯᑎᖓᓄᑦ ᖃᓱᑎᑦᑎᕚᓪᓕᕐᓂᕐᒧᑦ ᑭᒡᓕᖃᖅᑎᑕᐅᓂᐅᔪᓄᑦ ᐱᔾᔪᑎᖃᖅᑐᒥ ᓄᕙᒡᔪᐊᕐᓇᖅ-19–ᒧᑦ. ᓚᐃᓴᓐᓯᓕᖕᓂ ᐱᓕᕆᕝᕕᐅᔪᓂ ᐱᔪᓐᓇᖅᑎᑕᐅᓕᖅᐳᑦ ᒪᑐᐃᕐᓂᖏᓐᓂ ᐊᑐᒐᔪᒃᑕᒥᓂᑦ ᐃᑲᕐᕋᖏᓐᓂ, ᒥᒃᖠᒋᐊᖅᑐᒥ ᐃᓄᖃᕈᓐᓇᕐᓗᑎᒃ, ᖃᓱᓐᓇᖅᑐᒃᓴᐅᕗᖅ ᑕᐃᒃᑯᓄᖓ ᓇᖕᒥᓂᖃᖅᑎᐅᔪᓄᑦ ᐊᒻᒪᓗ ᐃᖅᑲᓇᐃᔭᖅᑎᖏᓐᓄᑦ, ᐅᓄᕐᓂᖅᓴᐅᔪᓂ 100–ᓂ ᓂᕆᕝᕕᖕᓂ ᐊᒻᒪ ᐳᓚᕋᖅᑐᓕᕆᓂᕐᒥ ᐱᓕᕆᓂᐅᔪᒥ – ᐃᖃᓗᖕᓂᑐᐊᖅ – ᐊᓯᐅᔨᓚᐅᖅᐳᑦ ᑮᓇᐅᔾᔭᒃᓴᓂᖏᓐᓂ ᐅᓪᓗᕐᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐱᓕᕆᔨᐅᔪᓂ ᑎᓕᐅᕆᑎᓪᓗᒋᑦ ᒪᑐᔭᐅᓂᖏᓐᓂ ᐃᒥᕐᕕᓂᑦ ᐊᒻᒪ ᓂᕆᕝᕕᓂᑦ ᒫᔾᔨ 20–ᒥ. ᑕᖅᑭᑦ ᑕᓪᓕᒪᑲᓴᖕᓂ ᐊᓂᒍᖅᓯᒪᓕᖅᐳᖅ ᑕᐃᒪᙵᓂ.

ᑭᓯᐊᓂ ᑕᐃᒃᑯᐊᓕ ᓇᖕᒥᓂᖃᖅᑎᐅᔪᑦ ᐊᖏᓂᖅᓴᒥ ᐊᒃᑐᖅᑕᐅᓂᖃᖅᑐᑦ ᓇᓗᓇᐃᖅᑕᐅᓯᒪᓂᖏᑎᒍᑦ ᐊᒻᒪᓗ/ᐅᕝᕙᓘᓐᓃᑦ ᐱᔪᓐᓇᙱᓪᓗᑎᒃ ᐅᑯᓂᖓ ᐊᔾᔨᒌᙱᑦᑐᓂ ᐃᑲᔪᖅᓱᐃᓂᐅᔪᓄᑦ?

ᓄᓇᕗᒻᒥ ᑐᓴᒐᒃᓴᓕᕆᔨᒃᑯᑦ ᐅᖃᖃᑎᖃᓚᐅᖅᐳᑦ ᑰᑦ ᐃᔨᑦᓯᐊᕐᒧᑦ ᐊᐅᓚᑦᑎᔨᒻᒪᕆᒃ ᐅᑭᐅᖅᑕᖅᑐᒥ UAV–ᒧᑦ, ᐃᖃᓗᖕᓂ-ᑐᙵᕕᓕᒃ ᐊᐅᓚᑕᐅᓂᐅᔪᒥ ᐊᑐᓲᖑᔪᒥ ᖃᖓᑕᕙᒃᑐᓂ ᐊᐅᓚᑕᐅᓪᓗᑎᒃ ᖃᖓᑕᑎᓪᓗᒋᑦ ᐊᔾᔨᓕᐅᕆᕙᒃᑐᓂ ᒪᐃᒥ. ᑕᐃᔅᓱᒪᓂ, ᓇᖕᒥᓂᕆᔭᖓ ᐱᔪᓐᓇᓚᐅᙱᓚᖅ ᓇᓕᐊᑐᐃᓐᓇᓄᑦ ᑐᑭᓕᐊᖑᔪᒥ ᑮᓇᐅᔭᖃᖅᑎᑕᐅᓂᐅᔪᓄᑦ ᐱᓕᕆᐊᖑᔪᓄᑦ. ᐃᓄᐃᑦ ᓇᖕᒥᓂᕆᔭᖏᓐᓄᑦ ᐊᑭᓕᒃᓴᖅᑖᒃᑲᓐᓂᕈᒪᓚᐅᙱᓚᑦ, ᐅᖃᓚᐅᖅᐳᖅ, ᐅᖃᕆᐊᓪᓚᒃᖢᓂ ᐃᓄᖕᓄᑦ ᓇᖕᒥᓂᕆᔭᐅᔪᓄᑦ ᑲᑎᒪᔨᐅᔪᑦ (ᓄᓇᕗᒻᒥ) ᐃᓚᒋᔭᐅᔪᑦ ᕿᓂᓚᐅᕐᓂᖏᓐᓂ ᕿᑐᙱᐅᕈᑎᖃᙱᑦᑐᒥ, ᐊᑭᓕᐅᑎᖃᙱᑦᑐᒥ $250,000 ᑭᒡᓕᖃᖅᑐᒥ ᐊᑐᖅᑐᐊᕐᕕᐅᔪᓐᓇᖅᑐᒥ ᐊᒻᒪ ᐃᓱᒪᒋᔭᐅᔪᓐᓃᕈᓐᓇᖅᑐᒥ ᐊᑐᖅᑐᐊᒐᕐᒥ ᑎᑭᐅᒪᔪᒧᑦ $50,000–ᒧᑦ.

ᐊᓯᖓᓐᓂ ᐊᑲᐅᙱᓕᐅᕈᑕᐅᔪᒥ ᓵᙵᔪᓄᑦ ᓇᖕᒥᓂᖃᖅᑎᐅᔪᓄᑦ ᐊᒻᒪ ᐊᒥᓱᓄᑦ ᐊᓯᖏᓐᓄᑦ ᐸᕐᓇᐃᓂᕐᒥ ᐊᐅᔭᒧᑦ ᐅᒥᐊᕐᔪᐊᒃᑯᑦ ᐊᐅᔭᒃᑯᑦ ᑎᑭᓴᐃᓂᐅᔪᒥ, ᒫᓐᓇ ᐱᓕᕆᔭᐅᕐᔪᐊᓕᖅᑐᒥ, ᐊᕐᕌᒍᓕᒫᒧᑦ ᐱᖁᑎᓂᑦ ᑎᑭᓴᖅᑕᐅᔭᕆᐊᖃᖅᑎᓪᓗᒋᑦ ᑕᐃᑲᓂ ᓇᓗᓇᕐᓂᐅᔪᒥ ᓄᕙᒡᔪᐊᕐᓇᖅ-19–ᒥ.

"ᐊᒥᓱᐃᑦ ᓇᖕᒥᓂᖃᖅᑎᐅᔪᑦ ᐊᑭᓖᕙᒌᖅᓯᒪᕗᑦ ᐱᖁᑎᓄᑦ, ᐊᑭᓖᕙᒌᖅᓯᒪᓪᓗᑎᒃ ᓇᓪᓕᐅᒃᑯᒫᓄᑦ," ᐃᔨᑦᓯᐊᖅ ᐅᖃᓚᐅᖅᐳᖅ. "ᑮᓇᐅᔭᐃᑦ ᐃᓯᖅᐸᓪᓕᐊᔪᑦ ᐱᑕᖃᙱᑦᑎᐊᓐᒪᕆᒃᑎᓪᓗᒋᑦ, ᐊᒥᓱᐃᑦ ᓇᖕᒥᓂᖃᖅᑎᐅᔪᑦ ᐃᓱᒫᓗᒃᐳᑦ ᐅᒥᐊᕐᔪᐊᒥ ᐊᙳᑎᔾᔮᙱᓐᓂᖏᓐᓂ, ᐃᒫᓪᓚᕆᒃ ... ᖄᖏᐅᑎᒍᕕᐅᒃ ᑕᐃᓐᓇ ᐱᕕᒃᓴᖃᕐᓂᐅᔪᖅ, ᑕᐃᓐᓇ ᐱᕕᒃᓴᐅᓂᐊᖅᑐᖅ ᐅᓯᑲᑦᑕᕐᓂᐅᔪᒥ ᐱᖁᑎᖕᓂ ᐅᑭᐅᖅᑕᖅᑐᒧᑦ, ᐊᕐᕌᒍᓕᒫᒥ ᖄᖏᐅᑎᓂᐊᖅᐳᑎᑦ. ᒐᕙᒪᒃᑯᓐᓂ ᐅᕙᑦᑎᓐᓂ ᐃᑲᔪᕐᓂᐊᖅᐸᑦ ᐊᕐᕌᒍᓕᒫᒧᑦ ᐅᒥᐊᕐᔪᐊᖅ ᖄᖏᐅᑎᒍᑦᑎᒍᑦ? ᐅᑯᐊ ᐊᔾᔨᐅᙱᑦᑐᕐᔪᐊᖑᕗᑦ ᖃᓄᐃᓐᓂᐅᔪᑦ ᐱᓕᕆᓇᓱᒃᑕᑦᑎᓐᓂ... ᑮᓇᐅᔭᓂ ᐃᓯᖅᑎᑦᑎᓂᖃᙱᒃᑯᒪ ᑕᒪᑐᒪᓂ ᐊᕐᕌᒎᔪᒥ, ᐅᖃᐅᑎᔪᓐᓇᖅᐸᒋᑦ ᓇᖕᒥᓂᖃᔾᔮᙱᓚᖓ ᐊᕐᕌᒍᒥ ᐊᑕᐅᓯᕐᒥ."

ᕿᑭᖅᑖᓗᖕᒥ ᐊᕕᒃᑐᖅᓯᒪᓂᐅᔪᒥ ᓇᖕᒥᓂᖅ ᐃᖅᑲᓇᐃᔭᕐᕕᓖᑦ ᑲᑐᔾᔨᖃᑎᒌᖑᔪᓄᑦ ᖃᐅᔨᓴᖅᑕᐅᓂᐅᔪᒥ ᔪᓚᐃ-ᕿᑎᖅᐸᓯᐊᓂ ᓴᖅᑭᑎᑦᑎᓚᐅᖅᐳᖅ 44 ᐳᓴᓐᑎᐅᔪᒥ ᓇᖕᒥᓂᕆᔭᐅᔪᓂ ᐅᓂᒃᑳᕆᓚᐅᕐᓂᖏᓐᓂ ᒥᒃᖠᒋᐊᕐᓂᐅᔪᒥ ᑮᓇᐅᔭᓂᒃ ᐃᓯᖅᐸᓪᓕᐊᔪᓄᑦ ᕿᑎᐊᓂ 0-30 ᐳᓴᓐᑎᒧᑦ. ᐊᑕᐅᓯᕐᒥ-ᑎᓴᒪᓄᑦ ᑭᐅᔨᐅᔪᓂ ᐅᖃᓚᐅᖅᐳᑦ ᐊᓯᐅᔨᓚᐅᕐᓂᖏᓐᓂ ᕿᑎᐊᓂ 30-70 ᐳᓴᓐᑎᒥ ᑮᓇᐅᔭᓂᒃ ᐃᓯᖅᐸᓪᓕᐊᔪᓄᑦ. ᖁᑦᑎᕐᔪᐊᖅᑐᓄᑦ ᑮᓇᐅᔭᓂᒃ ᐃᓯᖅᐸᓪᓕᐊᔪᓄᑦ ᔭᒐᐃᓂᐅᔪᓂ 70-100 ᐳᓴᓐᑎᒥ ᐊᒃᑐᐃᓂᖃᓚᐅᖅᐳᖅ 12.5 ᐳᓴᓐᑎᓂ ᐱᓕᕆᐊᖑᓂᐅᔪᓄᑦ.

ᕿᑎᕐᒥᐅᓂ ᓇᖕᒥᓂᖅ ᐃᖅᑲᓇᐃᔭᕐᕕᓖᑦ ᑲᑐᔾᔨᖃᑎᒌᖑᔪᓄᑦ ᐃᓚᒋᔭᖃᖅᐳᑦ ᓇᐃᓴᐅᓯᕆᔪᓂ ᔭᒐᐃᓂᐅᔪᓂ ᒥᓕᐊᓐ–ᖏᓐᓂ ᑮᓇᐅᔭᓂᑦ ᐱᔾᔪᑎᖃᖅᑐᒥ ᐊᒥᓱᓄᑦ ᖃᓐᓂᒻᒪᓐᓇᐅᔪᒥ.

"ᒥᑭᑦᑐᑦ ᓇᖕᒥᓂᖃᖅᑎᐅᔪᑦ ᐊᑦᑕᓇᖅᑐᒦᑉᐳᑦ," ᐃᔨᑦᓯᐊᖅ ᐅᖃᓚᐅᖅᐳᖅ. "ᐃᑲᔪᖅᓯᖅᑕᐅᔭᕆᐊᖃᖅᐳᒍᑦ ᐊᒻᒪ ᒫᓐᓇ ᐱᔭᕆᐊᖃᖅᐸᕗᑦ."

ᓄᓇᕗᒻᒥ ᒐᕙᒪᒃᑯᑦ ᐅᖃᐅᓯᖃᓚᐅᖅᐳᑦ ᒫᓐᓇᓕᓴᐅᔪᒥ ᓄᑖᖑᔪᒥ ᐱᓕᕆᐊᖑᔪᒥ ᐃᑲᔪᖅᓱᐃᓂᕐᒧᑦ ᓴᓇᐅᒐᓕᕆᔨᐅᔪᓂ ᑮᓇᐅᔭᖃᖅᑎᑕᐅᓂᖏᓐᓂ ᕿᑎᐊᓂ $5,000–ᒥ ᐊᒻᒪ $50,000–ᒧᑦ, ᖃᐅᔨᒪᔭᐅᓪᓗᓂ ᓄᓇᕗᒻᒥ ᐃᓄᓕᒫᓄᑦ ᓴᓇᐅᒐᓕᕆᓂᕐᒧᑦ ᐱᒋᐊᕈᑕᐅᔪᒥ. ᐃᓱᒪᓂᑦᑎᐊᕙᒻᒪᕆᐅᕗᖅ, ᐊᒻᒪ ᐊᑕᐅᓯᐅᓪᓗᓂ ᐊᒥᓱᓂ ᒐᕙᒪᒃᑯᓐᓂ ᐊᒻᒪ ᐊᕕᒃᑐᖅᓯᒪᓂᐅᔪᓄᑦ ᐃᓄᖕᓂ ᑲᑐᔾᔨᖃᑎᒌᖑᔪᓄᑦ ᐃᑲᔪᖅᓱᐃᓂᕐᒧᑦ ᐱᓕᕆᐊᖑᕗᖅ.

ᐊᑦᑎᒃᑐᒥ ᑮᓇᐅᔾᔭᒃᓴᓂᐅᔪᒥ ᑭᒡᓕᐅᔪᑦ ᑕᐃᒪᐃᒐᔪᒃᑎᓪᓗᒋᑦ ᓄᓇᕗᒻᒥ, ᒐᕙᒪᒃᑯᓐᓂ ᐱᓕᕆᒃᑲᓐᓂᕆᐊᖃᖅᑎᑦᑎᕗᒍᑦ, ᑭᓯᐊᓂ ᐃᓚᖓᓐᓂ ᐱᓕᕆᖃᑕᐅᓚᐅᖅᑕ, ᐱᔪᓐᓇᕐᓂᓕᒫᑦᑎᓐᓂ. ᓂᐅᕕᕐᓂᐅᒍᓂ ᑭᓱᑐᐃᓐᓇᓂ ᐅᕝᕙᓘᓐᓃᑦ ᐅᖃᐅᓯᖃᖃᑕᐅᓂᕐᒧᑦ ᐃᓅᖃᑎᒌᓄᑦ ᓯᐊᒻᒪᖅᑎᑦᑎᓂᐅᔪᓂ, ᓄᓇᓕᖕᓂ ᓇᖕᒥᓂᖃᖅᑎᐅᔪᑦ ᓴᐱᓕᖅᑕᐃᓕᓂᖏᓐᓂ ᐅᕙᓂ ᐊᒃᓱᕈᕐᓇᖅᑐᕐᔪᐊᖑᔪᒥ ᐱᓕᕆᓂᐅᔪᒥ.