ᔮᓐ ᓕᓐᑎᐅ ᐃᖅᑲᐅᒪᑉᓗᒍ ᐊᕐᕕᐊᓂ ᕼᐋᑭᕐᔪᐊᕐᓇᐅᓚᐅᖅᑐᖅ ᖁᕕᐊᒋᓛᕆᓚᐅᖅᐸᕋ ᑭᕙᓪᓕᕐᒥ ᐊᒥᓱᓂ ᐅᑭᐅᓂ ᑭᓯᐊᓂ ᕼᐋᑭᖅᑐᓂ ᒥᐊᓂᖅᓯᔨᐅᔪᓐᓇᓚᐅᕈᓐᓃᖅᐳᖓ.
ᐃᖢᐊᖏᔾᔪᑎᖃᓗᐊᓚᐅᖅᓯᒪᖏᑉᐳᖓ ᕼᐋᑭᖅᑐᓂᒃ ᑲᒪᔨᐅᑉᓗᖓ ᒥᐊᓂᖅᓯᑉᓗᖓ, ᐊᒻᒪ ᓯᑯᒥ ᐱᑎᓪᓗᒋᑦ ᖃᓄᐃᖏᑦᓯᐊᖃᑦᑕᖅᖢᖓ, ᑭᓯᐊᓂ ᓯᑰᖏᑦᑐᒥ ᐃᖢᐃᓪᓕᐅᕈᑎᖃᖅᓯᒪᕗᖓ.
ᐅᖃᖅᑐᖃᓚᐅᖅᐳᖅ ᖃᑉᓯᐅᓂᖏᓐᓄᑦ ᖃᑉᓗᓈᑦ ᕼᐋᑭᖃᑕᐅᔪᓂ ᐊᑐᓂ ᑕᐱᕇᓂ ᑲᒪᔨᒋᔭᖃᕐᓂᕋᖅᑕᐅᑉᓗᖓ ᐃᑲᔪᖅᑐᐃᓂᒻᓂᒃ ᑕᐱᕇᓂᒃ ᑕᒪᓐᓇ ᐃᒡᓚᕐᓇᓚᐅᖅᐳᖅ ᐅᕙᒻᓄᑦ ᐅᖃᐅᓯᕆᔭᐅᑎᓪᓗᒍ ᑕᐃᒪᓐᓇ ᕼᐋᑭᕐᓂᕐᒧᑦ ᐱᓕᕆᐊᖃᖅᑎᓪᓗᑕ, ᐊᒻᒪ ᐅᑉᓗᒥ ᓱᓕ ᑕᒪᓐᓇ ᐃᒡᓚᐅᑎᒋᖃᑕᖅᖢᒍ ᑕᐃᒪᓐᓇᐃᓐᓂᕋᖅᑕᐅᒍᑎᒋᓚᐅᖅᑕᕋ.
ᑕᐃᒪᓐᓇᐃᑦᑐᓂ ᐊᑭᕋᖅᑐᓪᓚᕆᒃᑐᓂᒃ ᖃᓄᐃᒃᓴᖏᓐᓇᖅᐳᖅ.
ᑭᓯᐊᓂ, ᖃᐅᔨᒪᒋᐊᖃᖅᐳᒍᑦ, ᕼᐋᑭᖅᑐᓕᕆᔨᐅᖃᑕᐅᔪᑦ ᒥᐊᓂᖅᓯᔨᑦ ᑭᕙᓪᓕᐅᑉ ᐃᓗᐊᓂ ᐊᒃᓱᕈᖅᓯᒪᖕᒪᑕ ᐊᑯᓂ ᐅᐱᒋᔭᐅᒍᒪᑉᓗᑎᒃ ᐱᓐᖑᐊᖅᑎᓄᑦ ᐊᒻᒪ ᐃᑲᔪᖅᑐᐃᔪᓄᑦ ᑕᒪᐃᓐᓂᑦ, ᐊᒻᒪ ᑕᒪᓐᓇ ᐱᐅᖏᑦᑐᖅ ᒪᓐᓇ ᓯᐊᕐᕆᔮᕋᓱᐊᕐᓂᕐᒧᑦ ᑐᓄᒻᒧᑦ ᑭᕙᓪᓕᕐᒥ.
ᐃᓐᓇᑐᖃᐅᓕᕋᒪ ᑕᐃᒪᓐᓇ ᕼᐋᑭᖅᑐᓂᒃ ᑲᒪᔨᐅᖏᓕᕌᖓᒪ ᐅᑎᕌᖓᒪᓗ ᐱᓕᕆᖏᓐᓂᕐᒥᒃ ᕼᐋᑭᖅᑐᓂᒡᓗ ᐃᑲᔪᖅᑐᐃᒋᐊᓕᖅᖢᖓ ᐱᖃᑦᑕᖅᐳᖓ.
ᖁᕕᐊᒋᓛᕆᓚᐅᖅᓯᒪᔭᕋ ᐱᓐᖑᐊᖅᑎᓪᓗᒋᑦ ᑖᒃᑯᐊ Boston ᐊᒻᒪ Montreal ᐊᒻᒪᓗ Philly ᐊᒻᒪ Toronto 1970-ᓂ ᐊᒻᒪ 1980-ᓂ.
ᑕᐃᒪ, ᖃᓄᐃᒃᓴᖏᑉᐳᖓ ᑭᓇᑐᐃᓐᓇᖅ ᐅᖃᐅᓯᕆᔭᐅᕙᖕᒪᑦ ᑕᒪᒃᑯᐊ ᕼᐊᑭᖅᑐᓕᕆᔨᑦ ᕼᐋᑭᖅᑐᓂᒃ ᒥᐊᓂᖅᓯᔨᖅ ᑕᐸᓱᖃᑦᑕᕐᓂᖏᓐᓄᑦ ᕼᐋᑭᖅᑐᓕᕆᔨᒥᒃ ᐱᓐᖑᐊᖅᑎᓪᓗᒋᑦ.
ᑭᓯᐊᓂᓗ ᐃᖢᐃᓪᓕᐅᕈᑎᖃᓕᕋᔭᖅᖢᖓ ᐱᓗᐊᖅᑐᖃᓕᕐᓂᖅᐸᑦ ᖁᕕᐊᓱᖏᔾᔪᑎᖃᕐᓗᑎᒃ ᕼᐋᑭᖅᑐᓕᕆᔨᐅᔪᒥᒃ.
ᐊᒻᒪ, ᓄᓕᐊᓪᓗ ᐱᓐᓇᓪᓗ ᐊᕐᓇᐃᑦ ᖁᕕᐊᒋᔭᐅᓚᐅᖏᒻᒪᑕ ᖃᓄᐃᓕᐅᓚᐅᕐᓂᖏᓐᓄᑦ ᕼᐋᑭᖅᑐᓂ, ᑕᐃᒪᓐᓇ ᐱᓗᐊᖅᓯᒪᓂᖏᓐᓄᑦ ᖃᐅᔨᒪᔭᐅᓚᐅᕐᒪᑕ.
ᐊᒻᒪ ᑕᒪᒃᑯᐊ ᑎᑎᕋᖃᑦᑕᖅᑐᑦ ᐅᖃᓘᑎᐊᓛᒃᑯᑦ, ᑲᖏᖅᖠᓂᕐᒥ ᕼᐋᑭᖅᑐᓕᕆᔨᑦ ᓯᑯᒦᒋᐊᖃᖏᓐᓂᖏᓐᓄᑦ ᒎᓗᑎᒥᒃ ᐅᔭᒥᒃᑖᕋᓱᐊᖅᑎᓪᓗᒋᑦ ᑲᖏᖅᖠᓂᕐᒥᐅᓪᓗ ᐱᓐᖑᐊᖃᑕᐅᑎᓪᓗᒋᑦ, ᑭᐅᔭᐅᔪᓐᓇᖅᐳᑦ ᐃᒪᓐᓇ: ᓄᓇᑉᓯᖕᓂ ᕼᐋᑭᖅᑐᓕᕆᔨᐅᓂᐊᖅᑐᓂᒃ ᓇᓗᓇᐃᒃᑯᑕᖅᑖᖅᑎᑦᓯᒋᐊᖃᖅᐳᑦ ᑲᖏᖅᖠᓂᕐᒥ ᕼᐋᑭᖅᑐᓕᕆᔨᓂᒃ ᒥᐊᓂᖅᓯᔨᓂᒃ ᐊᐅᓪᓚᖅᑎᑦᓯᖃᑦᑕᕐᓂᐊᖏᒻᒪᑕ ᑕᒪᐃᓐᓄᑦ ᐱᓐᖑᐊᕐᔪᐊᕐᓇᐅᓂᐊᖅᑐᓄᑦ, ᑮᓇᐅᔭᓂᒃ ᐊᑐᕆᐊᖃᖃᑦᑕᕐᓂᐊᖏᒻᒪᑕ ᑎᑭᑎᑦᓯᓗᑎᒃ ᕙᓂᐹᖕᒥᑦ ᑕᒪᒃᑯᓂᖓ.
ᖁᕕᐊᓇᖃᑦᑕᖏᑉᐳᖅ, ᐊᑐᖅᖢᑎᒃ ᐃᖃᐃᓕᓴᕐᓂᕐᒧᑦ ᐱᓐᖑᐊᕈᑎᓂᒃ, ᑕᐃᒪᓐᓇ ᐱᓕᕆᔪᓂᒃ ᐃᖢᐊᖅᓴᖏᒃᑳᖓᑕ ᐱᓐᖑᐊᖅᑐᖃᖅᑎᓪᓗᒍ, ᑕᐃᒪᓐᓇᐃᓚᐅᕐᒪᑦ ᔮᓐ ᓕᓐᑎᐅ ᐃᖅᑲᐅᒪᑉᓗᒍ ᕼᐋᑭᖅᑐᑦ ᑭᖑᓪᓕᖅᐹᖅᓯᐅᓕᖅᑎᓪᓗᒋᑦ ᐊᕐᕕᐊᓂ ᑖᒃᑯᐊ Arctic Connection ᒪᕐᕉᖕᓂᒃ ᐃᑎᖅᑎᑕᒥᓂᒃ ᐊᑐᖏᓐᓂᕋᖅᑕᐅᓚᐅᕐᒪᑦ, ᑐᖏᓕᖓ ᐊᔾᔨᒌᓕᕈᑕᐅᓂᐊᓚᐅᖅᑐᖅ ᐃᑎᖅᑎᑕᐅᔪᓄᑦ ᓴᑲᓐᓂᑐᐃᓐᓇᕐᓂᒃ ᐱᕕᒃᓴᖃᓕᖅᑎᓪᓗᒋᑦ.
ᑭᓯᐊᓂ ᐅᖃᖅᑐᖃᓚᐅᕐᒪᑦ ᑲᖏᖅᖠᓂᕐᒥᐅᑦ ᕼᐋᑭᖅᑐᓕᕆᔨᖓᓂᒃ ᐊᕐᕕᐊᓄᐊᖅᑐᖃᓚᐅᕐᓂᖓᓄᑦ ᔮᓐ ᓕᓐᑎᐅ ᐃᖅᑲᐅᒪᑉᓗᒍ ᕼᐋᑭᕐᔪᐊᖅᑐᓄᑦ ᐱᓂᕐᓗᒍᓐᓇᖁᑉᓗᒍ ᐃᑲᔪᖅᑐᕈᓐᓇᖁᑉᓗᒍ ᑲᖏᖅᖠᓂᕐᒥᐅᓂᒃ ᓵᓚᒃᓴᖁᑉᓗᒋᑦ.
ᑕᒪᒃᑯᐊ ᖃᐅᔨᒪᔪᑦ ᒋᓕᓴᓐ ᐅᒃᐸᕼᐅᐊᒃᑎᑐᑦ ᐅᕙᑉᑎᑐᓪᓗ ᐱᓕᕆᓇᓱᐊᓚᐅᕋᑉᑕ ᑎᑭᑎᑦᓯᒍᒪᑉᓗᑕ ᕙᓂᐹᖕᒥᐅᓂᒃ ᕼᐋᑭᖅᑐᓕᕆᔨᓂᒃ ᐊᕐᕌᒍᒥ ᐊᑐᖅᑐᒥ ᐃᑲᔪᕆᐊᖅᑐᖁᑉᓗᒋᑦ, ᑭᓯᐊᓂ ᑕᐃᒪᓐᓇᐃᓚᐅᖏᒻᒪᑕ ᑎᑭᑎᑦᓯᔪᓐᓇᓚᐅᖏᓐᓇᑉᑕ.
ᑕᐃᒪ, ᐱᓐᖑᐊᕐᔪᐊᕐᓂᐊᖅᐸᑦ ᒥᐊᓂᖅᓯᔨᖃᕐᓗᑎᒃ ᑲᖏᖅᖠᓂᕐᒥᐅᓂᒃ, ᐅᕙᓘᓐᓃᑦ ᑭᖑᕙᕆᐊᖅᑎᑦᓯᓂᐊᖅᐸᑦ ᐅᑕᕿᓗᑎᒃ ᐅᖓᓯᖕᑐᒥᑦ ᕼᐋᑭᖅᑐᓕᕆᔨᑖᕈᑎᒃ ᑭᓯᐊᓂ, ᖃᐅᔨᒪᓗᑎᒃ ᑲᖏᖅᖠᓂᕐᒥᐅᑦ ᕼᐋᑭᖅᑐᓕᕆᔨᖏᑦ ᐱᓕᕆᓯᒪᓂᖏᓐᓄᑦ ᔮᓐ ᓕᓐᑎᐅ ᐃᖅᑲᐅᒪᑉᓗᒍ ᕼᐋᑭᕐᔪᐊᖅᑐᓂᒃ ᐊᕐᕌᒍᑕᒫᑦ ᐅᑭᐅᓂ ᖁᓕᐅᓯᒪᓕᖅᑐᓂ.
ᑕᐃᒪᓐᓇᓗ ᐅᖃᐅᓯᕐᓗᖃᕐᓂᖅ ᐱᐅᖏᑦᑐᓂᒃ ᐅᖃᐅᓯᖃᕐᓗᓂ ᐱᕙᓪᓕᐊᔪᒃᑯᑦ ᐅᖃᓘᑎᐊᓛᒃᑯᑦ ᐊᒻᒪ ᐱᑦᓯᐊᖏᓐᓂᖅ ᐃᓄᖕᓂᒃ ᐊᕐᕕᐊᓃᓚᐅᖏᑦᑐᓂᒡᓘᓐᓃᑦ ᐱᓐᖑᐊᕐᓇᐅᑎᓪᓗᒍ: ᑕᐃᒪᓐᓇ ᐊᔪᕐᓇᖏᓐᓂᖅᓴᐅᓂᐊᖅᐸ ᐊᔪᕐᓇᕐᓂᖅᓴᐅᓂᐊᖅᐸᓘᓐᓃᑦ ᕼᐋᑭᖅᑐᓕᕆᔨᒃᓴᖅᓯᐅᕐᓂᖅ ᒥᐅᓂᖅᓯᔨᒃᓴᖅᓯᐅᕐᓂᖅ ᐊᕐᕌᒎᓂᐊᖅᑐᒥ ᐱᓐᖑᐊᕐᔪᐊᓕᕐᒥᒃᐸᑕ?
ᑭᕙᓪᓕᕐᒥ ᐱᕚᓪᓕᕈᑎᖃᖅᓯᒪᓕᖅᐳᑦ ᐅᑭᐅᓂ ᖁᓕᓂ, ᑭᓯᐊᓂ ᐱᐊᓚᔪᓂᒃ, ᐊᒃᓱᕈᕐᓇᖅᑐᓂᒡᓗ, ᐱᑦᓯᐊᕐᓂᕐᒧᓪᓗ ᕼᐋᑭᕐᓂᖅᓴᐅᖃᑦᑕᓕᖅᐳᑦ ᖁᕕᐊᒋᔭᐅᓂᖅᓴᐅᓕᖅᖢᑎᒡᓗ ᐃᓄᖕᓄᑦ ᒫᓐᓇᐅᔪᖅ.
ᐊᒻᒪ, ᓂᖓᖁᖏᓪᓗᒋᑦ ᕼᐋᑭᕐᓂᕐᒧᑦ ᖃᐅᔨᒪᔪᑦ, ᕼᐋᑭᖅᑐᓕᕆᔨᓂᒃ ᐱᑦᓯᐊᖏᑦᑐᓂᒃ ᐊᓄᓪᓚᒃᓯᖅᑕᐅᓯᒪᔪᖃᖅᓯᒪᓕᖅᐳᖅ ᑭᕙᓪᓕᕐᒥ ᐱᓐᖑᐊᕐᔪᐊᖅᑎᓪᓗᒋᑦ, ᐅᐱᒋᐊᖃᕐᓂᕐᒧᑦ ᐱᔾᔪᑎᖃᖅᑐᓂᒃ ᐱᓐᖑᐊᖅᑐᓄᑦ ᒥᐊᓂᖅᓯᔨᓄᓪᓗ ᑭᕙᓪᓕᕐᒥ.
ᐃᓱᒪᒋᔭᖃᕋᒪ, ᐱᓕᕆᐊᕆᓯᒪᓕᐊᓂᒃᑲᑉᑎᒍ ᐋᖅᑭᒃᑕᐅᓇᓱᐊᒃᑲᓐᓂᕆᐊᖃᖏᒻᒪᓪᓗ.
ᖃᐅᔨᒪᖏᒃᑲᓗᐊᖅᖢᖓᓗ ᖃᑉᓯᓂᒃ ᕼᐋᖅᑭᒃᑐᓂᒃ ᒥᐊᓂᖅᓯᓯᒪᖕᒪᖔᕐᒪ ᕼᐋᑭᖅᑐᓕᕆᔨᐅᓯᒪᖕᒪᖔᕐᒪ ᐊᕐᕌᒎᓯᒪᓕᖅᑐᓂ, ᑭᓯᐊᓂ ᐊᒻᒪ ᖃᐅᔨᒪᔭᐅᑦᓯᐊᖅᑐᓂᒃ "ᓄᓇᓕᖕᓂ ᕼᐋᑭᖅᑎᓂᒃ" ᕼᐋᑭᖅᑐᓕᕆᔨᐅᓐᓂᕈᒪ ᖃᖓᑐᐃᓐᓇᖅ, ᖃᐅᔨᒪᔪᒃᓴᐅᓚᐅᕐᒪᑦ ᐱᓕᕆᐊᒥᓂᒃ ᐅᔾᔨᕆᓚᐅᖏᓐᓇᑉᑯ.
ᑭᕙᓪᓕᕐᒥ ᕼᐋᑭᖅᑐᓕᕆᓂᖅ ᐱᑦᓯᐊᕋᓱᐊᖃᑦᑕᕐᒪᑕ, ᐱᓐᖑᐊᑦᓯᐊᖅᖢᑎᒡᓗ ᖁᕕᐊᒋᔭᖃᖅᖢᑎᒃ ᕼᐋᑭᓕᕌᖓᒥᒃ, ᐊᒻᒪ ᐱᑕᖃᖃᑦᑕᖅᖢᓂᓗ ᐃᑲᔪᖅᑐᖅᑐᓂᒃ ᓯᐊᕐᕆᔮᕐᕕᖕᒦᑦᑐᓂᒃ ᑕᐅᑐᒋᐊᖅᑐᖅᑐᓂᒃ ᐱᓐᖑᐊᕐᔪᐊᖅᑐᓂᒃ, ᐋᑕᒻᑯᓐᓂᑦ ᔪᓂᐅᑯᓐᓄᑦ, ᓄᑖᓄᓪᓗ.
ᑕᐃᒪ ᐱᓕᕆᑦᓯᐊᓚᐅᖅᑕ ᑕᐃᒪᓐᓇ ᐊᐅᓪᓛᑦᓯᐊᕈᓐᓇᖁᑉᓗᑕ. ᐱᔾᔪᑎᖃᑐᐃᓐᓇᕐᒪᑦ ᐱᓐᖑᐊᕐᓂᕐᒥᒃ, ᕼᐃᓖ?