ᓯᕗᓪᓕᖅᐹᑦ ᐃᓕᓐᓂᐊᖅᑐᑦ ᓂᕿᓕᕆᓂᕐᒥᒃ ᖁᕕᐊᓱᑦᑎᐊᓚᐅᖅᑐᑦ ᑲᖏᖅᖠᓂᕐᒥ ᑕᖅᑭᖅ ᐱᒋᐊᓕᓵᖅᑎᓪᓗᒍ.
ᐃᓕᓐᓂᐊᕈᑎ ᑮᓇᐅᔭᓕᖅᑐᖅᑕᐅᓯᒪᔪᖅ ᓂᕿᖃᑦᑎᐊᕆᐊᖃᕐᓂᕐᒧᑦ ᑲᑐᔾᔨᖃᑎᒌᒃᑯᓐᓄᑦ ᐃᓄᓕᕆᔨᒃᑯᑎᒍᑦ.
ᐃᓕᓐᓂᐊᕐᓂᕐᒧᑦ ᐃᓕᓐᓂᐊᖅᑎᑦᑎᔨ ᑭᓕ ᓕᓐᑎᐅᓪ ᐃᓕᑕᖅᓯᓂᒃᑯᓐᓂᙶᖅᑐᖅ − ᓄᓇᕗᒥ ᐅᖃᐅᓯᓕᕆᓂᕐᒧᑦ ᑲᑎᒪᔨᓂᒃ ᐅᖃᖅᖢᓂ ᓂᕿᖃᑦᑎᐊᕆᐊᖃᕐᓂᕐᒧᑦ ᑲᑐᔾᔨᖃᑎᒌᒃᑯᑦ ᑐᓴᕈᒪᓚᐅᕐᒪᑕ ᖃᓄᐃᑦᑐᓂᒃ ᐃᓕᓐᓂᐊᕈᑎᓂᒃ ᓴᖅᑭᑦᑐᖃᕈᓐᓇᕐᒪᖔᑦ ᓂᕿᖃᑦᑎᐊᖅᑎᑦᑎᖃᑦᑕᕋᔭᕐᓂᕐᒧᑦ ᐊᒻᒪᓗ, ᑕᐃᒪᐃᓕᐅᖅᑎᓪᓗᒋᑦ, ᐃᑲᔪᕐᓗᑎᒃᑕᐅᖅ ᐃᓄᖕᓂᒃ ᐃᓕᑦᑎᔪᓐᓇᕐᓂᕐᒧᑦ ᐃᓕᓯᒪᙱᑕᖏᓐᓂᒃ.
ᐅᖃᖅᖢᓂ ᐃᓕᓐᓂᐊᕈᑎᒃᓴᒧᑦ ᑐᒃᓯᕋᐅᑎ ᑐᓂᕐᕈᑎᒋᓚᐅᕐᒪᒍ ᐃᓕᓯᒪᔭᖏᑦ ᒪᓕᒃᖢᒋᑦ ᓯᓚᑦᑐᖅᓴᕐᕕᖕᒥ ᐃᓕᓐᓂᐊᓚᐅᖅᑳᖅᖢᓂ. “ᐃᓕᓐᓂᐊᕆᐊᓚᐅᕋᒪ ᑕᐃᒻᓇᓗ ᐃᓕᖦᖢᒍ ᐃᓕᓐᓂᐊᖅᑎᑦᑎᒍᑎᒋᔭᕋ, ᐃᓱᒪᓕᓚᐅᖅᑐᖓ ᐱᐅᔫᓇᔭᕐᓂᖓᓄᑦ ᐃᓕᓐᓂᐊᖅᑎᑦᑎᒍᒪ ᓂᕿᓕᕆᓂᕐᒥᒃ ᖃᓄᖅ ᓂᖀᑦ ᐸᐸᑐᖅᑕᐅᑦᑎᐊᕐᓂᖅᓴᐅᖃᑦᑕᕋᔭᕐᒪᖔᑕ ᓂᕿᑖᕐᓇᕈᓘᔭᖃᑦᑕᕐᒪᑦ ᐅᑭᐅᑉ ᐃᓚᖓᓂᒃ ᑕᒫᓂ, ᐊᒻᒪᓗ ᐊᑯᓂ ᓂᕿᒃᓴᖅᑖᕈᓐᓇᐃᓪᓕᖃᑦᑕᖅᖢᑕ ᐅᑭᐅᒃᑯᑦ ᑕᖅᑭᕆᔭᐅᔪᓂᒃ,” ᑕᐃᒪᓐᓇ ᐅᖃᖅᖢᓂ ᓕᓐᑎᐅᓪ.
“ᑕᒪᓐᓇ ᒪᓕᒃᑐᖅ ᓲᕐᓗ ᖃᓄᖅ ᐃᓄᐃᑦ ᒥᒃᑯᓕᐅᖃᑦᑕᕐᓂᖏᓐᓄᑦ, ᑕᐃᒪᓐᓇ ᓂᕿᓂᒃ ᐸᐸᑐᖃᑦᑕᕐᒪᑕ, ᐅᕝᕙᓘᓐᓃᑦ ᖃᓄᖅ ᐱᑉᓯᓕᐅᖃᑦᑕᕐᓂᖏᓐᓄᑦ − ᑕᒪᓐᓇ ᐃᓕᓐᓂᐊᕈᑎ ᐅᑉᓗᒥᒧᑦ ᑐᕌᖓᓂᖅᓴᐅᔪᖅ ᖁᕕᐊᒋᔭᐅᓂᐊᕋᓱᒋᑉᓗᒍ ᐃᓕᓐᓂᐊᖅᑕᐅᓗᓂ ᐃᓱᒪᒋᓚᐅᕋᑉᑯ.
“ᐋᖅᑭᒃᓯᓕᓚᐅᖅᑐᒍᑦ ᓯᕗᓪᓕᖅᐹᒥ ᐃᓕᓐᓂᐊᕐᓂᐊᖅᑐᓂᒃ ᓂᕈᐊᖅᖠᖅᖢᑕ ᐃᓕᓐᓂᐊᕐᓂᐊᖅᑐᓂᒃ ᓯᑕᒪᓂᒃ ᐅᑉᓗᓂᒃ ᖃᔪᓕᐅᕐᓂᕐᒧᑦ ᐱᕈᖅᑐᓂᒡᓗ ᖃᓄᖅ ᑲᒪᖃᑦᑕᕋᔭᕐᓂᕐᒧᑦ, ᐅᑉᓛᒃᑯᑦ ᐃᓕᓐᓂᐊᖅᐸᒃᖢᑎᒃ ᐊᒻᒪᓗ ᐅᓐᓄᒃᑯᑦ, ᐊᒻᒪᓗ ᐅᑐᐱᕆᐅᑉ ᐃᓱᐊᓂ ᐱᓇᓱᐊᕈᓯᕐᒥ, ᐅᑉᓛᒃᑯᑦ ᐃᓕᓐᓂᐊᖅᑎᑦᑎᒋᐊᕈᒫᖅᖢᑕ ᐅᓐᓄᒃᑯᓪᓗ ᓂᕿᓕᕆᓂᕐᒧᑦ ᑐᒃᑐᓂᒃ ᐊᒻᒪᓗ ᑕᕆᐅᕐᒥᐅᑕᓂᒃ ᐃᖃᓗᖕᓂᒃ.”
ᑲᓛᒃ ᐅᖃᖅᖢᓂ ᐃᓕᓐᓂᐊᕈᑎ ᐊᒥᓱᓄᑦ ᐆᒃᑐᖅᑕᐅᓚᐅᕐᒪᑦ, ᐊᔪᕐᓇᓚᐅᖅᖢᓂ ᑕᒪᐃᓐᓂᒃ ᐃᓚᐅᖃᑕᐅᑎᑦᑎᒋᐊᒃᓴᖅ ᓯᕗᓪᓕᖅᐹᒃᑯᑦ ᐃᓕᓐᓂᐊᕈᑎᒃᑯᑦ.
ᐅᖃᖅᖢᓂ ᑕᒪᓐᓇᒎᖅ ᐅᔾᔨᕆᓚᐅᖅᑕᖓ ᓂᕿᓕᕆᓂᖅ ᓂᕿᓂᒃ ᐸᐸᑐᑦᑎᐊᕈᓐᓇᕐᓂᕐᒧᑦ ᐃᓕᓐᓂᐊᕈᑎ ᐃᓕᓐᓂᐊᖅᑕᐅᒃᑲᓐᓂᕆᐊᖃᕐᓂᐊᖅᑐᖅ ᑲᖏᖅᖠᓂᕐᒥ ᐱᔫᒥᒍᓱᒃᑐᑦ ᑕᐃᒪᐅᖕᒪᑕ.
“ᓯᕗᓪᓕᖅᐹᑦ ᒪᕐᕈᒃ ᐃᓕᓐᓂᐊᕐᕕᐅᔫᒃ ᐃᓕᓐᓂᐊᕈᑕᐅᓚᐅᖅᑐᑦ ᐊᕐᓇᐃᓐᓇᕐᓄᑦ ᐆᒃᑐᓚᐅᖅᑐᓄᑦ ᐊᒻᒪᓗ ᑕᒪᕐᒥᒃ ᖁᕕᐊᒋᔭᖃᑦᑎᐊᖅᑑᔭᓚᐅᖅᑐᑦ ᐃᓕᓐᓂᐊᕈᑎᒥᒃ ᐊᒻᒪᓗ ᐃᓕᑦᑎᑦᑎᐊᓚᐅᖅᖢᑎᒃ ᓄᑖᓂᒃ ᐊᔪᕈᓐᓃᕈᑎᒋᔭᖏᓐᓂᒃ, ᐃᒻᒪᖄ ᐃᓕᓐᓂᐊᕈᑎᒋᓚᐅᖅᓯᒪᙱᑕᖏᓐᓂᒃ.
“ᖁᒃᓴᓱᓚᐅᖅᑰᕐᒪᑕ ᖃᓄᖅ ᐱᒋᐊᕆᐊᒃᓴᖅ ᑭᓯᐊᓂ ᐃᓱᒪᓕᖅᑐᖓ, ᓯᑕᒪᓂᒃ ᐅᑉᓗᓂᒃ ᐃᓕᓐᓂᐊᓚᐅᖅᑳᖅᖢᑎᒃ, ᓴᓚᐅᓱᖕᓂᖅᓴᐅᓕᖅᑐᑦ ᐃᖕᒥᓂᒃ ᐅᒃᐱᕈᓱᖕᓂᖅᓴᐅᓕᖅᖢᑎᒃ ᐊᖏᕐᕋᒥ ᐆᒃᑐᕈᓐᓇᕐᓂᕐᒧᑦ.
“ᐃᓚᖏᑦ ᐃᓚᐅᖃᑕᐅᔪᑦ ᑕᒪᑐᒥᙵ ᑕᐅᑐᒃᑐᒃᓴᐅᔪᑦ ᐊᓯᐊᒍᑦ ᐸᐸᑐᕈᓐᓇᕐᓂᕐᒧᑦ ᒪᒃᑖᓂᒃ ᖁᐊᖅᑎᑐᐃᓐᓇᙱᓪᓗᒋᑦ, ᐅᕝᕙᓘᓐᓃᑦ ᐸᐅᕐᖓᖅᑕᕐᓂᖅᓴᐅᔪᒪᔪᒫᖅᑐᑦ ᒪᒪᖅᓴᐅᑎᓕᐅᕈᓐᓇᖅᓯᒐᒥᒃ ᐸᐅᕐᖓᕐᓂᒃ ᐊᑐᕐᓗᑎᒃ.
“ᐊᓯᐊᒍᒃᑲᓐᓂᖅ ᐱᓕᕆᔪᓐᓇᖅᓯᔪᑦ ᐸᐸᑐᕐᓂᕐᒧᑦ ᓂᕿᓂᒃ ᐊᖑᓇᓱᒃᑕᐅᕙᒃᑐᓂᒃ ᓄᓇᒥᓂᒃ, ᑭᓯᐊᓂ ᐊᔾᔨᐅᙱᑦᑐᒃᑯᑦ. ᑕᐃᒪᐃᒻᒪᑦ, ᐅᒃᐱᕈᓱᒃᑐᖓ ᐃᓕᓐᓂᐊᕈᑕᐅᔪᖅ ᖁᕕᐊᒋᔭᐅᑦᑎᐊᓚᐅᕐᒪᑦ ᑕᒪᐃᓐᓄᑦ ᐃᓕᓐᓂᐊᓚᐅᖅᑐᓄᑦ.”