ᐅᑭᐅᖅᑕᖅᑐᒥ ᑐᓴᒐᒃᓴᓕᕆᔨᒃᑯᑦ
ᐊᖑᓇᓱᒃᑐᓕᕆᔨᒃᑯᑦ ᒥᑭᒋᐊᕐᓂᐊᖅᑎᓪᓗ ᑲᑐᔾᔨᖃᑎᒌᖑᔪᑦ ᓄᓇᕗᓕᒫᒥ ᑐᓂᓯᖃᑦᑕᖅᓯᒪᕗᑦ ᓂᕿᓂᑦ ᐃᓚᒌᖑᔪᓄᑦ ᐱᔭᕆᐊᓕᖕᓂ ᐱᖅᑯᓯᑐᖃᖅᑎᒍᑦ ᓂᕿᑦᑎᐊᕙᖕᓂ ᐊᒥᓱᓄᑦ ᐊᕐᕌᒍᓄᑦ ᑕᑯᒃᓴᐅᑎᑕᐅᓂᖓᓂ ᕇᑕ ᐱᒐᓛᑉ ᑎᑎᕋᐅᓯᕆᓚᐅᖅᑕᖓᓂ ᐱᓇᓱᐊᕈᓯᐅᓚᐅᖅᑐᒥ ("ᓂᕿᑦᑎᐊᕙᖕᓄᑦ ᐱᓕᕆᐊᖑᔪᖅ ᐃᑲᔪᖅᐳᖅ ᓂᕆᑎᑦᑎᓂᕐᒥ ᐃᓄᖕᓂ ᖁᕐᓗᖅᑑᒥ," ᐅᑭᐅᖅᑕᖅᑐᒥ ᑐᓴᒐᒃᓴᓕᕆᔨᒃᑯᑦ ᕕᕈᐊᕆ 24).
ᐅᓄᕐᓂᖅᓴᐅᔪᓂ 100–ᓂ ᐃᓚᒌᖑᔪᑦ ᐊᑐᓲᖑᕗᑦ ᐆᒥᖓ ᐱᔨᑦᑎᕋᕐᓂᐅᔪᒥ ᐊᕐᕌᒍᑕᒫᒥ ᐊᒻᒪ ᖁᔭᒋᔭᐅᕐᔪᐊᖅᐳᖅ ᓄᓇᓕᖕᒥᐅᑕᐅᔪᓄᑦ, ᐃᓚᖃᖅᑐᒥ ᐃᓄᑐᖃᕐᓂ.
ᐅᓇ ᐱᐅᓂᐅᔪᒥ ᐅᓂᒃᑳᓕᐊᖅ ᓄᐃᕗᖅ ᐊᕐᕌᒍᒐᓵᓗᖕᓂ ᖁᐊᖅᓵᕐᓇᖅᑐᓂ ᓂᕿᒃᓴᖃᑦᑎᐊᙱᓐᓂᖅ ᐅᓄᕐᓂᐅᔪᓄᑦ ᓄᓇᕗᒻᒥᐅᓄᑦ. ᑭᓯᐊᓂ ᓇᐃᓴᖅᑕᐅᓯᒪᓂᐅᔪᑦ ᐊᖏᐸᓗᒃᑐᒥ ᐱᐅᓯᕙᓪᓕᐊᑎᓪᓗᒍ – ᒥᒃᖠᒋᐊᕐᓂᐅᔪᒥ 12 ᐳᓴᓐᑎᒥ ᒫᓐᓇᓕᓴᓂ ᐊᕐᕌᒍᓂ ᐃᓄᖕᓄᑦ ᐊᑐᖅᑐᓂ ᓂᕿᒃᓴᖃᑦᑎᐊᙱᓐᓂᐅᔪᒥ – ᐅᓄᕐᓂᐅᔪᑦ ᓱᓕ ᐅᐊᑲᓪᓚᐅᕗᑦ.
57 ᐳᓴᓐᑎᐸᓗᖕᒥ ᐃᒡᓗᖃᖅᑎᐅᔪᓄᑦ ᓄᓇᕗᒻᒥ ᓱᓕ ᐊᑐᓲᖑᕗᑦ ᓂᕿᒃᓴᖃᑦᑎᐊᙱᓐᓂᐅᔪᒥ ᖃᓄᑐᐃᓐᓇᒃᑯᑦ, ᓴᓂᓕᒥᐅᑕᖏᑦ ᓄᓇᑦᓯᐊᖅ ᐃᒃᓯᕚᖅᑎᓪᓗᒍ 22 ᐳᓴᓐᑎᒥ ᐊᒻᒪ ᐊᒥᐊᒃᑯᖓ ᑲᓇᑕᒥ 13 ᐳᓴᓐᑎᒥ ("ᓄᑖᑦ ᓇᐃᓴᖅᑕᐅᓯᒪᓂᐅᔪᓂ ᑕᑯᒃᓴᐅᑎᑦᑎᕗᑦ ᐊᖏᐸᓗᒃᑐᒥ ᐃᖏᕐᕋᓂᖃᖅᑐᒥ ᓄᖅᑲᖅᑎᑦᑎᓂᕐᒧᑦ ᑳᖕᓂᐅᔪᒥ ᓄᓇᕗᒻᒥ," ᐅᑭᐅᖅᑕᖅᑐᒥ ᑐᓴᒐᒃᓴᓕᕆᔨᒃᑯᑦ ᕕᕈᐊᕆ 24).
ᒐᕙᒪᑐᖃᒃᑯᑦ ᐱᓕᕆᓂᖃᖅᑎᑦᑎᓂᕋᐃᕗᑦ ᐆᒥᖓ ᒥᒃᖠᒋᐊᕐᓂᐅᔪᒥ ᒫᓐᓇᐅᔪᒥ ᐱᐅᓯᒋᐊᕐᓂᐅᔪᓂ ᓂᕿᑦᑎᐊᕙᓕᕆᓂᕐᒧᑦ ᐅᑭᐅᖅᑕᖅᑐᒥ ᐱᓕᕆᐊᖑᔪᒥ, ᕼᐋᐸᒧᑦ-ᐊᕐᕌᒍᖏᓐᓂ ᐃᑲᔫᓯᖅᑕᐅᕙᒃᑐᓄᑦ ᐱᓕᕆᐊᖑᔪᒥ ᑐᕌᖓᓂᖃᖅᑐᒥ ᐊᖏᒡᓕᒋᐊᖅᓯᓂᕐᒥ ᓂᕿᑦᑎᐊᕙᐅᓂᖅᓴᓂ ᐊᑐᐃᓐᓇᐅᔪᓄᑦ ᐅᖓᓯᒃᑐᓂ ᓄᓇᓕᐅᔪᓄᑦ ᐊᑭᒃᖠᒋᐊᖅᑕᐅᔪᒥ ᐊᑭᐅᔪᓂ. ᐱᓕᕆᐊᖑᔪᖅ ᑕᑯᓯᒪᕗᖅ ᐊᖏᒡᓕᒋᐊᖅᑕᐅᔪᒥ ᐊᖏᓂᐅᔪᓂ ᓂᕿᓂᑦ ᑎᑭᑎᑕᐅᔪᓄᑦ ᐅᑭᐅᖅᑕᖅᑐᒧᑦ ᓕᐳᕈᒃᑯᑎᒍᑦ.
ᓄᑖᓂ ᐃᑲᔫᓯᖅᑕᐅᕙᒃᑐᓄᑦ ᐊᖑᓇᓱᒃᑎᓄᑦ ᐅᖃᐅᓯᐅᓯᒪᒋᕗᖅ ᒐᕙᒪᑐᖃᒃᑯᓐᓂ, ᐊᑐᐃᓐᓇᐅᑎᑕᐅᔪᒥ ᓄᓇᕗᒻᒥ ᑐᙵᕕᒃᑯᓐᓄᑦ, ᐊᑐᐃᓐᓇᐅᓕᕐᓂᐊᖅᑐᒥ ᐅᐱᕐᙶᖑᓂᐊᖅᑐᒥ.
ᐅᓇ ᐅᖃᐅᓯᒃᓴᖅᑖᕆᔭᐅᓵᖅᑐᒥ ᑐᓴᖅᑎᑦᑎᓂᐊᖅᐳᖅ ᓯᐅᑎᓂᑦ ᓄᓇᕗᒻᒥᐅᓂᑦ, ᑭᓯᐊᓂ ᓇᓗᓇᖅᐳᖅ ᓇᓚᐅᑦᑖᕆᓂᕐᒥ ᖃᓄᑎᒋ ᐊᒃᑐᐃᓂᐅᔪᖅ ᐃᒃᐱᒋᔭᐅᓂᐊᕐᓂᖓᓂ.
ᐃᒻᒥᒃᑰᖅᑐᓂ ᐊᖑᓇᓱᒃᑎᓄᑦ ᐊᒻᒪ ᓄᓇᓕᖕᓂ ᑲᑎᙵᓂᐅᔪᓂ ᓲᕐᓗ ᖁᕐᓗᖅᑑᒥ ᐊᖑᓇᓱᒃᑐᓕᕆᔨᒃᑯᑦ ᒥᑭᒋᐊᕐᓂᐊᖅᑎᓪᓗ ᑲᑐᔾᔨᖃᑎᒌᖑᔪᑦ ᐊᔭᐅᕆᔭᐅᓪᓗᐊᖅᐳᑦ ᐊᒻᒪ ᐃᑲᔪᖅᓯᖅᑕᐅᓗᑎᒃ. ᐱᔨᑦᑎᕋᓲᖑᕗᑦ ᐱᒻᒪᕆᐅᔪᒥ ᐃᓚᖓᓐᓂ ᐋᖅᑭᒃᓱᐃᓂᕐᒧᑦ ᐃᓚᐃᓐᓇᖓᓂᐅᒐᓗᐊᖅ ᓂᕿᒃᓴᖃᑦᑎᐊᙱᓐᓂᐅᔪᒥ ᐊᑲᐅᙱᓕᐅᕈᑕᐅᔪᓂ ᓄᓇᕗᒻᒥ.
ᑲᑎᓪᓗᒍ $30,000–ᓂ ᐊᕐᕌᒍᑕᒫᒥ – ᖁᕐᓗᖅᑑᒥ ᐊᖑᓇᓱᒃᑎᐅᔪᑦ ᐱᕙᖕᓂᖏᓐᓂ – ᐃᑲᔪᕐᓂᕐᒧᑦ ᐃᑲᔪᖅᓯᖅᑕᐅᓂᖏᓐᓄᑦ ᐊᖑᓇᓱᖕᓂᐅᔪᓂ ᐊᒻᒪ ᑐᓐᓂᖅᓴᐃᓂᕐᒧᑦ ᓂᕿᓂᑦ ᑮᓇᐅᔭᕐᔪᐊᖑᙱᓚᑦ ᑕᐅᑐᒃᖢᒍ ᐱᔭᕆᐊᖃᕐᓂᐅᔪᓂ ᓄᓇᓕᖕᓂ. ᑕᐃᒪᐃᒐᔪᒃᑐᒥ ᑲᑎᒪᔨᐅᔪᖅ ᓄᓇᕗᒻᒥ ᒐᕙᒪᒃᑯᓐᓂ ᐅᕝᕙᓘᓐᓃᑦ ᐃᓚᒋᔭᐅᔪᑦ ᒪᓕᒐᓕᐅᖅᑎᓂᑦ ᑮᓇᐅᔾᔭᒃᓴᓲᖑᕙ ᐊᕐᕌᒍᒥ?
ᐃᓄᖕᓄᑦ ᐱᔭᕆᐊᖃᕐᓂᐅᔪᑦ ᐊᓯᔾᔨᖅᓯᒪᙱᓚᖅ, ᑭᓯᐊᓂ ᑐᓂᔭᐅᓯᒪᓂᐅᔪᒥ ᐱᔪᓐᓇᕈᑕᐅᔪᑦ ᑕᐃᒪᐃᓕᐅᕐᓂᕐᒧᑦ ᐊᓯᔾᔨᖅᓯᒪᕗᖅ. ᐃᒻᒪᖄ ᒐᕙᒪᒃᑯᑦ ᐱᓕᕆᓂᖃᕈᓐᓇᖅᐳᑦ ᐊᒻᒪ ᕿᓂᕐᓗᑎᒃ ᐋᖅᑭᒍᑎᒃᓴᓂ ᕿᖓᖏᑕ ᐊᑎᑦᑎᐊᖓᓐᓂ ᐊᒻᒪ ᑮᓇᐅᔭᖃᖅᑎᑦᑎᐊᖅᓯᓗᑎᒃ ᑲᑐᔾᔨᖃᑎᒌᖑᔪᓂ ᐊᒻᒪᓗ ᓄᓇᓕᖕᒥᐅᑕᓂᑦ ᐊᐅᓪᓛᕐᓗᑎᒃ ᐊᒻᒪ ᐊᖑᓇᓱᒋᐊᕐᓗᑎᒃ ᓂᕿᒃᓴᒥᖕᓂᑦ ᓄᓇᒥᑦ. ᐅᓇ ᐱᑎᑦᑎᓂᑐᐃᓐᓇᐅᓪᓗᐊᙱᓚᖅ ᒥᑭᑦᑐᓂ ᑮᓇᐅᔭᓂᑦ ᐊᕕᒃᑐᖅᑕᐅᓂᐊᖅᑐᓄᑦ ᖃᔅᓯᐊᕐᔪᖕᓄᑦ ᐊᒃᓱᕈᖅᑐᓂ ᐱᓕᕆᔪᓂ ᐃᓄᖕᓄᑦ, ᑭᓯᐊᓂ ᓴᖅᑭᑎᑦᑎᓗᓂ ᐃᖅᑲᓇᐃᔮᓂ ᐃᖅᑲᓇᐃᔭᖅᑎᑦᑎᓪᓚᕆᒃᑐᓂ ᐱᖅᑯᓯᑐᖃᖅᑎᒍᑦ ᖃᐅᔨᒪᓂᐅᔪᒥ ᐊᒻᒪ ᐱᓐᓇᕆᔭᐅᔪᓄᑦ ᐃᓄᖕᓂ.
ᑲᑎᒪᔨᕐᔪᐊᖑᔪᓂ ᓲᕐᓗ ᔮᓐ ᒪᐃᓐᑎᑐᑦ ᑕᐃᒪᓐᓇᑦᑎᐊᖅ ᐅᖃᓪᓚᐅᓯᖃᕐᓂᖓᓂ ᓄᓇᕘᑉ ᐱᐅᙱᕐᔪᐊᖅᑐᒥ ᐃᖅᑲᓇᐃᔮᖃᕐᓂᕐᒧᑦ ᐅᓄᕐᓂᐅᔪᓂ, ᐃᓄᖕᓂ ᐊᐅᓪᓛᒃᑲᓐᓂᓕᕐᓗᑎᒃ ᓄᓇᒧᑦ ᐊᖑᓇᓱᖕᓂᕐᒧᑦ ᐊᒻᒪ ᐱᓕᒻᒪᒃᓴᐃᓗᑎᒃ ᓄᑖᓂᑦ ᐊᖑᓇᓱᒃᑎᒃᓴᓂ ᓴᖅᑭᑎᑦᑎᓇᔭᖅᐳᖅ ᖃᔅᓯᒐᓚᖕᓂ ᐃᖅᑲᓇᐃᔮᓂ ᐊᑐᓂ ᓄᓇᓕᐅᔪᓂ.
ᒪᒃᑯᒃᑐᓄᑦ ᐊᖑᓇᓱᒃᑎᓄᑦ ᐱᓕᕆᐊᖑᔪᖅ ᐊᕐᕕᐊᓂ ᒫᓐᓇᐅᔪᒥ ᑕᐃᒪᐃᓕᐅᑦᑎᐊᖅᐳᑦ, ᖁᔭᓐᓇᒦᒃ ᐃᓄᖕᓄᑦ ᓲᕐᓗ ᐅᑭᐅᖅᑕᖅᑐᒥ ᐱᓕᕆᓂᐅᔪᒥ ᒥᓂᔅᑕᖓᓄᑦ ᑖᓐ ᕚᓐᑎᐊᓪᒥ. ᐱᓕᕆᐊᖑᔪᖅ ᐊᑐᐃᓐᓇᖃᖅᑎᑦᑎᕗᖅ ᐊᒥᓱᓂ ᒐᕙᒪᑐᖃᒃᑯᑦ ᑮᓇᐅᔭᖃᖅᑎᑕᐅᓂᖓᓂ ᐋᖅᑭᒃᓱᖅᑕᐅᓯᒪᔪᓄᑦ ᐅᖃᐅᓯᕐᓂ, ᑭᓯᐊᓂ ᐅᑯᐊ ᑕᐃᒪᐃᑦᑑᕗᑦ ᐱᕕᒃᓴᖃᕐᓂᐅᔪᓂ ᓴᓇᔭᐅᔭᕆᐊᖃᖅᑐᓂ ᑕᒪᒃᑭᓄᑦ ᓄᓇᓕᐅᔪᓄᑦ. ᑐᓂᓯᓂᕐᒥ ᓄᓇᕗᒻᒥᐅᓂ ᐊᑐᐃᓐᓇᖃᕐᓂᕐᒥ ᓂᕿᑦᑎᐊᕙᖕᓄᑦ, ᐃᖅᑲᓇᐃᔮᓄᑦ, ᑲᑎᙵᓂᖃᕐᓂᐅᔪᒥ ᐱᖅᑯᓯᑐᖃᖅᑎᒍᑦ ᐊᒻᒪ ᐃᒻᒥᓂᒃ ᐱᒃᑯᒋᓂᕐᒧᑦ ᐊᖏᔫᓗᓂ ᐱᓕᕆᓂᐅᒐᔭᖅᐳᖅ ᐊᑦᑐᖏᖅᓯᓂᐅᔪᒥ ᒫᓐᓇᐅᔪᒥ ᑕᑯᔭᐅᙱᓗᐊᓲᒥᒃ ᑭᓯᐊᓂ ᐱᔭᐅᔭᕆᐊᖃᑦᑎᐊᖅᑐᒥ ᐃᓅᖃᑎᒌᖑᔪᓄᑦ ᐱᔪᓐᓇᕐᓂᕆᔭᐅᔪᓂᑦ.