ᐱᓇᓱᐊᕈᓯᐅᑉ ᓄᙳᐊᓂᐅᓚᐅᖅᑐᖅ ᑲᖏᖅᖠᓂᕐᒥ ᐃᓐᓇᑐᖃᐅᔪᑦ ᖁᖓᔮᑲᑕᑦᑎᐊᓚᐅᖅᑐᑦ ᐊᖑᓇᓱᒃᑎᒃᑯᑦ ᑲᑎᒪᔨᖏᓐᓄᑦ ᐅᒥᐊᖅᑐᕈᔾᔭᐅᖕᒪᑕ ᕿᑭᖅᑕᕆᔭᐅᔪᓄᑦ ᓄᓇᖓᑕ ᖃᓂᒋᔭᖓᓂᒃ.
“ᑕᑯᑉᓗᓂ ᐃᓐᓇᑐᖃᐅᔪᓂᒃ ᖁᕕᐊᓱᒃᑐᓂᒃ ᑮᓇᖏᑦ ᖃᐅᒪᔪᑯᓘᑉᓗᑎᒃ. ᑕᑯᔪᒪᓪᓚᑦᑖᓚᐅᖅᑕᒃᑲ,” ᑕᐃᒪᓐᓇ ᐅᖃᖅᖢᓂ ᐊᖑᓇᓱᒃᑎᒃᑯᑦ ᑲᑎᒪᔨᑦᑕ ᑎᑎᕋᕐᕕᖕᒥ ᑐᑭᒧᐊᒃᑎᑦᑎᔨᖓ ᐊᓐᑐᕈ ᐊᑭᕈᓕᒃ.
ᐊᓐᑐᕈ ᐊᑭᕈᓕᖕᒥᙶᖅᑐᖅ ᐊᔾᔨ
ᐊᐅᓪᓚᕈᔾᔭᐅᖃᑦᑕᕐᓂᐊᕐᓂᖏᓐᓄᑦ ᑕᒪᓐᓇ ᐃᓚᐅᖃᑕᐅᔪᖅ ᐊᖑᓇᓱᒃᑎᒃᑯᑦ ᑲᑎᒪᔨᖏᑦ ᐋᖅᑭᒃᓱᐃᓯᒪᑎᓪᓗᒋᑦ ᓄᓇᒧᙵᐅᔾᔨᖃᑦᑕᕐᓂᐊᕐᓂᕐᒧᑦ ᐊᐅᔭᐅᑉ ᓄᙳᕈᔪᐊᓂ.
ᓯᕗᓪᓕᖅᐹᖅ ᐋᖅᑭᒃᓱᖅᑕᐅᓯᒪᓚᐅᖅᑐᖅ ᐊᒐᓯ 16-ᒧᑦ ᑭᓯᐊᓂ ᐃᓕᔭᐅᖓᖅᖢᓂ ᐊᒐᓯ 17-ᒧᑦ ᓯᓚᑦᑕᐅᓚᐅᙱᓐᓂᖓᓄᑦ.
ᐅᒥᐊᖅᑐᓚᐅᖅᑐᑦ ᐅᖅᓱᕆᐊᓄᑦ, 25−ᓂᒃ ᑭᓛᒥᑕᓂᒃ ᐅᖓᓯᖕᓂᓕᒃ ᑲᖏᖅᖠᓂᕐᒧᑦ, ᐊᖏᔪᓄᙵᐅᓚᐅᖅᖢᑎᒡᓗ, ᕿᑭᖅᑕᖅ ᖁᓕᓂᒃ ᑭᓛᒥᑕᓂᒃ ᐅᖓᓯᖕᓂᓕᒃ ᐅᖅᓱᕆᐊᑦ ᐅᐊᖕᓇᖓᑕ ᑲᓇᖕᓇᖅᐸᓯᖓᓃᑦᑐᖅ.
ᑕᒪᕐᒥᒃ ᐃᓐᓇᑐᖃᐃᑦ ᐅᒥᐊᖅᑐᖃᑕᐅᖃᑦᑕᖅᓯᒪᓂᑰᔪᑦ ᑭᓯᐊᓂ ᐃᓚᖏᑦ ᖃᖔᓗᖕᓂ ᐃᓚᐅᖃᑕᐅᙱᓯᒪᔪᑦ.
“ᐃᓚᖏᑦ ᖁᓕᓂᒃ ᐅᑭᐅᓂᒃ ᐅᒥᐊᖅᑐᖃᑕᐅᖃᑦᑕᙱᓯᒪᔪᑦ,” ᑕᐃᒪᓐᓇ ᐅᖃᖅᖢᓂ ᐊᑭᕈᓕᒃ. “ᐃᓚᖏᑦ ᐅᖃᓚᐅᖅᑐᑦ ᐅᒥᐊᖅᑐᖃᑕᐅᔾᔮᙱᓐᓇᓱᒋᓕᖅᖢᑎᒃ ᖃᖓᑐᐃᓐᓇᖅ.”
ᐊᑐᓂ ᐅᒥᐊᑦ ᐊᖁᑎᖃᓚᐅᖅᑐᑦ ᐊᒻᒪᓗ ᐃᑲᔪᖅᑎᖃᖅᖢᑎᒃ ᐃᓐᓇᑐᖃᐃᑦ ᓴᓚᐅᓱᒍᓐᓇᖁᑉᓗᒋᑦ. ᐅᒥᐊᖅᑐᖅᑎᖓ ᓄᓇᒥ ᐃᒪᕐᒥᒃ ᖃᐅᔨᒪᑦᑎᐊᖅᖢᓂ, ᐃᓐᓇᑐᖃᐃᑦ ᐅᓂᑉᑳᖅᑐᐊᖃᑦᑕᓕᓚᐅᖅᑐᑦ ᐊᒻᒪᓗ ᐅᖃᐅᓯᖃᖃᑦᑕᖅᖢᑎᒃ ᖃᐅᔨᒪᔭᒥᓂᒃ ᑕᐃᑉᓱᒪᓂᒥᒃ. ᐅᒥᐊᖅᑐᖅᑐᑦ ᑐᒃᑐᓚᐅᖅᑐᓪᓘᓐᓃᑦ ᑕᐅᕙᓂ.
“ᐅᓂᑉᑳᖅᑐᐊᖃᑦᑕᓚᐅᖅᑐᑦ ᓄᓇᒦᖃᑦᑕᓚᐅᕐᓂᕐᒥᓂᒃ ᐊᒻᒪᓗ ᐅᒥᐊᖅᑐᖃᑕᐅᖃᑦᑕᓚᐅᕐᓂᕐᒥᓂᒃ,” ᑕᐃᒪᓐᓇ ᐅᖃᖅᖢᓂ ᐊᖁᑎᒋᔭᐅᓚᐅᖅᑑᑉ ᐃᓚᖓ. ᖁᕕᐊᓱᒍᔾᔨᑦᑎᐊᓚᐅᖅᑐᖅ ᐃᓐᓇᑐᖃᕐᒥᒃ.”
ᐊᑕᐅᓯᖅ ᖃᐅᔨᒪᔭᐅᓪᓚᕆᒃᑐᖅ ᐅᖅᓱᕆᐊᓕᐊᖅᖢᓂ ᐃᓄᐃᑦ ᑕᐅᕗᙵᐅᔪᑦ ᐹᕐᖑᖃᑦᑕᕆᐊᖃᕐᒪᑕ ᓄᓇᒧᑦ ᓯᕗᓪᓕᖅᐹᒥ ᑕᐅᕗᙵᖅᓯᒪᒍᕕᑦ.
“ᑕᒪᕐᒥᒃ ᐃᓐᓇᑐᖃᐃᑦ ᑕᐅᕗᙵᖃᑕᐅᓐᓂᑰᓚᐅᖅᑐᑦ ᑕᐃᒪᐃᒻᒪᑦ ᐹᕐᖑᕆᐊᖃᖅᑐᖃᓚᐅᙱᑦᑐᖅ,” ᑕᐃᒪᓐᓇ ᐅᖃᖅᖢᓂ ᐊᑭᕈᓕᒃ.
ᐊᑭᕈᓕᒃ, ᐅᒥᐊᖅᑐᖃᑕᐅᓚᐅᙱᑦᑑᒐᓗᐊᖅ, ᐅᖃᓚᐅᖅᑐᖅ ᐅᖃᓗᓚᐅᕋᒥᒎᖅ ᖃᑉᓯᑲᓪᓚᖕᓄᑦ ᐃᓐᓇᑐᖃᕐᓄᑦ ᖃᑉᓯᑲᓪᓚᑦ ᐅᑉᓗᑦ ᐱᐊᓂᒃᓯᒪᓕᖅᑎᓪᓗᒋᑦ.
“ᖁᕕᐊᓱᑦᑎᐊᓚᐅᖅᑐᑦ,” ᑕᐃᒪᓐᓇ ᐅᖃᖅᖢᓂ.
ᐊᑭᕈᓕᒃ ᐅᖃᖅᖢᓂ ᒪᕐᕈᐃᖅᑕᕐᓗᑎᒡᓘᓐᓃᒡᒎᖅ ᐅᒥᐊᖅᑐᕈᔾᔨᒃᑲᓐᓂᕈᒫᖅᑐᑦ ᐃᓐᓇᑐᖃᕐᓂᒃ. ᐊᖑᓇᓱᒃᑎᒃᑯᑦ ᑲᑎᒪᔨᖏᑦ ᒫᓐᓇᐅᔪᖅ ᑐᓴᕈᒪᔪᑦ ᐃᓚᐅᖃᑕᐅᔪᒪᓇᔭᖅᑐᓂᒃ.
ᑕᐃᒪᐃᓕᐅᖅᑎᑦᑎᑉᓗᓂ ᐃᓐᓇᑐᖃᕐᓂᒃ ᐱᒻᒪᕆᐊᓗᒃ ᐊᑭᕈᓕᖕᒧᑦ.
“ᐃᓐᓇᑐᖃᖁᑎᒋᔭᖅᐳᑦ ᑕᐃᒪᐅᙱᑉᐸᑕ ᑕᒫᓃᓐᓇᔭᙱᓐᓇᑉᑕ ᐅᑉᓗᒥ. ᐱᕈᖅᓴᖅᑕᐅᓚᐅᕐᒪᑕ ᑕᒫᓂ ᐊᒻᒪᓗ ᐱᕈᓚᐅᖅᖢᑎᒃ ᑕᒫᓂ.
“ᖃᐅᔨᒪᑦᑎᐊᖅᑐᑦ ᓄᓇᒥ ᐃᒪᑉᑎᓐᓂᒡᓗ. ᐃᓕᖅᑯᓯᑐᖃᑉᑎᓐᓂᒃ ᖃᐅᔨᒪᑦᑎᐊᖅᑐᑦ. ᐳᐃᒍᕆᐊᖃᙱᑕᖅᐳᑦ.”
ᐊᖑᓇᓱᒃᑎᒃᑯᑦ ᑲᑎᒪᔨᖏᑦ ᐸᕐᓇᐃᔪᑦᑕᐅᖅ ᓄᓇᒧᙵᐅᔾᔨᖃᑦᑕᕈᒫᕐᓂᕐᒧᑦ ᒪᒃᑯᒃᑐᓂᒃ ᐱᓇᓱᐊᕈᓯᕐᓂᒃ ᖃᐃᔪᓂᒃ. ᒪᒃᑯᒃᑐᓂᒃ ᐱᑕᖃᖅᐸᑦ ᐱᔫᒥᒍᓱᒃᑐᓂᒃ ᐊᑎᓕᐅᕋᔭᖅᑐᑦ ᐊᖑᓇᓱᒃᑎᒃᑯᑦ ᑲᑎᒪᔨᖏᑦᑕ ᑎᑎᕋᕐᕕᖓᓂᒃ ᐅᕝᕙᓘᓐᓃᑦ ᒫᓂ ᐅᓗᔪᒃ ᐃᓕᓐᓂᐊᕐᕕᖕᒥ.
“ᐅᔾᔨᕐᓇᖅᓯᓲᖅ ᖃᓄᖅ ᐃᓚᐅᖃᑕᐅᑎᑦᑎᓯᒪᙱᓐᓂᑉᑎᓐᓄᑦ ᒪᒃᑯᒃᑐᓂᒃ ᐃᓐᓇᑐᖃᕐᓂᒡᓗ.” ᑕᐃᒪᓐᓇ ᐅᖃᖅᖢᓂ ᐊᑭᕈᓕᒃ. “ᐱᒻᒪᕆᐊᓗᒃ ᐱᓕᕆᖃᑎᒋᖃᑦᑕᕆᐊᖃᕐᓂᑉᑎᓐᓄᑦ. ᐱᓗᐊᖅᑐᒥ ᐃᓱᒪᓕᕆᓂᒃᑯᑦ ᐃᑲᔪᖅᑐᖅᑕᐅᙱᓗᐊᖅᑎᓪᓗᒋᑦ ᒥᑭᔪᑦ ᓄᓇᓖᑦ.
ᐃᓕᖅᑯᓯᑐᖃᖅᐳᑦ ᐃᓕᓐᓂᐊᖅᑕᐅᔭᕆᐊᓕᒃ ᒪᒃᑯᒃᑐᑉᑎᓐᓄᑦ.”