ᐃᔨᕋᖅᑐᕐᓂᖃᓚᐅᙱᓚᖅ ᐅᕝᕙᓘᓐᓃᑦ ᑲᒪᓇᓚᐅᙱᓚᖅ ᓯᕗᓕᖅᑎ ᔫ ᓴᕕᑲᑖᖅ ᐅᖃᕋᒥ ᐃᒻᒥᒃᑯᑦ–ᐅᐸᒃᑕᐅᑦᑕᐃᓕᒪᓂᖓᓂ ᐃᒡᓗᕋᓛᖓᓂ ᐊᕐᕕᐊᑦ ᖃᓂᒋᔭᖓᓂ, ᓄᓇᕗᒻᒧᑦ ᐅᑎᓚᐅᖅᑎᓪᓗᒍ ᓇᖕᒥᓂᖓᓂ ᖃᖓᑕᓲᖓᓂ.
ᒪᓕᓚᐅᖅᐳᖅ ᑕᒪᒃᑭᑦᑎᐊᓂ ᒪᓕᒐᐅᔪᓂ ᒐᕙᒪᖓᑦ ᐋᖅᑭᒃᓱᓚᐅᖅᑕᖏᓐᓂ ᐊᐅᓪᓛᕐᓂᕐᒧᑦ ᐃᓚᐅᙱᓐᓂᐅᔪᒥ ᑐᙵᕕᖃᖅᑐᒥ ᓇᖕᒥᓂᖅ "ᓇᓗᓇᐃᖅᓯᒪᑦᑎᐊᖅᑐᓂ ᖃᓄᐃᓕᖓᓂᐅᔪᓄᑦ" ᐅᖃᐅᓯᕆᓚᐅᖅᑕᖏᓐᓂ ᕙᐃᔅᐳᒃᑯᑦ ᑎᑎᕋᕐᓂᐅᔪᒥ ᔪᓚᐃ 20–ᒥ.
ᓄᓇᕗᒻᒥᐅᑦ ᓲᖃᐃᒻᒪ ᐊᑲᐅᒃᓴᓗᐊᙱᓚᑦ, ᑕᐃᒪᐃᑦᑐᒪᒍᑎᒃ, ᑭᓯᐊᓂ ᐱᐅᒋᔭᐅᓂᖅᓴᐅᔪᒥ ᐃᓱᒪᒋᔭᐅᓂᐅᔪᒥ ᐋᖅᑭᐅᒪᕗᖅ, ᐃᒻᒥᓂᒃ ᓯᕗᓕᖅᑎ ᐅᖃᓚᐅᕐᓂᖓᓂ, ᐅᐸᒃᑕᐅᑦᑕᐃᓕᒪᓂᖓᓄᑦ ᐸᕐᓇᐅᑎ ᕿᒪᐃᓚᐅᕐᒪᑦ ᒪᑐᐃᖓᓂᐅᔪᒥ ᐃᓂᒃᓴᐅᔪᒥ ᐅᐃᓂᐱᐊᒡᒥ ᑐᔪᕐᒥᕕᐅᔪᒥ ᐊᓯᐊᓄᑦ ᐊᐅᓪᓛᖅᑎᐅᔪᒧᑦ ᐊᒻᒪ ᑮᓇᐅᔭᓂᑦ ᐊᑐᙱᓐᓂᖅᓴᖃᓚᐅᖅᐳᖅ.
ᑕᒪᓐᓇ ᖃᓄᐃᙱᑦᑎᐊᖅᐳᖅ ᐊᒻᒪ ᐱᐅᕗᖅ, ᐱᓗᐊᖅᑐᒥ ᑕᒪᑐᒪᓂ ᐱᓪᓚᕆᐅᔪᒥ ᐱᓕᕆᓂᐅᔪᒥ ᐅᐸᒃᑕᐅᑦᑕᐃᓕᒪᓂᐅᔪᓄᑦ ᑐᔪᕐᒥᕖᑦ ᐱᓪᓚᕆᐅᓪᓗᑎᒃ ᐃᒡᓗᖁᑎᒋᔭᐅᕗᑦ, ᑭᓯᐊᓂ ᐃᒻᒪᖄ ᐱᕚᓪᓕᕈᑕᐅᓇᔭᓚᐅᖅᐳᖅ ᓯᕗᓕᐅᖅᑎᐅᔪᒥ ᓄᓇᕗᒻᒥ ᒐᕙᒪᒃᑯᓐᓂ ᑕᑯᓂᕐᒧᑦ ᓯᕗᓪᓕᖅᐹᒥ ᖃᓄᐃᓕᖓᓂᐅᔪᓄᑦ ᐃᓄᖁᑎᖏᓐᓂ, ᐊᒥᓱᑦ ᐊᒃᑐᖅᑕᐅᓴᕋᐃᓪᓗᑎᒃ, ᐊᑐᕆᐊᖃᖅᑕᖏᓐᓂ?
ᒪᐃᒥ, ᓄᓇᕗᒻᒥ ᑐᓴᒐᒃᓴᓕᕆᔨᒃᑯᑦ ᐅᖃᖃᑎᖃᓚᐅᖅᐳᑦ ᒪᕐᕉᖕᓄᑦ ᓄᓇᕗᒻᒥᐅᓄᑦ ᐅᑎᖅᐸᓪᓕᐊᔪᓂ ᓄᓇᕗᒻᒥ–ᐊᖏᖅᑕᐅᓯᒪᔪᓄᑦ ᑐᔪᕐᒥᕕᐅᔪᓂ ᐅᓂᒃᑳᕆᓚᐅᖅᑐᓂ ᓂᕿᓄᑦ ᐃᔅᓴᒃᓯᒪᓂᐅᔪᓂ, ᑕᑯᒃᓴᐅᔪᓂ ᐊᒡᒐᐅᑉ ᐃᓂᖏᓐᓂ ᓴᓂᕋᕐᒥ ᐊᒻᒪ ᑕᓗᓂᑦ, ᐊᐅᒃ ᐊᒻᒪ ᐊᓯᖏᓐᓂ ᐃᑉᐸᖕᓂᐅᔪᓂ ᐃᒡᓗᕈᓯᕐᓂ. ᓴᓗᒪᙱᑦᑐᐊᓗᖕᓂ, ᑐᙵᓇᙱᑦᑐᐊᓗᖕᓂ, ᐊᒻᒪᓗ ᐃᓚᒋᐊᖅᑐᒥ ᐊᒃᓱᕈᕐᓂᐅᔪᒥ ᐅᖓᓯᒃᑎᓪᓗᒋᑦ ᐊᖏᕐᕋᒥ.
ᓄᓇᕗᒻᒥ ᒐᕙᒪᒃᑯᑦ ᐱᓕᕆᔨᕐᔪᐊᖑᔪᑦ ᐊᐅᓪᓛᖅᐸᒃᑎᓪᓗᒋᑦ ᖃᓪᓗᓈᑦ ᓄᓇᖓᓐᓂ ᑐᔪᕐᒥᕕᐅᔪᓄᑦ ᐱᐅᓯᒋᐊᖅᑎᑦᑎᓇᓱᐊᕐᓂᕐᒧᑦ ᐱᔨᑦᑎᕋᕐᓂᐅᔪᒥ ᑕᐃᒪᙵᓂ, ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒥᓂᔅᑕᖓ ᔪᐊᔾ ᕼᐃᒃᔅ ᒫᓐᓇᓕᓴᒥ ᐅᖃᓪᓚᐅᓯᖃᓚᐅᖅᐳᖅ ᖃᓄᖅ ᐃᓕᖅᑯᓯᖃᕐᕕᐅᓂᐅᔪᑦ ᐃᓚᖏᓐᓄᑦ ᑐᔪᕐᒥᔪᓄᑦ ᐊᒃᑐᐃᓂᖓᓂ ᐃᒡᓗᕈᓯᕐᓂ ᐊᑐᐃᓐᓇᐅᓂᖏᓐᓂ ᐅᐸᒃᑕᐅᑦᑕᐃᓕᒪᓂᐅᔪᓄᑦ ᑐᔪᕐᒥᕕᐅᔪᓄᑦ. ᐃᓄᐃᑦ ᓱᕋᐃᔪᓂ ᐅᐸᒃᑕᐅᑦᑕᐃᓕᒪᓂᖓᓐᓂ ᐱᒋᐊᒃᑲᓐᓂᕆᐊᖃᖅᐳᑦ ᐱᓕᕆᓂᐅᔪᒥ, ᐃᒡᓗᕈᓯᓂ ᐱᓯᒪᐃᓐᓇᕆᐊᖃᖅᖢᑎᒃ ᐊᑐᐃᓐᓇᕈᕋᔭᓚᐅᖅᑐᓂ ᓄᑖᓄᑦ ᑐᔪᕐᒥᓂᐊᓚᐅᖅᑐᓄᑦ.
ᐅᑯᐊ ᐊᑲᐅᙱᓕᐅᕈᑕᐅᔪᑦ ᐊᒻᒪ ᑭᖑᕙᕆᐊᖅᑎᑦᑎᓂᐅᔪᑦ ᑕᐃᒪᐃᓗᐊᕐᓂᖓᓄᑦ ᒪᕐᕈᖓᓂ ᐅᐸᒃᑕᐅᑦᑕᐃᓕᒪᓂᐅᔪᒧᑦ ᑐᔪᕐᒥᕕᖕᒥ ᒪᑐᐃᖅᑐᖃᖅᐳᖅ ᐅᐃᓂᐱᐊᒡᒥ ᐃᓂᒃᓴᖃᖅᑎᑦᑎᓂᕐᒧᑦ ᑭᖑᕙᕆᐊᖅᑎᑕᐅᓂᑯᓄᑦ ᐃᓅᓕᓴᖅᑕᐅᓂᕐᒧᑦ ᐊᐅᓪᓛᕐᓂᕐᒧᑦ ᐅᐸᒋᐊᖃᕐᓂᐅᔪᓄᑦ.
ᒫᔾᔨᒥ ᔫᓂ 12–ᒧᑦ, $5.9 ᒥᓕᐊᓐᓂ ᐊᑐᓚᐅᖅᐳᑦ ᐅᐸᒃᑕᐅᑦᑕᐃᓕᒪᓂᐅᔪᓄᑦ ᑐᔪᕐᒥᕕᐅᔪᓄᑦ. ᑕᒪᓐᓇ ᐅᓄᕐᓂᖓ ᐱᕈᖅᐸᓪᓕᐊᑐᐃᓐᓇᖅᐳᖅ ᓱᓕᒃᑲᓐᓂ ᐱᓇᓱᐊᕈᓯᕐᓄᑦ 6–ᓄᑦ ᑕᐅᓄᖓ, ᐊᒻᒪ ᐃᓚᒋᐊᖅᓯᓂᐅᔪᒥ ᓱᓕᒃᑲᓐᓂᖅ ᑐᔪᕐᒥᕕᐅᔪᒥ ᓄᓇᕗᒻᒥ ᒐᕙᒪᒃᑯᑦ ᐊᑭᓕᒐᒃᓴᖓ ᓱᓕ ᐱᕈᖅᐸᓪᓕᐊᖏᓐᓇᕐᓂᐊᖅᐳᖅ.
ᑕᐃᒪᑐᖅ ᑭᐅᔾᔪᑎᖓ ᐅᑯᓄᖓ "ᐃᓕᖅᑯᓯᖃᕐᕕᖃᕐᓂᐅᔪᒥ ᐊᑲᐅᙱᓕᐅᕈᑕᐅᔪᓄᑦ," ᕼᐃᒃᔅ ᑕᐃᓯᒪᔭᖏᓐᓂ, ᐃᑲᔪᖅᓱᐃᓂᐅᔪᓂ ᐊᑐᐃᓐᓇᐅᑎᑕᐅᓗᓂ ᕿᑭᖅᑖᓗᒃ ᑎᒥᖁᑕᐅᔪᒥ, ᓲᕐᓗ ᐋᖅᑭᒃᓯᓂᐅᔪᒥ ᐊᑲᐅᙱᓕᐅᕈᑕᐅᔪᓂ ᐊᒻᒪ ᑐᓂᓯᓂᕐᒥ ᑐᕌᖅᑎᑕᐅᓂᐅᔪᒥ ᐅᐸᒃᑕᐅᑦᑕᐃᓕᒪᓂᐅᔪᓄᑦ ᑐᔪᕐᒥᔪᓄᑦ ᖃᓄᖅ ᐱᔪᓐᓇᕐᓂᖏᓐᓂ ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᑲᔪᖅᓯᖅᑕᐅᓂᐅᔪᒥ. ᑐᕌᒐᒃᓴᐅᔪᖅ ᐱᖓᓱᓂ ᐃᖅᑲᓇᐃᔭᖅᑎᐅᔪᓂ ᐱᑕᖃᐃᓐᓇᖅᐸᖕᓂᖓᓂ ᐊᑐᓂ ᑐᔪᕐᒥᕕᐅᔪᓂ ᐊᒻᒪ ᑐᓂᓯᕙᒡᓗᑎᒃ ᐱᔨᑦᑎᕋᕐᓂᐅᔪᒥ ᐃᓄᒃᑎᑐᑦ. ᓄᓇᕗᒻᒥ ᒐᕙᒪᒃᑯᑦ ᑐᕌᒐᖃᕆᕗᑦ ᑐᓂᓯᔪᓐᓇᓛᕐᓂᖏᓐᓂ ᓂᕿᓪᓚᑦᑖᓂ ᐱᖓᓱᐃᖅᓱᕐᓗᒍ ᐱᓇᓱᐊᕈᓯᕐᒥ ᐅᐸᒃᑕᐅᑦᑕᐃᓕᒪᓂᐅᔪᓄᑦ ᑐᔪᕐᒥᕕᖕᓄᑦ.
ᐅᑯᐊ ᐃᓗᐊᖅᓯᔾᔪᑕᐅᔪᑦ ᐃᒃᐱᒍᓱᒃᑎᑦᑎᕚᓪᓕᕐᓂᐊᖅᐳᖅ ᓲᕐᓗ ᐊᖏᕐᕋᖅᓯᒪᓗᓂ, ᑭᓯᐊᓂ ᐊᑲᐅᙱᓕᐅᕈᑕᐅᔪᑦ ᐊᖏᕐᕋᒥ ᐊᖏᓂᖅᓴᒻᒪᕆᐅᕗᑦ. ᑕᒪᕐᒥᑲᓴᑦᑎᐊᑦ ᓄᓇᓕᐅᔪᑦ ᐅᓂᒃᑳᕆᓯᒪᕗᑦ ᐃᓄᓕᒫᓄᑦ ᐃᒡᓗᖁᑕᐅᔪᓂ ᑕᑖᖅᑐᓂ ᐅᖁᖕᓂ, ᐃᒐᓛᖏᑦ ᒪᑐᑦᑎᐊᕈᓐᓇᙱᑦᑐᓄᑦ ᐊᒻᒪ ᐸᖕᒥᐅᓗᐊᕐᓂᕐᒧᑦ.
ᑲᓇᑕᐅᑉ ᒪᓕᒐᓕᐅᖅᑎᖏᓐᓂ ᐃᓚᒋᔭᐅᔪᖅ ᒧᒥᓛᖅ ᖃᖅᑲᖅ ᐸᕐᓇᒃᐸᓪᓕᐊᕗᖅ ᐃᒡᓗᓕᕆᓂᕐᒧᑦ ᐳᓚᕋᕐᓂᐅᔪᒥ ᓄᓇᕗᒻᒥ ᓄᓇᓕᐅᔪᓄᑦ ᖃᐅᔨᓴᕐᓂᕐᒧᑦ ᐃᒡᓘᔪᓂ ᓇᖕᒥᓂᖅ ᐃᔨᒥᓄᑦ ᐊᒻᒪᓗ ᑐᓴᕐᓂᕐᒧᑦ ᐃᓄᖕᓂ ᒪᓂᖅᑲᒥ. ᐳᓚᕋᕐᓂᐊᖅᐳᖅ ᕿᑎᕐᒥᐅᓂ ᐊᒻᒪ ᑭᕙᓪᓕᕐᒥ ᑕᒪᑐᒪᓂ, ᐊᐅᓪᓛᕐᓂᕐᒧᑦ ᐅᓪᓗᖏᓐᓂ ᐋᒍᔅᑎ 10–ᒥ 26–ᒧᑦ.
ᓄᓇᕗᒻᒥ ᒐᕙᒪᒃᑯᑦ, ᓱᒃᑲᐃᑦᑐᒥ, ᑭᐅᕙᓪᓕᐊᓂᖏᓐᓂ ᐊᒥᓱᓄᑦ ᐱᐅᙱᓐᓂᐅᔪᓄᑦ ᓇᓗᓇᐃᖅᑕᐅᔪᓂ ᐅᐸᒃᑕᐅᑦᑕᐃᓕᒪᓂᕐᒧᑦ ᑐᔪᕐᒥᕕᐅᔪᓄᑦ, ᐱᓕᕆᓂᑦᑎᐊᕙᐅᕗᖅ ᓇᖕᒥᓂᖅ ᐊᑐᕐᓂᕐᒧᑦ ᐊᑐᖅᑕᐅᔪᓂ ᓱᓕᓂᐅᔪᓂ ᐃᓄᖕᓄᑦ ᑭᒡᒐᖅᑐᖅᑕᕐᓄᑦ.
ᐃᒻᒪᖄ ᓯᕗᓕᖅᑎ ᐊᒻᒪ ᒥᓂᔅᑕᖏᑦ ᒪᒃᐱᖅᑐᒐᕐᒥ ᐱᓪᓗᐊᖅᐳᑦ ᖃᖅᑲᐅᑉ ᐅᖃᓕᒫᒐᖓᓐᓂ.