ᒫᓐᓇᓕᓴᐅᔪᒥ ᐅᓂᒃᑳᓕᐊᖑᔪᓂ ᑕᑯᒃᓴᐅᑎᑦᑎᕗᑦ 48 ᐳᓴᓐᑎᖏᓐᓂ ᐊᕐᓇᓂ ᐊᒻᒪ 32 ᐳᓴᓐᑎᒥ ᐊᖑᑎᓂᑦ ᐊᑐᖅᓯᒪᕗᑦ ᐱᔪᒪᔭᐅᓇᓂ ᖁᓄᔪᕐᓂᐊᕐᓂᕐᒥ ᐃᓕᖅᑯᓯᖃᕐᓂᐅᔪᓄᑦ ᐅᑭᐅᖅᑕᖅᑐᓕᒫᒥ
ᐊᑲᐅᙱᓕᐅᕈᑎ: ᐊᖑᑕᐅᓂᖓᓂ ᐊᕐᓇᐅᓂᖓᓂ-ᑐᙵᕕᓕᖕᒥ ᐋᓐᓂᖅᓯᕆᓂᐅᔪᖅ
ᐅᖃᖅᐳᒍᑦ: ᐃᓚᐅᖃᑎᖃᕐᓗᓂ ᑐᐊᕕᕐᓇᕐᓂᐅᔪᒥ
ᑲᓇᑕᒥ ᑭᓪᓕᓯᓂᐊᖅᑎᒃᑯᑦ ᐅᓂᒃᑳᓕᐊᒥ ᓴᖅᑭᑕᐅᓚᐅᖅᑐᒥ ᐋᒍᔅᑎ 26–ᒥ ᓴᖅᑭᑎᑦᑎᓚᐅᖅᐳᖅ ᐊᑲᐅᒃᓴᕐᓇᙱᑦᑐᓂ ᓇᐃᓴᐅᑎᓂᑦ ᐱᔾᔪᑎᖃᖅᑐᒥ ᐱᔭᒪᔭᐅᙱᑦᑐᓂ ᖁᓄᔪᓐᓂᐊᕐᓂᐅᔪᓂ ᐃᓕᖅᑯᓯᖃᕐᓂᐅᔪᓂ ᓄᓇᕗᓕᒫᒥ.
ᓇᑉᐸᑲᓴᑦᑎᐊᖏᑦ ᐊᕐᓇᓂ (48 ᐳᓴᓐᑎ) ᐊᒻᒪ ᐊᑕᐅᓯᕐᒥ-ᐱᖓᓱᓄᑦ (32 ᐳᓴᓐᑎ) ᐊᖑᑎᓂᑦ ᐅᑭᐅᖅᑕᖅᑐᒥ ᓴᖅᑭᔮᕐᕕᐅᓯᒪᕗᑦ ᓈᒻᒪᙱᑦᑐᒥ ᐃᓕᖅᑯᓯᖃᕐᕕᐅᔪᓄᑦ, ᑎᑭᐅᑎᓯᒪᓂᐅᔪᓄᑦ ᒥᑕᓗᖕᓂᐅᔪᒥ, ᐅᕕᙱᐊᕋᕐᕕᐅᓂᕐᒥ ᐊᒻᒪ ᐃᒃᖠᒍᓱᒃᖢᑎᒃ ᕿᒥᕐᕈᖅᑕᐅᓪᓗᑎᒃ ᐱᔪᒪᔭᐅᙱᑦᑐᓄᑦ ᐊᒃᑐᖅᑕᐅᓂᐅᔪᒥ. ᐊᑕᐅᓯᖅ ᑎᓴᒪᓂ ᐊᕐᓇᓂᑦ ᐊᒻᒪ ᐊᑕᐅᓯᖅ 10–ᓂ ᐊᖑᑎᓂᑦ ᓄᓇᕗᒻᒥ ᐊᑐᖅᓯᒪᕗᑦ ᐅᑯᓂᖓ ᐃᓕᖅᑯᓯᖃᕐᕕᐅᔪᓄᑦ ᒪᕐᕈᐃᖅᓱᕐᓂᕐᒥ ᐅᖓᑖᓄᑦ 2018–ᒥ.
48 ᐳᓴᓐᑎ ᒥᑭᑦᑑᙱᓚᖅ ᐅᓄᕐᓂᐅᔪᓂ.
ᑕᒪᒃᑭᒐᓚᖕᓄᑦ ᐃᓄᖕᓄᑦ ᓄᓇᖃᖅᑐᓂ ᓄᓇᕗᒻᒥ, ᐅᓇ ᑲᒪᓇᙱᓚᖅ.
ᐱᓕᕆᐊᖃᕐᓂᖅ – ᑕᐃᒪᐃᑕᐅᑦᑕᐃᓕᒪᓂᕐᒥᓪᓘᓐᓃᑦ – ᐊᑲᐅᙱᓕᐅᕈᑎᓕᐅᖅᐸᒃᑐᓄᑦ ᐃᓄᖕᓂ ᐃᓅᖃᑎᒌᖑᔪᓄᑦ ᖃᓄᐃᓐᓂᐅᔪᓄᑦ ᓵᙵᔭᐅᔭᕆᐊᖃᕐᓂᐅᔪᒥ ᑲᒪᒋᔭᐅᓂᐅᓗᓂ ᐊᑐᖅᑕᐅᓪᓗᐊᙱᑦᑎᐊᖅᑐᖅ ᐅᓪᓗᒥᐅᓕᖅᑐᒥ.
ᕕᕈᐊᕆᒥ, ᑕᕐᕆᔭᓕᐅᖅᑎ ᐊᓖᑎᐊ ᐊᕐᓇᖅᑯᖅ–ᐳᕆᐅᓪ ᓴᖅᑭᑎᑦᑎᓚᐅᖅᐳᖅ ᐱᕐᔪᐊᖑᔪᒥ ᐸᓯᒃᓯᔾᔪᑕᐅᔪᒥ ᖁᙱᐊᖅᑕᐅᕙᒃᑐᒥ ᔮᓂ ᐄᓴᓗᖕᒥ ᐃᓚᖃᖅᑐᒥ ᐱᔪᒪᔭᐅᓇᓂ ᐊᒃᑐᖅᓯᖃᑦᑕᕐᓂᐅᔪᒥ ᐊᒻᒪ ᐅᖃᓚᐅᖅᐳᖅ ᐊᕐᕌᒍᒐᓴᓄᑦ ᑐᓴᖅᓯᒪᓂᖓᓂ "ᐊᒥᓱᓂ" ᐅᓂᒃᑳᕐᓂᐅᔪᓂ ᐊᕐᓇᓂᑦ "ᐊᑐᕐᓗᒃᓯᒪᓂᖏᓐᓂ ᐋᓐᓂᖅᓯᕆᓂᐅᔪᓂ ᐊᒻᒪ ᖁᓄᔪᓐᓂᐊᕐᓂᐅᔪᓂᑦ ᑕᐃᔅᓱᒪᙵᑦ."
ᐅᑯᐊ ᐃᓕᖅᑯᓯᖃᕐᕕᐅᔪᑦ ᑕᒪᕐᒥᒃ ᓈᒻᒪᒃᑐᐃᓐᓇᐅᙱᓚᑦ ᐊᒻᒪ ᖃᐅᔨᒪᕗᒍᑦ ᐃᓄᑐᐃᓐᓇᐅᓪᓗᑕ, ᑕᐃᒫᒃ ᖃᓄᐃᒻᒪᑦ ᓱᒃᑲᐃᓗᐊᖅᐱᑕ ᑭᐅᓂᕐᒧᑦ ᐱᕈᖅᐸᓪᓕᐊᔪᒧᑦ ᑐᐊᕕᕐᓇᕐᓂᐅᔪᒧᑦ?
ᑲᓇᑕᒥ ᑭᓪᓕᓯᓂᐊᖅᑎᒃᑯᑦ ᐅᓂᒃᑳᓕᐊᖓ ᓱᓕᓂᕋᐃᓯᒪᕗᑦ ᐃᓚᖏᓐᓂ ᖃᐅᔨᓴᖅᑕᐅᓂᐅᔪᓄᑦ ᐃᒪᐃᑦᑑᔮᕐᓂᖓᓂ "ᑕᐃᒪᐃᒐᔪᖕᓂᐅᓂᖓᓂ ᐋᓐᓂᖅᓯᕆᓂᐅᔪᒥ ᐃᓚᖏᓐᓄᑦ ᐃᓄᖕᓄᑦ ᐊᕐᓇᓄᑦ" ᓄᓇᕗᒻᒥ ᐅᓄᕐᓂᐅᔪᑦ ᖁᓄᔪᓐᓂᐊᕐᓂᐅᔪᓂ ᖁᑦᑎᒃᑑᑎᓪᓗᒍ. ᒪᓕᒃᑐᒥ, ᐃᓚᖏᓐᓂ ᐱᕐᔪᐊᖑᙱᓐᓂᖅᓴᐅᔪᓂ ᖁᓄᔪᓐᓂᐊᕐᓂᐅᔪᒥ ᐃᓕᖅᑯᓯᖃᕐᕕᐅᔪᓄᑦ ᑕᑯᔭᐅᙱᑐᐃᓐᓇᕆᐊᖃᖅᐳᑦ ᐋᓐᓂᖅᓯᕆᓂᐅᓂᖓᓂ.
"ᑭᓱᒥᒃ ᑕᐃᔭᕆᐊᒃᓴᖅ ᓇᓗᓚᐅᖅᐸᕋ ᑕᐃᔅᓱᒪᓂ ᐊᒻᒪ ᒫᓐᓇ ᖃᐅᔨᒪᕗᖓ ᑭᓱᒥᒃ ᑕᐃᔭᕆᐊᒃᓴᖅ –#ᖁᓄᔪᓐᓂᐊᕐᓂᐅᕗᖅ," ᐊᕐᓇᖅᑯᖅ–ᐳᕆᐅᓪ ᑎᑎᕋᓚᐅᖅᐳᖅ.
ᓴᖅᑭᓐᓂᖏᓐᓂ ᐸᓯᒃᓯᔾᔪᑕᐅᔪᓄᑦ, ᐄᓴᓗᒃ ᐅᖃᓚᐅᖅᐳᖅ, "ᑭᓇᑐᐃᓐᓇᒥᒃ ᐋᓐᓂᖅᓯᓇᓱᐊᓚᐅᙱᓚᖓ, ᑭᓯᐊᓂ ᐋᓐᓂᖅᓯᓚᐅᖅᐳᖓ. ᒪᒥᓴᖅᓯᒪᙱᓐᓂᓐᓂ ᓇᖕᒥᓂᖅ ᐱᓂᕐᓗᒡᔪᐊᖅᑕᐅᓯᒪᓚᐅᖅᓯᒪᔭᓐᓂ, ᐊᓯᓐᓂ ᐋᓐᓂᖅᓯᓯᒪᕗᖓ."
ᓄᓇᕗᒻᒥ ᒐᕙᒪᒃᑯᑦ ᓂᕈᐊᕈᓂ ᑲᒪᒋᔭᕆᐊᖃᙱᓐᓂᖏᓐᓂ ᐸᓯᒃᓯᔾᔪᑕᐅᔪᓄᑦ ᐋᓐᓂᖅᓯᕆᓂᐅᔪᓄᑦ ᐃᖅᑲᓇᐃᔭᖅᑎᐅᔪᒥ, ᑕᐃᒪᓐᓇᑎᑐᑦ ᓇᓗᓇᐃᖅᑕᐅᓯᒪᓂᐅᔪᒥ–ᖃᓄᐃᓕᐅᕐᓂᐅᔪᒧᑦ ᐃᖅᑲᖅᑐᒐᒃᓴᙳᖅᑎᑕᐅᓂᖓᓂ ᐱᔾᔪᑎᖃᖅᑐᒧᑦ ᐃᓕᓴᐃᔨᐅᓚᐅᖅᓯᒪᔪᒧᑦ ᒧᕇᔅ ᒃᓛᒃᓕ, ᖃᓄᖅ ᓂᕆᐅᒍᓐᓇᖅᐱᑕ ᑕᐃᒃᑯᓄᖓ ᖁᓄᔪᓐᓂᐊᖅᑕᐅᓯᒪᔪᓄᑦ ᐊᒻᒪ ᓵᑎᑦᑎᓗᑎᒃ ᐱᓂᕐᓗᒡᔪᐊᖅᓯᒪᓂᕆᔭᖏᓐᓂ ᐊᓯᖏᓐᓄᑦ ᑲᒪᒋᔭᖃᓕᕐᓂᕐᒧᑦ ᑖᒃᑯᓄᖓ ᐊᒻᒪ ᐊᓯᔾᔩᓗᑎᒃ ᓇᖕᒥᓂᖅ ᖃᓄᐃᓕᐅᕐᓂᕆᔭᖏᓐᓂᑦ?
ᕕᕈᐊᕆ 24–ᒥ, ᑲᖏᖅᖠᓂᖅ ᐅᐊᖕᓇᒥ-ᐃᒡᓗᓕᒑᕐᔪᖕᒧᑦ ᒪᓕᒐᓕᐅᖅᑎᐅᖃᑕᐅᔪᖅ ᑳᑎ ᑕᐅᑐᙱ ᑐᑭᓯᓇᖅᓯᑎᑦᑎᓚᐅᖅᐳᖅ ᐃᓱᒫᓗᖕᓂᖓᓂ ᒫᓐᓇᐅᔪᒥ ᑐᕌᒐᕆᔭᐅᔪᓄᑦ ᑭᐅᓂᕐᒧᑦ ᖁᓄᔪᓐᓂᐊᕐᓂᐅᔪᒥ.
ᐊᔪᕐᓇᙱᑦᑐᑯᓘᙱᓚᖅ ᐊᒻᒪ ᐱᐅᒋᔭᐅᙱᕐᔪᐊᖅᐳᖅ ᓴᐳᔾᔨᓇᓱᐊᕐᓂᕐᒥ ᑭᓇᑐᐃᓐᓇᒥᒃ ᐱᕋᔭᒃᓯᒪᕐᔪᐊᖅᑐᐊᓗᖕᒥ ᐊᓯᖏᓐᓄᑦ. ᐱᕋᔭᒃᑕᐅᓯᒪᔪᑦ ᐃᑲᔪᖅᓯᕆᐊᖃᖅᐳᕗᑦ, ᑭᓯᐊᓂᑦᑕᐅᖅ ᐱᕋᔭᒃᑐᕕᓂᐅᔪᑦ. ᑕᒪᒃᑭᑦ ᐋᓐᓂᐊᖅᐳᑦ," ᐅᖃᓚᐅᖅᐳᖅ.
ᐋᓐᓂᐊᕋᓗᐊᕈᑎᒃ ᐋᒃᑲᓘᓐᓃᑦ, ᐱᓕᖅᑭᒃᑕᕐᓂᐅᔪᖅ ᐋᓐᓂᖅᓯᕆᓂᐅᔪᒥ ᐃᓱᓕᑦᑕᕆᐊᖃᖅᐳᖅ.
ᐃᒻᒪᖄ ᐅᐃᕆᓯᒪᓂᐅᔪᓄᑦ ᐊᒻᒪ ᐱᓂᕐᓗᒡᔪᐊᖅᓯᒪᓂᐅᔪᓄᑦ ᐱᓕᕆᕝᕕᒃ ᓴᓇᔭᐅᔪᒃᓴᐅᑕᐅᔪᒥ ᐃᖃᓗᖕᓂ ᑎᑭᑉᐸᓪᓕᐊᔪᓄᑦ ᐊᕐᕌᒎᔪᓄᑦ ᐃᑲᔪᕐᓂᖃᕐᓂᐊᖅᐳᖅ ᐊᒃᑐᐃᓂᒐᓛᖕᓂᐅᔪᒥ ᐆᒧᖓ ᑲᑉᐱᐊᓇᖅᑐᒧᑦ ᐊᑲᐅᙱᓕᐅᕈᑕᐅᔪᒧᑦ
ᒫᓐᓇᐅᔪᒥ, ᐅᕙᑦᑎᓐᓄᓕᒫᖅ ᓂᓪᓕᕆᐊᖃᖅᐳᒍᑦ ᑕᑯᒍᑦᑕ, ᖃᓄᐃᓐᓂᐅᔪᑦ ᐊᐱᖅᑯᑕᐅᔪᓄᑦ ᐃᓚᖃᑐᐃᓐᓇᕋᓗᐊᕈᓂ ᒥᑕᓗᖕᓂᐅᓂᕋᖅᑕᐅᔪᓂ ᐅᕝᕙᓘᓐᓃᑦ ᑐᓴᖏᐊᓴᖕᓂᐅᔪᒥ. ᑕᐃᒃᑯᐊ ᐃᓂᒦᑦᑐᓂ ᐱᔪᓐᓇᕐᔪᐊᕐᓂᐅᔪᓂ – ᐃᖅᑲᓇᐃᔭᕐᕕᖕᒥ ᐊᐅᓚᑦᑎᔨᐅᔪᑦ, ᐱᓗᐊᖅᑐᒥ – ᐱᓕᕆᔭᕆᐊᖃᖅᐳᑦ ᐅᑯᓂᖓ ᖃᓄᐃᓐᓂᐅᔪᓄᑦ ᐱᓪᓚᕆᐅᓂᖓᓂ ᐱᔭᕆᐊᖃᓪᓗᐊᖅᑐᒥ, ᑭᓲᙱᑎᑕᐅᑐᐃᓐᓇᙱᓪᓗᑎᒃ, ᐱᓗᐊᖅᑐᒥ ᑕᐃᒪᐃᒐᔪᒃᓯᒪᔪᓄᑦ ᐱᕋᔭᒃᑎᐅᔪᓄᑦ.