Skip to content

ᐃᒻᖏᖅᑎ ᑐᒡᓕᐊᒍᑦ ᑲᑎᑦᑎᓕᖅᑐᖅ ᓄᑖᓂᒃ ᐃᒻᖏᐅᑎᓂᒃ

ᑭᕙᓪᓕᕐᒥ ᐃᒻᖏᖅᑎᐅᖃᑦᑕᓚᐅᖅᑐᖅ ᓵᒻ ᑐᑕᓐᓄᐊᖅ, ᕈᓴᓕ ᐱᓱᒡᓗ ᑲᖏᖅᖠᓂᕐᒥᐅᑕᖅ ᐃᒻᖏᓚᐅᖅᓯᒪᔫᒃ ᐊᓕᐊᓇᐃᒃᑯᑦ ᐃᒻᖏᖅᑎᑦᑎᑎᓪᓗᒋᑦ... ᑭᓯᐊᓂ ᖃᕆᑕᐅᔭᒃᑯᑦ ᑕᓪᓕᒻᒥᕐᒥ, ᒪᐃ 8-ᒥ.

ᑭᕙᓪᓕᕐᒥ ᐃᒻᖏᖅᑎᐅᖃᑦᑕᓚᐅᖅᑐᖅ ᓵᒻ ᑐᑕᓐᓄᐊᖅ, ᕈᓴᓕ ᐱᓱᒡᓗ ᑲᖏᖅᖠᓂᕐᒥᐅᑕᖅ ᐃᒻᖏᓚᐅᖅᓯᒪᔫᒃ ᐊᓕᐊᓇᐃᒃᑯᑦ ᐃᒻᖏᖅᑎᑦᑎᑎᓪᓗᒋᑦ... ᑭᓯᐊᓂ ᖃᕆᑕᐅᔭᒃᑯᑦ ᑕᓪᓕᒻᒥᕐᒥ, ᑐᓴᖅᑎᑦᑎᓯᒪᓕᖅᑐᖅ ᑎᑎᕋᖃᑦᑕᓕᕐᒥᒐᒥ ᐃᒻᖏᖃᑦᑕᕐᓂᐊᖅᑕᒥᓂᒃ ᑐᒡᓕᐊᒍᑦ ᐃᒻᖏᐅᑎᓕᐊᕆᓂᐊᖅᑕᒥᒍᑦ.
ᐊᔾᔨ ᓵᒻ ᑐᑕᓐᓄᐊᕐᒥᙶᖅᑐᖅ

ᑐᑕᓐᓄᐊᖅ ᐅᖃᖅᖢᓂ ᖃᕆᑕᐅᔭᒃᑯᑦ ᐃᒻᖏᖅᑎᑦᑎᓚᐅᖅᑐᑦ ᐃᓱᒪᓕᐊᕆᔭᐅᑦᑎᐊᖅᑐᐊᓗᕕᓂᖅ.

ᐅᖃᖅᖢᓂ ᐊᓕᐊᓇᐃᒃᑯᓐᓄᑦ ᐅᕐᓂᒃᑕᐅᖅᑳᓚᐅᕋᒥ ᐃᒻᖏᖁᔭᐅᑉᓗᓂ ᐃᒻᒪᖄ ᐱᖓᓱᑦ ᐱᓇᓱᐊᕈᓯᑦ ᑐᖔᓂ.

“ᐊᓕᐊᓇᐃᒍᓱᑦᑎᐊᓚᐅᖅᑐᖓ ᐅᐱᒍᓱᒃᖢᖓᓗ ᐃᒻᖏᖁᔨᖕᒪᑕ,” ᑕᐃᒪᓐᓇ ᐅᖃᖅᖢᓂ ᑐᑕᓐᓄᐊᖅ.

ᑐᑭᓯᐅᒪᔭᒃᑯᑦ ᐸᕐᓇᐃᖁᔭᐅᑉᓗᖓ ᐃᒻᒪᖄ 20-ᓂᒃ 25-ᓄᑦ ᒥᓂᑦᓂᒃ ᑕᕐᕆᔭᒐᒃᓴᒥᒃ ᐃᒻᖏᕐᓗᖓ ᐊᒻᒪᓗ ᓇᒃᓯᐅᑎᓗᒍ ᐊᓕᐊᓇᐃᒃᑯᓐᓄᑦ ᐊᒻᒪᓗ, ᖃᕆᑕᐅᔭᓕᕆᓂᖅ ᐅᑉᓗᒥᐅᓕᖅᑐᖅ ᐊᑐᕐᓗᒍ, ᑕᐃᒪᐃᓕᐅᕈᒪᓕᓚᐅᖅᑐᖓ.

“ᑕᕐᕆᔭᐅᓯᐊᕆᓚᐅᖅᑕᕋ ᐊᐃᕆᓕ 22-ᒥ ᐊᖏᕐᕋᕋᓂ ᐃᖃᓗᖕᓂ ᐅᖃᓘᑎᒐ ᐊᑐᑐᐃᓐᓇᖅᖢᒍ ᐊᒻᒪᓗ, ᑕᐅᑐᐊᓂᒃᑲᑉᑯ, ᓈᒻᒪᑦᑎᐊᕋᓱᒋᓚᐅᖅᑕᕋ.

“ᖁᕕᐊᒋᑉᓗᒍ ᐊᒻᒪᓗ, ᐃᓱᒪᓚᐅᖅᑐᖓ, ᐊᓕᐊᓇᐃᒃᑯᑦ ᖁᕕᐊᒋᔭᖃᕋᓱᒋᑉᓗᒋᑦᑕᐅᖅ ᓂᐱᓕᐅᕆᒃᑲᓐᓂᖁᔨᓚᐅᙱᒻᒪᑕ, ᑕᐃᒪᓕ ᑐᓴᖃᑦᑕᕐᓂᐊᓕᖅᐳᒍᑦ ᖃᓄᖅ ᐃᓄᖕᓄᑦ ᐃᓱᒪᒋᔭᐅᓚᐅᕐᒪᖔᑦ.”

ᑐᑕᓐᓄᐊᖅ, 53-ᓂᒃ ᐅᑭᐅᓕᒃ, ᐅᖃᖅᖢᓂ ᖁᕕᐊᓱᒃᑐᕉᖅ ᐊᓕᐊᓇᐃᒃᑯᑦ ᖃᕆᑕᐅᔭᒃᑯᑦ ᐃᒻᖏᖅᑎᑦᑎᑎᖕᒪᑕ ᓄᓇᕗᒥ ᐃᒻᖏᖅᑏᑦ ᑲᔪᓯᑦᑎᐊᙱᓐᓇᖁᑉᓗᒋᑦ ᓄᕙᒡᔪᐊᕐᓂᖅ-19 ᑕᐃᒪᐅᒐᓗᐊᖅᑎᓪᓗᒍ.

ᐅᖃᖅᖢᓂ ᐊᑕᐅᓰᖅᖢᓂᒎᖅ ᐃᒻᖏᖃᑕᐅᑉᓗᓂ ᐊᓯᖏᓐᓄᑦ ᐱᖃᑕᐅᓕᖃᑦᑕᕈᓐᓇᖅᑐᖅ.

“ᑐᑭᓯᐅᒪᙱᑦᑐᖓᓱᓕ ᖃᓄᖅ ᐃᒻᖏᖅᑏᑦ ᐊᑭᓕᖅᑕᐅᓂᐊᕐᒪᖔᑕ ᐃᓄᐃᑦ ᑕᐅᑐᖅᑳᖅᑎᓪᓗᒋᑦ, ᑭᓯᐊᓂ ᑕᒪᓐᓇ ᐱᐅᔪᐊᓗᒃᑕᐅᖅ ᖃᕆᑕᐅᔭᓕᕆᓂᖅ ᐱᔾᔪᑎᒋᑉᓗᒍ ᐅᑉᓗᒥ.

ᐊᑕᐅᓯᖅ ᐃᓄᖕᓄᑦ ᐳᐃᒍᖅᑕᐅᒐᔪᒃᑐᖅ ᑕᒪᓐᓇ ᐃᑲᔫᑕᐅᖃᑦᑕᕐᒪᑦ ᑎᒥᒥᒍᑦ ᐊᔪᕈᑎᓕᖕᓄᑦ, ᐃᒻᒪᖄ ᐊᓂᔪᓐᓇᙱᑦᑐᓄᑦ ᑕᐅᑐᒋᐊᖅᑐᖃᑕᐅᓗᑎᒃ ᐱᔪᒪᒐᓗᐊᖅᖢᑎᒃ.

“ᑕᒡᕘᓇ, ᖃᕆᑕᐅᔭᒃᑯᑦ ᑕᐅᑐᒍᓐᓇᖃᑦᑕᕐᓂᐊᖅᑐᑦ, ᐊᑭᓖᓗᑎᒃ 20-ᒥᒃ ᐅᕝᕙᓘᓐᓃᑦ ᖃᓄᑭᐊᖅ ᐊᑭᖃᖅᐸᑦ ᐊᒻᒪᓗ ᑕᐅᑐᓕᕐᓗᑎᒃ ᖁᕕᐊᒋᓂᖅᐹᕆᔭᕐᒥᓂᒃ ᐃᒻᖏᖅᑎᒥᒃ. ᐊᓕᐊᓇᐃᙱᑦᑑᓇᔭᖅᑐᒃᓴᐅᔪᖅ ᐃᓅᖃᑎᒦᖃᑕᐅᙱᖦᖢᓂ, ᑭᓯᐊᓂ ᐊᒃᓱᓪᓘᓐᓃᑦ ᐃᒻᖏᖅᑎᒥᒃ ᐊᓕᐊᓇᐃᒋᔭᕐᓂᒃ ᑕᐅᑐᖃᑕᐅᔪᓐᓇᕋᕕᑦ.”

ᑐᑕᓐᓄᐊᖅ ᓯᕗᓪᓕᖅᐸᐅᑎᓚᐅᖅᓯᒪᔪᖅ Aboriginal Music Countdown-ᑯᑦ 2010-ᒥ ᐃᒻᖏᐅᑎᖓᒍᑦ ᐱᖓᓱᑦ ᐃᒻᖏᖅᑏᑦ, ᓯᕗᓪᓕᖅᐹᒥ ᐃᒻᖏᐅᓯᐊᕐᒥᓃᖃᑕᐅᔪᖅ.

ᐅᖃᖅᖢᓂ ᓄᑖᓂᒃ ᐃᒻᖏᐅᑎᓂᒃ ᑎᑎᕋᖅᐸᓪᓕᐊᓕᕋᒥᒎᖅ ᑐᒡᓕᐊᒍᑦ ᑲᑎᑦᑎᕙᓪᓕᐊᔪᖅ, ᓂᐱᙳᖅᑎᑉᐸᓪᓕᐊᔪᒪᓂᐊᖅᑕᖓ ᕿᓚᒻᒥᐅᔪᒃᑯᑦ ᓯᕗᓂᒃᓴᒃᑯᑦ.

“ᐃᓄᑑᑉᓗᖓ ᐊᖏᕐᕋᕋᓂ ᐃᖃᓗᖕᓂ ᑎᑎᕋᓕᓚᐅᖅᑐᖓ ᐃᒻᖏᐅᑎᓂᒃ ᐊᒻᒪᓗ ᓯᕗᓪᓕᖅᐹᒥ ᐱᐊᓂᒃᓯᓵᑦᑎᐊᖅᑐᖓ, ᑕᐃᒪᒃᑲᓐᓂᐅᓂᐊᖅᑐᑦ ᖁᓕᑦ 15-ᓘᓐᓃᑦ ᐊᑕᐅᓯᕐᒧᑦ ᓂᐱᒃᓴᒧᑦ ᑲᑎᓯᒪᔪᓐᓇᖁᑉᓗᒋᑦ.

“ᐊᓕᐊᓇᐃᒃᑯᓐᓃᖃᑕᐅᓚᐅᖅᑎᓪᓗᖓ ᐊᐅᔭᐅᓚᐅᖅᑐᖅ ᐃᓕᖅᑯᓯᓕᕆᔨᒃᑯᑦ ᐃᑦᓴᕐᓂᑕᓕᕆᔨᒃᑯᑦ ᐅᕙᒻᓂᒃ ᐅᔾᔨᕈᓱᓚᐅᕐᒪᑕ ᐊᒻᒪᓗ ᓂᐱᓕᐅᕆᒃᑲᓐᓂᖁᔨᔪᑦ.

ᐃᓄᐃᑦ ᓴᓇᙳᐊᖅᑎᓄᑦ ᐃᒻᖏᖅᑎᓄᓪᓗ ᑲᑐᔾᔨᖃᑎᒌᒃᑯᖏᑦ ᐅᕙᒻᓂᒃ ᑐᓵᓚᐅᕐᒥᔪᑦ ᐊᒻᒪᓗ ᑮᓇᐅᔭᓕᖅᓯᔪᒪᔪᑦ ᐃᒻᖏᐅᓯᐅᕈᓐᓇᖁᑉᓗᖓ, ᑕᐃᒪᐃᒻᒪᑦ ᐃᒻᖏᐅᓯᐅᖅᐸᓪᓕᐊᑐᐃᓐᓇᕆᐊᖃᓕᖅᑐᖓ, ᑯᑭᒃᑕᐹᕋ ᑎᒍᓗᒍ ᐊᒻᒪᓗ ᑎᑎᕋᖃᑦᑕᕐᓗᖓ ᐃᒻᖏᐅᑎᓂᒃ.

“ᑕᐃᒪᑐᖅ, ᑲᔪᓯᑦᑎᐊᕐᓂᐊᖅᐳᖅ ᐊᒻᒪᓗ ᓱᑲᔪᒃᑯᑦ ᐱᐊᓂᑦᑎᐊᕐᓗᒍ.”