Skip to content

ᐅᖃᐅᓯᓕᕆᔨᒃᑯᑦ ᑲᑎᒪᔨᖏᑦ ᓴᖅᑭᑎᑦᑎᔪᑦ ᑭᕙᓪᓕᕐᒥ ᑎᑎᕋᕐᕕᒃᑖᖓᓂᒃ ᑲᖏᖅᖠᓂᕐᒥ

0303litz FRONT
0303litz.jpg Photo courtesy Jovette Kurok Ilitaqsiniq: Nunavut Literacy Council members, from left, Aliisa Autut, Kelly Lindell, Quluaq Pilakapsi, Adriana Kusugak, Panikuluk Kabluitok and Amy Aingidlik stand proudly in front of the council's new home named after Quluaq Pilakapsi on Rankin Inlet on Feb. 9, 2021.

ᐃᓕᑕᖅᓯᓂᒃᑯᑦ: ᓄᓇᕗᒥ ᐅᖃᐅᓯᓕᕆᓂᕐᒧᑦ ᑲᑎᒪᔨᒃᑯᑦ ᑎᑎᕋᕐᕕᒃᑖᓵᖓ ᑲᖏᖅᖠᓂᕐᒥ ᓴᖅᑭᑎᑕᐅᓚᐅᖅᑐᖅ ᑕᖅᑭᐅᓚᐅᖅᑐᒥ, ᐊᑦᑎᖅᑕᐅᑉᓗᓂ ᓴᓇᔨᑦᑎᐊᕙᐅᓛᖑᖃᑕᐅᓯᒪᔫᑉ ᐊᑎᖓᓂᒃ, ᖁᓗᐊᖅ ᐱᓚᑲᑉᓯᒥᒃ. ᑲᑎᒪᔨᒃᑯᑦ ᓴᓇᔨᖓ ᐃᑦᑐᕆᔭᓇ ᑯᓱᒐᖅ ᐅᖃᐅᓚᐅᖅᑐᖅ ᐃᓕᑕᖅᓯᓂᒃᑯᑦ ᑮᓇᐅᔭᖅᑖᖅᑎᑕᐅᓚᐅᕐᒪᑕ ᐊᒡᓂᒍ ᐃᒍ ᐅᔭᕋᖕᓂᐊᖅᑐᓕᕆᔨᒃᑯᓐᓂᒃ ᐅᔭᕋᖕᓂᐊᖅᑐᓕᕆᔨᒃᑯᑦ ᖁᕕᐊᓲᑎᖃᖅᑎᓪᓗᒋᑦ ᓯᕗᓪᓕᖅᐹᒥ ᑯᕕᓯᔪᓂᒃ ᒎᓘᒥᒃ ᑕᓯᕐᔪᐊᕐᒥ 2019-ᒥ.

Nunavut Literacy Council members, from left, Aliisa Autut, Kelly Lindell, Quluaq Pilakapsi, Adriana Kusugak, Panikuluk Kabluitok and Amy Aingidlik stand proudly in front of the council's new home named after Quluaq Pilakapsi on Rankin Inlet on Feb. 9, 2021. Photo courtesy Jovette Kurok Ilitaqsiniq

ᐅᖃᖅᖢᓂ ᑐᓂᕐᕈᓯᐊᖅ ᐃᑲᔫᑎᒃᓴᐅᓚᐅᖅᑐᖅ ᐃᓕᑕᖅᓯᓂᒃᑯᓐᓄᑦ: ᓄᓇᕗᒥ ᐅᖃᐅᓯᓕᕆᓂᕐᒧᑦ ᑲᑎᒪᔨᒃᑯᓐᓄᑦ ᓂᐅᕕᕐᓂᐊᖅᑎᓪᓗᒋᑦ ᑎᑎᕋᕐᕕᒃᓴᒥᒃ ᑭᕙᓪᓕᕐᒥ.

“ᑎᑎᕋᕐᕕᖕᒥᒃ ᓂᐅᕕᕋᑉᑕ, ᑲᑎᒪᔨᕗᑦ ᐃᓱᒪᓕᐅᓕᓚᐅᖅᑐᑦ ᐊᑎᖅᑖᖁᑉᓗᒍ ᖁᓗᐊᖅ ᑎᑎᕋᕐᕕᖕᒥᒃ ᐃᓱᒪᒋᑉᓗᒍ ᖁᓗᐊᖅ ᐱᓚᑲᑉᓯ,” ᑕᐃᒪᓐᓇ ᐅᖃᖅᖢᓂ ᑯᓱᒐᖅ.

“ᐊᑯᓂ ᓴᓇᔨᒋᔭᐅᓚᐅᕐᒪᑦ ᓄᓇᕗᒥ ᐅᖃᐅᓯᓕᕆᔨᒃᑯᑦ ᑲᑎᒪᔨᖏᓐᓄᑦ ᐊᒻᒪᓗ, ᓴᓇᔪᓐᓃᕋᓗᐊᖅᑎᓪᓗᒍ, ᓴᓇᖃᑦᑕᖅᑐᖅ ᓱᓕ ᖃᓄᐃᓕᐅᖅᑎᑦᑎᑎᓪᓗᑕ ᐊᒻᒪᓗ ᒫᓐᓇᐅᔪᖅ ᐃᓐᓇᖁᑎᒋᔭᖅᐳᑦ ᐱᙳᐊᖅᑕᒃᑯᑦ ᐱᓕᕆᐊᕆᖃᑦᑕᖅᑕᒃᑯᑦ.

“ᐃᑲᔪᖅᑐᐃᖏᓐᓇᖃᑦᑕᖅᓯᒪᑎᓪᓗᒍ ᓄᓇᕗᒥ ᐅᖃᐅᓯᓕᕆᔨᒃᑯᑦ ᑲᑎᒪᔨᖏᓐᓂᒃ ᑲᑎᒪᔩᑦ ᐊᑦᑎᖅᓯᔪᒪᓕᓚᐅᖅᑐᑦ ᖁᓗᐊᕐᒥᒃ, ᐱᓕᕆᐊᕆᓯᒪᔭᖏᑦ ᐃᑲᔪᐃᓐᓇᕐᓂᖓᓗ ᐅᑉᓗᒥᒧᑦ ᑲᑐᔾᔨᖃᑎᒌᒃᑯᓐᓄᑦ ᐃᓱᒪᒋᑉᓗᒍ.

“ᑕᐃᒪᐃᒻᒪᑦ ᓈᒻᒪᒋᔭᐅᓕᓚᐅᖅᑐᖅ ᑎᑎᕋᕐᕕᒃᐳᑦ ᑕᐃᒎᓯᖅᑕᐅᖁᓕᖅᖢᒍ ᐊᑎᖓᒍᑦ.”

ᑯᓱᒐᖅ ᐅᖃᖅᖢᓂ ᑕᒪᕐᒥᒃ ᐃᓚᒌᒃᓴᒃᑯᓐᓂᕐᒥᐅᑕᑦ ᑕᒪᑐᒥᙵ ᓴᕆᒪᓱᑦᑎᐊᕐᒪᑕ − ᖁᓗᐊᖅ ᑕᒫᓃᑦᑐᓐᓇᕐᒪᑦ ᐊᒻᒪᓗ ᖁᕕᐊᓲᑎᖃᖃᑕᐅᔪᓐᓇᕐᒪᑦ ᐃᓕᑕᕆᔭᐅᓂᖓᒍᑦ ᐊᒻᒪᓗ ᐃᑲᔪᖅᓯᒪᓂᖓᒍᑦ ᐃᖕᒥᓄᑦ.

ᐅᖃᖅᖢᓂ ᖁᓗᐊᕉᖅ ᓄᖅᑲᓱᐃᑦᑐᖅ, ᐊᒻᒪᓗ ᐅᐱᓐᓇᖅᑐᖅ ᓴᓇᖕᒪᑦ ᓱᓕ ᐅᖃᓕᒫᒐᓕᕆᔨᒃᑯᓐᓄᑦ ᐅᑉᓗᒥᒧᑦ ᑎᑭᖦᖢᒍ, ᓴᓇᔪᓐᓃᖅᓯᒪᒐᓗᐊᖅᑎᓪᓗᒍ.

“ᖁᔭᓐᓇᒦᓪᓚᕆᒃᓯᒪᔭᖅᐳᑦ ᐊᒡᓂᒍ ᐃᒍ ᐅᔭᕋᖕᓂᐊᖅᑐᓕᕆᔨᒃᑯᑦ ᑐᓂᓯᓯᒪᓂᖏᓐᓄᑦ. ᐃᓗᐃᑦᑐᒃᑯᑦ ᑎᑎᕋᕐᕕᐅᑉ ᐊᑭᖓᓂᒃ ᖃᐃᑦᑎᓚᐅᙱᑦᑐᑦ ᑭᓯᐊᓂ ᑐᓂᓯᓯᒪᔪᑦ ᓂᐅᕕᕈᓐᓇᖅᓯᒍᑎᒥᒃ ᐊᒻᒪᓗ ᐅᕙᒍᑦ ᑲᒪᔪᓐᓇᖅᓯᑉᓗᑕ ᐊᑭᓕᖅᑑᑕᐅᕋᐅᔭᕆᐊᓕᖕᒥᒃ.

“ᑎᑎᕋᕐᕕᖃᓕᖅᑎᓪᓗᑕ ᑐᙵᕕᖃᕐᓂᖅᓴᐅᔫᔭᓕᖅᑐᒍᑦ ᐊᒻᒪᓗ ᑲᔪᓯᑎᑦᑎᑦᑎᐊᕈᓐᓇᓕᖅᖢᑕ ᐱᓕᕆᐊᒃᓴᑉᑎᓐᓂᒃ.

“ᐊᒥᓲᓂᖅᓴᑦ ᐃᓄᐃᑦ ᖃᐅᔨᒪᑎᓪᓗᒋᑦ, ᐃᓕᑕᖅᓯᓂᖅ ᐱᕈᖅᐸᓪᓕᐊᖕᒪᑦ ᐊᒻᒪᓗ ᐃᓚᓯᕙᓪᓕᐊᑉᓗᓂ ᐃᑲᔫᑎᒃᓴᒃᑯᑦ ᐃᓄᖕᓂᒃ ᓴᖅᑭᑎᑦᑎᕙᓪᓕᐊᓂᒃᑯᑦ ᓄᑖᓂᒃ ᓄᓇᓕᖕᓂᒃ ᐊᒻᒪᓗ ᓴᖅᑭᑎᑦᑎᕙᓪᓕᐊᓂᒃᑯᑦ ᓄᑖᓂᒃ ᖃᓄᐃᓕᐅᕈᑎᒃᓴᓂᒃ.

“ᐊᒻᒪᓗ, ᐱᒻᒪᕆᐊᓗᒃ ᐱᕈᖅᐸᓪᓕᐊᑎᓪᓗᑕ ᐱᖁᑎᕗᑦᑕᐅᖅ ᐱᕈᖅᐸᓪᓕᐊᔭᕆᐊᖃᕐᒪᑕ ᑐᙵᕕᖃᕋᔪᒃᑲᑉᑕ ᓄᓇᓕᖕᓂᒃ ᐱᖁᑎᒋᔭᐅᔪᓂᒃ ᐃᑲᔫᑕᐅᔪᓐᓇᖁᑉᓗᒋᑦ ᖃᓄᐃᓕᐅᕈᑎᑦᑎᓂᕆᕙᒃᑕᒃᑯᑦ.”

ᑯᓱᒐᖅ ᐅᖃᖅᖢᓂ, ᑕᐃᒪᐃᒻᒪᑦ, ᑲᑎᒪᔩᑦ ᐅᔾᔨᕈᓱᒃᓯᒪᖕᒪᑕ ᐱᖁᑎᑖᖅᑐᕈᒪᓂᕐᒧᑦ ᐱᕈᒃᑲᓐᓂᕈᑎᒃᓴᒃᑯᑦ, ᑕᐃᒪᐃᑦᑐᒥᒃ ᑎᑎᕋᕐᕕᖃᓕᖅᑎᓪᓗᒋᑦ ᐃᓂᖃᓕᖅᑎᓪᓗᒋᓪᓗ ᐃᓕᑕᖅᓯᓂᒃᑯᑦ ᓇᖕᒥᓂᖁᑎᒋᓕᕐᒪᒍ ᓯᕗᓂᒃᓴᒧᑦ ᐊᑐᕐᓂᐊᖅᑐᒃᑯᑦ ᖃᓄᖅᑑᕈᑎᒃᓴᓂᒃ ᐃᑲᔫᑎᒃᓴᓂᒃ ᓴᖅᑭᑎᑦᑎᕙᓪᓕᐊᖏᓐᓇᕈᓐᓇᖁᑉᓗᒋᑦ.

ᐅᖃᖅᖢᓂ ᐃᖢᐊᖏᓕᐅᕈᑕᐅᔪᖅ ᐊᔾᔨᐅᙱᑦᑑᙱᒻᒪᑦ ᐃᓕᑕᖅᓯᓂᒃᑯᓐᓄᑦ, ᓱᓇᓂᒃ ᐊᑐᕆᐊᓕᖕᓂᒃ ᐊᒥᒐᖅᓯᖃᑦᑕᕐᓂᖅ ᐃᖢᐊᖏᓕᐅᕈᑕᐅᒐᔪᖕᒪᑦ ᓄᓇᕗᓗᒃᑖᒥ.

“ᑮᓇᐅᔾᔭᒃᓴᖅᑎᐅᙱᓐᓇᑉᑕ ᑎᒥᖁᑎᒋᔭᐅᑉᓗᑕ ᐱᓕᕆᓇᓱᑦᑎᐊᖅᖢᑕᓗ ᐊᔪᙱᓐᓂᓗᒃᑖᒃᑯᑦ ᑭᓯᐊᓂ, ᐅᖃᖅᑲᐅᒐᒪᑎᑐᑦ, ᐊᑐᐃᓐᓇᐅᔪᐃᓐᓇᕐᓂᒃ ᐊᑐᕈᓐᓇᖅᓯᖃᑦᑕᕋᑉᑕ ᐊᓯᖏᓐᓂᒃ ᓄᓇᓕᖕᓂᒃ.

“ᓴᖅᑭᑎᑦᑎᑎᓪᓗᑕ ᑎᑎᕋᕐᕕᒃᑖᓵᑉᑎᓐᓂᒃ ᐱᒻᒪᕆᐊᓗᒃᑯᑦ ᐱᓕᕆᐊᕆᔪᒪᓚᐅᖅᑕᕋᓗᐊᖅᐳᑦ ᑭᓯᐊᓂ ᓄᕙᒡᔪᐊᕐᓂᖅ ᑕᐃᒪᐅᑎᓪᓗᒍ, ᐅᖓᓯᒃᓯᒋᐊᖅᑕᐅᙱᓐᓇᕆᐊᖃᓚᐅᕐᒪᑦ ᐊᒻᒪᓗ ᓄᖅᑲᖅᑎᑉᐸᒃᖢᑎᒍᑦ ᑭᓯᐊᓂ ᐃᓱᒪᓕᐅᑐᐃᓐᓇᓕᖅᖢᑕ ᑎᑎᕋᕐᕕᑉᑕ ᑕᐃᒎᓯᖓ ᑎᑎᕋᖅᓯᒪᔪᖅ ᐃᓕᔪᒪᓕᕐᓂᑉᑎᓐᓄᑦ ᑎᑎᕋᑉᕕᐅᑉ ᓴᖓᓄᑦ ᖁᕕᐊᓲᑎᒋᓗᒍᓗ, ᑕᐃᒪᐃᒻᒪᑦ ᑲᔪᓯᑐᐃᓐᓇᓕᓚᐅᖅᑐᒍᑦ ᖃᓄᐃᓕᐅᖅᑎᑦᑎᕐᔪᐊᕐᓇᑕ.

“ᐊᐃᑦᑖᖑᓚᐅᖅᑑᒐᓗᐊᖅ ᖁᕕᐊᓱᖃᑎᖃᕈᒪᑦᑎᐊᓚᐅᕋᓗᐊᕋᑉᑕ ᓄᓇᓕᖕᒥ ᑭᓯᐊᓂ, ᓄᕙᒡᔪᐊᕐᓂᒃᑯᑦ ᒪᓕᒐᓕᐊᖑᓯᒪᔪᑦ ᑕᐃᒪᐅᑎᓪᓗᒋᑦ, ᓴᓇᔨᕗᑦ ᑲᑎᖦᖢᑎᒃ ᖁᕕᐊᓲᑎᖃᕈᓐᓇᑐᐃᓐᓇᓕᓚᐅᕐᒪᑕ.”

0303litz
0303litz.jpg Photo courtesy Jovette Kurok Ilitaqsiniq: Nunavut Literacy Council members, from left, Aliisa Autut, Kelly Lindell, Quluaq Pilakapsi, Adriana Kusugak, Panikuluk Kabluitok and Amy Aingidlik stand proudly in front of the council's new home named after Quluaq Pilakapsi on Rankin Inlet on Feb. 9, 2021.