ᖃᔅᓯᐊᕐᔪᖕᓂ ᐱᓇᓱᐊᕈᓯᐅᔪᓂ, ᐱᔪᒥᓇᓛᖑᔪᓂ ᐃᓚᒋᔭᐅᔪᓂ ᓄᓇᕗᒻᒥ ᓯᕗᓂᒃᓴᒧᑦ ᐃᖅᑲᓇᐃᔭᖅᑎᐅᓛᖅᑐᓄᑦ ᑐᕌᖅᐸᓪᓕᐊᓂᐊᖅᐳᑦ ᕼᐋᓕᕚᒃᔅᒧᑦ ᑭᒡᒐᖅᑐᐃᔭᖅᑐᕐᓗᑎᒃ ᓄᓇᕗᒻᒥ ᐊᕐᕌᒍᑕᒫᒥ ᐊᔪᙱᓐᓂᐅᔪᓄᑦ ᑲᓇᑕᒥ ᓵᓚᖃᕋᓱᐊᕐᓂᐅᔪᒥ.
ᐅᐱᕐᔪᐊᓪᓗᐊᖅᐳᒍᑦ ᐊᒃᓱᕈᕐᓂᐅᔪᓂ ᑕᒪᒃᑭᓂ ᐊᔪᙱᓐᓂᐅᔪᓄᑦ ᑲᓇᑕᒥ ᓄᓇᕗᒻᒥ ᓵᓚᖃᕋᓱᐊᖅᑎᐅᔪᓂᑦ ᐱᓕᕆᔭᖏᓐᓂ ᐊᕐᕌᒍᒥ ᐊᕐᕌᒍᒧᑦ ᑎᑭᐅᑎᓇᓱᐊᕐᓂᖏᓐᓄᑦ ᐃᓕᓐᓂᐊᕐᕕᖕᒥ, ᐊᕕᒃᑐᖅᓯᒪᓂᐅᔪᓄᑦ ᐊᒻᒪ ᓄᓇᕗᒻᒥ ᑭᒡᓕᐅᔪᓄᑦ ᐊᒃᓱᕈᕐᓂᐅᔪᒥ ᓄᓇᕗᒻᒥᐅᓂᒃ ᐅᐱᒍᓱᒃᑎᑦᑎᓂᕐᒧᑦ ᑲᓇᑕᒥ ᓴᖅᑭᔮᕐᓂᐅᔪᒧᑦ.
ᑭᓯᐊᓂ ᐃᒻᒪᖄ ᐱᒻᒪᕆᐅᓂᖅᓴᐅᔪᒥ, ᐅᑯᐊ ᒪᒃᑯᒃᑐᑦ ᑕᑯᒃᓴᐅᑎᑦᑎᓂᖏᓐᓂ ᐱᐅᓂᐅᔪᓂ ᐱᓕᕆᓂᖏᓐᓄᑦ. ᐊᒃᓱᕈᑐᐃᓐᓇᖅᖢᑎᒃ ᐱᓕᕆᓂᐅᔪᒥ ᐃᓚᖃᖅᑐᒥ ᐱᓂᕆᔭᖏᓐᓄᑦ ᐊᑯᓂᐅᓂᖅᓴᐅᔪᓐᓇᖅᑐᒥ ᐊᑕᐅᓯᕐᒥ ᐱᓇᓱᐊᕈᓯᐅᑉ ᓄᙳᐊᓂ ᖃᓪᓗᓈᑦ ᓄᓇᖓᓐᓂ – ᐃᓅᓯᓕᒫᒧᑦ ᑎᑭᐅᒪᔪᓐᓇᖅᐳᑦ.
ᓂᐱᖃᕐᔪᐊᖅᓯᒪᕗᖅ ᐱᐅᓂᐅᔪᓂ ᖁᑦᑎᖕᓂᖅᓴᒥ ᐃᓕᓐᓂᐊᕐᓂᐅᔪᒥ, ᐊᒻᒪᓗ ᓱᓕᑦᑎᐊᖅᑐᖅ ᓄᓇᕗᑦ ᐱᔭᕆᐊᖃᕐᓂᖏᓐᓂ ᐃᓄᖕᓂ ᓘᒃᑖᓂᑦ, ᐃᓗᐊᖅᓴᐃᔨᓂᑦ, ᓴᐳᔾᔨᔨᐅᔪᓂ, ᑲᑎᒪᔨᕐᔪᐊᖑᔪᓂ, ᐃᓕᓴᐃᔨᓂᑦ, ᐊᓯᖏᓪᓗ. ᑕᐃᒪᐃᖏᓐᓇᐅᔭᕐᓂᐊᖅᐳᖅ.
ᐅᖃᐅᓯᐅᓂᖃᓗᐊᕌᓗᙱᓚᖅ ᑕᐅᓯᓐ-ᖏᓐᓂ ᐊᓯᖏᓐᓂ ᐃᖅᑲᓇᐃᔮᖑᔪᓂ ᐱᔭᕆᐊᖃᖅᑐᓂ ᐱᔭᕆᑐᔪᓂ ᐊᔪᙱᓐᓂᐅᔪᓂᑦ, ᐊᒻᒪᓗ ᖁᕕᐊᑉᐳᒍᑦ ᑕᑯᓂᕐᒧᑦ ᒪᒃᑯᒃᑐᓂ ᓇᓂᓯᓂᖏᓐᓂ ᐊᑯᓂᐅᔪᒃᑯᑦ ᐱᕚᓪᓕᕈᑕᐅᓂᐊᖅᑐᓄᑦ ᐅᑯᐊ ᐊᔪᙱᓐᓂᐅᔪᓄᑦ ᓇᒃᓴᕈᓐᓇᕐᓂᖏᓐᓂ. ᕿᔪᓕᕆᓂᐅᒍᓂ ᐅᕝᕙᓘᓐᓃᑦ ᐃᖅᑲᓇᐃᔭᕐᕕᖕᒥ ᐊᑦᑕᓇᔾᔭᐃᖅᓯᒪᓂᕐᒧᑦ, ᐅᑭᐅᖅᑕᖅᑐᒥ ᐊᓐᓄᕌᓕᐊᓄᑦ ᐃᒐᓂᕐᒧᓪᓘᓐᓃᑦ, ᐊᔾᔨᓕᐅᕆᓂᕐᒥ ᓄᔭᓕᕆᓂᕐᒧᓪᓘᓐᓃᑦ, ᐊᔪᕐᓇᖅᐳᖅ ᑕᐅᑐᙳᐊᕆᐊᒃᓴᖅ ᖃᐅᑕᒫᒥ ᐃᓅᓯᕐᒥ ᐃᓄᖃᙱᓪᓗᓂ ᓇᓗᓇᐃᖅᑕᐅᓯᒪᔪᓄᑦ ᐊᔪᙱᓐᓂᖃᖅᑐᓂᑦ ᐃᑲᔪᖅᓱᐃᓂᕐᒧᑦ ᐱᕈᖅᐸᓪᓕᐊᔪᓂ ᓄᓇᓕᑦᑎᓐᓂ.
ᐃᖅᑲᓇᐃᔭᖅᑎᖁᑎᓖᑦᑕᐅᖅ, ᓂᐱᖅᑯᖅᑐᕐᔪᐊᖅᐳᑦ ᐃᓄᖕᓄᑦ ᐊᔪᙱᓐᓂᖃᖅᑐᓂ ᐊᒻᒪᓗ ᐸᕐᓇᒃᓯᒪᔪᓂ ᐃᓕᑦᑎᒃᑲᓐᓂᕐᓂᖏᓐᓄᑦ. ᐱᓇᓱᐊᕈᓯᐅᓚᐅᖅᑐᒥ, ᑎᑎᕋᐅᓯᖃᓚᐅᖅᐳᒍᑦ ᔫᓇᐃᑎᑦ ᔅᑕᐃᑦᔅᓂ ᓴᐳᔾᔨᓂᐅᔪᒧᑦ ᑳᓐᑐᕌᒃᑎᐅᔪᒥ Raytheon-ᒥ ᐊᒻᒪᓗ ᐱᔪᒪᓂᖏᓐᓂ ᐃᓄᖕᓂ ᐃᖅᑲᓇᐃᔭᖅᑎᐅᔪᓂᑦ ᐅᐊᖕᓇᒥ ᐃᓂᖅᑎᕆᓂᐅᔪᒥ ᐱᓕᕆᔾᔪᓯᐅᔪᒥ (ᓯᕗᓂᐊᓂ ᑑᓚᐃᓐ-ᖑᓚᐅᖅᑐᒥ) ᐃᓂᐅᔪᓄᑦ. ᐃᓕᓐᓂᐊᕐᓂᖃᕐᔪᐊᖅᓯᒪᔭᕆᐊᖃᙱᓚᑎᑦ ᐆᒧᖓ ᐱᓕᕆᓂᐅᔪᒧᑦ – ᐊᔪᙱᓐᓂᖃᕆᐊᖃᖅᐳᑎᑦ ᐅᕝᕙᓘᓐᓃᑦ ᐱᔪᓐᓇᕐᓂᐅᔪᒥ ᐱᓕᒻᒪᒃᓴᖅᑕᐅᔪᓐᓇᕐᓂᕐᒧᑦ. (ᖁᑦᑎᒃᑐᒥ ᐃᓕᓐᓂᐊᕐᕕᖕᒧᑦ ᐃᓱᓕᑦᑎᓂᐅᔪᒥ ᒥᑭᓛᖑᔪᒥ ᐊᑐᒐᒃᓴᓂ ᐋᖅᑭᒃᑕᐅᓯᒪᓂᐅᔪᒥ ᐱᓯᒪᑐᐃᓐᓇᕆᐊᖃᒐᔪᓕᖅᐳᖅ ᒫᓐᓇᐅᔪᒥ, ᑕᐃᒫᒃ ᐃᓕᓐᓂᐊᖏᓐᓇᕆᔅᓯ, ᓄᑕᖅᑲᐃᑦ.)
ᖃᐅᔨᒪᓂᕐᒥ ᐱᔪᒪᔭᐅᓂᐅᔪᒥ ᐱᑕᖃᕐᓂᖓᓂ ᐃᓄᖕᓄᑦ ᐱᓕᕆᔨᐅᔪᓄᑦ, ᓴᖑᑎᑦᑎᕗᒍᑦ ᑕᐅᑐᖕᓂᑦᑎᓐᓂ ᓄᓇᕗᒻᒥ ᒐᕙᒪᒃᑯᓐᓄᑦ, ᓴᖅᑭᑎᑦᑎᒋᐊᒃᑲᓐᓂᓚᐅᖅᑐᒥ ᑕᓗᓯᒪᓂᐅᔪᒥ ᐃᖅᑲᓇᐃᔭᖅᑎᓕᕆᔨᒃᑯᖏᓐᓂ ᑕᖅᑭᐅᓚᐅᖅᑐᒥ. ᐃᓯᕐᕕᖓᓐᓂ ᐊᓂᓪᓗᑎᒃ, 60 ᐳᓴᓐᑎᑐᐃᓐᓇᒥᒃ ᐃᖅᑲᓇᐃᔭᖅᑎᖁᑎᖃᓚᐅᖅᐳᑦ, ᐊᒻᒪᓗ ᐃᓄᖕᓂ ᖃᓪᓗᓈᓄᑦ ᐃᖅᑲᓇᐃᔭᖅᑎᖁᑎᖃᕐᓂᕐᒧᑦ ᐅᓄᕐᓂᖏᓐᓂᑦ ᒥᑭᑦᑐᒥ ᐱᐅᓂᖅᓴᒐᓚᐅᓂᖅᓴᐅᓚᐅᖅᐳᖅ ᓄᓇᕗᒻᒥ ᒐᕙᒪᒃᑯᓐᓄᑦ 50-50-ᒥ ᐊᕕᒃᓯᒪᓂᐅᔪᒥ.
ᒐᕙᒪᒃᑯᑦ ᑐᕌᒐᒃᓴᖓ ᑕᑯᒃᓴᐅᑎᑦᑎᓂᕐᒥ ᐃᓚᒋᔭᐅᔪᓂ ᐃᓄᖕᓂ ᓄᓇᕗᒻᒥ – 85 ᐳᓴᓐᑎ – ᓱᖁᓯᖅᓯᒪᙱᓚᖅ 50-50-ᒥ ᑕᐃᒪᙵᓂ ᓄᓇᕗᙳᓚᐅᖅᑎᓪᓗᒍ.
ᐃᒻᒪᖄ, ᐊᓯᖏᑦ ᐅᓄᖅᑐᓂ ᐃᖅᑲᓇᐃᔭᖅᑎᖁᑎᓖᑦ – ᐊᒡᓂᑯ-ᐄᒍᓪ, ᐹᕙᓐᓛᓐ, DeBeers, Raytheon, ᐊᓯᖏᓪᓗ – ᑐᑭᓕᐊᕐᓂᖃᖅᑎᓪᓗᒋᑦ ᐊᑭᓕᖅᓱᐃᑦᑎᐊᓲᓂᒃ ᐊᔪᙱᓐᓂᓕᖕᓂ ᐃᖅᑲᓇᐃᔮᖃᖅᑎᑦᑎᓂᕐᓄᑦ ᐸᕐᓇᒃᓯᒪᔪᓄᑦ ᐃᓄᖕᓄᑦ, ᐊᔪᕐᓇᖅᐳᖅ ᑕᑯᓂᕐᒥ ᖃᓄᖅ ᒐᕙᒪᒃᑯᑦ ᑎᑭᐅᑎᔪᓐᓇᕐᓂᐊᕐᓂᖏᓐᓂ ᐃᖅᑲᓇᐃᔮᖃᖅᑎᑦᑎᓂᕐᒧᑦ ᑐᕌᒐᒃᓴᖏᓐᓂᑦ.
ᓄᓇᕗᒻᒥ ᒐᕙᒪᒃᑯᑦ ᐊᔪᕐᓇᙱᑦᑐᒥ ᐱᓕᕆᓂᖃᒐᔪᒃᐳᑦ – ᐃᖅᑲᓇᐃᔮᖃᖅᑎᑦᑎᓪᓗᑎᒃ ᖃᓪᓗᓈᓂᑦ ᐱᓕᒻᒪᒃᓴᖅᓯᒫᓂᒃᑐᓂ. ᐊᒻᒪ ᓱᓕ, ᒐᕙᒪᒃᑯᑦ ᐱᓕᕆᓂᖃᓪᓗᐊᖅᑎᓪᓗᒋᑦ ᐃᓚᐅᑎᑦᑎᔪᒥᒃ ᑕᒪᒃᑭᓄᑦ ᐱᓕᒻᒪᒃᓴᕐᓂᐅᔪᒥ, ᑲᑎᖅᓱᖅᑕᐅᕙᓪᓕᐊᔪᓂ ᑮᓇᐅᔭᓂᒃ ᑐᖅᑯᖅᑕᐅᓯᒪᓗᑎᒃ ᐊᖏᓛᖑᔪᒥ ᐱᔪᓐᓇᕐᓂᓕᒫᖓᓐᓂ ᑐᓂᓯᓂᕐᒧᑦ ᓱᓕᓂᕋᐃᓂᐅᔪᓂ – ᐋᖅᑭᒃᑕᐅᓯᒪᓂᐅᙱᑦᑐᒥ – ᐃᓄᖕᓂ ᐃᖅᑲᓇᐃᔭᖅᑎᓂᑦ ᐱᓕᒻᒪᒃᓴᕐᓂᐅᔪᒥ ᐱᔭᕆᐊᖃᖅᑕᒥᓂᑦ ᖁᕝᕙᕆᐊᕈᓐᓇᕐᓂᕐᒧᑦ ᓄᓇᕗᒻᒥ ᒐᕙᒪᒃᑯᓐᓄᑦ.
ᒫᓐᓇᐅᔪᒥ, ᑎᑎᕋᖅᓯᒪᓂᐅᔪᒥ ᐃᖅᑲᓇᐃᔮᖃᕐᕕᕕᓂᕐᓂ ᐃᓚᖃᙱᒃᑯᓂ ᐅᖃᖅᓯᒪᓂᑦᑎᐊᖑᔪᓂ ᐃᖅᑲᓇᐃᔮᒃᓴᒧᑦ ᐅᓂᒃᑳᕆᓯᒪᓂᖓᓐᓂ, ᐃᓱᒪᒋᔭᐅᔾᔮᙱᓚᑎᑦ. ᓈᒻᒪᒃᓯᕗᖅ ᓄᓇᕗᒻᒥ ᒐᕙᒪᒃᑯᓐᓄᑦ ᐃᖏᕐᕋᓂᖅᓴᐅᔪᒥ, ᒫᓐᓇᒨᓕᖓᓂᖅᓴᐅᔪᒥ ᐊᒻᒪ ᐊᑑᑎᖃᕐᓂᖅᓴᐅᔪᒥ ᑐᕌᒐᕆᔭᐅᔪᒥ ᐃᖅᑲᓇᐃᔭᖅᑎᓕᕆᔨᒃᑯᓐᓄᑦ ᐊᒻᒪ ᕿᓂᕐᓗᑎᒃ ᐃᓄᖕᓂ ᐃᓕᑦᑎᔪᓐᓇᖅᑐᓂ ᖃᓄᖅ ᐃᖅᑲᓇᐃᔮᖅ ᐱᓕᕆᔪᓐᓇᖅᓯᑎᑕᐅᓂᖓᓂ, ᐃᒪᓐᓇᑐᐃᓐᓇᐅᙱᑦᑐᖅ ᐃᖅᑲᓇᐃᔮᖃᖅᑎᑦᑎᓗᑎᒃ 'ᐱᔪᓐᓇᕐᓂᖅᓴᐅᔪᓄᑦ' ᐅᑎᖅᑕᓲᓄᑦ ᐃᖅᑲᓇᐃᔭᖅᑎᓂᑦ.
ᐃᓱᒪᒋᓗᒍ ᐃᐊᓪᐳᑦ ᐊᐃᓐᔅᑕᐃᓐ, ᑕᐃᔅᓱᒥᖓᑦᑕᐃᓐᓇᖅ ᐱᓕᕆᓪᓗᐊᙱᓚᑎᑦ ᐊᒻᒪ ᓂᕆᐅᒡᓗᑎᑦ ᐊᔾᔨᒋᙱᑕᖓᓂ ᖃᓄᐃᓕᖓᓂᐅᔪᓄᑦ.