Skip to content

ᐃᑲᔪᕐᓂᖅ ᓄᕙᒡᔪᐊᕐᓂᖅ -19-ᑯᑦ ᓂᑲᓪᓗᖓᔪᑦ ᖁᕕᐊᓱᓕᖁᑉᓗᒋᑦ

ᑲᖏᖅᖠᓂᕐᒥ ᖃᑉᑎᕆᔨᒃᑯᓐᓂᕐᒥᐅᑕᑦ ᖁᕕᐊᓱᒃᑎᑦᑎᖃᑦᑕᓚᐅᖅᑐᑦ ᓄᑕᖅᑲᓂᒃ ᓇᓪᓕᐅᑎᔪᓂᒃ ᓄᑕᖅᑲᑦ ᓇᓪᓕᐅᑎᒐᓗᐊᕌᖓᑕ ᑲᑎᑦᑐᓐᓇᐃᓪᓕᓯᒪᑎᑕᐅᑎᓪᓗᒋᑦ ᓄᕙᒡᔪᐊᕐᓂᖅ -19 ᐱᔾᔪᑎᒋᑉᓗᒍ ᑕᖅᑭᐅᓚᐅᖅᑐᒥ - ᐅᐸᒃᑕᐅᖃᑦᑕᓚᐅᕐᒥᔪᑦ ᐃᓚᖏᑦ ᐃᓐᓇᑐᖃᐃᑦ. ᑲᖏᖅᖠᓂᕐᒥ ᖃᑉᑎᕆᔨᒃᑯᓐᓄᑦ ᐊᖓᔪᖅᑳᖅ ᑕᐃᒪᓐᓇ ᐃᓱᒪᓕᐅᓕᓚᐅᖅᑐᖅ ᑐᓴᖅᑳᖅᖢᓂ ᖃᑉᓗᓈᑦ ᓄᓇᖓᓂᒃ ᑕᐃᒪᐃᓕᐅᖃᑦᑕᕐᓂᖏᓐᓄᑦ.

ᕋᓴᓕᓐ (ᐸᐃᐱ) ᑭᖕ ᖁᕕᐊᓱᑦᑎᐊᖅᑐᖅ ᖃᑉᑎᕆᔨᓂᒃ ᑕᑯᒐᒥ, ᓴᐅᒥᖅᖠᕐᒥ, ᑯᓗᐃ ᓄᐊᕆᔅ, ᒪᑯᓯ ᐅᐊᐃᔭᑦ (ᖃᑉᑎᕆᔨᒃᑯᓐᓄᑦ ᐊᖓᔪᖅᑳᖅ) ᐊᒻᒪᓗ ᑐᕈᐃ ᐃᓄᒃᓱᒃ ᐃᒡᓗᖓ ᐅᕐᓂᒃᑕᐅᓚᐅᖅᑎᓪᓗᒍ ᓇᓪᓕᐅᑎᑎᓪᓗᒍ ᑲᖏᖅᖠᓂᕐᒥ ᑕᖅᑭᐅᓚᐅᖅᑐᖅ.
ᐊᔾᔨ ᑲᖏᖅᖠᓂᐅᑉ ᖃᑉᑎᕆᔨᒃᑯᖏᓐᓂᙶᖅᑐᖅ

ᐅᐊᐃᔭᑦ ᐅᖃᖅᖢᓂ ᑕᐃᒪᐃᓕᐅᖅᑐᓂᒃ ᑕᑯᑐᐊᕋᒥ, ᑕᐃᒪᐃᓕᐅᕈᒪᓕᑲᐅᑎᒋᓚᐅᕐᒪᑦ ᑲᖏᖅᖠᓂᕐᒥ ᓄᑕᖅᑲᑦ ᐃᓐᓇᑐᖃᐅᔪᓪᓗ ᑲᑎᖃᑎᒋᔭᐅᔪᓐᓇᐃᓪᓕᑎᓪᓗᒋᑦ ᓇᓪᓕᐅᑎᒐᓗᐊᕌᖓᑕ ᐅᑭᐅᖑᔪᖅ ᓄᓇᓕᖕᒥ.

ᐅᖃᖅᖢᓂ ᑕᒪᓐᓇ ᐱᒋᐊᕈᑕᐅᓚᐅᖅᑐᖅ ᐃᓐᓇᑐᖃᕆᔭᐅᔪᖅ ᔮᒃ ᖃᕝᕖᑦᑐᖅ ᓇᓪᓕᐅᑎᑎᓪᓗᒍ ᑕᖅᑭᐅᓚᐅᖅᑐᒥ.

“ᐃᒻᒪᖄ 8-ᖑᓕᖅᑐᑦ ᓄᑕᖅᑲᑦ ᐅᐸᒃᓯᒪᔭᖅᐳᑦ ᐃᓄᖕᓄᑦ ᑐᓴᖅᑎᑕᐅᖃᑦᑕᖅᖢᑕ ᖃᕆᑕᐅᔭᒃᑯᑦ ᐅᖃᐅᓯᕆᓚᐅᙱᖦᖢᒍᓘᓐᓃᑦ ᓱᓕ ᐱᓇᓱᐊᕈᓯᐅᓚᐅᖅᑐᒥ,” ᑕᐃᒪᓐᓇ ᐅᖃᖅᖢᓂ ᐅᐊᐃᔭᑦ.

ᑕᒪᓐᓇ ᐃᓱᒪᓕᐅᕈᑕᐅᓯᒪᓗᐊᖅᑐᖅ ᓄᑕᖅᑲᑦ ᓇᓪᓕᐅᑎᔭᕌᖓᑕ ᑲᑎᑦᑐᓐᓇᐃᓪᓕᓂᖏᓐᓄᑦ ᐃᓄᐃᑦ ᐅᖓᓯᒌᒍᑎᔭᕆᐊᖃᓕᖅᑎᓪᓗᒋᑦ ᐊᒻᒪᓗ ᐃᓄᐃᑦ ᑲᑎᖃᑦᑕᖁᔭᐅᔪᓐᓃᖅᑎᓪᓗᒋᑦ ᒫᓐᓇᐅᔪᖅ ᓄᕙᒡᔪᐊᕐᓂᖅ -19 ᐱᔾᔪᑎᒋᑉᓗᒍ, ᑕᐃᒪᐃᒻᒪᑦ ᓄᓇᑉᓯᓐᓂᒃ ᖃᑉᑎᕆᔨᒃᑯᑦ ᖃᓄᖅ ᐃᑲᔪᕆᐊᕈᓐᓇᖅᐸᑦ?

“ᐅᐸᒍᑎᖃᑦᑕᖅᑐᒍᑦ ᖃᑉᑎᕆᔨᒃᑯᑦ ᓄᓇᒃᑰᕈᑎᖓᓂᒃ ᒪᕐᕉᖕᓂᒡᓘᓐᓃᑦ ᐊᑐᖅᖢᑕ ᐊᒻᒪᓗ ᑎᑎᕋᖅᓯᒪᔪᒥᒃ ᓇᒃᓴᖅᖢᑕ ᑕᒪᐃᓐᓄᑦ ᖃᑉᑎᕆᔨᓄᑦ ᓴᓇᔭᐅᓚᐅᖅᑐᒥᒃ ᐅᖃᖅᓯᒪᔪᖅ ᐃᒪᓐᓇ ᓇᓪᓕᐅᑎᑦᑎᐊᕆᑦ.

“ᐊᖏᕐᕋᕆᔭᖓᓄᑦ ᐅᐸᒍᑎᑉᓗᑕ, ᖁᖁᐊᕈᑎ ᓂᑉᓕᖅᑎᖦᖢᒍ ᐊᒻᒪᓗ ᓄᓇᒃᑰᕈᑎᒥᒃ ᐊᓂᑉᓗᑕ ᑎᒍᒥᐊᖅᖢᑕ ᑎᑎᕋᖅᓯᒪᔪᒥᒃ. ᑕᒪᕐᒥᒃ ᐃᓄᐃᑦ ᐊᓂᖃᑦᑕᖅᑐᑦ ᑕᑯᔭᖅᑐᖅᖢᑎᒃ ᓄᑕᖅᑲᑦ ᑕᑯᒋᐊᙱᑦᑎᐊᓲᑦ ᐊᓕᐊᓇᐃᑦᑐᐊᓘᓲᖅ.

“ᑕᐃᑲᓃᖃᑦᑕᖅᑐᒍᑦ ᖃᑉᓰᓐᓇᕐᓂᒃ ᒥᓂᑦᓂᒃ ᐊᒻᒪᓗ ᐃᖏᕐᕋᓯᕙᒃᖢᑕ, ᑭᓯᐊᓂ ᑕᒪᓐᓇ ᐃᑲᔫᑕᐅᓪᓚᕆᖃᑦᑕᖅᑰᖅᑐᖅ ᐊᖓᔪᖅᑳᓂᒃ ᑐᓴᖅᑎᑕᐅᖃᑦᑕᕋᑉᑕ ᐊᒻᒪᓗ ᐃᓄᖕᓂᒃ ᑕᐃᒪᐃᓕᐅᕈᑎᓯᒪᔭᑉᑎᓐᓂᒃ - ᐊᓕᐊᓇᐃᑦᑐᒻᒪᕆᐊᓗᒎᖅ.”

ᑲᖏᖅᖠᓂᕐᒥ ᖃᑉᑎᕆᔨᒃᑯᑦ ᑕᐃᒪᐃᓕᐅᕈᔾᔨᓲᑦ ᓄᑕᖅᑲᓂᒃ ᐅᑭᐅᓕᖕᓂᒃ 12-ᓂᒃ ᑐᖔᓂᓗ ᐊᒻᒪᓗ ᐃᓐᓇᑐᖃᕐᓂᒃ ᐅᑭᐅᓕᖕᓂᒃ 75 ᐅᖓᑖᓂ.

ᐅᐊᐃᔭᑦ ᐅᖃᖅᖢᓂ ᖃᑉᑎᕆᔨᒃᑯᒡᒎᖅ ᑕᐃᒪᐃᓕᐅᖏᓐᓇᕐᓂᐊᖅᑐᑦ ᑭᓯᐊᓂ ᐃᓄᐃᑦ ᐅᒡᓚᕈᑎᔪᓐᓇᖅᓯᒃᐸᑕ ᑲᖏᖅᖠᓂᕐᒥ.

ᐅᖃᖅᖢᓂ ᐃᒻᒪᖄᒎᖅ ᖃᑉᓯᑐᐃᓐᓇᕐᓂᒃ ᐱᓇᓱᐊᕈᓯᕐᓂᒃ ᓱᓕ ᑭᓯᐊᓂ, ᑐᓴᖅᓯᒪᓕᖅᑎᓪᓗᑕ ᓄᕙᒡᔪᐊᕐᓂᕐᒥᒃ ᐱᓯᒪᓕᖅᑐᒥᒃ ᓄᓇᕗᒥ ᐊᒻᒪᓗ ᖃᐅᔨᒪᙱᖦᖢᑕ ᖃᓄᐃᓕᖓᓕᕐᓂᐊᕐᒪᖔᑦ, ᑕᐃᒪᐃᑐᐃᓐᓇᕆᐊᖃᖅᑐᒍᑦ ᑕᖅᑭᓂᒃ ᖃᐃᔪᓂᒃ.

“ᑐᓴᕈᓘᔭᖅᓯᒪᔪᒍᑦ ᐊᔾᔨᒌᙱᑦᑑᑕᐅᔪᓂᒃ ᑕᒡᕘᓇ, ᑭᓯᐊᓂ ᐃᓄᐃᑦ ᐅᐃᒻᒪᒃᑕᐅᓕᔭᕆᐊᓖᑦ ᑐᓴᑦᑎᐊᖅᑳᕐᓇᑕ ᒥᑦᑎᒪᑕᓕᖕᒥᒃ ᖃᓄᐃᓕᖓᓕᖅᑐᒥᒃ ᒐᕙᒪᒃᑯᓐᓂᒃ.

“ᑕᐃᒪᐃᒻᒪᑦ, ᑭᓯᐊᓂ, ᐸᕐᓇᑦᑎᐊᖅᓯᒪᔪᒍᑦ ᐊᑐᖅᑕᐅᓇᔭᖅᓂᒃ ᑕᒪᓐᓇ ᓯᐊᒻᒪᖁᓇᒍ ᓄᕙᒡᔪᐊᕐᓂᖅ.

“ᑕᐃᒪᓐᓇ ᐅᖃᖅᑎᓪᓗᖓ, ᖃᑉᑎᕆᔨᒃᑯᑦ ᖁᕕᐊᓱᒃᑎᑦᑎᓇᓱᖃᑦᑕᕐᓂᐊᖅᑐᑦ ᓄᓇᓕᖕᒥ ᐊᒃᓱᕈᕐᓇᖅᑐᒃᑰᕋᓗᐊᖅᑎᓪᓗᒋᑦ ᐃᓄᐃᑦ ᓇᓪᓕᐅᑎᔪᖃᕌᖓᑦ ᐅᐸᒍᑎᖃᑦᑕᕐᓗᑕ.

“ᐊᒻᒪᓗ ᑕᐃᒪᐃᓕᐅᖏᓐᓇᕐᓂᐊᖅᑐᒍᑦ ᓄᓇᒋᔭᖅᐳᑦ ᐅᑎᓪᓚᑦᑖᖅᑳᖅᑎᓐᓇᒍ ᖃᓄᐃᓐᓂᕆᓚᐅᖅᑕᖓᓄᑦ.”