ᓯᑎᐱᕆ 20–ᒥ ᓂᕈᐊᕆᐊᖅᑐᕐᓂᕐᒧᑦ ᑎᑭᑉᐸᓪᓕᐊᑎᓪᓗᒍ ᒪᓕᒃᑐᒥ ᒐᕙᒪᑐᖃᒃᑯᓐᓂ ᓂᕈᐊᕐᓂᐅᔪᒥ, ᖃᓄᐃᙱᓚᖅ ᐊᒥᓱᒻᒪᕆᐊᓗᖕᓂ ᐊᑲᐅᙱᓕᐅᕈᑎᐊᓗᖕᓂ ᕿᒥᕐᕈᓂᕐᒧᑦ ᓄᓇᕗᒻᒥᐅᓄᑦ ᑭᐅᔭᐅᔭᕆᐊᖃᖅᑐᓂ ᐃᕐᙲᓐᓇᑲᐅᑎᒋ ᐊᒻᒪᓗ ᓯᕗᓂᒃᓴᒧᑦ.
ᖁᕙᓕᓐᓇᒧᑦ ᐅᓪᓗᖓ ᖃᔅᓯᐊᕐᔪᖕᓂ ᐱᓇᓱᐊᕈᓯᕐᓂᐊᓕᖅᑎᓪᓗᒍ ᓂᕈᐊᓚᐅᖅᑎᓪᓗᒋᑦ, ᓄᖅᑲᓚᐅᑲᒃᑕ ᕿᓚᒻᒥᐅᓂᖅᓴᒥ ᐊᒻᒪ ᐃᖅᑲᐅᒪᓗᑕ ᐃᓚᖏᓐᓂ ᐊᒥᓱᓂ ᑐᙵᓇᕐᓂᐅᔪᓂ ᖃᓄᐃᓕᐅᕐᓂᐅᔪᓂ ᓴᖅᑭᑦᑐᖃᓲᖑᕗᖅ ᑭᒃᑯᑐᐃᓐᓇᓄᑦ.
ᐱᒋᐊᕐᓂᐊᖅᐳᒍᑦ ᖁᕐᓗᖅᑑᒥ, ᐊᒥᓱᓂ ᖃᑯᖅᑕᓂ ᕿᓚᓗᒐᖅᑕᐅᔪᓂ ᖃᔅᓯᐊᕐᔪᖕᓂ ᐅᓪᓗᓂ ᐋᒍᔅᑎᒥ. ᐱᑎᑦᑎᓂᖃᓚᐅᖅᐳᖅ ᒪᒃᑖᖃᐅᕐᔪᐊᖅᑐᒥ ᑐᓐᓂᖅᓴᖅᑕᐅᔪᓂ ᓄᓇᓕᖕᒥᐅᑕᓄᑦ. ᐃᓚᖏᑦ ᐃᓄᐃᑦ ᐱᓕᕆᒃᑲᓐᓂᓚᐅᖅᐳᑦ ᓇᓗᓇᐃᖅᓯᓂᖏᓐᓂ ᐊᓯᖏᑦ ᐊᑐᐃᓐᓇᖃᕐᓂᖏᓐᓂ ᓂᕿᒃᓴᕆᔭᐅᓂᐊᖅᑐᓄᑦ. ᑕᑯᒃᓴᐅᑎᑦᑎᐊᕙᐅᓚᐅᖅᐳᖅ ᑐᑭᓪᓚᕆᖓᓂ ᓄᓇᓕᖕᒥ.
ᔪᓚᐃᒥ, 8–ᓂ ᐃᓚᐅᒧᓂ ᑲᖏᖅᖠᓂᕐᒥ ᖁᓕᑦᑕᐅᔭᓕᐅᕐᓂᕐᒧᑦ ᐃᓕᓐᓂᐊᕐᓂᐅᔪᒥ ᑐᓂᓯᓚᐅᖅᐳᑦ ᓯᕗᓪᓕᖅᐹᖓᓂ ᓴᓇᐅᒐᖏᓐᓂ ᐃᓕᓐᓂᐊᖅᑎᓄᑦ ᑕᐃᒪᐃᑦᑐᒥ ᐊᑐᕈᓐᓇᕋᔭᖅᑐᓄᑦ. ᐃᓕᑕᖅᓯᓂᖅ ᓄᓇᕗᒻᒥ ᑎᑎᕋᕈᓐᓇᕐᓂᕐᒧᑦ ᐅᖃᓕᒫᕈᓐᓇᕐᓂᕐᒧᓪᓗ ᑲᑎᒪᔨᐅᔪᑦ ᐋᖅᑭᒃᓱᐃᓚᐅᖅᐳᑦ ᐃᓕᓐᓂᐊᕐᓂᐅᔪᒥ ᒪᒃᑯᒃᑐᓄᑦ, ᐱᓕᕆᕙᓪᓕᐊᔪᓂ ᐱᔭᕇᖅᓯᓂᕐᒧᑦ ᐃᑲᕐᕋᓂ 120–ᓂ ᐊᑭᓕᖅᓱᖅᑕᐅᓇᑎᒃ ᐃᑲᔪᕐᓂᕐᒧᑦ ᐅᕘᓇ ᐃᑲᔪᕐᓂᖅ ᒪᒃᑯᒃᑐᓄᑦ ᑲᑎᙵᓂᐅᔪᓄᑦ ᐱᓕᕆᐊᖑᔪᒥ. ᐊᓱᐃᓛᒃ ᒪᕐᕈᖓᓂ ᖁᓕᑦᑕᐅᔭᓕᐅᓚᐅᖅᐳᑦ ᐃᒻᒥᓂᒃ ᐱᒋᓂᐊᖅᑕᖓᓂ. ᐃᓱᒪᒋᔭᖃᑦᑎᐊᕐᓂᕐᒥ ᐱᓕᕆᓂᐅᕗᖅ.
ᐊᔾᔨᐸᓗᐊᓂ ᐱᓕᕆᓂᐅᔪᒥ, ᐃᓕᓐᓂᐊᕐᓂᕐᒧᑦ ᐊᕐᕌᒍᖓ ᐱᒋᐊᖅᑎᓪᓗᒍ, ᐃᓕᓐᓂᐊᖅᑏᑦ ᖃᔅᓯᒐᓚᖕᓂ ᓄᓇᕗᒻᒥ ᓄᓇᓕᐅᔪᓂ ᑐᓂᔭᐅᓂᐊᖅᐳᑦ ᐃᓕᓐᓂᐊᕐᕕᖕᒧᑦ ᓱᓇᒃᑯᑖᓂ ᐃᓚᒋᔭᐅᔪᒥ ᐅᑭᐅᖅᑕᖅᑐᒥ ᑲᓇᑕᒥ ᐱᓕᕆᐊᒃᓴᕋᓛᖑᔪᓂ. ᐅᓇ ᑲᑐᔾᔨᖃᑎᒌᖑᔪᖅ, ᓴᖅᑭᑕᐅᔪᒥ ᓯᓐᑎ ᑎᓕᓐᒧᑦ ᑳᒻᓘᑉᔅ, B.C.–ᒥ, ᐃᑲᔪᕐᓂᖃᓲᖑᕗᑦ ᐅᑭᐅᖅᑕᖅᑐᕐᒥᐅᓄᑦ ᐊᔾᔨᒌᙱᕈᓘᔭᖅᑐᓂ ᐊᓯᐊᒎᖅᑐᓂ ᖃᓄᐃᓕᐅᕐᓂᐅᔪᓄᑦ ᐊᕐᕌᒍᒥ ᐊᕐᕌᒍᒧᑦ. ᐱᔾᔪᑎᖓ ᑕᐃᒪᐃᑉᐸᖕᓂᖓᓂ ᐊᔪᕐᓇᙱᑦᑑᕗᖅ: ᓇᒡᓕᒍᓱᖕᒪᑕ ᐊᒃᓱᕈᕈᑕᐅᕙᒃᑐᓂ ᐅᑭᐅᖅᑕᖅᑐᕐᒥᐅᑕᓂ ᓵᙵᔭᐅᓲᓂᑦ ᖃᔅᓯᐊᕐᔪᑯᓗᖕᓂ ᓂᕈᐊᒐᒃᓴᖃᖅᖢᑎᒃ ᐊᒻᒪ ᐊᑭᑐᔫᑎᐊᓘᓪᓗᑎᒃ. ᑕᐃᒫᒃ, ᐅᑯᐊ ᐱᑎᑦᑎᕐᔪᐊᓲᑦ ᐃᓄᐃᑦ ᑲᑎᖅᓱᖅᑕᒥᓂ ᑮᓇᐅᔭᖏᓐᓂ ᐲᖅᓯᓲᖑᕗᑦ ᐊᒻᒪ ᓇᒃᓯᐅᔾᔨᓪᓗᑎᒃ ᑐᓐᓂᖅᑯᓯᐊᒃᓴᓂ ᖃᓄᐃᑦᑐᑐᐃᓐᓇᑦᑎᐊᓂ, ᐃᓚᖃᖅᑐᒥ ᓇᖕᒪᒐᕐᓂ, ᐅᖃᓕᒫᒐᕐᓂ, ᑎᑎᕋᐅᑎᓂᒃ ᐊᒻᒪ ᐋᖅᑭᒃᓱᒐᕐᓂ. ᐃᓚᓗᒍ ᑕᐃᔅᓱᒧᖓ ᐅᓇᑕᖅᑐᒃᓴᑦ ᑲᓇᑕᒥ ᑕᕆᐅᕐᒥ ᐅᓇᑕᖅᑐᒃᓴᑦ ᓴᖅᑭᑦᑐᓂ ᐃᖃᓗᖕᓄᑦ ᑕᖅᑭᐅᑉ ᓄᙳᐊᓂ ᐃᓕᓐᓂᐊᕐᕕᖕᒧᑦ ᓱᓇᒃᑯᑖᖃᖅᖢᑎᒃ ᐊᒻᒪ ᓇᖕᒪᒐᕐᓂ ᑐᓂᔭᐅᓯᒪᔪᓂ ᕼᐋᓕᕚᒃᔅᒥ. ᐅᐊᑲᓪᓚᖔ!
ᐊᐅᔭᐅᑉ ᓄᙳᐊᓂ ᓇᓗᓇᐃᖅᓯᒋᕗᖅ ᑭᖑᓪᓕᖅᐹᖑᔪᓂ ᐅᓪᓗᓂ ᐊᐅᔭᒃᑯᑦ ᑕᖕᒫᕐᓂᐅᔪᓄᑦ, ᓲᕐᓗ ᑲᒪᓇᕐᔪᐊᖅᑐᒥ ᓂᔾᔮᑎᑦᑎᓂᕐᒧᑦ ᑕᖕᒫᕐᕕᒃ ᓄᓇᕘᑉ ᐊᖓᔪᖅᑳᖃᕐᕕᖓᓂ, ᐃᖃᓗᖕᓂ ᓂᔾᔮᑎᑦᑎᓂᕐᒧᑦ ᑲᑐᔾᔨᖃᑎᒌᖑᔪᑦ ᑲᒪᒋᓯᒪᔭᖓᓂ ᑲᒪᓇᖅᑐᓂ ᐊᕐᕌᒍᓄᑦ 26–ᓄᑦ. ᐱᔪᓐᓇᖅᑎᑦᑎᓯᒪᕗᖅ 80–ᓂ ᒪᒃᑯᒃᑐᓂ ᐱᒋᐊᖅᑎᑕᐅᓂᖏᓐᓂ ᐋᒍᔅᑎᒥ ᐱᖅᑯᓯᑐᖃᖅᑎᒍᑦ ᐃᓄᖕᓄᑦ ᐊᒻᒪᓗ ᖃᓪᓗᓈᑦ ᓄᓇᖓᓐᓂ ᓂᔾᔮᑎᑦᑎᓂᐅᔪᒥ ᕿᓚᐅᔾᔭᕐᓂᕐᒧᑦ, ᑲᑕᔾᔭᕐᓂᕐᒧᑦ ᐊᒻᒪᓗ ᐊᒋᐊᒐᕐᒥ ᐱᙳᐊᕐᓂᕐᒧᑦ, ᑎᑕᐅᑎᒥᒃ ᐊᒻᒪ ᔫᑲᓚᐃᓕᒥ.
ᐱᑕᖃᓚᐅᕆᕗᖅ ᖁᕕᐊᑦᑕᒋᑦ ᐊᐅᔭᒃᑯᑦ ᐅᓪᓗᒃᑯᑦ ᑕᖕᒫᕐᕕᖕᒥ ᐱᓕᕆᐊᖑᔪᒥ, ᐊᐅᓚᑕᐅᔪᒥ ᐱᙳᐊᖅᑐᓕᕆᓂᕐᒧᑦ ᒥᕐᙳᐃᖅᓯᕐᕕᓄᓪᓗ ᑲᑐᔾᔨᖃᑎᒌᖑᔪᓄᑦ ᓄᓇᕗᒻᒥ, ᔪᓚᐃᒥ ᐊᒻᒪ ᐋᒍᔅᑎᒥ ᐊᔾᔨᒌᙱᕈᓘᔭᖅᑐᓂ ᓄᓇᓕᐅᔪᓂ. ᒪᒃᑯᒃᑐᑦ ᐃᓚᐅᖃᑕᐅᔪᑦ ᐃᓚᐅᑐᐃᓐᓇᓚᐅᙱᓚᑦ ᐱᙳᐊᕐᓂᕐᓄᑦ ᖃᓄᐃᓕᐅᕐᓂᐅᔪᓂ, ᑭᓯᐊᓂᑦᑕᐅᖅ ᐃᓄᐃᑦ ᐱᙳᐊᕈᓯᖏᓐᓂ, ᑭᓱᑐᐃᓐᓇᓂ ᕿᓂᖅᓴᕐᓂᐅᔪᓂ ᐊᒻᒪ ᐹᐱᑭᐅᖅᑎᓪᓗᑎᒃ.
ᑭᙵᕐᓂ, ᑯᕆᔅ ᐳᓪᓚᑦ ᐊᖓᔪᒃᖠᖅ ᐃᒻᒥᓂᒃ ᐋᖅᑭᒃᓱᐃᓚᐅᖅᐳᖅ ᐅᓪᓘᔪᒥ ᐅᒥᐊᖅᑐᕐᓂᕐᒥ, ᐃᖃᓪᓕᐊᕐᓂᕐᒥ ᐊᒻᒪ ᓇᑦᑎᕋᓱᖕᓂᕐᒥ 20–ᓄᑦ ᒪᒃᑯᒃᑐᓄᑦ ᔪᓚᐃ 30–ᒥ ᐊᒻᒪ 31–ᒥ.
“ᒪᒃᑯᒃᑐᖁᑎᕗᑦ ᐊᐅᓪᓛᖅᓯᒪᒃᑲᓐᓂᕆᐊᖃᖅᐳᑦ ᑲᔾᔮᕐᓇᖅᑐᐊᓗᖕᒥ ᓄᓇᑦᑎᓐᓂ ᐊᒻᒪ ᑕᕆᐅᕐᒥ. ᐊᒥᓱᓗᐊᑦ ᓄᓇᕗᒻᒥ ᐱᔭᒃᓴᖃᖃᑦᑕᙱᓚᑦ, ᐱᙳᐊᕐᓂᖃᙱᓗᐊᖅᖢᓂ ᐊᖑᓇᓱᖕᓂᖃᙱᓗᐊᖅᖢᓂ ᓄᓇᓕᑦᑎᓐᓂ,” ᐅᖃᓚᐅᖅᐳᖅ ᐳᓪᓚᑦ ᐊᖓᔪᒃᖠᖅ.
ᑖᓐᓇ ᐊᐅᓪᓛᕐᓂᐅᔪᖅ ᐱᔪᓐᓇᖅᑎᓚᐅᖅᐸᖓ ᑮᓇᐅᔭᖃᖅᑎᑕᐅᓪᓗᓂ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᓐᓂ. ᑕᒪᓐᓇ ᐱᐅᔪᐊᓘᓪᓗᓂ ᐱᒋᐊᕈᑕᐅᕗᖅ.
ᐅᐱᒍᓱᒍᒪᒋᕗᒍᑦ ᐃᓅᓪᓗᑎᒃ ᓇᖕᒥᓂᖃᖅᑎᐅᔪᓂ ᐊᕐᓇᓂ ᑎᑭᐅᑎᐊᓂᒃᓯᒪᔪᓂ ᑭᖑᓪᓕᖅᐹᖅᓯᐅᑎᐅᖃᑕᐅᔪᓂ ᐊᕐᕌᒍᑕᒫᒥ Pow Wow ᐱᓕᕆᓂᐅᔪᒥ ᓇᖕᒥᓂᖃᕐᓂᕐᒧᑦ ᓵᓚᖃᕋᓱᐊᕐᓂᐅᔪᒥ. ᐃᒪᓕ ᔪᐊᓇᓯ, ᓇᑖᓴ ᐊᓚᒃᑲᕆᐊᓪᓚᒃ, ᐳᓃᔅ ᑲᓛᒃ, ᓂᑰᓪ ᑳᒻᐸᐅ ᐊᒻᒪ ᓰᓚ ᕙᓚᕈᑎ ᐱᓇᓱᐊᖅᑐᐃᓐᓇᐅᕗᑦ $25,000 ᐊᖏᓛᖓᓂ ᓵᓚᖃᕋᓱᐊᕐᓂᐅᔪᒥ, ᑭᓯᐊᓂ ᓵᓚᒃᓴᖅᑎᐅᕌᓂᒃᑐᑦ, ᐱᔪᓐᓇᕋᓱᒋᔭᐅᙱᑦᑐᓂ ᐱᔪᓐᓇᕐᓂᖏᓐᓂ ᓴᖅᑭᑎᑦᑎᓂᕐᒧᑦ ᐱᓕᕆᑦᑎᐊᕈᓐᓇᖅᑐᓂ ᓇᖕᒥᓂᖃᕐᓂᕐᒥ.
ᑕᐃᒫᒃ, ᐄ, ᒐᕙᒪᑐᖃᒃᑯᓐᓂ ᑲᑎᒪᔨᕐᔪᐊᖑᔪᓂ ᐱᓕᕆᒃᑲᓐᓂᖁᕙᕗᑦ ᐃᓅᓯᑦᑎᓐᓂ ᐱᐅᓯᒋᐊᖅᑎᑦᑎᒃᑲᓐᓂᕐᓂᕐᒧᑦ ᓄᓇᕗᒻᒥᐅᓂ, ᑭᓯᐊᓂ ᖁᔭᓕᕗᒍᑦ ᐃᓄᖕᓄᑦ ᑕᒫᓃᑦᑐᓂ ᐱᓕᕆᕐᔪᐊᕌᓂᒃᓯᒪᔪᓂ.