ᓄᑖᓪᓚᕆᒃ ᐃᓄᒃᑐᐃᓐᓇᖅ ᑕᓚᕕᓴᒃᑯᑦ ᓵᓄᒃᓴᖅ ᓴᖅᑭᓐᓇᔭᖅᑐᖅ ᓄᓇᕗᒥ ᐅᑭᐅᑉ ᓄᙳᕈᔪᐊᓂ ᑕᒡᕙᓂ ᐅᑭᐅᒥ.
ᐃᓄᐃᑦ ᑕᓚᕕᓴᒃᑯᑦ ᑕᑯᓐᓇᒐᒃᓴᓕᕆᔨᒃᑯᖏᑦ −− ᑕᑕᑎᕆᓯᒪᓕᖅᑐᑦ ᐊᓕᓚᔪᕐᓂᒃ ᑲᓇᑕᒥ ᓈᓚᐅᑎᓕᕆᔨᒃᑯᓐᓄᑦ − ᑕᓚᕕᓴᓕᕆᔨᒃᑯᓐᓄᑦ ᐊᒻᒪᓗ ᑐᓴᐅᒪᖃᑦᑕᐅᑎᓕᕆᔨᒃᑯᑦ ᑲᑎᒪᔨᖏᓐᓄᑦ −− ᐱᓕᕆᓂᐊᖅᑐᑦ ᓴᖅᑭᔮᖅᑎᑦᑎᒃᑲᓐᓂᕐᓂᐊᕐᓂᕐᒧᑦ ᐃᓕᖅᑯᓯᑐᖃᑎᒍᑦ ᐃᓄᒃᑎᑐᓪᓗ ᐃᓕᓐᓂᐊᕈᑎᒃᓴᓂᒃ ᐊᒻᒪᓗ ᓂᕆᐅᒋᔭᐅᔪᑦ ᐱᒻᒪᕆᐊᓗᒃᑯᑦ ᐊᑑᑎᖃᕐᓂᐊᕐᓂᖏᓐᓄᑦ ᐃᓄᐃᑦ ᑕᕐᕆᔭᐅᓯᐅᖅᑏᑦ ᑕᑯᒃᓴᐅᑎᑦᑎᔪᓐᓇᖃᑦᑕᕐᓂᐊᖅᖢᑎᒃ ᓴᓇᓯᒪᔭᖏᓐᓂᒃ ᑕᕐᕆᔭᐅᓯᐅᖅᓯᒪᔭᖏᓐᓂᒃ.
ᐊᔾᔨ ᒍᐊᑦ ᐱᓕᐊᑦᒥᙶᖅᑐᖅ
ᓄᓇᕗᑦ ᑐᙵᕕᒃᑯᑦ ᑎᒥᖓ ᑮᓇᐅᔭᓕᖅᓯᓯᒪᔪᖅ ᓄᑖᒥᒃ ᑕᑯᓐᓇᒐᒃᓴᓕᕆᔾᔪᑎᒥᒃ ᑮᓇᐅᔭᓕᖅᓯᒪᑉᓗᒍ $2.4 ᒥᓕᔭᒥᒃ ᐱᖓᓱᓄᑦ ᐅᑭᐅᓄᑦ ᖃᐃᔪᓄᑦ.
ᓄᓇᕗᑦ ᑐᙵᕕᒃᑯᑦ ᑎᒥᖓ ᑐᓴᒐᒃᓴᒥᒃ ᓴᖅᑭᑎᑦᑎᓚᐅᖅᑎᓪᓗᒍ ᓯᑕᒻᒥᕐᒥ, ᔪᓚᐃ 9-ᒥ, ᑐᓴᖅᑎᑦᑎᓚᐅᖅᑐᑦ ᑕᒪᓐᓇ ᑕᑯᓐᓇᒐᒃᓴᓕᕆᔾᔪᑎ ᑐᕌᖓᓂᖃᕐᓂᖅᓴᐅᓂᐊᕐᒪᑦ ᓴᙱᒃᑎᑉᐹᓪᓕᕈᓐᓇᖁᑉᓗᒍ ᐃᓄᒃᑎᑐᑦ ᐅᖃᐅᓯᖅ ᐊᒻᒪᓗ ᐃᓄᐃᑦ ᐃᓕᖅᑯᓯᑐᖃᖓ.
ᐃᐅᕆᒃ ᐊᓄᐃ ᐊᕐᕕᐊᕐᒥᐅᑕᖅ, ᑮᓇᐅᔭᓕᕆᔨᒋᔭᐅᔪᖅ ᐃᓄᐃᑦ ᑕᓚᕕᓴᓕᕆᔨᒃᑯᑦ ᐊᐅᓚᑦᑎᔨᖏᓐᓄᑦ, ᐅᖃᖅᖢᓂ ᖃᓄᖅ ᐋᖅᑭᐅᒪᓂᕆᓂᐊᖅᑕᖓ ᐅᖃᖃᑎᒋᔭᐅᖏᓐᓇᖅᓯᒪᖕᒪᑦ ᐊᑯᓂᐅᓕᖅᑐᖅ.
ᐅᖃᖅᖢᓂ ᑕᒪᑐᒪ ᐱᓕᕆᐊᖑᓂᖓ ᐃᒻᒪᖄ ᖁᓕᑦ ᐅᑭᐅᖑᓕᖅᑐᑦ, ᐊᒻᒪᓗ ᓱᑲᔪᒃᑯᑦ ᓴᖅᑭᑉᐸᓪᓕᐊᔪᖃᓕᖅᖢᓂ ᓲᕐᓗ ᑮᓇᐅᔭᓕᕆᓂᒃᑯᑦ ᑕᑯᓐᓇᒐᒃᓴᓕᕆᔨᒃᑯᑦ ᓴᖅᑭᓪᓚᑦᑖᕈᓐᓇᖁᑉᓗᒋᑦ.
“ᐊᕐᕕᐊᑦ ᐊᒻᒪᓗ ᐱᓕᕆᖃᑎᒌᒃᑐᑦ ᐳᐃᒍᖅᑕᐅᑎᓪᔮᙱᑕᒃᑲ, ᐊᒻᒪᓗ ᐊᔭᐅᖅᑐᕈᑎᒃᑲᓐᓂᕐᓂᐊᖅᑕᒃᑲ ᒥᑭᓐᓂᖅᓴᑦ ᓄᓇᓖᑦ ᓴᖅᑭᔮᖃᑕᐅᔪᓐᓇᖁᑉᓗᒋᑦ ᐊᒻᒪᓗ ᓂᐱᖃᕈᓐᓇᖁᑉᓗᒋᑦ ᐃᓱᒪᓕᐅᕆᖃᑕᐅᓂᒃᑯᑦ.” ᑕᐃᒪᓐᓇ ᐅᖃᖅᖢᓂ ᐊᓄᐃ.
“ᐊᐅᓪᓛᖅᑎᑦᑎᑉᓗᓂ ᑕᓚᕕᓴᒃᑯᑦ ᑕᑯᓐᓇᒐᒃᓴᓕᕆᔾᔪᑎᒥᒃ, ᓲᖃᐃᒻᒪ ᕿᓂᕐᓇᖃᑦᑕᕐᒪᑦ ᑕᑯᒃᓴᐅᔪᓐᓇᕐᓂᐊᖅᑐᓂᒃ, ᐱᓗᐊᖅᑐᒥ ᓄᑖᓂᒃ ᑕᑯᒃᓴᐅᔪᒃᓴᓂᒃ.
“ᓇᓗᓇᙱᑦᑐᖅ ᐊᒥᒐᖅᓯᖃᑦᑕᕐᓂᐊᖅᑐᒍᑦ ᓯᕗᓪᓕᖅᐹᒃᑯᑦ ᓴᖅᑭᔮᓕᖅᐸᑕ ᑕᑯᒃᓴᐅᔪᒃᓴᑦ, ᐊᒻᒪᓗ ᓴᖅᑭᔮᖃᑦᑕᖅᓯᒪᔪᓂᒃ ᓴᖅᑭᑦᑎᑦᑎᖃᑦᑕᒃᑲᓐᓂᕋᔭᖅᑐᒃᓴᐅᔪᒍᑦ ᐃᓗᐃᑦᑐᕈᖅᓯᒪᙱᓪᓗᒋᑦ ᐃᓚᖏᑦ ᐱᒋᐊᓕᓵᖅᑎᓪᓗᑕ.”
ᐊᓄᐃ ᐅᖃᖅᖢᓂ ᓂᕆᐅᖕᓂᖃᑦᑎᐊᖅᑐᕉᖅ ᐃᓄᐃᑦ ᑕᓚᕕᓴᒃᑯᑦ ᑕᑯᓐᓇᒐᒃᓴᓕᕆᔨᒃᑯᖏᑦ ᓄᑖᓂᒃ ᐱᕕᒃᓴᕆᔭᐅᔪᓂᒃ ᓴᖅᑭᑎᑦᑎᓂᐊᕐᒪᑦ ᐃᓄᐃᑦ ᑕᕐᕆᔭᐅᓯᐅᖅᑎᒃᑯᑎᒍᑦ ᐱᓕᕆᐊᕆᓯᒪᔭᖏᑦ ᑕᑯᔭᐅᔪᓐᓇᖁᑉᓗᒋᑦ.
ᐅᖃᖅᖢᓂ ᑕᑯᓐᓇᒐᒃᓴᓕᕆᔨᒃᑯᒡᒎᖅ ᑮᓇᐅᔾᔭᒃᓴᕈᑎᒃᓴᒃᑯᑦ ᐱᕚᓪᓕᖅᑎᑦᑎᔪᓐᓇᕐᓂᐊᕐᒥᔪᖅ ᐃᓄᐃᑦ ᐱᔫᒥᒍᓱᖃᑦᑕᖅᑎᓪᓗᒋᑦ ᐊᒻᒪᓗ ᐱᒋᐊᕈᑕᐅᓗᓂ ᓱᓇᙳᖅᓴᕈᒪᔪᓄᑦ ᓄᓇᕗᓗᒃᑖᒥ.
“ᒫᓐᓇᐅᔪᖅ, ᓴᖅᑭᓐᓇᔭᖅᑐᑦ ᓄᓇᕗᒥᙶᖅᑐᑦ ᐊᒥᒐᕐᒪᑕ ᐊᒻᒪᓗ ᐃᓄᐃᑦ ᓴᓇᙳᐊᖅᑏᑦ ᑕᐃᒪᐅᔫᒐᓗᐊᑦ ᑕᑯᔭᒃᓴᐅᓇᔭᖅᑐᑦ.
“ᑕᐃᒪᑐᖅ, ᑕᒡᕙᐅᑎᓪᓗᒍ ᓄᑖᖅ ᑕᑯᓐᓇᒐᒃᓴᓕᕆᔾᔪᑎ ᓄᓇᕗᒧᑦ ᑐᕌᖓᔪᖅ, ᐅᔾᔨᕆᔭᐅᑦᑎᐊᕐᓂᐊᖅᐳᖅ ᐊᒻᒪᓗ ᓄᓇᕗᒥᐅᑦ ᐊᒻᒪᓗ ᐊᓯᖏᓐᓂᒃ ᓄᓇᖃᖅᑐᑦ ᑐᓵᔪᓐᓇᖃᑦᑕᕐᓂᐊᖅᑐᑦ ᐅᖃᐅᓯᑉᑎᓐᓂᒃ ᐃᓕᖅᑯᓯᑐᖃᑉᑎᓐᓂᒡᓗ.
“ᑕᐃᒪᓐᓇ, ᑕᐃᒪᑐᖅ ᐱᐅᔪᒃᑯᑦ ᐊᒃᑐᖅᓯᓂᖃᕐᓂᐊᖅᐳᖅ ᐅᖃᐅᓯᕐᖓᐅᑎᕗᑦ ᐊᑐᖅᑕᐅᙱᓐᓂᖅᓴᒻᒪᕆᐊᓘᓕᕐᒪᑦ ᐊᒻᒪᓗ ᐅᖃᖃᑎᖃᖅᓯᒪᓪᓚᕆᒃᑐᒍᑦ ᑕᓚᕕᓴᒃᑯᑦ ᓴᖅᑭᐅᒪᓂᖅᓴᐅᖃᑦᑕᖁᑉᓗᒍ.
“ᑕᐃᒪᑐᖅ ᑕᒪᓐᓇ ᓄᑖᖅ ᐱᕕᒃᓴᕆᔭᐅᔪᖅ ᓴᖅᑭᔮᖅᑎᑦᑎᓂᖅᓴᐅᓂᐊᖅᐳᖅ ᐃᓄᖁᑎᑉᑎᓐᓂᒃ ᐊᒻᒪᓗ ᓄᑕᕋᑉᑎᓐᓂᒃ ᓂᐱᖏᑦ ᑐᓴᖅᑕᐅᓂᖅᓴᐅᔪᓐᓇᖁᑉᓗᒋᑦ.”