ᐃᓯᖅᐳᒍᑦ ᐃᓂᐅᔪᒧᑦ ᓱᓕᓂᕋᐃᓐᓂᐅᔪᑦ ᑲᑕᖕᓂᖏᓐᓂ ᒪᖁᒃᑎᑐᑦ ᕿᓚᒻᒥᐅᓗᐊᖅᑐᒥ ᓄᓇᕗᒻᒥ ᐊᐅᔭᐅᔪᒥ.
ᐱᓇᓱᐊᕈᓯᕐᓂ ᑕᓪᓕᒪᓂ ᒐᕙᒪᑐᖃᒃᑯᓐᓂ ᓂᕈᐊᕐᓂᐅᔪᒥ ᒪᓂᓵᕆᓂᐅᔪᒥ ᐱᒋᐊᓚᐅᖅᐳᖅ ᐋᒍᔅᑎ 15–ᒥ.
ᐱᓇᓱᐊᕈᓯᕐᒥ ᒪᕐᕉᖕᓂᓪᓘᓐᓃᑦ ᓯᕗᓂᐊᓂ ᑲᓇᑕᒥ ᐊᖓᔪᖅᑳᕐᔪᐊᖓ ᔭᔅᑎᓐ ᑐᕉᑑ ᐱᓪᓚᕆᐅᑎᑦᑎᔪᒥ ᑲᓇᑕᐅᑉ ᓂᕈᐊᕐᓂᕐᒧᑦ ᐃᔨᕋᖅᑑᑎᐅᙱᓛᖑᔪᒥ – ᐅᑭᐊᒃᓵᒥ ᓂᕈᐊᕐᓂᐅᔪᒥ – ᑮᓇᐅᔭᓂ ᐊᑐᖅᑕᐅᓂᖓᓂ ᐊᖏᕈᑕᐅᓯᒪᔪᓂ ᐊᐅᓚᑦᑎᔨᐅᔪᒥ ᑲᑎᒪᔨᐅᔪᓄᑦ ᑲᒪᓇᕐᔪᐊᓚᐅᖅᐳᑦ. ᖃᐅᑕᒫᖑᖅᑰᔨᔪᒥ ᑐᓴᒐᒃᓴᓕᐅᕐᓂᖃᓚᐅᖅᐳᖅ, ᐃᓛᓐᓂᒃᑯᑦ ᖃᔅᓯᒐᓚᐅᔪᓂ, ᑐᑦᑐᓂ ᓄᓇᕗᒻᒥ ᑐᓴᒐᒃᓴᓕᕆᔨᒃᑯᓐᓄᑦ ᖃᕋᓴᐅᔭᑎᒍᑦ ᑎᑎᕋᕐᕕᖓᓄᑦ.
ᐃᓚᒋᔭᐅᔪᒥ ᐅᖃᐅᓯᒃᓴᓕᐅᕐᓂᖃᓚᐅᖅᐳᖅ ᐱᔾᔪᑎᖃᖅᑐᓂ ᐃᓕᑦᑎᓵᓕᓂᐅᔪᓄᑦ ᐊᒻᒪ ᓱᕈᓯᕐᓄᑦ ᐸᐃᕆᕝᕕᖕᓂ ᐃᑲᔪᖅᓱᐃᓂᐅᔪᓂ, ᐃᒡᓗᒃᓴᖃᖅᑎᑦᑎᓂᕐᒥ ᐊᒻᒪ ᐊᓯᖏᓐᓂ ᓄᓇᓖᑦ ᐊᑐᖅᐸᒃᑕᖏᓐᓂ ᐊᐅᓚᔪᓐᓇᖁᓪᓗᒋᑦ ᐊᒻᒪᓗ ᓄᓇᕗᒻᒥ ᒪᒥᓴᕐᕕᖕᒥ ᑕᐃᒃᑯᓄᖓ ᐊᑐᖅᓯᒪᔪᓄᑦ ᐱᓂᕐᓗᒃᑕᐅᓂᖓᓂ ᐊᒻᒪ ᐅᐃᕆᓯᒪᓂᐅᔪᓄᑦ.
ᐊᒥᓱᐊᓗᖕᓂ ᓱᓕᓂᕋᕐᓂᐅᔪᓂ ᓇᒃᓴᕈᓐᓇᖅᐳᖅ ᖃᔅᓯᐊᕐᔪᖕᓂ ᖃᓄᐃᓐᓂᐅᔪᓄᑦ: ᐋᑐᕚ ᓇᒡᓕᒍᓱᑦᑎᐊᖅᐳᖅ ᓄᓇᕗᒻᒥ ᐊᒻᒪᓗ ᑕᑯᒃᓴᐅᕗᖅ, ᐅᕝᕙᓘᓐᓃᑦ ᐃᒻᒥᖕᓂ ᐃᓱᒪᒋᓂᐅᓂᐅᔪᒥ ᐊᒥᓱᐊᓗᐃᑦ ᓱᓕᓂᕋᕈᑎᑦ ᓴᖅᑭᓲᖑᖕᒪᑕ ᓂᕈᐊᕐᓂᖃᕐᓂᐊᓕᕌᖓᑦ ᓂᕈᐊᖅᑕᐅᒃᑲᓐᓂᕈᒪᓂᖏᓐᓂ ᓂᕈᐊᒐᒃᓴᐅᔪᓂ ᐱᔭᕆᐊᓕᖕᓂ ᓴᖑᑎᑦᑎᓂᕐᒥ ᓱᓕᓂᕋᕈᑎᓂ ᐱᓪᓚᕆᙳᖅᑎᑕᐅᓂᖓᓄᑦ – ᐃᓱᒪᓂᐅᔪᒥ, ᐊᒃᓱᓪᓘᓐᓃᑦ.
ᓄᓇᕗᒻᒥᐅᑦ ᐱᖓᓱᓂ ᓂᕈᐊᒐᒃᓴᖃᖅᐳᑦ ᐱᓇᓱᐊᖅᑐᓂ ᓄᓇᕗᒻᒥ ᓄᑖᖑᓗᓂ ᐃᓚᒋᔭᐅᓂᖓᓂ ᑲᓇᑕᐅᑉ ᒪᓕᒐᓕᐅᖅᑎᖏᓐᓂ, ᑕᐃᒫᒃ ᓈᒻᒪᒃᑐᓂ ᓂᕈᐊᕐᓂᖃᕈᓐᓇᖅᐳᑦ. ᐹᑦ ᐊᕐᓇᒃᑲᖅ ᐱᒋᐊᓚᐅᖅᐳᖅ Liberal–ᑯᓐᓄᑦ. ᓗᐊᕆ ᐃᓪᓚᐅᑦ ᑭᒡᒐᖅᑐᐃᓂᐊᖅᐳᖅ New Democratic Party–ᒧᑦ. ᓗᐊᕆ ᒪᑲᓐᓯ ᓂᕈᐊᒐᒃᓴᐅᓂᐊᖅᐳᖅ Conservatives–ᑯᓐᓄᑦ.
Green Party ᐃᓚᒋᔭᐅᖃᑕᐅᙱᓚᖅ ᓱᒃᑲᓴᐅᑎᓂᐅᔪᒥ ᑕᒪᑐᒪᓂ. ᐃᒻᒪᖄ ᐱᔭᕇᓚᐅᕐᓂᖓᓂ 2.2 ᐳᓴᓐᑎᒥ ᓂᕈᐊᕐᓂᐅᔪᒥ 2019–ᒥ ᕿᒪᐃᓗᐊᓚᐅᙱᓚᖅ Greens–ᓂ ᐱᔪᒪᓂᐅᔪᒥ ᐅᑎᕋᓱᐊᕐᓂᕐᒧᑦ.
ᒧᒥᓛᖅ ᖃᖅᑲᖅ ᐱᓇᓱᐊᕈᒪᓚᐅᙱᓚᖅ ᒪᕐᕈᖓᓂ ᐃᓚᒋᔭᐅᓂᐅᔪᒥ. ᐅᖃᓚᐅᖅᐳᖅ ᖃᓄᐃᑦᑑᓂᖓᓂ ᐱᔾᔪᑎᒋᓪᓗᒍ ᐱᕋᔭᐅᑎᑕᐅᓇᓱᒋᓚᐅᖅᐳᖅ ᑲᓇᑕᐅᑉ ᒪᓕᒐᓕᐅᖅᑎᖏᓐᓂ ᒥᐊᓂᖅᓯᔨᓄᑦ ᐊᒻᒪ ᐅᖃᓪᓚᓚᐅᖅᐳᖅ ᐊᑲᐅᒃᓴᙱᓐᓂᖓᓂ ᐅᖃᐅᓯᐅᔪᓂ ᐅᖃᐅᓯᖃᖅᑎᓪᓗᒍ ᑎᑭᑉᐸᓪᓕᐊᓕᖅᑎᓪᓗᒍ ᑐᑭᓕᐊᕐᓂᐅᑉ ᐃᓱᐊᓂ.
“ᐃᓄᐃᑦ ᐅᕙᑦᑐᑦ ᐅᕙᓃᓪᓗᐊᙱᓚᑦ ᒐᕙᒪᑐᖃᒃᑯᓐᓂ ᐱᓕᕆᕝᕕᒡᔪᐊᖑᔪᓂ,” ᐅᖃᓚᐅᖅᐳᖅ ᑲᓇᑕᐅᑉ ᒪᓕᒐᓕᐅᕐᕕᖏᑕ ᑲᑎᒪᕝᕕᒡᔪᐊᖓᓂ ᔫᓂ 15–ᒥ. “ᓱᓕᓂᐅᔪᖅ ᐅᓇ ᐱᓕᕆᕝᕕᒡᔪᐊᖑᔪᓂ ᐊᒻᒪ ᑲᓇᑕ ᓴᖅᑭᑎᑕᐅᓯᒪᕗᑦ ᑐᓄᑦᑎᓐᓂ, ᐱᓂᕐᓗᒡᔪᐊᕐᓂᐅᔪᓂ ᐊᒻᒪ ᐃᓂᖃᑦᑎᐊᙱᑎᑦᑎᓂᐅᔪᒥ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ.”
ᐊᒃᓱᕈᕐᓂᐅᔪᒥ ᐃᖅᑲᓇᐃᔮᖑᔪᒥ ᐅᖁᒪᐃᓚᐅᖅᐳᖅ ᖃᖅᑲᕐᒧᑦ. ᒪᕐᕉᖕᓂ ᐃᓱᒪᒧᑦ ᖃᓄᐃᙱᑦᑎᐊᕐᓂᕐᒧᑦ ᕿᑲᕐᓂᖃᓚᐅᖅᐳᖅ: ᓯᕗᓪᓕᖅ ᐅᒃᑐᐱᕆ 23–ᒥ ᑎᓯᐱᕆᒧᑦ, ᒪᕐᕈᖓ ᖃᔅᓯᐊᕐᔪᖕᓄᑦ ᐱᓇᓱᐊᕈᓯᕐᓄᑦ ᐊᐃᑉᕆᓕᒥ ᐊᒻᒪ ᒪᐃᒥ.
ᐊᓂᕙᓪᓕᐊᕗᖅ ᑐᒡᒑᕆᔭᖃᖅᖢᓂ, ᑭᓯᐊᓂ. ᐃᒻᒥᓂᒃ ᐊᒻᒪ NDP ᐃᓚᒋᔭᐅᖃᑎᖓ ᑲᓇᑕᒥ ᒪᓕᒐᓕᐅᖅᑎᖏᓐᓂ ᓵᓕ ᐋᙱᔅ ᖁᑦᑎᒃᑐᒥ–ᑕᑯᒃᓴᐅᓂᐅᔪᒥ ᐱᓕᕆᓂᖃᖅᐳᑦ ᐊᓯᐊᒎᖅᑐᒥ ᓴᐳᓐᓂᐊᖅᑎᒥ ᑎᒃᑯᐊᖅᑕᐅᓂᖓᓂ ᖃᐅᔨᓴᕐᓂᕐᒧᑦ “ᐱᕋᔭᖕᓂᐅᔪᓂ ᐃᓅᖃᑎᒌᖑᔪᓄᑦ” ᑲᓇᑕᐅᑉ ᐊᐅᓪᓚᖅᑎᑕᐅᕙᓚᐅᖅᑐᓂ ᐃᓕᓐᓂᐊᕆᐊᖅᑎᑕᐅᔪᓄᑦ ᐃᓕᓐᓂᐊᕐᕕᓄᑦ. ᐃᒃᓯᕋᕐᔪᐊᓂ ᐱᓂᕐᓗᒃᐸᓚᐅᖅᑐᓂ ᓄᓇᖃᖅᑳᖅᓯᒪᔪᓄᑦ ᓱᕈᓯᕐᓄᑦ ᐃᖅᑲᖅᑐᖅᑕᐅᓂᖏᓐᓂ.
ᖃᖅᑲᖅ ᐊᑭᕋᖅᑐᕐᔪᐊᖅᓯᒪᒋᕗᖅ ᒐᕙᒪᑐᖃᒃᑯᓐᓂ ᐱᓕᕆᙱᓗᐊᕐᓂᖏᓐᓂ ᑭᐅᓂᕐᒧᑦ ᓄᓇᕘᑉ ᐃᒡᓗᒃᓴᖃᖅᑎᑦᑎᓂᕐᒧᑦ ᑐᐊᕕᕐᓇᕐᓂᐅᔪᒥ ᐊᒻᒪ ᓄᓇᓖᑦ ᐊᑐᖅᐸᒃᑕᖏᓐᓂ ᐊᐅᓚᔪᓐᓇᖁᓪᓗᒋᑦ ᐊᒥᒐᓗᐊᕐᓂᖓᓂ, ᐊᒻᒪᓗ ᐊᓯᖏᓐᓂ ᐊᑲᐅᙱᓕᐅᕈᑕᐅᔪᓂ.
ᐊᒃᓱᕈᕐᓇᕐᓂᐅᔪᓂ ᑭᒡᒐᖅᑐᐃᓂᕐᒥ ᓄᓇᕗᒻᒥ ᑲᓇᑕᒥ ᑭᒡᓕᐅᔪᒥ ᐱᓂᖃᑐᐃᓐᓇᕆᐊᖃᕆᕗᖅ ᓯᕗᓕᖅᑎᐅᓂᖅ ᐅᖁᒪᐃᑦᑐᖅ ᕼᐊᓐᑐᕐ ᑑᑑᒥᑦᑕᐅᖅ. ᖃᖅᑲᕐᒥ ᓯᕗᓂᐊᓃᓚᐅᖅᐳᖅ ᑲᓇᑕᒥ ᒪᓕᒐᓕᐅᖅᑎᖏᓐᓄᑦ ᐊᒻᒪ ᓴᖅᑭᔮᕐᓂᒦᓕᓚᐅᖅᐳᖅ ᒪᐃ 2016–ᒥ ᐊᒃᓱᕈᕐᓇᕐᓂᐅᔪᒥ, ᓄᖅᑲᓚᐅᖅᐳᖅ Liberal–ᑯᑦ ᒐᕙᒪᑐᖃᒃᑯᓐᓂ ᐃᖃᓗᓕᕆᓂᕐᒧᑦ ᒥᓂᔅᑕᐅᓂᖓᓂ ᐊᒻᒪᓗ ᑭᖑᓂᐊᒍᑦ ᐃᒻᒥᒃᑰᖅᖢᓂ ᐃᓚᒋᔭᐅᓕᓚᐅᖅᐳᖅ ᑲᓇᑕᒥ ᒪᓕᒐᓕᐅᖅᑎᖏᓐᓂ.
ᒪᑐᐃᖓᑦᑎᐊᖅᖢᓂ ᐅᖃᓪᓚᓚᐅᖅᐳᖅ ᐅᐃᕆᓯᒪᓂᖓᓂ ᐃᒥᐊᓗᖕᒧᑦ ᐊᒻᒪᓗ ᖄᖏᐅᑎᓛᕈᒪᓂᖓᓂ. ᑐᓴᒐᒃᓴᓕᐊᖃᕐᔪᐊᓚᐅᕆᕗᖅ ᓈᒻᒪᙱᑦᑐᒥ ᐊᐃᑉᐸᖃᕐᓂᖓᓂ ᐱᓕᕆᐊᕆᓚᐅᕐᓂᖓᓂ ᑲᑎᒪᔨᕐᔪᐊᖑᑎᓪᓗᒍ.
ᓯᕗᓂᐊᓂ, ᓕᐆᓇ ᐊᒡᓘᒃᑲᖅ ᓂᕈᐊᖅᑕᐅᓚᐅᖅᐳᖅ ᒪᕐᕈᐃᖅᓱᖅᑕᐅᓪᓗᓂ. ᐱᔨᑦᑎᕋᓚᐅᖅᐳᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᐊᒻᒪ ᐊᕙᑎᓕᕆᓂᕐᒧᑦ ᒥᓂᔅᑕᐅᓪᓗᓂ ᐅᕘᓇ ᓯᑏᕙᓐ ᕼᐋᕐᐳᕐ Conservatives–ᑯᓐᓄᑦ. ᐅᑎᕋᓱᐊᓚᐅᕋᓗᐊᖅᐳᖅ 2015–ᒥ ᐊᒻᒪ 2019–ᒥ, ᑭᓯᐊᓂ, ᓄᓇᕗᒻᒥᐅᑦ ᐅᖃᓚᐅᖅᐳᑦ, “ᖁᔭᓐᓇᒦᒃ, ᑭᓯᐊᓂ ᐋᒃᑲ.”
Liberal ᐃᓚᒋᔭᐅᔪᒥ ᑲᓇᑕᒥ ᒪᓕᒐᓕᐅᖅᑎᖏᓐᓂ ᓈᓐᓯ ᖃᕆᑕᖅ–ᓕᓐᑎᐅᓪ ᑲᑎᒪᔨᕐᔪᐊᖑᓚᐅᖅᐳᖅ ᓄᓇᕗᑦ ᐃᓕᓴᕆᔭᐅᓕᖅᑎᓪᓗᒍ ᐊᓯᐊᒎᖅᑐᒥ ᐅᑭᐅᖅᑕᖅᑐᒥ ᐊᕕᒃᓯᒪᓂᐅᔪᒥ. ᐱᔨᑦᑎᕋᓚᐅᖅᐳᖅ ᑎᓴᒪᓂ ᑲᑎᒪᔨᐅᓂᕐᒥ 1997–ᒥ 2008–ᒧᑦ. ᓱᖏᐅᓐᓇᙱᑦᑐᒥ, Liberal–ᑯᑦ ᑲᓇᑕᒥ ᒥᓂᔅᑕᐅᖁᔭᐅᔫᓚᐅᙱᓚᖅ, ᐊᓯᐅᔪᒥ ᐱᕕᒃᓴᖃᕐᓂᐅᔮᖅᖢᓂ
ᖃᐅᔨᓂᐊᖅᐳᒍᑦ ᑕᖅᑭᒥ ᐅᓄᙱᓐᓂᖅᓴᐅᔪᒥ ᓇᓕᐊᒃ ᐊᕐᓇᖅ ᑎᒍᒥᐊᕐᓂᐊᕐᓂᖓᓂ ᐃᑲᒪᔪᒥ ᐋᑐᕚᒥ ᒪᓕᒃᑐᒥ. ᐅᖁᒪᐃᖦᖢᓂ ᑲᒪᒋᔭᖃᕐᓂᐅᕗᖅ, ᐊᒻᒪ ᐱᒻᒪᕆᐅᓪᓗᓂ ᓂᕈᐊᕐᓂᐅᕗᖅ ᓄᓇᕗᒻᒥᐅᓂ ᐱᓕᕆᓂᕐᒧᑦ.