Skip to content

ᐃᓱᒪᕗᑦ: ᓱᓕᓂᖅ ᐊᓂᕗᖅ, ᓴᐃᒻᒪᖃᑎᒌᒋᐊᖃᓕᖅᐳᒍᑦ

ᖄᖏᖅᓯᒪᓕᖅᑐᓂ ᐊᕐᕌᒍᓂ ᑕᓪᓕᒪᓂ, 94−ᓂ ᖃᐃᖁᔨᓂᐅᔪᓂ−ᖃᓄᐃᓕᐅᕐᓂᕐᒧᑦ ᑐᓂᔭᐅᓚᐅᖅᐳᑦ ᒐᕙᒪᑐᖃᒃᑯᓐᓄᑦ ᑭᓯᐊᓂ 9−ᖏᓐᓇᐃᑦ ᐱᓕᕆᐊᖑᓯᒪᕗᑦ ᒫᓐᓇᒧᑦ ᑎᑭᖦᖢᒍ

ᐊᑲᐅᙱᓕᐅᕈᑎ: ᓴᐃᒻᒪᖃᑎᒌᖕᓂᖅ
ᐅᖃᖅᐳᒍᑦ: ᑐᑭᓕᐊᖅᑐᒥ ᐊᖅᑯᑎᖃᙱᑦᑐᖅ

ᑲᑉᐱᐊᓇᕐᓂᐅᔪᑦ ᐊᐅᓪᓚᖅᑎᑕᐅᕙᓚᐅᖅᑐᓂ ᐃᓕᓐᓂᐊᕆᐊᖅᑎᑕᐅᓪᓗᑎᒃ ᑎᑎᕋᐅᓯᐅᑦᑎᐊᖅᓯᒪᕗᑦ. ᑲᓇᑕᐅᑉ ᓱᓕᓂᕐᒧᑦ ᐊᒻᒪ ᓴᐃᒻᒪᖃᑎᒌᖕᓂᐅᔪᒥ ᑎᓕᔭᐅᓯᒪᔪᓂ ᐱᓕᕆᓚᐅᖅᐳᑦ 2008-2015–ᒧᑦ ᓴᓇᓂᕐᒥ 500-ᐅᖓᑖᓂ-ᒪᒃᐱᖅᑐᒐᓕᖕᒥ ᐅᓂᒃᑳᓕᐊᒥᒃ ᐊᒻᒪ 94–ᓂ ᖃᐃᖁᔨᓂᐅᔪᓂ ᖃᓄᐃᓕᐅᕐᓂᕐᒧᑦ ᑭᐅᓂᕐᒧᑦ ᐅᑯᓂᖓ ᐊᒥᓱᓄᑦ ᐱᓕᕆᑦᑎᐊᙱᓐᓂᐅᔪᒥ ᐃᓄᖕᓄᑦ ᐱᑦᑎᐊᕐᓂᐅᔪᒥ ᐊᑐᖅᑎᑕᐅᔪᓂ ᐊᖓᔪᖅᑳᖑᔪᓄᑦ ᐊᒻᒪ ᓱᕈᓯᕐᓄᑦ ᑕᒪᒃᑭᓄᑦ, ᑲᑎᖅᓱᐃᓪᓗᑎᒃ 7,000–ᑲᓴᖕᓂ ᓯᕗᓪᓕᖅᐹᓂᙶᖅᑐᓂ ᐃᖅᑲᐅᒪᓂᐅᔪᓄᑦ ᐊᑐᖅᓯᒪᓂᑰᔪᓄᑦ, ᐃᓚᒌᖑᔪᓄᑦ ᐊᒻᒪ ᐊᓯᖏᓐᓄᑦ.

ᑭᓯᐊᓂ, ᑎᓯᐱᕆ 2019–ᒥ ᐅᓂᒃᑳᓕᐊᖑᔪᒥ ᐄᕙ ᔫᕗᓪᒧᑦ ᐊᒻᒪ ᐄᔭᓐ ᒨᔅᐱᒧᑦ Yellowhead Institute–ᒥ ᓇᓂᓯᓚᐅᖅᐳᑦ 9-ᑐᐃᓐᓇᐅᔪᓂ ᖃᐃᖁᔨᓂᐅᔪᓂ ᖃᓄᐃᓕᐅᕐᓂᕐᒧᑦ ᐱᔭᕇᖅᑕᐅᓯᒪᓚᐅᖅᐳᑦ ᑕᐃᔅᓱᒪᓂ. ᑲᑎᙵᓂᖃᖅᖢᓂ ᐊᒥᓱᓄᑦ ᖃᓂᒻᒪᓐᓇᐅᔪᒥ ᐊᒻᒪ ᒐᕙᒪᑐᖃᒃᑯᑦ ᐃᓱᒫᓗᖕᓂᖅᓴᐅᔪᓂ ᖃᐃᖁᔨᓂᐊᕐᓂᖏᓐᓂ ᕿᓚᒻᒥᐅᔪᒥ ᓂᕈᐊᕐᓂᐅᔪᒥ, ᓇᓗᓇᙱᐸᓗᒃᐳᖅ ᐃᖏᕐᕋᓂᖃᓗᐊᕌᓗᙱᓐᓂᖏᓐᓂ ᑕᐃᒪᙵᓂ.
ᖃᐃᔨᓴᐃᓂᐅᔪᒥ ᑐᓂᓯᓚᐅᙱᑎᓪᓗᒍ ᑕᒪᒃᑭᐅᒪᔪᒥ ᓇᓗᓇᐃᖅᑕᐅᓂᖓᓂ ᐅᑯᓇᓂ ᐃᓚᐃᓐᓇᖓᒍᑦ ᐱᔭᕇᖅᓯᒪᓂᐅᔪᓂ ᖃᓄᐃᓕᐅᕐᓂᐅᔪᓂ ᐊᒻᒪᓗ ᑕᐃᒃᑯᐊ ᐱᒋᐊᖅᑕᐅᓯᒪᙱᑦᑎᐊᒻᒪᕆᒃᑐᓂ, ᐅᓇ ᐱᓗᐊᖅᑐᒥ ᐃᓱᒫᓗᖕᓇᖅᐳᖅ ᖃᐃᖁᔨᓂᐅᔪᑦ ᑭᐅᔭᐅᓯᒪᔪᓂ ᔫᕗᓪ ᐅᓂᒃᑳᕆᓯᒪᔭᖏᓐᓂ

"ᑕᐅᑦᑐᐃᓐᓇᖓᓂ ᐊᓯᔾᔨᕐᓂᐅᔪᓂ" ᑲᓇᑕᐅᑉ ᐱᓕᕆᖃᑎᒋᓂᖏᓐᓂ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ ᑲᓇᑕᓕᒫᒥ.
ᐊᒥᓱᓂ ᒪᒥᐊᓯᒪᓂᖅᑕᖃᖅᐳᖅ, ᓄᓇᓕᖕᓂ ᐊᒻᒪ ᑲᓇᑕᒥ ᐊᖏᓂᐅᔪᓄᑦ, ᑕᒪᒃᑭᑦ ᐱᐅᓯᖃᓕᖅᑎᑕᐅᓂᕐᒥ ᖃᓄᐃᓕᐅᕐᓂᐅᔪᓄᑦ ᐱᓕᕆᐊᖑᔪᓄᑦ ᒐᕙᒪᐅᔪᓂ ᑲᓇᑕᐅᑦ ᐊᕐᕌᒍᓄᑦ–150-ᓄᑦ ᖃᓄᐃᑉᐸᓚᐅᕐᓂᖏᓐᓂ ᐊᖕᓕᑲᓐᑯᓐᓂ ᐊᒻᒪ ᐃᒃᓯᕋᕐᔪᐊᒃᑯᓐᓂ ᑐᒃᓯᐊᕐᕕᐅᔪᓄᑦ.

ᓯᑎᐱᕆ 2019–ᒥ ᐊᐱᖅᓱᖅᑕᐅᓂᐅᔪᒥ ᓄᓇᕗᒻᒥ ᑐᓴᒐᒃᓴᓕᕆᔨᒃᑯᓐᓄᑦ, ᐸᖕᓂᖅᑑᒥ ᐃᓄᑐᖃᖅ ᔪᐊᓇᓯ ᖄᐱᖕᒥ, ᐅᖃᓚᐅᖅᐳᖅ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖑᔪᒃᑯᑦ ᑐᓵᔨᑎᒍᑦ ᔪᓕᐊ ᑕᒻᓯᓴᓐᒧᑦ, "ᒪᒥᐊᓐᓂᖃᖅᑎᓪᓗᒍ, ᑭᒃᑯᓕᒫᓂᒃ ᐊᒃᑐᐃᓂᖃᓲᖑᕗᖅ. ᐊᖏᖃᑎᖃᙱᓐᓂᖃᖅᑎᓪᓗᒍ, ᐅᓇᐅᒐᓗᐊᖅᐸᑦ (ᑐᖁᑕᐅᔪᓄᑦ ᕿᒧᒃᓯᕈᑎᓄᑦ) ᕿᒻᒥᓂᑦ, ᓅᑕᐅᓂᐅᔪᒥ ᐅᕝᕙᓘᓐᓃᑦ ᐊᓯᐊᓂ ᐊᑲᐅᙱᓕᐅᕈᑕᐅᔪᒧᑦ, ᑭᓯᐊᓂ ᒪᒥᐊᓐᓂᖃᖅᐸᑦ ᑭᒃᑯᓕᒫᑦ ᖃᓂᒋᔭᑦᑎᓐᓂ ᓱᔪᒃᓯᒪᓂᐊᖅᐳᑦ, ᓂᙵᐅᒪᓂᖃᕐᓗᑎᒃ ... ᐃᓱᒪᒋᔪᓐᓃᕐᓂᖃᖅᐸᑦ ᑭᒃᑯᓕᒫᑦ ᓴᐃᓕᓂᖃᓲᖑᕗᑦ."

ᖃᐃᖁᔨᓂᖅ ᖃᓄᐃᓕᐅᕐᓂᐅᔪᒧᑦ ᓈᓴᐅᑎᓕᖕᒥ 21–ᒥ ᖃᐃᖁᔨᓂᖃᖅᐳᖅ ᒐᕙᒪᑐᖃᒃᑯᓐᓂ ᑐᓂᓯᓂᕐᒥ ᒪᑭᒪᔾᔪᑎᒃᓴᓂ ᑮᓇᐅᔭᓂᑦ ᐱᑕᖃᖅᐸᒌᖅᑐᓄᑦ ᐊᒻᒪ ᓄᑖᖑᔪᓄᑦ ᓄᓇᖃᖅᑳᖅᓯᒪᔪᓄᑦ ᒪᒥᓴᕐᕕᐅᔪᓄᑦ ᑭᐅᓂᕐᒧᑦ ᑎᒥᒧᑦ, ᐃᓱᒪᒧᑦ, ᐃᒃᐱᒍᓱᖕᓂᐅᔪᒧᑦ ᐊᒻᒪ ᐅᒃᐱᕐᓂᕐᒧᑦ ᓱᔪᐃᓂᐅᔪᓄᑦ ᐱᑎᑕᐅᔪᓂ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓄᑦ, ᐊᒻᒪᓗ ᓇᓗᓇᐃᖅᓯᓂᕐᒥ ᑮᓇᐅᔭᖃᖅᑎᑕᐅᓂᐅᔪᑦ ᒪᒥᓴᕐᕕᐅᔪᓄᑦ ᓄᓇᕗᒻᒥ ᐊᒻᒪᓗ ᓄᓇᑦᓯᐊᕐᒥ ᓯᕗᓪᓕᐅᑎᑕᐅᓂᖓᓐᓂ.

ᓄᓇᕗᒻᒥ ᒐᕙᒪᒃᑯᑦ, ᒐᕙᒪᑐᖃᒃᑯᑦ ᐊᒻᒪ ᓄᓇᕗᒻᒥ ᑐᙵᕕᒃᑯᑦ ᐊᖏᖃᑎᒌᒃᓯᒪᕗᑦ ᑲᑐᔾᔨᓂᖏᓐᓂ ᐅᐃᕆᓯᒪᔪᓄᑦ ᐊᒻᒪ ᐱᓂᕐᓗᒃᑕᐅᓂᑯᓄᑦ ᒪᒥᓴᕐᕕᐅᔪᒥ ᐃᖃᓗᖕᓂ, ᑭᓯᐊᓂ ᑕᐃᓐᓇ ᐃᒡᓗᕐᔪᐊᒃᓴᖅ ᓱᓕ ᓂᕆᐅᒋᔭᐅᙱᓚᖅ ᓴᓇᔭᐅᓛᕐᓂᖓᓂ ᖃᔅᓯᐊᕐᔪᖕᓄᑦ ᐊᕐᕌᒍᓄᑦ ᓱᓕ.

ᐋᓐᓂᐊᖃᕐᓇᙱᑦᑐᓕᓂᕐᒥ, ᑕᒪᒃᑭᓄᑦ ᐃᓱᒪᒧᑦ ᐊᒻᒪ ᑎᒥᒧᑦ, ᓄᓇᕗᒻᒥᐅᓕᒫᓄᑦ ᓯᕗᓪᓕᐅᔾᔭᐅᑎᑕᐅᔭᕆᐊᖃᐃᓐᓇᖅᐳᖅ. ᐅᖃᐅᓯᐅᓪᓗᓂ ᑭᒻᐳᓕ ᒪᐃᓴᓐᒧᑦ, ᐃᓚᒋᔭᐅᔪᒥ ᒥᓂᔅᑕᐅᑉ ᑐᖓᓕᖓᓂ ᐃᓅᓯᐅᑉ ᐱᐅᓂᖓᓄᑦ ᑲᑎᒪᔨᐅᔪᓄᑦ ᐅᑯᐊᓗ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ, ᑕᒪᕐᒥᒃ ᓄᓇᓕᐅᔪᑦ ᓄᓇᕗᒻᒥ ᐃᓂᒃᓴᖃᖅᐳᖅ ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᓗᐊᖅᓴᐃᔨᒧᑦ – ᑕᐃᒪᐃᓚᐅᙱᓚᖅ ᐊᕐᕌᒍᑦ 20–ᓂ ᖄᖏᖅᓯᒪᓕᖅᑐᓂ.

ᐊᓯᖏᓐᓂ ᐱᒋᐊᕈᑕᐅᔪᓂ ᐃᓚᖃᖅᐳᖅ ᐃᓕᓐᓂᐊᖅᑎᑦᑎᓂᕐᒥ ᐃᓄᓕᒫᓂ ᐃᒥᐊᓗᖕᒥ ᐊᒻᒪ ᓱᓐᓂᕈᑕᐅᓲᓂᒃ ᓱᐴᖅᑐᒐᕐᓂ ᓱᔪᐃᓂᐅᔪᒥ ᒥᒃᖠᒋᐊᖅᑎᑦᑎᓂᐅᔪᒥ; ᐊᑐᓕᖅᑎᑦᑎᓂᕐᒥ ᓄᓇᒥᒃ–ᑐᙵᕕᓕᖕᒥ ᐅᐃᕆᓯᒪᓂᐅᔪᓄᑦ ᐊᒻᒪᓗ ᐱᓂᕐᓗᒃᑕᐅᓯᒪᔪᓄᑦ ᐃᓅᓕᓴᖅᑕᐅᓂᖏᓐᓂ; ᐊᒻᒪᓗ ᑐᓂᓯᓂᕐᒥ ᓄᓇᖃᖅᑳᖅᓯᒪᔪᓄᑦ ᐃᓕᖅᑯᓯᑎᒍᑦ ᐱᔪᓐᓇᖅᓯᑦᑎᐊᕐᓂᐅᔪᒥ ᐱᓕᒻᒪᒃᓴᐃᓂᐅᔪᓂ ᐱᓕᕆᔨᕐᔪᐊᖑᔪᓄᑦ.

ᒪᒥᓴᕐᓂᐅᔪᑦ ᐊᒻᒪᓗ ᓄᓇᒥᒃ ᑕᖕᒫᕐᕕᐅᔪᓂ ᐊᓯᐊᒎᖅᑐᒥ ᐱᒻᒪᕆᐅᓪᓗᓂ ᐃᓚᒋᔭᐅᕗᖅ ᓴᐃᒻᒪᖃᑎᒌᖕᓂᕐᒥ ᓇᓗᓇᖅᑑᔪᒥ. ᓈᓚᒃᖢᓂ ᐃᓄᑐᖃᑦᑎᓐᓂ ᐊᒻᒪᓗ ᐅᓂᒃᑳᖅᑐᐊᖏᓐᓂ ᐅᕙᑦᑎᓐᓂ ᐃᑲᔪᕐᓂᐊᖅᐳᑦ ᒪᒥᓴᕐᓂᕐᒥ ᑕᐃᔅᓱᒪᓂᐅᓚᐅᖅᑐᒥ ᐊᒻᒪᓗᑦᑕᐅᖅ ᐅᕙᑦᑎᓐᓂ ᐃᓕᓐᓂᐊᖅᑎᑦᑎᓗᓂ ᖃᓄᖅ ᓯᕗᒻᒧᑦ ᐃᖏᕐᕋᔪᓐᓇᕐᓂᑦᑎᓐᓂ ᐃᒃᐱᒌᖃᑦᑕᐅᑎᑦᑎᐊᕐᓗᑕ ᑲᑎᙵᓗᑕ.

"ᑕᕝᕙ ᑕᒪᓐᓇ ᑕᐃᒪᐃᓐᓂᖃᖅᐳᖅ – ᒪᒥᐊᓐᓂᐅᔪᒥ ᐊᒻᒪ ᐃᓱᒪᒋᔪᓐᓃᖃᑎᒌᖕᓂᐅᔪᒥ," ᐅᖃᓚᐅᖅᐳᖅ ᖄᐱᒃ. "ᑕᐃᒪᐃᑉᐸᓕᐊᕐᓂᖏᑎᑐᑦ, ᐃᓄᐃᑦ ᐱᖅᑯᓯᖏᓐᓂ, ᐱᓕᕆᐊᖃᐃᓐᓇᖅᐸᒃᓯᒪᕗᒍᑦ ᐊᑲᐅᙱᓕᐅᕈᑕᐅᔪᓂ ᑕᐃᒪᐃᑦᑐᐸᓗᖕᓄᑦ, ᓴᐃᒻᒪᖃᑎᒌᒍᓐᓇᕐᓂᕐᒧᑦ."
ᐃᓱᒪᒋᔪᓐᓃᕐᓂᖃᕐᓂᐅᔪᖅ ᐱᒻᒪᕆᐅᓪᓗᓂ ᐱᓕᕆᓂᐅᕗᖅ ᒪᒥᓴᐃᓂᕐᒧᑦ ᑕᒻᒪᖅᑕᐅᓯᒪᓂᐅᔪᓄᑦ ᑕᐃᔅᓱᒪᓂᐅᓚᐅᖅᑐᒥ, ᑭᓯᐊᓂ ᐊᖅᑯᑎᖓ ᓴᐃᒻᒪᖃᑎᒌᖕᓂᐅᔪᒥ ᓴᓇᓯᒪᔭᕆᐊᖃᖅᐳᖅ ᑐᙵᕕᖃᑦᑎᐊᖅᑐᓂ ᖃᓄᐃᓕᐅᕐᓂᐅᔪᓂᑦ, ᐊᒻᒪᓗ ᑕᒪᓐᓇ ᑐᓐᓂᖃᖅᐳᖅ ᐅᑯᓄᖓᓪᓚᕆᒃ ᒐᕙᒪᑐᖃᐅᔪᓄᑦ.